1. Gurhi abantu bishwekerezi bakahamagala Yehova?

 OMULALA gwa Yehova gw’empingu guhiziremwo Yezu Kristu, “Nfula omu biremwa byoshi,” n’ehitu hya bamalahika. (Kl. 1:15; Enna. 103:20) Amango Yezu âli hanw’igulu, ayerekine oku abantu bishwekerezi banahamagala Yehova Ishe wabo. Erhi aba ali aganiza abanafunzi bage, Yezu ahamagala Yehova “Larha na Sho.” (Yn. 20:17) N’erhi rhucihâna emwa Yehova n’okubatizibwa, rhunabe baguma b’omu mulala guzigirana gwa bene wirhu na bali birhu.​—Mk. 10:29, 30.

2. Bici rhwaganirira mw’eci cigabi?

² Bantu baguma na baguma banakabona oku kuli kuzibu okuhamagala Yehova Ishe w’obuzigire. Abandi barhayishi gurhi bakayeresa bene wabo na bali babo obuzigire. Mw’eci cigabi rhwabona gurhi Yezu arhurhabire okubona Yehova nka Larha w’obuzigire rhwakahash’iyegera. Na kandi rhwabona gurhi rhwakayigamwo Yehova lugenda oku ajirira bene wirhu na bali birhu.

3. Gurhi isala ly’olwiganyo lirhurhabala rhuyegere Yehova?

³ Yehova aba Larha w’obuzigire. Yezu alonzize rhukabona Yehova nk’oku omubona: nka mubusi wa lukogo na wa buzigire rhwakayegera, arhali nka muntu orhagwerhi buzigire ohâna amarhegeko gone. Ayerekine ntyo n’obwalagale mw’oku abwiraga abanafunzi bage bakasalira. Arhondera isala ly’olwiganyo n’ezi nderho: “Larha wirhu.” (Mt. 6:9, Mashi Bible) Yezu akarhubwizire oku rhukahamagala Yehova “Ogala Byoshi,” “Lulema,” erhi “Mwami w’ensiku n’amango”​—ago goshi gali mazino gage g’obukulu gakwanine ganayemerirwe n’Amandiko. (Murh. 49: 25; Iz. 40:28, NWT; 1 Tm. 1:17) Cikone akolesa oluderho “Larha.”

4. Gurhi rhumanyiremwo oku Yehova alonzize rhumuyegere?

⁴ K’onabone oku kuli kuzibu okubona Yehova nka Sho okuzigira? Bantu baguma na baguma banabone ntyo. Nkaba rhwanabona nka kuli kuzibu okuba n’omubusi w’obuzigire bulya omubusi wirhu arhali wa buzigire. Rhuhîrwe omurhima bwenene okumanya oku Yehova anahugûkwe bwinja oku rhuli rhwaciyumva! Alonzize okurhuyegera. Co cirhumire arhuhunyire ntya omu Kanwa kage: “Yegeri Nyamuzinda, naye ammuyegerera.” (Yk. 4:8) Yehova anarhuzigire, anarhubwizire oku ye Larha mwinja bwenene rhwakaba naye.

5. Nk’oku biyerekinwe omu Luka 10:22, gurhi Yezu akarhurhabala rhuyegere Yehova?

⁵ Yezu anarhurhabala rhuyegere Yehova. Yezu aba amanyire Yehova bwinja ananayerekane amorhere ga Yehova bwinja bwinja. Co carhumaga aderha ntya: “Ombwine erhi abwine na Larha.” (Yn. 14:9) Nka mukulu wirhu w’omu mulala, Yezu arhuyigirizize gurhi rhwakakenga n’okurhumikira Larha wirhu, gurhi rhwakayaka okumugayisa na gurhi rhwakajira lyo rhuyemerwa Naye. Cikone bwenene akalamo ka Yezu hanw’igulu ko kayerekine kunganaci Yehova aba wa kukogo na wa buzigire. (Osome Luka 10:22.) Rhushambalire nyiganyo nguma na nguma.

6. Ohâne enyiganyo ziyerekine gurhi Yehova ayumvirhize Yezu.

⁶ Yehova anayumvirhize abana bage. Rhuganirire gurhi Yehova ayumvirhizagya Enfula yage. Yehova ayumvirhize masala manji Omugala asaliraga amango ali hanw’igulu. (Lk. 5:16) Ayumvirhize amasala Yezu asaliraga amango akagirhola emihigo y’obulagirire, kwa lwiganyo amango acishogaga baganda bage 12. (Lk. 6:12, 13) Na kandi Yehova ayumvirhize isala Yezu asaliraga amango ali omu kanga kazibu. Embere bamugwarhe, Yezu ashenga Ishe bwenene lugenda ago marhangulo galikola gali hofi gamuhikire. Yehova ayumvirhiza isala lya Yezu na kandi amurhumira malahika ly’amuzibuhya.​—Lk. 22:41-44.

