ECIGABI C’OKUYIGA CA 44
LWIMBO 33 Ohengulire Yehova Amazibu Gawe
Oku Wakalemberamwo Obubule bw’Obushinganyanya
“Omanye wankahimwa n’obubi, ci ohime obubi omu kujira aminja.”—RM. 12:21.
EBI ECI CIGABI CISEGIZE
Oku wakalemberamwo obubule bw’obushinganyanya omu njira erharhume ebintu byaba bibi bwenene.
1-2. Bandi bakarhujirira omu njira erhali ya bushinganyanya? Ohugûle.
YEZU aganirire olwiganyo lugenda omukana wagendekeraga ahûna omuzuzi amutwire olubanja omu njira y’obushinganyanya. Buzira karhinda, banji b’omu banafunzi ba Yezu bahugûsirwe bwinja ogo mwanzi, bulya mw’ago mango abantu barhalengeriri kanji-kanji bakag’ijirirwa omu njira erhali ya bushinganyanya. (Lk. 18:1-5) Nirhu rhwanahugûkwa bwinja oku oyo mukana aciyumvagya bulya rhweshi rhwajirirwe omu njira erhali ya bushinganyanya mango malebe.
2 Bantu banji mw’er’igulu ly’ene baba ba kabôlo, barhajira lukogo banajira irala linji ly’eby’en’igulu. Enyanya z’oko, rhumanyire oku rhwanajirirwa omu njira erhali ya bushinganyanya. (Muh. 5:8) Cikone, rhwanavunika omurhima bwenene erhi mwene wirhu erhi mwali wirhu akarhujirira kubi. Kobinali, bene wirhu na bali birhu barhaba bashombanyi b’okuli. Barhaba kone bimana. Rhwanaciyigiriza binji kugerera oku Yezu alemberagamwo obubule b’obushinganyanya ajiriragwa n’abantu bakag’imuhagalika. Erhi akaba rhwanalembera abashombanyi birhu barhujirira omu njira erhali ya bushinganyanya, oko kuyerekine oku rhwanalembera ciru bwenene abirhu bemezi! Gurhi Yehova aciyumva erhi rhujirirwa kubi n’abantu barhali Bahamirizi erhi cirhu n’abali Bahamirizi? K’oko kunamuhangayise?
3. Gurhi rhumanyiremwo oku Yehova anashibirire oku abakozi bage bajirirwa?
3 Yehova anashibirire bwenene oku rhujirirwa. “Nyakasane [Yehova, NWT] ye lumbirhonya obushinganyanya.” (Enna. 37:28) Yezu arhuyemezize n’obwalagale oku hano hofi-hofi, omu kasanzi kashinganine, Yehova ‘atwa olubanja duba.’ (Lk. 18:7, 8) Kandi hano hofi-hofi, akûla ho amazibu goshi garhuhikire n’okumaliriza obubule boshi bw’obushinganyanya.—Enna. 72:1, 2.
4. Burhabale buhi Yehova ali arhuha ene?
4 Yehova ali arhurhabala okulembera obubule bw’obushinganyanya omu mango rhuli rhwalinda oku obushinganyanya bwayish’igandaza. (2 Pt. 3:13) Anarhuyigirize oku rhwakayakamwo okujira akantu kabi erhi rhwakajirirwa omu njira erhali ya bushinganyanya. Kugerera Omugala, Yehova arhuhîre olwiganyo lwimana lugenda oku rhwakalemberamwo obubule bw’obushinganyanya. Na kandi anarhuhe amahano minja rhwakakolesa amango rhwamajirirwa omu njira erhali ya bushinganyanya.
OBE MASU LUGENDA OKU OJIRA ENYANYA Z’OBUBULE BW’OBUSHINGANYANYA
5. Bulya gurhi rhushinganine rhube masu lugenda oku rhujira enyanya z’obubule bw’obushinganyanya?
5 Okujirirwa omu njira erhali ya bushinganyanya kwanarhubabaza bwenene n’okurhuma rhwaciyumva kubi. (Muh. 7:7) Abakozi bishwekerezi ba Yehova nka Ayubu na Habakuki, nabo baciyumvirhe ntyo. (Ayu. 6:2, 3; Hab. 1:1-3) Ciru akaba biyumvikine oku rhwanaciyumva ntyo, rhushinganine rhube masu lugenda oku rhujira lyo rhuyaka okujira akantu kabi bwenene.
