1. Bici obona omu bukengere erhi orhanya lugenda Yehova?

 KA HALI amango okola obwine omu bukengere bwawe oku Yehova ayorha? Erhi omuganiza kugerera isala, bici obona omu bukengere bwawe? Ciru akaba Yehova arhabonekana, Ebibliya emuganirire omu njira ziri lubero. Yehova ahamagirwe “Kazubazuba, Mpenzi” na “ngulumira ya muliro.” (Enna. 84:11, Mashi Bible; Hb. 12:29) Ezekiyeli aganirire oku Yehova akag’ibonekana omu cibonekerezi nk’ibuye lya safiri, nka cuma ciri cayaka muliro, na mutirigongo gwakag’ilangashana. (Eze. 1:26-28) Mahugûlo maguma na maguma mw’ago lugenda Yehova ganarhuma rhwasomerwa bwenene erhi ciru ganarhuyobohya.

2. Bici byakarhuma bantu baguma na baguma barhayegera Yehova?

² Bulya rhurhakabona Yehova, nkaba rhwanabona nka kuli kuzibu okuyemera oku aba arhuzigire. Enyanya z’ebyabahikire omu kalamo, bantu baguma na baguma banarhanya oku Yehova arhakabazigira ciru n’ehitya. Nkaba barhal’igwerhe ishe wal’ibazigire. Yehova anahugûkwe gurhi rhuciyumva anamanyire oku kwanarhuma kwaba kuzibu kuli rhwe okumuyegera. Ly’arhurhabala, arhufululîre amorhere gage minja bwenene omu Kanwa kage.

3. Bulya gurhi rhushinganine rhuganirire bwenene obuzigire bwa Yehova?

³ Oluderho luguma luba luhugwîre bwinja oku Yehova ayorha buli buzigire. (1 Yn. 4:8) Yehova buba buzigire. Obuzigire bunashumye ngasi kantu ajira. Obuzigire bwa Nnâmahanga buba bunji bwenene bunajira buhashe bunji bwenene na ciru anabuyerese abantu barhaba bamuzigire. (Mt. 5:44, 45) Mw’eci cigabi, rhwaganirira bwenene Yehova n’obuzigire bwage. Oku rhwagendekera rhwayiga binji kuli Nnâmahanga wirhu, ko rhwanagendekera rhwamuzigira.

YEHOVA ABA ARHUZIGIRE BWENENE

4. Gurhi obuzigire bunji bwa Yehova burhuma waciyumva? (Olole n’enfoto.)

⁴ “Yehova aba wa buzigire bunji bwenene.” (Yk. 5:11, NWT) Omu Bibliya, acishushanyize n’omuzire w’obuzigire.  (Iz. 66:12, 13) Obone omu bukengere bwawe omuzire oli washibirira omwana wage murho. Omu njira y’obuzigire anamuhire oku madwi n’okumuderheza n’izu linja na lya kurhuliriza. Amango ali alaka erhi amango ali omu malumwa, anajire okwage koshi ly’amuha ebi alagirireko. Amango rhuli omu malumwa, rhwanalangalira oku Yehova arhuzigire. Omuzihi w’Ennanga ayandisire ntya: “Erhi naciyumva ebihamba binduga emurhima, nyumve oburhulirize bwawe bushagaluse omurhima omu nda.”—Enna. 94:19.

5. Bici obuzigire bwishwekerezi bwa Yehova buhugwîre kuli we?

⁵ Yehova aba mwishwekerezi. (Enna. 103:8) Arhaleka okurhuzigira erhi rhwakajira kantu kalebe kabi. Ishanja ly’Abaisraheli lyagayisize Yehova kanji-kanji; cikone ayeresa abantu bage baciyunjuzagya obuzigire bwage bwishwekerezi kugerera ezi nderho: “Orhali munyi omu masu gani, oli wacitwiro cihamu, ntanahimwa kukurhonya.” (Iz. 43:4, 5) Obuzigire bwa Nnâmahanga burhasag’ishanja. Ensiku zoshi rhwanabulangalira. Ciru akaba rhwajijire amagosa mazibu, Yehova arhakarhuleka. Erhi rhuciyunjuza n’okugalukira Yehova, rhunabone oku acirhuzigire. Alaganyize oku “aba wa bwonjo bunji.” (Iz. 55:7) Ebibliya eganirire okubabalira kwa Yehova nka kunalerhe “amango g’oburhulirize . . . kurhenga emwa Yehova ye nnene.”—Ebj. 3:19, NWT.

