1-2. (a) Gurhi marhegesi maguma na maguma gajirire abakozi ba Yehova, cikone gurhi abakozi ba Yehova bajijire? (b) Bulya gurhi rhwanaba n’omwishingo ciru n’omu mango rhuli rhwalibuzibwa? (Oganirire enfoto eri oku cijalada c’eyi gazeti.)

 KUHIKA buno, omukolo gwirhu guhanzibwe goshi-goshi erhi bigabi bilebe byago omu bihugo 30 na kulusha omw’igulu lyoshi. Omu bihugo bilebe muli ebyo, abarhegesi bahebire bene wirhu na bali birhu omu prizo. Magosa gahi bajijire? Omu masu ga Yehova, nt’igosa bajijire. Ebi bajijire byone kuli kusoma n’okuyiga Ebibliya, okuganirira abandi obwemere bwabo, n’okuja omu ntimanano haguma n’ababo bemezi. Kandi, balahire okulunga okuboko oluhande loshi-loshi omu by’epolitike. Ciru akaba abo bakozi ba Nnâmahanga b’obuyemere bahagalisirwe bwenene, bagendekire okubêra bishwekerezi, * na muli ntyo bayerekine oku bacihânyire loshi-loshi emwa Yehova. N’okujira ntyo kwabalerhire omwishingo!

² Nkaba wabwîne enfoto za baguma na baguma muli abo Bahamirizi b’oburhwali wanabona oku bali bamwemwerhwa. Bagwerhe omwishingo bulya bamanyire oku Yehova abashagalukire okubona bagendekire babêra bishwekerezi kuli ye. (1 Nga. 29:17a) Yezu adesire ntya: “Ab’omwishingo bali balya bali balibuzibwa erhi bushinganyanya burhuma . . . Musîme munashagaluke bwenene bulya oluhembo lwinyu luli lunene.”​—Mt. 5:10-12, NWT.

3. Nk’oku olwandiko lw’Ebijiro by’Entumwa 4:19, 20 ludesire, gurhi entumwa zajijire erhi zilibuzibwa omu myaka igana mirhanzi, na bulya gurhi zajijire ntyo?

³ Ebiri byahikira bene wirhu na bali birhu bishushine n’ebyahikiraga entumwa omu myaka igana mirhanzi erhi zilibuzibwa enyanya z’okuhubiri lugenda Yezu. Kanji-kanji, abatwi b’emanja b’omu kagombe kakulu k’Eciyahudi “babahanza mpu barhacihira bakaderha erhi kuyigiriza oku izino lya Yezu.” (Ebj. 4:18; 5:27, 28, 40) Gurhi entumwa zajijire? (Osome Ebijiro by’Entumwa 4:19, 20.) Bal’imanyire oku omurhegesi w’obuhashe bwenene ye ‘wabarhumaga mpu baj’iyigiriza olubaga, banahamirize’ lugenda Kristu. (Ebj. 10:42) Co carhumaga Petro na Yowane, baderhaga omw’izino ly’ezindi ntumwa zoshi, baderha n’oburhwali oku bagendekera okurhumikira Nnâmahanga kulusha abo batwi b’emanja n’oku barhakaleka okuhamiriza lugenda Yezu. Ko bali nk’abadosize abo barhegesi er’idoso, ‘Ka mulonzize okurhubwira oku amarhegeko ginyu gali makulu kulusha aga Nnâmahanga?’

4. Nk’oku biyerekinwe omu lwandiko lw’Ebijiro by’Entumwa 5:27-29, lwiganyo luhi entumwa zalekire Abakristu boshi b’okuli, na gurhi rhwakayigamwo olo lwiganyo lwabo?

