1-2. Bici ‘omukolo mwinja’ gw’abagula guba guhiziremwo?

 ERHI akaba hakola hali kasanzi oli wakola nka murhabazi w’abagula, wanaba erhi wakozire bwenene ly’ohikiriza manji g’omu morhere gahûnyirwe ly’oba mugula. Ka wanacihangana okuhikira ogo “mukolo mwinja”?​—1 Tm. 3:1.

² Bici omukolo gw’abagula guba guhiziremwo? Abagula baba lwiganyo lwinja omu kujira omukolo gw’amahubiri, omu kukola bwenene lyo bashibirira ebibuzi n’omu kuyigiriza, bananazibuhye ecigamba kugerera enderho zabo n’olwiganyo lwabo. Ebibliya egwerhe ecirhumire cinja c’okuhamagala abagula bakola bwenene ‘nshokano’ omu balume.​—Ef. 4:8.

3. Gurhi mwene wirhu akahikirizamwo ebihûnyirwe ly’aba mugula? (1 Timoteyo 3:1-7; Tito 1:5-9)

³ Gurhi wakahikirizamwo ebihûnyirwe ly’oba mugula? Okuhikiriza ebihûnyirwe ly’omuntu aba mugula, kurhali nk’oku omuntu akahikiriza ebihûnyirwe ly’apata kazi kalebe k’okulipwa ensaranga. Omu makazi g’er’igulu, kanji-kanji erhi akaba ogwerhe obulenga oli wahâna akazi ali alonza, wanahâbwa ako kazi. Lubero n’oko, erhi akaba olonzize obe mugula, oshinganine ojire binji ahanyuma n’okuba n’obulenga bw’okuhubiri n’okuyigiriza bone. Oshinganine ohikirize amorhere Amandiko gadesire abagula bashinganine babe nago, gayerekinwe omu 1 Timoteyo 3:1-7 n’omu Tito 1:5-9. (Osome.) Eci cigabi caganirira ebihûnyirwe oku bagula omu njira isharhu z’obulagirire: okuba n’irenge linja omu cigamba n’embuga z’ecigamba, okuba lwiganyo lwinja nka cirhwe c’omulala, n’okuba n’obulonza bwinja bw’okukolera ecigamba.

 OBE N’IRENGE LINJA

4. Bici okuba “muntu mweru-kweru” kuhugwîre?

⁴ Ly’ohikira okuba mugula, ogwasirwe obe “muntu mweru-kweru.” Oko kuli kuderha oku oshinganine obe n’irenge linja omu cigamba n’oku nta muntu wakaba n’ecirhumire cinja c’okukushobeka olugenzi lubi. Na kandi, oshinganine oderherwe “obuhamirizi bwinja n’abantu b’embuga.” Abantu barhali Bakristu banaderha kubi enyigirizo z’Ecikristu oba oyemire, cikone barhashinganini babe n’ecirhumire c’okunali c’okuba n’akarhinda lugenda obwikubagirwa bwawe n’olugenzi lwawe. (Dan. 6:4, 5) Ocidose ntya: ‘Ka njira irenge linja omu cigamba n’embuga z’ecigamba?’

5. Bici okuba “muntu osima aminja” kuhugwîre?

⁵ Erhi akaba oba “mwira w’abantu nkana [muntu osima aminja, NWT],” wanakabona amorhere minja g’abandi n’okubabwira kunganaci obashagalukire enyanya z’ago morhere. Kandi, onashagalukire okujirira abandi aminja ciru n’okujira binji kulusha ebihûnyirwe. (1 Ts. 2:8) Bulya gurhi obo borhere buba bwa bulagirire bwenene oku bagula? Bulya banakolese kasanzi kanji omu mukolo gw’okushibirira bene wirhu na bali birhu n’okuhikiriza eyindi mikolo omu cigamba. (1 Pt. 5:1-3) Ciru akaba ntyo, omwishingo baba nago omu kukolera abandi guba gulushire ebi baciyima.​—Ebj. 20:35.

