Naburhagwa omu mwaka gwa 1948 omu lugo lusungunu luba omu eneo y’emukondwe y’ebuzikiro bw’izuba (Sud-Ouest) omu cihugo c’e Nigeria. Mw’ago mango, Moustapha, mulumuna wa larha, na Wahabi, mukulu wani babatizibwa n’okuba Bahamirizi ba Yehova. Erhi ngwerhe myaka mwenda, larha afâ. Navunika omurhima bwenene. Wahabi ambwira oku rhwanacibone Larha amango g’obufûke. Ezo ntanya z’okurhuliriza zanshumya nyige Ebibliya. Nabatizibwa omu mwaka gwa 1963. Bakulu bani babirhi na mulumuna wani muguma nabo babatizibwa kasanzi kasungunu enyuma z’aho.

Omu mwaka gwa 1965, naj’ilama haguma na mukulu wani Wilson e Lagos nanashagalukira obwîra bwa hofi-hofi haguma na bapainiya b’akasanzi koshi omu Cigamba c’e Igbobi. Omwishingo gwabo n’obushiru bwabo byanshumya, n’omu Mwezi gwa 1, 1968, nani narhondera obupainiya.

Mwene wirhu muguma wakag’ikolera oku Beteli ohamagalwa Albert Olugbebi, apanga okujira entimanano yago-yago haguma n’emisole ly’arhubwira lugenda obulagirire bwa bapainiya ba pekee omu eneo y’emwené (Nord) y’e Nigeria. Nancikengere ezi nderho Mwene Wirhu Olugbebi aderhaga n’obushagaluke: “Muciri misole, mwananakolesa akasanzi kinyu n’emisi yinyu omu mukolo gwa Yehova. Hali binji mwakajira eyo munda!” Bulya nal’ilonzize nyige iroho  ly’okucihâna ly’omulebi Izaya, nayunjuza efomu y’okuba painiya wa pekee.—Iz. 6:8.

Omu Mwezi gwa 5, 1968, naba painiya wa pekee omu vile y’e Kano, eba olunda lw’emwené lw’e Nigeria. Ago gali mango g’ivita lya Biafra (mwaka gwa 1967-1970); er’ivita lyadwirhe malibuko manji bwenene lyanayirha abantu omu eneo y’emwené y’e Nigeria na buzinda lyahamira omu eneo y’ebushoshokero bw’izuba y’e Nigeria. Mwene wirhu muguma wabonekanaga nk’anshibirire alonza okunyemeza oku ntajaga eyo munda. Cikone namubwira ntya: “Koko oku kunshibirira kwawe. Cikoki, akaba Yehova alonzize mukolere eyo munda, ntagwerhi karhinda koshi-koshi oku aba haguma nani.”

Byali bya kugayisa bwenene okubona ebi ivita lyajiraga omu eneo y’e Kano. Ivita egarhi ka bacikala bone na nnene lyashereza bwenene eyo vile nnene. Erhi rhwakabire rhuli omu mukolo gw’amahubiri, hali amango rhwakag’irhaluka emirhumba y’abantu banigagwa mw’ako kavulindi. Ciru akaba hali bigamba binji omu vile y’e Kano, bene wirhu banji bali erhi bayasire. Bahubiri barhahisiri 15 bone bal’isigire, na kandi bal’iyobohire banal’ivunisire omurhima. Abo bene wirhu bashagaluka bwenene erhi rhwe bapainiya ndarhu ba pekee rhuhika. Rhwaha abo bahubiri omurhima banaciyumva bwinja. Rhwabarhabala bacib’iba n’enkomedu nyinja y’ebintu by’ekiroho n’okukarhuma eraporo zabo oku tawi n’efomu z’okuhûna ebicapo.

