1. ‘Obulagirire bwirhu bw’ekiroho’ bo buhi, na gurhi burhulerheramwo omwishingo?

 OMWISHINGO gw’okunali burhaba bushagaluke kone omuntu ayumva omu kasanzi kalebe na buzinda buhwe. Gwanagendekera omu kalamo koshi k’omuntu. Bulya gurhi rhudesire ntyo? Yezu ahugwîre ntyo omu Mahubiri gage g’oku Ntondo erhi aderha ntya: “Ab’omwishingo bali balya bamanyire obulagirire bwabo bw’ekiroho.” (Mt. 5:3, NWT) Yezu al’imanyire oku abantu balemirwe n’irala linene ly’okumanya n’okuharamya Omulemi wabo, Yehova Nnâmahanga. Obo bo ‘bulagirire bwirhu bw’ekiroho.’ Na bulya Yehova aba “Nnâmahanga w’omwishingo,” abamuharamya nabo banaba n’omwishingo.​—1 Tm. 1:11, NWT.

2-3. (a) Nk’oku Yezu anaderhaga, bandi bahi bakaba n’omwishingo? (b) Bici rhwaganirira mw’eci cigabi, na bulya gurhi kuli kwa bulagirire okubiganirira?

² Erhi rhwakaba rhurhagwerhi mazibu omu kalamo, ka lyone rhwakaba n’omwishingo? Nanga. Omu Mahubiri gage g’oku Ntondo, Yezu adesire kantu kalebe k’okusomeza. “Balya bali burhê [abadwirhe balaka, NWT],” abe enyanya z’okulibuzibwa erhi byaha byabo birhuma erhi kuhikirwa n’amazibu omu kalamo, banaba n’omwishingo. Ntyo ko Yezu anadesire lugenda “abali balibuzibwa erhi bushinganyanya burhuma” erhi abali ‘bajacirwa’ bulya bali banafunzi ba Kristu. (Mt. 5:4, 10, 11, Mashi Bible.) Cikone, gurhi byakahashikanamwo omuntu abe n’omwishingo omu hali za ntyo?

³ Yezu alonzagya okurhuyigiriza oku, arhali okuba n’ehali nyinja omu kalamo ko kwakarhulerhera omwishingo gw’okunali, cikone rhwanaba n’omwishingo gw’okunali omu kuhikiriza obulagirire bwirhu bw’ekiroho n’okuyegera Nnâmahanga. (Yk. 4:8) Gurhi rhwakajiramwo ntyo? Mw’eci cigabi, rhwaganirira bintu bisharhu bya bulagirire rhwakajira lyo rhuba n’omwishingo gw’okunali.

4. Kantu kahi ka burhanzi rhugwasirwe rhujire lyo rhuba n’omwishingo gw’okunali? (Ennanga 1:1-3, NWT)

⁴ AKANTU KA 1: Lyo rhuba n’omwishingo gw’okunali, rhugwasirwe rhukacilisa ebiryo by’ekiroho. Abantu n’ensimba boshi baba balagirire oku biryo by’omubiri lyo balama. Cikone abantu bone bakacilisa ebiryo by’ekiroho. Rhunaba rhubilagirireko. Co carhumaga Yezu aderha ntya: “Omuntu arhankalama n’omugati gwone, cikwone na ngasi luderho lurhenga ekanwa ka Nnâmahanga.” (Mt. 4:4, Mashi Bible) Co cirhumire, rhurhashinganini rhugeze ciru lusiku luguma buzira kucilisa ebiryo by’ekiroho kurhenga omu Bibliya, Kanwa ka Nnâmahanga. Omuzihi w’ennanga adesire ntya: ‘Ow’omwishingo ali muntu osimisibwa n’irhegeko lya Yehova onalisoma mushi n’obudufu.’​—Osome Ennanga 1:1-3, NWT.

5-6. (a) Bici Ebibliya erhuyigirizize? (b) Omu njira zihi okusoma Ebibliya kwakarhurhabalamwo?

⁵ Bulya Yehova aba arhuzigire, arhuyeresire omu Bibliya ebi rhushinganine rhujire lyo rhuba n’omwishingo omu kalamo. Erhuyigirizize omuhigo gwage lugenda akalamo kirhu. Erhuyigirizize gurhi rhwakamuyegeramwo n’ebi rhushinganine rhujire ly’arhubabalira ebyaha birhu. Na kandi erhuyigirizize obulangalire bwinja bwenene arhulaganyize lugenda amango gayisha. (Yer. 29:11) Ezo nyigirizo z’okuli rhupata omu kuyiga Ebibliya zinayunjuze omwishingo omu murhima gwirhu!