6. Bici olwiganyo lwa Absalomu lurhuyigirizize? (Olole n’enfoto.)
6 Erhi rhwakajirirwa omu njira erhali ya bushinganyanya, nkaba rhwanalonza okucihôla, cikone okujira ntyo kwanarhuma ebintu byaba bibi ciru bwenene. Rhuganirire olwiganyo lwa Absalomu, mugala wa Mwami Daudi. Aciyumvirhe kubi bwenene erhi Tamari mwali wabo abakwa na Amnoni, mugala wa muk’ishe. Kushimbana n’Irhegeko lya Musa, Amnoni al’igwasirwe anigwe enyanya z’ebi ajiraga. (Lev. 20:17) Ciru akaba Absalomu al’igwerhe ecirhumire c’okuba burhe, arhal’igwasirwe acihôle.—2 Sam. 13:20-23, 28, 29.
Absalomu alesire obubule bw’obushinganyanya Tamari, mwali wabo, ajiriragwa bumulerhere obukunizi (Olole ecifungo ca 6)
7. Gurhi omuzihi w’ennanga aciyumvirhe omu kasanzi kalebe enyanya z’obubule bw’obushinganyanya?
7 Erhi rhwakabona nk’abajira omu njira erhali ya bushinganyanya barhahâbirwi obuhane, rhwanacidosa erhi kobinali okujira aminja kuli kwa bulagirire. Rhuganirire olwiganyo lw’omuzihi w’ennanga wabonaga abashinganyanya bali bajirirwa kubi, n’abo bakag’ibajirira kubi bakabonekana nka bali bayololoka. Aderha ntya: “Ntyo kwo abantu babi bayorha, banakâba barhûlwire.” (Enna. 73:12, Mashi Bible) Kandi avunisire omurhima bwenene enyanya z’obubule bw’obushinganyanya akag’ibona, n’oko kwarhuma abona nka okukolera Yehova kurhagwerhi bunguke boshi-boshi, aderha ntya: “Nacîja emurhima obwo, nti: ‘Ka nyumve okwo’; nabona oku kuli kurhama bwenene.” (Enna. 73:14, 16) Enyanya z’oko aderha ntya: “Amagulu gani okwisi gagend’ebinzongonzongo, hindi hitya amagulu gani garherere.” (Enna. 73:2) Akantu kashushine n’ako kahikire mwene wirhu muguma rhwakahamagala Alberto.
8. Bici byahikire mwene wirhu mulebe enyanya z’obubule bw’obushinganyanya?
8 Alberto ashobekwa oku anazimbire ensaranga z’ecigamba. Enyanya z’oko, aheza emikolo al’igwerhe omu cigamba na bantu banji b’omu cigamba bamanyaga lugenda oko barhacikag’imukenga. Adesire ntya: “Nakaciyumva kubi bwenene, nkunire, na mvunisire omurhima.” Aleka oku akag’iciyumva ekandalala kuzambanye ehali yage y’ekiroho na ciru ajira myaka irhanu alesire emikolo y’ecigamba. Olo lwiganyo luyerekine ebyakarhuhikira erhi rhwakaciyumva kubi bwenene enyanya z’obubule bw’obushinganyanya.
OYIGE OKU YEZU ALEMBERAGAMWO OBUBULE BW’OBUSHINGANYA
9. Bubule buhi bw’obushinganyanya Yezu alembire? (Olole n’enfoto.)
9 Yezu ayerekine olwiganyo lwimana lugenda okulembera obubule bw’obushinganyanya. Rhuganirire oku ajiriragwa omu njira erhali ya bushinganyanya n’abantu b’omu mulala gwage n’abandi. Abantu b’omu mulala gwage barhali bemezi baderha oku anasirahire, ebirongozi by’amadîni byamushobeka oku ali akola n’abazimu, n’abasoda Baroma bamushekera, bamulibuza na buzinda bamuniga. (Mk. 3:21, 22; 14:55; 15:16-20, 35-37) Cikone, Yezu alembire obo bubule boshi bw’obushinganyanya n’ebindi buzira kucihôla. Bici olwiganyo lwage lwakarhuyigiriza?
Yezu arhulekire olwiganyo lwinja lugenda okulembera obubule bw’obushinganyanya (Olole ecifungo ca 9-10)
10. Gurhi Yezu alembiremwo obubule bw’obushinganyanya? (1 Petro 2:21-23)
10 Osome 1 Petro 2:21-23. a Yezu arhusigire olwiganyo lwimana lw’okukulikira amango rhuli rhwalembera obubule bw’obushinganyanya. Al’imanyire amango g’okuhulika n’amango g’okuderha. (Mt. 26:62-64) Erhi bakamuderhire obunywesi, arhali ngasi mango akag’ishuza. (Mt. 11:19) Erhi akadesire, arhakag’ijacira abakag’imuhagalika erhi kubayobohya. Yezu akag’iyerekana oborhere bw’okucihasha bulya ‘akag’icihira omu maboko gw’Omuciranuzi otwa emanja n’oburhondekezi [erhi bushinganyanya].’ Yezu al’imanyire oku Yehova akag’ibona oku akag’ijirirwa omu njira erhali ya bushinganganya. Al’iyemire oku Yehova akayusize obubule boshi b’obushinganyanya omu kasanzi kashinganine.
