1. Bulya gurhi hali amango rhwakaciyumva rhuyobohire?

 NGASI muntu anayumve oboba mango malebe. Kobinali, ifunzo lirhu ly’Ebibliya lyarhukuzire omu buja bw’okuyoboha abafû, okuyoboha abazimu, n’okuyoboha ebyaba omu mango gayisha. Cikone rhuciri rhwalama omu mango galimwo “eby’okuyobohya,” nk’amavita, ebijiro by’okuvuna amarhegeko, n’endwala. (Lk. 21:11) Kandi rhwanayoboha bene bantu, kuhiramwo abarhegesi barhulibuza erhi ciru abantu b’omulala gwirhu bahagalika enterekêro y’okuli. Baguma na baguma banayobohe oku barhabe n’obuhashe bw’okulembera amazibu bali bageramwo ene erhi agabahikira omu mango gayisha.

2. Oganirire akanga kahikiraga Daudi e Gati.

² Hali amango Daudi aciyumvirhe ayobohire. Kwa lwiganyo, amango Mwami Saulu akag’imuhiva ly’amuniga, Daudi ahiga okuyakira omu lugo lw’Abafilistini lw’e Gati. Enyuma za kasanzi kasungunu, Akishi mwami w’e Gati amanya oku Daudi y’olya mulwi w’ivita w’emisi bayimbaga omu lwimbo oku ananizire “amakumi g’ebihumbi” by’Abafilistini. Daudi “ayoboha bwenene.” (1 Sam. 21:10-12, NWT) Ayoboha oku Akishi amujira kubi. Gurhi Daudi ahimiremwo oboba bwage?

3. Kushimbana n’Ennanga 56:1-3, 11, gurhi Daudi ahimiremwo oboba bwage?

³ Omu Olulanga lwa 56, Daudi ayerekinemwo oku akag’iciyumva amango ali e Gati. Olo lulanga luyerekine oboba Daudi agwerhe, cikone kandi luyerekine gurhi abuhimiremwo. Erhi Daudi aciyumva ayobohire, alangalira Yehova. (Osome Ennanga 56:1-3, 11.) Daudi arhal’ilangalire busha. Kugerera omugisho gwa Yehova, Daudi ajira ekomplo yago-yago yanagwarha: Acijira musirhe! Lero Akishi arhacilonzagya okumuniga, cikone alonza agende, na muli ntyo Daudi acira.—1 Sam. 21:13–22:1.

4. Gurhi rhwakazibuhyamwo obulangalire bwirhu muli Yehova? Ohâne olwiganyo.

 ⁴ Nirhu rhwanahima oboba omu kulangalira Yehova. Cikone gurhi rhwakazibuhyamwo obulangalire bwirhu muli Yehova, bwenene amango rhuyobohire? Rhuganirire olwiganyo. Erhi wakayumva oku ogwerhe endwala ndebe, oku murhondero wanayoboha. Ciru akaba ntyo, wanaciyumva orhulirire erhi wakalangalira doktere wawe. Nkaba anaba amanyikine bwenene oku anafumye abalwazire eyo ndwala. Nkaba anakuyumvirhiza bwinjinja, n’okukuyemeza n’obwalagale oku kobinali ahugûsirwe oku oli waciyumva. Kandi nkaba anakuyandikira obufumu bwarhabire abandi. Ko n’oko, rhwanazibuhya obulangalire bwirhu muli Yehova omu kurhanya kw’ebi amakajira, ebi ali ajira ene, n’ebi acirhujirira. Ntyo ko Daudi ajijire. Amango rhuli rhwaganirira nderho zage nguma na nguma zalongozibagwa n’iroho lya Nnâmahanga ziri omu Olulanga lwa 56, orhanye lugenda gurhi nawe wakazibuhyamwo obulangalire bwawe muli Yehova n’okuhima oboba bwawe.

BICI YEHOVA AMAKAJIRA?