6. Bici olwandiko lwa Zakariya 2:8 lurhuyigirizize lugenda Yehova?

⁶ Osome Zakariya 2:8. Bulya Yehova aba arhuzigire, anahugûkwe oku rhuciyumva anaba mubidu okurhulanga. Anaciyumve kubi amango rhuli rhwaciyumva kubi. Co cirhumire rhwanayemera n’obwalagale oku arhushuza, erhi rhwakamushenga ntya: “Onnange nka mbonyi y’isu.” (Enna. 17:8) Isu ciba cirumbu cizamba na ca bulagirire bwenene c’omubiri. Muli ntyo, omu kurhushushanya n’embonyi y’isu lyage, Yehova ali nk’odesire ntya: ‘Ngasi yeshi omujirire kubi bantu bani, ajirire kubi akantu k’obulagirire bwenene kuli nie.’

7. Bulya gurhi rhushinganine rhuzibuhye obulangalire bwirhu omu buzigire bwa Yehova?

⁷ Yehova alonzize rhuyemere n’obwalagale oku aba azigire ngasi muguma wirhu. Cikone aba amanyire oku enyanya z’ebyarhuhikire omu kalamo, nkaba rhwanacidosa erhi anarhuzigira. Erhi nkaba ene rhwanaba rhuli rhwalwisa akanga kakarhuma rhurhalangalira obuzigire bwa Yehova. Bici byazibuhya obulangalire bwirhu omu buzigire bwa Yehova? Kuli kuyiga  gurhi Yehova ayerekanamwo obuzigire bwage kuli Yezu, oku Bakristu bashige amavurha, na kuli rhweshi.

OKU YEHOVA AYEREKANAMWO OBUZIGIRE BWAGE

8. Bulya gurhi Yezu al’iyemire n’obwalagale oku Ishe al’imuzigire?

⁸ Yehova n’Omugala balamire haguma omu kasanzi ka myaka minji bwenene kulusha abandi bantu boshi. Mw’eyo miliyare y’emyaka balamire haguma, bayegererana bwenene banaba n’obwîra bwa hofi-hofi bwenene. Yehova ayerekine n’obwalagale oku aba azigire Yezu, nk’oku biyerekinwe omu Mateyo 17:5. Yehova akadesire kone ntya: ‘Oyu ye mba nyemire.’ Cikone, al’ilonzize rhumanye kunganaci aba azigire Yezu, co carhumire amuhamagala “Mugala wani, muzigirwa.” Yehova acidinire Yezu, bwenene bulya al’iyemire okuhâna akalamo kage. (Ef. 1:7) Na Yezu arhal’igwerhe karhinda lugenda oku Ishe akag’iciyumva enyanya zage. Al’iyemire n’obwalagale oku Ishe amuzigire. Adesire kanji-kanji na buzira karhinda oku Ishe aba amuzigire.—Yn. 3:35; 10:17; 17:24.

9. Nderho zihi zihugwîre obuzigire bwa Yehova oku Bakristu bashige amavurha? Ohugûle. (Abaroma 5:5)

⁹ Kandi Yehova anayerekane oku aba azigire Abakristu bashige amavurha. (Osome Abaroma 5:5.) Olole oluderho “bwabulagirwe.” Citabu ciguma cihâna amahugûlo g’Ebibliya cihugwîre ezo nderho nka “kuyisha kuli rhwe nka hishi.” Ezo ziri nderho nyinja bwenene z’olwiganyo ziyerekine kunganaci Yehova aba azigire Abakristu bashige amavurha! Abakristu bashige amavurha baba bamanyire oku balamire omu “buzigire bwa Nnâmahanga.” (Yd. 1, Mashi Bible) Entumwa Yowane yayerekine oku baciyumva erhi ayandika ntya: “Mulole buzigire buci Larha Nyamuzinda arhuzigire, mpu rhukaderhwa bana ba Nnâmahanga!” (1 Yn. 3:1) Ka bashige amavurha bone Yehova aba azigire? Nanga, Yehova ayerekine oku aba arhuzigire rhweshi.

