Erhi abahubiri bagendekera bayushuka, haba obulagirire bunji bw’ebicapo. Bene wirhu oku Beteli y’e Brooklyn bakag’icapisa amagazeti, cikone ekompanyi z’okucapisa ebitabu zo zakag’ibacapikiza ebitabu by’ebijalada bizibu. Buzinda, erhi hagera myezi erhali minyi ezo kompanyi zirhali zacapisa bitabu binji by’okukolesa omu mahubiri, Mwene wirhu Rutherford adosa Robert Martin, mwimangizi w’enafasi y’okucapikiza ebitabu, erhi byakahashikine bakacicapikiza bone ebitabu byabo.

Mwene wirhu Martin adesire oku ezo zali “ntanya nyinja bwenene, bulya kwali kuderha oku rhwene rhurhondeze eyirhu nafasi y’okucapikiza ebitabu by’ebijalada bizibu.” Bene wirhu bapanga enyumpa oku Rue Concord numéro 18 omu Brooklyn banapata ebikolanwa bal’ilagirireko lyo bajira ogo mukolo.

Arhali ngasi muntu washagalukire ago majambere. Omwimangizi w’ekompanyi yakag’irhucapikiza ebitabu alambagirira eyo nafasi yirhu mpyahya y’okucapikiza ebitabu. Aderha ntya: “Mugwerhe ebikolanwa binja by’okucapisa ebitabu, cikone nta muguma muli mwe omanyire okubikolesa. Enyuma za myezi ndarhu, mwaba mwamabishereza byoshi.”

Mwene wirhu Martin adesire ntya: “Ezo nderho zabonekana nka ziri z’okuli, cikone rhwal’imanyire oku Yehova akarhurhabire, ko anajijire ntyo.” Ebyo mwene wirhu Martin aderhaga byali by’okuli. Enyuma za kasanzi kasungunu, omu atelier yirhu y’okuhira ebijalada oku bitabu, rhwakajira bitabu 2 000 ngasi lusiku.

Aha nyuma n’okucicapikiza ebitabu byabo bone, Abahamirizi ba Yehova barhondera okukolesa enjira mpyahya y’okulumiza omwanzi mwinja, k’okuderha kuhubiri kugerera eradiyo. Lw’Iyinga enyuma z’emidi, omu nsiku 26/2/1922, Mwene wirhu Rutherford aderha oku radiyo oburhangiriza. Ageza ehotuba oku radiyo KOG omu Los Angeles, Californie, États-Unis, eyo hotuba yal’idesire, “Emiliyoni y’Abantu Elamire Ene Erhafê.”

 Hofi bantu 25 000 bayumvirhiza eyo hotuba. Baguma na baguma mulibo barhuma amaruba g’okuvuga Mwene Wirhu Rutherford omunkwa kw’eyo hotuba. Maruba maguma muligo garhumagwa na Willard Ashford, muntu muguma wakag’ilama omu Santa Ana, e Californie. Avuga Mwene Wirhu Rutherford omunkwa kw’eyo hotuba “nyinja na ya kushagalusa.” Buzinda, ayushula ntya: “Bulya ngwerhe balwala basharhu omu nyumpa, ntaye muli rhwe wakahashire okuyumvirhiza eyo hotuba nka murhayijiraga kugerera eyo njira, ciru mwakayigerize hofi n’aha mwirhu.”

Bageza ezindi hotuba kugerera eradiyo omu migobe yakulikiraga. Oku buzinda bw’omwaka gwa 1922, Ilabiro ly’Akalalizi lyaderha oku hanaba “bantu hofi 300 000 bahâbirwe obuhamirizi kugerera eradiyo.”

