ECIGABI C’OKUYIGA CA 45
LWIMBO 138 Obwinja bw’Irhwe Lirimwo Emvi
Ociyigirize Binji Kugerera Enderho Nzinda z’Abalume Bishwekerezi
“Abashosi bo bajira obumanye, n’abakulûkulû bo bajira obwenge.”—AYU. 12:12, Mashi Bible.
EBI ECI CIGABI CISEGIZE
Okurhumikira Yehova kunarhulerhere emigisho ene, kwarhulerhera n’obuzine bw’ensiku n’amango omu mango gayisha.
1. Bulya gurhi rhwanaciyigiriza binji kugerera abakola bakulu?
LYO rhurhôla emihigo y’obulagirire omu kalamo, rhweshi rhuba rhulagirire oku bulongozi. Abagula n’abandi Bakristu bakuzire kiroho banarhuha bulongozi bunji. Ciru akaba bali bakulu bwenene kurhulusha, rhurhashinganini rhulahire ho n’aho amahano gabo omu kurhanya oku gali ga mîra. Yehova aba alonzize rhuciyigirize kugerera abakola bakulu. Bulya balamire myaka minji kurhulusha, bakola bamanyire binji lugenda akalamo, banakola bagwerhe obwenge.—Ayu. 12:12.
2. Bici rhwaganirira mw’eci cigabi?
2 Omu mango ga mîra, Yehova akolesize abantu bishwekerezi bal’ikola bashosi lyo balongoza abantu bage n’okubaha omurhima. Kwa lwiganyo, rhuganirire Musa, Daudi, n’entumwa Yowane. Balamire omu kasanzi kali lubero n’akanga kabo kali lubero bwenene. Oku buzinda bw’akalamo kabo, bahîre abaciri misole amahano g’obwenge. Ngasi muguma wa mw’abo bantu bal’ikola bashosi asegize obulagirire bw’okuba wa kurhumikira Mungu. Yehova ayandikisize enderho zabo omu Bibliya lyo zirhuyigiriza. Rhube rhuciri misole erhi rhukola bashosi, rhwanayunguka n’amahano gabo. (Rm. 15:4; 2 Tm. 3:16) Mw’eci cigabi, rhwaganirira enderho z’abo balume basharhu bal’ikola bashosi, n’isomo rhwakaciyigiriza kugerera ebi baderhaga.
‘OBONE BYANDA MWANDU’
3. Mikolo ehi n’ehi Musa ajijire?
3 Musa akolire Yehova bwenene omu kalamo kage koshi. Akozire nka mulebi, muzuzi, cirongozi, na mwandisi. Musa acibwinire binji omu kalamo! Alongozize ishanja ly’Abaisraheli kurhenga omu buja e Misri anacibonera binji by’omu bisomerine bya Yehova. Yehova amukolesize ly’ayandika ebitabu birhanu birhangiriza by’Ebibliya, Olulanga lwa 90, byanahashikana oku ye wayandikaga n’Olulanga lwa 91. Bibonekine oku ye wanayandikaga ecitabu ca Ayubu.
4. Bandi Musa ahîre omurhima, na bulya gurhi?
4 Kasanzi kasungunu embere Musa afê, erhi akola agwerhe myaka 120, agusha haguma Abaisraheli boshi ly’abakengeza ebintu bacibwinire Yehova abajiriraga. Erhi baciri misole, baguma na baguma omu bumvirhiza bage bacibwinire bimanyiso na bisomerine binji Yehova ajiraga n’emanja atwiraga Abamisri. (Lub. 7:3, 4) Bagezire omu Nyanja Ndukula yagabikanagamwo, banacibonera okusherezibwa kw’omurhwe gw’abasoda ba Faraoni. (Lub. 14:29-31) Omw’irungu, bacibwinire gurhi Yehova abalanzire n’okubashibirira. (Lush. 8:3, 4) Erhi olubaga luba luyegerire okuja omu Cihugo c’Amalaganyo, Musa akolesa obo bulyo buzinda ly’aha abantu omurhima. a
5. Bici enderho nzinda za Musa ziri omu Olushika 30:19, 20, Mashi Bible, zayemezize Abaisraheli n’obwalagale?
5 Bici Musa adesire? (Osome Olushika 30:19, 20, Mashi Bible.) Musa akengeza ishanja ly’Abaisraheli oku bal’igwerhe obulangalire bw’okuba n’akalamo kinja bwenene. Kugerera omugisho gwa Yehova, Abaisraheli bakalamire kasanzi kanji bwenene omu cihugo Yehova abalaganyagya. Canali cihugo cinja na ca kuyera bwenene! Musa abahugûlira oku cal’iyosire omu kuderha ntya: “Mirhundu [erhi, vile] minene eyêra bwenene ôrhanali aha yayûbakagwa, omu nyumpa ziyunjwire binja bya ngasi lubero, arhanali we waziyunjuzagyabyo, hofi n’amaliba orhâli aha gahumbwa, hofi n’emizabibu n’emizeti orhâli aha yarhweragwa.”—Lush. 6:10, 11.
