1-2. (a) Gurhi rhwakaciyumva erhi rhwakarhanya bwenene oku kalamo ka Yezu n’omukolo gwage? (b) Bici rhwaganirira mw’eci cigabi?

 ERHI rhufîrwa n’omuzigirwa wirhu, rhunamudule bwenene! Oku murhondero, nkaba rhwanayumva amalumwa manji erhi rhurhanya oku nsiku nzinda z’akalamo kage, bwenene erhi akaba oyo muzigirwa wirhu alibusire bwenene embere afê. Cikone, erhi hagera kasanzi, nkaba rhwanarhondera okuyumva omwishingo erhi rhwakarhanya kuli kantu kalebe arhuyigirizize erhi kantu kalebe aderhaga erhi kujira ly’arhuha omurhima erhi kurhujira rhumwemwerhwe.

² Ko n’oko, rhunagaye erhi rhusoma lugenda amalibuko n’olufû lwa Yezu. Omu migobe y’embere n’enyuma z’olusiku lw’Okukengera olufû lwa Yezu, rhunacihe akasanzi lyo rhurhanya bwenene lugenda kunganaci enterekêro y’engombôlo eba ya bulagirire bwenene kuli rhwe. (1 Kr. 11:24, 25) Cikone, rhunabe n’omwishingo munji erhi rhurhanya bwenene oku bintu byoshi Yezu adesire n’okujira amango ali hanw’igulu. Kandi rhunahabwe omurhima erhi rhurhanya kw’ebi Yezu ali ajira ene na kw’ebi arhujirira omu mango gayisha. Okurhanya bwenene kw’ebyo bintu n’oku buzigire bwage kuli rhwe kwanarhushumya rhuyerekane oku rhuvuzire omunkwa omu njira nyinji, nk’oku rhwabona mw’eci cigabi.

3. Bulya gurhi rhuvuzire omunkwa lugenda engombôlo?

³ Rhunabe bakuvuga omunkwa erhi rhurhanya bwenene oku  kalamo ka Yezu n’olufû lwage. Omu mango goshi g’omukolo gwage hanw’igulu, Yezu ayigirizize abantu okubiyerekire emigisho Obwami bwa Nnâmahanga bwayish’ilerha. Rhunashagalukire bwenene ezo nyigirizo lugenda Obwami bwa Nnâmahanga. Rhunavuge omunkwa lugenda engombôlo bulya enarhuhashise okuba n’obwîra bwa hofi-hofi haguma na Yehova na Yezu. Abantu bayerekana obuyemere muli Yezu bagwerhe n’obulangalire bw’okulama ensiku n’amango n’okucib’ibona abazigirwa babo bafîre. (Yn. 5:28, 29; Rm. 6:23) Nta kantu koshi-koshi rhwajijire lyo rhushinganana okuhabwa eyo migisho; na ntaco rhwakalyula Yehova na Yezu kw’ebi barhujirire. (Rm. 5:8, 20, 21) Cikone rhwanabayeresa oku rhuvuzire omunkwa bwenene. Gurhi rhwakajiramwo ntyo?

