1. Ene, gurhi bantu banji bajira erhi bayumva amahano gw’obwenge garhenga omu Bibliya? (Emigani 1:20, 21)

 OMU bihugo binji, abantu bakag’ibona abahubiri b’Obwami bagwerhe omwishingo bali baha abantu bali bagera ebicapo. Ka nawe okola okolesize eyo njira nyinja y’okuhubiri? Akaba okola oyikolesize, buzira karhinda yakukengezize ezo nderho z’olwiganyo ziri omu citabu c’Emigani, zidesire oku obwenge buli bwayakûliza omu muhanda ly’abantu bayumva ihano lyabo. (Osome Emigani 1:20, 21.) Ebibliya n’ebicapo birhu bibamwo “obwenge bw’okunali,” k’okuderha obwenge burhenga emwa Yehova. Ogo go mwanzi abantu balagirireko lyo barhondera okulambagira omu njira ehêka ebwa buzine. Rhunashagaluke bwenene erhi muntu mulebe ayemera ecicapo cirhu. Cikone arhali bantu boshi bayemera ebicapo birhu. Bantu baguma na baguma barhasima okumanya ebi Ebibliya edesire. Abandi banarhushekere. Banarhanye mpu Ebibliya ciri citabu ca mira na nta bunguke cicigwerhe. N’abandi banakagayaguza ebi Ebibliya eyigirizize lugenda olugenzi lwinja, banaderhe oku abakulikira ezo nyigirizo barhaba ba lugero bananakacibona oku bo bashinganyanya. Cikone, enyanya z’obuzigire bwage, Yehova agendekire okuha abantu boshi obwenge bw’okunali. Omu njira nci ali abuhânamwo?

2. Gurhi abantu bakapatamwo obwenge bw’okunali ene, cikone gurhi bantu banji bahiga okujira?

² Enjira nguma Yehova akolesa ly’abantu bayumva obwenge bw’okunali kali Kanwa kage Bibliya. Hofi ngasi muntu anapata eco citabu. Gurhigi lugenda ebicapo birhu biyimangire oku Bibliya? Kugerera emigisho ya Yehova, ebyo bicapo biri omu ndimi zirhalusire 1 000. Abayumvirhiza, k’okuderha abasoma n’okukolesa ebi bali bayiga banabe n’obunguke. Cikone, bantu banji banacishoge okurhayumvirhiza izu ly’obwenge bw’okunali. Amango bagwerhe  emihigo y’okurhôla, banasime okucilangalira bo nnene erhi okuyumvirhiza ababo bene bantu. Ciru banarhugayaguza bulya rhunahige okushimba ebi Ebibliya edesire. Eci cigabi caganirira bulya gurhi abantu bajira ntyo. Cikone, rhurhang’iganirira gurhi rhwakapatamwo obwenge burhenga emwa Yehova.

3. Bici obwenge bw’okunali buhugwîre?

³ Obwenge bwanahugûlwa nka buhashe bw’okukolesa ebi rhumanyire lyo rhurhôla emihigo minja. Cikone, obwenge bw’okunali buhugwîre bintu binji. Ebibliya edesire ntya: “Okurhinya Yehova go murhondero gw’obwenge, n’okumanya Omutagatifu Bwenene ko kuhugûkwa ebintu.” (Mig. 9:10, NWT) Co cirhumire, erhi rhwakaba rhugwerhe omuhigo gw’obulagirire bwenene gw’okurhôla, gushinganine guyimangire oku ntanya za Yehova, k’okuderha “okumanya Omutagatifu Bwenene.” Rhwanajira ntyo omu kulola ebi Ebibliya edesire n’ebicapo birhu. Erhi rhujira ntyo, rhunayerekane obwenge bw’okunali.​—Mig. 2:5-7.

4. Bulya gurhi Yehova yene ye wakarhuha obwenge bw’okunali?

⁴ Yehova yene wakarhuha obwenge bw’okunali. (Rm. 16:27) Bulya gurhi rhwakaderha oku Yehova ye Nshôko y’obwenge? Burhangiriza, bulya ye Mulemi, agwerhe obumanye burhagwerhi lugero anaba ahugûsirwe bwinja ebintu alemire. (Enna. 104:24) Bwa kabirhi, ngasi ebi Yehova ajira byoshi binayerekane oku agwerhe obwenge. (Rm. 11:33) Bwa kasharhu, amahano ga Yehova g’obwenge ensiku zoshi ganalerhere obunguke abagakolesa. (Mig. 2:10-12) Erhi akaba rhulonzize rhube n’obwenge bw’okunali, rhugwasirwe rhuyemere ebyo bintu bisharhu by’omusingi n’okuleka bikalongoza emihigo yirhu n’ebijiro birhu.

