1. Bici Yezu abwizire abanafunzi bage lugenda akasanzi ka buzinda, na burhonde buhi abahire?

 NSIKU nsungunu embere z’okufâ kwa Yezu, bani b’omu banafunzi bage bamudosa ntya: “Ecabe cimanyiso . . . c’okuhwa kw’igulu” co cihi? (Mt. 24:3) Bibonekine oku abo banafunzi nkaba bakag’icidosa gurhi bakayishir’imanyamwo akasanzi Yeruzalemu n’ehekalu yage byakasherezibwe. Omw’ishuzo lyage, Yezu arhaganiriraga okusherezibwa kwa Yeruzalemu n’ehekalu yage kone, cikone kandi aganirire n’akasanzi k’“okuhwa kw’igulu” rhulamiremwo ene. Lugenda akasanzi obuzinda bwakahisiremwo, Yezu aderha ntya: “Olwo lusiku n’ako kasanzi, ntaye obimanyire, ciru bamalahika b’empingu, ciru n’Omugala, nta wundi aha nyuma ly’Ishe yenene.” Enyuma z’aho arhonda abanafunzi bage boshi erhi “mumanye” na kandi “mube masu.”​—Mk. 13:32-37.

2. Bulya gurhi okuba masu kwali kwa bulagirire oku bantu bal’ilamire omu mago g’okusherezibwa kwa Yeruzalemu n’ehekalu yage?

² Abakristu Bayahudi b’omu myaka igana mirhanzi bal’ishinganine bagendekere baba masu lyo bacunguka. Yezu abwizire abanafunzi bage ebyakabamanyisize oku Yeruzalemu n’ehekalu yage byali hofi bisherezibwe. Adesire ntya: “Amango mukabona Yeruzalemu azungulusirwe n’engabo, mumanye oku okushâbwa [okusherezibwa] kwage kukola kuli hofi.” Mw’ako kasanzi bal’ishinganine barhumikire oburhonde bwa Yezu n’‘okuyakira oku ntondo.’ (Lk. 21:20, 21) Ngasi abakulikire obo burhonde bwa Yezu bacunguka erhi Abaroma bashereza Yeruzalemu.

3. Bici rhwaganirira mw’eci cigabi?

³ Ene rhulamire omu mango ga buzinda g’er’igulu ligalugalu. Co cirhumire nirhu rhushinganine rhugendekere rhwalanga olugero lwirhu n’okugendekera rhwaba masu. Mw’eci cigabi, rhwaganirira gurhi rhwakabamwo ba lugero  amango rhuli rhwalola ebiri byajirikana omw’igulu, gurhi rhwakakacilabirizamwo rhwenene, n’oku rhwakakolesamwo bwinja akasanzi kacisigire.

4. Bulya gurhi rhushinganine rhuhangayikire okumanya gurhi ebiri byajirikana omw’igulu ene biri byahikirizamwo obulebi bw’Ebibliya?

⁴ Hali ecirhumire cinja cirhuma rhwalonza okumanya gurhi ebiri byajirikana omw’igulu ene biri byahikirizamwo obulebi bw’Ebibliya. Kwa lwiganyo, Yezu aganirire ebintu byakajirikine omw’igulu ly’arhurhabala rhumanye mangaci obuzinda bw’er’igulu lya Shetani bwakabire buli hofi. (Mt. 24:3-14) Entumwa Petro yarhuhîre omurhima rhukasegeza obwenge oku kuhikirizibwa kw’obulebi bw’Ebibliya ly’obuyemere bwirhu bubêra busezire. (2 Pt. 1:19-21) Ecitabu cizinda c’Ebibliya cirhondire n’ezi nderho: “Okucîmanyisa [Amafulûlo, NWT] kwa Yezu Kristu ahâbagwa na Nyamuzinda, mpu ayereke abambali ebiri hofi bibê.” (Maf. 1:1) Co cirhuma rhuhangayikira okumanya ebiri byajirikana omw’igulu ene n’okumanya gurhi byakahikirizamwo obulebi bw’Ebibliya. Na kandi rhwanaba n’irala ly’okuganirira emyanzi eri nk’eyo egarhi kirhu rhwene na nnene.

