1. Amango rhurhacigwerhi misi minji nk’eyi rhwaligwerhe embere, muhigo guhi rhwakacihiriraho?

 AMANGO rhuli rhwashosihala, nkaba rhwanakayoboha mpu rhurhacibe ba bulagirire omu masu ga Yehova nk’oku byali embere. Kobinali, rhwanaba rhurhacigwerhi misi minji nk’eyi rhwaligwerhe embere, cikoki rhwanakolesa obwenge bwirhu n’obulenga rhukola rhugwerhe lyo rhurhabala emisole ekolese emisi yabo yoshi n’okuyemera emikolo mihyahya omu cigamba. Mugula muguma aderha ntya: “Erhi ntondera nayumva oku ntacigwerhi emisi erhi bushosi burhuma, nashagaluka okubona oku hali misole minji egwerhe obuhashe yakajira omukolo nakagijira.”

2. Bici rhwaganirira mw’eci cigabi?

² Omu cigabi c’embere, rhwaganirire obunguke abaciri misole bakaba nabo erhi bakakayegerera abakola bashosi. Mw’eci cigabi, rhwaganirira gurhi obwirhohye, okuba wa lugero, okuba wa kuvuga omunkwa n’okuba muhanyi kwakarhabala abakola bashosi bakole haguma n’abaciri misole, n’emigisho oko kwakalerhera ecigamba coshi.

3. Nk’oku biyerekinwe omu Abafilipi 2:3, 4, obwirhohye byo bici, na gurhi bwakarhabala Omukristu?

³ Abakola bashosi bashinganine babe birhohye erhi bakalonza barhabale emisole. Omuntu mwirhohye anakabona oku abandi bamulushire. (Osome Abafilipi 2:3, 4.) Abakola bashosi bayerekana obo borhere banahugûkwe oku hali njira nyinji ziyemerirwe n’Amandiko z’okuhikiriza mukolo mulebe. Muli oko, barhakasêza ngasi muntu oku ajire ebintu nk’oku bakagibijira embere. (Muh. 7:10) Ciru akaba bakola  bagwerhe bumanye bunji bakashangîra haguma n’emisole, banahikire aha bahugûkwa oku “ebiri byagera omw’igulu binahinduke” n’oku kwanaba kwa bulagirire bacikomereze okujira ebintu omu njira mpyahya.​—1 Kr. 7:31.

4. Gurhi abangalizi b’omuzunguko bayerekana entanya ziri nk’eza Bene-Levi?

⁴ Omushosi oli mwirhohye anahikire aha ahugûkwa oku obushosi bwanarhuma arhacihikirize ebintu binji akagijira embere. Rhuganirire olwiganyo lw’abangalizi b’omuzunguko. Erhi bakayeneza myaka 70, banahâbwe ogundi-gundi mukolo. Kwanaba kuzibu okuyemera eyo mpindûlo. Babà bashagalukire omukolo gwabo gw’okurhabala bene wirhu. Banacizigire ogo mukolo bwenene. Cikone, banahugûkwe oku kwanaba kwinja abaciri misole bajire ogo mukolo. Muli eyo njira, banayerekane entanya ziri nk’eza Bene-Levi b’omu Israheli ya mîra. Erhi bakayenezize myaka 50, bakagihûnwa baleke omukolo gwabo bakagijira omw’ihema ly’entimanano. Arhali ogo mukolo baligwerhe omw’ihema ly’entimanano go gwakagijira babe n’omwishingo. Bakagijira n’obushiru emikolo yabo yoshi n’okucihangana okurhabala emisole. (Mib. 8:25, 26) Ciru akaba abangalizi ba mîra, barhaciri balambagirira ebigamba ene, babà mugisho omu cigamba barhumirwemwo.

