1-2. Enjira nyinja y’okusoma n’okuyiga Ebibliya yo ehi? Ohâne olwiganyo.

 ORHANYE oli wahiga okugula enyumpa. Bici wakalonza obone embere orhôle ogo muhigo? Ka wanalonza obone enfoto y’ecigabi c’embere cone c’eyo nyumpa? Buzira karhinda wanalonza ocibonere eyo nyumpa wene oyizunguluke, oje omu ndani n’okulola ebyumpa byoshi, n’okubona obugali bwayo boshi. Nkaba ciru wanalonza olabirize e plan y’eyo nyumpa ly’omanya gurhi yayubakagwa. Kobinali, nkaba wanalonza omanye gurhi eyo nyumpa wayish’igula eyosire yoshi.

² Nirhu rhwanajira akantu kashushine n’ako amango rhuli rhwasoma n’okuyiga Ebibliya. Musomi muguma w’Ebibliya adesire oku Ebibliya kw’eyorha nka “nyumpa nnene, eri ndîri bwenene enayubasirwe oku misingi ejire omw’idaho bwenene.” Muli ntyo, gurhigi rhwakamanyamwo bwinja ebiba omu Bibliya byoshi? Erhi akaba onasome Ebibliya duba-duba kone, wanaba oli wayiga enyigirizo z’omusingi zone, kuli kuderha “nyigirizo z’omurhondêro gw’ebinwa bya Nyamuzinda.” (Hb. 5:12) Cikone, nka kula wakalonza oje omu nyumpa ly’omanya binji lugenda yo, oshinganine oyige Ebibliya bwinjinja ly’oyihugûkwa bwinja. Enjira nyinja y’okuyiga Ebibliya kuli kubona gurhi ebigabi biri lubero by’omwanzi gw’Ebibliya biba bipatine. Okayiga, arhali mpu ly’ohugûkwa kone nyigirizo zihi z’okuli oba oyemire, cikone kandi ly’omanya bulya gurhi oba oziyemire.

3. Bici entumwa Paolo yayinginzire ababo Bakristu bajire, na bulya gurhi? (Abefezi 3:14-19)

³ Lyo rhuhugûkwa Akanwa ka Nnâmahanga bwinjinja n’ebimuba byoshi, rhugwasirwe rhuyige kwa bulîri enyigirizo z’Ebibliya. Entumwa Paolo ayinginzire bene wabo na bali babo Bakristu bayige Akanwa ka Nnâmahanga n’obushiru lyo ‘bahash’iyumva . . . obugali n’obuli, oburherema n’obwandagala’ bw’enyigirizo z’okuli. Buzinda bakahikire ‘okumera emizi omu buzigire, banasêre’  omu buyemere bwabo. (Osome Abefezi 3:14-19.) Nirhu rhushinganine rhujire ntyo. Lekagi rhubone gurhi rhwakayiga bwinjinja Akanwa ka Nnâmahanga lyo rhuhugûkwa bwinja ebibamwo.

4. Bici rhwakajira lyo rhuyegera Yehova bwenene? Ohâne enyiganyo.

⁴ Rhwe nka Bakristu, rhurhashagalukira kone okuhugûkwa enyigirizo z’omusingi z’Ebibliya. Kugerera oburhabale bw’iroho litagatifu lya Nnâmahanga, rhuba rhulonzize ciru rhuyige n’“amahwe ga Nyamuzinda.” (1 Kr. 2:9, 10) Wanacihiriraho eprograme y’okujira ifunzo lyawe wene ly’oyegera Yehova bwenene. Kwa lwiganyo, wanayiga gurhi ayerekagamwo abakozi bage b’omu mango ga mîra obuzigire na gurhi oko kukuyemezize n’obwalagale oku nawe aba akuzigire. Wanayiga lugenda gurhi Yehova al’ipanzire enterekêro omu Israheli ya mîra na gurhi oko kushushine n’oku apanzire Abakristu ene. Erhi kandi, wanayiga bwenene amalebi Yezu ahikirizize omu mango g’akalamo kage n’omukolo gwage hanw’igulu.

5. Ka hali omwanzi wakalonza ojirire obusagasi omw’ifunzo lyawe wene?

⁵ Bantu baguma na baguma bayiga Ebibliya n’obushiru badosibwe bintu bihi bizibu bakalonza bayige omu Kanwa ka Nnâmahanga. Mashuzo gabo maguma na maguma gali omu cisanduku cidesire “ Emyanzi Wakayiga omu Programe y’Ifunzo Lyawe Wene.” Okuyiga emyanzi ya ntyo kwanakulerhera omwishingo erhi wakakolesa e Index des publications des Témoins de Jéhovah erhi ecitabu Musaada wa Kutafuta Habari kwa Ajili ya Mashahidi wa Yehova. Okuyiga Ebibliya bwinjinja kwanazibuhya obuyemere bwawe n’okukurhabala ‘omanyîrire Nnâmahanga.’ (Mig. 2:4, 5, Mashi Bible) Lekagi rhuganirire nyigirizo nguma na nguma z’Ebibliya rhwakayiga bwinjinja.

