1-2. (a) Bulya gurhi entumwa Paolo yaderhaga oku obuzigire bwo borhere ‘bukulîre’ agandi? (b) Madoso gahi rhwaganirira?

 AMANGO entumwa Paolo yakag’iganirira obuyemere, obulangalire, n’obuzigire, ashwinjire omu kuderha oku “ecikulîre ebindi [ago morhere] bwo buzigire.” (1 Kr. 13:13) Bulya gurhi Paolo aderhaga ntyo? Omu mango gayisha, rhurhakaciba rhulagirire oku kuba n’obuyemere omu biragane bya Nnâmahanga lugenda igulu lihyahya erhi kulangalira oku ebyo biragane byahikirizibwa, bulya byayish’iba erhi byahikirizibwe. Cikone ensiku zoshi rhwayish’iba rhulagirire oku kuzigira Yehova n’okuzigira abantu. Kobinali, obuzigire bwirhu kulibo bwayish’igendekera bwayushûka ensiku n’amango.

² Bulya ensiku zoshi rhwayish’iba rhulagirire oku kuba n’obuzigire, rhwaganirira madoso asharhu. Burhangiriza, bulya gurhi rhushinganine rhuzigirane rhwene na nnene? Bwa kabirhi, gurhi rhuyerekanamwo obuzigire egarhi kirhu rhwene na nnene? Bwa kasharhu, gurhi rhwakazibuhyamwo obuzigire bwirhu egarhi kirhu rhwene na nnene?

3. Birhumire bihi rhugwerhe birhushumya rhuzigirane rhwene na nnene?

³ Bulya gurhi kuli kwa bulagirire kuli rhwe okuzigirana rhwene na nnene? Obuzigire, buba egarhi k’ebintu biyerekana oku kobinali rhuli Bakristu b’okunali. Yezu abwizire entumwa zage erhi: “Ecimanyiso abantu boshi babonerekwo oku muli baganda bani, bwo buzigire mwazigirane.” (Yn. 13:35) Kandi, okuba  n’obuzigire egarhi kirhu rhwene na nnene kunarhume rhwagendekera rhwaba omu cinyabuguma. Paolo ahamagire obuzire oku ly’“ifûndo limana ly’ecinyabuguma.” (Kl. 3:14, NWT) Cikone, hali ecindi cirhumire c’obulagirire cakarhushumya rhuzigirane rhwene na nnene. Entumwa Yowane ayandikire ababo bemezi ntya: “Osîma [ozigira] Nnâmahanga agwasirwe asîme na mwene wabo.” (1 Yn. 4:21, Mashi Bible) Erhi rhuyerekana obuzigire egarhi kirhu rhwene na nnene, rhunayerekane oku rhuzigire Nnâmahanga.

4-5. Ohâne olwiganyo luyerekine olushangi lubaho egarhi k’obuzigire bwirhu kuli Nnâmahanga n’obuzigire bwirhu egarhi kirhu rhwene na nnene.

⁴ Omu njira nci obuzigire bwirhu kuli Nnâmahanga bujira olushangi bwenene n’obuzigire rhuyeresa bene wirhu na bali birhu? Kwa lwiganyo, rhuganirire olushangi lubaho egarhi k’omurhima gwirhu n’ebindi birumbu by’omubiri gwirhu. Erhi munganga akalabiriza gurhi omuko guli gwatera-tera omu njingo y’ecigasha ly’abona erhi guli gwatera-tera duba-duba erhi bunyi-bunyi, anaba n’obulyo bw’okumanya emyanzi lugenda oku omurhima gwirhu guyosire. Gurhi rhwakakolesamwo ako kanuni omu kuganirira obuzigire?

