Paul: Rhwal’ishagalusire bwenene! Gwali Mwezi gwa 11, 1985, erhi rhuyerekire e Liberia omu Afrique de l’Ouest, omu mukolo gwirhu murhanzi gw’obumisiyonere. Emviyo rhwalimwo yagwa e Sénégal. Anne aderha ntya: “Omu nsa nguma n’abana rhwahika e Liberia!” Enyuma z’aho rhwayumva er’itangazo: “Abaja e Liberia bahonoke omu mviyo. E coup d’état yarhuma emviyo yirhu erhagwa yo.” Omu nsiku ikumi zakulikiraga, rhwabêra haguma na bamisiyonere e Sénégal. Rhwakayumvirhiza emyanzi y’e Liberia lugenda oku bantu banji bwenene bakag’inigwa na lugenda emisako eguvernema yal’ihûnyire eje yajirwa, n’abakag’ihuluka omu nyumpa zabo bijingo bakag’ilashwa ho n’aho.

Anne: Rhuba bantu ba kucikema bwenene. Kurhenga amango nali murho, bakag’impamagala Annie Nnamwoba. Ciru nanyobohe okuyikira ibarabara! Cikone rhwal’ihizire okuhika e Liberia emunda rhwarhumagwa.

Paul: Nie na Anne rhwaburhiragwa omu eneo y’ebuzikiro bw’izuba y’e Angleterre, kurhenga aha mwirhu kuja aha mwabo hali bilometre munani byone. Nie naye rhwarhonderaga omukolo gw’obupainiya erhi rhuyusa amasomo g’enyanya, ababusi bani na nnina wa Anne bo barhuhâga omurhima bwenene. Bal’ilunzire okuboko bwenene irala lirhu ly’okugeza akalamo kirhu koshi omu mukolo gw’akasanzi koshi. Erhi ngwerhe myaka 19, nalalikwa okuj’ikolera oku Beteli, na Anne acilunga haguma na nani enyuma z’obuhya bwirhu omu mwaka gwa 1982.

Anne: Rhwal’isimire okukolera oku Beteli, cikone ensiku zoshi rhwal’ilonzize okukolera ahali obulagirire bunji. Okukolera oku Beteli haguma n’abali bamisiyonere mîra, kwazibuhya ery’irala lirhu. Rhwajijire myaka isharhu rhuli rhwasalira n’obwalagale lugenda oko ngasi budufu, co cirhumire omu mwaka gwa 1985, rhwashagaluka bwenene erhi rhuhâbwa omulali gw’okuja oku isomo lya 79 ly’Amasomo g’Egileadi! Rhwarhumwa okuj’ikolera e Liberia, omu Afrique de l’Ouest.

Paul: Rhwarhôla emviyo ntanzi yayemereragwa okuja e Liberia. Ehali erhali nyinja n’emisako yacir’igendekire. Erhi ipiné ly’omutuga lyakabashire, abantu bakag’ikanguka bwenene omu cibuye. Lyo rhurhulirira, rhwakag’isoma haguma bigabi bilebe by’ecitabu c’Ennanga ngasi budufu. Ciru akaba ntyo, rhwal’izigire bwenene omukolo gwirhu. Anne ali misiyonere wakag’ihubiri omu eneo ngasi lusiku, na nani nakag’ikolera  oku Beteli. Nakag’ikola haguma na John Charuk. a Emyaka ali amajira omu mukolo n’okuhugûkwa kwage akanga ka bene wirhu na bali birhu b’omu Liberia byarhabala okunkomereza.

Anne: Bici byarhumire rhwazigira ecihugo c’e Liberia duba-duba? Buzigire bwa bene wirhu na bali birhu. Bali bashagalusi, ba kuyegerwa, na bishwekerezi. Rhwajira obwîra busezire haguma nabo; banaba mulala gwirhu muhyahya. Amahano gabo garhuzibuhya omu hali y’ekiroho. Rhwashagalukira bwenene omukolo gw’amahubiri eyo munda. Abumvirhiza barhakag’isima omuntu abaleke duba-duba! Abantu bakag’iganirira amadoso lugenda Ebibliya ngasi hoshi. Kwali kulembu okucilunga omu nganîro zabo. Rwal’igwerhe banafunzi banji bwenene b’Ebibliya kuhika kwakaba kuzibu okubayigiriza boshi. Eyo yali eneo nyinja bwenene!

