1. Bulangalire buhi Yehova arhuhîre?

 YEHOVA arhuhîre obulangalire bwinja bwenene bw’obuzine bw’ensiku n’amango. Baguma na baguma bagwerhe obulangalire bw’okulama ensiku n’amango e mpingu nka biremwa by’ekiroho birhakafâ. (1 Kr. 15:50, 53) Cikone banji bagwerhe obulangalire bw’okuyish’ilama ensiku n’amango hanw’igulu bagwerhe n’amagala mimana n’omwishingo. (Maf. 21:3, 4) Rhube rhugwerhe obulangalire bw’okulama e mpingu erhi hanw’igulu, obulangalire bwirhu buba bwa ngulo ndarhi kuli rhwe.

2. Bici obulangalire buba buyimangireko, na bulya gurhi rhwakaderha ntyo?

² Oluderho “bulangalire,” nk’oku lukolesibwe omu Bibliya, lwanahugûla “okulinda oku ebintu binja byajirikana.” Obulangalire bwirhu lugenda amango gayisha bwahikirira bulya burhenzire emwa Yehova. (Rm. 15:13) Rhumanyire ebi arhulaganyize, rhunamanyire oku anahikirize ebiragane byage ngasi mango. (Mib. 23:19) Rhuyemire n’obwalagale oku Yehova agwerhe obulonza n’obuhashe bw’okuhikiriza ngasi kantu alaganyize. Co cirhumire, obulangalire bwirhu burhayimangiri kw’ebi rhuli rhwagerereza erhi kw’ebi rhulonzize bibe; cikone buyimangire kw’ebi rhumanyire oku biri by’okuli.

3. Bici rhwaganirira mw’eci cigabi? (Ennanga 27:14)

³ Larha wirhu w’omu mpingu aba arhuzigire, anaba alonzize rhumulangalire. (Osome Ennanga 27:14.) Erhi rhwakaba rhugwerhe obulangalire buzibu kuli Yehova, rhwanahash’ilembera amarhangulo rhwananaba n’oburhwali n’omwishingo ciru mazibu gahi gakarhuhikira omu mango gayisha. Rhulolage gurhi obulangalire bwirhu burhulangamwo. Co cirhumire, rhwarhang’iganirira bulya gurhi obulangalire bwirhu buba nka nanga na nka nsirha y’ecuma. Buzinda, rhwaganirira gurhi rhwakazibuhyamwo obulangalire bwirhu.

4. Gurhi obulangalire bubamwo nka nanga? (Abahabraniya 6:19)

⁴ Omu maruba entumwa Paolo yayandikiraga Abahabraniya, yashushanyize obulangalire bwirhu na enanga. (Osome Abahabraniya 6:19.) Bulya kanji-kanji Paolo akag’ijira omubalamo omu nyanja, al’imanyire oku enanga enakolesibwe ly’erhabala ebato erhag’ihekwa n’empusi. Mango maguma, haba omulaba mudarhi amango ali omu bato. Amango g’ogo mulaba, abwine gurhi abanyakazi b’omu bato barhogezagya enanga omu mishi lyo bacîka eyo bato erhag’ihekwa n’omulaba n’okuhangarhana omu mabuye madarhi. (Ebj. 27:29, 39-41) Nk’oku enanga erhabala ebato, obulangalire bwirhu bunarhurhabale lyo rhurhadundaganaga n’okuja kuli na Yehova erhi rhwakahikirwa n’amazibu gali nka mulaba mudarhi. Obulangalire bwirhu bunarhurhabale rhugendekere rhwarhulirira erhi rhwakahikirwa n’amazibu bulya rhumanyire oku akasanzi kinja kayiruka. Okengere oku Yezu arhurhonzire oku rhwakalibuzibwe. (Yn. 15:20) Co cirhumire, okurhanya bwenene oku luhembo lw’amango gayisha rhulaganyizibwe kunarhurhabale rhurhadundaganaga omu lugenzi lwirhu lw’Ecikristu.