6. (a) Lubero luhi luliho egarhi k’omupango n’omuhigo? (b) Bulya gurhi rhwakaderha oku omuhigo gwa Yehova kuyerekera bene bantu n’igulu guba gw’“emyaka n’emyaka”? (Abefezi 3:11, Mashi Bible)

⁶ Kwa lwiganyo, orhanye kw’ebi Ebibliya edesire lugenda omuhigo gwa Nnâmahanga. Hali olubero bwenene egarhi k’okuba n’omupango n’omuhigo. Omupango gwanashushanyizibwa n’ibarabara liyerekire hantu halebe olonzize oje. Cikone, erhi kantu kalebe kakafunga er’ibarabara orhakacihika emunda oyerekire. Okubundi, rhwanashushanya omuhigo na hantu halebe rhulonzize rhuhike. Rhumanyire bwinjinja ahantu rhulonzize rhuhike, cikone rhwanagera omu mabarabara gali lubero lyo rhuhika aho hantu ho na nnene rhuyerekire. Erhi akaba ibarabara liguma lifunzirwe, rhwanagera omu lindi. Eby’okushagalusa, kuli kubona oku Yehova afulwire bunyi-bunyi “obulonza bwage [muhigo gwage] bw’ensiku n’amango” omu Bibliya. (Ef. 3:11, Mashi Bible.) Yehova anacishoga enjira ziri lubero ly’ahikiriza omuhigo gwage, n’ensiku zoshi anahashe okujira ntyo bulya “àjizire ngasi kantu erhi anamanyire ecirhumire.” (Mig. 16:4) N’amalehe g’ebi Yehova ajira gagendekera ensiku n’amango. Omuhigo gwa Yehova go guhi, na mpindulo zihi ajijire ly’aguhikiriza?

7. Erhi abantu barhangiriza bayus’igoma, gurhi Yehova ashanjiremwo enjira akahikirizizemwo omuhigo gwage? (Mateyo 25:34)

⁷ Nnâmahanga abwizire abantu barhangiriza omuhigo gwage gwali guhi kuli bo. Bal’igwasirwe ‘baburhe, bayololoke, babumbe igulu banalirhegeke . . . barhegeke n’ensimba zinyafûka’ oku idaho zoshi. (Murh. 1:28) Erhi Adamu na Eva bagoma, bajira ecaha n’okurhuma eco caha cayahukira bene bantu boshi, omuhigo gwa Yehova gurhahweraga aho. Ashanja enjira gwakahikirizibwemwo. Ho n’aho, ahiga okuhiraho Obwami omu mpingu bwayish’ihikiriza omuhigo agwerhe oku murhondero kuli bene bantu n’igulu. (Osome Mateyo 25:34.) Oku kasanzi al’icishozire, enyanya z’obuzigire bwage, Yehova arhuma Omugala cusha hanw’igulu ly’ayigiriza abantu lugenda Obwami n’okuhâna obuzine bwage ly’arhucungula kurhenga omu caha n’omu lufû. Buzinda Yezu afûka, agaluka e mpingu ly’arhegeka nka Mwami w’Obwami bwa Nnâmahanga. Cikone hali ebindi bintu binji rhwakayiga lugenda omuhigo gwa Nnâmahanga.

8. (a) Omwanzi mukulu gw’Ebibliya go guhi? (b) Nk’oku biyerekinwe omu Abefezi 1:8-11, omuhigo muzinda gwa Yehova go guhi? (Olole enfoto eri oku cijalada c’eyi gazeti.)

⁸ Omwanzi mukulu gw’Ebibliya kuli kuderha oku izino lya Yehova lyayish’icêsibwa hano ahikiriza omuhigo gwage okubiyerekire igulu kugerera Obwami bwage bwayish’irhambulwa na Kristu. Omuhigo gwa Yehova gurhakashanjwa. Alaganyize oku ngasi kantu kajirikana nk’oku anadesire. (Iz. 46:10, 11; Hb. 6:17, 18) Igulu lyayish’ihikira aha lyahinduka paradizo, hantu abantu bimana na bashinganyanya b’omu iburha lya Adamu na Eva ‘bayish’ishagalukira akalamo ensiku n’amango.’ (Enna. 22:26, NWT) Cikone arhali ebyo byone Yehova ayish’ihikiriza. Omuhigo gwage muzinda kuli kugusha haguma abakozi bage boshi b’omu mpingu n’okw’igulu. Buzinda abazine boshi omu mpingu na hanw’igulu bayish’imurhumikira nka Murhegesi wabo Mukulu. (Osome Abefezi 1:8-11.) K’enjira nyinja bwenene Yehova ali ahikirizamwo omuhigo gwage erhakusomezizi?