7. Gurhi rhuciyumvirhe omu kumanya oku Yehova anayumvirhize amasla girhu?

 ⁷ Ene, Yehova agendekire ayumvirhiza amasala g’abakozi bage, ananagashuze omu kasanzi kakwanine n’omu njira nyinja yakanahashikana. (Enna. 116:1, 2) Rhulole gurhi mwali wirhu muguma w’omu Inde acibwinîre ntyo. Akagilwisa akanga k’ociyumva kubi bwenene n’okuyumva oboba, anasalira Yehova bwenene enyanya z’ako kanga alimwo. Ayandisire ntya: “Omwanzi gwali omu programe y’e JW Télédiffusion y’Omwezi gwa 5, 2019 gwaliganirire gurhi omuntu akahagalika akanga k’okuciyumva kubi n’okuyumva oboba, n’ogo mwanzi gwantabala bwenene. Lyali ishuzo oku masala gani.”

8. Omu njira zihi Yehova ayeresiremwo Yezu obuzigire?

⁸ Yehova aba arhuzigire n’okurhushibirira, nk’oku ayeresagya Yezu obuzigire n’okumushibirira amango arhimananaga n’amazibu omu mukoko gwage hanw’igulu. (Yn. 5:20) Akagihikiriza amalagirire goshi ga Yezu: ag’ekiroho, ag’ekandalala n’ag’omubiri. Kandi Yehova ali mubidu okubwira Omugala oku amuzigire ananamuyemire. (Mt. 3:16, 17) Nta mango Yezu aciyumvirhe kahumba bulya alilangalire oku ensiku zoshi Ishe w’obuzigire ali haguma naye.​—Yn. 8:16.

9. Bici birhuyeresire oku Yehova anarhuzigire?

⁹ Aka Yezu, rhweshi rhwacibwinîre obuzigire bwa Yehova omu njira nyinji. Orhanye k’oku: Yehova arhukulwire emwage ananarhuhîre omulala gw’ekiroho gubamw’obuzigire n’ecinyabuguma gurhurhabala rhube n’omwishingo n’okuhikiriza amalagirire girhu g’ekandalala. (Yn. 6:44) Kandi Yehova ali arhuha ebiryo by’ekiroho rhulagirireko lyo rhuba n’obuyemere busêzire. Ananarhurhabale okuhikiriza amalagirire girhu ga ngasi lusiku g’omubiri. (Mt. 6:31, 32) Erhi rhwakakarhanya oku buzigire bwa Yehova kuli rhwe, obuzigire bwirhu kuli ye bunasêra.

10. Bici rhwakaciyigiriza kugerera oku Yehova ajirira bene wirhu na bali birhu?

¹⁰ Yehova anazigire bene wirhu na bali birhu. Cikone, ensiku zoshi kurhaba kulembu okuzigira bene wirhu na bali birhu b’omu mulala gw’ekiroho n’okubayeresa obuzigire. Kobinali, rhurhenzire omu nkomedu ziri lubero, rhwanakuliraga ahantu hali lubero. Kandi, rhweshi rhunajire amagosa gakagayisa abandi n’okubavuna omurhima. Ciru akaba ntyo, rhwanacihangana lyo rhuzibuhya obuzigire b’omulala gwirhu gw’ekiroho. Gurhi rhwakajiramwo ntyo? Omu kuyeresa bene wirhu na bali birhu obuzigire nk’oku Yehova ajira. (Ef. 5:1, 2; 1 Yn. 4:19) Rhulolage ebi rhwakaciyigiriza kugerera olwiganyo lwa Yehova.

11. Gurhi Yezu ayerekinemwo “olukogo” lwa Yehova?

¹¹ Yehova aba wa ‘lukogo.’ (Lk. 1:78) Omuntu w’olukogo anaciyumve kubi erhi abona abantu bali balibuka; ananalonze gurhi akabarhabala n’okubarhuliriza. Oku Yezu akagijirira abantu kwakagiyerekana oku Yehova anabashibirire. (Yn. 5:19) Mango maguma, erhi Yezu abona ehitu hy’abantu, “abayumviza obwonjo, bulya bali bangongôle kw’oluhu n’okukwebwa eyi n’eyi nka bibuzi birhagwerhi mungere.” (Mt. 9:36, NWT) Yezu arhayumvizagya abantu obwonjo kone, cikone ajira akandi kantu ly’abarhabala. Afumya abalwala anarhuliriza abali ‘bababire n’okuzidohirwa.’​—Mt. 11:28-30; 14:14.