5. Gurhi obulangalire bwahîremwo Yezu emisi amango ali hofi h’okufâ?

⁵ Orhanye gurhi obulangalire bwarhabiremwo Yezu ly’agendekera okubêra mwishwekerezi ciru akaba al’imanyire oku afâ olufû lw’amalumwa manji. Olusiku lwa Pentekoste mwaka gwa 33 muli Kano Kasanzi Kirhu (K.K.K.), entumwa Petro yagalukira obulebi buli omu citabu c’Ennanga buyerekine bwinja-bwinja gurhi Yezu agendekire okurhulirira n’okurhaba n’oboba: “Omubiri gwani gwayish’iluhukira omu bulangalire; bulya orhankaleka omûka gwani gwabêra omu Kuzimu, orhankanayemera omwira wawe abolere omu nshinda. . . . Wanacinyunjuza masîma olusiku nabona obusu bwawe.” (Ebj. 2:25-28; Enna. 16:8-11) Ciru akaba Yezu al’imanyire oku afâ, al’igwerhe obulangalire buzibu oku Nnâmahanga akamufûzire n’oku akabire n’omwishingo gw’okucib’ibuganana n’Ishe omu mpingu.​—Hb. 12:2, 3.

6. Bici mwene wirhu muguma adesire okubiyerekire obulangalire?

⁶ Obulangalire bwirhu bw’Ecikristu bwarhabire bene wirhu na bali birhu banji lyo balembera. Rhuganirire olwiganyo lwa Leonard Chinn, mwene wirhu muguma w’obuyemere wal’ilamire omu cihugo c’e Angleterre. Omu mango g’Ivita lya Burhanzi ly’Igulu, ahebwa omu prizo erhi alahira okuja omu kazi k’ecisoda. Ajijire myezi ibirhi ashwekirwe ahantu hage yene, n’enyuma z’aho bamusêza okujira emikolo midarhi. Buzinda ayandika ntya: “Ebyampikiraga byantabire nahugûkwa oku rhulagirire bwenene oku bulangalire lyo rhuhash’ilembera. Rhugwerhe olwiganyo lwa Yezu, entumwa, n’abalebi, rhugwerhe n’ebiragane binja bwenene biri omu Bibliya. Ebyo byoshi binarhuhe obulangalire buzibuhire lugenda akasanzi kayisha n’okurhuha emisi y’okulembera.” Obulangalire bwali nka nanga kuli Leonard, na nirhu bwanaba nka nanga kuli rhwe.

7. Gurhi amarhangulo gazibuhyamwo obulangalire bwirhu? (Abaroma 5:3-5; Yakobo 1:12)

⁷ Erhi rhulembera amarhangulo n’okubona gurhi Yehova arhurhabire, rhunahugûkwe oku rhuyemirwe naye n’oko kunarhume obulangalire bwirhu bwazibuha bwenene. (Osome Abaroma 5:3-5; Yakobo 1:12.) Muli ntyo obulangalire bwirhu bunazibuhe bwenene kulusha oku byali erhi rhuyumva omwanzi mwinja oburhangiriza. Shetani alonzize amazibu girhu garhuvunyange, cikone kugerera oburhabale bwa Yehova rhwanahash’igalembera goshi.

8. Gurhi obulangalire bubamwo nka nsirha y’ecuma? (1 Abatesalonika 5:8)

⁸ Kandi Ebibliya eshushanyize obulangalire bwirhu n’ensirha y’ecuma. (Osome 1 Abatesalonika 5:8.) Omusoda anayambale ensirha y’ecuma ly’elanga irhwe lyage lyo lirhag’ihikwako n’emiherho y’abashombanyi bage. Omw’ivita lirhu ly’ekiroho, rhushinganine rhulange entanya zirhu lyo zirhag’ihikwako n’ebirhero bya Shetani. Anakolese bintu binji ly’arhurhangula n’okushereza entanya zirhu. Nka kula ensirha y’ecuma elanga irhwe ly’omusoda, obulangalire bwirhu bunalange entanya zirhu lyo rhugendekera okubêra bishwekerezi kuli Yehova.

9. Bici bihikira abantu amango barhagwerhi bulangalire?

⁹ Obulangalire bwirhu bw’obuzine bw’ensiku n’amango bunarhurhabale rhukakola n’obwenge n’oburhimanya. Cikone, erhi obulangalire bwirhu bwakazambanya rhukanaleka entanya z’omubiri ziyunjule omu bukengere bwirhu, rhwanayibagira obulangalire bwirhu bw’obuzine bw’ensiku n’amango. Orhanye lugenda ebyahikiraga Bakristu baguma na baguma bal’ilamire omu vile y’e Korinti ya mira. Bahêza obuyemere omu ciragane ciguma c’obulagirire ca Nnâmahanga, k’okuderha obulangalire bw’obufûke. (1 Kr. 15:12) Paolo ayandika oku abantu barhajira bulangalire lugenda akalamo k’amango gayisha banalame nk’oku banalonzize. (1 Kr. 15:32) Ene, bantu banji barhagwerhi obulangalire omu biragane bya Nnâmahanga banalame nk’oku banalonzize omu kujira ngasi kantu bakanahasha lyo bacishagalusa omu kalamo. Cikone rhwehe rhulangalire akasanzi kayisha Nnâmahanga arhulaganyize. Obulangalire bwirhu buba nka nsirha y’ecuma elanga entanya zirhu n’okurhurhabala lyo rhurhag’icisegezako obwenge bulya oko kwanashereza obwîra birhu haguma na Yehova.​—1 Kr. 15:33, 34.