5. Lyo Daudi ahima oboba bwage, bici akag’irhanyako bwenene? (Ennanga 56:12, 13)

⁵ Amango akalamo ka Daudi kali omu mazibu, asegeza obwenge bwage kw’ebi Yehova amakajira. (Osome Ennanga 56:12, 13.) Ntyo ko Daudi akag’ijira omu kalamo kage koshi. Kwa lwiganyo, hali amango akag’irhanya oku bulemi bwa Yehova, n’oko kwakamukengeza oku Yehova ajira misi minji bwenene n’oku aba azigire bene bantu bwenene. (Enna. 65:6-9) Kandi Daudi akag’irhanya kw’ebi Yehova ajirire abandi. (Enna. 31:19; 37:25, 26) Na kandi akag’irhanya bwenene kw’ebi Yehova amakamujirira ye nnene. Yehova arhabire Daudi n’okumulanga kurhenga eburho bwage. (Enna. 22:9, 10) Kobinali, okurhanya bwenene kw’ebyo bintu kwarhabire Daudi ly’azibuhya obulangalire bwage muli Yehova!

6. Amango rhuli rhwaciyumva rhuyobohire, bici byakarhurhabala lyo rhulangalira Yehova?

⁶ Erhi wakaciyumva oyobohire, okacidosa ntya: ‘Bici Yehova amakanjirira?’ Okarhanya kw’ebi alemire. Kwa lwiganyo, erhi  ‘rhulola’ gurhi Yehova ashibirira orhunyunyi n’amauwa n’obo birhalemagwa oku nshusho yage birhanajira obuhashe bw’okumuharamya, rhunazibuhye obulangalire bwirhu oku nirhu arhushibirira. (Mt. 6:25-32) Kandi orhanye kw’ebi Yehova ajirire abakozi bage. Nkaba wanayiga lugenda muntu mulebe oganirirwe omu Bibliya wayerekine obuyemere bwago-bwago, erhi wanasoma lugenda ebi mukozi mulebe wa Yehova wa muli gano mango acibwinire. a Na kandi, orhanye bwenene lugenda gurhi Yehova akushibiriremwo. Gurhi akukulwiremwo omu okuli? (Yn. 6:44) Gurhi ashuzizemwo amasala gawe? (1 Yn. 5:14) Gurhi oli wayungukamwo ngasi lusiku n’enterekêro y’Omugala muzigirwa?—Ef. 1:7; Hb. 4:14-16.

7. Gurhi ebyahikiraga omulebi Daniyeli byarhabiremwo Vanessa ly’ahima oboba bwage?

⁷ Vanessa, b mwali wirhu muguma w’omu cihugo c’e Haïti, ahikirwe n’akanga k’okuyobohya. Mulume muguma w’omu eneo yabo akamuhamagala n’okumurhumira amamesaje ngasi lusiku, ly’amuseza bajire obwîra bo naye. Vanessa alahira loshi-loshi. Cikone oyo mulume agendekera aba mukali bwenene ciru n’okumuyobohya oku amujira kubi. Vanessa adesire ntya: “Nayoboha bwenene.” Gurhi ahimiremwo oboba bwage? Arhôla mihigo milebe ly’acilanga. Mugula muguma amurhabala okumanyisa abarhegesi. Cikone kandi Vanessa asegeza obwenge bwage lugenda gurhi Yehova alanziremwo abakozi bage b’omu mango ga mîra. Vanessa adesire ntya: “Omulebi Daniyeli ye muntu murhangiriza narhanyizeko, akwebwa omu bulumba bw’entale zal’ishalisire bwenene ciru akaba arhal’igwerhe igosa lyoshi-lyoshi. Ciru akaba ntyo, Yehova amushibirira. Nahûna Yehova ashibirire ako kanga koshi. Enyuma z’okujira ntyo, ntaciyobohaga ciru n’ehitya.”—Dan. 6:12-22.

BICI YEHOVA ALI AJIRA ENE?