Erhi Abanafunzi b’Ebibliya babona oku abantu bal’isimisibwe n’ago mahubiri kugerera eradiyo bahâbwa omurhima, n’oko kwarhuma bahiga okuyubaka e stasyo y’eradiyo omu parsele nguma yali oku Cirhwa c’e Staten, hofi n’Ebeteli y’e Brooklyn. Omu myaka yakulikiraga, Abanafunzi b’Ebibliya bakolesa eyo stasyo y’eradiyo yakag’ihamagalwa WBBR, lyo bayaligiza bantu banji bwenene omwanzi gw’Obwami.

Egazeti y’Ilabiro ly’Akalalizi y’omu nsiku 15/6/1922, yaderha oku entimanano nkulu yajirwa omu Cedar Point, Ohio, kurhangira omu nsiku 5-13/9/1922. Abanafunzi b’Ebibliya bashagaluka bwenene erhi bahika omu Cedar Point.

Omu hotuba yage ntanzi, Mwene Wirhu Rutherford abwira abumvirhiza bage ntya: “Nyemire n’obwalagale oku Nnawirhu . . . agisha eyi ntimanano nkulu n’oku obuhamirizi burhasag’ihânwa bundi hanw’igulu, bwahânwa.” Abagezagya ehotuba kw’eyo ntimanano nkulu basegeza bwenene omukolo gw’amahubiri.

Erhi luba Lwa Karhanu, nsiku 8 Mwezi gwa 9, bantu hofi 8 000 baja omu nyumpa nnene y’okujiriramwo entimanano, banakag’ilindirira okuyumvirhiza ehotuba ya Mwene Wirhu Rutherford. Bal’ilangalire oku ahugûla eherufi “ADV,” zal’iyandisirwe oku milali yabo. Erhi batamala, buzira karhinda baguma mulibo babona ecitambara cigali cizinge cali enyanya z’ejukwa. Arthur Claus, warhengaga e Tulsa, Oklahoma, États-Unis ly’aja kw’eyo ntimanano nkulu, apata  enafasi nyinja yakamurhabire okuyumva bwinja eyo hotuba; okuyumva eyo hotuba kwali kuzibu bulya mw’ezo nsiku barhal’icikakolesa emikro erhi bindi byombo by’okuyushula izu.

Ly’ehotuba egera buzira kavulindi, owal’iyimangire eyo ntimanano atangaza oku nta muntu yeshi-yeshi wayisha enyuma oyemerirwe okuja omu nyumpa amango Mwene Wirhu Rutherford aba ali ageza eyo hotuba. Erhi ziba nsa 3:30, Mwene Wirhu Rutherford arhondera ehotuba yage omu kugalukira enderho za Yezu ziri omu Mateyo 4:17 zidesire ntya: “Obwami bw’empingu buli hofi.” Erhi ali aganirira lugenda gurhi abantu bakayumvamwo omwanzi g’obo Bwami, aderha ntya: “Yezu yene adesire oku, omu mango g’okubaho kwage, akalongozize omukolo gw’okusarula abantu bage, na muli ogo mukolo akagusanyize abanafunzi b’okuli na bishwekerezi.”

Mwene Wirhu Claus, wal’itamire omu cumpa cinene c’eyo nyumpa y’entimanano, akengire ntya: “Rhwakag’iyumvirhiza bwinja ngasi luderho.” Cikone, buzira kulaliza, alwala anahuluka mw’eyo nyumpa. Oyo mwene wirhu ahulusire buzira kulonza, bulya al’imanyire oku barhacimuyemerere okugaluka mw’eyo nyumpa.

Enyuma za miniti misungunu, arhondera okuciyumva bwinja. Adesire oku erhi aba ali agaluka mw’eyo nyumpa, ayumva abantu bakoma akagasha. Oko kwamukangamula! Ahiga oku ajira akwage koshi ly’ayumva ecigabi cal’isigire c’eyo hotuba nyinja bwenene, ciru byakahûna oku ashonere oku burhungiri bw’eyo nyumpa, ajira ntyo ly’ayumva. Bulya Mwene Wirhu Claus gwali musole gwa myaka 23 ago mango, ahasha okushonera oku burhungiri bw’eyo nyumpa! Enafasi z’okuyingiza omwangaza mw’eyo nyumpa zali nyigule, n’erhi azishegeraho, arhondera “okuyumva bwinja.”