6. Bici okuba “muntu oyish’ihandisa ebigolo” kuhugwîre? (Abahabraniya 13:2, 16; olole n’enfoto.)

⁶ Onayerekane oku oli “muntu oyish’ihandisa ebigolo” erhi ojirira abandi aminja, kuhiramwo n’abarhali bîra bawe. (1 Pt. 4:9) Citabu ciguma cihâna amahugûlo g’Ebibliya cidesire oku omuntu oyish’ihandisa erhi kuyegereza ebigolo aba wa lukogo, ciru n’oku bantu arhamanyiri ananashagalukire okubalalika aha mwage. Ocidose ntya: ‘Gurhi mba manyikine lugenda okuyegereza ebigolo?’ (Osome Abahabraniya 13:2, 16.) Omuntu oyegereza ebigolo anashangire ebi akaba agwerhe haguma n’ebigolo, bihiziremwo abantu barhalengeriri, n’abakola bwenene, kwa lwiganyo abangalizi b’omuzunguko n’abandi bene wabo b’omu bindi bigamba bayish’igeza ehotuba omu cigamba cabo.​—Murh. 18:2-8; Mig. 3:27; Lk. 14:13, 14; Ebj. 16:15; Rm. 12:13.

7. Gurhi omugula ayerekanamwo oku ‘arhaba wa magene g’eby’en’igulu’?

⁷ ‘Arhabaga wa magene g’eby’en’igulu.’ Oko kuli kuderha oku ensaranga erhi ebintu by’omubiri arhali byo biba bya bulagirire bwenene  omu kalamo kawe. Obe oli mugale erhi mukenyi, onahire ebiyerekire Obwami oku nafasi ntanzi omu bigabi byoshi by’akalamo kawe. (Mt. 6:33) Onakolese akasanzi kawe, emisi yawe, n’ebintu byawe by’omubiri ly’oharamya Yehova, ly’oshibirira omulala gwawe, n’okukolera ecigamba. (Mt. 6:24; 1 Yn. 2:15-17) Ocidose ntya: ‘Gurhi mbona ensaranga? Ka nantimukwe n’ebintu by’obulagirire omu kalamo? Erhi ka nansegeze obwenge bwani oku kulongereza ensaranga n’okuba na bintu binji by’omubiri?’​—1 Tm. 6:6, 17-19.

8. Njira zihi oyerekanamwo oku ‘orhaba mudada’ onaba “muntu wa lugero muli byoshi”?

⁸ “Arhabaga mudada” anabe “muntu wa lugero muli byoshi.” Oko kuli kuderha oku onacihirireho emipaka omu bigabi byoshi by’akalamo kawe. Oko kuhiziremwo okuyaka okulya, okunywa, okuyambala n’okuciyinjihya, n’okucishagalusa okurhalusire olugero. Orhayiga enjira z’okulama zirhashinganini z’abantu barhakolera Yehova. (Lk. 21:34; Yk. 4:4) Onabêre orhuzize ciru n’amango abandi bamakujirira kubi. Orhaba “mulalwe” orhanaba omanyikine nka muntu onywa amamvu bwenene. Ocidose ntya: ‘K’oku ndama kunayerekane oku ntaba mudada na mba wa lugero muli byoshi?’

9. Bici okuba “wa bwenge bwinja” n’‘okurhaba w’ishababe’ kuhugwîre?

⁹ Erhi akaba oba “murhondeza [wa bwenge bwinja, NWT],” onakalabiriza bwinja ebi amakanuni g’Ebibliya gadesire lugenda ehali ziri lubero z’akalamo. Onarhanye bwenene lugenda oku amakanuni g’Ebibliya gakakola omu kanga kalebe, n’oko kunarhume wahugûkwa bwinja ebintu n’okurhôla emihigo minja. Orhalutwa duba-duba. Lubero n’oko, onakamanya n’obwalagale erhi kobinali ogwerhe emyanzi yoshi y’obulagirire. (Mig. 18:13) Oko kunarhume warhôla emihigo y’olugero eyerekine entanya za Yehova. Erhi akaba oba “mukengwa [orhaba w’ishababe, NWT],” onabe muntu opanga ebintu bwinja n’okukenga akasanzi. Onabe omanyikine oku oba wa kulangalirwa na muntu okulikira obulongozi. Ago morhere ganakurhabala obe n’irenge linja. Lekagi rhuganirire oku wakahikirizamwo ebihûnyirwe omu Mandiko omu kuba lwiganyo lwinja nka cirhwe c’omulala.

OYEREKANE OLWIGANYO LWINJA NKA CIRHWE C’OMULALA

10. Gurhi omulume akabamwo muntu ‘omanyirirhegeka bwinja enyumpa yage’?

¹⁰ Erhi akaba oli mushamuka onalonzize ohikirize ebihûnyirwe ly’oba mugula, omulala gwawe gushinganine gube n’irenge linja. Muli ntyo, oshinganine ‘omanyirhegeka bwinja enyumpa yawe.’ Oko kuli kuderha oku, oshinganine oshibirire omulala gwawe omu njira y’obuzigire n’okurhôla emihigo minja oku bunguke bw’omulala gwawe. Oko kuhiziremwo okulongoza omulala gwawe omu bigabi byoshi by’enterekêro yirhu. Bulya gurhi oko kuli kwa bulagirire bwenene? Entumwa Paolo yarhanyize ntya: “Omuntu orhishirhegeka eyage nyumpa, kurhi ankahashishibirira e Ekleziya ya Nnâmahanga [erhi, cigamba ca Nnâmahanga]?”​—1 Tm. 3:5.

