ECIGABI C’OKUYIGA 39
Erhi Omuntu Ozigira Akaleka Yehova
‘Kanji kanji . . . Bakagimugayisa.’—ENNA. 78:40, Mashi Bible.
LWIMBO 102 ‘Musaidie Wale Wenye Kuwa Wazaifu’
EBI RHWAYIGA *
1. Gurhi rhuciyumva erhi omuntu rhuzigira akatengwa n’ecigamba?
KA HALI omuntu ozigira wantenzirwe n’ecigamba? Oko kunagayise bwenene! Mwali wirhu muguma ohamagalwa Hilda adesire ntya: “Erhi ibaniè afâ myaka 41 enyuma z’obuhya, namanya mpu ko kantu kabi bwenene kakampikira omu kalamo. * Cikone erhi mugala wani aleka ecigamba, aleka mukage n’abana bage, byaba bizibu bwenene kuli niè kulusha oku naciyumvagya erhi ibaniè afâ.”
Yehova anahugûkwe amalumwa omuntu akaba nago erhi omuzigirwa wage akaleka okuli (Olole ecifungo ca 2-3) *
2-3. Nk’oku biyerekinwe omu lwandiko lw’Ennanga 78:40, 41, gurhi Yehova aciyumva erhi abakozi bage bamuleka?
2 Orhanye gurhi Yehova aciyumvirhe kubi bwenene erhi bamalahika baguma na baguma b’omu mulala gwage bamuleka! (Yd. 6) Ocibigirhanya gurhi aciyumvagya kubi bwenene erhi aba Israheli, lubaga lwage luzigirwa, bamugomera kanji-kanji. (Osome Ennanga 78:40, 41.) Oyemere n’obwalagale oku Larha wirhu w’obuzigire w’omu mpingu naye anaciyumve kubi erhi omuntu ozigira akamuleka. Anahugûkwe oku ociyumva. Enyanya z’obwonjo bwage, anakuha oburhulirize n’oburhabale olagirirekwo.
3 Mw’eci cigabi, rhwaganirira gurhi rhwakajira lyo rhuhâbwa oburhabale bwa Yehova amango rhwamahikirwa n’akanga ka ntyo. Kandi rhwaganirira gurhi rhwakarhabala abandi omu cigamba amango bali balwisa amazibu ga ntyo. Cikone, rhurhang’iganirira entanya mbi rhushinganine rhuyake.
ORHACITUMUZAGYA
4. Gurhi babusi banji baciyumva erhi mugala wabo erhi mwali wabo aleka Yehova?
4 Erhi mugala wabo erhi mwali wabo aleka Yehova, kanji-kanji ababusi banakacidosa erhi hali okundi bakajijire lyo barhabala oyo mwana abêre omu okuli. Enyuma z’okutengwa kw’omugala, mwene wirhu muguma ohamagalwa Luke aderha ntya: “Nacitumuza. Nakalôrha ebilôrho bibi. Hali n’amango nakagilaka n’omurhima gwakanduma.” Elizabeth, mwali wirhu muguma naye wahikiragwa n’akanga kali nk’ako, akacitumuza ntya: “Ka hali akantu kabi najijire niè nka muzîre? Nakarhanya mpu nkaba ntahashaga nayigiriza mugala wani okuli.”
5. Ndi rhwakatumuza erhi muntu mulebe akaleka Yehova?
5 Rhushinganine rhukakengera oku Yehova ahîre ngasi muguma wirhu oluhûma lw’okucishoga. K’okuderha oku rhwanacishoga erhi rhwamurhumikira erhi nanga. Bana baguma na baguma barhahâbagwa olwiganyo lwinja n’ababusi babo lw’oku bakakolera Yehova, cikone bacishozire okukolera Yehova n’obwishwekerezi. Haligi n’abandi bana ababusi babo bajijire okwabo koshi lyo babalera nk’oku Amandiko ganadesire, cikone erhi bakula banaleke Yehova. Rhuyumvirhage oku ngasi muguma wirhu yene okwanine acishoge erhi akolera Yehova. (Yoz. 24:15) Co cirhumire, mwe babusi muli mwalaka bulya abana binyu balesire Yehova, muhagalike entanya z’okubona nk’ebyo byamuhikire gali magosa ginyu!
6. Gurhi omusole gwakaciyumva erhi omubusi wago akaleka Nnâmahanga?
6 Agandi mango, omubusi analeke okuli, ciru n’omulala gwage. (Enna. 27:10) Oko kunavune abana omurhima bwenene bulya bakagibona oku omubusi wabo ye bakalolerakw’olwiganyo. Mwali wirhu Esther, ishe atengagwa, adesire ntya: “Nakalaka kanji-kanji bulya nabona oku larha arhakagileka okuli bunyi-bunyi. Cikone alihizire okuleka Yehova loshi-loshi. Mba nzigire larha bwenene, co cirhumire erhi atengwa, nakarhanya kanji-kanji oku byakamuhikira omu kalamo. Ciru n’agandi mango nakayumva nyobohire bwenene.”
