ECIGABI C’OKUYIGA 49
Ka Yehova Ashuza Amasala Gani?
“Mwanyakûza munayishe, mwanshenga mmuyumve.”—YER. 29:12.
LWIMBO 41 Tafazali, Sikia Sala Yangu
EBI RHWAYIGA a
1-2. Bulya gurhi rhwakaciyumva nka Yehova arhali ashuza amasala girhu?
“OBE wacîzigiriza muli Nyakasane [Yehova, NWT], wabona oku akushobôza engalo omurhima gwawe gusengîre.” (Enna. 37:4) Eco ciri ciragane cinja bwenene! Cikone k’ensiku zoshi rhushinganine rhukalangalira oku Yehova arhuha ho n’aho ngasi kantu rhumuhûnyire? Bulya gurhi rhwakacidosa er’idoso? Rhuganirire ezi nyiganyo zikulikire. Mwali wirhu muguma ociri mulamba ali ashenga Yehova amurhabale ly’aja oku Masomo g’Abaeneza Injili b’Obwami. Cikone hamagera myaka minji arhanasag’ilalikwa kw’ago masomo. Mwene wirhu muguma ociri musole ali ashenga Yehova amurhabale afume obulwala budarhi bumugwerhe ly’ajira binji omu cigamba. Cikone arhafumiri. Ababusi Bakristu bali bashenga Yehova ly’omwana wabo abêra omu okuli. Cikone omwana wabo amahiga okuleka okukolera Yehova.
2 Nkaba nawe wahûnyire Yehova kantu kalebe, cikone orhakahâbagwa. Enyanya z’oko, nkaba wanarhanya oku Yehova anashuze amasala g’abandi cikone arhashuza agawe. Erhi nkaba wanarhanya oku hali kantu kalebe kabi ogwasirwe obe wajijire. Mwali wirhu muguma ohamagalwa Janice b akag’iciyumva ntyo. Ye n’iba bakag’ishenga Yehova bwenene bulya bal’ilonzize okuj’ikolera oku Beteli. Adesire ntya: “Nal’iyemire n’obwalagale oku rhwakajir’ikolera oku Beteli enyuma za kasanzi kasungunu.” Cikone emyezi yahinduka myaka, oyo mulume na mukage barhahamagalagwa oku Beteli. Janice adesire ntya: “Naciyumva kubi bwenene nanahwerwa. Nakacidosa bici najijire byagayisize Yehova. Nashenzire bwenene lugenda okuja oku Beteli. Bulya gurhi arhashuzagya isala lyani?”
3. Bici rhwaganirira mw’eci cigabi?
3 Hali amango rhwakacidosa erhi Yehova ali ayumvirhiza amasala girhu. Ciru balume baguma na baguma bishwekerezi b’omu mango ga mîra nabo bakag’icidosa ntyo. (Ayu. 30:20; Enna. 22:2; Hab. 1:2) Bici byakakuyemeza n’obwalagale oku Yehova ashuza amasala gawe? (Enna. 65:2) Lyo rhubona ishuzo ly’er’idoso, rhwarhang’ishuza amadoso gakulikire: (1) Bici rhwakalonza Yehova ajire? (2) Bici Yehova alonzize rhujire? (3) Bulya gurhi byanahûna rhushanje masala girhu maguma na maguma?
BICI RHWAKALONZA YEHOVA AJIRE?
4. Kushimbana na Yeremiya 29:12, bici Yehova alaganyize?
4 Yehova arhulaganyize oku ayumvirhiza amasala girhu. (Osome Yeremiya 29:12.) Nnâmahanga wirhu aba azigire abakozi bage bishwekerezi, co cirhumire arhakabula buyumvirhiza amasala gabo. (Enna. 10:17; 37:28) Cikone, oko kurhali kuderha oku arhuha ngasi byoshi rhumuhûnyire. Nkaba rhushinganine rhulinde igulu lihyahya lyo rhuhâbwa bintu biguma na biguma rhumuhûna.
