OMU mango g’Ivita lya Kabirhi ly’Igulu, mukulu muguma w’omurhwe gw’abasoda b’Abanazi amokera ecigusho c’Abahamirizi ba Yehova omu kuderha ntya: “Muguma muli mwe akalahira okuj’ilwisa ecihugo c’e France n’ec’e Angleterre, mweshi mwanigwa!” Ciru akaba abasoda b’Abanazi bali aha burhambi banal’igwerhe ebikolanwa byabo byoshi by’okulwa ivita, nta mwene wirhu ciru n’omuguma wayemire okuvuna amarhegeko ga Yehova. Obo bwali burhwali bunji! Olo luli lwiganyo lwinja luyerekine entanya z’Abahamirizi ba Yehova lugenda ivita; rhunalahire okulwa amavita g’er’igulu. Ciru bakarhuyobohya oku barhuniga, rhurhayemera okulunga okuboko oluhande loshi-loshi omu ntambala z’er’igulu.

1. ABANTU BA NNÂMAHANGA BOSHI LYALI ISHANJA LIGUMA LYONE

Omu mango ga mira, Yehova al’igushire abantu bage omw’ishanja liguma lyone, k’okuderha ishanja ly’Abaisraheli. Ahamagala Abaisraheli ‘lubaga lwage omu zindi mbaga zoshi.’ (Lub. 19:5, Mashi Bible) Kandi, Nnâmahanga al’ibahîre eyabo eneo. Co cirhumire, erhi Nnâmahanga arhegeka Abaisraheli oku balwise agandi mashanja, barhakag’ilwisa erhi kuniga ababo bakozi ba Yehova. *

Muli gano mango girhu, abaharamya Yehova omu njira y’okuli bali “ba ngasi cihugo, ba ngasi bûko, na ngasi ishanja, na ba ngasi lulimi luderhwa.” (Maf. 7:9) Erhi abakozi ba Nnâmahanga bakaja omu  by’okulwa amavita ene, banalwisa ababo bakozi ba Nnâmahanga erhi ciru kubaniga.

2. YEHOVA AL’IRHEGESIRE ABAISRAHELI OKU BALWE IVITA

Omu mango ga mira, Yehova akag’icishoga amango n’ecirhumire Abaisraheli bal’ishinganine balwe ivita. Kwa lwiganyo, Nnâmahanga arhegesire Abaisraheli oku balwe ivita lyo bahana Abakanani bulya bal’imanyikine bwenene oku bakag’iharamya abazimu, bakag’ijira ebijiro bibi bwenene by’enshonyi, n’okuhâna abana babo nterekêro. Yehova arhegeka Abaisraheli oku bashereze abo bantu bakag’ijira ebyo bintu bibi omu Cihugo c’Amalaganyo lyo barhag’ibayahukiza ebyo bijiro bibi. (Lev. 18:24, 25) Erhi Abaisraheli baba bakola bali balama omu Cihugo c’Amalaganyo, hali amango Nnâmahanga akag’ibayemerera balwe ivita lyo bahalira ecihugo c’e Israheli oku bashombanyi. (2 Sam. 5:17-25) Cikone, nta mango Yehova ayemerire Abaisraheli oku bone bacirholere omuhigo gw’okulwa ivita. Erhi bakajijire ntyo, kanji-kanji obuhanya bwakag’ibahikira.​—Mib. 14:41-45; 2 Nga. 35:20-24.

Muli gano mango, Yehova arharhegesiri bene bantu oku bwalwe ivita. Amashanja ganalwe amavita lyo gahikiriza ebi galonzize cikone arhali ebi Nnâmahanga alonzize. Banarhondeze ivita lyo bayushula e eneo yabo, lyo baba n’ensaranga nyinji, erhi lyo bagendekeza entanya z’epolitike. Cikone, gurhigi bala baderha oku bali balwa ivita omw’izino lya Nnâmahanga lyo balanga idîni lyabo erhi lyo baniga abashombanyi ba Nnâmahanga? Yehova ayish’ilanga abantu bamuharamya omu njira y’okuli n’okushereza abashombanyi bage oku ivita ly’amango gayisha, k’okuderha ivita lya Harmagedoni. (Maf. 16:14, 16) Mw’er’ivita, omurhwe gwa Nnâmahanga gwayish’iba gujijirwe n’ebiremwa by’ekiroho byone, cikone arhali bakozi bage bene bantu.​—Maf. 19:11-15.

3. ABAISRAHELI BARHAKAG’INIGA ABANTU BAKAG’IYEREKANA OBUYEMERE MULI YEHOVA

Omu mango ga mira, omurhwe gw’Abaisraheli kanji-kanji gwakag’ibêra obwonjo abantu bakag’iyerekana obuyemere muli Nnâmahanga n’okuniga  abantu Yehova akag’iderha oku bashinganine banigwe. Rhuganirire nyiganyo ibirhi. Ciru akaba Yehova arhegesire Abaisraheli oku bashereze evile y’e Yeriko, barhanigaga Rahabu n’omulala gwage enyanya z’obuyemere bwage. (Yoz. 2:9-16; 6:16, 17) Buzinda, evile yoshi y’e Gabaoni erhasherezibagwa bulya Abagabaoni bayerekine obukenge kuli Nnâmahanga.​—Yoz. 9:3-9, 17-19.