5. Bici rhushinganine rhukayaka, cikone bici rhushinganine rhukajira? (Olole enfoto.)

⁵ Cikone, omu mango rhuli rhwaganirira obulebi bw’Ebibliya rhushinganine rhukayaka okuderha ebi rhwene rhuli rhwarhanya mpu nkaba byanabe. Bulya gurhi? Bulya rhurhakalonza rhuderhe kantu kalebe kakarhuma abantu baciberulamwo omu cigamba. Kwa lwiganyo, nkaba wayumvirhe abakulu ba mw’er’igulu bali baderha lugenda gurhi bakamalamwo kadali kalebe n’okulerha omurhûla n’akalembe. Ahali h’okurhanya rhwene mpu nkaba ezo nderho zabo ziri zahikiriza obulebi buli omu 1 Abatesalonika 5:3, kuli kwa bulagirire rhukamanya emyanzi mihyahya yazindig’icapisibwa. Erhi enshabalo zirhu zakakayimangira oku nyigirizo rhuhabwa n’ikubuliro lya Yehova, rhwanarhabala ecigamba cigendekere caba n’ecinyabuguma “omu nkengêro.”​—1 Kr. 1:10; 4:6.

6. Masomo gahi olwandiko lwa 2 Petro 3:11-13 lwakarhuyigiriza?

⁶ Osome 2 Petro 3:11-13, NWT. Entumwa Petro erhurhabire rhukaba n’entanya z’olugero amango rhuli rhwarhanya lugenda obulebi bw’Ebibliya. Arhuhûnyire ‘rhukacifinja okuyisha kw’olusiku lwa Nyamuzinda.’ Bulya gurhi? Arhali bulya rhuli rhwalonza rhumanye ‘olusiku n’akasanzi’ Yehova alerhamwo ivita lya Harmagedoni, cikone bulya rhulonzize rhukolese akasanzi kacisigire omu kuba nʼ“ebijiro bitagatifu byʼolugenzi nʼebijiro byʼobwishwekerezi kuli Nnâmahanga.” (Mt. 24:36; Lk. 12:40) Omu zindi nderho, rhulonzize rhugendekere rhwaba n’olugenzi lwinja n’okujira okwirhu koshi ly’obushiru bwirhu omu mukolo gwa Yehova buyerekana oku rhumuzigire bwenene. Lyo rhuhasha okujira ntyo, rhugwasirwe rhukacilabiriza rhwenene.

7. Gurhi rhuyerekanamwo oku rhuli rhwacilabiriza rhwenene? (Luka 21:34)

⁷ Yezu abwizire abanafunzi bage oku arhali ebiri byajirikana omw’igulu byone bakalabiriza cikone nabo bone bakacilabiriza. Ezo ntanya zibonekine n’obwalagale omu burhonde buli omu lwandiko lwa Luka 21:34, Mashi Bible. (Osome.) Olole enderho za Yezu: “Mucîlange.” Omuntu ocîlanga erhi kucilabiriza yenene anakaba masu lugenda ngasi mirhego yakaheba obwîra bwage haguma na Yehova omu mazibu, na kandi anarhôle emihigo yakamuyasa eyo mirhego. Omu kujira ntyo, anagendekere okubêra omu buzigire bwa Nnâmahanga.​—Mig. 22:3; Yd. 20, 21.

8. Burhonde buhi entumwa Paolo yahîre Abakristu?

 ⁸ Entumwa Paolo yarhonzire abakristu oku bakacilabiriza bonene. Kwa lwiganyo, abwizire Abakristu b’e Efezi ntya: “Mumanye olugendo lwinyu; murhahîmbaga nka bingolongolo, ci mube barhimanya [bantu ba bwenge, NWT].” (Ef. 5:15, 16) Ensiku zoshi Shetani anakalonza ashereze obwîra bwirhu haguma na Yehova, co cirhumire Ebibliya erhurhonzire oku ‘rhucisêze okumanya cici Nyakasane [Yehova, NWT] alonza’ lyo rhuhash’ilwisa ebirhero bya Shetani byoshi.​—Ef. 5:17.