7. Gurhi Yehova aciyumva lugenda omusole omubusi wago atenzirwe?
7 Mwe misole, erhi akaba omubusi winyu atenzirwe, nirhu rhuli rhwaciyumva kubi akinyu! Muyemere n’obwalagale oku Yehova naye ahugûsirwe amalumwa ginyu. Amuzigire anashagalukire obwishwekerezi bwinyu, ciru na nirhu bene winyu na bali binyu rhumushagalukîre. Kandi, mukengere oku, arhali mwe mwarhumaga ababusi binyu bahiga okujira ntyo. Nk’oku rhwaderhaga embere, Yehova ahîre ngasi muguma wirhu oluhûma lw’okucishoga erhi amukolera erhi arhamukolere. Na ngasi Mukristu wacihânyire emwa Yehova n’okubatizibwa agwasirwe “okubarhula omuzigo gwage yene.”—Gl. 6:5, Mashi Bible.
8. Bici abantu b’omulala bishwekerezi bakajira amango bali balinda omuzigirwa wabo agalukire Yehova? (Olole ecisanduku “ Ogalukire Yehova.”)
8 Erhi omuntu ozigira akaleka Yehova, entanya z’okulangalira oku anacimugalukire ziri ntanya nyinja. Gurhigi wakajira omu mango ociri walinda agalukire Yehova? Wanacihangana okushibirira ehali yawe y’ekiroho. Erhi wakajira ntyo, wanayereka abandi bantu b’omulala olwiganyo lwinja, nkaba ciru n’oyo watenzirwe. Kandi wanaba n’emisi olagirireko ly’olwisa amalumwa g’ekandalala oli wayumva. Rhuganirirage bintu biguma na biguma wakajira.
BICI WAKAJIRA LY’OGENDEKERA WAZIBUHYA EHALI YAWE Y’EKIROHO?
9. Gurhi wakajira lyo Yehova akuha emisi? (Olole ecisanduku “ Amandiko Gakakurhuliriza Erhi Akaba Omuzigirwa Wawe Alesire Yehova.”)
9 Ogendekere waba n’eprograme nyinja y’ekiroho. Kuli kwa bulagirire ogendekere wacizibuhya kiroho n’okuzibuhya abandi bantu b’omu mulala gwawe. Gurhi wakajiramwo ntyo? Yehova anakuha emisi erhi wakagendekera wakulikira eprograme yawe y’okusoma Akanwa ka Nnâmahanga, okurhanya kw’ebi oli wasoma n’okukaja oku ntimanano. Joanna, ishe na mukulu wage balekaga okuli, adesire ntya: “Nanyumve oburhulirize erhi nsoma emyanzi okubiyerekire bantu baguma na baguma baganirirwe omu Bibliya, nka Abigaili, Esteri, Ayubu, Yusufu, na Yezu. Enyiganyo zabo zinayunjuze omurhima gwani n’obwenge bwani entanya nyinja zinyihya amalumwa gani. Na kandi, enyimbo zago-zabo zinampe omurhima bwenene.”
10. Nk’oku biyerekinwe omu lwandiko lw’Ennanga 32:6-8, gurhi rhwakajira amango rhuli rhwaciyumva rhugayire?
10 Obwire Yehova ngasi kantu kali kakuhangayisa. Erhi wakaciyumva ogayire bwenene, agendekere wamushenga, oyinginge Nnâmahanga wirhu w’obuzigire akurhabale obone ako kanga nk’oku ali akabona onamuhûne ‘akuyigirize n’okukulangula enjira wageramwo.’ (Osome Ennanga 32:6-8.) Kobinali, kwanaba kuzibu okubwira Yehova oku oli waciyumva. Cikone Yehova anahugûkwe bwinja amalumwa gawe g’emurhima. Aba akuzigire bwenene anakuyinginzire omuyigulire omurhima gwawe.—Lub. 34:6; Enna. 62:7, 8.
11. Nk’oku biyerekinwe omu Abahabraniya 12:11, bulya gurhi rhurhakwanini okuba n’akarhinda okubiyerekire obuhâne b’obuzigire bwa Yehova? (Olole ecisanduku “ Okutenga Omuntu Buba Buhâne bwa Yehova Buyerekine Obuzigire.”)