Muli gano mango, amashanja galwa amavita gananige n’abantu bagwerhe obuyemere muli Nnâmahanga. Ciru hali amango bacikala barhagwerhi magosa banigwa mw’ago mavita g’amashanja.

4. ABAISRAHELI BAL’IGWASIRWE BAKARHUMIKIRA AMARHEGEKO GA NNÂMAHANGA LUGENDA IVITA

Omu mango ga mira, Yehova al’ihûnyire abasoda Baisraheli bakalwa ivita kushimbana n’obulongozi bwage. Kwa lwiganyo, hali amango Nnâmahanga akag’ihûna Abaisraheli oku erhi bakalwisa lugo lulebe ‘barhang’idôsa abantu ba mwo erhi barhâlonza kulwa.’ (Lush. 20:10) Kandi Yehova al’ihûnyire abasoda Baisraheli oku bagendekere bacicêsa n’okucêsa akambi kabo omu hali y’omubiri n’omu lugenzi lwabo. (Lush. 23:9-14) Emirhwe y’abosoda b’amashanja gal’izungulusire Abaisraheli kanji-kanji bakag’ibaka abakazi omu maeneo bakag’ihima, cikone Yehova al’ihanzize Abaisraheli bohe oku barhakag’ijira ntyo. Erhi bakahimire lugo lulebe, bal’ishinganine balinde mwezi muguma gugere embere z’okurhôla omukazi bagwarhaga mw’olo lugo.​—Lush. 21:10-13.

Muli gano mango, bihugo binji byapatine okulwa amavita kushimbana na marhegeko malebe. Ciru akaba ago mapatano gaba ga kulanga bacikala, eby’okugayisa kuli kubona oku kanji-kanji amashanja ganavune ago marhegeko.

5. NNÂMAHANGA AKAG’ILWIRA ISHANJA LYAGE

Omu mango ga mira, Yehova akag’ilwira Abaisraheli, kanji-kanji akag’ibahimira omu njira y’ecisomerine. Kwa lwiganyo, gurhi Yehova arhabiremwo Abaisraheli lyo bahima evile y’e Yeriko? Oku bulongozi bwa Yehova, erhi Abaisraheli ‘bajira olôho lunene bwenene, olukuta lwahongoka,’ n’oko kwarhuma kwaba kulembu kuli bo okugwarha eyo vile. (Yoz. 6:20) Na gurhi bahimagamwo ivita balwisagya Abaamori? “Nyakasane [Yehova, NWT] abarhibulirakwo amabuye manene kurhenga e malunga, . . . Abafîre n’ago mabuye g’olubula balushire abayisirwe n’engorho ya bene Israheli.”​—Yoz. 10:6-11.

ABAKRISTU B’OKULI BABA BA KUJIRA OMURHÛLA

Nk’oku rhwabwine, akanga kirhu ene kali lubero bwenene n’aka Abaisraheli ba mira. Cikone, arhali olo lubero lone lurhuma rhurhalwa amavita. Hali ebindi birhuma. Kwa lwiganyo, Nnâmahanga alebire oku omu nsiku nzinda, abayigirizibwe naye ‘barhacicîyigirize okulwa amatumu’ erhi ivita, barhakanalijamwo ciru n’ehitya. (Iz. 2:2-4) Kandi, Kristu adesire oku abanafunzi bage “barhali cigabi c’er’igulu”; barhakalunga okuboko oluhande loshi-loshi omu mavita g’er’igulu.​—Yn. 15:19, NWT.

Kandi, Kristu abwizire abanafunzi bage oku bajire binji kulusha oko. Abayigirizize oku bakayaka entanya zilerha okubîka omujina, obukunizi, n’ivita. (Mt. 5:21, 22) Na kandi, abayigirizize oku babe bantu “balonza omurhûla” banazigire abashombanyi babo.​—Mt. 5:9, 44, Mashi Bible.

Gurhi rhwakajiramwo ntyo? Nkaba rhurhakalonza okulwa ivita ciru n’eliguma, cikone k’omu murhima gwirhu mwanaba muli enshombo yakalerha okurhayumvikana n’okugabikanamwo omu cigamba? Rhugendekerage rhwajira okwirhu koshi lyo rhukûla entanya zoshi za ntyo omu murhima gwirhu.​—Yk. 4:1, 11.

Ahali h’okulunga okuboko amavita g’amashanja, rhunagendekeze omurhûla n’obuzigire egarhi kirhu. (Yn. 13:34, 35) Lekagi rhuhige okurhalunga okuboko oluhande loshi-loshi amango rhuli rhwalinda olusiku Yehova ayusa amavita goshi emyaka n’emyaka.​—Enna. 46:9.