9. Gurhi rhumanyamwo bici Yehova alonzize?

⁹ Ebibliya erhaganiriri ngasi murhego gwakaheba obwîra bwirhu haguma na Yehova omu mazibu. Kanji-kanji rhushinganine rhukarhôla emihigo lugenda ebintu birhaganirirwi n’obwalagale omu Mandiko. Lyo rhurhôla emihigo minja rhushinganine rhukamanya erhi kuhugûkwa ‘cici Nyakasane [Yehova, NWT] alonza.’ Rhwanajira ntyo erhi ngasi mango rhwakakayiga Akanwa ka Nnâmahanga n’okukarhanyako bwenene. Oku rhwagendekera rhwahugûkwa ebi Yehova alonzize n’okucihangana okumanya “obugerêreze bwa Kristu,” ko kwanaba kulembu kuli rhwe okulambagira nka “bantu ba bwenge,” ciru n’omu mango nta marhegeko g’obwalagale gahali gakalongoza olugenzi lwirhu. (1 Kr. 2:14-16, Mashi Bible) Hali amango kuba kulembu kuli rhwe okumanya emirhego rhwakayaka, cikone omu gandi mango kurhaba kulenbu.

10. Mirhego ehi miguma na miguma rhugwasirwe rhuyake?

¹⁰ Mirhego miguma na miguma rhushiganine rhuyake ehiziremwo okulehya, okunywa amanvu bwenene, obudambye, okuderha enderho zakayagaza abandi, ciru n’okulaba ebintu by’okucishagalusa birimwo obuminya, epornografi, n’ebindi bintu biri nk’ebyo. (Enna. 101:3) Ensiku zoshi, omushombanyi wirhu Ibilisi, anakalongereza obulyo bw’okurhusheregeza obwîra bwirhu haguma na Yehova. (1 Pt. 5:8) Erhi rhwakabula buba masu, Shetani anarhwera omu bukengere n’omu mirhima yirhu engeso z’okucifinja ebya bene, okurhaba bikubagirwa, irala ly’okuba na binji, enshombo, obucibone, n’okubîka agarhinda. (Gl. 5:19-21) Oku murhondero, nkaba ezo ngeso zanaba zirhali ndarhi bwenene. Cikone erhi akaba rhurhabiri babidu okuzihôngola, zanagendekera zakula nka murhi gulimwo sumu n’okurhulerhera amazibu.​—Yk. 1:14, 15.

11. Murhego muguma guhi gurhabonekana n’obwalagale rhugwasirwe rhuyake, na bulya gurhi?

¹¹ Murhego muguma gurhabonekana n’obwalagale bali bîra babi. Orhanye kw’aka kanga. Onakole na muntu mulebe orhali Muhamirizi wa Yehova. Olonzize oyo winyu munyakazi abe n’entanya nyinja lugenda Abahamirizi ba Yehova, na muli ntyo onacihangane okuba wa lukogo onanamurhabale. Na mango maguma na maguma ciru onayemere okushangira ebiryo by’omûshi haguma n’oyo muntu. Enyuma za kasanzi kalebe, orhondere okushangira ebiryo by’omûshi haguma naye ngasi mango. Mango maguma na maguma, oyo muntu arhondere okuganirira eby’enshonyi, cikone oku murhondero, wehe olahire okushuza kw’ezo nshambalo. Enyuma za kasanzi kalebe, ohikire okukomera ezo nshambalo zirhanacikakugayise. Lusiku luguma, oyo winyu munyakazi akulalike oku muj’inywa amamvu enyuma z’akazi, onayemere. Buzinda, orhondere okurhanya ak’oyo winyu munyakazi. Birhakahûna kasanzi kanji embere orhondere okujira ebintu biri nk’ebi ajira. Kobinali, rhunayerese abantu boshi olukogo n’obukenge, cikone rhugwasirwe rhukengere oku abantu rhucishoga okugeza akasanzi haguma nabo banarhushumya bwenene. (1 Kr. 15:33) Erhi rhwakakacilabiriza nk’oku Yezu arhuhûnaga rhujire, rhwanayaka okukageza akasanzi karhali ka bulagirire haguma n’abantu  barharhumikira amakanuni ga Yehova. (2 Kr. 6:15) Rhwanabona omurhego n’okuguyaka.