11-12. Bulya gurhi olugenzi lw’abana luli lwa bulagirire bwenene erhi akaba omuntu alonzize okuba mugula? (Olole n’enfoto.)

¹¹ Erhi akaba oli ishe w’omulala, abana bawe baciri barhorho, ogwasirwe ‘obalere omu bukenge n’omu borhere nkana.’ Oshinganine obayigirize n’okubakomereza omu njira y’obuzigire. Kobinali, ak’abandi bana boshi, banashagalukira okusheka n’okusharha. Cikone erhi wakabakomereza bwinja, banaba ba kurhumikira, ba bukenge, na ba borhere bwinja. Kandi, ogwasirwe ojire okwawe koshi ly’orhabala abana bawe bajire obwîra bwinja haguma na Yehova, balame kushimbana n’amakanuni g’Ebibliya, banajire amajambere kuhika okubatizibwa.

 ¹² Abe n’abana “barhankashobekwa irala [ly’obugonyi] nisi erhi obugoma.” Erhi omwana oli mwemezi ociri omu nyumpa akashobekwa ecaha cizibu, malehe gahi oko kwakalerha kuli ishe? Erhi akaba ishe alekerire okumukomereza n’okumuha obuhane, oko kwanayerekana oku oyo ishe w’omulala arhahikirizizi ebihûnyirwe ly’aba mugula.​—Olole Ilabiro ly’Akalalizi ly’omu nsiku 15/10/1996, buk. 21, cif. 6-7 (omu Ciswahiri).

OKOLERE ECIGAMBA

13. Gurhi oyerekanamwo oku oba “wa lugero” ‘orhanaba wa bucibone’?

¹³ Bene wirhu bayerekana amorhere minja g’Ecikristu banarhabale ecigamba bwenene. Omuntu “mutûdu [wa lugero, NWT]” anagendekeze omurhûla. Erhi akaba olonzize omanyikane nka muntu wa lugero, okayumvirhiza abandi n’okuyemera entanya zabo. Erhi akaba okola oli mugula, omu ntimanano y’embaraza y’abagula, okaba mubidu okulunga okuboko omuhigo gw’abantu banji erhi akaba nt’irhegeko erhi kanuni k’Ebibliya kavunyirwe. ‘Okurhaba wa bucibone’ kuhugwîre oku orhashinganini okasegeza oku ebintu bijirwe nk’oku olonzize. Onamanye obulagirire bw’abahanûzi banji. (Murh. 13:8, 9; Mig. 15:22) ‘Orhabaga wa nnongwe’ erhi “wa bukunizi.” Oko kuhugwîre oku orhabulira abandi obukenge erhi kubajisa kadali, lubero n’oko, oba wa lukogo kubayerekera. Nka muntu wa murhûla, onabe murhanzi okujira omurhûla ciru n’omu kanga kuli kuzibu bwenene okujira ntyo. (Yk. 3:17, 18) Enderho zawe nyinja zinarhulirize oburhe bw’abandi, ciru n’abahagalika bwenene enyigirizo zirhu.​—Bac. 8:1-3; Mig. 20:3; 25:15; Mt. 5:23, 24.

14. Bici okurhaba “mukristu muhyahya” n’okuba “mwishwekerezi” kuhugwîre?

¹⁴ Mwene wirhu ohikirizize ebihûnyirwe ly’aba mugula arhashinganini abe “mukristu muhyahya.” Ciru akaba birhahûnyiri hagere myaka minji bwenene obatizibwe, olagirire oku kasanzi ly’oba Mukristu okuzire kiroho. Embere ohirweho nka mugula, ogwasirwe oyige olwiganyo lwa Yezu omu kuyerekana oku oli mwirhohye na wa kurhimukwa kuhika Yehova akuhe eyindi mikolo omu cigamba. (Mt. 20:23; Fl. 2:5-8) Wanayerekana oku oli “mwimana [mwishwekerezi, NWT]”  omu kucishwekera kuli Yehova n’oku makanuni gage mashinganyanya n’omu kukulikira obulongozi rhuhâbwa n’ikubuliro lyage.​—1 Tm. 4:15.