⁶ Nk’oku rhunamanyire, Ebibliya ebamwo mahano manji gakarhurhabala omu kalamo kirhu ka ngasi lusiku. Erhi rhwakakolesa ago mahano, rhwanaba n’omwishingo gw’okunali. Ngasi mango erhi wakaciyumva ovunisire omurhima erhi mazibu g’akalamo garhuma, okageza kasanzi kanji oli wasoma Akanwa ka  Yehova n’okukarhanyako bwenene. Yezu adesire ntya: “Ab’omwishingo bali balya bayumva akanwa ka Nnâmahanga n’okukakulikira!”​—Lk. 11:28, NWT.

7. Bici byakakurhabala ly’oyunguka bwenene n’akasanzi ogeza omu kusoma Akanwa ka Nnâmahanga?

⁷ Amango oli wasoma Akanwa ka Nnâmahanga, okaciha akasanzi k’okushagalukira ebi oli wasoma. Kwa lwiganyo, k’aka kanga kakola kakuhikire? Muntu mulebe ayende ebiryo osîma. Cikone bulya oli buhena erhi bulya ogwerhe bintu binji oli warhanyako, olye ebyo biryo duba-duba buzira kukanja bwinja ngasi hihande ly’oyumva obununu bwahyo. Enyuma z’okulya, ohugûkwe oku walire duba-duba onabone oku kwakabire kwinja ocirhuzagye n’okushagalukira obununu bwa ngasi hihande. K’okola osomire Ebibliya duba-duba n’oko kwarhuma orhashagalukira omwanzi gulimwo? Okaciha akasanzi ly’oshagalukira okusoma Akanwa ka Nnâmahanga; okabona omu bwenge bwawe ebiri byajirikana, okagerereza oku mazu g’ebiri byajirikana, n’okurhanya bwenene kw’ebi wasomire. Okujira ntyo kwanayushula omwishingo gwawe.

8. Gurhi “mushizi mwirhonzi na mwikubagirwa” ali ahikirizamwo omukolo gwage? (Olole n’amahugûlo g’idako.)

⁸ Yezu ahizireho “mushizi mwirhonzi na mwikubagirwa” ly’arhuha ebiryo by’ekiroho omu mango gakwanine, na kobinali rhuli rhwalisibwa bwinja omu njira y’ekiroho. * (Mt. 24:45, NWT) Ebiryo byoshi mushizi mwirhonzi arhuha biba biyimangire oku Mandiko galongozibagwa n’iroho litagatifu. (1 Ts. 2:13) Muli ntyo, ebyo biryo binarhurhabale rhumanye entanya za Yehova ziyerekinwe omu Bibliya. Co cirhuma rhusoma amagazeti Ilabiro ly’Akalalizi na Amuka! n’emyanzi eba oku jw.org. Rhunarheganye entimanano y’ecigamba y’omu kagarhi k’omugobe n’ey’oku buzinda bw’omugobe. Na kandi, rhunalole eprograme ya JW Télédiffusion ya ngasi mwezi nka bihashikine. Okucilisa biryo binji by’ekiroho kwanarhurhabala rhujire akantu ka kabirhi karhulerhera omwishingo gw’okunali.

9. Akantu ka kabirhi karhulerhera omwishingo ko kahi?

⁹ AKANTU KA 2: Lyo rhuba n’omwishingo gw’okunali, rhushinganine rhulame kushimbana n’amakanuni ga Yehova. Omuzihi w’ennanga ayandisire ntya: “Ow’omwishingo ali ngasi muntu orhinya Yehova, olambagira omu njira zage.” (Enna. 128:1, NWT) Okurhinya Yehova kuli kumukenga bwenene n’okuyaka okujira ngasi kantu kakamugayisa. (Mig. 16:6) Co cirhumire, rhunagendekere rhwajira okwirhu koshi lyo rhulama kushimbana n’amakanuni ga Nnâmahanga lugenda ebinja n’ebibi nk’oku ganayerekinwe omu Bibliya. (2 Kr. 7:1) Rhwanaba n’omwishingo erhi rhwakakajira ebintu Yehova asima n’okuyaka ebintu ashomba.​—Enna. 37:27; 97:10; Rm. 12:9.

10. Ahanyuma n’okumanya obulonza bwa Nnâmahanga, bici rhushinganine rhujire? (Abaroma 12:2)

¹⁰ Osome Abaroma 12:2. Omuntu anamanya oku Yehova ye gwerhe obuhashe bw’okuhiga bici biri binja na bici biri bibi, cikone kandi yene agwasirwe ayemere okurhumikira amakanuni ga Nnâmahanga. Kwa lwiganyo, omuntu anamanya oku oburhegesi bw’ecihugo bugwerhe ehaki y’okuhiraho amarhegeko gayerekine ebitesi omuntu agwasirwe atembezemwo. Cikone nkaba yene anaba arhalonzizi okurhumikira ago marhegeko. N’oko kwanarhuma atembeza n’ebitesi binji bwenene kulusha oku ahûnyirwe. Kugerera olugenzi lwirhu, rhunayerekane oku rhuyemire n’obwalagale oku okurhumikira amakanuni ga Yehova yo njira nyinja bwenene  y’akalamo. (Mig. 12:28) Daudi al’iyemire ntyo n’obwalagale, co carhumaga aderha ntya lugenda Yehova: “We wanyereka enjira y’obulamu, nanshagaluke nka ndi embere zawe, omwishingo gw’ensiku n’amango emwawe yo guba.”​—Enna. 16:11, Mashi Bible.

