ECIGABI C’OKUYIGA CA 46
LWIMBO 49 Rhushagaluse Omurhima gwa Yehova
Bene Wirhu, ka Muli Mwacihangana Okuhikiriza Ebihûnyirwe lyo Muba Barhabazi b’Abagula?
“Haba bushagaluke bunji omu kuhâna kulusha omu kuhâbwa.”—EBJ. 20:35, NWT.
EBI ECI CIGABI CISEGIZE
Kuha bene wirhu babatize omurhima lyo baba n’irala ly’okuba barhabazi b’abagula n’okuhikiriza ebihûnyirwe lyo baba bo.
1. Gurhi entumwa Paolo yakag’ibona abarhabazi b’abagula?
ABARHABAZI b’abagula banahikirize omukolo gw’obulagirire bwenene omu cigamba. Entumwa Paolo yakag’ibona oku abo balume bishwekerezi bali ba bulagirire bwenene. Kwa lwiganyo, erhi ayandikira Abakristu b’omu Filipi, alamusize n’obwalagale abarhabazi b’abagula haguma n’abagula.—Fl. 1:1.
2. Gurhi mwene wirhu muguma ohamagalwa Luis aciyumva lugenda okuba kwage murhabazi w’abagula?
2 Bene wirhu banji babatize, babe baciri misole erhi bakola bakulu, banabe n’omwishingo munji omu kuba barhabazi b’abagula. Kwa lwiganyo, Devan agwerhe myaka 18 erhi aba murhabazi w’abagula. Oku bundi, mwene wirhu muguma ohamagalwa Luis abire murhabazi w’abagula erhi agwerhe myaka 50 na kulusha. Aganirire kwa bofofi oku banji baciyumva omu kuderha ntya: “Nanyumve oku luli lukengwa lunene kuli nie okukola nka murhabazi w’abagula, ci bwenene erhi ntanya oku buzigire boshi ecigamba canyeresire!”
3. Madoso gahi rhwaganirira?
3 Erhi akaba oli mwene wirhu mubatize orhanaciba murhabazi w’abagula, ka wanacihiriraho ogo muhigo? Bici byakakushumya okujira ntyo? Na bintu bihi oshinganine ohikirize bihûnyirwe omu Mandiko? Mw’eci cigabi, rhwabona amashuzo kw’ago madoso. Cikone, lekagi rhurhang’iganirira omukolo gw’abarhabazi b’abagula guba guhi.
OMUKOLO GW’ABARHABAZI B’ABAGULA GUBA GUHI?
4. Omukolo gw’abarhabazi b’abagula guba guhi? (Olole n’enfoto.)
4 Omurhabazi w’abagula aba mwene wirhu mubatize ohirwaho n’iroho litagatifu, ly’arhabala abagula okuhikiriza mikolo minji y’obulagirire omu cigamba. Barhabazi b’abagula baguma na baguma banarhabale abahubiri okuba n’e eneo, n’ebicapo balagirireko lyo bajira omukolo gw’amahubiri. Abandi banarhabale okushibirira n’okucêsa Enyumpa y’Obwami. Kandi, abarhabazi b’abagula banarhabale okuyegereza abantu bayishire oku ntimanano, n’okukolesa ebyombo by’okuyushûla izu n’eby’okuyerekana amavideo amango g’entimanano z’ecigamba. Eyo mikolo yoshi ejirwa n’abarhabazi b’abagula enarhabale bwenene. Akantu k’obulagirire bwenene, abarhabazi b’abagula baba balume ba kiroho baba bazigire Yehova, banalama kushimbana n’amakanuni gage g’obushinganyanya. Banaba bazigire bene wabo na bali babo Bakristu. (Mt. 22:37-39) Gurhi mwene wirhu mubatize akajira ly’ahikira okuba murhabazi w’abagula?
Abarhabazi b’abagula banayige olwiganyo lwa Yezu omu kucihâna bwenene lyo bakolera abandi (Olole ecifungo ca 4)
5. Bici mwene wirhu ashinganine ajire ly’ahikira okuba murhabazi w’abagula?
5 Ebibliya eyerekine ebihûnyirwe bene wirhu balonzize okuba barhabazi b’abagula bashinganine bahikirize. (1 Tm. 3:8-10, 12, 13) Omu kuyiga ebihûnyirwe n’Amandiko n’okukola bwenene ly’obihikiriza, wanahikira okuba n’olo lukengwa. Cikone burhangiriza, oshinganine orhanye lugenda ebiri byakushumya olonze okuba murhabazi w’abagula.