5. Okurhayemera oku Yehova ye Nshôko y’obwenge bw’okunali, bici kwadwirhe?

⁵ Bantu banji omw’igulu banayemere oku ebintu babona bibazungulusire biba bya kusomeza; cikone banalahire okuyemera oku ho Omulemi aba, bananaderhe mpu ebintu kuhinduka byajire byahinduka-hinduka. Abandi banaderhe oku bayemire Nnâmahanga, cikone banakabona nk’amakanuni g’Ebibliya gakola ga mira bwenene bananacishoge okulama nk’oku balonzize. Bici oko kwadwirhe? K’igulu lyabire linja okubona abantu banayegemere obwenge bwabo bone ahali h’okuyegemera obwenge bwa Nnâmahanga? K’abantu babire n’omwishingo gw’okunali erhi bulangalire busêzire lugenda amango gayisha? Ebi rhuli rhwacibonera omw’igulu birhuyemezize n’obwalagale ezi nderho z’okuli: “Harhaba bwenge, erhi burhimanya, erhi ihano omu kuhagalika Yehova.” (Mig. 21:30, NWT) Kobinali, ezo nderho zirhushumize rhugendekere rhwasengera Yehova arhuhe obwenge bw’okunali! Eby’okugayisa kuli kubona oku bantu banji barhajira ntyo. Bulya gurhi?

6. Kushimbana n’olwandiko lw’Emigani 1:22-25, bandi balahira okuyumvirhiza obwenge bw’okunali?

⁶ Bantu banji barhayumvirhiza amango obwenge bw’okunali “budwirhe bwayakûliza omu njira.” Kushimbana n’Ebibliya, hali bigusho bisharhu by’abantu barhayumvirhiza obwenge: ‘ebingolo-ngolo,’ “ba-cinya-masheka,” n’“abahwinja.” (Osome Emigani 1:22-25.) Rhuganirirage kwa buliri engeso zirhuma abantu ba ntyo balahira obwenge burhenga emwa Nnâmahanga, rhunalole gurhi rhwakayakamwo okuba n’ezo ngeso.

7. Bulya gurhi bantu baguma na baguma bacishoga okubêra “bingolo-ngolo”?

⁷ ‘Ebingolo-ngolo’ bali bantu bayemereza ngasi kantu, bakanashumikwa, erhi kurhebwa  duba-duba. (Mig. 14:15.) Kanji-kanji, rhunarhimanane n’abantu ba ntyo omu mukolo gwirhu gw’amahubiri. Kwa lwiganyo, orhanye oku miliyoni y’abantu bali barhebwa n’ebirongozi by’amadîni erhi birongozi by’epolitike. Bantu baguma na baguma banagaye bwenene erhi bamanya oku barhebirwe n’ebyo birongozi. Cikone abo baganirirwe omu lwandiko lw’Emigani 1:22 banacishoge okubêra bingolo-ngolo erhi bantu barhagwerhi bumanye bulya balonzize okubêra ntyo. (Yer. 5:31) Banakajira ebi balonzize barhanalonza okuyiga ebi Ebibliya edesire erhi okurhumikira amakanuni gayo. Banji banaciyumve aka mukazi muguma wal’izigire eby’idîni bwenene w’omu vile y’e Québec, omu Canada, wabwiraga Muhamirizi muguma wal’imulambagirire ntya: “Erhi akaba padiri wirhu arhurhebire, elyo lyayish’iba igosa lyage, ci arhali igosa lirhu!” Kobinali, rhurhalonzizi rhuyige olwiganyo lw’abo balonza bonene okubêra buzira bumanye!​—Mig. 1:32; 27:12.