11-12. (a) Amango rhuzidohirwe n’entanya erhi kuvunika omurhima, bici rhugwasirwe rhubeko masu? (b) Gurhi enderho ziri omu lwandiko lw’Abafilipi 4:8 zakarhurhabala amango rhuli rhwacishoga ebintu by’okucishagalusa?

¹¹ Amango rhugwerhe amazibu erhi rhuvunisire omurhima, nkaba rhwanaciyumva oku rhushinganine rhujire kantu kalebe kakarhurhabala lyo rhuyaka ago mazibu girhu. Oko kuyumvikine, cikone rhugwasirwe rhube masu lyo rhurhag’ijira akantu kakagayisa Yehova.​—Ef. 5:10-12, 15-17.

¹² Omu maruba Paolo ayandikiraga Abafilipi, ayinginzire Abakristu oku bagendekere barhanya oku bintu “bishinganine, . . . bicîre, . . . bikwanine okuzigizwa, n’okukengwa.” (Osome Abafilipi 4:8.) Ciru akaba Paolo arhakag’iganirira ebintu by’okucishagalusa, ebi ayandikaga byanarhurhabala rhucishoge bwinja ebintu rhucishagalusamwo. Obe nka wajira ntya: Ngasi hoshi oluderho “bintu” luhugwîre binji lubonekine mw’olo lwandiko, oje wahiraho oluderho “nyimbo,” “filme,” “bitabu,” erhi “micezo y’evideo.” Okujira ntyo kwanakurhabala ohugûkwe bici byakasimisa Nnâmahanga na bici birhakamusimisa. Rhulonzize okulama kushimbana n’amakanuni ga Yehova galengerire. (Enna. 119:1-3) Buzinda, okuba n’ezamiri ecîre kwanarhurhabala rhujire akandi kantu kakarhulerhera omwishingo gw’okunali.​—Ebj. 23:1.

13. Akantu ka kasharhu kakarhulerhera omwishingo ko kahi? (Yowane 4:23, 24)

¹³ AKANTU KA 3: Ojire okwawe koshi ly’oheba enterekêro ya Yehova oku nafasi ntanzi omu kalamo kawe. Bulya Yehova ye Mulemi wirhu, rhushinganine rhukamuharamya. (Maf. 4:11; 14:6, 7) Co cirhumire, akantu k’obulagirire omu kalamo kirhu, kuli kumuharamya omu njira alonzize, k’okuderha “omu murhima [omw’iroho, NWT] n’omw’okuli.” (Osome Yowane 4:23, 24, Mashi Bible.) Rhulonzize iroho litagatifu lya Nnâmahanga lilongoze enterekêro yirhu ly’epatana n’enyigirizo z’okuli ziri omu Kanwa kage. Rhugwasirwe rhuhebe enterekêro rhuha Yehova oku nafasi ntanzi omu kalamo kirhu ciru akaba rhulamire omu cihugo omukolo gwirhu guhanzibwemwo goshi erhi bigabi bilebe byago. Kuhika buno, bene wirhu na bali birhu 100 na kulusha bali omu prizo bulya kone bali Bahamirizi ba Yehova. * Ciru akaba ntyo, bagwerhe omwishingo banali bajira okwabo koshi lyo basalira, lyo bayiga, n’okuganirira abandi lugenda Nnâmahanga n’Obwami bwage. Erhi rhwakajacirwa erhi kulibuzibwa, rhwanaba n’omwishingo bulya rhumanyire oku Yehova ali haguma na nirhu n’oku anarhuhembe.​—Yk. 1:12; 1 Pt. 4:14.

