1. Mwanzi guhi omulebi Izaya abwizire ababo Baisraheli?

 OMULEBI Izaya aganirire Yehova nka “Nyamuzinda w’okuli.” Oluderho lwahindwirwe “okuli” lwanahugûla amen. (Iz. 65:16) Amen kuli kuderha “bibe ntyo,” erhi “kobinali.” Erhi oluderho amen lukolesibwa omu Bibliya lugenda Yehova erhi Yezu, lunabe lurhuyemezize n’obwalagale oku ngasi byoshi badesire biri by’okuli. Co cirhumire, omwanzi Izaya abwiraga ababo Baisraheli gwal’iyumvikine n’obwalagale: Ebi Yehova aderha biba bya kulangalirwa ensiku zoshi. Yehova ayerekine oku ebi aderha biba by’okuli omu kuhikiriza ebiragane byage byoshi.

2. Bulya gurhi rhwakalangalira ebiragane bya Yehova lugenda amango girhu gayisha, na madoso gahi rhwaganirira mw’eci cigabi?

² Ka nirhu rhwanaba n’obulangalire buli nk’obo omu biragane bya Yehova lugenda amango girhu gayisha? Hofi myaka 800 enyuma z’amango ga Izaya, entumwa Paolo yahugwîre bulya gurhi ebiragane bya Nnâmahanga biba bya kulangalirwa ensiku zoshi. Paolo adesire oku ‘ntakwo Nyamuzinda ankahash’inywerha.’ (Hb. 6:18) Nka kula iriba lirhakarhengamwo amishi minja n’amishi g’omunyu, ko Yehova naye Nshoko y’okuli, arhankaywerha. Co cirhumire, rhwanalangalira loshi-loshi ngasi kantu Yehova adesire, kahiziremwo ebiragane byage byoshi lugenda amango girhu gayisha. Mw’eci cigabi, rhwaganirira amadoso gakulikire: Bici Yehova alaganyize okurhuha omu mango gayisha? Na gurhi Yehova arhuyemezizemwo n’obwalagale oku eciragane cage cahikirira?

3. (a) Ciragane cihi cishagalusa abakozi ba Nnâmahanga? (Amafulûlo 21:3, 4) (b) Gurhi bantu baguma na baguma baciyumva erhi rhubaganirira eco ciragane?

³ Abakozi ba Nnâmahanga b’omu igulu lyoshi banashagalukire  eciragane rhwaganirira. (Osome Amafulûlo 21:3, 4.) Yehova alaganyize amango “olufû ntalwo lwacihabê; emishîbo n’endûlù, n’amababale birhakacihabâ bundi.” Banji ba muli rhwe, amango bali bahubiri banakolese olo lwandiko lw’Ebibliya lw’okuhâna omurhima lugenda gurhi akalamo kayish’iyorha omu Paradizo. Gurhi bantu baguma na baguma baciyumva erhi rhubaganirira eco ciragane? Hali amango baderha erhi: “Ebyo biri binja bwenene birhakahash’ihikirira.”

4. (a) Erhi Yehova ahâna eciragane c’okuhindula igulu libe Paradizo, bici al’imanyire byakabire muli gano mango girhu? (b) Ahanyuma n’okuhâna eciragane, bindi bici Yehova ajijire?

⁴ Kobinali, erhi Yehova alongoza entumwa Yowane n’iroho lyage litagatifu ly’eyandika eco ciragane lugenda akalamo omu Paradizo, al’imanyire oku muli gano mango rhwakaganirire abandi obo bulangalire amango rhuli rhwayaliza omwanzi gw’Obwami. Kandi Yehova ali amabona oku bantu banji bakabwine oku eco ciragane c’ebintu ‘bihyahya’ cakabire cizibu okuyemera. (Iz. 42:9; 60:2; 2 Kr. 4:3, 4) Gurhigi rhwakajira lyo rhuciyemeza rhwe nnene n’okuyemeza abandi oku emigisho eganirirwe omu citabu c’Amafulûlo 21:3, 4 yahikirira? Yehova arharhuhîri kone eco ciragane c’okushagalusa cikone kandi arhuhîre ebintu birhuyemezize n’obwalagale bulya gurhi rhwakacilangalira. Bintu bihi ebyo arhuhîre?

