1. Gurhi Yehova abona obuzine bwirhu?

 ORHANYE omwîra wawe akuhîre enyumpa. Ekola erhenzireko irangi enali yaloba. Ciru akaba eyo nyumpa egwerhe ago mazibu, yanaguzibwa emiliyoni y’amadolare. Kobinali, wanashagalukira eyo nyumpa n’okuyilanga. Ko n’oko, Yehova arhuhîre engalo y’engulo ndarhi bwenene, k’okuderha engalo y’obuzine. Ayerekine oku anabone obuzine bwirhu oku buli bwa ngulo ndarhi omu kuhâna Omugala abe ngombôlo kuli rhwe.​—Yn. 3:16.

2. Nk’oku biyerekinwe omu 2 Abakorinti 7:1, bici Yehova aba alonzize rhujire?

² Yehova ye Nshôko y’obuzine. (Enna. 36:9) Entumwa Paolo nayo yal’iyemire ntyo yanaderha ntya: “Muli ye, rhugwerhe obuzine, n’obwikanye n’okuba ho.” (Ebj. 17:25, 28, Mashi Bible) Co cirhumire rhwanaderha oku obuzine bwirhu eba ngalo kurhenga emwa Nnâmahanga. Enyanya z’obuzigire bwage, anarhuhe ebi rhulagirireko lyo rhugendekera rhwalama. (Ebj. 14:15-17) Cikone Yehova arhalanga obuzine bwirhu omu njira y’ecisomerine. Lubero n’oko, aba alonzize rhujire okwirhu koshi lyo rhushibirira amagala girhu g’omubiri n’ag’ekiroho. (Osome 2 Abakorinti 7:1.) Bulya gurhi rhushinganine rhulange amagala girhu n’obuzine bwirhu, na gurhi rhwakajiramwo ntyo?

3. Cirhumire ciguma cihi cirhushumya rhujire okwirhu koshi lyo rhugendekera rhwaba n’amagala minja?

³ Ecirhumire ciguma cirhushumya rhujire okwirhu koshi lyo rhugendekera rhwaba n’amagala minja kuli kubona oku rhwanakolera Yehova n’obushashe bwirhu boshi erhi rhwakaba rhugwerhe amagala minja. (Mk. 12:30) Rhuba rhulonzize rhuhâne “emibiri yirhu nka nterekêro y’obuzine, ntagatifu n’ey’okusimisa Nnâmahanga,” co cirhumire rhunayake okujira ebintu rhumanyire oku byanahira amagala girhu omu mazibu. (Rm. 12:1) Kobinali, ciru rhwakajira gurhi, arhali ko kuderha oku rhurhakacilwala.  Cikone, rhunajire oku rhwakanahasha koshi bulya rhulonzize rhuyerese Larha wirhu w’omu mpingu oku rhushagalukire engalo y’obuzine.

4. Bici Mwami Daudi al’ilonzize okujira?

⁴ Mwami Daudi ahugwîre bulya gurhi al’izigire engalo ya Nnâmahanga y’obuzine erhi ayandika ntya: “Bunguke buci wakabona erhi nakafa nje ekuzimu? K’ebidaka byanacikukuza obwo, ka byanacimanyisa okuli kwawe?” (Enna. 30:9, Mashi Bible) Nkaba Daudi ayandikaga ezo nderho ebwa buzindikiriza bw’akalamo kage. Cikone al’ihizire okubêra azine anagwerhe amagala minja nsiku nyinji nk’oku binahashikine ly’agendekera aha Yehova obukuze. Buzira karhinda, rhweshi rhujira omuhigo guli nk’ogwo.

5. Ciru rhwakashosihala gurhi erhi kulwala kunganaci, bici rhwakahash’ijira?

⁵ Erhi rhwakalwala erhi kushosihala nkaba rhurhakacihash’ijira bintu binji nk’oku rhwakag’ijira embere. Enyanya z’oko, nkaba rhwanaciyumva kubi na kandi rhwanavunika omurhima. Cikone rhurhagwasirwi rhuleke okujira okwirhu koshi lyo rhushibirira amagala girhu. Bulya gurhi? Bulya ciru rhwakashosihala gurhi erhi kulwala kunganaci, rhwanacigendekera rhwaha Yehova obukuze, nk’oku Mwami Daudi akag’ijira. Okumanya oku Nnâmahanga wirhu anabone obuzine bwirhu oku buli bwa bulagirire ciru akaba rhurhaba bimana kurhuhumire oku murhima bwenene! (Mt. 10:29-31) Ciru rhwakahikira aha rhwafâ, anaciyish’irhufûla. (Ayu. 14:14, 15) Amango rhucizine, rhulonzize rhujire okwirhu koshi lyo rhulanga amagala girhu n’obuzine bwirhu.