15. K’omugula agwasirwe abe mwalimu mwinja bwenene embere z’abantu banji? Ohugûle.

¹⁵ Amandiko gadesire n’obwalagale oku balungere bashinganine babe bantu ‘bankahashiyigiriza.’ K’oko kuli kuderha oku ogwasirwe obe muntu oyigiriza bwinja bwenene embere z’abantu? Nanga. Bagula banji baba bahikirizize bwinja ebihûnyirwe, ciru akaba barhaba balimu binja bwenene embere z’abantu banji, banayigirize bwinja omu mukolo gw’amahubiri n’omu mukolo gw’okulambagirira ebibuzi lyo babiha omurhima. (Oshushanye na 1 Abakorinti 12:28, 29 n’Abefezi 4:11.) Ciru akaba ntyo, oshinganine ogendekere wakola bwenene ly’okubûla obulenga bwawe bw’okuyigiriza. Gurhi wakajira ly’oba n’amalehe minja bwenene omu kuyigiriza?

16. Gurhi wakahikiramwo okuba n’amalehe minja bwenene omu kuyigiriza? (Olole n’enfoto.)

¹⁶ ‘Ocishwekere oku kanwa k’okuli.’ Ly’oba n’amalehe minja bwenene omu kuyigiriza, ebi oyigiriza embere z’abantu banji n’amahano oha bene wirhu na bali birhu, bishinganine biyegemere Akanwa ka Mungu. Okayiga bwinja Ebibliya n’ebicapo birhu. (Mig. 15:28; 16:23) Amango oli wayiga, okalabiriza bwinja oku wakakolesa Amandiko omu kalamo kawe. N’amango oli wayigiriza, ocihangane okuhuma oku murhima gw’abumvirhiza bawe. Wanakubûla enjira yawe y’okuyigiriza erhi wakakahûna abagula bagwerhe obulenga amahano n’okugakolesa. (1 Tm. 5:17) Abagula bashinganine ‘bahashihanûla [bahash’iha omurhima, NWT]’ bene wabo na bali babo, cikone hali amango bagwasirwe “babayagirize [erhi kubakalihira].” Mw’ako kanga kombi, ensiku zoshi abagula bagwasirwe babe ba lukogo. Erhi akaba oba mwinja na wa buzigire n’enyigirizo zawe zinayimangire oku Kanwa ka Mungu, wanaba mwalimu mwinja bulya wanaba oli washimba olwiganyo lwa Yezu, Mwalimu Mukulu.​—Mt. 11:28-30; 2 Tm. 2:24.

 OGENDEKERE WACIHANGANA OKUHIKIRIZA EBIHÛNYIRWE

17. (a) Bici byakarhabala abarhabazi b’abagula lyo bagendekera bacihangana okuhikiriza ebihûnyirwe lyo baba bagula? (b) Bici abagula bashinganine bakengere amango bali balabiriza bene wirhu bakaba bagula? (Olole ecisanduku cidesire “ Mube ba Lugero Amango Muli Mwalabiriza Abandi.”)

¹⁷ Enyuma z’okuganirira ebihûnyirwe ly’omuntu aba mugula, barhabazi balebe b’abagula banaciyumva nka nta lusiku bakahash’ibihikiriza. Cikone okengere oku, oli Yehova oli ikubuliro lyage, barhakakuhûna ohikirize ago morhere n’obwimana. (1 Pt. 2:21) Kandi okengere oku iroho lya Yehova lijira obuhashe, lyo lyakurhabala obe n’ago morhere. (Fl. 2:13) Ka hali borhere bulebe obwine wakalonza okujirira omukolo? Oshenge Yehova lugenda oko. Ojire obusagasi lugenda obo borhere onahûne mugula mulebe amahano lugenda oku wakajiramwo amajambere.

18. Bici abarhabazi b’abagula boshi bahîrwe omurhima bajire?

¹⁸ Lekagi rhweshi bene wirhu, ciru n’abakola bagula, rhugendekere rhwaba n’amorhere gaganirirwe mw’eci cigabi. (Fl. 3:16) K’oli murhabazi w’abagula? Ocihangane okuhikiriza ebihûnyirwe ly’oba mugula! Ohûne Yehova akukomereze ly’omukolera bwenene kulusha n’okukolera ecigamba. (Iz. 64:8) Yehova agishage bwenene obushiru bwawe bw’okuhikiriza ebihûnyirwe ly’ohikira okuba mugula.