5. Birhumire bihi byakarhuma rhwalangalira eciragane ca Nnâmahanga c’okujira igulu libe Paradizo, na ngahi rhwakabibona?

⁵ Omu milongo ekulikire, rhwabona ebirhumire by’okulangalira eciragane ca Yehova c’okuhindula igulu libe Paradizo. Edesire ntya: “Olya wali otamire oku ntebe aderha, erhi: ‘Loli oku byoshi namabijira bihyahya.’ Ashubirira, erhi: ‘Yandika oku ebi binwa birhali bya bunywesi, biri by’okuli.’ Ashub’imbwira, erhi: ‘Hoshi aho! Nie Alfa, nie na Omega, nie Murhondêro, nie na Buzinda.’”—Maf. 21:5, 6a.

6. Bulya gurhi ebintu biganirirwe omu Amafulûlo 21:5, 6 bizibuhize obulangalire bwirhu omu ciragane ca Nnâmahanga?

⁶ Bulya gurhi olo lwandiko lw’Ebibliya luzibuhize obulangalire bwirhu omu ciragane ca Nnâmahanga? Okubiyerekire eyo milongo, ecitabu Upeo wa Ufunuo cidesire ntya: “Ko biri nka Yehova yene asinyize akaratasi kayemezize bene bantu bishwekerezi oku bagwerhe ehaki y’okuhâbwa eyo migisho y’amango gayisha.” b Eco ciragane ca Nnâmahanga ciganirirwe omu Amafulûlo 21:3, 4. Cikone omu mulongo gwa 5 n’ogwa 6, muli esinyatire ya Yehova, erhuyemezize n’obwalagale oku kobinali eco ciragane cage cayish’ihikirira. Leki rhuganirire gurhi Yehova arhuyemezizemwo n’obwalagale oku rhwanamulangalira.

7. Nderho za ndi zirhondire omulongo gwa 5, na bulya gurhi ziri zago-zago?

⁷ Omulongo gwa 5 gurhondire n’ezi nderho zikulikire: “Olya wali otamire oku ntebe aderha, erhi.” (Maf. 21:5a) Ezo nderho zo ntangiriza omu kasharhu kone Yehova aganire omu citabu c’Amafulûlo kugerera ebibonekerezi. Arhali malahika erhi ciru Yezu orhuhîre eyo myanzi y’okurhuyemeza n’obwalagale, cikone Yehova yene orhuhîreyo! Ebyo biyerekine oku rhwanalangalira bwenene ebi adesire enyuma z’aho. Bulya gurhi rhudesire ntyo? Bulya Yehova ‘arhankarhebana.’ (Tt. 1:2) Ezo nderho ziyerekine oku ebi rhusomire omu citabu c’Amafulûlo 21:5, 6 kobinali byahikirira.

8. Bici Yehova adesire ly’ayerekana n’obwalagale oku eciragane cage canahikirire? (Izaya 46:10)

⁸ Rhuganirirage oluderho “Loli.” (Maf. 21:5)  Oluderho lw’Ecigiriki lwahindwirwe “loli” lukolesibwe kanji-kanji omu citabu c’Amafulûlo. Mahugûlo maguma gayerekine oku olo luderho lunakolesibwe omu “kukengeza omuntu oli wasoma oku asegeze obwenge bwage oku byaderhwa enyuma z’aho.” Bici Nnâmahanga adesire enyuma z’aho? Aderha ntya: “Byoshi namabijira bihyahya.” Kobinali, Yehova ali aganira lugenda empindulo zaba omu mango gayisha. Cikone kuli ye eco ciragane ciri c’okuli canahikirira, co cirhumire adesire omu njira eyerekine nk’ezo mpindulo ziri nk’ezahikirire.—Osome Izaya 46:10.

9. (a) Mikolo ehi ibirhi ya Yehova omusemwa “byoshi namabijira bihyahya” guhugwîre? (b) Bici byayish’ihikira “amalunga [empingu]” n’“igulu” biriho ene?

