1. Bici biyerekine oku Amandiko gali ga bulagirire kuli Yezu?

 ORHANYE gurhi okuyumvirhiza oku Yezu ali ayigiriza kwali kwinja bwenene. Kanji-kanji akag’iderha enderho z’Amandiko Matagatifu al’ihasire omu bukengere bwage! Yezu agalukire Amandiko omu nderho zage ntangiriza nyandike aderhaga enyuma z’okubatizibwa kwage n’omu nderho zage nguma na nguma nzinda aderhaga embere z’okufâ kwage. b (Lush. 8:3; Enna. 31:5; Lk. 4:4; 23:46) N’omu myaka isharhu n’enusu Yezu agezagya enyuma z’okubatizibwa kwage n’embere afê, akag’isoma Amandiko embere z’olubaga, akag’igalukira enderho z’Amandiko, n’okugahugûla.​—Mt. 5:17, 18, 21, 22, 27, 28; Lk. 4:16-20.

2. Erhi Yezu ali akûla, bici byamurhabire ly’amanya Amandiko bwinja? (Olole enfoto eri oku cijalada c’eyi gazeti.)

² Myaka minji embere Yezu arhondere omukolo gwage, akag’isoma n’okuyumvirhiza kanji-kanji Akanwa ka Nnâmahanga. Buzira karhinda, akag’iyumva Yozefu na Mariya bali bagalukira enderho z’Amandiko omu nganîro zabo za ngasi lusiku aha kâ. c (Lush. 6:6, 7) Rhwanayemera n’obwalagale oku Yezu akag’ija omu sinagogi ngasi lusiku lwa Sabato haguma n’omulala gwage. (Lk. 4:16) N’omu sinagogi, agwasirwe abe akag’iyumvirhiza bwinja-bwinja obusomi bw’Amandiko. Erhi hagera kasanzi, Yezu ayiga okucisomera yene Amandiko Matagatifu. Oko kwarhumire Yezu amanya Amandiko bwinja na kandi agazigira anagaleka gakashumya ebijiro byage. Kwa lwiganyo, okengere ebyajirikanaga omu hekalu  amango Yezu agwerhe myaka 12 yone. Abalimu bal’imanyire bwinja-bwinja Irhegeko lya Musa “basomerwa n’obumanye n’amashuzo [ga Yezu].”​—Lk. 2:46, 47, 52.

3. Bici rhwaganirira mw’eci cigabi?

³ Na nirhu rhwanahikira aha rhwamanya n’okuzigira Akanwa ka Nnâmahanga erhi rhwakakasoma Amandiko ngasi mango. Cikone, gurhi rhwakajira lyo rhuyunguka bwenene n’ebi rhuli rhwasoma? Rhwanayiga binji kugerera enderho Yezu abwiraga abantu bal’imanyire Irhegeko, bahiziremwo abandisi, Abafarizeyi, n’Abasadukayo. Ebyo birongozi by’amadîni byakag’isoma Amandiko kanji-kanji, cikone barhakag’iyunguka n’ebi bakag’isoma. Yezu ayerekine bintu bisharhu abo balume bakajijire lyo bayunguka bwenene n’Amandiko. Enderho ababwiraga zarhurhabala rhukubûle obuhashe bwirhu (1) bw’okuhugûkwa ebi rhuli rhwasoma, (2) okupata obuhirhi bw’ekiroho, na (3) okuleka Akanwa ka Nnâmahanga karhushumye.

4. Bici olwandiko lwa Luka 10:25-29, Mashi Bible, lurhuyigirizize lugenda okusoma Akanwa ka Nnâmahanga?

⁴ Rhuba rhulonzize rhukahugûkwa ebi rhusoma omu Kanwa ka Nnâmahanga. Erhi akaba rhurhahugûsirwi ebi rhusomire, rhurhakayunguka bwenene n’obusomi bwirhu. Kwa lwiganyo, rhuganirire enshambalo za Yezu haguma na “mushamuka muguma w’ihano.” (Osome Luka 10:25-29, Mashi Bible.) Erhi oyo mulume amudosa ebi al’ishinganine ajire ly’aba n’obuzine bw’ensiku n’amango, Yezu amurhabala ly’abona ishuzo omu Kanwa ka Nnâmahanga. Amudosa ntya: “Kurhi biyandisirwe omu marhegeko girhu? Kurhi oyumva nk’oli wagasoma?” Oyo mulume ahashire okuhâna ishuzo linja omu kugalukira ebi amandiko gadesire lugenda okuzigira Nnâmahanga n’okuzigira omulungu. (Lev. 19:18; Lush. 6:5) Cikone oyumve ebi adesire enyuma z’aho: “Owirhu ye nndi [omulungu wani ye ndi, NWT]?” Oyo mulume ayerekana oku arhal’ihugûsirwe bwinja ebi asomaga. N’enyanya z’oko, arhal’imanyire gurhi akakolesa bwinja ago mandiko omu kalamo kage.