8. Bici byakarhurhabala lyo rhuba n’obwenge?

⁸ Ebibliya egwerhe ecirhumire cinja c’okurhuha omurhima oku rhurhagendekeraga rhwabêra bingolo-ngolo erhi bantu barhagwerhi bumanye, cikone ‘omu kurhimanya, rhubê bantu bakulu.’ (1 Kr. 14:20) Rhunabe n’obwenge omu kukolesa amakanuni g’Ebibliya omu kalamo kirhu. Rhunacibonere bunyi-bunyi gurhi ago makanuni garhurhabala rhuyake amazibu n’okurhôla emihigo y’obwenge. Kuli kwinja rhukalabiriza amajambere rhwamakajira muli oko. Erhi akaba rhukola rhugwerhe kasanzi kalebe rhuli rhwayiga Ebibliya n’okuja oku ntimanano, rhwanacidosa bulya gurhi rhurhasag’irhôla omuhigo gw’okucihâna emwa Yehova n’okubatizibwa. Akaba rhwabatizibwe, ka rhuli rhwajira amajambere lyo rhuba bahubiri na balimu binja? K’emihigo yirhu enayerekane oku rhuli rhwalongozibwa n’amakanuni g’Ebibliya? Ka rhunayerekane amorhere g’Ecikristu muli oku rhujirira abandi? Erhi rhwakabona oku rhugwasirwe rhujire empindulo, rhushinganine rhurhanye bwenene oku nyigirizo Yehova arhuyigiriza bulya zo ‘ziyengehya embula-bwenge ebe n’obumanye.’​—Enna. 19:7, Mashi Bible.

9. Gurhi “ba-cinya-masheka” bayerekanamwo oku balahire obwenge?

⁹ Ecigusho ca kabirhi c’abantu balahira obwenge burhenga emwa Nnâmahanga bali “ba-cinya-masheka” erhi bantu barhushekera. Hali amango rhurhimanana n’abantu ba ntyo omu mukolo gwirhu gw’amahubiri. Banashagalukire okushekera abandi. (Enna. 123:4) Ebibliya yarhonzire oku omu nsiku nzinda, hakabire bantu banji ba kushekera abandi. (2 Pt. 3:3, 4) Nk’oku abakwi b’omulume mushinganyanya Loti bakag’ijira, ene bantu baguma barhali bayumvirhiza oburhonde kurhenga emwa Nnâmahanga. (Murh. 19:14) Banji banashekere abalama kushimbana n’amakanuni g’Ebibliya. Abo bantu barhushekera banashumibwe n’“irala ly’obubi bwabo.” (Yd. 7, 17, 18) Ebi Ebibliya edesire lugenda abo bantu barhushekera bipatine n’entanya z’abagoma n’abandi bantu balesire Yehova!

10. Nk’oku olwandiko lw’Ennanga 1:1 luyerekine, gurhi rhwakayakamwo okuba bantu bashekera abandi?

¹⁰ Gurhi rhwakacilangamwo lyo rhurhag’iyiga oborhere bw’abo bantu bakashekera abandi? Njira nguma rhwakajiramwo ntyo kuli kuyaka okujira obwîra haguma n’abantu baciduduma lugenda ngasi kantu. (Osome Ennanga 1:1.) Oko kuli kuderha oku rhurhashinganini rhukayumvirhiza erhi kusoma akantu koshi-koshi k’abagoma. Rhunahugûkwe oku erhi akaba rhurhabiri masu, rhwanarhondera okuciduduma lugenda ngasi kantu n’okuba n’akarhinda lugenda enjira ya Yehova y’okujira ebintu n’obulongozi rhuhâbwa kugerera ikubuliro lyage. Co cirhumire, rhushinganine rhucidose ntya: ‘Ka ngasi mango nancidudume erhi rhuhâbwa obulongozi buhyahya erhi mahugûlo mahyahya?  Ka nanje nalongereza amagosa oku bantu bali barhulongoza?’ Erhi rhwakaba babidu okuyaka ezo ngeso, Yehova anarhushagalukira.​—Mig. 3:34, 35.