⁹ Lekagi rhuganirire omusemwa gukulikire guli omu lwandiko lw’Amafulûlo 21:5: “Byoshi namabijira bihyahya.” Mw’eci cigabi c’Ebibliya, ogo musemwa guyerekine bintu bibirhi Yehova ayish’ijira. Burhangiriza, ayish’ishereza er’igulu lya mîra. Bwa kabirhi ayish’ilerha igulu lihyahya. Olwandiko lw’Amafulûlo 21:1 ludesire ntya: “Amalunga [empingu] marhanzi n’igulu lirhanzi byahirigisire.” “Amalunga [empingu] marhanzi” gaganirire amarhegesi ga bene bantu gali gashumibwa na Shetani n’abazimu bage. (Mt. 4:8, 9; 1 Yn. 5:19) Erhi Ebibliya eganirira oluderho “igulu” enabe ehugwîre abantu balilamireko. (Murh. 11:1; Enna. 96:1) Cikone, “igulu lirhanzi” liyerekire abantu babi balamire oku igulu ene. Yehova arhakakubûla kone “amalunga [empingu]” n’“igulu” biriho ene; lubero n’oko, ayish’ibishereza loshi-loshi anabishanje. Ayish’irhenza amalunga erhi empingu eriho ene n’igulu liriho ene n’okuhiraho “amalunga [empingu] mahyahya n’igulu lihyahya” ko kuderha, oburhegesi buhyahya bwayish’irhambula abantu bashinganyanya.

10. Bici Yehova ayish’ijira bihyahya?

¹⁰ Olwandiko lw’Amafulûlo 21:5 lushubir’iganirira ebi Yehova adesire lugenda ebintu ayish’ijira bihyahya. Mw’olo lwandiko Yehova arhadesiri erhi: “Namajira ebihyahya byoshi.” Lubero n’oko, adesire: “Byoshi namabijira bihyahya.” Yehova ayish’ijira igulu libe lihyahya n’abantu babe bahyahya omu kujira igulu limana n’abantu babe bimana. Nk’oku Izaya ali alebire, Yehova ayish’ijira igulu lyoshi habe hantu hinja bwenene, nk’oku ishwa ly’e Edeni lyal’iyosire. Yehova ayish’irhujira bahyahya omu kufumya ngasi muguma wirhu loshi-loshi. Ebirema, emihurha, n’ebihuli bayish’ifuma, ciru n’abafîre nabo bayish’ifûka.—Iz. 25:8; 35:1-7.

11. Irhegeko lihi Yehova ahaga Yowane na bulya gurhi amuhaga lyo?

¹¹ Bindi bici Nnâmahanga adesire birhuyemezize n’obwalagale oku rhwanamulangalira? Yehova abwira Yowane erhi: “Yandika oku ebi binwa birhali bya bunywesi, biri by’okuli.” (Maf. 21:5) Yehova arhahaga Yowane irhegeko ly’‘okuyandika’ lyone. Amuhîre n’ecirhumire. Aderha ntya: “Ebi binwa birhali bya bunywesi, biri by’okuli,” oko kuyerekine oku ezo nderho za Nnâmahanga ziri z’okuli na za kulangalirwa. Rhuvuzire omunkwa okubona Yowane arhumikire er’irhegeko lidesire oku ‘ayandike.’ Okubona alirhumikire, rhugwerhe obulyo bw’okusoma lugenda eciragane ca Nnâmahanga c’okujira igulu libe Paradizo n’okurhanya bwenene oku migisho minja bwenene eri embere zirhu.

12. Bulya gurhi Yehova aderhaga erhi: “Hoshi aho!”

¹² Bici Nnâmahanga adesire enyuma z’aho? “Hoshi aho!” (Maf. 21:6) Yehova adesire omu njira eyerekine nk’ebintu byoshi biyerekire eciragane c’okujira igulu libe Paradizo byoshi byahikirire. Anashinganine aderhe mw’eyo njira bulya nta kantu koshi-koshi kakamuhanza okuhikiriza omuhigo gwage. Enyuma z’aho, Yehova adesire akandi kantu karhuyemezize n’obwalagale  oku eciragane cage cahikirira loshi-loshi. Kantu kahi ako?