4. Gurhi Mariya Magadalena ayerekinemwo oku avuzire omunkwa kw’ebi Yezu amujirire? (Olole enfoto.)

⁴ Rhuganirire olwiganyo lwa mukazi muguma Muyahudi ohamagalwa Mariya Magadalena. Akag’ilibuzibwa bwenene, bulya aliko bazimu nda. Agwasirwe abe akag’iciyumva oku ntaye wakamurhabala. Orhanye kunganaci avuzire omunkwa erhi Yezu amukûlakw’abo bazimu! Okuba wakuvuga omunkwa kwamushumya aba mwanafunzi wa Yezu n’okukolesa akasanzi kage, emisi yage, n’ebirugu byage ly’alunga Yezu okuboko omu mukolo gw’amahubiri. (Lk. 8:1-3) Ciru akaba Mariya avuzire omunkwa bwenene kw’ebi Yezu amujiriraga, nkaba arhal’ihugûsirwe oku Yezu amujirira binji bwenene enyuma z’aho. Akahânyire obuzine bwage erhi bene bantu barhuma, lyo “ngasi yeshi wamuyemera” aba n’obuzine bw’ensiku n’amango. (Yn. 3:16) Ciru akaba ntyo, Mariya ayerekine oku avuzire Yezu omunkwa omu kubera mwishwekerezi kuli ye. Amango Yezu akag’ilibuzibwa oku murhi gw’amalibuko, Mariya al’iyimanzire eburhambi bwage, bulya al’ishibirire Yezu anal’ilonzize okurhuliriza abandi baliho. (Yn. 19:25) Enyuma z’okufâ kwa Yezu, Mariya n’abandi bakazi babirhi badwirhe amavurha garhenga omu mirhi y’ehisununu hinja lyo bagashiga oku mubiri gwa Yezu lyo bagurheganya oku mazishi.  (Mk. 16:1, 2) Mariya ahembirwe enyanya z’obwishwekerezi bwage. Abire n’omwishingo omu kurhimanana na Yezu enyuma z’okufûka kwage anaganira naye; olo lwali lukengwa banafunzi banji barhabaga nalo.​—Yn. 20:11-18.

5. Gurhi rhwakayerekanamo oku rhuvuzire omunkwa oku bintu byoshi Yehova na Yezu barhujirire?

⁵ Na nirhu rhwanayerekana oku rhuvuzire omunkwa oku bintu byoshi Yehova na Yezu barhujirire omu kukolesa akasanzi kirhu, emisi yirhu, n’omu kuhâna oburhabale bw’ensaranga lyo rhugendekeza omukolo gw’Obwami. Kwa lwiganyo, rhwanacihâna lyo rhurhabala oku mukolo gw’okuyubaka n’okushibirira enyumpa rhukolesa omu nterekêro ecîre.

6. Bulya gurhi rwakaderha oku engombôlo eba ngalo kuli ngasi muguma wirhu?

⁶ Erhi rhurhanya kunganaci Yehova na Yezu baba barhuzigire, oko kunarhushumye nirhu rhubazigire. (1 Yn. 4:10, 19) Rhunabazigire ciru kulusha erhi rhuhugûkwa oku Yezu afîrire ngasi muguma wirhu. Entumwa Paolo ali yemire ntyo, anayerekana oku al’ivuzire omunkwa enyanya z’okwo erhi ayandikira Abagalasiya. Aderha ntya: ‘Mugala wa Nyamuzinda . . . anzigire anacihâna erhi nie ntuma.’ (Gl. 2:20) Kugerera engombôlo Yehova akukulwire emunda ali ly’oba mwîra wage. (Yn. 6:44) K’orhashagalusiri omu kuyumva oku Yehova abwine kantu kalebe kinja omu murhima gwawe n’oku alyuzire ibeyi linene bwenene ly’oba muguma w’omu bîra bage? K’oko kurhazibuhizi obuzigire bwawe kuli Yehova na Yezu? Co cirhumire gasi muguma wirhu ashinganine acidose ntya: ‘Bici obo buzigire bunshumize okujira?’

7. Nkʼoku rhubwine oku nfoto, gurhi rhweshi rhwakayerekanamwo obuzigire bwirhu kuli Yehova na Yezu? (2 Abakorinti 5:14, 15; 6:1, 2)

⁷ Obuzigire bwirhu kuli Nnâmahanga na Kristu bunarhushumye rhuzigire abandi. (Osome 2 Abakorinti 5:14, 15; 6:1, 2.) Njira nguma rhuyerekanamwo  obuzigire bwirhu kuli kuba n’obushirhu omu mukolo gw’amahubiri. Rhunaganize ngasi muntu rhurhimanine naye. Rhurhabolôla muntu yeshi-yeshi enyanya z’irangi lyage ly’omubiri, obûko bwage, abe mugale erhi mukenyi erhi abe asomire erhi arhasomaga. Muli eyo njira, rhunabe rhuli rhwahikiriza omuhigo gwa Yehova “ye lonzize mpu abantu boshi bacizibwe lyo banahasha okumanya okuli.”​—1 Tm. 2:4, Mashi Bible.