12. Ohâne olwiganyo luyerekine gurhi rhwakayereka abandi olukogo.

¹² Lyo rhuyereka bene wirhu na bali birhu olukogo, rhushinganine rhumanye amazibu bagwerhe. Kwa lwiganyo, mwali wirhu mulebe anaba alwazire endwala nzibu bwenene. Arhaciduduma enyanya z’eyo ndwala, cikoki nkaba anashagalukira okuhâbwa oburhabale. Gurhi ali ajira ly’ahikiriza amalagirire g’omubiri  g’omulala gwage? K’anashagaluka erhi rhwakamurhabala okudeka ebiryo erhi okucêsa enyumpa? Nkaba mwene wirhu mulebe ahêzize akazi. Ka kurhakaba kwinja okumuha olusaranga lwakamurhabala kuhika amango abona akandi kazi, buzira kucimanyisa oku we wamuhaga lo?

13-14. Gurhi rhwakayiga Yehova omu kuba bahanyi?

¹³ Yehova aba muhanyi. (Mt. 5:45) Rhurhashinganini rhukalinda kuhika bene wirhu na bali birhu barhuhûne oburhabale lyo rhubayereka oku rhuli ba lukogo. Aka Yehova, rhwanajira kantu kalebe embere barhuhûne oburhabale. Izuba lyage linarhumolekere rhweshi ngasi lusiku buzira kumuhûna lyo! N’ecidûrhu c’izuba cinarhabale abantu boshi, ciru na bala barhavuga Yehova omunkwa. K’orhayemiri oku Yehova anarhuyerese obuzigire omu kuhikiriza amalagirire girhu? Rhunazigire Yehova bwenene omu kubona oku aba wa lukogo bwenene na muhanyi!

¹⁴ Bene wirhu na bali birhu banji banayige Yehova omu kucihangana okuba bahanyi. Kwa lwiganyo, omu mwaka gwa 2013, empusi ehamagalwa Typhon Haiyan yashereza bintu binji bwenene omu Philippines. Bene wirhu na bali birhu banji bwenene bahêza enyumpa zabo n’ebirugu byabo. Cikoki, omulala gwabo gw’ekiroho gw’omw’igulu lyoshi gwajira okwabo koshi lyo gubarhumira oburhabale. Banji bahâna oburhabale bw’ensaranga n’abandi barhabala omu mukolo gw’okuyubaka, na muli ntyo bakubûla erhi kuyubaka buhyahya hofi nyumpa 750 omu myezi milebe! Omu mango g’obulwala bw’e Korona, Abahamirizi ba Yehova bacihangana bwenene okurhabala bene wabo na bali babo. Amango rhuli babidu okurhabala ab’omu mulala gwirhu gw’ekiroho, rhunabayerese oku rhubazigire.

15-16. Nk’oku biyerekinwe omu Luka 6:36, omu njira nci y’obulagirire rhwakayigamwo Larha wirhu w’omu mpingu?

¹⁵ Yehova aba wa bwonjo na wa kubabalira. (Osome Luka 6:36.) Rhunacibonere ngasi lusiku obwonjo bwa Larha wirhu. (Enna. 103:10-14) Abaganda ba Yezu barhali bimana; cikoki akagibayeresa obwonjo n’okubababalira. Ciru ahâna obuzine bwage buzira kusêzibwa lyo rhubabalirwa ebyaha birhu. (1 Yn. 2:1, 2)  K’oko kurhakarhushumya rhuyegere Yehova na Yezu bulya babà ba bwonjo na ba kubabalira?

¹⁶ Obuzigire buba omu mulala gwirhu gw’ekiroho bunasêre erhi ‘rhwakakababalirana rhwêne na nnene.’ (Ef. 4:32) Kobinali, hali amango kurhaba kulembu okubabalira abandi, co cirhumire rhushinganine rhucihangane okujira ntyo. Mwali wirhu muguma abwine oku ecigabi c’Ilabiro ly’Akalalizi calidesire “Tuwe Tayari Kusameheana” camurhabire akajira ntyo. * Ayandisire ntya: “Okuyiga eco cigabi kwantabire mbe n’entanya nyinja lugenda okubabalira abandi. Eco cigabi cahugwîre oku okuba mubidu okubabalira abandi kurhali kuyemera olugenzi lwabo lubi erhi kuderha oku lurharhumire waciyumva kubi. Cikone okubabalira kuli kuleka okubika akarhinda enyanya z’ebyo bakujirire n’okugendekera waba n’omurhûla.” Erhi rhubabalira bene wirhu na bali birhu, rhunayerekane oku rhubazigire n’oku rhuli rhwayiga Larha wirhu, Yehova.