⁴ Entumwa zayerekine olwiganyo lwinja bwenene Abakristu b’okuli boshi bakulikira kuhika buno, k’okuderha “kuyumva [erhi kurhumikira] Nyamuzinda kulusha abantu.” (Osome Ebijiro by’Entumwa 5:27-29.) Enyuma z’entumwa okushurhwa enyanya z’okubêra bishwekerezi, barhenga aha kagombe kakulu k’Eciyahudi “banashagalusire bulya babonekine oku bal’ishinganine okubulirwa obukenge erhi izino lya [Yezu] lirhuma,” banagendekera bahubiri!​—Ebj. 5:40-42, NWT.

5. Madoso gahi rhushinganine rhushuzeko?

⁵ Olwiganyo entumwa zayerekanaga lwanarhuma rhwacidosa madoso malebe. Kwa lwiganyo, gurhi entumwa zakarhumikiremwo Nnâmahanga kulusha abantu n’okugendekera zakenga irhegeko ly’Amandiko lidesire oku “ngasi muntu akayumva abarhegesi bamukulire”? (Rm. 13:1) Gurhi ‘rhwakakengamwo abarhambo n’abarhegesi,’ nk’oku entumwa Paolo yaderhaga, n’okugendekera rhwabêra  bishwekerezi kuli Nnâmahanga, Murhegesi wirhu mukulu bwenene?​—Tt. 3:1.

6. (a) ‘Abarhegesi barhukulire’ baganirirwe omu lwandiko lw’Abaroma 13:1 bo bandi, na gurhi rhushinganine rhukabajirira? (b) Bici rhumanyire lugenda abarhegesi boshi bene bantu?

⁶ Osome Abaroma 13:1. Mw’olu lwandiko, oluderho “abarhegesi bamukulire” luhugwîre bene bantu bagwerhe obuhashe oku bandi bantu. Abakristu bagwasirwe barhumikire abo barhegesi bene bantu. Abo barhegesi banarhabale lyo harhabaga akavulindi, ly’abantu bakenga amarhegeko, na ciru hali amango bahalira abakozi ba Yehova. (Maf. 12:16) Co cirhumire rhurhegesirwe okulipa amatakse, okuvurha amakoli, okubayoboha, n’okubaha obukenge bahûnyire. (Rm. 13:7) Cikone, abo barhegesi bene bantu bagwerhe obuhashe bulya Yehova abalesire babe nabo. Yezu ahugwîre ako kanuni n’obwalagale erhi Guvernere Muroma Pontyo Pilato amudosa amadoso. Erhi Pilato aderha lugenda obuhashe al’igwerhe bw’okuciza Yezu erhi kurhegeka anigwe, Yezu amubwira ntya: “Nta buhashe ongwerhe kwo okuleka bulya Nnâmahanga akuhâga kurhenga enyanya.” (Yn. 19:11, Mashi Bible) Nk’oku byali lugenda Pilato, ene obuhashe bw’abarhegesi bene bantu n’obw’abantu b’epolitike boshi buba bwa lugero.

7. Maganci rhurhagwasirwi rhurhumikire abarhegesi bene bantu, na bici bashinganine bamanye?

⁷ Abakristu banarhumikire amarhegesi ga bene bantu amango amarhegeko gabo garhavunyiri amarhegeko ga Nnâmahanga. Cikone, rhurhakabarhumikira amango barhuhûnyire rhujire ebi Nnâmahanga arhuhanzize kandi erhi amango barhuhanzize ebi Nnâmahanga arhuhûnyire rhujire. Kwa lwiganyo, banahûna abalume boshi baciri misole oku bacilunge haguma n’emirhwe y’abasoda b’ecihugo lyo balwa ivita. * Erhi kandi, banahanza Ebibliya yirhu n’ebicapo birhu biyimangire oku Bibliya n’okurhuhanza okuhubiri n’okuharamya Yehova haguma na bene wirhu na bali birhu. Erhi abarhegesi bakolesa obuhashe bwabo kubi, kwa lwiganyo omu kulibuza abanafunzi ba Kristu, bagwasirwe bayish’isamba embere za Nnâmahanga. Yehova anabone ebi bali bajira!​—Muh. 5:8.