5. Bici Yehova alola ly’ayumvirhiza amasala girhu? Ohugûle.
5 Yehova analole erhi amasala girhu gapatine n’omuhigo gwage. (Iz. 55:8, 9) Cigabi ciguma c’ogo muhigo cihiziremwo okuyunjuza igulu abalume n’abakazi bagwerhe omwishingo n’ecinyabuguma balongozibwe naye. Cikone Shetani adesire oku bene bantu banaba n’akalamo kinja bwenene erhi bakacilongoza bone. (Murh. 3:1-5) Yehova alesire bene bantu bone bacilongoze ly’ayerekana oku ebi Shetani adesire biri bya bunywesi. Cikone, okucilongoza kw’abantu kwadwirhe mazibu manji rhuli rhwabuganana nago ene. (Muh. 8:9) Rhuhugûsirwe oku Yehova arharhenzeho ago mazibu goshi mwa kano kasanzi. Erhi akagarhenzaho, bantu baguma na baguma banarhanya oku oburhegesi bwa bene bantu buli bwinja, n’oku bene bantu bone banahasha okuciyukiza amazibu gabo.
6. Bulya gurhi rhushinganine rhuyemere n’obwalagale oku ensiku zoshi Yehova ajira ebishinganine na bya buzigire?
6 Nkaba Yehova anashuza omu njira ziri lubero amasala g’abakozi bage bali bamuhûna ebintu byo n’ebyo. Kwa lwiganyo, amango Mwami Hezekiya al’ilwazire bwenene, ahûna Yehova amurhabale afume. Yehova amushuza omu kumufumya. (2 Bam. 20:1-6) Oku bundi, erhi entumwa Paolo asemberera Yehova amurhenzemwo “akababo omu mubiri,” byanahashikana oku gali mazibu g’obulwala, Yehova arharhenzagya ago mazibu. (2 Kr. 12:7-9) Kandi rhuganirire olwiganyo lw’entumwa Yakobo na Petro. Mwami Herodi al’ilonzize okubaniga bombi. Ecigamba casalira enyanya za Petro, byanahashikana oku cajijire ntyo n’enyanya za Yakobo. Ciru akaba ntyo, Yakobo anigwa, cikone Petro yehe acizibwa omu njira y’ecisomerine. (Ebj. 12:1-11) Nkaba rhwanacidosa, ‘Bulya gurhi Yehova acizize Petro cikone arhacizagya Yakobo?’ Ebibliya erhadesiri bulya gurhi. c Rhwanayemera n’obwalagale oku enjira za Yehova zirhaba za ‘bulenzi.’ (Lush. 32:4, Mashi Bible) Kandi rhumanyire oku Petro na Yakobo bal’iyemirwe na Yehova. (Maf. 21:14) Hali amango nkaba rhwakahikirwa na kantu kalebe rhurhal’irhanyizeko. Cikone bulya rhulangalire oku amashuzo ga Yehova oku masala girhu gaba ga bushinganyanya na ga buzigire, rhurhakaba n’akarhinda lugenda enjira acishozire y’okushuzamwo amasala girhu.—Ayu. 33:13.
7. Bici rhucihangana okuyaka, na bulya gurhi?
7 Rhunayake okushushanya akanga kirhu n’ak’abandi. Kwa lwiganyo, nkaba rhwanahûna Yehova arhurhabale omu njira ndebe, cikone isala lirhu lirhashuzibwe. Buzinda, rhwanamanya oku muntu mulebe naye ajijire isala lya ntyo, binabonekine oku Yehova alishuzizeko. Mwali wirhu muguma ohamagalwa Anna ahikirwe n’akanga ka ntyo. Ashenzire Yehova arhabale iba wakag’ihamagalwa Matthew, afume obulwala bw’akansere. Mw’ago mango go n’ago, bali birhu babirhi bagikulu nabo bal’ilwazire akansere. Anna akasalira bwenene enyanya z’iba Matthew n’abo bali birhu. Abo bali birhu bafuma, cikone Matthew afâ. Oku murhondero, Anna akacidosa erhi abo bali birhu bafumire bulya Yehova abarhabire. Na nkaba ntyo ko biri, bulya gurhi Yehova arhashuzagya amasala gage g’okufumya iba? Kobinali, rhurhamanyiri gurhi abo bali birhu babirhi bafumiremwo. Cikone rhumanyire oku Yehova ayish’iyusa amazibu girhu goshi, anali alinda oku afûla abîra bage bafîre.—Ayu. 14:15.