5. Gurhi okusalira n’okusoma rhunacirhonzire kwakarhurhabala rhuhugûkwe bwinja ebi rhuli rhwasoma?

⁵ Rhwanahugûkwa bwinja Akanwa ka Nnâmahanga erhi rhwakaba n’enkomedu nyinja z’okusoma. Rhulole mahano maguma na maguma gakakurhabala. Okasalira embere orhondere okusoma. Rhuba rhulagirire oku burhabale bwa Yehova lyo rhuhugûkwa Amandiko, co cirhumire rhwanamuhûna iroho lyage litagatifu lyo lirhurhabala rhusegeze obwenge kw’ebi rhuli rhwasoma. Enyuma z’aho osome onacirhonzire. Okwo kwanakurhabala ly’ohugûkwa ebi oli wasoma. Nkaba wanayunguka omu kusoma n’izu linene erhi kusoma onali wakulikira obusomi bw’Ebibliya buli arejistré. Erhi wakayumvirhiza obusomi buli arejistré onali wabona obo busomi oku karatasi, okwo kwanakurhabala okuhugûkwa, okukengera n’okuyiga binji kugerera ebi oli wasoma omu Kanwa ka Nnâmahanga. (Yoz. 1:8) Amango wamamala wasoma wanacib’isalira ly’ovuga Yehova omunkwa oku ngalo y’Akanwa kage n’okumuhûna oburhabale ly’okolesa ebi wasomaga.

6. Bulya gurhi okucidosa amadoso n’okuyandika myanzi milebe kwanakurhabala amango oli wasoma? (Olole n’enfoto.)

⁶ Ebindi bintu bibirhi byakakurhabala ly’ohugûkwa Ebibliya bwinja biri by’ebi. Okacidosa amadoso lugenda ebi oli wasoma. Amango oli wasoma mwanzi mulebe, okacidosa ntya: ‘Ba ndi baganirirwe mw’ogu mwanzi? Ndi oli waganira? Ndi ali aganiza, na bulya gurhi? Ngahi na mangaci ebiganirirwe byajirikanaga?’ Amadoso gali nk’ago ganakurhabala ly’orhanya  n’okukulikira entanya z’obulagirire ziganirirwe mw’olo lwandiko. Kandi, okayandika myanzi milebe amango oli wasoma. Okuyandika ebi oli wasoma kwanarhuma wabirhanyakwo bwenene kwananakurhabala ly’obihugûkwa bwinja. Kandi okuyandika kunakurhabale ly’okengera ebi wasomaga. Wanayandika amadoso, emyanzi wapataga omu busagasi bwawe, wanayandika kwa bofofi entanya z’obulagirire, wanayandika gurhi wakakolesamwo ebi wasomaga erhi gurhi oli waciyumva lugenda ebi wasomaga. Okuyandika emyazi eri nk’eyo kwanakurhabala obone Akanwa ka Nnâmahanga nka mwanzi akurhumire.

7. Borhere buhi rhuba rhulagirireko omu mango rhuli rhwasoma, na bulya gurhi? (Mateyo 24:15)

⁷ Yezu ayerekine akantu k’obulagirire rhulagirireko lyo rhuhugûkwa ebi rhuli rhwasoma omu Kanwa ka Nnâmahanga​—kuli kuderha oburhimanya. (Osome Mateyo 24:15.) Oburhimanya byo bici? Buli buhashe bw’okuhugûkwa gurhi ntanya ndebe zipatine n’ezindi na lubero luhi luli egarhi k’ezo ntanya zombi ly’omanya ntanya zihi zirhali nembu okuhugûkwa. Kandi, Yezu ayerekine oku rhulagirire oku burhimanya lyo rhubona n’obwalagale ebimanyiso biri byahikiriza obulebi bw’Ebibliya. Na kandi rhulagirirek’obo borhere lyo rhuyunguka bwenene na ngasi kantu rhuli rhwasoma omu Bibliya.

8. Gurhi rhwakasomamwo n’oburhimanya?

⁸ Yehova ahîre abakozi bage oburhimanya. Co cirhumire okamuyegera kugerera isala, n’okumuhûna akurhabale ly’oba n’obo borhere. (Mig. 2:6) Gurhi wakajiramwo ebipatine n’isala lyawe? Okarhanya bwenene kw’ebi oli wasoma, onahugûkwe lushangi luhi bigwerhe n’eyindi myanzi omanyire. Okakolesa ebicapo birhu birhurhabala okuyiga Ebibliya ly’ohasha okujira ntyo. Kwa lwiganyo, wanakolesa ecitabu Musaada wa Kutafuta Habari kwa Ajili ya Mashahidi wa Yehova. Ebyo bicapo byanakurhabala ly’omanya amahugûlo ga lwandiko lulebe n’okumanya gurhi wakakolesamwo ebi wasomaga omu kalamo kawe. (Hb. 5:14) Amango oli wasoma n’oburhimanya,  obumanye bwawe bw’Amandiko bwanayushuka.

