1-2. Mazibu gahi gakahikira abakozi ba Yehova bishwekerezi?

 AMAZIBU ganashanja akalamo kirhu buzira kulaliza. Kwa lwiganyo, mwene wirhu muguma mwishwekerezi ohamagalwa Luis a avumbulwamwo akansere abandi barhalug’ilwala. Doktere amubwira oku acisigaline myezi misungunu yone y’okulama. Monika n’iba bakag’ijira binji omu mikolo y’ekiroho. Buzinda, lusiku luguma Monika ayumva oku iba, wali mugula, akag’ijira ecaha bwifulikwe omu kasanzi ka myaka minji. Olivia, mwali wirhu mulamba, ahûnwa okurhenga omu nyumpa yage bulya kalemera mudarhi al’iyegerire. Erhi agaluka, arhimana eyo mpusi ndarhi yasherezize enyumpa yage. Omu kasanzi kasungunu, akalamo k’abo bantu kashanjire loshi-loshi. K’okola ohikirwe n’akanga kadarhi kashanjaga akalamo kawe buzira kulaliza?

² Ciru akaba rhuli bakozi bishwekerezi ba Yehova, rhunalwise amazibu n’endwala zihikira abantu boshi. Kandi byanahûna rhulembere okuhagalikwa n’okulibuzibwa n’abantu bashomba abakozi ba Nnâmahanga. Ciru akaba Yehova arharhucika oku mazibu ga ntyo, arhulaganyize oku arhurhabala. (Iz. 41:10) Kugerera oburhabale bwage, rhwanagendekera rhwaba n’omwishingo, rhwanarhôla emihigo minja, n’okugendekera rhwabêra bishwekerezi kuli ye ciru n’omu mango mazibu bwenene. Mw’eci cigabi, rhwaganirira njira ini Yehova arhurhabalamwo omu mango mazibu g’akalamo kirhu. Kandi rhwaganirira ebi rhushinganine rhujire lyo rhuyunguka n’oburhabale arhuha.

YEHOVA AKULANGA

3. Bici byakaba bizibu kuli rhwe okujira amango rhuli omu mazibu?

³ Amazibu. Erhi rhuhikirwa n’amazibu, kwanaba kuzibu kuli  rhwe okurhanya bwinja n’okurhôla emihigo. Bulya gurhi? Omurhima gwirhu gwanaba gubabire bwenene n’obukengere bwirhu bwanaba buzidohirwe bwenene n’amahangayiko. Rhwanaciyumva nk’abali balambagira omu lwikungu, lurhusisire okubona emunda rhuyerekire. Olole oku bali birhu babirhi rhwaganiriraga embere baciyumvirhe amango bali omu mazibu. Olivia adesire ntya: “Erhi empusi ya kalemera eshaba enyumpa yani, naciyumva mpwerirwe na nzidohirwe bwenene.” Lugenda obulenzi bw’iba, Monika adesire ntya: “Naciyumva mvunisire omurhima bwenene. Naciyumva nk’ofunzirwe engorho omu murhima. Kwali kuzibu kuli nie okujira emikolo yani ya ngasi lusiku. Nta mango narhanyize oku ebyo byakampikire.” Gurhi Yehova alaganyize arhurhabalamwo amango rhuli rhwaciyumva rhuzidohirwe?

4. Kushimbana n’Abafilipi 4:6, 7, bici Yehova arhulaganyize?

⁴ Oku Yehova arhurhabalamwo. Alaganyize oku arhuha ebi Ebibliya ehamagire “omurhûla gwa Nyamuzinda.” (Osome Abafilipi 4:6, 7.) Ogo murhûla guhugwîre ehali y’okurhulirira omu bukengere n’omu murhima rhuba nayo enyanya z’obwîra bwinja rhugwerhe haguma naye. Ogo murhûla guba “gulushire ngasi nkengero”; guba mwinja bwenene kulusha oku rhwakarhanya. Ka hali amango okola osomirwe omu kuciyumva orhulirire enyuma z’okusalira Yehova n’obushiru? Oko waciyumvagya orhulirire go ‘murhûla gwa Nyamuzinda.’