14. Bici byahikiraga mwene wirhu muguma musole w’omu cihugo c’e Tadjikistan, na bulya gurhi?

¹⁴ Enyiganyo z’abantu balembire amazibu omu kalamo zirhuyemezize n’obwalagale oku ebyo bintu bisharhu rhuganirire byanarhulerhera omwishingo gw’okunali ciru rhwakaba rhuli omu mazibu gahi. Rhuganirire ebyahikiraga Jovidon Bobojonov wa myaka 19 w’omu cihugo c’e Tadjikistan, walahiraga okuja omu mukolo gw’ecisoda. Omu nsiku 4/10/2019, bamukûla aha mwage cirimisi, bamushweka omu prizo myezi milebe, n’okumukolera nka nkola-maligo.  Oko bamukoleraga omu njira erhali y’obushinganyanya kwaderhwa omu byombo by’okuhâna emyanzi omw’igulu lyoshi. Kw’ebyo byombo, baderha oku bamushusire lyo bamusêza ajire eciragane c’obwishwekerezi oku murhwe gw’abasoda n’okuyambala emishangi y’ecisoda. Enyuma z’aho bamusambisa banaderha oku ayazire, banamuhêka omu kambi k’amalibuko kuhika amango prezida w’eco cihugo amubabaliraga anaderha oku ashwekulwe. Muli ako kasanzi koshi k’amazibu, Jovidon agendekire okubêra mwishwekerezi anagendekera okuba n’omwishingo. Bici byamurhabire? Agendekire okumanya obulagirire bwage bw’ekiroho.

15. Gurhi Jovidon akag’icilisamwo ebiryo by’ekiroho amango ali omu prizo?

¹⁵ Erhi Jovidon ali omu prizo, agendekire okucilisa ebiryo by’ekiroho, ciru n’amango arhal’igwerhe Bibliya erhi cicapo coshi-coshi ciyimangire oku Bibliya. Gurhi oko kwahashikinemwo? Bene wirhu na bali birhu b’omu eneo yabo bakamuhekera ebiryo by’omubiri banakayandika olwandiko lw’olusiku oku mifuko bakag’imuhekeramwo ebiryo. Oko kwamurhabala aba n’obuhashe bw’okukasoma Ebibliya n’okuyirhanyako bwenene ngasi lusiku. Enyuma z’okushwekûlwa omu prizo, ahâna er’ihano oku bandi barhacihikirwa n’amarhangulo madarhi: “Kuli kwa bulagirire bwenene okolese bwinja  oluhuma ogwerhe ly’oyushula obumanye bwawe kuli Yehova omu kusoma Akanwa kage n’ebicapo birhu.”

16. Bici Jovidon akag’isegezako obwenge?

¹⁶ Oyo mwene wirhu akag’ilama kushimbana n’amakanuni ga Yehova. Ahali h’okusegeza obwenge oku irala libi n’okuba n’olugenzi lubi, abusegeza kuli Yehova na kw’ebi Yehova asima. Jovidon akalolereza ebintu binja bwenene Nnâmahanga alemire. Ngasi lusiku, akag’izuka sezi amango orhunyunyi rhuli rhwavigira n’okuyimba. Na budufu, akalolereza omwezi n’enyenyezi. Adesire ntya: “Ezo ngalo kurhenga emwa Yehova zakanshagalusa n’okumpa omurhima.” Erhi rhwakaba ba kuvuga omunkwa oku biryo by’ekiroho n’ebintu by’omubiri Yehova arhuha, rhwanaba n’omwishingo, n’ogo mwishingo gwanarhurhabala lyo rhulembera.

17. Gurhi enderho ziri omu 1 Petro 1:6, 7 zakarhabala omuntu wakaba ali omu kanga kali nk’aka Jovidon alimwo?

¹⁷ Kandi Jovidon akag’iheba enterekêro ya Yehova oku nafasi ntanzi omu kalamo kage. Al’ihugûsirwe oku, okubêra mwishwekerezi kuli Nnâmahanga w’okuli kuli kwa bulagirire. Yezu adesire ntya: “Wakaz’iharâmya Nyakasane [Yehova, NWT] Nyamuzinda wawe, onakaz’imukolera yenene.” (Lk. 4:8) Bakomanda n’abasoda bal’ilonzize Jovidon aleke idîni lyage. Ahali h’okujira ntyo, akasalira bwenene ngasi mulegerege na ngasi budufu, n’okuhûna Yehova amurhabale ly’agendekera okubêra mwishwekerezi. Ciru akaba Jovidon ajirirwe ebijiro birhali by’obushinganyanya, arhalahiraga obuyemere bwage ciru n’ehitya. Ene, akola agwerhe akantu arhal’igwerhe embere bamukûle aha mwage cirimisi, ashurhwe n’okuhirwa omu prizo, k’okuderha oku akola agwerhe obuyemere burhangwirwe.​—Osome 1 Petro 1:6, 7.

18. Gurhi rhwakajira lyo rhugendekera okuba n’omwishingo?

¹⁸ Yehova amanyire ebi rhulagirireko lyo rhuba n’omwishingo gw’okunali. Erhi wakajira ebyo bintu bisharhu bilerha omwishingo gw’okunali, wanagendekera waba n’omwishingo, ciru akaba oli omu kanga kazibu. Muli ntyo, nawe wanahash’iderha ntya: “Ab’omwishingo bali bantu Yehova aba Nnâmahanga wabo!”​—Enna. 144:15, NWT.