5. Bici rhuciyigirizize kugerera olwiganyo lwa Dan na Katie?

⁵ Rhuganirire olwiganyo lwa mwene wirhu  Dan, wali mwangalizi w’omuzunguko myaka 23. Erhi Dan ayeneza myaka 70, ye na mukage Katie, bajirwa bapainiya bapekee. Gurhi bali bajira lyo bashagalukira ogo mukolo gwabo muhyahya? Dan adesire oku ene agwerhe binji bya kujira kulusha embere! Ali ahikiriza emikolo yage y’omu cigamba, ali arhabala bene wirhu lyo bahikiriza ebihûnyirwe lyo babà barhabazi b’abagula, anali akomerêza abandi omu mukolo gw’okuhubiri omu vile n’omu prizo. Mwe bene wirhu na bali birhu mukola bashosi, mube muli omu mukolo gw’akasanzi koshi erhi nanga, mwanajira binji bwenene lyo murhabala abandi. Gurhi mwakajiramwo ntyo? Mucihangane okucikomerêza akanga kahyahya, mucihirireho emihigo mihyahya, munasegeze obwenge bwinyu kw’ebi mwakahasha okujira, ci arhali kw’ebi murhakahasha.

6. Bulya gurhi kuli kwa bulagirire okuba wa lugero? Ohâne olwiganyo.

⁶ Omuntu w’olugero anayemere oku hali ebintu arhakahasha. (Mig. 11:2) Olugero lwanarhabala omuntu arhalonzagya okujira bintu binji bwenene kulusha ebi akahasha. N’oko kwanarhuma agendekera aba n’obushagaluke n’okujira binji. Rhwanashushanya omuntu w’olugero n’omuntu oli watembegeza omutuga oku hirhondo. Nkaba byanahûna atembeze n’ebitesi bisungunu cikone anagendekera asôka kw’ehyo hirhôndo. Ko n’oko, omuntu w’olugero ayishi amango akwanine “alambagire n’ebitesi bisungunu” ly’agendekera aba n’obushiru n’okujira binji omu mukolo gwa Yehova.​—Fl. 4:5.

7. Gurhi Barzilayi ayerekinemwo oku ali wa lugero?

⁷ Rhuganirirage olwiganyo lwa Barzilayi, waligwerhe myaka 80 erhi Mwami Daudi amulalika oku aj’ilama aha bwami. Bulya Barzilayi ali wa lugero, alahira okuj’ilama aha bwami. Barzilayi alimanyire oku hali ebi arhakacihash’ijira enyanya z’emyaka yage. N’oko kwarhuma aderha oku omusole Kimuhamu abe yej’ilama eyo munda ahali hage. (2 Sam. 19:35-37) Aka Barzilayi, abakola bashosi banashagalukire okuha emisole oluhya lw’okujira omukolo gwa Yehova.

8. Gurhi Mwami Daudi ayerekinemwo oku ali wa lugero erhi Yehova alahira oku arhali ye wayubaka ehekalu?

⁸ Mwami Daudi naye arhulekire olwiganyo lwinja lw’okuba wa lugero. Alilonzize n’omurhima gwage goshi okuyubakira Yehova enyumpa. Cikone, erhi Yehova amubwira oku omusole Solomoni ye wajira ogo mukolo, Daudi ayemera ogo muhigo gwa Yehova analunga obo bubasi okuboko n’omurhima gwage goshi. (1 Nga. 17:4; 22:5) Daudi arhabonaga oku ye walishinganine bwenene okujira ogo mukolo mpu bulya Solomoni “aciri murho, na nta bwenge ecibona.” (1 Nga. 29:1) Daudi alimanyire oku, obo bubasi bwakahikirire kugerera emigisho ya Yehova, ci arhali kugerera emyaka erhi bumanye bw’abaliyimangire ogo mukolo. Aka Daudi, bene wirhu bakola bashosi banagendekere bakola omukolo gwa Yehova n’obushiru ciru n’amango omukolo balikomîre okujira omw’ikubuliro lya Yehova gwamashanje. Na kandi, banamanye oku Yehova agendekera okugisha emisole eri yajira emikolo bakagijira embere.

9. Gurhi mwene wirhu muguma w’omu Komite y’Etawi ayerekinemwo oku ali wa lugero?

⁹ Rhuganirire mwene wirhu Shigeo wayerekine olwiganyo lwinja lw’okuba n’olugero muli zino nsiku zirhu. Omu mwaka gwa 1976, erhi agwerhe myaka 30, aba muguma w’omu Komite y’Etawi. Omu mwaka gwa 2004, aba muratibu w’Ekomite y’Etawi. Buzinda bw’aho, abona oku arhacigwerhi misi minji n’oku arhakacihash’ihikiriza ogo mukolo. Asalira  enyanya z’oko anabona oku kwanaba kwinja bwenene mwene wirhu muguma ociri musole abe muratibu ahali hage. Ciru akaba Shigeo arhaciri muratibu, acigendekire alunga okuboko abandi bene wirhu ba mw’eyo Komite y’Etawi. Nk’oku rhwanabwine omu lwiganyo lwa Barzilayi, lwa Mwami Daudi, na mwene wirhu Shigeo, omuntu mwirhohye na wa lugero arhasegeza obwenge bwage oku bumanye bw’emisole, cikone anabusegeze oku misi yabo. Arhabalwisa luhali, cikone anababone nka babo banyakazi.​—Mig. 20:29.