10. Njira ehi nkulu eyerekine obuzigire bwa Yehova kuli we?

¹⁰ Njira ehi nkulu Yehova ayerekinemwo obuzigire bwage? Eri ngombôlo; co cijiro cinja bwenene c’obuzigire burhasag’iyerekanwa bundi! (Yn. 3:16; Rm. 5:8) Yehova ahânyire Omugala muzigirwa, amuleka afîra bene bantu boshi lyo rhubabalirwa ebyaha birhu n’okuba bîra bage. (1 Yn. 4:10) Oku rhwagendekera rhwarhanya bwenene oku ibeyi Yehova na Yezu balyuzire, ko rhwanagendekera rhwahugûkwa kunganaci baba bazigire ngasi muguma wirhu. (Gl. 2:20) Engombôlo erhalyulagwa mpu bulya kone obushinganyanya bwa Yehova bwal’ihûnyire ntyo, eba ngalo y’obuzigire. Yehova ayerekine obuzigire bwage kuli rhwe omu kuhâna nterekêro omuntu wali wa bulagirire bwenene kuli ye, ko kuderha Yezu. Yehova alesire Omugala alibuke n’okufâ erhi rhwe rhurhuma.

11. Bici olwandiko lwa Yeremiya 31:3 lurhuyigirizize?

¹¹ Nk’oku rhwabonaga, Yehova arhaciyumva arhuzigire kone, cikone kandi anarhubwire kunganaci aba arhuzigire. (Osome Yeremiya 31:3.) Yehova arhukulwire emunda ali bulya aba arhuzigire. (Oshushanye n’Olushika 7:7, 8.) Nta kantu na nta muntu yeshi-yeshi wakarhunanûla k’obo buzigire. (Rm. 8:38, 39) Gurhi obo buzigire burhuma waciyumva? Osome Ennanga 23, onalole gurhi obuzigire bwa Yehova bwarhumire Daudi aciyumva na gurhi nawe bwakarhuma waciyumva.

GURHI OBUZIGIRE BWA YEHOVA BURHUMA WACIYUMVA?

12. Gurhi wakahugûla kwa bofofi Olulanga lwa 23?

¹² Osome Ennanga 23:1-6, Mashi Bible. Olulanga lwa 23 luli lwimbo luyerekine n’obwalagale oku Yehova aba arhuzigire ananarhushibirire. Daudi, mwandisi w’olo lulanga, ayerekine obwîra bwa hofi-hofi bwali egarhi kage na Yehova ahamagalaga Lungere wage. Aciyumvirhe ali  omu bulanzi omu kuleka Yehova amulongoze, ananal’imulangalire loshi-loshi. Daudi al’imanyire oku Yehova akamuyeresire obuzigire bwage ensiku zoshi z’akalamo kage. Bici byarhumaga aba n’obo bulangalire bunji?

13. Bulya gurhi Daudi al’iyemire n’obwalagale oku Yehova akag’imushibirira?

¹³ “Ntaco nakabula.” Daudi akag’iciyumva ashibirirwe bwinja bulya ngasi mango Yehova akag’imuha ebi al’ilagirireko byoshi. Kandi Daudi al’ishagalukire obwîra bwage haguma na Yehova anal’imanyire oku ayemirwe naye. Co cirhumire al’iyemire n’obwalagale oku ciru bici byakamuhikira omu mango gali embere, Yehova akagendekire ashibirira amalagirire gage goshi. Obulangalire bwa Daudi omu buzigire bwa Yehova bwal’igwerhe misi minji bwenene kulusha ngasi kantu kakamuyobohize bwanamulerhera omwishingo munji n’okurhimukwa.—Enna. 16:11.