9. Nyigirizo zihi z’obulagirire z’Amandiko Abasadukayo barhal’iyemire?

⁹ Abasadukayo bakag’isoma bwenene ebitabu birhanu birhanzi by’Amandiko g’Ecihabraniya, cikone barhal’iyemire enyigirizo z’okuli zali mw’ebyo bitabu byalongozibagwa n’iroho litagatifu. Kwa lwiganyo, olole oku Yezu ashuzagya erhi Abasadukayo bamujisa mbaka lugenda obufûke bw’abafîre. Abadosa ntya: “Ka murhasag’isoma omu citabu ca Musa, halya hadesire ogw’ishaka ly’emishugi? Aho hayandisirwe oku Nnâmahanga abwiraga Musa erhi: ‘Ndi Nnâmahanga wa Abrahamu, na wa Isaki na wa Yakobo.’” (Mk. 12:18, 26, Mashi Bible) Ciru akaba Abasadukayo bali bamakasoma kanji-kanji olo lwandiko, idoso lya Yezu lyayerekine oku barhal’iyemire ezi nyigirizo z’obulagirire z’Amandiko: enyigirizo z’obufûke.​—Mk. 12:27; Lk. 20:38. d

10. Amango rhuli rhwasoma, bici rhushinganine rhukasegezako obwenge?

¹⁰ Isomo lihi oko kurhuyigirizize? Amango rhuli rhwasoma, rhulonzize rhukasegeza obwenge oku bintu byoshi olwandiko erhi mwanzi mulebe gw’Ebibliya gwakarhuyigiriza. Rhurhalonza okuhugûkwa enyigirizo z’omusingi zone cikone kandi rhunalonze rhuhugûkwe enyigirizo nzibu n’amakanuni g’Ebibliya garhali gabonekana n’obwalagale.

11. Kushimbana n’olwandiko lwa 2 Timoteyo 3:16, 17, gurhi wakapatamwo obuhirhi bw’ekiroho omu Bibliya?

¹¹ Gurhi wakapatamwo obuhirhi bw’ekiroho amango oli wasoma Ebibliya? Rhulole ebi olwandiko lwa 2 Timoteyo 3:16, 17 ludesire. (Osome.) Obwine oku olo lwandiko ludesire oku “amandiko goshi . . . gakwanana” oku (1) kuyigiriza, (2) kuhanûla, (3) kuhabûla abahabusire, n’oku (4) kuherha abantu omu bushinganyanya erhi kuhâna obuhane. Ciru n’ebitabu by’Ebibliya orhakolesa bwenene byanakulerhera obunguke mw’ezo njira ini. Okarhanya bwenene oku mwanzi mulebe ly’obona ebi gukuyigirizize lugenda Yehova, omuhigo gwage, erhi lugenda amakanuni gage. Okalola gurhi ogo mwanzi gwakarhabala omu kuhanûla. Okajira ntyo omu kubona gurhi amandiko gakurhabire omanye entanya mbi n’okuziyaka n’okugendekera wabêra mwishwekerezi kuli Yehova. Ololereze gurhi wakakolesamwo lwandiko lulebe ly’ohabûla, erhi kukubûla entanya mbi warhimanine nazo omu mukolo gw’amahubiri. Na kandi okalonza ngasi buhane amandiko gahânyire, bwanakurhabala ly’obona ebintu nk’oku Yehova abibona. Erhi wakakengera ezo njira ini Amandiko garhulerheramwo obunguke, wanabona obuhirhi bw’ekiroho bwakakurhabala ly’oyunguka bwenene n’obusomi bwawe bw’Ebibliya.

12. Bulya gurhi Yezu adosagya Abafarizeyi erhi “ka murhasag’isoma?”

¹² Kandi Yezu adosize idoso “Ka murhasag’isoma?” ly’ayerekana entanya mbi Abafarizeyi bagwerhe lugenda ebi bakag’isoma omu Mandiko. (Mt. 12:1-7) e Muli ako kanga, Abafarizeyi baderha oku abanafunzi ba Yezu bavunyire irhegeko ly’e Sabato. Omu kubashuza, Yezu aganirira nyiganyo ibirhi z’omu Mandiko anagalukira lwandiko luguma lw’omu citabu ca Hozeya ly’ayerekana oku Abafarizeyi barhal’ihugûsirwe bulya gurhi irhegeko ly’e Sabato lyahebagwaho n’oku barhakag’iyereka abandi bantu olukogo. Bulya gurhi abo balume barhalekaga obusomi bwabo bw’Akanwa ka Nnâmahanga bubashumye? Bulya bakag’ikasoma banagwerhe enkomedu y’okuderha-derha abandi kubi n’obucibone. Eyo nkomedu yabo yakarhuma barhahugûkwa ebi bakag’isoma.​—Mt. 23:23; Yn. 5:39, 40.