6. Bulya gurhi Mungu alekaga agandi mashanja gahime Abaisraheli?
6 Kandi Musa ahîre Abaisraheli oburhonde. Lyo bagendekera balama omu cihugo cabo cinja, bal’ishinganine barhumikire amarhegeko ga Yehova. Musa abayinginga ‘bacishoge obuzine’ omu kuyumvirhiza Yehova n’omu ‘kucishwekera kuli ye.’ Cikone, Abaisraheli barharhumikiraga Yehova. Enyanya z’oko, enyuma za kasanzi kalebe Mungu aleka Abaasiriya na buzinda Abababiloni babahime, banabahamisa kurhenga omu cihugo cabo.—2 Bam. 17:6-8, 13, 14; 2 Nga. 36:15-17, 20.
7. Bici rhwakaciyigiriza kugerera enderho za Musa? (Olole n’enfoto.)
7 Isomo lihi rhuciyigirizize? Okurhumikira kwayish’iyokola obuzine bwirhu. Ak’Abaisraheli bali oku luso lw’okuja omu Cihugo c’Amalaganyo, rhuyegerire bwenene igulu lihyahya Mungu alaganyize, na hano hofi-hofi rhwabona oku er’igulu lyahinduka paradizo. (Iz. 35:1; Lk. 23:43) Shetani n’abazimu bage barhacish’ibe ho. (Maf. 20:2, 3) Amadîni g’obunywesi garhakacihabula abantu lyo barhakoleraga Yehova. (Maf. 17:16) Amarhegesi ga bene bantu garhakacilibuza bacikala. (Maf. 19:19, 20) Abantu barharhumikira barhakaba n’enafasi omu paradizo. (Enna. 37:10, 11) Ngasi hoshi abantu bayish’ikarhumikira amarhegeko mashinganyanya ga Yehova galerha ecinyabuguma n’omurhûla. Co cirhumire bayish’ikazigirana n’okulangalirana. (Iz. 11:9) Obo buli bulangalire bwinja bwenene! Na kandi erhi rhwakarhumikira Yehova, rhwanayish’igendekera rhwalama omw’igulu paradizo, arhali magana g’emyaka gone, ci emyaka n’emyaka!—Enna. 37:29; Yn. 3:16.
Erhi rhwakarhumikira Yehova, rhwanalama omu paradizo hanw’igulu arhali magana g’emyaka gone, cikone emyaka n’emyaka (Olole ecifungo ca 7)
8. Gurhi obulangalire bw’obuzine bw’ensiku n’amango bwarhabiremwo misiyonere muguma? (Yuda 20, 21)
8 Erhi rhwakagendekera rhwasegeza obwenge bwirhu oku ciragane ca Mungu c’obuzine bw’ensiku n’amango, rhwanacishwekera kuli ye ciru rhwakahikirwa na mazibu gahi. (Osome Yuda 20, 21.) Kandi eco ciragane canarhuha emisi y’okulwisa obuzamba bwirhu. Mwene wirhu muguma wajiraga myaka minji omu mukolo gw’obumisiyonere omu Afrique, ahugwîre oku ajijire myaka minji ali alwisa buzamba bulebe burhakag’ishagalusa Yehova. Adesire ntya: “Okuhugûkwa oku nakahezize obulangalire bwani bw’okulama ensiku n’amango, kwarhuma nahiga bwenene okulwisa ago mazibu n’okusemberera Yehova lugenda oko. Na kugerera oburhabale bwage, naba n’obuhashe bw’okugahima.”