8. (a) Kushimbana na Izaya 43:2, gurhi Yehova arhurhabalamwo? (b) Gurhi isala lyakarhurhabalamwo lyo rhulembera amazibu madarhi? (Olole evideo edesire Isala Linarhuhashise Okulembera.)
8 Yehova arhurhabala ensiku zoshi. Bulya Yehova aba Larha wirhu w’obuzigire, arhalonza rhulibuke. (Iz. 63:9) Cikone Yehova arharhucîka oku mazibu girhu goshi, gashushanyizibwe n’enyishi erhi ngulumira z’omuliro. (Osome Izaya 43:2.) Cikone, alaganyize oku arhurhabala lyo ‘rhugalambagiramwo.’ Arhakanaleka ago mazibu girhu garhuzidohere ensiku zoshi. Kandi Yehova anarhuhe iroho lyage litagatifu ligwerhe obuhashe lyo lirhurhabala rhulembere. (Lk. 11:13; Fl. 4:13) Enyanya z’oko, rhwanayemera n’obwalagale oku ensiku zoshi arhuha ebi rhulagirireko lyo rhulembera n’okugendekera rhwabêra bishwekerezi kuli ye. d
BICI YEHOVA ALONZIZE RHUJIRE?
9. Kushimbana na Yakobo 1:6, 7, bulya gurhi rhushinganine rhulangalire oku Yehova arhurhabala?
9 Yehova alonzize rhumulangalire. (Hb. 11:6) Hali amango rhuciyumva rhuzidohirwe bwenene enyanya z’amazibu girhu. Hali amango rhwakarhondera rhwaba n’akarhinda omu kurhanya oku Yehova arharhurhabale. Cikone, Ebibliya erhuyemezize n’obwalagale oku, kugerera obuhashe bwa Nnâmahanga ‘rhwanashembuka enkûta.’ (Enna. 18:29, Mashi Bible) Co cirhumire ahali h’okusegeza obwenge oku karhinda kirhu, rhushinganine rhusalire n’obuyemere boshi, n’okulangalira oku Yehova ashuza amasala girhu.—Osome Yakobo 1:6, 7.
10. Ohâne olwiganyo luyerekine gurhi rhwakajira kushimbana n’amasala girhu.
10 Yehova alonzize rhujire kushimbana n’amasala girhu. Kwa lwiganyo, nkaba mwene wirhu muguma anahûna Yehova amurhabale bamuhe oluhusa ebw’akazi ly’aja oku ntimanano y’e eneo. Nkaba gurhi Yehova akashuzamwo er’isala? Nkaba anaha oyo mwene wirhu oburhwali alagirireko ly’aganiza omukulu wage w’akazi. Cikone byanahûna oyo mwene wirhu abone oyo mukulu wage w’akazi ly’amuhûna oluhusa. Nkaba ashinganine agendekere ahûna oluhusa. Nkaba anahûna owundi munya-kazi amurhabale lyo bashanja ensiku z’akazi. N’erhi akaba kuli kwa bulagirire, anahûna barhamulipaga ensiku ayish’iba arhakoziri.
11. Bulya gurhi rhushinganine rhusalire kanji-kanji lugenda amalagirire girhu?
11 Yehova alonzize rhukasalira kanji-kanji lugenda amalagirire girhu. (1 Ts. 5:17) Kushimbana n’enderho za Yezu, masala girhu maguma na maguma garhakashuzibwa ho n’aho. (Lk. 11:9) Co cirhumire, orharhamaga! Okasalira kanji-kanji na kurhenga oku murhima. (Lk. 18:1-7) Erhi rhugendekera rhwasalira Yehova lugenda kantu kalebe, rhunamuyerese oku kobinali rhulagirire kw’ebi rhuli rhwamuhûna. Kandi rhunayerekane oku rhugwerhe obuyemere oku anarhurhabala.
BULYA GURHI BYANAHÛNA RHUSHANJE MASALA GIRHU MAGUMA NA MAGUMA?
12. (a) Idoso liguma lihi rhushinganine rhucidose lugenda amasala girhu, na bulya gurhi? (b) Gurhi rhwakamanyamwo n’obwalagale erhi amasala girhu gayerekine obukenge kuli Yehova? (Olole ecisanduku cidesire “ K’Amasala Gani Gayerekine Obukenge Kuli Yehova?”)
