Hulda Ahikire Omuhigo Gwage
AKABA walambagirire ecirhwa cisungunu c’e Sangir Besar omu Indonésie myaka milebe egezire, nkaba wanaba wabwine bali birhu basharhu Bakristu oku burhambi bw’enyanja. Baba bamanyikine bwinja mw’eco cirhwa enyanya z’omukolo gwabo gw’amahubiri gw’okurhabala abantu bahugûkwe Ebibliya. Cikone mw’ago mango, bakag’ijira ogundi mukolo guli lubero.
Ecirhwa c’e Sangir Besar olunda lw’emwenè [Nord] lw’e Indonésie
Oku murhondero, bakag’ija omu mishi bakarhôlamwo amabuye mazirho bwenene n’okugahêka oku burhambi bw’enyanja. Mabuye maguma muligo gal’igwerhe obunene bw’akabumbu. Enyuma z’aho, abo bakazi bakag’itamala oku rhusonga rhusungunu-ngunu banakag’ikolesa amahama lyo bavunyungula ago mabuye gabe rhuhande rhusungunu-ngunu kulusha iji ly’engoko. Enyuma z’aho, abo bakazi bakag’ihira ago mabuye masungunu-ngunu omu mbegeti z’eplastike n’okugasosa oku eskalye kuhika ahantu bal’ilamire. Buzinda, bakag’ihira ago mabuye omu mifuko migali yakapakizibwe omu mituga minenene n’okukolesibwa lyo gayubaka amabarabara.
Hulda, ali arhologola amabuye oku burhambi bw’enyanja
Muguma muli abo bali birhu ali Hulda. Akanga kage kakag’imuhashisa okugeza kasanzi kanji mw’ogo mukolo kulusha abandi. Akag’ikolesa ensaranga akag’ipata ly’ahikiriza amalagirire ga ngasi lusiku g’omulala gwage. Cikone, lero akakola erhi agwerhe n’ogundi muhigo omu bukengere. Al’ilonzize abe n’etablete ly’akayigula JW Library®. Hulda al’imanyire oku evideo n’ebindi bintu biba omu JW Library® byakamurhabire ly’ajira bwinja omukolo gwage gw’amahubiri n’okuhugûkwa bwinja Ebibliya.
Hulda akakola zindi nsa ibirhi ngasi sezi omu kasanzi ka mwezi muguma n’enusu, akavunyungula amabuye g’okuyunjuza akaroseri k’akamyo kasungunu. Buzinda, aba n’ensaranga z’okugula etablete.
Hulda n’etablete yage
Hulda adesire ntya: “Ciru akaba nakag’iciyumva ntamire bwenene nakayumva n’omubiri guli gwashushubira enyanya z’okuvunyungula ago mabuye, nayibagira duba-duba lugenda ago malumwa goshi n’oko kushushubira erhi mba nkola ndi nakolesa etablete yani mpyahya ly’entabala mbe n’amalehe minja omu mukolo gw’amahubiri n’okurheganya entimanano z’ecigamba buzira mazibu.” Kandi adesire oku eyo tablete yamurhabire oku murhondero gw’obulwala bw’okuyahukira bw’Ekorona bulya emikolo yoshi y’ecigamba yakag’ijirwa kugerera e vidéoconférence. Rhushagalusire haguma na Hulda bulya ahikire omuhigo gwage.