‘WAKABÊRWA’
9. Mazibu gahi gahikire Daudi omu kalamo kage?
9 Daudi ali mwami w’olubaga lwa Yehova, anali mwishwekerezi kuli ye. Kandi ali muzihi w’omuziki, akag’iyandika e poème, ali mulwi w’ivita, na mulebi. Ahikirwe na mazibu manji. Alamire nka mubunga myaka milebe erhi ali ayaka mwami Sauli w’obumvu. Enyuma z’okuba mwami, kandi Daudi ayaka ly’aciza obuzine bwage erhi omugala Absalomu alonza okumunyaga obwami. Ciru akaba Daudi ahikirwe n’ago mazibu anajijire amagosa madarhi, agendekire abêra mwishwekerezi kuli Yehova kuhika oku buzinda bw’akalamo kage. Yehova adesire oku Daudi ali “muntu w’omurhima [gwage].” Kobinali, rhushinganine rhuyumvirhize amahano ga Daudi g’obwenge!—Ebj. 13:22; 1 Bam. 15:5.
10. Bulya gurhi Daudi ahanûlaga omugala Solomoni wayimaga omu byage?
10 Kwa lwiganyo, orhanye oku mahano Daudi ahâga omugala Solomoni wayimaga omu byage. Yehova al’icishozire ogo musole lyo gugendekeza enterekêro ecîre n’okuyubaka ehekalu y’okumulerhera obukuze. (1 Nga. 22:5) Solomoni akalwisize mazibu manji ly’ahikiriza ogo mukolo. Bicigi Daudi akamubwizire? Lekagi rhubibone.
11. Kushimbana na 1 Abami 2:2, 3, bici Daudi ayemezize Solomoni n’obwalagale, na gurhi ezo nderho zabonekine oku zali z’okunali? (Olole n’enfoto.)
11 Bici Daudi adesire? (Osome 1 Abami 2:2, 3.) Daudi abwira omugala Solomoni oku akarhumikira Yehova, abêrwa omu kalamo. N’omu myaka minji Solomoni abêrwa bwenene. (1 Nga. 29:23-25) Ayubasire ehekalu nyinja bwenene anayandika bitabu bilebe by’Ebibliya n’okuhâna entanya ziri omu bindi bitabu by’Ebibliya. Amanyikana bwenene enyanya z’obwenge bwage n’obuhirhi bwage. (1 Bam. 4:34) Cikone nk’oku Daudi ahugûlaga, erhi Solomoni akarhumikire Yehova Mungu, lyone akabêrirwe. Eby’okugayisa, erhi Solomoni ashosihala, arhondera aharamya abandi bamungu. Yehova arhashagalukiraga oko, analeka okuha Solomoni obwenge bw’okulongoza abantu bage omu njira nyinja na ya bushinganyanya.—1 Bam. 11:9, 10; 12:4.
Enderho nzinda Daudi abwiraga omugala Solomoni zirhurhabire okubona oku erhi rhwakaba ba kurhumikira Yehova, anarhuha obwenge bw’okurhôla emihigo minja (Olole ecifungo ca 11-12) b
12. Bici rhwakaciyigiriza kugerera enderho za Daudi?
12 Isomo lihi rhuciyigirizize? Okurhumikira kwarhuma rhwabêrwa. (Enna. 1:1-3) Okuderha okuli, Yehova arharhulaganyizi oku arhuha obuhirhi n’irenge Solomoni agwerhe. Cikone erhi rhwakarhumikira Mungu wirhu, arhuha obwenge bwarhuhashisa okukarhôla emihigo minja. (Mig. 2:6, 7; Yk. 1:5) Amakanuni gage ganarhulongoza lyo rhurhôla emihigo minja lugenda akazi, amasomo, okucishagalusa, n’ensaranga. Erhi rhwakakulikira amahano gage, rhwanalanga obwîra bwirhu haguma naye n’okuyish’iba n’obuzine bw’ensiku n’amango. (Mig. 2:10, 11) Rhwanaba n’abîra binja. Rhwananaba n’obulongozi rhulagirireko lyo rhuba n’akalamo k’omulala k’omwishingo.