8. Lubero luhi luliho egarhi k’oluderho “bamukulire” na “mukulu bwenene,” na bulya gurhi okumanya ntyo kuli kwa bulagirire?

⁸ Oluderho “bamukulire” luhugwîre “binja, bakulu, ba cikono c’enyanya.” Cikone lurhahugwîri “binja bwenene, bakulu bwenene, ba cikono c’enyanya bwenene.” Ago go mahugûlo g’olundi luderho “enyanya bwenene.” Ciru akaba amarhegesi ga bene bantu gadesirwe oku bali ‘barhegesi barhukulire’ erhi gali makulu, hali obundi burhegesi bugwerhe ecikono c’enyanya bwenene erhi bukulu bwenene. Kani koshi omu Bibliya, Yehova Nnâmahanga ahamagirwe “Ow’Enyanya bwenene.”​—Dan. 7:18, 22, 25, 27.

9. Bici omulebi Daniyeli abwine omu bibonekerezi?

⁹ Omulebi Daniyeli abwine ebibonekerezi byayerekanaga n’obwalagale oku oburhegesi bwa Yehova buli bukulu bwenene kulusha agandi marhegesi goshi. Burhangiriza, Daniyeli abona biryanyi bini bishushanyize amarhegesi makulu g’igulu lyoshi g’omu mango ga mira, k’okuderha Babiloni, Abamedi n’Abapersi, Obugiriki, na Roma n’oburhegesi bukulu bw’igulu lyoshi bwa muli gano mango girhu, k’okuderha, Angleterre na Amerika. (Dan. 7:1-3, 17) Buzinda, Daniyeli abona Yehova Nnâmahanga atamîre omu ntebe y’obwami omu kagombe k’omu mpingu. (Dan. 7:9, 10) Ebi oyo mulebi w’obuyemere abwine buzinda buli burhonde oku barhegesi b’ene.

10. Kushimbana n’olwandiko lwa Daniyeli 7:13, 14, 27, bandi Yehova ahire oburhegesi bw’igulu, na bici oko kuyerekine kuli ye?

¹⁰ Osome Daniyeli 7:13, 14, 27. Nnâmahanga  anyaga abarhegesi ba bene bantu oburhegesi boshi anabuha abandi bashinganine bwenene banagwerhe buhashe bunji. Bandi abuhîre? Abuha “oli nka mwene omuntu,” k’okuderha Yezu Kristu, n’“abatagatifu b’Ow’Enyanya bwenene,” k’okuderha abantu 144 000 bayish’irhegeka “ensiku n’amango.” (Dan. 7:18) Bibonekine n’obwalagale oku Yehova ye “Ow’Enyanya bwenene,” bulya yene ye gwerhe obuhashe bw’okujira ecijiro ca ntyo.

11. Bindi bici Daniyeli ayandisire biyerekine oku Yehova agwerhe obuhashe bunji bwenene kulusha amashanja goshi?

¹¹ Ebyo Daniyeli abonaga omu cibonekerezi bipatine na kantu kaguma aderhaga embere z’aho. Daniyeli aderha ntya: “Nyamuzinda w’empingu . . . ye oyimika abami ayimûle n’abandi.” Kandi ayandisire oku “Nnâmahanga w’Enyanya-Bwenene ye mwami w’amami goshi g’en’igulu. Anashoboze ngasi oyu asîmire obwami.” (Dan. 2:19-21; 4:17, Mashi Bible) Ka hali amango Yehova ayimwire erhi kuyimika barhegesi balebe? Neci!