BICI BIRI BYAKUSHUMYA OLONZE OKUBA MURHABAZI W’ABAGULA?
6. Bici bishinganine bikushumye okujira ngasi mukolo goshi-goshi gw’okurhabala bene winyu na bali binyu? (Mateyo 20:28; olole n’enfoto)
6 Yezu Kristu, lwiganyo lwirhu lwinja bwenene, akag’ishumibwa n’obuzigire, ko kuderha, obuzigire kuli Ishe n’obuzigire oku bantu. Obo buzigire bo bwamushumize akole bwenene n’okujira emikolo abandi bakag’igayaguza. (Osome Mateyo 20:28; Yn. 13:5, 14, 15) Erhi akaba buzigire bo bukushumize, Yehova anakugisha n’okukurhabala ohikirize ebihûnyirwe ly’oba murhabazi w’abagula.—1 Kr. 16:14; 1 Pt. 5:5.
Kugerera olwiganyo, Yezu ali ayigiriza abanafunzi bage okukolera abandi n’obwirhohye ahali h’okulonza cikono cilebe (Olole ecifungo ca 6)
7. Bulya gurhi mwene wirhu arhashinganini alonze okuba murhabazi w’abagula bulya kone alonzize okuhâbwa irenge?
7 Mw’er’igulu, abantu bacihira enyanya kanji-kanji banasimwe. Cikone arhali ntyo ko biyorha omw’ikubuliro lya Yehova. Mwene wirhu oshumibwe n’obuzigire aka Yezu, arhalalikira bukulu, okurhambula abandi, erhi okuba n’ecikono. Erhi omuntu ogwerhe irala lya ntyo akahirwaho nka murhabazi w’abagula, nkaba analahira okujira mikolo milebe abandi bagayaguza eba ya bulagirire omu kushibirira ebibuzi bya Yehova by’engulo ndarhi. Anarhanya oku emikolo ya ntyo erhamushinganini. (Yn. 10:12) Yehova arhakagisha obushiru bw’omuntu yeshi-yeshi oli washumibwa n’obucibone erhi olonzize okuhâbwa irenge.—1 Kr. 10:24, 33; 13:4, 5.
8. Ihano lihi Yezu ahîre entumwa zage?
8 Hali amango irala libi lyashumize ciru n’abîra ba hofi-hofi ba Yezu balonze okuhâbwa lukengwa lulebe. Rhuganirire kanga kalebe kayerekire banafunzi babirhi ba Yezu. Yakobo na Yowane bahûna Yezu abahe ecikono cilengerire omu Bwami bwage. Yezu arhababwiraga oku kuli kwinja okuhûna ecikono ca ntyo. Lubero n’oko, ahugûlira entumwa 12 zoshi ntya: “Owalonz’iba mukulu muli mwe, acijire murhumisi winyu, na ngasi walonziba wa burhanzi muli mwe, acijire muja wa boshi.” (Mk. 10:35-37, 43, 44) Bene wirhu bagwerhe ebirhumire binja bibashumize, ko kuderha, irala ly’okukolera abandi gwaba mugisho oku cigamba.—1 Ts. 2:8.
BICI BYAKAZIBUHYA IRALA LYAWE LY’OKULONZA OKUBA MURHABAZI W’ABAGULA?
9. Gurhi wakazibuhyamwo irala lyawe ly’okulonza okuba murhabazi w’abagula?
9 Buzira karhinda, ozigire Yehova onalonzize okukolera abandi. Ciru akaba ntyo, wanaba orhagwerhi irala ly’okujira omukolo omurhabazi w’abagula ahûnyirwe okujira. Gurhi wakazibuhyamwo irala lyawe ly’okulonza okukola nka murhabazi w’abagula? Wanarhanya oku mwishingo gurhenga omu kukolera bene winyu na bali binyu. Yezu adesire ntya: “Haba bushagaluke bunji omu kuhâna kulusha omu kuhâbwa.” (Ebj. 20:35, NWT) Yezu arhaderhaga ntyo kone, cikone anakag’ikujira. Abire n’omwishingo gw’okunali omu kukolera abandi, na nawe wanaba nago.