Paul: Omu mwaka gwa 1989 enyuma za myaka ini rhugwerhe ehy’omurhûla, ebintu byashanja: haba ivita egarhi ka bacikala. Omu nsiku 2/7/1990, ecikundi c’abasoda bagoma cagwarha e eneo Ebeteli yalimwo. Rhwajijire myezi isharhu buzira kuganira n’abantu b’embuga, kuhiramwo abantu b’emilala yirhu n’ebiro bikulu. Hali akavulindi ngasi hoshi, ishali, n’abakazi bakag’ibakwa. Ako kavulindi kajijire myaka 14 kanalandira omu cihugo coshi.

Anne: Abantu b’omu mûko maguma na maguma bakag’ilwisanya n’okunigana. Abasoda bagoma bagwerhe amabunduki n’ebindi bikolanwa by’okulwa ivita banayambirhe kubi bakag’igera ngasi hoshi omu mabarabara n’okunyaga ebintu omu ngasi nyumpa. Baguma na baguma bakag’ibona okuniga omuntu nka kubaga engoko. Emirhumba yal’iyunjwire oku mikange, n’eyindi yali hofi n’etawi. Abahamirizi bishwekerezi banizirwe, kuhiramwo na bamisiyonere birhu babirhi bazigirwa.

Abahamirizi bahizire akalamo kabo omu mazibu lyo bafulika ababo Bahamirizi b’omu mûko gakag’ilongerezibwa n’okunigwa. Bamisiyonere na Babetelite nabo bajijire ntyo. Bahamirizi baguma na baguma bal’iyakire oku Beteli bakag’igwishira omu byumpa by’idako n’abandi bakag’ilama haguma na nirhu omu byumpa by’enyanya. Rhwal’ishangire ecumpa cirhu n’omulala gwa bantu nda.

Paul: Ngasi lusiku, abasoda bagoma bakag’ilonza okuja omu Beteli lyo balola erhi rhufulisiremwo abantu. Rhwagwerhe bantu bani bw’okujira obulanzi: babirhi bakag’ilolera omw’idirisha n’abandi babirhi bakag’ija embuga z’omuhango gw’Ebeteli. Erhi abo babirhi bakag’iba bali embuga bakahizire amaboko gabo embere, rhunamanye oku ebintu biri binja. Cikone erhi bakahizire amaboko gabo emugongo, oko kwali kuderha oku abasoda bagoma bali bakali bwenene, na  ntyo abakag’ilolera omw’idirisha bakag’ifulika duba-duba abîra birhu.

Anne: Enyuma za migobe minji, cigusho ciguma c’abasoda bagoma bal’igayire bwenene caja omu Beteli cirimisi. Nie na mwali wirhu muguma rhwaciyigalira omu dushe yalimwo akabati kalimwo ahantu hasungunu h’obwifulikwe. Oyo mwali wirhu acifulika mw’ako kabati. Abo basoda basokera omu byumpa by’enyanya banadwirhe embunduki zabo. Bashurha olumvi lwirhu bwenene banagayire. Paul abasemberera omu kuderha erhi, “Mukanie ali akalaba.” Okuyigala ako kabati kwajira olubi, n’okucib’ipanga ebintu buhyahya omu maetajere kwarhôla akasanzi, na ntyo narhondera najuguma kurhondera okw’irhwe kuhika oku magulu. Gurhigi nakayigwiremwo olumvi lw’edushe? Najira isala ly’ekandalala, nasemberera Yehova antabale. Enyuma z’aho nayigula olumvi nanabalamusa nandi nka ntulirire. Muguma muli bo ansunsunika, aja ebwa kabati, akayigula, anashandaza ebyali omu maetajere. Arhayemeraga oku omwo mwanabula akantu. Enyuma z’aho, ye n’ecigusho cage basagarha omu bindi byumpa n’omw’idari. Cikone kandi barhabonaga kantu koshi-koshi.