13. Bici byarhabire Carmen ly’amanya ebyakajira akalamo kage kabe kinja?
13 Carmen, olama e Mozambique, akag’irhanya oku okusoma amasomo malîri kwakarhumire aba n’akalamo kinja. Aciyandikisa oku université anasoma ebiyerekire eby’obubasi. Ayandisire ntya: “Nal’isimire ebi nakag’iyiga. Cikone byakag’intôla kasanzi kanji bwenene na misi minji. Nakag’iba emasomo kurhondera aha nsa 1:30 y’esezi kuhika aha nsa 12:00 z’ebijingo. Kwali kuzibu kuli nie okuja oku ntimanano, n’ehali yani y’ekiroho yazambanya. Omu kandalala, nakaciyumva oku nakag’ilonza okukolera bami babirhi.” (Mt. 6:24) Oyo munyere ashenga lugenda akanga kage anajira obusagasi omu bicapo birhu. Acibir’iderha ntya: “Enyuma za bene wirhu bakuzire kiroho na nyâma okumpa amahano minja, nahiga okuleka e université lyo nkolera Yehova akasanzi koshi. Oko kwantabire ntôle emihigo minja omu kalamo, ntanasag’iciyunjuza lugenda eyo mihigo narhôlaga.”
14. Omwanzi gw’obulagirire gwa Musa na Daudi gwali guhi?
14 Musa na Daudi bal’izigire Yehova, banal’imanyire oku kwali kwa bulagirire bwenene okumurhumikira. Omu nderho zabo nzinda, bahîre abumvirhiza babo omurhima bakulikire olwiganyo lwabo omu kucishwekera kuli Yehova Mungu wabo. Bombi barhonzire abantu oku abakalesire Yehova, Yehova akabalahire barhakanacibire n’emigisho al’ibalaganyize. Amahano gabo gali ga bulagirire bwenene kuli rhwe ene. Magana malebe g’emyaka enyuma z’aho, owundi mukozi wa Yehova ayerekana obulagirire bw’okuba mwishwekerezi kuli Yehova.
“NTA KUNDI KWAKANSIMISA”
15. Bici entumwa Yowane yacibwinire omu kalamo kayo?
15 Yowane yo yali ntumwa Yezu Kristu asimaga bwenene. (Mt. 10:2; Yn. 19:26) Yowane alusize Yezu omu mukolo gwage gw’amahubiri, acibwinire ebisomerine akag’ijira arhanamulekaga omu mango g’amazibu. Abwine erhi Yezu anigwa, anamubona enyuma z’okufûka kwage. Na kandi acibwinire oku Obukristu bwalandiraga omu kagana karhanzi kurhenga oku cigusho cisungunu c’Abakristu bishwekerezi kuhika amango “ngasi muntu w’en’igulu ayigirizibagwa” omwanzi mwinja.—Kl. 1:23, Mashi Bible.
16. Bandi bayungusire kugerera amaruba ga Yowane?
16 Erhi ayegerera obuzinda bw’akalamo kage, Yowane aba n’olukengwa lw’okuyandika bitabu bilebe by’omu Kanwa ka Mungu kalongozibagwa n’iroho lyage. Ayandisire “ebi Yezu Kristu afulûlaga” by’okusomeza. (Maf. 1:1, Mashi Bible) Yowane ayandisire e Enjili ehamagalwa okw’izino lyage. Na kandi ayandisire maruba asharhu galongozibagwa n’iroho litagatifu. Amaruba gage ga kasharhu, agayandikiraga Omukristu mwishwekerezi wakag’ihamagalwa Gayo, muntu akag’ibona nka mwana wage muzigirwa w’ekiroho. (3 Yn. 1) Mw’ago mango, hashinganine habe hali bantu banji Yowane akag’ibona nka bana bage b’ekiroho. Ebi oyo mushosi mwishwekerezi ayandikaga bicigendekire byaha abanafunzi ba Yezu boshi omurhima kuhika ene.
17. Kushimbana na 3 Yowane 4, bici bilerha omwishingo munji?
17 Bici Yowane ayandisire? (Osome 3 Yowane 4.) Yowane ayandisire lugenda omwishingo okurhumikira Mungu kulerha. Amango Yowane ayandikaga amaruba gage ga kasharhu, bantu baguma na baguma bakag’iyaliza enyigirizo z’obunywesi banarhuma haba okugabikanamwo omu cigamba. Ciru akaba ntyo, abandi bagendekire ‘bashimba enjira y’okuli.’ Bakag’irhumikira Yehova n’‘okushimba amarhegeko gage.’ (2 Yn. 4, 6) Abo Bakristu bishwekerezi balerhire Yowane na Yehova omwishingo.—Mig. 27:11.