13. Bici byarhumaga Yehova aderha erhi: “Nie Alfa, nie na Omega”?

¹³ Nk’oku rhwaganiriraga embere, Yehova ye nnene aganire kasharhu koshi-koshi omu bibonekerezi Yowane abonaga. (Maf. 1:8; 21:5, 6; 22:13) Ngasi mango erhi Yehova akadesire mw’ebyo bibonekerezi, akag’igalukira ezi nderho: “Nie Alfa, nie na Omega.” Eherufi alfa yo eba erhondire olufabé lw’Ecigiriki, n’eherufi omega yo eba eluyusize. Omu kukolesa enderho “Alfa na Omega,” Yehova ayerekine n’obwalagale oku erhi akarhondera kantu kalebe, anakashibirire kuhika ebuzinda bwako.

14. (a) Ohâne olwiganyo luyerekine mangaci Yehova aderhaga “Alfa” omu njira y’olwiganyo na mangaci anaderhe “Omega” omu njira y’olwiganyo. (b) Bici birhuyemezize n’obwalagale biri omu Omurhondêro 2:1-3?

¹⁴ Enyuma z’okulema Adamu na Eva, Yehova ayerekana omuhigo agwerhe oku murhondero okubiyerekire bene bantu n’igulu. Ebibliya edesire ntya: “Nyamuzinda abagisha, ababwira, erhi: ‘Muburhe, muyololoke, mubumbe igulu munalirhegeke.’” (Murh. 1:28) Erhi Yehova arhondeza omuhigo gwage, aba nk’odesire “Alfa.” Amango gakahisire, iburha limana na lya kurhumikira lya Adamu na Eva lyakabumbire igulu n’okulihindula libe paradizo. Hano ago mango gahika, Yehova ayish’iba nk’odesire “Omega.” Erhi Yehova ayusa okulema “amalunga [empingu] n’igulu n’ebibamwo byoshi,” aderha kantu kalebe kayerekine oku omuhigo gwage kobinali gwakahikirire. Ako kantu kali omu Omurhondêro 2:1-3, Mashi Bible. (Osome.) Yehova aderha oku olusiku lwa kali nda lwaba lutagatifu kuli ye. Bici oko kuhugwîre? Yehova ayerekana oku arhakayabirwa okuhikiriza omuhigo gwage lugenda bene bantu n’igulu. Gwakahikirire loshi oku buzinda bw’olo lusiku lwa kali nda.

15. Bulya gurhi byakabonekine nka Shetani akarhumire Nnâmahanga arhahikiriza omuhigo gwage lugenda bene bantu?

 ¹⁵ Erhi Adamu na Eva bayus’igoma, baba banya-byaha banayahukiza iburha lyabo ecaha n’olufû. (Rm. 5:12) Oko kwakarhumire byabonekana nka birhakahashikana abantu bimana na ba kurhumikira Yehova babumbe igulu. Byakabonekine nka Shetani akarhumire Yehova arhaba n’obulyo bw’okuderha “Omega.” Shetani akarhanyize oku Yehova agwerhe bintu bisungunu byone akajira ly’ahikiriza omuhigo gwage. Kantu kaguma ka muli ebyo bintu kwali kuniga Adamu na Eva n’okulema owundi mulume n’omukazi mwimana ly’ahikiriza omuhigo gwage kuli bene bantu. Cikone Nnâmahanga acijiraga ntyo, Ibilisi akamushobesire oku ali munywesi. Bulya gurhi? Bulya, nk’oku biyerekinwe omu citabu c’Omurhondêro 1:28, Yehova ali erhi abwizire Adamu na Eva oku iburha lyabo lyo lyakabumbire igulu.

16. Bulya gurhi nkaba Shetani akarhanyize oku ashobeka Yehova oku anayabirwe okuhikiriza omuhigo gwage?

¹⁶ Gundi muhigo guhi nkaba Shetani akarhanyize oku Nnâmahanga orhôla? Nkaba Shetani akarhanyize oku Yehova akalesire Adamu na Eva baburhe iburha lirhali limana lirhakanahashire ciru n’ehitya okuhikira okuba limana. (Muh. 7:20; Rm. 3:23) Yehova acijiraga ntyo, buzira karhinda, Ibilisi akamushobesire oku anayabirwe okuhikiriza omuhigo gwage. Bulya gurhi? Bulya oko kwakarhumire Nnâmahanga arhahikiriza omuhigo gwage gw’okujira igulu Paradizo n’okuliyunjuza iburha limana na lya kurhumikira lya Adamu na Eva.