12 Erhi akaba rhurhahâbirwi ebi rhwahûnaga omw’isala, nkaba rhwanacidosa madoso asharhu. Idoso lirhanzi liri ly’eri: ‘Ka ndi nasalira lugenda akantu kashinganine?’ Kanji-kanji rhunarhanye oku rhumanyire ebiri binja bwenene kuli rhwe. Cikone nkaba ebintu rhuhûna birhakarhulerhera obunguke kasanzi kanji. Erhi akaba rhuli rhwasalira lugenda mazibu malebe, nkaba hanaba akantu kinja bwenene kakamala ago mazibu kulusha aka rhuli rhwahûna. N’ebintu biguma na biguma rhuhûna, nkaba byanaba birhapatini n’obulonza bwa Yehova. (1 Yn. 5:14) Kwa lwiganyo, rhuganirire olwiganyo lw’ababusi rhwaderhaga embere. Bashenzire Yehova ly’omwana wabo agendekera abêra omu okuli. Er’isala lyabonekana nka lishinganine. Cikone, ntaye Yehova asêza muli rhwe oku amukolere. Alonzize ngasi muguma muli rhwe, kuhiramwo n’abana birhu, acishoge okumuharamya. (Lush. 10:12, 13; 30:19, 20) Co cirhumire, ababusi bashinganine bakahûna Yehova abarhabale lyo bahuma oku murhima gw’omwana wabo ly’ashumibwa okuzigira Yehova n’okuba mwîra wage.—Mig. 22:6; Ef. 6:4.
13. Kushimbana n’Abahabraniya 4:16, mangaci Yehova arhurhabala? Ohugûle.
13 Idoso lya kabirhi liri ly’eri: ‘K’aka ko kasanzi ka Yehova k’okushuza isala lyani?’ Nkaba rhwanaciyumva rhulagirire okw’ishuzo lya ho n’aho ly’amasala girhu. Cikone, Yehova amanyire akasanzi kinja k’okurhurhabala. (Osome Abahabraniya 4:16.) Erhi akaba rhurhahâbirwi ishuzo lya ho n’aho, nkaba rhwanarhanya oku ishuzo lya Yehova liri ‘Nanga.’ Cikone nkaba ishuzo lyage lyanaba ‘Akasanzi karhacihika.’ Kwa lwiganyo, ocib’irhanya lugenda olya mwene wirhu ociri musole wasaliraga Yehova amurhabale afume endwala yage. Yehova acifumyagya oyo mwene wirhu omu njira y’ecisomerine, Shetani akadesire oku oyo mwene wirhu agendekire akolera Yehova mpu bulya kone amufumize. (Ayu. 1:9-11; 2:4) Kandi, Yehova ahizireho akasanzi afumya endwala zoshi. (Iz. 33:24; Maf. 21:3, 4) Embere ago mango gahike, rhurhakalangalira okufuma omu njira y’ecisomerine. Co cirhumire, oyo mwene wirhu akashenzire Yehova amuhe emisi n’omurhûla omu bukengere ly’alembera endwala yage n’okugendekera akolera Nnâmahanga n’obwishwekerezi.—Enna. 29:11.
14. Bici olwiganyo lwa Janice lukuyigirizize?
14 Okengere olwiganyo lwa Janice wasaliraga lugenda okukolera oku Beteli. Hagera myaka irhanu embere ahugûkwe gurhi Yehova ali amashuzamwo isala lyage. Adesire ntya: “Yehova akolesize ako kasanzi ly’anyigiriza binji n’okuntabala mbe Mukristu mwinja bwenene. Nal’igwasirwe nseze obulangalire bwani muli ye. Nal’ikwanine mbe n’enkomedu nyinja z’ifunzo. Nanal’ilagirire oku mwishingo gw’ekandalala, gurhal’iyegemire oku kanga nalimwo.” Buzinda, Janice n’iba balalikwa bajire omukolo gw’omuzunguko. Omu kukengera ebyagezire, Janice adesire ntya: “Yehova ashuzize amasala gani, ciru akaba arhashuzagya omu njira nal’ilangalire. Byal’ihûnyire akasanzi lyo mbona oku ishuzo lyage liri linja, cikone mvuzire omunkwa bwenene okubona nacibwinire obuzigire bwage n’olukogo lwage.”