Rhwe bapainiya ba pekee rhwarhondera okuyiga olulimi lw’Ecihausa. Omu kuyumva omwanzi gw’Obwami omu lulimi lwabo, bantu banji ba mw’eyo eneo bakarhuyumvirhiza. Cikone, abemezi b’idîni lyal’igwerhe bantu banji mw’eyo eneo barhashagalukiraga omukolo gwirhu gw’amahubiri, co cirhumire rhwal’igwasirwe rhube masu. Mango maguma, mulume muguma wal’idwirhe akere arhulibirhako nie n’owundi muhubiri. Eby’okushagalusa, rhwalibirha bwenene arhanahashaga okurhugwarha! Ciru akaba hali ago mazibu, Yehova ‘alirhuyimangire’ n’omubalè gw’abahubiri gwarhondera okuyushuka. (Enna. 4:8, Mashi Bible) Ene, bahubiri balushire 500 bali bakola omu bigamba 11 omu vile y’e Kano.

Oku buzinda bw’Omwezi gwa 8, 1968, enyuma z’okujira myezi misungunu yone omu Kano, narhumwa e Niamey, vile nkulu y’ecihugo c’e Niger, haguma n’abandi bapainiya ba pekee. Enyuma za kasanzi  kasungunu, rhwacibonera oku ecihugo c’e Niger, ciba omu Afrique de l’Est, ciba ciguma c’omu bihugo bibamwo cidurhu cinene bwenene omw’igulu. Ahanyuma n’okuciyigiriza okulembera idurhu, rhwal’igwasirwe rhuciyigirize olulimi lwa leta lw’eco cihugo, ko kuderha olulimi lw’Ecifaransa. Ciru akaba hali ago mazibu, rhwahira obulangalire bwirhu muli Yehova rhwanarhondera okuhubiri mw’eyo vile haguma n’abandi bahubiri basungunu bal’ilamiremwo. Omu kasanzi kasungunu, hofi ngasi muntu wakamanyir’isoma w’omu Niamey ahâbwa ecitabu c’okuyiga Ebibliya cidesire Kweli Iongozayo Kwenye Uzima wa Milele. Ciru hali n’amango abantu bakagiyish’irhulonza lyo rhubaha eco citabu!

Enyuma za kasanzi kasungunu, rhwavumbula oku abarhegesi barhal’isimire Abahamirizi ba Yehova. Omu Mwezi gwa 7, 1969, rhwajira entimanano y’omuzunguko ntangiriza mw’eco cihugo, yaliko bantu hofi 20. Rhwakag’ilindirira okubona gurhi bahubiri babirhi bahyahya babatizibwa. Cikone, olusiku lurhanzi lw’eyo ntimanano, abapolisi bayisha banayimanza eyo programe. Barhugwarha rhuli bapainiya ba pekee na mwangalizi w’omuzunguko barhuheka oku biro by’abapolisi. Enyuma z’okurhudosa amadoso, barhubwira oku rhucib’igaluka olusiku lwakulikiraga. Rhwahugûkwa oku hali amango abarhegesi bakarhulerhera amazibu; enyanya z’oko, rhwapanga okugeza ehotuba y’obubatizo omu nyumpa ya muntu mulebe na buzinda rhwabatiza abantu bwifulikwe omu lwishi.

Migobe misungunu enyuma z’aho, Ministre w’Ebiri Byajirikana omu Cihugo Lugenda Obulanzi arhufukuza mw’eco cihugo nie n’abandi bapainiya ba pekee barhanu. Barhuha nsa 48 z’okurhenga mw’eco cihugo, na rhwene rhwal’ishinganine rhucijirire emipango y’okurhengamwo. Rhwarhumikira, na ho n’aho rhwagenda oku biro by’etawi y’e Nigeria, n’eyo munda rhwahâbwa emikolo mihyahya.

Narhumwa okuj’ikolera omu lugo lw’e Nigeria luhamagalwa Orisunbare, na mw’olo lugo nashagalukira okuhubiri n’okulongoza amafunzo g’Ebibliya haguma n’ecigusho cisungunu c’abahubiri bal’ilamiremwo. Cikone enyuma za myezi ndarhu, ebiro by’etawi byampûna ngaluke e Niger niene. Oku murhondero, nal’isomirwe nanal’iyobohire, cikone buzinda nashagalukira bwenene okucib’ibuganana na bene wirhu b’e Niger!