11 Olunge okuboko omuhigo gw’abagula. Okutenga omuntu guba mupango gwa Yehova. Obo buhâne b’obuzigire bunalerhere abantu boshi obunguke, ciru n’owajiraga ecaha. (Osome Abahabraniya 12:11.) Bantu baguma na baguma omu cigamba banaderha oku abagula barharhozire omuhigo mwinja omu kutenga muntu mulebe, cikone okengere oku kanji-kanji abo bantu barhaganirira ebintu bibi omuzigirwa wabo anajijire. Kobinali, rhurhahugûkwa ebintu byoshi byajijirwe. Co cirhumire, kuli kwinja rhukalangalira oku abagula batwaga olo lubanja bacihanganyire okukulikira amakanuni g’Amandiko n’okulutwa “okw’izino lya Nyamuzinda [Yehova, NWT].”—2 Nga. 19:6.
12. Bunguke buci bantu baguma na baguma bacibwinîre bulya balunzire okuboko omupango gwa Yehova lugenda obuhâne?
12 Erhi wakalunga okuboko omuhigo gw’abagula gw’okutenga omuzigirwa wawe, wanarhabala oyo muntu ahikire aha agalukira Yehova. Elizabeth, rhwaganiriraga embere, adesire ntya: “Okutwa olushangi loshi haguma na mugala wirhu mukulu kwali kuzibu bwenene. Cikone, erhi agalukira Yehova, yene aderha oku okumutenga gwali muhigo mwinja. Buzinda, avuga omunkwa okubona oku oko kutengwa kwamuyigirizize binji. Nahikira aha nashagalukira obuhâne bwa Yehova.” Iba Mark naye adesire ntya: “Buzinda, mugala wirhu ayish’imbwira oku, egarhi k’ebyarhumaga agalukira Yehova, kwali kubona oku rhwacihanganyire okujira ebi rhwalishinganine okujira. Nshagalusire bwenene okubona Yehova arhurhabire okumurhumikira.”
13. Bici byakakurhabala olwise entanya mbi z’ekandalala?
13 Okaganira n’abîra bakahugûkwa oku oli waciyumva. Okageza akasanzi haguma n’Abakristu bakuzire kiroho bakakurhabala ogendekere okuba n’entanya nyinja. (Mig. 12:25; 17:17) Joanna, rhwaganiriraga embere, adesire ntya: “Omu murhima gwani, nakagiciyumva ndi kahumba. Cikone, okuganira n’abîra bikubagirwa kwantabire ndembere.” Cikoki, gurhigi wakajira erhi wakabona oku bantu baguma na baguma b’omu cigamba bali baderha ebintu bibi byakarhuma wacibiciyumva kubi bwenene?
14. Bulya gurhi rhushinganine ‘rhukalemberana n’okubabalirana’?
14 Obe wakulembera bene winyu na bali binyu. Okuderha okuli, abantu boshi barhakakaderha ebyakusimisa. (Yk. 3:2) Rhweshi rhurhaba bimana, co cirhumire orhasomeragwa erhi bantu baguma na baguma bakabula ebi bakubwira kandi erhi bakubwire buzira kulonza ebyakarhuma waciyumva kubi. Okengere er’ihano ly’entumwa Paulo: “Mukalemberana munababalirane akaba hali owagayisize owabo.” (Kl. 3:13) Mwali wirhu muguma omuntu w’omulala gwage atengagwa adesire ntya: “Yehova antabire okubabalira bene wirhu bakagicihangana okuderha akantu kinja k’okumpa omurhima omu njira erhali nyimana.” Bici ecigamba cakajira lyo cirhabala abantu b’omulala gw’owatengagwa baciri bishwekerezi?
ECIGAMBA CANARHABALA
15. Gurhi rhwakarhabala abantu b’omulala omuzigirwa wabo azindig’itengwa?
15 Mukayegereza n’omwishingo abantu bishwekerezi b’omulala gw’omuntu wazindig’itengwa. Mwali wirhu muguma ohamagalwa Miriam akagiyumva ehy’oboba b’okuja oku ntimanano enyuma z’okutengwa kwa mushinja wage. Adesire ntya: “Nakagiyoboha enyanya z’ebi abantu baderha. Cikone, hali abîra binja bakagishangîra amalumwa gani buzira kuganirira ebintu bibi mushinja wani ajiraga. Kugerera abo bîra, ntacikagiciyumva nka niene ngayire.” Owundi mwali wirhu adesire ntya: “Enyuma z’okutengwa kwa mugala wani, abîra bazigirwa bay’ishirhurhuliriza. Baguma na baguma bakaderha n’obwalagale oku barhamanyiri eci baderha. Baguma balaka haguma na nani erhi kuntumira amaruba g’okumpa omurhima. Ebi bajijire byantabala bwenene!”