17. Nk’oku biyerekinwe omu Mateyo 5:16, gurhi rhwakakuzamwo Larha wirhu w’omu mpingu?

¹⁷ Luli lukengwa bwenene okuba baguma b’omu mulala gw’obuzigire gwa bene wirhu na bali birhu b’omw’igulu lyoshi. Rhuba rhulonzize bantu banji bwenene nk’oku byakanahashikana bacilunge haguma na nirhu omu kuharamya Nnâmahanga wirhu. Co cirhumire, rhushinganine rhube masu lyo rhurhagijira akantu koshi-koshi kakarhuma rhwaheza irenge ly’olubaga lwa Nnâmahanga erhi lya Larha wirhu w’omu mpingu. Rhunacihangane okuba n’olugenzi lwakashumya abantu bayemere omwanzi mwinja.​—Osome Mateyo 5:16.

18. Bici byakarhurhabala rhuhâne obuhamirizi buzira boba?

¹⁸ Bantu baguma na baguma banarhugayaguza erhi ciru kurhuhagalika bulya rhuli rhwarhumikira Larha wirhu w’omu mpingu. Gurhigi rhwakajira erhi rhwakayumva ehy’oboba amango rhuli rhwaganirira abandi okubiyerekire obuyemere bwirhu? Rhwanalangalira oku Yehova n’Omugala barhurhabala. Yezu abwizire abanafunzi bage oku barhashinganini bakayoboha  enyanya z’ebi baderha na gurhi babiderha. Bulya gurhi? Yezu ahugûla ntya: “Ebi mwaderha mwabihabwe muli ako kasanzi, bulya arhali mwe mwaderha, ci iroho litagatifu lya Sho lyo lyaderha kugerera mwe.”​—Mt. 10:19, 20, NWT.

19. Ohâne olwiganyo lw’omuntu wahânaga obuhamirizi n’oburhwali.

¹⁹ Rhuganirire olwiganyo lwa Robert. Erhi aciri mwanafunzi w’Ebibliya muhyahya arhanaliciba na bumanye bunji bw’Ebibliya, ahamagalwa oku aj’isamba oku tribinali y’abasoda omu Afrique du Sud. Abahugûlira oku arhalonzizi okuja omu by’epolitike bulya aba azigire bene wabo na bali babo. Alizigire enafasi yage omu mulala gwirhu gw’ekiroho! Abatwi b’emanja bamudosa ho n’aho ntya: “Bene winyu bo bandi?” Robert arhalicirheganyize kw’er’idoso, cikone ho n’aho akengêra olwandiko lw’olo lusiku. Olo lwandiko ali Mateyo 12:50 ludesire ntya: “Ngasi yeshi ojira oku Larha oli omu mpingu alonza, ye mwene wirhu, ye na mwali wirhu, ye na nyama.” Ciru akaba Robert aciri mwanafunzi muhyahya w’Ebibliya, iroho litagatifu lya Yehova lyamurhabala okushuza kw’er’idoso n’oku gandi madoso manji arhalicirheganyizeko. Yehova acidinira Robert bwenene! Na Yehova anacidinire rhwe erhi rhumulangalira lyo rhuhâna obuhamirizi n’oburhwali omu kanga kazibu.

20. Bici rhushinganine rhuhige okujira? (Yn. 17:11, 15)

²⁰ Rhugendekere rhwashagalukira omugisho rhugwerhe gw’okuba baguma b’omu mulala gw’ekiroho gw’obuzigire. Rhugwerhe Larha mwinja bwenene na bene wirhu na bali birhu banji. Rhushinganine rhuvuge omunkwa bwenene enyanya z’oko. Shetani n’abaganda bage babi banajire okwabo koshi lyo barhujira rhube n’akarhinda lugenda obuzigire Larha wirhu w’omu mpingu arhujirako bananajire okwabo koshi lyo barhusheregeza ecinyabuguma cirhu. Cikone, Yezu arhushengire emw’Ishe, ahûna Ishe oku arhulange ly’omulala gwirhu gugendekera gwaba n’ecinyabuguma. (Osome Yowane 17:11, 15.) Yehova ali ashuza kw’er’isala. Aka Yezu, rhurhashinganini rhube n’akarhinda ciru n’ehitya oku Larha wirhu w’omu mpingu arharhuzigira n’okurhurhabala. Rhweshi rhuhige okugendekera rhwayegera ab’omu mulala gwirhu gw’ekiroho.