11. Omu njira nguma na nguma zihi rhwakaba masu lugenda enderho zirhu? (Olole n’enfoto.)
11 Rhwanayiga olwiganyo lwa Yezu omu kuba masu lugenda ebi rhuderha erhi rhwakajirirwa omu njira erhali ya bushinganyanya. Hali amango kurhaba kwa bulagirire rhuderhe erhi kujira kantu kalebe, bulya obubule bw’obushinganyanya rhwajiriragwa burhali budarhi bwenene. Erhi rhwanahulika lyo rhuyaka okuderha kantu kalebe kakarhuma ebintu byaba bizibu bwenene. (Muh. 3:7; Yk. 1:19, 20) Agandi mango byanahûna rhuhalire okuli erhi rhuhalire omuntu ojirirwe omu njira erhali ya bushinganyanya. (Ebj. 6:1, 2) Erhi byakahûna rhuderhe, rhushinganine rhucihangane rhujire ntyo rhunarhulwire n’omu njira y’obukenge.—1 Pt. 3:15. b
Erhi rhwakajirirwa omu njira erhali ya bushinganyanya, rhwanayiga olwiganyo lwa Yezu omu kuba masu lyo rhuhiga mangaci na gurhi rhwaderha (Olole ecifungo ca 11-12)
12. Gurhi ‘rhucihiramwo omu maboko gw’Omuciranuzi otwa emanja n’oburhondekezi [erhi, bushinganyanya]’?
12 Kandi rhwanayiga olwiganyo lwa Yezu omu ‘kukacihira omu maboko gw’Omuciranuzi otwa emanja n’oburhondekezi [erhi, bushinganyanya].’ Erhi abandi bakarhurhanyiza kubi erhi kurhujirira kubi, rhunalangalire oku Yehova amanyire okuli. Okujira ntyo kwanarhurhabala rhulembere okujirirwa omu njira erhali ya bushinganyanya bulya rhumanyire oku, buzinda Yehova ayish’ikubûla ebintu. Okuleka ebintu omu maboko ga Yehova, kunarhurhabale rhurhagendekeraga rhwabîka akarhinda n’obukunizi omu murhima gwirhu. Okubîka akarhinda n’obukunizi kwanarhuma rhwajira akantu kabi, kwanarhuma rhurhaba n’omwishingo, kwananarhuma rhwaheza obwîra bwirhu haguma na Yehova.—Enna. 37:8.
13. Bici byakarhurhabala lyo rhugendekera rhwalembera obubule bw’obushinganyanya?
13 Okuderha okuli, birhakahashikana okushimba olwiganyo lwa Yezu omu njira nyimana. Hali amango rhuderha erhi kujira ebintu rhwaciyunjuzako enyuma. (Yk. 3:2) Na bubule bulebe bw’obushinganyanya bwanarhuma rhwagendekera rhwaba n’ebihulu by’ekandalala n’eby’omubiri omu kalamo kirhu koshi. Erhi akaba oli omu kanga ka ntyo, oyemere n’obwalagale oku Yehova amanyire ebi oli walembera. Na Yezu wajiriragwa omu njira erhali ya bushinganyanya, anahugûkwa oku oli waciyumva. (Hb. 4:15, 16) Ahanyuma n’okurhuha olwiganyo lwimana lwa Yezu, Yehova anarhuhe amahano minja garhurhabala rhulembere obubule bw’obushinganyanya. Lekagi rhuganirire mandiko abirhi omu citabu c’Abaroma gakarhurhabala.
“MULEKE OBUKUNIZI BWA NYAMUZINDA BWÔNE BUYISH’ICIHÔLA”
14. ‘Okuleka obukunizi bwa Nyamuzinda bwône bucihôle’ ko kuderha gurhi? (Abaroma 12:19)
14 Osome Abaroma 12:19. Entumwa Paolo yayinginzire Abakristu oku ‘baleke obukunizi bwa Nyamuzinda bwône buyish’icihôla.’ Rhunaleke obukunizi bwa Yehova bwône bucihôle omu kumuleka yene alerhe obushinganyanya omu njira n’omu mango yene alonzize. Enyuma z’okujirirwa omu njira erhali ya bushinganyanya, mwene wirhu muguma ohamagalwa John adesire ntya: “Nal’ishinganine ndeke obukunizi lyo nyaka okujira kantu kalebe kabi, cikone oko kurhali kulembu. Olwandiko lw’Abaroma 12:19 lwantabire ndeke Yehova yene akole.”