9. Omu kusoma Ebibliya, kuhika ngahi rhwakahash’ibona omu mango gayisha?

⁹ Rhuganirire obulebi Yehova aderhaga omu ishwa ly’e Edeni, buli omu citabu c’Omurhondêro 3:15. b Obo bulebi bwal’iyerekine ebyakajirikine ly’omuhigo gwa Yehova guhikirizibwa, cikone hakagezire ebihumbi by’emyaka embere ebyo bintu bijirikane. Ebyo bintu byal’ihiziremwo okuhirwaho kw’iburha lya Abrahamu, na mwer’iburha mwo Kristu akarhenzire. (Murh. 22:15-18) Muli ntyo, omu mwaka gwa 33 Kano  Kasanzi Kirhu (K.K.K.), Yezu alumirwa oku kansisira, nk’oku byal’ilebirwe. (Ebj. 3:13-15) Ecigabi cizinda c’obo bulebi, ko kuderha okuvunyungulwa kw’irhwe lya Shetani, cahikirizibwa enyuma za myaka 1 000 na kulusha kurhangira buno. (Maf. 20:7-10) N’Ebibliya eyerekine bindi bintu binji lugenda ebyayish’iba hano enshombo egarhi k’igulu lya Shetani n’ikubuliro lya Yehova ehikira ebuzinda.

10. (a) Bintu bihi byajirikana omu mango gayisha gali hofi-hofi? (b) Gurhi rhwakarheganyamwo obukengere bwirhu n’omurhima gwirhu? (Olole amahugûlo g’idako.)

¹⁰ Orhanye lugenda ebi bintu byayish’idundaganya igulu Ebibliya elebire. Burhangiriza, amashanja gayish’iyaliza ‘omurhûla n’akalembe!’ (1 Ts. 5:2, 3) Amalibuko madarhi gayish’irhondera “caligumiza,” hano amashanja garhera amadîni goshi g’obunywesi. (Maf. 17:16) Enyuma z’aho, hayish’iba ecimanyiso c’okuyerekana oku “Mwene-omuntu ayîshire omu bitû n’obuhashe n’irenge linji.” (Mt. 24:30) Yezu ayish’itwira bene bantu olubanja, omu kuberûla empene n’ebibuzi. (Mt. 25:31-33, 46) Cikone, Shetani, arhayish’igoyole. Bulya aba ashombire abantu ba Yehova bwenene, ayish’ishumya omulungano gw’amashanja Ebibliya ehamagire Gogi w’omu cihugo c’Amagogi gurhere abantu balunga okuboko enterekêro ecîre. (Eze. 38:2, 10, 11) Kasanzi kalebe, abashige amavurha bacisigire bayish’ihekwa e mpingu lyo bacilunga haguma na Kristu n’emirhwe yage y’omu mpingu balwe ivita lya Harmagedoni, bwayish’iba buzindikiriza bw’amalibuko madarhi. c (Mt. 24:31; Maf. 16:14, 16) Enyuma z’aho, Oburhegesi bwa Kristu bw’Emyaka Cihumbi okw’igulu bwayish’irhondera.—Maf. 20:6.

11. Bici obulangalire bw’obuzine bw’ensiku n’amango buhugwîre kuli we? (Olole n’enfoto.)

¹¹ Orhanyagye gurhi akalamo kawe kayish’iba omu mango gayisha enyuma z’emyaka 1 000. Ebibliya edesire oku Omulemi wirhu “ahizire ensiku n’amango omu murhima [gwirhu].” (Muh. 3:11, NWT) Orhanye bici oko kuhugwîre kuli we n’oku bwîra bwawe haguma na Yehova. Ecitabu Mkaribie Yehova, bukurasa bwa 319, cidesire ezi nderho z’okushagalusa: “Enyuma z’okulama amagana, ebihumbi, emiliyoni, ciru n’emiliyare y’emyaka, rhwayish’iba  rhukola rhumanyire binji bwenene kuli Yehova Nnâmahanga kulusha ebi rhumanyire ene. Cikone rhwayishikaciyumva oku hali bindi bintu binji bwenene by’okusomeza rhwakaciyigiriza lugenda ye . . . Ciru rhurhakahash’irhanya kunganaci akalamo omu paradizo kayish’iba kinja bwenene na ka kushagalusa, n’akantu kinja bwenene, rhwayish’igendekera rhwayegera Yehova ensiku zoshi.” Embere ago mango gahike, bindi bici rhwakarhanyako amango rhuli rhwagendekera rhwayiga bwinjinja Akanwa ka Nnâmahanga?