10. Gurhi Yezu ayerekinemwo oku akag’ishagalukira okukolera abandi? (Marko 6:31-34)
10 Rhuganirire olwiganyo lugenda gurhi Yezu ayerekinemwo oku akag’ishagalukira okukolera abandi. (Osome Marko 6:31-34.) Mango maguma, Yezu n’entumwa zage bal’irhamire. Bali omu njira kuyerekera ahantu hali akahwenyenye lyo barhamuka. Cikone, ehitu hy’abantu hyahika aho embere zabo, banalangalire oku abayigiriza. Kobinali Yezu akalahire, bulya embere z’aho ‘ye n’entumwa zage babuzire amango gw’okulya.’ Erhi kandi Yezu akabwizire abo bantu bagende enyuma z’okubayigiriza mwanzi muguma gone erhi ibirhi. Cikone bulya akag’ishumibwa n’obuzigire, “arhondera okubayigiriza binji.” Agendekera abayigiriza kuhika “izuba . . . lyazika.” (Mk. 6:35) Ajijire ntyo arhali mpu bulya al’igwasirwe akujire, cikone bulya “obwonjo bwabo bwamugwarha.” Al’ilonzize abayigirize bulya al’ibazigire. Okukolera abandi kwakag’ilerhera Yezu mwishingo munji.
11. Gurhi Yezu ahîremwo abumvirhiza bage oburhabale bal’ilagirireko? (Olole n’enfoto.)
11 Erhi Yezu ahubiri ehitu hy’abantu, ajijire binji kulusha okubayigiriza kone. Ashibirire n’amalagirire gabo g’omubiri. Abahîre ebiryo omu njira y’ecisomerine n’enyuma z’aho abwira abanafunzi bage babagabire byo. (Mk. 6:41) Omu kujira ntyo, ayigiriza abanafunzi bage okukakolera abandi. Kandi abayeresire oku omukolo gwa ntyo, nk’omukolo abarhabazi b’abagula bajira, guba gwa bulagirire. Orhanye omwishingo entumwa zabire nago omu kukola haguma na Yezu lyo bagabira abantu ebyo biryo Yezu ahânaga omu njira y’ecisomerine kuhika “bâlya boshi, bayigurha”! (Mk. 6:42) Kobinali, arhali obo bo bwali burhanzi Yezu ashokoza amalagirire g’abandi ahali h’okushokoza agage. Ajijire ntyo omu kalamo kage koshi hanw’igulu. (Mt. 4:23; 8:16) Yezu abire n’omwishingo n’okurhimukwa omu kuyigiriza abandi n’omu kushibirira n’obwirhohye amalagirire gabo. Buzira karhinda, nawe waba n’omwishingo munji erhi, buzira kucikaliza, wakacihangana okuba murhabazi w’abagula.
Obuzigire kuli Yehova n’irala ly’okukolera abandi, byakushumya okukolesa ngasi buhashe wakaba ogwerhe ly’okolera ecigamba (Olole ecifungo ca 11) a
12. Bulya gurhi ntaye muli rhwe oshinganine arhanye oku nta buhashe agwerhe akakolesa ly’arhabala ecigamba?
12 Erhi wakaciyumva nka nta buhashe bwago-bwago ogwerhe, orhavunikaga omurhima. Buzira karhinda, ogwerhe amorhere wakakolesa ly’orhabala ecigamba. Wanayunguka omu kurhanya oku nderho za Paolo ziri omu 1 Abakorinti 12:12-30, n’enyuma z’aho ohûne Yehova akurhabale obone gurhi zikuyerekiremwo. Ezo nderho za Paolo ziyerekine n’obwalagale oku, aka ngasi mukozi wa Yehova, ogwerhe omukolo gw’obulagirire gw’okujira omu cigamba. Erhi akaba mw’agano mango orhacihikiriza ebihûnyirwe ly’oba murhabazi w’abagula, orhavunikaga omurhima. Ahali h’okuvunika omurhima, wanajira oku wakanahasha koshi ly’okolera Yehova bwenene n’okurhabala bene winyu. Oyemere n’obwalagale oku abagula barhanya oku buhashe ogwerhe n’okumanya mukolo guhi bakakuha.—Rm. 12:4-8.