6. Bici Yehova aba alonzize rhukajira lugenda okulya n’okunywa kwirhu?

⁶ Ciru akaba Ebibliya cirhaba citabu ciganirira eby’amagala nkana erhi ca kuhâna enyigirizo okubiyerekire ebiryo, eyerekine entanya Yehova ajira lugenda ebyo bintu. Kwa lwiganyo, arhurhônzire oku ‘rhucirhenzekwo ngasi mababale’ gakashereza omubiri gwirhu. (Muh. 11:10) Ebibliya ehanzize obudanbye n’okunywa amamvu kurhalusire olugero, byombi byanashereza amagala girhu na ciru byanarhuma rhwafâ. (Mig. 23:20) Yehova ab’alonzize rhukayerekana oborhere bw’okucihasha omu mango rhuli rhwahiga lugenda bici na binganaci rhwalya n’okunywa.​—1 Kr. 6:12; 9:25.

7. Gurhi ihano liri omu Emigani 2:11 lyakarhurhabala rhukarhôla emihigo minja lugenda amagala girhu?

⁷ Rhwanarhôla emihigo eyerekine oku rhuvuzire omunkwa oku ngalo ya Nnâmahanga y’obuzine omu kukakolesa obuhashe bwirhu bw’okurhanya. (Enna. 119:99, 100; osome Emigani 2:11.) Kwa lwiganyo, rhwanarhôla emihigo minja lugenda ebi rhwalya. Erhi akaba rhusima biryo bilebe cikone rhumanyire oku binarhume rhwalwala, obuhashe bwirhu bw’okurhanya bwinja bunarhushumye rhuleke okukalya ebyo biryo. Kandi rhunayerekane oku rhugwerhe obwenge erhi rhwakakahûnga nk’oku bihûnyire, okujira esporo ngasi mango, n’okugendekera rhwacêsa omubiri gwirhu n’enyumpa yirhu.

8. Bici Ebibliya eyerekine lugenda entanya za Nnâmahanga okubiyerekire okucilanga kwirhu?

⁸ Yehova al’ihîre Abaisraheli Irhegeko lyalimwo obulongozi buyerekine gurhi bone bakacilanziremwo lyo barhahikiragwa n’e aksida ndarhi aha mwababwe n’ebwa kazi. (Lub. 21:28, 29; Lush. 22:8) Erhi muntu mulebe akanizire owundi buzira kumanya, hakabire amazibu madarhi bwenene. (Lush. 19:4, 5) Irhegeko lyal’ihûnyire oku ciru n’abantu bakajirire kubi omwana orhac’iburhwa buzira kumanya bahâbwe obuhane. (Lub. 21:22, 23) Amandiko gayerekine n’obwalagale oku Yehova alonzize rhukayaka ebyakarhuma e aksida yarhuhikira.

9. Bici rhwakajira lyo rhuyaka ama aksida? (Olole n’enfoto.)

 ⁹ Rhunayerekane oku rhushagalukire engalo ya Nnâmahanga y’obuzine omu kujira okwirhu koshi lyo rhucilanga rhurhahikiragwa n’e aksida aha kâ n’ebwa kazi. Kwa lwiganyo, rhunabîke bwinja ebyoji, ama produits chimiques erhi amafumu gakayirha abantu, na kandi rhunabîke ebyo bintu aha abana barhakahika. Rhunabe masu erhi rhuyasa omuliro, erhi rhudeka amishi, n’amango rhuli rhwakolesa ebyombo bikolesibwa n’omuliro gw’e kura, rhunanabe masu ly’ebyo bintu birharhulerheraga amazibu. Rhurhatembeza omutuga amango rhuli rhwanywa amafumu gakarhuma kwaba kuzibu kuli rhwe okutembeza, erhi akaba rhwanywire amamvu rhurhakanahash’itembeza bwinja, n’erhi akaba rhurhamire bwenene. Na kandi rhurhakolesa etelefone zirhu omu mango rhuli rhwatembeza omutuga.