⁵ Nk’oku munganga akamanya myanzi milebe lugenda amagala girhu n’omurhima gwirhu amango ali alabiriza gurhi omuko guli gwatera-tera omu njingo y’ecigasha cirhu, rhwanamanya kunganaci obuzigire bwirhu kuli Nnâmahanga busêzire omu kulabiriza oku obuzigire bwirhu buyosire oku bandi. Erhi rhwakabona oku obuzigire bwirhu kuli bene wirhu buli bwanyiha omu njira ndebe, nkaba oko kwanayerekana oku obuzigire bwirhu kuli Nnâmahanga nabo buli bwanyiha. Cikone erhi ngasi mango rhwakakayereka bene wirhu obuzigire, ako kali kantu kayerekana oku obuzigire bwirhu kuli Nnâmahanga busêzire.

6. Bulya gurhi rhwanaderha oku rhugwerhe amazibu madarhi erhi akaba obuzigire bwirhu kuli bene wirhu na bali birhu buli bwanyiha? (1 Yowane 4:7-9, 11)

⁶ Erhi akaba obuzigire bwirhu kuli bene wirhu na bali birhu buli bwanyiha, rhwanaba rhugwerhe amazibu bwenene. Bulya gurhi? Bulya oko kwanaba kuyerekine oku ehali yirhu y’ekiroho eri omu mazibu. Entumwa Yowane yahugwîre ntyo n’obwalagale erhi arhukengeza ntya: “Orhazigira mwene wabo adwirhe abona, ntakwo ankazigira Nyamuzinda arhabona.” (1 Yn. 4:20) Isomo lihi rhuyizire? Erhi ‘rhwakakazigirana’ lyone Yehova akarhushagalukira.—Osome 1 Yowane 4:7-9, 11.

7-8. Njira zihi nguma na nguma rhwakayerekanamwo obuzigire egarhi kirhu rhwene na nnene?

⁷ Omu Kanwa ka Nnâmahanga, muli irhegeko ligalukirwe kanji-kanji lirhuhûnyire ‘rhuzigirane.’ (Yn. 15:12, 17; Rm. 13:8; 1 Ts. 4:9; 1 Pt. 1:22; 1 Yn. 4:11) Cikone, obuzigire buba borhere bw’omurhima, erhi muntu w’ekandalala, na nta mwene muntu wakabona ebirhuli omu murhima. Muli ntyo, gurhigi rhwakayerekanamwo oku rhuzigire bene wirhu na bali birhu? Kugerera enderho zirhu n’ebijiro birhu.

⁸ Hali njira nyinji ziri lubero rhwakayeresamwo bene wirhu na bali birhu oku rhubazigire. Aha hali nyiganyo nguma na nguma: “Ngasi muguma akaz’ibwira mulungu wage okuli.” (Zak. 8:16) ‘Mube n’omurhûla mwêne na mwêne.’ (Mk. 9:50) Mukaba barhanzi “okuyerekana obukenge.” (Rm. 12:10, Mashi Bible) “Mukayankirirana mwêne na nnene.” (Rm. 15:7) ‘Mukababalirana.’ (Kl. 3:13) ‘Ngasi muguma akabarhula omuzigo gw’owabo.’ (Gl. 6:2) “Mukaz’irhulirizanya.” (1 Ts. 4:18) ‘Mukazibuhanya.’ (1 Ts. 5:11, Mashi Bible) ‘Mukasengererana.’—Yk. 5:16.

9. Bulya gurhi okurhuliriza abandi eri njira y’obulagirire y’okuyerekana obuzigire bwirhu? (Olole n’enfoto.)

 ⁹ Lekagi rhuganirire nderho nguma z’omu nderho ziyerekana obuzigire bwirhu ziganirirwe omu cifungo cishokwire. Paolo adesire ntya: “Mukaz’irhulirizanya.” Bulya gurhi okurhuliriza abandi eba njira y’obulagirire bwenene y’okubayeresa obuzigire bwirhu? Nk’oku citabu ciguma cihugûla Ebibliya ciyerekine, enderho ‘kurhuliriza’ Paolo akolesagya zihugwîre “kuyimanga aha burhambi bwa muntu mulebe n’okumuha omurhima amango ali alwisa amazibu madarhi.” Muli ntyo, rhunarhabale owirhu mwemezi oli walibuka ayimange n’okugendekera alambagira omw’ibarabara liyerekire ebwa buzine. Na ngasi mango erhi rhurhuliriza mwene wirhu erhi mwali wirhu rhunamuyerese oku rhumuzigire.—2 Kr. 7:6, 7, 13.