8. Gurhi rhwakayerekanamwo obuzigire bwirhu kuli bene wirhu na bali birhu?

⁸ Kandi rhunayerekane obuzigire bwirhu kuli Nnâmahanga na Kristu omu kuzigira bene wirhu na bali birhu. (1 Yn. 4:21) Rhunabashibirire bwenene n’okubarhabala omu mango bali bahikirwa n’amazibu. Rhunabarhulirize amango bafîrirwe n’omuzigirwa wabo, rhunabalambagirire amango balwazire, rhunanajire okwirhu koshi lyo rhubaha omurhima erhi akaba bavunisire omurhima. (2 Kr. 1:3-7; 1 Ts. 5:11, 14) Rhunasalire enyanya zabo bulya rhuba rhumanyire oku “omusengero gw’omushinganyanya washenga n’omurhima gwage gwoshi gujira buhashe bunji.”​—Yk. 5:16.

9. Yindi njira ehi rhwakayerekanamwo obuzigire kuli bene wirhu na bali birhu?

⁹ Kandi rhunayerekane obuzigire bwirhu kuli bene wirhu na bali birhu omu kucihangana bwenene lyo rhugendekeza omurhûla haguma nabo. Rhunajire okwirhu koshi lyo rhuyiga olwiganyo lwa Yehova lw’okubabalira. Erhi akaba Yehova abire mubidu okuleka Omugala afê erhi byaha birhu birhuma, ka nirhu rhurhashinganini rhube babidu okubabalira bene wirhu na bali birhu amango barhugokize? Rhurhalonzizi rhube ak’omuja mugalugalu Yezu aganiriraga omu lwiganyo lwage luguma. Ciru akaba nnawabo amubabalire omwenda munene bwenene, oyo muja ayabirwa okubabalira owabo muja omwenda musungunu bwenene. (Mt. 18:23-35) Erhi akaba hali okurhayumvikana egarhi kawe na muntu mulebe omu cigamba, ka wanacihangana obe murhanzi okujira omurhûla haguma naye embere olusiku lw’Okukengera olufû lwa Yezu luhike? (Mt. 5:23, 24) Okujira ntyo kwanayerekana oku ozigire bwenene Yehova na Yezu.

10-11. Gurhi abagula bakayerekanamwo obuzigire kuli Yehova na Yezu? (1 Petro 5:1, 2)

¹⁰ Gurhi abagula bakayerekanamwo oku bazigire Yehova na Yezu? Njira nguma y’obulagirire bakajiramwo ntyo kuli kushibirira amalagirire g’ebibuzi bya Yezu. (Osome 1 Petro 5:1, 2.) Yezu ayeresire entumwa Petro ntyo n’obwalagale. Enyuma z’okuhakana Yezu kasharhu koshi, Petro al’ilonzize bwenene ayerekane oku al’izigire Yezu. Enyuma z’okufûka kwage, Yezu adosa Petro ntya: “Simoni, mwene Yowane, k’onzigira?” Rhwanayemera n’obwalagale oku Petro akalonzize ajire okwage koshi ly’ayerekana oku al’izigire Nnawabo. Yezu abwira Petro ntya: “Yabula abana-buzi bani.” (Yn. 21:15-17) Omu kalamo kage koshi enyuma z’aho, Petro ashibirire bwenene ebibuzi bya Nnawabo, n’oko kwayerekana oku al’imuzigire.