13. Bici rhwakaderha lugenda bintu binji by’omu bintu bihûnyirwe oku balume bahizirweho omu cigamba?
13 Orhanye oku cindi cirhumire cishinganine cikushumye ocihangane okuhikiriza ebihûnyire ly’oba murhabazi w’abagula: Binji muli ebyo bihûnyirwe biyerekire Abakristu boshi. Kobinali Abakristu boshi bashinganine bayegere Yehova, bacibonere omwishingo gurhenga omu kuhâna, n’okuyerekana olwiganyo lwinja lw’akalamo k’Ecikristu. Bicigi bene wirhu bahûnyirwe okujira lyo bahikira okuba barhabazi b’abagula?
OKU WAKAJIRA LY’OHIKIRA OKUBA MURHABAZI W’ABAGULA
14. Okuba ‘muntu okengwa,’ ko kuderha gurhi? (1 Timoteyo 3:8-10, 12, Mashi Bible)
14 Lekagi rhuganirire bintu biguma na biguma bihûnyirwe biyerekinwe omu 1 Timoteyo 3:8-10, 12, Mashi Bible. (Osome.) Omurhabazi w’abagula agwasirwe abe ‘muntu okengwa.’ Kandi olo luderho lwanahindulwa “muntu orhôla ebintu kwa buzibu-zibu,” erhi “ogwerhe olugenzi abantu bakakenga.” Oko kurhali kuderha oku orhakasheka erhi kushagalukira ebintu by’okushesa. (Muh. 3:1, 4) Ciru akaba ntyo, oshinganine orhôle emikolo yawe yoshi kwa buzibu-zibu. Erhi akaba omanyikine oku oba muntu wa kulangalirwa na wa kucikubagirwa, abandi banakukenga omu cigamba.
15. Bici ‘okurhaba ba kuderha kubirhi’ n’‘okurhaba bantu ba kulonza obunguke bubi’ kuhugwîre?
15 “Barhabâga ba kuderha kubirhi.” Oko kuhugwîre oku oshinganine obe wa kuderha okuli, mwikubagirwa na wa kulangalirwa. Kuli kuderha oku oshinganine okahikiriza ebi waderhaga orhanakag’irheba abandi. (Mig. 3:32) “Barhabâga bantu ba kulonza bugunke bubi.” Oko kuhugwîre oku oshinganine obe mwikubagirwa omu mikolo yawe yoshi n’omu biyerekire ensaranga. Orhashinganini ojire obwîra omu cigamba n’abandi Bakristu ly’obayungukirako ensaranga.
16. (a) Bici ‘okuba ba lugero omu kunywa’ kuhugwîre? (b) Bici okuba n’‘omurhima gucîre [erhi, zamiri ecîre]’ kuhugwîre?
16 “Babe ba lugero omu kunywa.” Oko kuhugwîre oku orhashinganini obule olugero omu kunywa amamvu, erhi kumanyikana oku oba luganywa. Okuba n’‘omurhima gucîre [erhi, zamiri ecîre]’ kuhugwîre oku oshinganine olame kushimbana n’amakanuni ga Yehova. Ciru akaba orhali mwimana, ogwerhe obwîra bwinja haguma naye, n’oko kunarhume waba n’omurhûla gw’ekandalala.
17. Gurhi mwene wirhu akayerekanamwo oku ali wa kulangalirwa amango ali ‘arhangulwa’? (1 Timoteyo 3:10, Mashi Bible; olole n’enfoto.)