10. Lushangi luhi luli egarhi k’obwonjo n’oburhulirize?

¹⁰ Haba olushangi lwa hofi-hofi egarhi k’obwonjo n’oburhulirize. Omu njira nci? Omuntu w’obwonjo anashumibwe ly’arhuliriza abandi ananalonze okubarhabala omu malibuko gabo. Oku murhondero rhunayumve obwonjo, buzinda rhuhâne oburhulirize. Rhulole gurhi Paolo ayerekine oku obwonjo Yehova ajira kuli bene bantu bunamushumye abarhulirize. Paolo ayerekine oku Yehova ye “Larha w’obwonjo na Nyamuzinda wa ngasi burhulirize.” (2 Kr. 1:3) Nk’oku amahugûlo g’ifunzo g’ogo mulongo gayerekine, Paolo akolesize oluderho ‘bwonjo’ ly’ayerekana obwonjo rhuyumviza abandi. Co cirhumire, “Nnâmahanga ahamagirwe Larha, erhi Nshoko y’obwonjo, enyanya z’obwonjo bunji ajira kuli bene bantu.” N’obo bwonjo bo bumushumya arhurhulirize “omu mbaka zirhu zoshi.” (2 Kr. 1:4) Nka kula amishi minja gahulula kurhenga omw’iriba galuhûla abagwerhwe n’enyorha, Yehova analuhûle n’okurhuliriza balya bavunisire omurhima. Gurhi rhwakayigamwo olwiganyo lwa Yehova omu kuyumviza abandi obwonjo n’okubarhuliriza? Njira nguma rhwakajiramwo ntyo, kuli kucihangana okuba n’amorhere gakarhushumya rhukarhuliriza abandi. Rhuganirire maguma na maguma ga muli ago morhere.

11. Kushimbana n’Abakolosi 3:12 na 1 Petro 3:8, gandi morhere gahi rhugwasirwe rhube nago lyo rhugendekera rhwaba n’obuzigire burhushumya rhurhulirize abandi?

¹¹ Bici byakarhurhabala lyo rhugendekera rhwaba n’obuzigire rhulagirireko lyo ‘rhukaz’irhulirizanya’ ngasi lusiku? Rhushinganine rhukaba n’amorhere gali nk’aga: okufâ abandi lukogo, okuzigirana nka bana ba nda nguma, n’okuba ba bwonjo. (Osome Abakolosi 3:12; 1 Petro 3:8.) Gurhi ago morhere gakarhurhabalamwo? Erhi rhwakayumviza bene wirhu na bali birhu obwonjo, n’okubashibirira okunali, rhwanaba n’irala linji ly’okubarhuliriza amango bali balibuka. Yezu adesire oku “omuntu arhaderha ecirhamuli omu murhima. Omuntu nkana omu mbiko nyinja akûla aminja.” (Mt. 12:34, 35) Okurhuliriza bene wirhu na bali birhu amango bali omu bulagirire kobinali yo njira nyinja bwenene rhwakayerekanamwo obuzigire bwirhu kuli bo.

12. (a) Bulya gurhi rhushinganine rhube masu? (b) Idoso lihi rhukola rhwaganirira?