15. Bulya gurhi kuba kwinja okulinda Yehova yene akubûle ebintu?
15 Rhunayunguke erhi rhulinda Yehova yene akubûle ebintu. Erhi rhujira ntyo, rhunayake amahangayiko omu bukengere n’okuvunika omurhima rhuyumva kanji-kanji erhi rhulonza okuyusa amazibu madarhi oku bwirhu rhwene. Yehova arhulaganyize oku arhurhabala. Ali nk’odesire erhi, ‘Muleke obubule bw’obushinganyanya omu maboko gani; niene nashibirira ebintu.’ Erhi rhwakayemera eciragane ca Yehova cidesire erhi, “Niene nayish’ilyula,” rhurhakagendekera rhwabêrana obukunizi bulya rhuyemire oku yene ayish’ishibirira ako kanga omu njira nyinja yakahashikana. Oko ko kwarhabalaga John rhwaganiriraga embere. Adesire ntya: “Erhi nakaleka Yehova yene akole, anashibirira ako kanga omu njira nyinja bwenene kulusha oku nakahasha.”
“OHIME OBUBI OMU KUJIRA AMINJA”
16-17. Gurhi isala lirhurhabalamwo lyo rhugendekera ‘rhwahima obubi omu kujira aminja’? (Abaroma 12:21)
16 Osome Abaroma 12:21. Kandi, Paolo ayinginzire Abakristu bagendekere ‘bahima obubi omu kujira aminja.’ Omu Mahubiri gage g’oku Ntondo, Yezu adesire ntya: “Muzigire abammushomba, musengerere abammulibuza.” (Mt. 5:44) Na kobinali ko ajijire ntyo. Byanahashikana oku rhwarhanyize lugenda amalumwa Yezu alembire erhi abasoda Baroma bamumanika oku murhi gw’amalibuko. Yezu ajirirwe omu njira y’obuminya analembire amalumwa madarhi. Rhurhankahasha okuhugûkwa kobinali kunganaci alibusire.
17 Yezu arhahimagwa n’obubule bw’obushinganyanya ajirirwe. Ahali h’okuheherera abo basoda, asalira ntya: “Larha, obafe bwonjo, bulya barhamanyiri eci badwirhe bajira.” (Lk. 23:34) Erhi rhushenga Yehova enyanya z’abarhujirira kubi, oko kunarhurhabale rhurhulirire n’okurhakunira bwenene, kunanarhurhabale rhushanje oku rhubabona.
18. Gurhi isala lyarhabiremwo Alberto na John lyo balembera obubule bw’obushinganyanya?
18 Isala lyarhabire bene wirhu babirhi rhwaganiriraga oku murhondero gw’eci cigabi lyo balembera obubule bw’obushinganyanya bajiriragwa. Alberto adesire ntya: “Nashenzire enyanya za bene wirhu banjiriraga omu njira erhali ya bushinganyanya. Nabwira Yehova kanji-kanji antabale nyibagire obubule bw’obushinganyanya najiriragwa.” Eby’okushagalusa kuli kubona oku, kandi Alberto akola ali akolera Yehova n’obwishwekerezi. John adesire ntya: “Kanji-kanji nashenzire enyanya za mwene wirhu wangayisagya. Amasala ga ntyo gantabire okumubona omu njira nyinja, buzira kumutwira olubanja. Kandi ago masala garhumire naba n’omurhûla omu bukengere.”
19. Gurhi rhugwasirwe rhujire embere obuzinda bw’er’igulu libi buhike? (1 Petro 3:8, 9)
19 Rhurhankahash’imanya bubule buhi bw’obushinganyanya rhwajirirwa embere obuzinda bw’er’igulu buhike. Ciru bici byakarhuhikira, rhugendekere rhwashenga Yehova ly’arhuha oburhabale. Kandi, rhugendekere rhwayiga enjira Yezu alembiremwo okujirirwa kubi, n’okugendekera rhwakolesa amakanuni g’Ebibliya. Erhi rhwakajira ntyo, rhwanayemera n’obwalagale oku Yehova arhugisha.—Osome 1 Petro 3:8, 9.
LWIMBO 38 Akuha Emisi
a Omu cigabi ca 2 n’eca 3 c’amaruba marhanzi ga Petro, aganirire akanga Bakristu banji b’omu myaka igana mirhanzi balembiremwo okujirirwa omu njira erhali ya bushinganyanya na ba nnawabo bali bakali erhi b’iba barhali bemezi.—1 Pt. 2:18-20; 3:1-6, 8, 9.
b Oku jw.org, olole evideo edesire Oku Obuzigire Bulerhamwo Omurhûla gw’Okunali.