¹¹ Mwe bagula, omu migobe y’embere n’enyuma z’olusiku lw’Okukengera olufû lwa Yezu, gurhi mwakayerekanamwo oku ebinwa Yezu abwiraga Petro biri bya bulagirire kuli mwe? Mwanayerekana oku muzigire Yehova na Yezu omu kujira ngasi mango omukolo gw’okulambagirira ebibuzi n’omu kujira okwinyu koshi lyo murhabala abalesire omukolo gw’amahubiri bagalukire Yehova. (Eze. 34:11, 12) Kandi mwanajira okwinyu koshi lyo muha omurhima abanafunzi b’Ebibliya n’abandi bantu basimisibwe bayishire oku ntimanano y’Okukengera olufû lwa Yezu. Rhulonzize baciyumve bayegerezibwe bwinja bulya rhulangalire oku nabo bayish’iba banafunzi ba Yezu.

12. Bulya gurhi okurhanya bwenene oku nderho Yezu aderhaga omu budufu bw’embere z’okufâ kwage kwanarhuha oburhwali? (Yowane 16:32, 33)

¹² Omu budufu bw’embere z’okufâ kwage, Yezu abwira abanafunzi bage ntya: “Mwabone amalumwa omu igulu. Ci muzibuhe! Nahimire igulu.” (Osome Yowane 16:32, 33.) Bici byarhabire Yezu ly’ayerekana oburhwali embere z’abashombanyi bage n’okubêra mwishwekerezi kuhika okufâ? Al’ilangalire Yehova. Bulya Yezu al’imanyire oku abanafunzi bage nabo bakarhimanine n’amarhangulo gali nk’ago, ashenga Yehova oku abalange. (Yn. 17:11) Bulya gurhi oko kurhuhire oburhwali? Bulya Yehova agwerhe misi minji kulusha abashombanyi birhu boshi. (1 Yn. 4:4) Anabone ngasi kantu. Rhuyemire n’obwalagale oku erhi rhwakalangalira Yehova, rhwanahima oboba bwirhu n’okuyerekana oburhwali.

13. Gurhi Yozefu w’e Arimatiya ayerekinemwo oburhwali?

¹³ Rhuganirire olwiganyo lwa Yozefu w’e Arimatiya. Ali muntu Abayahudi bakag’ikenga bwenene. Ali muguma w’omu Sanhedrini, erhi kagombe kakulu k’Abayahudi. Omu mango g’omukolo gwa Yezu hanw’igulu, Yozefu al’igwerhe agandi morhere minja cikone arhagwerhe burhwali. Yowane adesire oku “âli naye muganda wa Yezu, ci bufundafunda erhi kuyoboha Abayahudi kurhuma.” (Yn. 19:38) Ciru akaba Yozefu al’isimisibwe n’omwanzi gw’Obwami, akag’ifulika abandi oku agwerhe obuyemere muli Yezu. Buzira karhinda al’iyobohire oku aheza ecikono cinja al’igwerhe omu lubaga. Abe ntyo ko byali erhi nanga, Ebibliya erhubwizire oku enyuma z’okufâ kwa Yezu, Yozefu “aja emwa Bilato n’oburhwali amuhûna omubiri gwa Yezu.” (Mk. 15:42, 43) Yozefu arhac’ifulikaga oku ali mwanafunzi wa Yezu.

14. Gurhi wakajira erhi akaba onayobohe bene bantu?

¹⁴ Ka hali amango nawe wayobohire bene bantu aka Yozefu? Ebwa masomo erhi ebwa kazi, ka hali amango oyumva enshonyi z’okucimanyisa oku oba Muhamirizi wa Yehova? K’oli warhindira okuba muhubiri erhi okubatizibwa bulya oyobohire lugenda ebi abandi bakurhanyiza? Orhalekaga enshonyi n’oboba birhume waleka okujira akantu omanyire oku kali kinja. Oshenge Yehova kurhenga oku murhima. Omuhûne akuhe oburhwali bw’okujira obulonza bwage. Okubona gurhi Yehova ashuzize oku masala gawe, kwanakurhabala obe n’emisi minji n’oburhwali bunji.​—Iz. 41:10, 13.