¹² Rhweshi rhuba rhulonzize ‘rhukazigirana.’ (1 Yn. 4:7) Cikone, kuli kwa bulagirire bwenene kuli rhwe okukengera oku Yezu arhurhonzire oku “obuzigire bwa banji bwanyihe.” (Mt. 24:12) Yezu arhal’ilonzize okuyerekana oku abanafunzi bage bakalesire okuyerekana obuzigire egarhi kabo bone na nnene. Co cirhumire, rhushinganine rhugendekere rhwaba masu lyo rhurhag’ishumibwa n’obubule bw’obuzigire buli mw’er’igulu lirhuzungulusire. Bulya rhugwerhe ezo ntanya omu bukengere bwirhu, lekagi rhuganirire er’idoso ly’obulagirire: Bici byakarhurhabala lyo rhumanya erhi obuzigire bwirhu kuli bene wirhu busêzire?

13. Bici byakarhangula obuzigire bwirhu?

 ¹³ Njira nguma rhwakamanyamwo erhi obuzigire bwirhu busêzire kuli kulabiriza oku rhujira erhi kanga kalebe kakarhuhikira omu kalamo. (2 Kr. 8:8) Entumwa Petro yayerekine kanga kaguma ka ntyo erhi aderha ntya: “Ci bwenene muzigirane mwêne na nnene, bulya obuzigire buzaza omwandu gw’ebyaha.” (1 Pt. 4:8) Co cirhumire, obuzamba bw’abandi n’okurhaba bimana kwabo kwanarhangula obuzigire bwirhu.

14. Kushimbana na 1 Petro 4:8, buzigire bwa gurhi rhulagirireko? Ohâne olwiganyo.

¹⁴ Lekagi rhusegeze obwenge oku nderho za Petro. Ecigabi cirhanzi c’omulongo gwa 8 ciyerekine buzigire buhi rhushinganine rhube nabo; cidesire erhi: “Bwenene muzigirane.” Oluderho “bwenene” Petro akolesagya lwanahugûlwa luderho oku lundi “kulambula.” Ecigabi ca kabirhi c’ogo mulongo ciyerekine ebi obo buzigire bwakarhuhashisa okujira. Okuzigirana bwenene kunarhurhabale lyo rhuzaza ebyaha bya bene wirhu. Rhwanaganirira obuzigire mw’eyi njira: Rhunagwarhe obuzigire bwirhu na maboko abirhi, kuli nka kula rhwakarhôla ecitambara cigali n’okucilambula bwenene, lyo cibwikira arhali caha ciguma cone erhi bibirhi cikone lyo cibwikira “omwandu gw’ebyaha.” Okuzaza erhi kubwikira luli luderho lw’olwiganyo lukolesibwe  omu kuganirira okubabalira. Nka kula oluhande lw’ecitambara lwakabwikira ishembo lilebe, obuzigire bwanabwikira obuzamba n’okurhaba bimana kw’abandi.

15. Erhi akaba obuzigire bwirhu kuli bene wirhu na bali birhu busêzire bwenene, bici rhwakahasha okujira? (Abakolosi 3:13)

¹⁵ Obuzigire bwirhu bushinganine bube busêzire bwenene lyo rhubabalira obuzamba bw’abirhu bemezi, ciru akaba kwanaba kuzibu bwenene okujira ntyo mango maguma na maguma. (Osome Abakolosi 3:13.) Erhi rhuhasha okubabalira abandi, rhunayerekane oku obuzigire bwirhu busêzire n’oku rhulonzize okushagalusa Yehova. Bindi bici byakarhurhabala lyo rhubabalira amagosa g’abandi n’okurhakagaya duba-duba enyanya z’ebi bajijire?

16-17. Bindi bici byakarhurhabala lyo rhurhasegezagya obwenge oku magosa masungunu-ngunu g’abandi? Ohâne olwiganyo. (Olole n’enfoto.)