12. Ohâne olwiganyo luyerekine gurhi Yehova ayimulagamwo bami balebe omu mango ga mira. (Olole enfoto.)

¹² Yehova ayerekine n’obwalagale oku agwerhe obuhashe bunji bwenene kulusha ‘abarhegesi barhukulire.’ Rhuganirire nyiganyo isharhu. Mwami Faraoni w’e Misri ajira olubaga lwa Nnâmahanga baja na kanji-kanji alahira okubalikûla. Cikone Nnâmahanga abalikuza anazisa Faraoni omu Nyanja Ndukula. (Lub. 14:26-28; Enna. 136:15) Mwami Baltazari w’e Babiloni ajira idinye ‘analonza okucijira mukulu kulusha Nyamuzinda w’e mpingu’ kandi ‘aharamya banyamuzinda b’amarhale [erhi cuma c’ensaranga] n’ab’amasholo [erhi noro]’ ahali h’okuharamya Yehova. (Dan. 5:22, 23) Cikone Nnâmahanga arhohya oyo mulume w’obucibone. “Muli obwola budufu mwonene,” Baltazari anigwa n’obwami bwage bwahâbwa Abamedi n’Abapersi. (Dan. 5:28, 30, 31) Mwami Herodi Agripa wa I w’e Palestina arhegeka oku entumwa Yakobo enigwe na buzinda aheba entumwa Petro omu prizo erhi anagwerhe omuhigo g’okumuniga. Cikone Yehova acîka Herodi ly’arhahikirizagya ogo muhigo gwage. “Malahika wa Nyakasane [Yehova, NWT] amunesha [amuyukiriza],” anafâ.​—Ebj. 12:1-5, 21-23.

13. Ohâne olwiganyo luyerekine gurhi Yehova ahimagamwo ebigusho by’abarhegesi.

¹³ Kandi Yehova ayerekine oku agwerhe buhashe bunji kulusha ecigusho ca barhegesi balebe bal’icilunzire haguma. Ahashisize Abaisraheli bashereza bami 31 Bakanani bal’icilunzire haguma na ntyo bahima maeneo manji  g’Ecihugo c’Amalaganyo. (Yoz. 11:4-6, 20; 12:1, 7, 24) Kandi Yehova arhabire Abaisraheli bahima Mwami Ben-Hadadi loshi-loshi n’abandi bami Basiria 32 bakag’ilwisa Abaisraheli.​—1 Bam. 20:1, 26-29.

14-15. (a) Bici Mwami Nebukadnezari na Mwami Dariusi badesire lugenda oburhegesi bukulu bwenene bwa Yehova? (b) Bici omuzihi w’ennanga adesire lugenda Yehova n’ishanja lyage?

¹⁴ Kanji-kanji, Yehova ayerekine oku ali w’Enyanya Bwenene! Erhi Mwami Nebukadnezari w’e Babiloni acikungira ‘obuhashe bw’emisi yage, n’olukengwa lw’irenge lyage’ ahali h’okuyemera n’obwirhohye oku Yehova ye shinganine irenge, Nnâmahanga amusirahya. Erhi Nebukadnezari afuma ‘acîtakîra Nnâmahanga w’Enyanya-Bwenene’ anayemera oku “oburhegesi [bwa Yehova] buba bw’ensiku n’amango.” Ayushula ntya: “Ntaye wakamuhanza oku muhigo gwage.” (Dan. 4:30, 33-35, Mashi Bible) Enyuma z’obwishwekerezi bwa Daniyeli kuli Nnâmahanga okurhangulwa n’enyuma za Yehova okuciza Daniyeli kurhenga omu bulumba bw’entale, Mwami Dariusi arhegeka oku abantu “bakazirhinya n’okukenga Nyamuzinda wa Daniyeli, ebwa kuba yene ye Nyamuzinda ozine, yene ye onayorha aba ho ensiku zoshi; obwami bwage burhakayurha n’oburhegesi bwage buli bw’ensiku n’amango.”​—Dan. 6:7-10, 19-22, 26, 27.

¹⁵ Omuzihi w’ennanga adesire ntya: “Yehova atwîre omu mirâli y’amashanja; avunyire omu mihigo y’embaga.” Ayushula ntya: “Liri lya bushagaluke ishanja Yehova aba Nnâmahanga walyo, abantu acishozire oku babe buhirhi bwage ye nnene.” (Enna. 33:10, 12, NWT) Eco ciri cirhumire cinja c’okubêra bishwekerezi kuli Yehova!