17. Gurhi Yehova ajijire lugenda obugoma bwa Shetani n’obwa Adamu na Eva, na bici oko kwayish’ilerha buzinda? (Olole n’enfoto.)

¹⁷ Shetani arhahugûkagwa ciru n’ehitya ebi Yehova akajijire. Yehova al’igwerhe akantu kinja akajijire ly’ahikiriza omuhigo gwage ciru akaba Shetani, Adamu na Eva bamugomire. (Enna. 92:5) Ahali h’okuba munywesi, Yehova ayerekana oku ali wa kulangalirwa omu kuleka Adamu na Eva baburhe abana. Yehova ayerekana oku erhi akahiga okujira kantu kalebe, ntabyo byakamuhanza okukahikiriza. Ayerekine n’obwalagale oku omuhigo gwage gwakahikirire omu kuhiraho “iburha” lyakayokwire abana ba Adamu na Eva bakarhumikire. (Murh. 3:15; 22:18) Shetani agwasirwe abe aciyumvirhe kubi lugenda omupango Yehova arhôlaga gw’okuhâna engombôlo! Bulya gurhi? Bulya ogo guli mupango guyimangire oku buzigire burhali bwa kucikaliza. (Mt. 20:28; Yn. 3:16) Shetani arhajira  obo borhere. Aba wa kucikaliza. Bicigi byayish’iba kugerera ogo mupango gw’engombôlo? Oku buzinda bw’Emyaka Cihumbi, iburha limana na lya kurhumikira lya Adamu na Eva lyayish’ilama omu paradizo hanw’igulu, nk’oku Yehova al’ihizire kurhenga aha murhondero. Mw’ago mango, Yehova ayish’iba nk’odesire, “Omega.”

18. Bintu bisharhu bihi Yehova arhuhîre birhuyemezize n’obwalagale oku ahikiriza eciragane cage? (Olole n’ecisanduku cidesire “ Bintu Bisharhu Byakarhuma Rhwalangalira Eciragane ca Yehova.”)

¹⁸ Mw’eci cigabi, rhwabwine ebintu birhuyemezize n’obwalagale oku igulu lyayish’iba Paradizo. Bicigi rhwakaganirira abandi lyo rhubayemeza n’obwalagale oku oko kwanahikirire? Burhangiriza, Yehova ye nnene ohânyire eco ciragane. Ecitabu c’Amafulûlo cidesire ntya: “Olya wali otamire oku ntebe aderha, erhi: ‘Loli oku byoshi namabijira bihyahya.’” Agwerhe obwenge, obuhashe, n’irala ly’okuhikiriza eciragane cage. Bwa kabirhi, eciragane ca Yehova cahikirira bulya omu masu gage ciri nk’ecahikirire. Co cirhumire adesire ntya: “Ebi binwa birhali bya bunywesi, biri by’okuli. . . . Hoshi aho!” Bwa kasharhu, erhi akarhondera kantu kalebe, anakashibirire kuhika ebuzinda bwako, nk’oku ezi nderho ziyerekine: “Nie Alfa, nie na Omega.” Yehova ayish’iyerekana oku Shetani ali munywesi arhakanamuhanza okuhikiriza omuhigo gwage.

19. Gurhi wakajira erhi abantu bakaba n’akarhinda lugenda eciragane ca Nnâmahanga c’Eparadizo?

¹⁹ Okengere oku, erhi oganirira abandi ebintu Yehova adesire birhuyemezize n’obwalagale oku ebiragane byage byayish’ihikirira, onazibuhye obulangalire bwawe muli ye. Erhi agandi mango wakaba oli wasoma eciragane c’okuhuma oku murhima ciyerekire Eparadizo y’amango gayisha ciganirirwe omu Amafulûlo 21:4 na muntu mulebe aderhe erhi, “Ebyo biri binja bwenene birhakanahikirira,” gurhi wakajira? Wanamusomera omulongo gwa 5 n’ogwa 6 n’okumuhugûlira yo. Wanamuyereka gurhi Yehova ayerekine n’obwalagale oku ahikiriza eciragane cage, bulya ali nk’owacisinyize yene n’esinyatire yage.—Iz. 65:16.