Paul: Omu myezi milebe kwali kuzibu okupata ebiryo. Cikone ngasi lusiku rhwal’igwerhe ebiryo by’ekiroho. Enterekêro y’esezi y’omulala gw’Ebeteli byone byali “biryo birhu by’esezi,” na rhweshi rhwagendekera rhwashagalukira emisi y’ekandalala rhwakag’ipata kugerera eyo nterekêro.

Rhucirhengage oku Beteli lyo rhuj’ilonza ebiryo n’amishi embuga, abal’icifulisiremwo bakanizirwe. Enjira n’akasanzi Yehova akag’irhuhamwo ebi rhwal’ilagirireko, hali amango yakag’ibonekana nka ya cisomerine! Yehova akag’ishibirira amalagirire girhu anakag’irhurhabala lyo rhurhayobohaga bwenene.

Igulu lyal’igendekire lyabamwo omwizimya, cikone okuli kwagendekera kwamoleka bwenene. Kanji-kanji, bene wirhu na bali birhu bakag’iyaka lyo baciza obuzine bwabo, cikone obuyemere bwabo bwabêra busezire barhanadundaganaga. Baguma na baguma badesire oku okulembera ery’ivita kwali “kucikomereza oku bayish’ilembera amalibuko madarhi.” Abagula na bene wirhu baciri misole, omu njira y’oburhwali, bajira oku bakanahashire koshi lyo barhabala bene wabo na bali babo. Erhi bene wirhu na bali birhu bakayasire, bakag’ilungana haguma, bakag’irhondeza amaeneo mahyahya g’amahubiri n’okujirira entimanano omu Nyumpa z’Obwami bakag’iyubaka omu mashaka. Entimanano zakag’irhuha omurhima mw’ago mango mazibu n’amahubiri gakag’irhurhabala okulembera. Amango g’okugabira bene wirhu na bali birhu oburhabale, rhwakag’ihumwa oku murhima omu kubona bahûnyire enshoho z’amahubiri ahali h’okuhûna emishangi. Bantu banji baciboneraga n’okuhikirwa n’ebintu bidarhi omw’ivita bakag’iyumvirhiza omwanzi mwinja. Bakag’isomerwa okubona Abahamirizi bal’igwerhe omwishingo n’entanya nyinja; bakag’imoleka nk’itara mw’ogo mwizimya. (Mt. 5:14-16) Obushiru bwa bene wirhu na bali birhu bwarhuma ciru basoda baguma na baguma baminya baba Bahamirizi.

Paul: Mango malebe, rhwal’igwasirwe rhurhenge mw’eco cihugo. Hali amango rhwagenzire kasharhu  cikone rhurhakag’iyorha, na kabirhi rhwakayusa omwaka. Mwali wirhu muguma wali misiyonere ahugwîre kwa bofofi oku rhwakag’iciyumva amango rhwakag’igenda omu kuderha ntya: “Oku Gileadi, barhuyigirizize oku rhuzigire bene wirhu na bali birhu n’omurhima gwirhu goshi, ko rhwanajijire. Co cirhumire, okubaleka omu kanga ka ntya kuli nka kusharhula emirhima yirhu!” Eby’okushagalusa, kuli kubona oku rhwakag’irhabala bene wirhu na bali birhu b’e Liberia erhi rhunali omu bihugo biba hofi n’e Liberia.

Anne: Omu Mwezi gwa 5, 1996, bani muli rhwe bagenda omu mutuga gw’Ebeteli gwalimwo edokima z’obulagirire bwenene lugenda etawi y’e Liberia. Rhwal’ilonzize rhuzihêke omu yindi eneo y’eyo vile yali oku bilometre 16 yalimwo obulanzi. Ho n’aho e eneo yirhu yarherwa. Abasoda bagoma bal’ikunire bakalasha emalunga, barhuyimanza, bashonola basharhu muli rhwe omu mutuga, banaguhêka erhi na Paul acirimwo. Rhwayimanga aho rhunayobohire bwenene. Buzira kulegama, Paul ayisha ali alambagira omu hitû hy’abantu n’omuko guli gwamudwa emalanga. Rhwakarhanya oku bamulashire, cikone enyuma z’aho rhwahugûkwa oku, acibage ntyo ko byali, arhakayishire ali alambagira! Musoda muguma mugoma amuhukuzize erhi aba ali amusunsunika arhenge omu mutuga. Eby’okushagalusa, cirhali cihulu cinene.