10. Bici rhwakajira embere z’akanga kazibu n’omu mango g’ako kanga?

¹⁰ Hali amango rhurhakahasha okujira akantu koshi-koshi lyo rhucîka akanga kazibu karharhuhikiraga.  Kwa lwiganyo, rhurhakahasha okucîka obuhanya bucilerha bone, endwala z’okuyahukira, n’akavulindi k’obuminya. Cikone erhi obuhanya bwa ntyo bwakarhibuka, rhwanajira okwirhu koshi lyo rhucilanga n’okucira obo buhanya omu kurhumikira amarhegeko g’abarhegesi garhuhûnyire rhubêre aha mwabirhwe, rhurhenge omu eneo yirhu, n’agandi marhegeko garhuhûnyire okujira duba-duba. (Rm. 13:1, 5-7) Byanahashikana rhucirheganye lugenda kanga kaguma na kaguma kahûna okujira duba-duba, co cirhumire rhushinganine rhuyumvirhize obulongozi bw’abarhegesi b’omu eneo yirhu bwakarhurhabala rhucirheganye lugenda ako kanga. Kwa lwiganyo, rhwanabîka amishi n’ebiryo birhakabola n’amafumu gakarhurhabala oku ndwala zirhali ndarhi.

11. Amango endwala y’okuyahukira eri yalandira omu eneo yirhu, bici rhushinganine rhukaba babidu okujira?

¹¹ Bici rhwakajira erhi akaba endwala y’okuyahukira eri yalandira omu eneo yirhu? Rhushinganine rhurhumikire amarhegeko g’abarhegesi, kwa lwinganyo irhegeko ly’okukalaba enfune, okurhayegera abandi, okuyambala amaske, n’okubêra omu luzerema. Erhi rhwakacihangana okujira ebyo byoshi, rhwanayerekana oku rhushagalukire engalo ya Nnâmahanga y’obuzine.

12. Gurhi akanuni kali omu lwandiko lw’Emigani 14:15, Mashi Bible, kakarhurhabala lyo rhucishoga bwinja emyanzi rhwakayemera omu mango g’obuhanya?

¹² Omu mango g’akanga kahûnyire okujira duba-duba, hanaba myanzi minji y’obunywesi rhwakabwirwa n’abîra, abalungu, na kugerera ebyombo by’okuhâna emyanzi. Ahali h’okuyemera ‘ngasi kanwa,’ kwanaba kwinja rhuyumvirhize emyanzi y’okuli kurhenga oku barhegesi na badoktere. (Osome Emigani 14:15, Mashi Bible.) Bene wirhu b’omu Mbaraza Eri Yalongoza n’ab’omu mabiro g’etawi banajire okwabo koshi lyo bamanya emyanzi y’okuli embere z’okurhuha obulongozi lugenda entimanano z’ecigamba n’omukolo gw’amahubiri. (Hb. 13:17) Omu kurhumikira obo bulongozi, rhunacilange n’okulanga abandi lyo barhag’ihikirwa n’amazibu. Kandi rhunarhabale abandi lyo baba n’entanya nyinja lugenda Abahamirizi ba Yehova.​—1 Pt. 2:12.

13. Gurhi rhuyerekanamwo oku rhuba rhushagalukire engalo ya Nnâmahanga y’obuzine omu kanga kahûnyire okuhirwamwo omuko?

¹³ Bantu banji baba bamanyire oku rhwe Bahamirizi ba Yehova rhunabone omuko oku guba mutagatifu. Rhunarhumikire irhegeko lya Yehova lugenda omuko omu kulahira okuguhirwamwo, ciru n’omu kanga k’ecinganga kahûnyire okujira duba-duba. (Ebj. 15:28, 29) Cikone, oko kurhali kuderha oku rhuba rhulonzize okufâ. Lubero n’oko, rhuba rhuzigire engalo ya Nnâmahanga y’obuzine. Rhunalonze oburhabale bw’abanganga bagwerhe obulenga bunji bakayemera okurhubuka bwinja buzira kurhuhiramw’omuko.

14. Gurhi rhwakayakamwo kanga kaguma na kaguma kakarhuma byahûna rhuberwe duba-duba?

¹⁴ Erhi rhwakashibirira amagala girhu omu kujira ebintu rhwaganiriraga oku murhondero gw’eci cigabi, nkaba rhurhakahikirwa na kanga kaguma na kaguma kahûnyire okubêrwa erhi akandi kanga kadarhi kahûnyire okubukwa. Erhi rhwakaba rhugwerhe amagala minja, rhwanafuma duba omu mango bihûnyire okuberwa. Omu kuyaka ebintu byakarhuma e aksida yarhuhikira aha kâ n’ebwa kazi n’omu kurhumikira bwenene amarhegeko g’omw’ibarabara, nkaba rhwanayaka kanga kaguma na kaguma kakarhuma byahûna rhuberwe duba-duba.