10. Gurhi obulangalire bwakarhulangamwo lyo rhurhag’iba n’entanya mbi?

¹⁰ Kandi, obulangalire bwirhu bwanarhulanga lyo rhurhag’ikarhanya mpu rhurhakahasha okushagalusa Yehova ciru rhwakajira gurhi. Kwa lwiganyo, hali abantu bakarhanya ntya: ‘Ntakaba omu bantu bayish’ilama ensiku n’amango. Ntashinganini ciru n’ehitya. Nta lusiku nakahasha okulama kushimbana n’amakanuni ga Nnâmahanga.’ Okengere oku Elifazi, murhuliriza muguma w’obunywesi wa Ayubu, arhanyize ntyo haguma na Ayubu. Elifazi aderha ntya: “Kurhi omuntu ankabâ mwêru-kwêru?” Buzinda aderha ntya lugenda Nnâmahanga: “Lola oku ciru abatagatifu bage arhacikubagirabo, n’amalunga garhaba mêru-kwêru omu masû gage.” (Ayu. 15:14, 15) Kobinali obo buli bunywesi! Okengere oku Shetani ye lonzize obe n’entanya za ntyo. Amanyire oku erhi wakagendekera waba n’entanya za ntyo, wanahêza obulangalire bwawe. Co cirhumire, olahire obunywesi bwa ntyo, onasegeze obwenge oku biragane bya Yehova. Buzira karhinda, alonzize olame ensiku n’amango na kandi akurhabala ly’ohikira ogo muhigo gwawe.​—1 Tm. 2:3, 4.

11. Bulya gurhi rhushinganine rhube ba kulembera amango rhuli rhwalinda oku obulangalire bwirhu bwahikirizibwa?

¹¹ Ensiku zoshi, kurhaba kulembu okugendekera rhwazibuhya obulangalire bwirhu. Amango rhuli rhwalinda okuhikirizibwa kw’ebiragane bya Nnâmahanga, nkaba rhwanavunika omurhima. Cikone, Yehova aba w’ensiku n’amango n’oku abona akasanzi arhali ko rhukabona. (2 Pt. 3:8, 9) Ahikiriza ebiragane byage omu njira nyinja bwenene, cikone nkaba arhali omu kasanzi rhulangalire oku ly’ajira ntyo. Omu mango rhuli rhwalinda oku Nnâmahanga ahikiriza ebiragane byage, bici byakarhurhabala lyo rhugendekera rhwazibuhya obulangalire bwirhu?​—Yk. 5:7, 8.

12. Kushimbana n’Abahabraniya 11:1, 6, gurhi obuyemere bwakarhurhabala lyo rhuba n’obulangalire?

¹² Rhwanagendekera rhwazibuhya obulangalire bwirhu erhi rhakagendekera rhwayegera Yehova, bulya ye wahikiriza obo bulangalire bwirhu. Lyo rhuba n’obulangalire, rhugwasirwe rhuyemere oku ho Yehova aba n’oku ‘anahembe abamulonza.’ (Osome Abahabraniya 11:1, 6.) Oku  rhwagendekera okuyemera oku Yehova aba muntu w’okunali, ko rhwanagendekera okulangalira oku ahikiriza ebi arhulaganyize byoshi. Rhuganirirage ebi rhwakajira lyo rhusêza obwîra bwirhu haguma na Yehova n’okugendekera rhwazibuhya obulangalire bwirhu.

13. Gurhi rhwakajira lyo rhuyegera Nnâmahanga?

¹³ Okayegera Yehova kugerera isala n’okusoma Akanwa kage. Ciru akaba rhurhabona Yehova, rhwanamuyegera. Rhwanaganira naye kugerera isala erhi rhunayemire n’obwalagale oku arhuyumvirhiza. (Yer. 29:11, 12) Rhwanayumvirhiza Nnâmahanga omu kusoma Akanwa kage n’okukarhanyako bwenene. Okusoma emyanzi eyerekine gurhi Yehova ashibiriragamwo abakozi bage bishwekerezi b’omu mango ga mira kwanarhuma obulangalire bwirhu bwagendekera bwazibuha. Ebiba omu Kanwa ka Nnâmahanga byoshi “byayandikagwa mîra mpu birhuyigirize, lyo rhuba n’obulangalire omu njira y’okukolesa obulembêdu n’oburhwali Amandiko garhuha.”​—Rm. 15:4, Mashi Bible.