Aha burhambi hali omutuga gw’abasoda b’ecihugo gwal’iyunjwiremwo abantu bal’iyobohire bwenene. Bulya mw’ogo mutuga murhaciri enafasi, rhwaguparamako. Shoferi agulibisa bwenene na rhweshi rhwal’ikola rhwahirima. Rhwamuyinginga ayimange cikone arhayemeraga bulya al’iyobohire bwenene. Rhwagunanirako lyo rhurhahonaga, cikone rhwahika erhi rhujanganusire bwenene n’irhwe liri lyajegera.

Paul: Rhwahika maboko mûmu, rhuzinzire bwenene, emishangi yarhusharhukireko, rhwakalolanako n’okucidosa gurhi rhucizinemwo. Rhwalala embuga hofi n’e elikoptere yaligeziremw’amasoro, yanarhuhêka e Sierra Leone olusiku lwakulikiraga. Rhwavuga omunkwa okubona rhwacir’izine, cikone rhwayoboha bwenene lugenda abandi bene wirhu na bali birhu b’e Liberia.

Anne: Erhi rhuhika oku Beteli y’e Freetown, omu Sierra Leone, rhwaba omu bulanzi rhwanashibirirwa bwinja. Cikone ebyo byabaga byakangaluka omu bukengere. Ngasi lusiku, ensa zoshi nakag’iba nyobohire bwenene oku hali kantu kalebe kadarhi kaba ntanacikag’irhanya bwinja, ngasi kantu kali aha burhambi bwani kakabonekana nka karhali k’okunali. Budufu, kanji-kanji nakag’izuka ndi najuguma nanyobohire oku hali akantu kadarhi kaba. Kwakaba kuzibu kuli nie okuyisa. Paul akag’imbagalira n’okusalira haguma na nani. Rhwakag’iyimba enyimbo z’Obwami kuhika okujuguma kwani kuhwe. Nakarhanya oku nasiraha n’oku ntacihashe okugendekeza omukolo gwani gw’obumisiyonere.

Ntakayibagira ebyabire enyuma z’aho. Ogo mugobe go n’ogo rhwapata magazeti abirhi. Gazeti nguma yali Amuka! y’omu nsiku 8/6/1996 (omu Ciswahiri). Yalimwo omwanzi gudesire “Kukabiliana na Mishiko ya Hofu ya Ghafula.” Eyo gazeti yantabala okuhugûkwa ebyakag’irhuma naciyumva ntyo. Eya kabirhi lyali Ilabiro ly’Akalalizi ly’omu nsiku 15/5/1996 (omu Ciswahiri), yalimwo omwanzi gudesire, “Wao Hupata Wapi Nguvu Zao?” Ery’Ilabiro ly’Akalalizi lyalimwo enfoto y’ecihwihwi cigwerhe ecubi ciharabisire. Ogo mwanzi gwahugûla oku, nk’oku ecihwihwi cakagendekera cacilisa n’okubalala ciru akaba ebyubi byaco biharabisire bwenene, kugerera iroho lya Yehova, nirhu rhwanagendekera rhwarhabala abandi ciru akaba rhwayagalisire ekandalala. Ebyo byali biryo bya kuzibuhya rhwahâbagwa na Yehova omu kasanzi kashinganine. (Mt. 24:45) Okujira obusagasi lugenda ogo mwanzi n’okubîka hantu halebe ebigabi biganirire ako kanga kwantabala bwenene. Enyuma za kasanzi kalebe, ntacigendekeraga nalibuzibwa n’ebyo byakag’inyishira omu bukengere.

Paul: Ngasi mango erhi rhwakagalusire e Liberia, rhwakag’ishagaluka bwenene. Oku buzinda bw’omwaka gwa 2004, rhwali rhwamajira hofi myaka 20 omu mukolo gwirhu. Ivita lyali lyamahwa. Hali emipango y’obubasi oku tawi. Cikone buzira kulegama, rhwarhumwa okuj’ikolera ahandi hantu.