8. Bici Daudi al’iyemire n’obwalagale? (Ennanga 56:8)

⁸ Ciru akaba Daudi ali omu mazibu madarhi bwenene amango ali e Gati, arhasegezagya obwenge oku bintu byarhumaga ayumva oboba. Ahali h’okujira ntyo, ahiga okurhanya kw’ebi Yehova akag’imujirira mw’ako kasanzi. Daudi akag’icibonera oku Yehova akag’imulongoza, akag’imulanga, n’oku al’ihugûsirwe oku akag’iciyumva. (Osome Ennanga 56:8.) Kandi Daudi al’igwerhe abîra bakag’imuha omurhima n’okumurhabala, kwa lwiganyo Yonatani na Kuhani Mukulu Ahimeleki. (1 Sam. 20:41, 42; 21:6, 8, 9) Na Daudi acira ciru akaba Mwami Saulu akag’ilonza okumuniga. Al’iyemire n’obwalagale oku Yehova al’ihugûsirwe amazibu akag’igeramwo na gurhi gakag’irhuma aciyumva.

9. Bici Yehova abona lugenda ngasi muguma wirhu?

⁹ Erhi wakahikirwa n’amazibu garhumire wayoboha, okengere oku Yehova anabone ago mazibu anamanyire gurhi gali garhuma waciyumva. Kwa lwiganyo, Yehova arhal’imanyire kone gurhi Abaisraheli bakag’ijirirwa kubi e Misri, cikone kandi al’imanyire ‘malibuko maci balimwo.’ (Lub. 3:7) Daudi ayimbire oku Yehova akag’ibona oku ali ‘arhindibuka’ n’‘ebimujira bihamba.’ (Enna. 31:7, Mashi Bible) N’amango abakozi bage bakag’ilibuka, ciru n’amango balibukaga enyanya z’emihigo yabo mibi, “oko kwamubabazize.” (Iz. 63:9, NWT) Amango oyobohire, Yehova anahugûkwe oku oli waciyumva anaba mubidu okukurhabala ly’ohima oboba bwawe.

10. Bulya gurhi oyemire n’obwalagale oku Yehova anakushibirire n’oku akurhabala ly’olwisa ngasi mazibu?

 ¹⁰ Ciru akaba ntyo, nkaba wanacidosa gurhi Yehova ali akurhabalamwo amango oli walwisa amazibu g’okuyobohya. Muli ntyo, omuhûne akurhabale ly’obona enjira ali akurhabalamwo. (2 Bam. 6:15-17) Buzinda orhanye ntya: Ka hotuba ndebe erhi ishuzo lilebe oku ntimanano y’ecigamba lyakuhîre emisi? Ka cicapo cilebe, video ndebe, erhi lwimbo lulebe lwago-lwago lwakuhîre omurhima? Ka muntu mulebe akuganirire entanya erhi lwandiko lw’okuhâna omurhima? Nkaba kwanaba kulembu okuyibagira obulagirire bw’omulala gugwerhe obuzigire gwa bene wirhu na bali birhu n’ebiryo by’ekiroho rhuhâbwa. Cikone ezo ziba ngalo zago-zago kurhenga emwa Yehova. (Iz. 65:13; Mk. 10:29, 30) Ezo ngalo zinayerekane oku anakushibirire. (Iz. 49:14-16) Na kandi zinayerekane oku ashinganine okulangalirwa.