12. Gurhi rhwakalolamwo e mpingu amango rhuli rhwasoma? Ohâne olwiganyo.

¹² Akanwa ka Nnâmahanga kaderhire hisungunu lugenda okubaho kwa Yehova “emalunga.” (Iz. 33:5) Ebibliya eyerekine ebintu by’okusomeza lugenda Yehova n’ecigabi c’e mpingu c’ikubuliro lyage. (Iz. 6:1-4; Dan. 7:9, 10; Maf. 4:1-6) Kwa lwiganyo, rhwanasoma lugenda ebintu by’okusomeza bwenene Ezekiyeli abonaga erhi ‘amalunga gayiguka, anabona amalêbi [ebibonekerezi] garhenga emwa Nyamuzinda.’—Eze. 1:1.

13. Bici oshagalukire lugenda omukolo Yezu ali ajira e mpingu, nk’oku biyerekinwe omu Abahabraniya 4:14-16, Mashi Bible?

¹³ Kandi orhanye oku mukolo Yezu ali ajira e mpingu nka Mwami wirhu oli warhegeka na nka Kuhani Mukulu w’obwonjo. Kugerera ye, rhwanayegera omw’isala aha “ntebe ya Nnâmahanga . . . hali olukogo [lurhashinganinwi]” n’okumuhûna olukogo n’oburhabale “omu mango rhulagîrire.” (Osome Abahabraniya 4:14-16, Mashi Bible.) Rhurhakag’igeza olusiku ciru n’oluguma buzira kurhanya bwenene kw’ebi Yehova na Yezu barhujirire n’ebi bali barhujirira kurhenga e mpingu. Obuzigire bwabo kuli rhwe bushinganine burhuhume oku murhima bwenene n’okurhushumya rhube n’obushiru omu mukolo gwirhu n’omu nterekêro yirhu.—2 Kr. 5:14, 15.

14. Njira nguma ehi nyinja bwenene rhwakayerekanamwo kunganaci rhuvuzire Yehova na Yezu omunkwa? (Olole n’enfoto.)

 ¹⁴ Njira nguma omu njira nyinja bwenene rhwakayerekanamwo kunganaci rhuvuzire Nnâmahanga wirhu n’Omugala omunkwa, kuli kucihangana bwenene lyo rhurhabala abandi babe Bahamirizi ba Yehova na banafunzi ba Yezu. (Mt. 28:19, 20) Ntyo ko entumwa Paolo yajijire ly’avuga Nnâmahanga na Kristu omunkwa. Al’imanyire oku Yehova aba alonzize “abantu boshi bacizibwe banahashe okumanya okuli.” (1 Tm. 2:3, 4, Mashi Bible) Akozire bwenene omu mukolo gwage gw’amahubiri ly’arhabala bantu banji bwenene nk’oku binahashikine ‘mpu lyo ajira aba acungula muli bo.’—1 Kr. 9:22, 23, Mashi Bible.

15. Kushimbana n’Ennanga 1:2, NWT, bici byakarhuma rhwaba n’omwishingo?

¹⁵ Kuli kwinja okubona oku omuzihi w’ennanga ayerekine oku omuntu w’omwishingo, onabêrwa ali muntu ‘osimisibwa n’irhegeko lya Yehova, onalirhanyako mushi n’obudufu.’ (Enna. 1:1-3, NWT; amahugûlo g’idako.) Muhinduzi muguma w’Ebibliya omu lundi lulimi ohamagalwa Joseph Rotherham ahânyire amahugûlo kw’olo lwandiko lw’Ebibliya omu citabu cage ciguma cihugwîre ecitabu c’ennanga (Studies in the Psalms), omu kuderha oku omuntu ashinganine “ashagalukire obulongozi bwa Nnâmahanga, n’oko kushinganine kumushumye abulongereze, abuyige, n’okuburhanyako bwenene.” Kandi adesire oku “omuntu osoma Ebibliya erhi akageza olusiku arhanayisomire, olo lusiku lunabe lwagezire busha.” Wanashagalukira okuyiga Ebibliya omu kukabona amahugûlo masungunu-ngunu lugenda mwanzi mulebe n’okubona gurhi ago mahugûlo goshi gapatinemwo. Guli mwishingo munji okuyiga bwinjinja Akanwa ka Nnâmahanga!

16. Bici rhwaganirira omu cigabi cikulikire?

¹⁶ Enyigirizo nyinja bwenene Yehova arhuyigiriza omu Kanwa kage zirhaba nzibu kuli rhwe okuhugûkwa. Omu cigabi cikulikire, rhwaganirira nyigirizo nguma omu nyigirizo nzibu z’Akanwa ka Nnâmahanga, kuli kuderha ehekalu nnene ya Yehova y’ekiroho Paolo aganiriraga omu maruba ayandikiraga Abakristu Bahabraniya. Lekaga okuyiga ogo mwanzi kukulerhere bushagaluke bunji.