5. Gurhi omurhûla gwa Nyamuzinda gulangamwo enkengero zirhu n’emirhima yirhu?

⁵ Olo lwandiko lo n’olo ludesire oku omurhûla gwa Nyamuzinda “gwalanga,” erhi kucunga, “emirhima yinyu n’obukengere bwinyu.” Oluderho lurhangiriza lwahindwirwe “kulanga” lwali luderho lwakag’ikolesibwa omu by’ivita lwanakag’iganirira abasoda bakag’ilanga olugo lyo lurhag’irherwa. Abantu bal’ilamire omu lugo lulanzirwe bakag’igwishira n’omurhûla, bulya bal’imanyire oku abasoda bali oku mihango y’olo lugo. Ko n’oko, amango omurhûla gwa Nyamuzinda gulanzire emirhima yirhu n’obukengere bwirhu, rhunaciyumve rhurhulirire bulya rhumanyire oku rhuli omu bulanzi. (Enna. 4:8) Nk’oku byabaga omu kanga ka Ana, ciru akaba akanga kirhu karhashanjiri ho n’aho, rhwanaciyumva rhugwerhe omurhûla omu njira ndebe. (1 Sam. 1:16-18) N’amango rhuli rhwaciyumva rhurhulirire, kanji-kanji kunabe kulembu okurhanya bwinja n’okurhôla emihigo minja.

6. Bici rhwakajira lyo rhuba n’omurhûla gwa Nyamuzinda? (Olole n’enfoto.)

⁶ Ebi rhushinganine rhujire. Amango oli waciyumva orhagwerhi murhûla, ohamagale omulanzi, omu njira y’olwiganyo. Gurhi wakajiramwo ntyo? Osalire kuhika obe n’omurhûla  gwa Nyamuzinda. (Lk. 11:9; 1 Ts. 5:17) Luis, rhwaganiriraga embere, ahugwîre gurhi ye na mukage, Ana, babiremwo n’obuhashe bw’okulembera erhi bababwira oku acigwerhe myezi misungunu yone y’okulama. Adesire ntya: “Omu kasanzi kali nk’ako, kuba kuzibu bwenene okurhôla emihigo lugenda eby’okubukwa n’ebindi bintu. Cikone isala lyarhurhabire bwenene lyo rhuba n’omurhûla mw’ako kasanzi kazibu.” Luis na mukage badesire oku bakag’ishenga Yehova n’obushiru na ngasi mango, omu kumuhûna abahe omurhûla omu bukengere, omurhima gurhulwire, n’obwenge bw’okurhôla emihigo minja. Banabona oburhabale bwage. Erhi akaba oli walwisa amazibu, ogendekere wasalira, na ntyo wanayumva oku omurhûla gwa Yehova guli gwalanga omurhima gwawe n’obukengere bwawe.—Rm. 12:12.

YEHOVA AKURHABALA ORHAHULIGANAGA

7. Gurhi rhwakaciyumva erhi akaba rhuli omu mazibu madarhi?

⁷ Amazibu. Amango rhuli rhwalwisa mazibu malebe, nkaba rhurhakaciyumva, rhurhakarhanya erhi kujira nk’oku rhuyorha rhujira. Nka kula ebato eri yagera omu mulaba ehêkwa eyi n’eyi n’omulaba, nirhu rhwanaciyumva rhuli rhwahêkwa eyi n’eyi enyanya z’oku rhuli rhwaciyumva. Ana, rhwaganiriraga embere, adesire oku akag’iciyumva kubi omu njira ziri lubero enyuma z’okufâ kwa Luis. Adesire ntya: “Mango maguma na maguma nakag’iciyumva mvunisire omurhima bwenene, nanakarhondera naciyumviza obwonjo. Kandi nakag’iyumva oburhe enyanya z’okufâ kwage.” Okurhôla emihigo lugenda ebintu Luis akag’ishibirira bwinja, agandi mango kwakag’irhuma Ana aciyumva ali kahumba anali burhe. Hali amango akag’iciyumva nk’ali omu nyanja erimwo omulaba. Gurhi Yehova arhurhabalamwo amango rhuli rhwaciyumva ntyo?