11. Gurhi “abahwinja” babona amakanuni ga Yehova g’olugenzi lwinja?

¹¹ Ecigusho ca kasharhu c’abantu balahira omwenge bali “abahwinja.” Bali bahwinja bulya banalahire okulama kushimbana n’amarhegeko ga Nnâmahanga g’olugenzi lwinja. Banajire ebi babwine binja omu masu gabo bonene. (Mig. 12:15) Abo bantu ba ntyo, banalahire okuyumvirhiza Yehova, Nshôko y’obwenge. (Enna. 53:1) Erhi rhurhimanana nabo omu mukolo gw’amahubiri, kanji-kanji banarhugayaguze okubona rhuli rhwarhumikira amakanuni g’Ebibliya. Cikone barhakarhuha akalamo kinja. Ebibliya edesire ntya: “Omuhwînja mpu oburhimanya [obwenge bw’okunali, NWT] buli enyanya bwenene, arhanabumbûla kanwa aha ngombe.” (Mig. 24:7) Abahwinja barhajira mahano g’obwenge bakarhuha. Co cirhumire Yehova arhuhanwire oku ‘rhuyake omuhwinja’!​—Mig. 14:7, Mashi Bible.

12. Bici byakarhurhabala lyo rhuyaka okujira ebijiro biri nk’eby’abahwinja?

¹² Lubero n’abantu barhashagalukira amahano ga Nnâmahanga, rhunayige okuzigira enjira zage, zihiziremwo amakanuni g’olugenzi lwinja. Rhwanazigira bwenene enjira za Nnâmahanga omu kulola ebihikira abamurhumikira n’abarhamurhumikira. Olole amazibu abantu bacilerhera bonene enyanya z’okulahira amahano ga Yehova g’obwenge erhi buhwinja bwabo burhuma. Buzinda, olole gurhi akalamo kawe kaba kinja enyanya z’okurhumikira Nnâmahanga.​—Enna. 32:8, 10.

13. Ka Yehova anarhusêze lyo rhurhumikira amahano gage g’obwenge?

¹³ Yehova ahîre abantu boshi obulyo bw’okuba n’obwenge, cikone arhasêza omuntu yeshi-yeshi mpu abuyemere. Ciru akaba ntyo, arhuyeresire ebihikira abalahira okuyumvirhiza obwenge. (Mig. 1:29-32) Abacishoga okurharhumikira Yehova “bàlya amalehe gw’obuhabusi bwabo.” Enjira yabo y’akalamo yayish’ibalerhera amalumwa, amazibu, na buzinda bayish’isherezibwa. Lubero n’oko, abayumvirhiza amahano ga Yehova g’obwenge n’okugakolesa omu kalamo kabo balaganyizibwe ntya: “Onyumva yehe ayorha adekerîre, anarhulûle buzira kuyoboha buhanya buci.”​—Mig. 1:33.

14-15. Bici olwandiko lw’Emigani 4:23 lurhuyigirizize?

¹⁴ Erhi rhukolesa obwenge burhenga emwa Nnâmahanga omu kalamo kirhu, ngasi mango rhunabe n’obunguke. Nk’oku rhwaganiriraga, kuba kulembu okupata amahano g’obwenge garhenga emwa Yehova. Kwa lwiganyo, omu citabu coshi c’Emigani, arhuhîre amahano gakola ensiku zoshi gakarhurhabala okujira akalamo kirhu kabe kinja erhi rhwakagakolesa. Rhuganirirage nyiganyo ini zone z’ago mahano g’obwenge.

¹⁵ Olange omurhima gwawe gw’olwiganyo. Ebibliya edesire ntya: “Olange omurhima gwawe, kulusha ebindi byoshi, gwo guba nshôko  y’obuzine.” (Mig. 4:23) Orhanye kw’ebi rhuhûnyirwe okujira lyo rhulanga omurhima gwirhu gw’okunali. Rhushinganine rhukalya ebiryo binja, rhukajira e sporo ngasi mango, n’okuyaka enkomedu mbi. Rhunajire ebishushine n’ebyo lyo rhulanga omurhima gwirhu gw’olwiganyo. Rhunacilise Akanwa ka Nnâmahanga ngasi lusiku. Rhunarheganye entimanano z’ecigamba n’okuzijako, n’okuhâna amashuzo. Rhunagendekere rhwacikomereza omu kuja ngasi mango omu mukolo gw’amahubiri. Rhunanayake okuba n’enkomedu mbi omu kucilanga na ngasi kantu kakazinza entanya zirhu, nk’ebintu bibi by’okucishagalusa n’abîra babi.