16. Bici rhwakayemera n’obwalagale lugenda “amalibuko [madarhi],” na bulya gurhi? (Olole enfoto)

¹⁶ Rhwabwine ebi Yehova ajijire omu mango ga mira. Bicigi rhwakalangalira oku byajirikana omu mango gayisha gali hofi-hofi? Rhwanayemera n’obwalagale oku Yehova ayish’icungula abakozi bage bishwekerezi omu mango g“amalibuko [madarhi]” gayisha. (Mt. 24:21; Dan. 12:1) Ayish’ijira ntyo amango omulungano gw’amashanja guhamagalwa Gogi w’Amagogi gwarhera  abakozi bishwekerezi ba Yehova omw’igulu lyoshi. Ciru ogo mulungano gwakajirwa n’ebihugo 193 byoshi bilunzire okuboko Ecinyabuguma c’Amashanja, gurhakahash’ilwisa Ow’Enyanya Bwenene n’emirhwe yage y’omu mpingu! Yehova alanganyize ntya: ‘Nacikuza nanciheke [nancihe] irenge, nancimanyise emwa amashanja manji, gamanya oku nie ndi Nyamubaho [Yehova, NWT].’​—Eze. 38:14-16, 23; Enna. 46:10.

17. Bici Ebibliya elebire byayish’ihikira abami b’igulu n’abantu bagendekire okubêra bishwekerezi kuli Yehova?

¹⁷ Hano Gogi arhera abakozi ba Yehova, oko kwayish’irhuma Yehova alerha ivita lya Harmagedoni n’okushereza “ngasi mwami w’en’igulu lyoshi.” (Maf. 16:14, 16; 19:19-21) Lubero n’oko, “abantu bashinganyanya bo bàyish’irya ecihugo [igulu], entagengwa [abantu bishwekerezi, NWT] zo zàyishicibêramwo.”​—Mig. 2:21.

18. Bici Bakristu banji b’okuli babîre babidu okujira, na bulya gurhi? (Daniyeli 3:28)

¹⁸ Kurhenga mira, Bakristu banji b’okuli banyazirwe oluhuma lwabo na ciru bahebire akalamo kabo omu mazibu enyanya z’obuzigire bwabo kuli Yehova, Murhegesi Mukulu Bwenene. Abo Bakristu b’okuli baba bahizire okubêra bishwekerezi kuli Yehova; omuhigo gwabo guli nk’ogwa balya Bahabraniya basharhu bagendekeraga okubêra bishwekerezi kuli Ow’Enyanya Bwenene na buzinda abayokola omw’ifuru ly’omuliro.​—Osome Daniyeli 3:28.

19. Bici olubanja Yehova ayish’itwira abantu lwayish’iyimangirako, na bici rhugwasirwe rhujire muli gano mango?

¹⁹ Omuzihi w’ennanga Daudi ayandisire lugenda obulagirire bw’okubêra bishwekerezi kuli Nnâmahanga. Aderha ntya: “Nyamuzinda we otwira embanga emanja, ontwire olubanja lwani, kushimbana n’obushinganyanya [obwishwekerezi, NWT] n’okuli kwani.” (Enna. 7:8, Mashi Bible) Kandi Daudi ayandika ntya: “Obwishwekerezi n’obushinganyanya binange.” (Enna. 25:21, NWT) Enjira nyinja bwenene y’akalamo kuli kugendekera rhwaba n’obuyemere muli Yehova n’okubêra bishwekerezi kuli ye ciru rhwakahikirwa na mazibu gahi! Erhi rhwakajira ntyo, nirhu rhwanaciyumva ak’omuzihi w’ennanga wayandikaga ntya: “Ab’omwishingo bali balya babêra bishwekerezi . . . , balambagira omw’irhegeko lya Yehova.”​—Enna. 119:1, NWT, amahugûlo g’idako.