YOMARA na bashinja bage, Marcelo na Hiver, baba balamire omu lugo lusungunu omu cihugo c’e Guatemala. Yomara arhondera ayiga Ebibliya haguma n’Abahamirizi ba Yehova na bashinja bage nabo bacilunga kw’er’ifunzo. Cikone hali amazibu. Boshi basharhu baba mihurha, barhanakag’ihasha okusoma amandishi g’emihurha. Enyanya z’oko mwalimu wabo w’Ebibliya akag’ibasomera ebi bayiga n’Amandiko g’Ebibliya gakag’iba gali omu isomo bayiga.

Kwanali kuzibu kuli bo okuja oku ntimanano z’ecigamba. Bone barhakahashire okulambagira miniti 40 lyo bahika aha Nyumpa y’Entimanano yali hofi n’emwabo. Cikone bene wirhu b’omu cigamba barhôla emipango lyo babarhabala bakahika oku ntimanano zoshi z’ecigamba. N’erhi barhondera okukageza ebigabi by’abanafunzi oku ntimanano y’omu garhi k’omugobe, bene wirhu na bali birhu bakabarhabala babîke omu bukengere bwabo ebi bayish’iderha omu bigabi byabo.

Omu mwezi gwa Karhanu, 2019, entimanano z’ecigamba zarhondera okujirwa omu lugo lwabo. Kurhangira ago mango, mulume muguma na mukage, bapainiya b’akasanzi koshi bahamira mw’olo lugo. Bacihiriraho omuhigo gw’okuyigiriza abo bantu basharhu balondine okusoma n’okuyandika amandishi g’emihurha, ciru akaba oyo mulume na mukage barhal’imanyire okusoma n’okuyandika ago mandishi. Baja omu ibikiro ly’ebitabu lyo bamanya binji lugenda amandishi g’emihurha n’okuyiga obulenga bakolesa omu kugayigiriza abandi.

Omu myezi misungunu, abo bantu basharhu balondine baba n’obuhashe bw’okusoma bwinja amandishi g’emihurha, n’oko kwabaha obulyo bw’okujira majambere manji g’ekiroho. a Bunola Yomara, Marcelo, na Hiver bali bapainiya b’akasanzi koshi. Marcelo ali murhabazi w’abagula. Banajire binji omu mikolo y’ekiroho omugobe goshi. Obushiru bwabo omu kukolera Yehova buli bwarhuma abandi nabo baba na bushiru bunji.

Abo bantu basharhu balondine bavuzire omunkwa bwenene oku buzigire n’oburhabale ecigamba cibahâ. Yomara adesire ntya: “Abahamirizi ba Yehova barhuyeresire obuzigire bw’okunali bw’Ecikristu kurhangira amango rhwarhimananaga nabo oburhangiriza.” Marcelo ayushwire ntya: “Rhugwerhe abîra binja bwenene omu cigamba cirhu, kandi rhuli baguma b’omu mulala gwa bene wirhu na bali birhu b’omw’igulu lyoshi balungine haguma omu buzigire.” Yomara na bashinja bage bali balindirira olusiku bayish’ibona oku igulu lyahinduka paradizo.​—Enna. 37:10, 11; Iz. 35:5.