16. Bulya gurhi olwandiko lw’Emigani 23:4, 5 lwanarhurhabala bwenene ene?

¹⁶ Orhimukwe n’ebi ogwerhe. Ebibliya erhuhanwire ntya: “Orhacîrhamagya mpu walwira okuhirhira, . . . Obuhirhi obukonolîre amasu, arhabubwini. Bulyala kwo bujira ebyubi nk’ikozi, lyo liyakira oku nkuba.” (Mig. 23:4, 5) Ebirugu n’ensaranga kuhwa bihwa. Cikone, ene abagale n’abakenyi boshi banahangayikire bwenene ensaranga. Oko kuzihanganyikira bwenene kunarhume bashereza irenge lyabo, obwîra haguma n’abandi, ciru n’amagala gabo. (Mig. 28:20; 1 Tm. 6:9, 10) Lubero n’oko, obwenge bunarhurhabale rhube n’entanya z’olugero lugenda ensaranga. Ezo ntanya z’olugero zinarhulange lyo rhurhabaga ba kukonolera eby’en’igulu amasu, zinarhume rhwarhimukwa n’okuba n’omwishingo.​—Muh. 7:12.

17. Gurhi rhwakabamwo n’‘olulimi lw’ab’obwenge,’ nk’oku olwandiko lw’Emigani 12:18 ludesire?

¹⁷ Okarhanya embere oderhe. Erhi akaba rhurhabiri masu, enderho zirhu zanalerha mazibu manji. Ebibliya edesire ntya: “Ola oderha duba buzira kugerêreza anayagaze owabo nka ngorho, cikwone enderho z’ab’obumanye [ab’obwenge, NWT] buba bufûmu.” (Mig. 12:18, Mashi Bible) Rhunarhabale okugendekeza omurhûla amango rhuli rhwayaka okuderha-derha lugenda amagosa g’abandi. (Mig. 20:19) Ly’enderho zirhu zifumya abandi ahali h’okubayagaza, rhugwasirwe rhuyunjuze omu mirhima yirhu obumanye kurhenga omu Kanwa ka Nnâmahanga. (Lk. 6:45) Erhi rhwakakarhanya bwenene kw’ebi Ebibliya edesire, enderho zirhu zanaba “nshôko y’obwenge” na kandi zanaha abandi omurhima.​—Mig. 18:4, NWT.

18. Gurhi okukolesa olwandiko lw’Emigani 24:6 kwakarhurhabala lyo rhuba n’amalehe minja omu mukolo gw’amahubiri?

 ¹⁸ Okarhumikira obulongozi. Ebibliya erhuhîre er’ihano lyakarhurhabala: “Obumanye [obwenge, NWT] bwanarhuma walwa entambala, n’okuhima kurhenga omu bahanûzi banji.” (Mig. 24:6, Mashi Bible.) Rhuganirire gurhi okukolesa ako kanuni kwakarhurhabala lyo rhuba n’amalehe minja omu mukolo gwirhu gw’okuhubiri n’okuyigiriza. Ahali h’okujira omukolo gw’amahubiri nk’oku rhunalonzize, rhunacihangane okukulikira obulongozi rhuhabwa. Rhunahabwe amahano g’obwenge oku ntimanano zirhu z’ecigamba; kw’ezo ntimanano, abahanûzi bagwerhe obulenga banageze ehotuba n’ebipindi biyimangire oku Bibliya lyo barhukomereza. Kandi, ikubuliro lya Yehova linarhuhe ebikolanwa binja, k’okuderha ebicapo n’amavideo garhabala abantu bahugûkwe Ebibliya. K’oli wacikomereza okukolesa ebyo bikolanwa bwinja?

19. Gurhi ociyumva lugenda obwenge Yehova arhuha? (Emigani 3:13-18)

¹⁹ Osome Emigani 3:13-18. Rhuvuzire omunkwa bwenene oku mahano minja rhukûla omu Kanwa ka Nnâmahanga! Gurhi akalamo kirhu kakabire buzira ago mahano? Mw’eci cigabi rhwaganirire enyiganyo z’amahano g’obwenge gali omu citabu c’Emigani. Kobinali, Yehova arhuhîre amahano g’obwenge kugerera Amandiko. Lekagi rhuhige okukolesa omu ngasi cigabi c’akalamo kirhu obwenge Yehova arhuha. Oku igulu libona obo bwenge kurhali kwa bulagirire kuli rhwe; rhwehe rhuyemire n’obwalagale oku ‘ogwerhe [obwenge] anashube muntu obêrîrwe.”