Nagaluka e Niamey. Lusiku luguma enyuma z’okuhika kwani, mulume muguma w’e Nigeria wali murhunzi mukulu amanya oku ndi Muhamirizi anarhondera okundosa amadoso lugenda Ebibliya. Nakamuyigiriza Ebibliya, n’enyuma z’okuleka okunywa irhabi n’okunywa amamvu kurhalusire olugero, abatizibwa. Enyuma z’aho, nashagalukira okuhubiri haguma na bene wirhu na bali birhu omu eneo ziri lubero z’ecihugo c’e Niger n’okubona gurhi abantu bahikire aha bayemera okuli omu kasanzi ka myaka minji. Erhi mpika mw’eco cihugo oburhangiriza, mwali Bahamirizi 31; n’erhi ntengamwo mwali Bahamirizi 69.

Oku buzinda bw’omwaka gwa 1977, nagaluka e Nigeria lyo nj’ikomerezibwa. Oku buzinda bw’amasomo  gajiraga migobe isharhu, omuratibu w’Ekomite y’Etawi wakag’ihamagalwa Malcolm Vigo, ambwira nsome amaruba garhengaga oku tawi y’e Sierra Leone. Bene wirhu bakag’ilonza mwene wirhu muguma ociri mulamba onagwerhe amagala minja, wal’imanyire okuderha olulimi lw’Ecingereza n’Ecifaransa ly’aj’ikola nka mwangalizi w’omuzunguko omu Guinée. Mwene Wirhu Vigo ambwira oku nakag’ikomerezibwa lyo nj’ijira ogo mukolo. Ambwira n’obwalagale oku gurhali mukolo mulembu. Ampanûla ntya: “Ogurhanyeko embere oyemere.” Ho n’aho nashuza erhi, “Bulya Yehova ye ntumire, naja yo.”

Narhôla e aviyo y’okuja e Sierra Leone nanabuganana na bene wirhu oku biro by’etawi. Mwene wirhu muguma w’omu Komite y’Etawi ambwira erhi, “Rhurhamanyiri binji lugenda omukolo gw’Obwami omu Guinée.” Ciru akaba ebiro by’etawi by’e Sierra Leone byo byal’iyimangire omukolo gw’amahubiri omu cihugo c’e Guinée, kurhali kulembu okumanya emyanzi y’abahubiri enyanya z’akavulindi kali omu by’epolitike mw’eco cihugo. Na ciru akaba bacihanganyire kanji-kanji, birhakahashikine mwene wirhu orhumirwe n’etawi alambagirire bene wirhu mw’eco cihugo. Co cirhumire, bampûna mbalamire e Conakry, vile nkulu y’ecihugo c’e Guinée, lyo mpûna okuba cikala w’eco cihugo.

Erhi mpika e Conakry, naj’ibona omuja-bugo (ambasadere) w’ecihugo c’e Nigeria oku biro byage. Namubwira lugenda irala nagwerhe ly’okuhubiri omu cihugo c’e Guinée. Anyinginga oku ntaberaga mw’eco cihugo lyo ntag’ishwekwa erhi kujirirwa kubi. Ambwira ntya: “Ogaluke e Nigeria oj’ihubiri yo,” nani namushuza erhi, “Mpizire okubêra eno munda.” Co cirhumire, ayandikira Ministre w’omu Guinée Olaba Ebiri Byajirikana omu Cihugo Lugenda Obulanzi ly’antabala, n’oyo ministre anyankirira bwinja.

Kasanzi kasungunu enyuma z’aho, nagaluka oku biro by’etawi by’e Sierra Leone nanamanyisa bene wirhu lugenda omuhigo gw’oyo ministre. Bene wirhu bashagaluka bwenene erhi bayumva gurhi Yehova agishire omubalamo gwani. Nali namayemererwa okuba cikala w’omu cihugo c’e Guinée!

Kurhangira omu mwaka gwa 1978 kuhika omu mwaka gwa 1989, nakola nka mwangalizi w’omuzunguko omu Guinée, omu Sierra Leone, na nka mwangalizi w’omuzunguko murhabazi omu Liberia. Oku murhondero, nakag’ilwala kanji-kanji. Hali amango oko kwakag’impikira omu maeneo ga kulî bwenene n’evile. Cikone bene wirhu bakag’ijira okwabo koshi lyo bampeka oku hopitali.