¹⁶ Okasegeza obwenge oku morhere minja ga bene winyu na bali binyu, arhali oku magosa gabo. Rhuganirire olu lwiganyo. Orhanye obe oli okw’idinye haguma n’ecigusho ca bene winyu na bali binyu muli mwacishagalusa. Muli mwashagalukira akasanzi kinja n’oku buzinda bwer’idinye murhôlwe enfoto haguma. Kobinali, mwanarhôlesa zindi nfoto ibirhi mwakabêrana erhi akaba eya burhanzi erhayish’irhenge bwinja. Mwanabaga mukola mugwerhe nfoto isharhu. Cikone oku nfoto nguma mulizo, oboneko mwene wirhu muguma anzinzire amalanga. Gurhi wakajira eyo nfoto? Wanayizaza bulya ogwerhe zindi nfoto ibirhi, na kw’ezo nfoto  ngasi muguma winyu ali amwemwerhwa, kuhiramwo n’oyo mwene wirhu.

¹⁷ Lekagi rhushushanye enfoto rhubîka n’ebintu binja rhugendekera rhwakengera kuli bene wirhu na bali birhu. Kanji-kanji rhunakengere akasanzi kinja rhwagezize haguma na bene wirhu na bali birhu. Cikone orhanye kasanzi kaguma mw’orho rhusanzi mwagezagya haguma, mwene wirhu muguma erhi mwali wirhu aderha erhi kujira kantu kalebe karhashinganini. Bici rhushinganine rhujire lugenda ako kantu karhashinganini? Bulya gurhi orhakacihangana okukazaza omu bwenge nka kula wanazazagya erya nfoto nguma mw’ezirya nfoto? (Mig. 19:11; Ef. 4:32) Rhwanajira okwirhu koshi lyo rhuzaza ecaha cisungunu c’oyo mwene wirhu bulya rhukengire rhusanzi rhunji rhwinja rhwagezize haguma naye. Ebyo bintu bya ntyo byo rhulonzize rhukabîka omu bwenge bwirhu n’okubikengera.

18. Bintu bihi by’obulagirire lugenda obuzigire rhwaganirire mw’eci cigabi?

¹⁸ Bulya gurhi rhulonzize rhugendekere rhwazibuhya obuzigire egarhi kirhu rhwene na nnene? Nk’oku rhwaganiriraga, erhi rhuyeresa bene wirhu na bali birhu obuzigire, rhunabe rhuli rhwabuyeresa Yehova. Gurhi rhuyeresamwo abirhu bemezi obuzigire bwirhu? Njira nguma rhujiramwo ntyo kuli kubarhuliriza. Rhwanahasha ‘okukarhulirizanya’ erhi rhwakakayumviza abandi obwonjo. Gurhi rhwakagendekera rhwazibuhyamwo obuzigire bwirhu egarhi kirhu rhwene na nnene? Omu kubabalira amagosa ga bene wirhu na bali birhu ciru n’amango kuli kuzibu okujira ntyo.

19. Bulya gurhi ene kuli kwa bulagirire bwenene okuyeresa bene wirhu na bali birhu obuzigire?

¹⁹ Bulya gurhi ene kuli kwa bulagirire bwenene okuyeresanya obuzigire? Petro ahânyire ecirhumire omu kuderha ntya: “Obuzinda bw’ebintu byoshi bukola buli hofi . . . bwenene muzigirane mwêne na nnene.” (1 Pt. 4:7, 8) Bulya obuzinda bw’er’igulu ligalugalu buyegerire bwenene, bici rhushinganine rhukengere? Omu kuganirira lugenda abanafunzi bage, Yezu ali adesire ntya: “Mwashombwe na boshi erhi Izino lyani lirhuma.” (Mt. 24:9) Lyo rhulembera enshombo ya ntyo, rhushinganine rhubêre omu cinyabuguma. Erhi rhwakakayeresa bene wirhu na bali birhu obuzigire, nta mango Shetani akahasha okurhujira rhugabikanemwo, bulya obuzigire liba “ifûndo limana ly’ecinyabuguma.”—Kl. 3:14, NWT; Fl. 2:1, 2.