10. Gurhi abakola bashosi babona emisole omu cigamba?

¹⁰ Abakola bashosi banabone emisole oku luli luhembo kurhenga emwa Yehova na muli oko, banamuvuge omunkwa. Bulya emisi yabo ekola eri yanyiha, abakola bashosi banashagaluke okubona oku, emisole ecigwerhe emisi eba mibidu enagwerhe emisi y’okuhikiriza omukolo gwa Yehova omu cigamba.

11. Gurhi olwandiko lwa Ruti 4:13-16 luyerekine obunguke abakola bashosi bakaba nabo erhi bakayemera n’obushagaluke oburhabale bw’emisole?

¹¹ Noemi oganirirwe omu Bibliya luli lwiganyo lwinja lw’omugikulu wayemeraga n’obushagaluke oburhabale bw’owaciri musole. Burhangiriza, Noemi ayinginga omwali-kazi wali mukana oku agaluke emwabo. Cikone, erhi Ruti ahiga oku arhamuleke, amulusa kuhika e Betlehemu, Noemi ayemera obwo burhabale. (Rut. 1:7, 8, 18) N’oko kwalerhera abo bakazi bombi omugisho! (Osome Ruti 4:13-16.) Obwirhohye bwanashumya abakola bashosi bayige olwiganyo lwa Noemi.

12. Gurhi Paulo ayerekinemwo oku ali wa kuvuga omunkwa?

¹² Entumwa Paulo yavuzire omunkwa oku burhabale ahabagwa. Kwa lwiganyo, avuga  Abakristu b’e Filipi omunkwa oku bintu bamurhumiraga. (Fl. 4:16) Avuga omunkwa oku burhabale Timoteyo amuhâga. (Fl. 2:19-22) Na kandi, Paulo avuga Nnâmahanga omunkwa enyanya z’abayish’igimuha omurhima amango ahêkagwa e Roma ly’ajishwekerwa yo. (Ebj. 28:15) Paulo ali mulume wa misi wakagilambagira ebilometre n’ebilometre ly’ajihubiri n’okuzibuhya ebigamba. Ciru akaba ntyo, bulya ali mwirhohye, ayemera oburhabale bwa bene wabo na bali wabo.

13. Gurhi abakola bashosi bakayerekana oku bavuzire omunkwa lugenga abaciri misole?

¹³ Mwe mukola bashosi, mwanayerekana oku muli ba kuvuga omunkwa lugenda emisole omu cigamba cinyu omu njira nyinji. Erhi bakalonza okukurhabala oku transporo, okuj’igula ebintu, erhi oku gandi malagirire g’omubiri, oyemere oburhabale bwabo n’omurhima goshi. Obone oburhabale bwa ntyo oku buli buzigire kurhenga emwa Yehova. Nkaba wanasomerwa n’obwira wakahikira aha wajira haguma nabo. Ensiku zoshi, ocihangane okurhabala bene winyu na bali binyu baciri misole bakule kiroho, onanakababwira kunganaci oshagalusire okubona bali bacihangana okujira mikolo minji omu cigamba. Na kandi, okacihiriraho akasanzi k’okubaganirira ebi wacibwinîre omu kalamo kawe. Erhi wakajira ntyo, wanayerekana oku ‘ovuzire [Yehova] omunkwa’ enyanya z’emisole akulwire omu cigamba.​—Kl. 3:15; Yn. 6:44; 1 Ts. 5:18.