14. Gurhi Yehova akarhushibiriramwo omu njira y’obuzigire?

¹⁴ Yehova anarhushibirire omu njira y’obuzigire, bwenene erhi ebintu bibi byakarhuhikira omu kalamo. Claire, a wakolire oku Beteli myaka erhalusire 20, aciyumvirhe ahwerirwe erhi omulala gwage guhikirwa n’amazibu gakulikirine. Ishe arhibukirwa n’e AVC, muguma w’omu balumuna atengwa, n’omulala gwabo gwayimanza omukolo gwabo musungunu gw’okulonza ensaranga n’ebanke yabanyaga enyumpa yabo. Gurhi Yehova abashibiriremwo omu njira y’obuzigire? Claire adesire ntya: “Yehova arhabire ly’omulala gwani guba n’ebi gwal’ilagirireko ngasi lusiku. Kanji-kanji, Yehova arhuhîre binji bwenene kulusha ebi rhwal’ilagirireko! Kanji-kanji nantanye oku mango nacibwinire obuzigire bwa Yehova, na mba nshagalukire  ago mango. Okukengera ago mango kwantabire ngendekere nakolera Yehova n’omwishingo erhi agandi mazibu gakampikira omu kalamo.”

15. Bici byarhumire Daudi aciyumva agwerhe emisi? (Olole n’enfoto.)

¹⁵ “Anampe emisi.” Hali amango Daudi akag’iciyumva ababire enyanya z’amazibu n’amarhangulo goshi akag’ilwisa. (Enna. 18:4-6) Cikone, obuzigire bunji bwa Yehova n’oku akag’imushibirira byakamuha emisi. Yehova ayerekeza omwîra wage wal’irhamire ebwa “bulambo bw’akahasi kinja” n’ebwa “ntûla y’amîshi gashongwire.” Oko kwarhuma Daudi acib’iba n’emisi anahasha okugendekera akolera Yehova n’omwishingo.—Enna. 18:28-32.

16. Gurhi obuzigire bwa Yehova bwakuhiremwo emisi?

¹⁶ Ko n’oko ene, “enyanya z’obuzigire bwishwekerezi bwa Yehova co cirhuma rhurhahwa” amango rhuli rhwalwisa amarhangulo n’amazibu g’akalamo. (End. 3:22, NWT; Kl. 1:11) Rhuganirire olwiganyo lwa Rachel. Avunika omurhima bwenene erhi iba amuleka n’okuleka Yehova omu mango g’obulwala bw’e COVID-19. Bici Yehova amujirire? Adesire ntya: “Yehova antabire nkaciyumva oku nzigirwe. Antumira abîra bakag’igeza akasanzi haguma na nani, bakag’inderhera ebiryo, bakantumira amamesaje minja n’amandiko g’okuhâna omurhima, bakamwemwerhwa omu kumbona, n’okugendekera bankengeza oku Yehova akag’inshibirira. Ngasi mango namvuge Yehova omunkwa omu kumpa omulala munene gw’obuzigire.”

17. Bulya gurhi Daudi ‘arhayobohaga cici’?

¹⁷ “Ntakayoboha cici bulya ali haguma nani.” Kanji-kanji akalamo ka Daudi kali omu mazibu, anal’igwerhe abashombanyi b’emisi. Cikone, obuzigire bwa Yehova bwakag’imujira aciyumve ali omu murhûla analanzirwe. Daudi akaciyumvirhe oku Yehova ali haguma naye omu ngasi kanga, n’oko kwakag’irhuma arhayoboha. Co carhumire ayimba ntya: “[Yehova] ankûla kw’ebihamba byandi kwo.” (Enna. 34:4, Mashi Bible) Ciru akaba hali amango Daudi akag’iciyumva ayobohire, ahashire okuhima oboba bwage bulya al’imanyire oku Yehova al’imuzigire.