15. (a) Bulya gurhi kuli kwa bulagirire rhukaba rhugwerhe efomu eriko amarhegeko okubiyerekire okuhirwamw’omuko erhali ya mîra? (Olole n’enfoto.) (b) Nk’oku biyerekinwe omu video, gurhi rhwakarhôlamwo emihigo minja lugenda okukolesa omuko omu by’okubukwa?

¹⁵ Bulya rhuba rhushagalukire engalo ya  Nnâmahanga y’obuzine, rhunayunjuze efomu y’obulagirire eriko amarhegeko okubiyerekire okuhirwamw’omuko (instructions médicales) n’okuyiheka ngasi aha rhunajire hoshi. b Kugerera eyo fomu, rhunayerekane emihigo yirhu lugenda okuhirwamw’omuko n’ezindi njira z’okubukwa. K’ogwerhe efomu y’obulagirire eriko amarhegeko okubiyerekire okuhirwamw’omuko erhali ya mîra? Akaba bihûnyire oyunjuze eyo fomu erhi kuyiyunjuza buhyahya, orhaderhaga mpu wajira ntyo agandi mango. Okuyerekana emihigo yirhu omu kuyiyandika kwanarhurhabala rhubukwe duba-duba ahali h’okuheza akasanzi omu kuja kadali na badoktere. Na kandi rhwanarhabala abanganga lyo barhag’ikolesa enjira z’okubuka erhi amafumu gakarhulerhera amazibu. c

16. Gurhi rhwakajira erhi akaba rhurhamanyiri bwinja okuyunjuza efomu y’obulagirire eriko amarhegeko okubiyerekire okuhirwamw’omuko?

¹⁶ Ciru akaba rhuciri misole bwenene erhi rhugwerhe amagala minja, rhweshi rhwanahikirwa n’e aksida erhi endwala. (Muh. 9:11) Co cirhumire, rhwanakolesa obwenge erhi rhwakayunjuza efomu y’obulagirire eriko amarhegeko  okubiyerekire okuhirwamw’omuko. Erhi akaba orhamanyiri bwinja gurhi wakayunjuza eyo fomu, ohûne abagula b’omu cigamba cinyu oburhabale. Banacihangane okumanya enjira y’okuyunjuza eyo fomu, cikone barhakakurhôlera emihigo eyerekire eby’okubukwa. Ogo guli mukolo gwawe. (Gl. 6:4, 5) Ciru akaba ntyo, banakurhabala ly’ohugûkwa emihigo wakarhôla na kandi banakurhabala amango okola wayiyandika kw’eyo fomu.

17. Gurhi rhwakayerekanamwo oku rhuli ba lugero okubiyerekire eby’amagala?

¹⁷ Mihigo yirhu minji rhurhôla lugenda amagala girhu n’eby’okubukwa eba eyimangire oku zamiri yirhu eyigirizibwe n’Ebibliya. (Ebj. 24:16; 1 Tm. 3:9) Amango rhuli rhwarhôla emihigo n’okuyiganirira haguma n’abandi, kuli kwinja rhukakolesa akanuni kali omu lwandiko lw’Abafilipi 4:5, NWT, ludesire ntya: “Oborhere bwinyu bw’okuba ba lugero bumanyikane oku bantu boshi.” Erhi akaba rhuli ba lugero, rhurhakasegeza bwenene obwenge bwirhu oku magala girhu g’omubiri; rhurhakanaseza abandi oku bayemere entanya zirhu okubiyerekire eby’amagala. Rhuba rhuzigire bene wirhu na bali birhu rhunanabakenge, ciru akaba emihigo barhôzire eri lubero n’eyirhu.​—Rm. 14:10-12.

18. Gurhi rhwakayerekanamwo oku rhuvuzire Yehova omunkwa oku ngalo y’obuzine?

¹⁸ Rhunayereke Yehova oku rhumuvuzire omunkwa, bulya ye Nshôko y’obuzine, omu kukalanga obuzine bwirhu n’okumukolera n’emisi yirhu yoshi. (Maf. 4:11) Muli gano mango, rhugwasirwe rhulwise endwala n’obuhanya. Cikone arhali ako ko kalamo Omulemi wirhu al’ilonzize rhube nako. Hano hofi-hofi arhuha obuzine bw’ensiku n’amango, rhurhakanaciyumva amalumwa rhurhakanac’ifâ. (Maf. 21:4) Embere ako kasanzi kahike, kuli kwinja bwenene okuba rhuzine n’okukolera Yehova, Larha wirhu w’obuzigire w’omu mpingu!