Mango maguma, nalwala amalariya madarhi n’enzoka. Erhi mpikira aha nafuma, nayumva oku bene wirhu bakag’iganirira ngahi bambisha! Ciru akaba ebyo bintu by’okuyobohya byampikire, nta mango narhanyize lugenda okuleka omukolo gwani. Ngendekire nayemera n’obwalagale oku Nnâmahanga yene wakarhuha obulanzi bw’okunali bulya ciru rhwakafâ, agwerhe obuhashe bw’okurhugalulira obuzine.

Omu mwaka gwa 1988, nabuganana na Dorcas, mwali wirhu muguma mwirhohye bwenene onaba ozigire Yehova bwenene. Rhwajira obuhya, anacilunga haguma na nani omu mukolo gw’omuzunguko. Dorcas abonekine oku aba mukazi wa buzigire onajira iroho ly’okucihâna. Haguma naye, rhwakag’ilambagira bilometre 25 kurhenga omu cigamba cilebe kuja omu cindi, rhubarhwire n’omuzigo gwirhu. Lyo rhuja omu bigamba bya kulî, rhwakag’ikolesa ngasi  bulyo rhwanakag’ipata lyo rhubalama omu mabarabara gayunjwiremwo ebijondo n’emina.

Dorcas aba mukazi wa burhwali bwenene. Kwa lwiganyo, hali amango byakag’ihûna rhuyikire enyishi ziyunjwiremwo bamamba. Omu mubalamo muguma gwa nsiku irhanu, ebiralo by’emirhi bya lwishi luguma byal’ivunisire na ntyo rhwal’igwasirwe rhukolese emitumbu. Erhi Dorcas ayimuka ly’arhenga omu mutumbu, arhogera omu mishi g’entûla. Nta muguma muli rhwe wal’imanyire okuyoga, na mw’olo lwishi mwali bamamba. Eby’okushagalusa, misole miguma yacikweba mw’ago mishi yanamuyokola. Omu kasanzi kalebe rhwakag’ifuduka budufu enyanya z’ebyo byarhuhikiraga, cikone rhwagendekera n’omukolo gwirhu.

Oku murhondero gw’omwaka gwa 1992, rhwasomerwa bwenene okumanya oku Dorcas ali izimi. Byal’ihûnyire rhuhige erhi rhwakola nka bapainiya ba pekee. Rhwakarhanya ntya: “Yehova anarhuhîre engalo!” Co cirhumire, rhwahiga okuyirika omwana-nyere wirhu izino lya Jahgift (luderho lw’Ecingereza luhugwîre “Ngalo Kurhenga emwa Yah”). Myaka ini enyuma z’okuburhwa kwa Jahgift, mushinja wage Eric naye aburhwa. Abo bana birhu bombi zabire ngalo z’ekiroho kuli rhwe. Jahgift akozire kasanzi kalebe oku biro by’okuhindula ebicapo birhu omu zindi ndimi omu Conakry, na Eric ali murhabazi w’abagula.

Ciru akaba byahûnyire buzinda Dorcas aleke okukola nka painiya wa pekee, agendekire okuba painiya w’akasanzi koshi, ciru akaba akag’ilera abana birhu. Kugerera oburhabale bwa Yehova, nagendekire naba painiya wa pekee. Erhi abana birhu bakula, Dorcas acib’iba n’obuhashe bw’okuba painiya wa pekee. Ene, nie naye rhuli bamisiyonere omu Conakry.

Ensiku zoshi najire ngasi hoshi Yehova antumire. Kanji-kanji nie na mukanie rhwacibwinire obulanzi bwage n’emigisho yage. Omu kulangalira Yehova ahali h’okulangalira ebintu by’omubiri, rhwayasire mazibu manji na mahangayiko manji g’obukengere. Kugerera ebi rhwacibwinire, nie na Dorcas, rhwaciyigirizize oku Enshoko y’obulanzi bw’okunali aba Yehova, “Nyamuzinda Mucunguzi wirhu.” (1 Nga. 16:35) Nyemire n’obwalagale oku obuzine bwa balya boshi bamulangalira “bwabohwa bwinja omw’irhu ly’obuzine hofî na Yehova.”—1 Sam. 25:29, NWT.