15. Enyuma za Yezu okubonekera abanafunzi bage, bici omwishingo bagwerhe gwabashumize bajire? (Luka 24:52, 53)

¹⁵ Abanafunzi ba Yezu bagayire bwenene erhi  afâ. Ocibone oli omu kanga balimwo. Barhahezagya kone omwîra wabo bal’izigire cikone kandi bakag’iciyumva bahezize n’obulangalire bwabo. (Lk. 24:17-21) Cikone, erhi Yezu ababonekera acihâ akasanzi k’okubarhabala bahugûkwe gurhi ahikirizizemwo obulebi bw’Ebibliya. Kandi abahâ omukolo gw’obulagirire gw’okujira. (Lk. 24:26, 27, 45-48) Erhi Yezu agaluka empingu nsiku 40 enyuma z’aho, abanafunzi bage barhac’ibabalaga cikone baba na mwishingo munji. Okumanya oku Nnawabo azîne n’oku ali mubidu okubarhabala bahikirize omukolo muhyahya abahaga kwarhuma baba n’omwishingo. Omwishingo gwabo gwabashumya bakuze Yehova burhahusa.​—Osome Luka 24:52, 53; Ebj. 5:42.

16. Gurhi rhwakayigamwo abanafunzi ba Yezu?

¹⁶ Gurhi rhwakayigamwo abanafunzi ba Yezu? Rhwanaba n’omwishingo omu kuharamya Yehova arhali omu migobe y’embere n’enyuma z’olusiku lw’Okukengera olufû lwa Yezu yone cikone omu mwaka goshi. Lyo rhuba n’omwishingo rhugwasirwe rhuhire Obwami bwa Nnâmahanga oku nafasi ntanzi omu kalamo kirhu. Kwa lwiganyo, banji bashanjire eprograme yabo y’akazi lyo bajira omukolo gw’amahubiri, lyo baja oku ntimanano, n’okujira enterekêro y’omulala ngasi mango. Abandi ciru bahizire okurhaba na bintu binji by’omubiri abandi babona oku biri bya bulagirire lyo bakolesibwa bwenene omu cigamba erhi lyo baj’ikolera ahali obulagirire bunji bw’abahubiri b’Obwami. Ciru akaba rhushinganine rhulembere lyo rhukolera Yehova burhahusa, alaganyize oku arhugisha bwenene erhi rhwakahira Obwami oku nafasi ntanzi omu kalamo kirhu.​—Mig. 10:22; Mt. 6:32, 33.

17. Bici ohizire okujira omu migobe y’embere n’enyuma z’olusiku lw’Okukengera olufû lwa Yezu mw’ogu mwaka? (Olole enfoto.)

¹⁷ Rhuli rhwalindirira okukengera olufû lwa Yezu Lwa kabirhi Nsiku 4, Mwezi gwa 4. Cikone, orhalindaga mpu olo lusiku luhike ly’orhanya bwenene oku kalamo ka Yezu, olufû lwage, n’oku buzigire ye na Yehova barhuyeresire. Orhanye bwenene kw’ebyo bintu kanji bwenene nk’oku binahashikine omu migobe y’embere n’enyuma z’olusiku lw’Okukengera olufû lwa Yezu. Kwa lwiganyo, ocihirireho akasanzi k’okusoma n’okurhanya bwenene oku bintu byajirikanaga biyerekinwe omu karte kadesire: “Juma la Mwisho la Maisha ya Yesu Katika Dunia” omu Nyongeza B12-A, “Juma la Mwisho la Maisha ya Yesu Katika Dunia” omu Nyongeza B12-B y’Ebibliya Tafsiri ya Ulimwengu Mupya. Amango oli wajira ntyo, olonze amandiko g’Ebibliya gakarhuma wavuga omunkwa bwenene n’okuyushula obuzigire bwawe, oburhwali bwawe, n’omwishingo gwawe. Buzinda olonze njira ndebe wakayerekanamwo oku ovuzire omunkwa kurhenga oku murhima. Wanayemera n’obwalagale oku Yezu ashagalukira ebi wajira byoshi ly’omukengera omu migobe y’embere n’enyuma z’olusiku lw’Okukengera olufû lwage.​—Maf. 2:19.