Cikone arhali Arthur yene washonyire kw’eyo nyumpa. Bîra bage baguma na baguma nabo bali oku burhungiri bw’eyo nyumpa. Mwîra wage muguma wakag’ihamagalwa Frank Johnson, amulibirhiraho anamudosa ntya, “K’ogwerhe ehyere hyoji hy’akanifu?”

Arthur ashuza erhi, “neci, mpigwerhe.”

Mwene wirhu Frank aderha erhi: “Wamaba ishuzo oku masala girhu. K’obwine cira citambara cigali  cizinge? Ciri cimanyiso cikomerhirwemwo emisumari. Oyumvirhize bwinja Omuzuzi. * Hano aderha erhi, ‘munagwasirwe muyalize, muyalize,’ otwe eyo migozi ini.”

Muli ntyo, Arthur n’akanifu kage omu nfune, akalinda haguma n’abandi oku Mwene Wirhu Rutherford aderha zirya nderho. Enyuma za kasanzi kasungunu, Mwene Wirhu Rutherford ahika oku cigabi c’obulagirire bwenene c’ehotuba yage. Bulya Mwene Wirhu Rutherford al’ishagalusire bwenene anal’igwerhe bushiru bunji, byanahashikana nkaba adesire ezi nderho n’izu linene: “Mube bahamirizi bishwekerezi na b’okunali ba Nnawirhu. Mulwe entambala kuhika Babiloni asherere yeshi-yeshi. Muyalize omwanzi ngasi hoshi. Iguli ligwasirwe limanye oku Yehova ye Nnâmahanga n’oku Yezu Kristu ye Mwami w’abami na Nnawirhu wa ba nnawirhu. Aka ko kasanzi k’obulagirire bwenene. Mulole, Omwami ali arhegeka! Mugwerhe omukolo gw’okumanyisa ngasi muntu lugenda oko. Co cirhumire, muyalize, muyalize, muyalize, Omwami n’Obwami bwage!”

Arthur adesire oku ye n’abandi bene wirhu batwa erya migozi na cirya citambara cizinge cacizingula bunyi-bunyi. Eco citambara caliko amahugûlo ga zirya herufi “ADV.” Ezo herufi bwali bofofi bw’oluderho lw’Ecingereza “advertise” luhugwîre muyalize erhi muhâne obuhamirizi.

Entimanano nkulu yajiragwa omu Cedar Point yarhabala bene wirhu na bali birhu basegeze obwenge oku mukolo gw’obulagirire bwenene gw’okuyaliza Obwami, na ngasi boshi bal’igwerhe obulonza bwinja bashagalukira okujira ogo mukolo. Mwene wirhu muguma wali kolportere (okola ohamagalwa painiya ene) w’omu Oklahoma, États-Unis, ayandika ntya: “Ewilaya rhwakag’ikoleramwo yali eneo yalimwo amakala g’amabuye (charbon) n’obukenyi bwali bunji mw’eyo eneo.” Adesire oku, kanji-kanji erhi abantu bakayumvirhe omwanzi gwali omu gazeti L’Âge d’Or “bakag’irhoza emirenge.” Kwa bofofi adesire ntya: “Guli mugisho bwenene okubarhuliriza.”

Abanafunzi b’Ebibliya babona oku bal’ishinganine bakolese duba-duba enderho za Yezu ziri omu Luka 10:2, zidesire ntya: “Emyaka y’okusarulwa eri minji, ci abakozi banyiha; hunagi Nn’emyaka [Nn’ebisarulwa] arhume abakozi omu myaka yage.” Kuhikira oku buzinda bw’omwaka, bal’ihizire bwenene kulusha embere okuyaliza omwanzi gw’Obwami ngasi hoshi.