Erhi wakarhanya oku Yehova arhacishuza isala lyawe, wanashenga lugenda ebindi bintu (Olole ecifungo ca 15) f
15. Bulya gurhi byanahûna rhurhasaliraga lugenda kantu kaguma kone? (Olole n’enfoto.)
15 Idoso lya kasharhu liri ly’eri: ‘K’arhakaba ndi nashenga lugenda akandi kantu?’ Ciru akaba kuli kwinja okusalira n’obwalagale lugenda kantu kaguma omw’isala lirhu, rhwanahash’ihugûkwa obulonza bwa Yehova buli buhi kuli rhwe omu kurhasêra oku kantu kaguma kone. Rhuganirire olwiganyo lw’olya mwali wirhu ociri mulamba wakag’ishenga lugenda okuja oku Masomo g’Abaeneza Injili b’Obwami. Alonzize okuja kw’ago masomo ly’ajikolera ahali obulagirire bunji bw’abahubiri. Co cirhumire omu mango ali ashenga Yehova amurhabale ly’alalikwa kw’ago masomo, kandi anashenga Yehova amurhabale ahugûkwe obundi bulyo akaba nabo bw’okujira binji omu mukolo gw’amahubiri. (Ebj. 16:9, 10) Muli ntyo, anajira kushimbana n’er’isala lyage omu kudosa mwangalizi w’omuzunguko erhi hali ecigamba ca hofi-hofi cigwerhe obulagirire bunji bwa bapainiya. Erhi kandi anayandikira ebiro by’etawi ly’adosa lugenda ahali obulagirire bunji bw’abahubiri b’Obwami. e
16. Bici rhwakayemera n’obwalagale?
16 Nk’oku rhwayizire, rhwanayemera n’obwalagale oku Yehova ashuza amasala girhu omu njira eshinganine na ya buzigire. (Enna. 4:3; Iz. 30:18) Hali amango rhurhakashuzibwa omu njira rhwal’ilangalire. Cikone nta mango Yehova akabula buyumvirhiza amasala girhu. Aba arhuzigire bwenene. Na nta mango akarhuleka. (Enna. 9:10) Co cirhumire, ogendekere ‘wacîkubagira Nyamuzinda ngasi mango,’ omu kumuyigulira omurhima gwawe goshi kugerera isala.—Enna. 62:8, Mashi Bible.
LWIMBO 43 Sala ya Shukrani
a Eci cigabi cahugûla bulya gurhi rhwanayemera n’obwalagale oku ensiku zoshi Yehova ashuza amasala girhu omu njira eshinganine na ya buzigire.
b Mazino maguma na maguma gashanjirwe.
c Olole ecigabi cidesire “K’Oba Olangalire Enjira ya Yehova y’Okujira Ebintu?” omw’Ilabiro ly’Akalalizi ly’Omwezi gwa 2, 2022 cif. 3-6.
d Ly’obona eyindi myanzi lugenda gurhi Yehova arhurhabalamwo lyo rhulembera amazibu madarhi, oku jw.org olole evideo edesire Isala Linarhuhashise Okulembera.
e Akaba olonzize okumanya gurhi wakajira ly’ojikolera omu eneo y’eyindi tawi, olole ecitabu cidesire Tengenezo Yenye Kufanya Mapenzi ya Yehova, cig. 10 cif. 6-9.
f AMAHUGÛLO G’ENFOTO: Bali birhu babirhi bali basalira embere bayunjuze efomu y’Amasomo g’Abaeneza Injili b’Obwami. Buzinda, muguma mulibo alalisirwe, cikone owundi arhalalisirwi. Ahali h’okuvunika omurhima bwenene, oyo mwali wirhu orhalalisirwi ali asalira Yehova amurhabale ly’ahugûkwa obundi bulyo akajiramwo binji omu mukolo gw’amahubiri. Buzinda ali ayandikira ebiro by’etawi amaruba, ly’abamanyisa oku alonzize okuj’ikolera ahali obulagirire bunji bw’abahubiri.