18. Bici rhwakaciyigiriza kugerera enderho za Yowane?
18 Isomo lihi rhuciyigirizize? Obwishwekerezi bunalerhe omwishingo. (1 Yn. 5:3) Kwa lwiganyo, rhunabe n’omwishingo omu kumanya oku rhuli rhwashagalusa Yehova. Anashagaluke erhi abona rhuli rhwahagalika amashumi g’er’igulu n’okuyemera okuli. (Mig. 23:15) Bamalahika baba empingu nabo banashagaluke. (Lk. 15:10) Nirhu rhwanaba n’omwishingo omu kubona abandi bagendekire babêra bishwekerezi, ci bwenene amango bali balwisa amazibu n’amashumi. (2 Ts. 1:4) Muli ntyo hano er’igulu ligera, rhwayish’irhimukwa omu kumanya oku rhwabêzire bishwekerezi kuli Yehova, ciru n’omw’igulu lyal’irhambwirwe na Shetani.
19. Bici mwali wirhu muguma ohamagalwa Rachel adesire lugenda okuyigiriza abandi okuli? (Olole n’enfoto.)
19 Rhunashagaluke ciru bwenene erhi rhuganirira abandi okuli. Rachel, olama omu République Dominicaine, anaciyumve oku okuyigiriza muntu mulebe lugenda Mungu wirhu mwinja bwenene rhukolera, luli lukengwa lurhankagerwa. Omu kurhanya oku bana bage b’ekiroho, adesire ntya: “Kurhaba kulembu okuganirira omwishingo nyumva erhi mbona abantu nyigiriza lugenda Yehova bayushûla obuzigire bwabo kuli ye, bamuyegemera loshi-loshi, n’okushanja akalamo kabo lyo bamushagalusa. Ogo mwishingo guba munji kulusha obushiru boshi-boshi najijire erhi kantu koshi-koshi naciyimire lyo mbayigiriza.”
Rhunabe n’omwishingo omu kuyigiriza abandi bazigire Yehova n’okumurhumikira nk’oku rhujira (Olole ecifungo ca 19)
OYUNGUKE KUGERERA ENDERHO NZINDA Z’ABALUME BISHWEKEREZI
20. Njira zihi rhushushinemwo na Musa, Daudi, na Yowane?
20 Musa, Daudi, na Yowane balamire omu mango gali lubero n’agirhu n’omu kanga kali lubero n’akirhu. Cikone rhushushine nabo omu njira nyinji. Bakag’ikolera Mungu w’okuli, na nirhu rhuli rhwamukolera. Akabo, rhunashenge Yehova, rhunamulangalire, n’okumuhûna obulongozi. N’akabo balume ba mîra, rhuba rhuyemire n’obwalagale oku Yehova anagishe bwenene abamurhumikira.
21. Migisho ehi abakulikira ihano ly’abashosi bishwekerezi bali nka Musa, Daudi, na Yowane bayish’ihâbwa?
21 Lekagi rhukulikire enderho nzinda z’abo balume bal’ikola bashosi omu kurhumikira amarhegeko ga Yehova. Omu kujira ntyo, rhwabêrwa okunali omu ngasi byoshi rhwajira. Rhwayish’iba n’obuzine n’‘okubona byanda mwandu,’ ko kuderha, okulama ensiku n’amango! (Lush. 30:20, Mashi Bible) Na kandi rhwayish’iba n’omwishingo gw’okushagalusa Larha wirhu w’obuzigire w’omu mpingu, ohikiriza ebiragane byage byoshi omu njira zilushire oku rhwakahash’irhanya.—Ef. 3:20.
LWIMBO 129 Rhwalembera Kuhika Ebuzinda
a Bantu banji bwenene omu Baisraheli babonaga ebisomerine Yehova ajiraga oku Nyanja Ndukula barhalamaga kuhika babone Ecihugo c’Amalaganyo. (Mib. 14:22, 23) Yehova aderha oku abalume boshi bal’igwerhe myaka 20 na kulusha bakafîrire omw’irungu. (Mib. 14:29) Cikone Yozwe, Kalebu, n’abandi banji baciri barho omw’ishanja, n’ab’omu bûko bwa Levi balamire kuhika babona oku Yehova ahikiriza eciragane cage, amango Abaisraheli bayikiraga Olwishi Yordani n’okuja omu Kanani.—Lush. 1:24-40.
b AMAHUGÛLO G’ENFOTO: Ekulembe: Daudi ali abwira omugala Solomoni nderho nzinda ndebe z’obwenge. Ekulyo: Abanafunzi bali oku Masomo ga Bapainiya bali bayunguka n’enyigirizo z’eciteokrasi.