Okujira ntyo kwali kuzibu bwenene kuli rhwe. Rhwal’izigire bwenene bene wirhu na bali birhu b’e Liberia, rhurhanal’ilonzize okubaleka. Erhi rhuleka emilala yirhu mizigirwa lyo rhuja oku Gileadi, rhwacibwinire kunganaci okucihira omu maboko ga Yehova kulerha emigisho, na ntyo rhwayemera ogo mukolo muhyahya. Byal’ihûnyire rhuj’ikolera omu cihugo c’e Ghana ciba hofi n’e Liberia.

 Anne: Rhwavugumula mirenge minji bwenene erhi rhurhenga e Liberia. Rhwasomerwa bwenene erhi mwene wirhu Frank, walikola mushosi wanali wa bwenge, arhubwira ntya: “Mugwasirwe murhuyibagire!” Enyuma z’aho ahugûla ntya: “Rhumanyire oku murhakarhuyibagira ciru n’ehitya, cikone mushinganine muhire omurhima gwinyu goshi omu mukolo gwinyu muhyahya. Yehova omuhîre ogo mukolo, co cirhumire musegeze obwenge bwinyu boshi kuli bene wirhu na bali birhu b’eyo munda.” Oko kwarhuzibuhya okubiyerekire amazibu g’okucib’irhondera omukolo ahantu bantu banji barhal’irhumanyire n’aha ebintu byoshi byali bihyahya kuli rhwe.

Paul: Cikone harhageraga kasanzi kanji embere rhuhikire okuzigira bene wirhu na bali birhu b’omu Ghana. Eyo munda yali Bahamirizi banji! Obwishwekerezi n’obuyemere busezire bw’abo bîra birhu bahyahya byarhuyigirizize binji. Enyuma z’okujira myaka 13 rhuli rhwakolera omu cihugo c’e Ghana, rhwacib’irhumwa okuj’ikolera ahandi hantu. Rhwarhumwa oku tawi y’e Afrique de l’Est omu cihugo c’e Kenya. Ciru akaba rhwakag’idula bwenene abîra birhu ba mw’ebyo bihugo rhwakoleragamwo embere, birharhôlaga kasanzi kanji embere rhube n’abandi bîra omu cihugo c’e Kenya. Rhunacigendekire rhwakolera mw’eyo eneo nnene bwenene erimwo bulagirire bunji.

Anne: Mazibu manji gampikire omu kalamo kani, hali n’amango nakag’iba nyobohire bwenene. Ehali zakahira obuzine omu mazibu erhi z’okuyobohya zanalerha amazibu g’omubiri erhi g’ekandalala. Rhurhalangwa omu njira y’ecisomerine kw’ago mazibu. Ene, erhi nakayumva balasha, nanciyumve kubi omu nda n’enfune zani zinahole. Cikone nayizire okuyegemera oburhabale boshi Yehova arhuha ly’arhuzibuhya, buhiziremwo oburhabale bwa bene wirhu na bali. Kandi nabwine oku, erhi rhwakagendekera rhwaba n’eprograme nyinja y’ebintu by’ekiroho, Yehova anarhurhabala rhugendekere rhwabêra omu mukolo gwirhu.

Paul: Hali amango abantu bakarhudosa erhi, “Ka muba musimire omukolo gwinyu?” Ebihugo byanaba biri binja, cikone kandi byanajamwo akavulindi n’okuhira obuzine omu mazibu. Muli ntyo, bicigi rhuzigira bwenene kulusha ecihugo? Bene wirhu na bali birhu bazigirwa, ko kuderha, omulala gwirhu. Ciru akaba rhwanaba rhurhenzire omu nkomedu ziri lubero, rhweshi rhunabe rhugwerhe ntanya nguma lugenda Yehova. Rhwakag’irhanya oku rhwarhumirwe lyo rhubaha omurhima, cikone okuderha okuli, rhwe bazibuhize.

Ecinyabuguma ciba egarhi ka bene wirhu na bali birhu b’omw’igulu lyoshi ciri cisomerine kurhenga emwa Yehova. Rhujira omulala ngasi hoshi! Amango goshi rhugendekire rhwaba omu cigamba, rhunabe rhugwerhe omulala n’aha kâ. Rhuyemire n’obwalagale oku, erhi rhwakagendekera rhwalangalira Yehova, arhuha emisi lyo rhulembera ciru mazibu gahi gakarhuhikira.​—Fl. 4:13.