8. Nk’oku biyerekinwe omu Izaya 33:6, bici Yehova arhuyemezize n’obwalagale?

⁸ Oku Yehova arhurhabalamwo. Arhuyemezize n’obwalagale oku arhurhabala rhurhahuliganaga. (Osome Izaya 33:6.) Erhi ebato erhimanana n’omulaba omu nyanja, yanarhondera yacikweba eyi n’eyi. Ly’ebato edekerera erhi kurhaja eyi n’eyi, bato nyinji zijira ebyuma biba bishwekirwe oku ngasi lunda luli omu mishi. Ebyo byuma binarhabale ly’ebato erhacikwebaga eyi n’eyi bwenene, n’oko kunarhume abantu balimwo bashagalukira omubalamo. Cikone, ebyo byuma binakole bwinja amango ebato eri yagenda. Ko n’oko, Yehova anarhurhabala lyo rhurhahuliganaga amango rhuli rhwagendekera rhwamukolera n’obwishwekerezi omu mazibu.

9. Gurhi ebikolanwa birhu by’okujirira obusagasi byakarhurhabalamwo lyo rhurhahuliganaga amango g’amazibu? (Olole n’enfoto.)

⁹ Ebi rhushinganine rhujire. Amango ozidohirwe  n’amazibu garhumire waciyumva kubi, ojire okwawe koshi ly’ogendekera wakenga eprograme yawe y’ekiroho. Kobinali, nkaba wanaba orhagwerhi obuhashe bw’okujira binji nk’oku wakag’ijira embere, cikone okengere oku Yehova arhakakuhûna oku ojire ebi orhagwerhi obuhashe bw’okujira. (Oshushanye na Luka 21:1-4.) Omu programe yawe y’ekiroho, ocihirireho akasanzi k’okujira ifunzo lyawe wene n’okurhanya bwenene. Bulya gurhi? Kugerera ikubuliro lyage, Yehova arhuhîre amavideo n’emyanzi minja bwenene yakarhurhabala lyo rhurhahuliganaga amango g’amazibu. Ly’obona ebi olagirireko, wanakolesa ebikolanwa birhurhabala okujira obusagasi biri omu lulimi lwawe, nka JW Library^®, e Index des publications des Témoins de Jéhovah, na Musaada wa Kutafuta Habari kwa Ajili ya Mashahidi wa Yehova. Monika, rhwaganiriraga embere, adesire oku akag’ikolesa ebyo bikolanwa by’okujirira obusagasi erhi akayumvirhe akola arhondera okuciyumva kubi bwenene ekandalala. Kwa lwiganyo, akag’ijirira obusagasi oluderho “burhe.” Agandi mango, akag’ijirira obusagasi oluderho “bulenzi” erhi “bwishwekerezi.” Buzinda akag’isoma kuhika aciyumve bwinja. Adesire ntya: “Amango nakag’irhondera okujira obusagasi, nakag’iba mpangayisire bwenene. Cikone erhi nakagendekire nasoma nakag’iciyumva nka Yehova ali ampobera. Omu kusoma, nahikira aha nahugûkwa oku Yehova al’imanyire oku nakag’iciyumva koshi, n’oku akag’intabala.” Obo burhabale kurhenga emwa Yehova nawe bwanakurhabala orhahuliganaga kuhika orhulirire.—Enna. 119:143, 144.