11. Bici byarhabire Aida ly’ahima oboba bwage?

¹¹ Aida, olama omu Sénégal, asegize obwenge oku njira Yehova amurhabalagamwo amango ali omu mazibu. Bulya ye mwana mukulu omu mwabo, ababusi bage bal’icifinjire alonze nsaranga nyinji ly’acishibirira yene n’okubashibirira. Cikone enyuma z’okujira akalamo kage kabe kalembu ly’ajira omukolo gw’obupainiya, Aida aba n’amazibu g’okubula ensaranga. Oko kwarhuma abantu b’omulala gwage bamubêra burhe banakamugayaguza. Adesire ntya: “Nayoboha oku ntabe n’obuhashe bw’okurhabala ababusi bani n’oku ngasi muntu anshomba. Ciru nakabona nka Yehova ye rhumire ebintu byaba bibi bwenene.” Buzinda ayumva ehotuba oku ntimanano y’ecigamba. Adesire ntya: “Owagezagya ehotuba arhukengeza oku ciru akaba rhugwerhe bihulu bihi oku murhima, Yehova aba abimanyire. Bunyi-bunyi, kugerera amahano nahâbagwa n’abagula n’abandi bantu, nayemezibwa n’obwalagale oku Yehova anzigire. Erhi nkashenga Yehova narhondera okuba n’obulangalire oku antabala, nanarhondera okuyumva omurhûla gw’ekandalala erhi mbona oku akag’ishuza amasala gani.” Enyuma za kasanzi kalebe, Aida apata akazi kakag’imurhabala acihikirigize amalagirire gage erhi anali painiya ciru n’okuha ababusi bage  n’abandi bantu oburhabale bw’ensaranga. Adesire ntya: “Naciyigirizize okulangalira Yehova loshi-loshi. Ene, erhi nkola nyusa okusalira, oboba bwani bunahwe.”

BICI YEHOVA ACIJIRA?

12. Kushimbana n’Ennanga 56:9, bici Daudi al’iyemire n’obwalagale?

¹² Osome Ennanga 56:9. Olo lwandiko luyerekine eyindi njira Daudi ahimiremwo oboba bwage. Ciru akaba akalamo kage kaciri omu mazibu, arhanya bwenene kw’ebi Yehova acimujirira. Daudi al’imanyire oku Yehova akamucizize omu kasanzi kakwanine. Kobinali, Yehova ali erhi adesire oku Daudi ye wakabire Mwami wakakulikire w’ishanja ly’e Israheli. (1 Sam. 16:1, 13) Daudi akag’ibona oku ngasi kantu koshi Yehova alaganyize, ko kali nk’akahikirire.

13. Bici rhwakayemera n’obwalagale oku Yehova ayish’ijira?

¹³ Bici Yehova alaganyize okukujirira? Rhurhakalangalira oku arhucîka oku mazibu goshi. c Cikone, ciru mazibu gahi gakakuhikira mw’er’igulu libi, Yehova agarhenza goshi omw’igulu lihyahya lyayisha. (Iz. 25:7-9) Omulemi wirhu agwerhe buhashe bunji bwenene bw’okufûla abafîre, okurhufumya, n’okushereza abashombanyi birhu boshi.—1 Yn. 4:4.

14. Bici rhwakarhanyako bwenene?

¹⁴ Erhi wakaciyumva oyobohire, orhanye kw’ebi Yehova ajira omu mango gayisha. Orhanye lugenda gurhi wayish’iciyumva amango Shetani aba arhaciriho, amango abantu bashinganyanya baba barhôzire enafasi y’abantu babi, n’amango okurhaba bimana kwaba kuli kwagendekera kwahwa ngasi lusiku. Onyesho nguma y’oku ntimanano y’e eneo y’omwaka gwa 2014 yayerekine gurhi rhwakakarhanyamwo bwenene oku bulangalire bwirhu. Ishe muguma w’omulala aganira n’omulala gwage gurhi olwandiko lwa 2 Timoteyo 3:1-5 lwakasomwa lubero erhi akaba eyo milongo elebire oku byayish’iba omu Paradizo: “Omu igulu lihyahya hanabe akasanzi k’omwishingo bwenene. Bulya abantu bayish’iba ba kuzigira abandi, ba kuzigira ebintu by’ekiroho, ba lugero, birhohye, ba kuha Nnâmahanga irenge, ba kurhumikira ababusi babo, ba kuvuga omunkwa, bishwekerezi, ba kuzigira emilala yabo bwenene, ba kulonza obumvikane, ba kuderha abandi bwinja ensiku zoshi, ba kucihasha, batûdu, ba kuzigira aminja, ba kucikubagirwa, ba kuyemera entanya z’abandi, birhohye omu bukengere, ba kuzigira Nnâmahanga ahali h’okuzigira amasîma g’igulu, ba kushumibwa n’obwishwekerezi bw’okunali kuli Nnâmahanga; ocishwekere oku bantu ba ntyo.” K’onaganirire abantu b’omulala gwawe erhi abinyu bemezi oku akalamo kayish’iba omw’igulu lihyahya?

