“Amango nakag’ilibuzibwa n’entanya z’okuciyumva nka ndi wa busha, Yehova ampa omurhima kugerera enyimbo z’oku JW Télédiffusion.” —Lorraine, Etats-Unis d’Amérique.

Ensiku zoshi, “enyimbo” z’ekiroho ziba cigabi c’enterekêro yirhu y’Ecikristu. (Kl. 3:16) Erhi wakabîka ezo nyimbo omu bukengere bwawe, zanakurhabala ciru n’amango orhagwerhi citabu c’enyimbo erhi ecombo c’ecielektronike. Ocihangane okukolesa amahano gakulikire lyo gakurhabala obîke enyimbo zirhu omu bukengere.

• Okasoma bwinja-bwinja enderho z’olwimbo ly’oluhugûkwa. Kwanaba kulembu kuli we okukengera emyanzi erhi wakaba oyihugûsirwe bwinja. Enderho z’enyimbo zirhu zoshi, ciru n’enyimbo zago-zago n’enyimbo z’abana, ziba oku jw.org. Oje omu cigabi Bibliothèque, buzinda oyigule Musique.

• Okayandika enderho z’olwimbo oku karatasi. Bibonekine oku okujira ntyo kwanasegeza ezo nderho omu bukengere bwawe.—Lush. 17:18.

• Ocikomereze omu kuyimba n’izu linene. Okasoma erhi kuyimba olwimbo kanji-kanji.

• Okalola erhi obisire enyimbo omu bukengere. Okapima okuyimba olwimbo buzira kulola oku nderho zalo, na buzinda wanazilolako ly’omanya erhi wahashire okuzibîka omu bukengere bwawe.