12. Bici abanafunzi ba Yezu baligwasirwe bajire omu mango bakag’ilinda obuzinda bw’er’igulu?

¹² Yezu al’ilonzize abanafunzi bage babe na binji bya kujira omu mango bali balinda oku obuzinda bwahika. Yezu abahîre omukolo gw’okujira. Abarhegesire oku bahubiri omwanzi mwinja “omu Yeruzalemu, n’omu Yudeya yoshi, n’omu Samariya, na kuhika aha igulu lihekera.” (Ebj. 1:6-8) Ogo guli mukolo munji abanafunzi ba Yezu bahabirwe! Bakolesize bwinja akasanzi kabo omu kucihâna bwenene mw’ogo mukolo.

13. Bulya gurhi rhushinganine rhukolese bwinja akasanzi kirhu? (Abakolosi 4:5)

¹³ Osome Abakolosi 4:5. Lyo rhucilabiriza rhwenene, rhushinganine rhukarhanya bwenene lugenda gurhi rhuli rhwakolesa akasanzi kirhu. “Obuhanya [mazibu gahika buzira kulaliza, NWT]” bwanahikira ngasi muguma wirhu. (Muh. 9:11) Rhwanafâ omu kasanzi rhurhal’irhanyize.

14-15. Gurhi rhwakakolesamwo bwinja akasanzi kirhu? (Abahabraniya 6:11, 12, Mashi Bible) (Olole n’enfoto.)

¹⁴ Rhwanakolesa bwinja akasanzi kirhu omu kujira obulonza bwa Yehova n’omu kuseza obwîra bwirhu haguma naye. (Yn. 14:21) Rhushinganine ‘rhusimike, rhurhadundaganaga, ensiku zoshi rhukaja embere [rhube na binji  bya kujira, NWT] omu mukolo gwa Nyakasane.’ (1 Kr. 15:58) Erhi rhwakajira ntyo, hano obuzinda buhika, bube buzinda bw’akalamo kirhu erhi buzinda bw’er’igulu ligalugalu, rhurhakaciyunjuza ciru n’ehitya.​—Mt. 24:13; Rm. 14:8.

¹⁵ Ene, Yezu agendekire alongoza abanafunzi bage omu mango bali bahubiri omwanzi gw’Obwami bwa Nnâmahanga omw’igulu lyoshi. Ajijire ecage cigabi. Kugerera ikubuliro lya Yehova, Yezu ali arhukomereza gurhi rhwakahubiri anali arhuha ebikolanwa rhulagirireko lyo rhuyalagaza omwanzi mwinja. (Mt. 28:18-20) Rhunajire ecirhu cigabi omu kuba n’obushiru omu mukolo gwirhu gw’okuhubiri n’okuyigiriza n’omu kugendekera rhwaba masu amango rhuli rhwalinda oku Yehova alerha obuzinda bw’er’igulu. Erhi rhwakakolesa ihano liri omu Abahabraniya 6:11, 12, Mashi Bible, rhwanagwarha kwa buzibu-zibu obulangalire bwirhu “kuhika oku buzinda.”​—Osome.

16. Bici rhuhizire okujira?

¹⁶ Yehova ahizireho olusiku n’ensa alerha obuzinda bw’er’igulu lya Shetani. Amango olo lusiku lwahika, Yehova ahikiriza obulebi boshi ayandikisize omu Kanwa kage. Nkaba hali amango rhwakarhanya oku obuzinda bw’er’igulu burhayishiri duba. Cikone, olusiku lwa Yehova lwayisha “buzira kulegama!” (Hab. 2:3) Co cirhumire, rhuhige oku ‘Nyamuzinda yene rhwalola kwo,’ rhunagendekere ‘okulangalira Nnâmahanga [wirhu] orhuciza.’​—Mik. 7:7, Mashi Bible.