17 “Kukwanine barhang’ibarhangula.” Oko kuhugwîre oku abagula babwine oku onahikirize bwinja emikolo yawe n’oku banakulangalira. Co cirhumire erhi abagula bakakuha mukolo mulebe, okulikire bwinja-bwinja amahano gabo n’obulongozi buhânyirwe n’ikubuliro lugenda enjira y’okujira ogo mukolo. Omanye n’obwalagale erhi ohugûsirwe bwinja ebi oshinganine ojire n’amango oshinganine oyuse ogo mukolo. Amango oli wahikiriza n’obushiru ngasi mukolo ohâbirwe, abandi omu cigamba banabona ntyo n’okushagalukira amajambere minja oli wajira. Mwe bagula, mukomereze bene wirhu babatize. (Osome 1 Timoteyo 3:10, Mashi Bible.) Ka hali bene wirhu babatize omu cigamba cinyu bali oku murhondero gw’emyaka y’omushûko erhi barho kulusha? Ka bajira enkomedu nyinja z’okujira ifunzo lyabo bonene n’okurheganya bwinja entimanano? Ka ngasi mango banahâne amashuzo oku ntimanano n’okujira omukolo gw’amahubiri? Akaba ntyo, mukabaha emikolo epatine n’emyaka yabo n’akanga kabo. Abo bene wirhu baciri misole ‘banarhangulwa’ mw’eyo njira. Muli ntyo, amango baba bakola bali omu myaka yabo mizinda y’omushûko, banahikiriza ebihûnyirwe lyo baba barhabazi b’abagula.
Omu kuha bene wirhu babatize emikolo omu cigamba, abagula ‘banabarhangula’ mw’eyo njira (Olole ecifungo ca 17)
18. Enderho “ntaco bababwine kwo,” bici zihugwîre?
18 “Ntaco bababwine kwo.” Oko kuhugwîre oku harhashinganini habe ecirhumire c’okunali c’okukushobeka oku wajijire igosa lilebe lidarhi. Kobinali Abakristu banashobekwa eby’obunywesi. Yezu ashobesirwe eby’obunywesi analebire oku abanafunzi bage nabo bakajirirwe ntyo. (Yn. 15:20) Cikone erhi wakagendekera waba n’olugenzi lucîre aka Yezu, wanaba n’irenge linja omu cigamba.—Mt. 11:19.
19. Bici okuba “mulume wa mukazi muguma yene” kuhugwîre?
19 “Mulume wa mukazi muguma yene.” Akaba wajire omu buhya, oshinganine ogendekere warhumikira akanuni ka Yehova ka kurhenga aha murhondero lugenda obuhya, ko kuderha, mulume muguma na mukazi muguma yene. (Mt. 19:3-9) Omulume Mukristu arhashinganini ajire ciru n’ehitya eby’enshonyi. (Hb. 13:4) Cikone oko kuhiziremwo binji. Oshinganine obe mwishwekerezi kuli mukawe, orhanashinganini ciru n’ehitya obe n’entanya z’okulonza okulehya owundi mukazi.—Ayu. 31:1.
20. Gurhi omulume arhegekamwo “bwinja” omulala gwage?
20 “Muntu ohashire okurhegeka abana bage n’ab’aha mwage bwinja.” Erhi akaba oli cirhwe c’omulala, ogwasirwe orhôle omukolo gwawe kwa buzibu-zibu. Okalongoza enterekêro y’omulala ngasi mango. Okahubiri haguma na ngasi muntu w’omu mulala gwawe kanji-kanji nk’oku wakanahasha. Orhabale abana bawe ngasi muguma acijirire obwîra bwa hofi-hofi haguma na Yehova. (Ef. 6:4) Omulume oshibirira omulala gwage, anayerekane oku anashibirira ecigamba.—Oshushanye na 1 Timoteyo 3:5.
21. Erhi akaba orhacirhondera wakola nka murhabazi w’abagula, bici wakajira?
21 Bene wirhu, erhi akaba murhacirhondera mwakola nka barhabazi b’abagula, mwe mukasinga murhanye bwenene oku myanzi eganirirwe mw’eci cigabi munashenge Yehova lugenda oko. Muyige ebihûnyirwe ly’omuntu aba murhabazi w’abagula munakole bwenene lyo mubihikiriza. Murhanye kunganaci muba muzigire Yehova na bene winyu na bali binyu. Muyushûle irala linyu ly’okubakolera. (1 Pt. 4:8, 10) Mwaba n’omwishingo munji amango muli mwakolera bene winyu na bali binyu omu cigamba. Mashi Yehova agishage obushiru bwinyu bw’okuhikiriza ebihûnyirwe lyo muba barhabazi b’abagula!—Fl. 2:13.
LWIMBO 17 “Nnonzize”
a AMAHUGÛLO G’ENFOTO: Ekulembe, Yezu ali akolera entumwa zage n’obwirhohye; ekulyo, omurhabazi w’abagula ali arhabala mwene wirhu w’omu cigamba okola mushosi.