YEHOVA AKURHABALA

10. Gurhi rhwakaciyumva enyuma z’okuhikirwa n’akanga kazibu?

¹⁰ Amazibu. Enyuma z’okuhikirwa na mazibu malebe, hali ensiku rhukaciyumva rhugwerhe obuzamba bw’omubiri n’obw’ekandalala. Nkaba rhwanaciyumva ak’omuntu wal’ikomire okulibirha bwenene akamashigwe cikone okola olambagira anali akunagira. Nkaba kwanaba kuzibu kuli rhwe okuhikiriza emikolo yali milembu okuhikiriza omu mango gageraga, erhi nkaba rhwanabula bushagalukira emikolo rhwakag’ishagalukira omu mango malebe. Aka Eliya, rhwanaciyumva nka kuli kuzibu bwenene okuzuka n’oku rhulonzize kone rhugwishire. (1 Bam. 19:5-7) Bici Yehova alaganyize okujira amango rhuli rhwaciyumva rhuli bazamba?

11. Yindi njira ehi Yehova arhurhabalamwo? (Ennanga 94:18)

¹¹ Oku Yehova arhurhabalamwo. Alaganyize okurhurhabala. (Osome Ennanga 94:18.) Ak’omulibisi w’akamashigwe olagirire oku  burhabale ly’agendekera alambagira, nirhu rhwanaba rhulagirire oku burhabale lyo rhugendekera rhwajira binji omu mukolo gwa Yehova. Omu mango ga ntyo, Yehova arhuyemezize n’obwalagale ntya: “Niono, Nyakasane Nyamuzinda wawe, nkugwarhire oku kuboko kulyo, nankubwizire, nti: ‘Orhayobohaga, nie nakurhabala!’” (Iz. 41:13) Mwami Daudi acibwinire obo burhabale. Omu mango akag’ilwisa amazibu n’abashombanyi bage, abwira Yehova ntya: “Oba ongwasire n’okuboko kwawe kulyo.” (Enna. 18:35, Mashi Bible) Cikone gurhi Yehova ahânamwo oburhabale?

12. Ba ndi Yehova akakolesa ly’arhurhabala amango rhuli bazamba?

¹² Kanji-kanji Yehova anarhurhabale omu kushumya abandi bantu barhuhe oburhabale. Kwa lwiganyo, mango maguma erhi Daudi aciyumva ali muzamba, omwîra wage Yonatani amulambagirira ly’amubwira enderho z’okumuha omurhima n’okumurhabala aciyumve bwinja ekandalala. (1 Sam. 23:16, 17) Ko n’oko, Yehova acishozire Elisha ly’aha Eliya oburhabale al’ilagirireko. (1 Bam. 19:16, 21; 2 Bam. 2:2) Ene, Yehova anakolesa omulala, abîra, erhi abagula ly’arhurhabala. Cikone, erhi akaba rhuvunisire omurhima, nkaba rhwanalonza okuciyegula oku bandi. Rhwanashagalukira kone okubêra rhwe nnene. Biyumvikine oku omuntu anajira ntyo. Bici rhwakajira lyo rhuhâbwa oburhabale bwa Yehova?

13. Bici rhushinganine rhujire lyo rhuba n’oburhabale bwa Yehova? (Olole n’enfoto.)

¹³ Ebi rhushinganine rhujire. Ojire okwawe koshi ly’orhaciyegulaga oku bandi. Erhi rhwakaciyegula oku bandi, nkaba rhwanarhondera okucisegezak’obwenge rhwe nnene n’okubusegeza oku mazibu rhugwerhe. Entanya za ntyo zanarhuma rhurharhôla emihigo minja. (Mig. 18:1) Kobinali, rhweshi rhunalonze okubêra kahumba kasanzi kalebe, ci bwenene erhi akaba rhuli rhwalwisa mazibu malebe. Cikone erhi rhwakaciyegula oku bandi kasanzi kanji, rhwanaba rhuli rhwayaka enjira Yehova ali akolesa ly’arhurhabala. Co cirhumire, ciru amazibu gawe gakaba madarhi gurhi, okayemera oburhabale bw’omulala gwawe, abîra bawe, n’abagula. Obone oku Yehova ali abakolesa ly’akurhabala.—Mig. 17:17; Iz. 32:1, 2.