16. Gurhi ecigamba cakagendekera carhabala abantu b’omulala gw’owatenzirwe?
16 Ogendekere warhabala abantu baciri bishwekerezi b’omulala gw’omuntu watenzirwe. Kulusha agandi mango goshi, balagirire oku buzigire bwawe n’okuhâbwa omurhima. (Hb. 10:24, 25) Agandi mango, abantu b’omulala gw’owatenzirwe banabone oku bene wirhu na bali birhu baguma na baguma barhacibaganiza. N’oko kunarhume baciyumva nka nabo batenzirwe. Orhayemeraga oko kwahika! Emisole ababusi babo batenzirwe bo balagirire bwenene oku kuvugwa omunkwa n’okuhâbwa omurhima. Maria, iba atengagwa n’okuleka omulala, adesire ntya: “Bîra bani baguma na baguma bakayisha aha mwani n’okundekera ebiryo n’okuntabala okuyiga Ebibliya haguma n’abana bani. Bakayumva amalumwa gani n’okulaka haguma na nani. Bakampalira erhi abantu bakanderhire ebirhali by’okuli. Bampa omurhima bwenene!”—Rm. 12:13, 15.
Ecigamba canayerekana obuzigire omu kurhabala abantu b’omulala gw’owatenzirwe (Olole ecifungo ca 17) *
17. Gurhi abagula bakarhulirizamwo abantu b’omu mulala gw’owatenzirwe?
17 Mwe bagula, mukolese ngasi bulyo mwakaba nabo lyo muzibuhya abantu bishwekerezi b’omu mulala gw’owatenzirwe. Mugwerhe omukolo gwago-gwago gw’okurhuliriza bene wirhu na bali birhu bishwekerezi abazigirwa babo balesire Yehova. (1 Ts. 5:14) Mwanalonza ehisanzi hy’okujira ntyo embere n’enyuma z’entimanano. Mwanabalambagirira aha kâ n’okusalira haguma nabo. Mwanahubiri haguma nabo na ciru mwanabayegereza oku nterekêro yinyu y’omulala. Balungere b’ekiroho bashinganine bayereke ebibuzi bya Yehova biri omu burhe obwonjo, obuzigire, n’okubishibirira.—1 Ts. 2:7, 8.
OGENDEKERE WABA N’OBULANGALIRE N’OKUCIKUBAGIRA YEHOVA
18. Nk’oku biyerekinwe omu 2 Petro 3:9, bici Yehova aba alonzize okubiyerekire abalesire okumukolera?
18 Yehova “arhalonza hajire owahera, ci alonza boshi baciyunjuze.” (Osome 2 Petro 3:9.) Ciru omuntu akajira ecaha cizibu, obuzine bwage buciri bwa bulagirire omu masu ga Yehova. Orhanye okw’ibeyi linene Yehova alipire: ahâna Omugala muzigirwa ngombôlo enyanya z’abanya-byaha. Enyanya z’obuzigire bwage, Yehova analonze okurhabala abo bamulesire bamugalukire. Analangalire oku bajira ntyo, nk’oku olwiganyo Yezu aganiriraga lw’omwana mulalahi luyerekine. (Lk. 15:11-32) Bantu banji balesire okuli bagalukîre Ishe wabo w’obuzigire w’omu mpingu. N’ecigamba cabayegereza n’omwishingo. Elizabeth, rhwaganiriraga embere, ashagalusire erhi omugala agalukira Yehova. Omu kukengera ebyagezire, adesire ntya: “Nashagalukîre bwenene abampire omurhima ntahezagya obulangalire.”
19. Bulya gurhi rhwanagendekera rhwacikubagira Yehova?
19 Rhwanacikubagira Yehova ensiku zoshi. Nta mango akarhuha obulongozi bwakarhuhabula. Aba Larha muhanyi na wa bwonjo ozigira bwenene abantu boshi bamuzigira n’okumuharamya. Arhakakuleka ciru n’ehitya omu mango ogayire bwenene. (Hb. 13:5, 6) Mark, rhwaganiriraga embere, adesire ntya: “Yehova arhakarhuleka ciru n’ehitya. Arhaba kuli na nirhu amango rhuli omu mazibu.” Yehova agendekera okuha “obuhashe bunene . . . burhali bwirhu.” (2 Kr. 4:7, Mashi Bible) Wanagendekera waba mwishwekerezi n’okuba n’obulangalire, ciru n’amango omuntu ozigira amaleka Yehova.
LWIMBO 44 Sala ya Mutu wa Hali ya Chini
^ kip. 5 Rhunagaye bwenene erhi omuntu rhuzigira akaleka Yehova! Eci cigabi caganirira gurhi Nnâmahanga wirhu aciyumva erhi bihika ntyo. Caganirira ebi abantu b’omulala baciri bishwekerezi bakajira lyo banyihya oku malumwa gabo n’okugendekera babà n’obuyemere busêzire. Na kandi, caganirira gurhi ecigamba coshi cakarhuliriza n’okurhabala ogo mulala.
^ kip. 1 Mazino maguma na maguma gashanjirwe mw’eci cigabi.