18. Gurhi okuyemera n’obwalagale oku Yehova akuzigire kwakakuhamwo emisi amango oyobohire?

¹⁸ Gurhi okuyemera oku Yehova arhuzigire kurhuhamwo emisi amango rhuli rhwalwisa akanga k’okuyobohya? Painiya muguma ohamagalwa Susi aganirire gurhi ye n’iba baciyumvirhe erhi mugala wabo aciniga. Adesire ntya: “Obuhanya burhibuka buzira kulaliza bunayobohye bwenene, bunarhume omuntu agendekera aciyumva arhagwerhi misi arhanagwerhi burhabale. Cikone obuzigire bunji bwa Yehova bwarhujijire rhuciyumve rhuli omu murhûla rhunalanzirwe.” Rachel, rhwaganiriraga embere, adesire ntya: “Budufu buguma erhi omurhima gunduma bwenene, n’erhi nciyumva ngwerhe  ebihamba bwenene na nyobohire, nalakira Yehova n’izu linene, ho n’aho enyuma z’okujira ntyo, nayumva ayusa amalumwa gali oku murhima gwani anantuliriza nka kula omuzire arhuliriza akabonjo kage, nanaj’iro. Ntakayibagira ago mango ciru n’ehitya.” Mugula muguma ohamagalwa Tasos ajijire myaka ini omu prizo enyanya z’okulahira okucilunga n’omurhwe gw’abasoda. Gurhi acibwiniremwo oku Yehova al’imuzigire anakag’imushibirira? Adesire ntya: “Yehova ampire binji kulusha ebi nal’ilagirireko. Oko kwanyemeza bwenene oku nanamulangalira loshi-loshi. Kandi kugerera iroho lyage, Yehova ampa omwishingo ciru akaba nali ahantu hakarhumire navunika omurhima. Oko kwanyemeza n’obwalagale oku, oku nakagendekire namulangalira bwenene, ko nakanagendekire nayunguka n’obwinja bwage. Muli ntyo, narhondera namukolera nka painiya w’akasanzi koshi erhi nandi omu prizo.”

OYEGERERE NNÂMAHANGA WAWE W’OBUZIGIRE BUNJI

19. (a) Bici rhwakaderha omw’isala lirhu erhi akaba rhumanyire oku Yehova aba arhuzigire? (b) Mahugûlo gahi lugenda obuzigire bwa Yehova gakuhumire oku murhima? (Olole ecisanduku cidesire, “ Enderho Zirhurhabala Rhuciyumve oku Yehova Aba Arhuzigire.”)

¹⁹ Enyiganyo rhwaganirire zoshi ziyerekine oku Yehova, “Nnâmahanga w’obuzigire,” ali haguma na nirhu! (2 Kr. 13:11, Mashi Bible) Anashibirire ngasi muguma wirhu. Rhuyemire n’obwalagale oku “rhuzungulusirwe n’obuzigire bwage bwishwekerezi.” (Enna. 32:10, NWT) Oku rhwagendekera rhwarhanya bwenene lugenda gurhi arhuyeresiremwo obuzigire bwage, kw’anagendekera aba w’okunali kuli rhwe, ko rhwanagendekera rhwaciyumva rhumuyegerire. Rhwanamuyegera buzira boba n’okumubwira kunganaci rhuba rhulagirire oku buzigire bwage. Rhwanamuganirira ebirhuyobohize byoshi n’okuyemera n’obwalagale oku ahugûsirwe n’oku ali mubidu okurhurhabala.—Enna. 145:18, 19.

20. Gurhi obuzigire bwa Yehova burhuma rhwamuyegerera?

²⁰ Nka kula rhuyegerera omuliro gugwerhe ecikanga olusiku lw’emboho, rhunayegerere obuzigire bwa Yehova. Ciru akaba obuzigire bwa Yehova bujira misi minji bwenene, kandi buba bwa lukogo. Co cirhumire, oshagaluke bulya Yehova akuzigire. Kandi, lekagi rhweshi rhuyemere obuzigire bwage omu kuderha ntya: “Nsîma Nyamuzinda”!—Enna. 116:1, Mashi Bible.