14. Bulya gurhi kuli kwinja rhukarhanya kw’ebi Yehova ajirire abandi bakozi bage bishwekerezi?

¹⁴ Okarhanya bwenene lugenda gurhi Yehova ahikirizizemwo ebiragane byage. Orhanye kw’ebi Nnâmahanga ajiriraga Abrahamu na Sara. Balikola bali omu myaka barhakacibusiremwo. Ciru akaba ntyo, Nnâmahanga abalaganya oku baburha omwana. (Murh. 18:10) Gurhi Abrahamu ajijire? Ebibliya edesire ntya: “Abrahamu ayemire, na ntyo ahinduka ishe w’amashanja mwandu.” (Rm. 4:18) Ciru akaba mwene muntu akarhanyize oku birhakacihashikana, Abrahamu ayemera n’obwalagale oku Yehova akahikirizize eciragane cage. Oyo mulume w’obuyemere arhavunikaga omurhima. (Rm. 4:19-21) Emyanzi ya ntyo erhuyigirizize oku ensiku zoshi, rhwanalangalira n’obwalagale oku Yehova ahikiriza ebiragane byage, ciru rhwakabona nk’oko kurhakahashikana.

15. Bulya gurhi rhushinganine rhukarhanya bwenene kw’ebi Nnâmahanga arhujirire?

 ¹⁵ Okarhanya kw’ebi Yehova akujirire. Orhanye gurhi wene wayungusiremwo omu kuhikirizibwa kw’ebiragane biri omu Kanwa ka Nnâmahanga. Kwa lwiganyo, Yezu alaganyize oku Ishe akuhikirigiza ebintu by’obulagirire omu kalamo kawe. (Mt. 6:32, 33) Kandi Yezu akuyemezize n’obwalagale oku Yehova akuha iroho lyage litagatifu erhi wakamuhûna lyo. (Lk. 11:13) Yehova ahikirizize ebyo biragane byage. Nkaba wanarhanya oku bindi biragane akuhikirigize. Kwa lwiganyo, akulaganyize oku akubabalira, akurhuliriza, n’okukulisa omu hali y’ekiroho. (Mt. 6:14; 24:45; 2 Kr. 1:3) Erhi wakakarhanya kw’ebi Nnâmahanga amakakujirira, wanalangalira bwenene ebi akujirira omu mango gayisha.

16. Bulya gurhi obulangalire eba ngalo nyinja bwenene?

¹⁶ Obulangalire bwirhu bw’obuzine bw’ensiku n’amango eba ngalo nyinja bwenene kurhenga emwa Nnâmahanga. Rhuli rhwalindirira akasanzi kinja bwenene, rhunayemire n’obwalagale oku ako kasanzi kahika. Obo bulangalire buba nka nanga yirhu, bunarhuhe emisi lyo rhulembera amarhangulo, okulibuzibwa, na ciru lyo rhurhag’iyoboha olufû. Obo bulangalire buba nka nsirha y’ecuma kuli rhwe, bunalange entanya zirhu lyo rhuyaka ebintu bibi n’okujira ebintu binja. Obulangalire bwirhu buyimangire oku Bibliya bunarhurhabale rhuyegere Nnâmahanga bwenene, bunanarhuyerese oku aba arhuzigire bwenene. Rhunabe na bunguke bunji omu kugendekera rhwazibuhya obulangalire bwirhu.

17. Bulya gurhi obulangalire bwirhu bunalerhe obushagaluke?

¹⁷ Entumwa Paolo yadesire ntya omu maruba yayandikiraga Abaroma: “Mushagaluke omu bulangalire.” (Rm. 12:12) Paolo al’ishagalusire bulya al’iyemire n’obwalagale oku akagendekera abêra mwishwekerezi, ahabwa obuzine bw’ensiku n’amango omu mpingu. Na nirhu rhwanashagaluka omu bulangalire bulya rhuyemire n’obwalagale oku Yehova ahikiriza ebiragane byage. Nk’oku omuzihi w’ennanga ayandikaga, “ow’omwishingo ali muntu . . . olangalira Yehova Nnâmahanga wage, . . . Ye obêra mwishwekerezi ensiku zoshi.”​—Enna. 146:5, 6, NWT.