15. Ciru akaba Tanja aciyumvirhe ayobohire, bici byamurhabire ly’ahima oboba bwage?

¹⁵ Mwali wirhu muguma w’omu eneo y’Emwené y’e Macédoine ohamagalwa Tanja ahimire oboba bwage omu kurhanya bwenene oku migisho y’amango gayisha. Ababusi bage bamuhagalisire bwenene bulya akag’iyiga Ebibliya. Adesire ntya: “Nahikirwa na bintu biguma na biguma ntakag’irhanya oku byakampikire. Nyama akag’inshurha enyuma za ngasi ntimanano. Ababusi bani banyobohya bwenene oku baniga erhi nakahikira okuba Muhamirizi wa Yehova.” Buzinda, bafukuza Tanja aha mwabo. Gurhi ajijire? Adesire ntya: “Nakasegeza obwenge oku mwishingo munji nayish’iba nago ensiku zoshi omu kugendekera nabêra mwishwekerezi. Kandi nakarhanya lugenda gurhi Yehova ayish’impemba omw’igulu lihyahya enyanya za ngasi kantu nakaheza  mw’er’igulu na gurhi ebintu bibi byoshi byayish’iyibagirwa.” Tanja agendekire okubêra mwishwekerezi. Na kugerera oburhabale bwa Yehova, apata ahantu h’okulama. Ene, aherusire omu mwa mwene wirhu muguma mwishwekerezi banali bakolera Yehova haguma n’omwishingo omu mukolo gw’akasanzi koshi.

OZIBUHYE OBULANGALIRE BWAWE ENE

16. Bici byayish’irhurhabala lyo rhugendekera rhwaba n’oburhwali hano rhubona ebyalebirwe omu Luka 21:26-28 biri byajirikana?

¹⁶ Omu mango g’amalibuko madarhi, abantu boshi “bafe n’obwoba.” Cikone abantu ba Nnâmahanga bayish’iba n’oburhwali barhakanahuligana. (Osome Luka 21:26-28.) Bulya gurhi rhurhakayoboha? Bulya rhwayish’iba rhwaciyigirizize okulangalira Yehova. Tanja, rhwaganiriraga embere, adesire oku ebyamuhikiraga omu mango gageraga biri byamurhabala ly’alembera agandi mazibu. Adesire ntya: “Naciyigirizize oku Yehova anarhurhabala okulembera ngasi kanga n’okurhugisha. Mango maguma na maguma byanabonekana nk’abandi bantu bagwerhe buhashe bunji, cikone okuderha okuli, Yehova ye gwerhe buhashe bunji kubalusha. Na ciru amazibu gakaba madarhi gurhi, gayish’ihwa.”

17. Gurhi olwandiko lwirhu lw’omwaka gwa 2024 lwarhurhabalamwo? (Olole enfoto eri oku cijalada.)

¹⁷ Ene, rhunayumve oboba. Cikone aka Daudi, rhurhakayemera oboba bwarhurhegeka. Olwandiko lwirhu lw’omwaka gwa 2024 liri isala lya Daudi emwa Yehova lidesire ntya: “Amango ndi ecôba oku murhima, we nkâba nnangalîre.” (Enna. 56:3, Mashi Bible) Nk’oku citabu ciguma cihugûla enderho z’Ebibliya cidesire lugenda ogo mulongo, Daudi “arhayobohaga bwenene arhanasegezagya obwenge oku mazibu gage, cikone alangalira oku Omucunguzi wage amuyokola.” Okarhanya oku lwandiko lwirhu lw’omwaka omu myezi yayisha, bwenene amango oli walwisa akanga k’okuyobohya. Ocihe akasanzi k’okurhanya oku bijiro bya Yehova by’omu mango ga mîra, ebya muli gano mango, n’eby’omu mango gayisha. Buzinda, aka Daudi wanaderha n’obwalagale ntya: “Nnâmahanga ye ncîkubagira ntabyo nakayoboha.”—Enna. 56:4, Mashi Bible.