YEHOVA AKURHULIRIZA

14. Bintu bihi by’okuyobohya byakarhuhikira?

¹⁴ Amazibu. Hali amango rhuciyumva rhuyobohire. Omu Bibliya, abakozi bishwekerezi ba Nnâmahanga baganirire amango bakag’iciyumva bababire banali bajuguma enyanya z’abashombanyi babo erhi agandi mashumi. (Enna. 18:4; 55:1, 5) Ko n’oko, nkaba rhwanahagalikwa  ebwa masomo, ebwa kazi, n’abantu b’omulala gwirhu erhi abarhegesi. Nkaba ciru rhwanayoboha oku rhwafâ enyanya z’amazibu g’okubukwa. Omu mango ga ntyo, nkaba rhwanaciyumva nka rhurhagwerhi burhabale ak’omwana murho. Gurhi Yehova arhurhabalamwo omu mango ga ntyo?

15. Bici Yehova arhujirira biyerekinwe omu Ennanga 94:19?

¹⁵ Oku Yehova arhurhabalamwo. Anarhurhulirize n’okurhuha omurhima. (Osome Ennanga 94:19.) Olo lulanga lwanarhukengeza ehyana-nyere hiyobohire bwenene hyanayabirwe bwahunira enyanya z’emikungulo midarhi y’enkuba. Rhwanabona omu bwenge gurhi ishe ayishire, amamulengeza, n’okumubagalira kuhika aj’iro. Ciru akaba enkuba eciri yakungula, okumurhuliriza kw’ishe omu kumubagalira kwamarhuma aciyumva ali omu bulanzi. Erhi rhwakahikirwa n’amazibu gakarhuyobohya, rhwanaba rhulagirire oku kubagalirwa na Larha wirhu w’omu mpingu omu njira y’olwiganyo kuhika rhuciyumve rhurhulirire. Gurhi rhwakahâbwamwo oburhulirize bwa ntyo kurhenga emwa Yehova?

16. Bici rhwakajira lyo Yehova arhurhuliriza? (Olole n’enfoto.)

¹⁶ Ebi rhushinganine rhujire. Ngasi mango okageza akasanzi haguma na Yehova omu kusalira n’okusoma Akanwa kage. (Enna. 77:1, 12-14) Erhi wakaba ogwerhe eyo nkomedu, akantu karhanzi wakajira amango oli omu mazibu kuli kuhûna Sho w’omu mpingu oburhabale. Okamanyisa Yehova ebi oyobohire n’ebikuhangayisize. Buzinda okamuyumvirhiza omu kusoma Akanwa kage na muli ntyo wabona gurhi akurhuliriza. (Enna. 119:28) Nkaba wanabona oku okusoma bigabi bilebe by’Ebibliya kwanakurhuliriza amango oyobohire. Kwa lwiganyo, nkaba wanarhulirizibwa omu kusoma ecitabu ca Ayubu, Ennanga, n’Emigani ciru n’enderho za Yezu ziri omu Mateyo cigabi ca 6. Amango oli wasalira Yehova n’okusoma Akanwa kage, wanabona oburhulirize bwage.

17. Bici rhwakayemera n’obwalagale?

¹⁷ Rhwanayemera n’obwalagale oku Yehova arhurhabala ensiku zoshi erhi amazibu gakarhuhikira omu kalamo kirhu. Nta mango rhwakaba kahumba. (Enna. 23:4; 94:14) Yehova arhulaganyize oku arhulanga, arhujira rhurhahuliganaga, arhurhabala, n’okurhurhuliriza. Lugenda Yehova, olwandiko lwa Izaya 26:3, Mashi Bible ludesire ntya: “Onahâne omurhûla kuli balya bakenga amarhegeko; bulya bakulangâlîre.” Co cirhumire, olangalire Yehova, n’okujira oku wakanahasha ly’oyunguka n’oburhabale bwage. Erhi wakajira ntyo, wanacib’iba n’emisi ciru n’omu mango g’amazibu.