14. Gurhi Mwami Daudi ayerekinemwo oku âli muhanyi?

¹⁴ Olwiganyo lwa Mwami Daudi lurhuyeresire obundi borhere bw’obulagirire abakola bashosi bashinganine okuyerekana; okuba muhanyi. Ahanyîre nsaranga nyinji na birugu binji bya ngulo ndarhi ly’alunga okuboko obubasi bw’ehekalu. (1 Nga. 22:11-16; 29:3, 4) Ajijire ntyo ciru akaba omugala Solomoni ye wakahabirwe irenge enyanya z’ogo mukolo. Erhi akaba rhurhacigwerhi emisi y’okurhabala omu mikolo y’obubasi, rhwanahâna ensaranga rhwakanabona lyo rhulunga okuboko eyo mikolo. Na kandi, rhwanarhabala abaciri misole bayunguke n’obumanye rhukola rhugwerhe enyanya z’emyaka minji rhwamageza omu mukolo gwa Yehova.

15. Ngalo zihi nyinja Paulo ashangîre haguma na Timoteyo?

¹⁵ Okubiyerekire okuba murhanyi, rhurhanye oku lwiganyo lw’entumwa Paulo. Ahûna Timoteyo oku acilunge naye omu mukolo gw’obumisionere, na Paulo ayigiriza ogo musole enjira zage z’okuhubiri n’okuyigiriza. (Ebj. 16:1-3) Oko kukomereza Paulo akomerezagya Timoteyo kwamurhabala naye abe muhubiri mwinja w’omwanzi gw’Obwami. (1 Kr. 4:17) Timoteyo naye akolesa ezo njira Paulo amuyigirizagya ly’akomereza abandi.

16. Bici byarhumire Shigeo akomereza abandi?

¹⁶ Ene, abakola bashosi barhayoboha mpu barhacibe ba bulagirire erhi bakakomereza emisole okujira omukolo bakagijira omu cigamba. Kwa lwiganyo, Shigeo, rhwaganiriraga embere, ajijire myaka minji ali akomereza bene wirhu b’omu Komite y’Etawi baciri misole. Ajijire ntyo ly’alunga okuboko omukolo gw’Obwami mw’eco cihugo ali akoleramwo. Erhi Shigeo aba arhacigwerhi obushashe bw’okuba muratibu, mwene wirhu muguma walikomerezibwe bwinja aba ye muratibu ahali hage. Shigeo akola agwerhe myaka 45 ali akola omu Komite y’Etawi anacigendekire ashangîra obumanye bwage haguma n’abaciri misole b’omu Komite y’Etawi. Bene wirhu  bali nka Shigeo guba mugisho oku bakozi ba Nnâmahanga!

17. Nk’oku biyerekinwe omu Luka 6:38, bici abashosi bakakaha abandi?

¹⁷ Mwe bene wirhu na bali birhu mukola bashosi, muli mwayerekana n’obwalagale oku okukolera Yehova n’obwishwekerezi ko kalamo kinja omuntu akaba nako. Kugerera olwiganyo lwinyu, muli mwayerekana n’obwalagale oku kuli kwinja kuli rhwe okuyiga amakanuni g’Ebibliya n’okugakolesa omu kalamo kirhu. Mumanyire gurhi ebintu byakagijirwa embere, cikone kandi munabone oku kuli kwa bulagirire okucikomereza empindûlo. Ninyu mwe bashosi mwazindig’ibatizibwa, mugwerhe binji mwakahâna; mwanakaganirira abandi omwishingo mugwerhe okubona mwamanyire Yehova omu bushosi bwinyu. Emisole yanashagalukira okuyumva ebi mwacibwinîre n’amasomo mwaciyigirizize. Erhi ‘mwakakahâna’ oku muhako gw’obumanye mukola mugwerhe, Yehova anamugisha bwenene.​—Osome Luka 6:38.

18. Gurhi abakola bashosi n’abaciri misole bakarhabalana?

¹⁸ Bene wirhu na bali birhu mukola bashosi, erhi mwakakayegerera emisole, mweshi mwanarhabalana. (Rm. 1:12) Ngasi muguma agwerhe akantu k’obulagirire owundi arhagwerhi. Abakola bashosi bagwerhe obwenge n’obumanye kulusha emisole. N’emisole nayo egwerhe emisi kulusha abashosi. Erhi emisole n’abakola bashosi bakakola haguma nka bîra, banalerhera Larha wirhu w’omu mpingu w’obuzigire irenge n’oko kunalerhere ecigamba coshi emigisho.