13. Ntanya zihi rhushinganine rhube nazo amango rhuli rhwasoma Ebibliya, na bulya gurhi?

¹³ Enderho za Yezu zirhuyigirizize oku kuli kwa bulagirire rhukaba n’entanya nyinja amango rhuli rhwasoma Ebibliya. Lubero n’Abafarizeyi, rhugwasirwe rhukaba birhohye na babidu okuyemera okuyigirizibwa. Rhugwasirwe ‘rhukayankirira n’obwirhohye akanwa ka Nyamuzinda karhweragwa omu mirhima yirhu.’ (Yk. 1:21) Erhi rhwakaba birhohye, rhwanaleka Akanwa ka Nnâmahanga kabe n’emizi omu mirhima yirhu. Erhi rhwakayaka enkomedu y’okukaderha-derha abandi kubi n’iroho ly’obucibone lyo enyigirizo z’Ebibliya lugenda olukogo, obwonjo n’obuzigire zakarhushumya.

14. Gurhi rhwakamanyamwo erhi rhuli rhwaleka Ebibliya erhushumye? (Olole n’enfoto.)

¹⁴ Oku rhujirira abandi kwanayerekana erhi rhuli rhwaleka Akanwa ka Nnâmahanga karhushumye. Abafarizeyi barhahashaga okuleka  Akanwa ka Nnâmahanga kahume oku mirhima yabo, n’oko kwakarhuma ‘batwa olw’aberu kweru.’ (Mt. 12:7) Ko n’oko, oku nirhu rhubona abandi n’oku rhubajirira kunayerekane erhi rhwalesire Akanwa ka Nnâmahanga karhushumye erhi nanga. Kwa lwiganyo, ka rhunaganirire kanji-kanji amorhere minja g’abandi bantu erhi rhunakaba babidu okuganirira obuzamba bwabo? Ka rhunayerekane olukogo n’okuba babidu okubabalira, erhi rhunakaderha-derha abandi kubi n’okubîka akarhinda amango bamarhugokeza? Amashuzo girhu kw’ago madoso ganayerekana erhi rhuli rhwaleka ebi rhusoma bishumye entanya zirhu, oku rhuciyumva, n’ebijiro birhu erhi nanga.​—1 Tm. 4:12, 15; Hb. 4:12.

15. Gurhi Yezu akag’iciyumva lugenda Amandiko Matagatifu?

¹⁵ Yezu al’izigire Amandiko Matagatifu, n’enderho ziri omu lwandiko lw’Ennanga 40:8, Mashi Bible, zal’izaganirire gurhi Yezu akaciyumvirhe lugenda Akanwa ka Nnâmahanga. Ludesire ntya: “Nsîma okukâjira ebi walonza waliha Nnâmahanga, amarhegeko gawe aha murhima gamba.” Bulya Yezu al’izigire Amandiko, agwerhe omwishingo anakazag’ibêrwa omu kukolera Yehova. Na nirhu rhwanaba n’omwishingo n’okubêrwa erhi rhwakakasoma Akanwa ka Nnâmahanga rhunaciyigirize okukazigira.​—Enna. 1:1-3.

16. Bici wakajira ly’oyunguka bwenene n’obusomi bwawe bw’Akanwa ka Nnâmahanga? (Olole ecisanduku cidesire “ Enderho za Yezu Zanakurhabala Ohugûkwe ebi Oli Wasoma.”)

¹⁶ Lekagi rhukubûle obulenga bwirhu bw’okusoma Ebibliya omu kukulikira enderho za Yezu n’olwiganyo lwage. Rhwanahash’ikubûla obuhashe bwirhu bw’okuhugûkwa amandiko g’Ebibliya omu kukasalira, omu kukasoma rhunacirhonzire, omu kukacidosa amadoso n’okukayandika myanzi milebe. Rhwanakolesa oburhimanya omu kukalabiriza bwinja ebi rhuli rhwasoma kugerera oburhabale bw’ebicapo birhu biyimangire oku Bibliya. Rhwanaciyigiriza okukolesa Ebibliya bwinja, ciru n’amandiko g’Ebibliya rhurhaba rhuhugûsirwe bwinja, omu kukalongereza obuhirhi bw’ekiroho buli omu myanzi eganirirwe mw’ago mandiko. Kandi rhwanaleka Akanwa ka Nnâmahanga kakarhushumya omu kugendekera rhwaba n’entanya nyinja amango rhuli rhwasoma. Erhi rhwakakacihangana okujira ebyo bintu rhwaganiriraga, rhwanakayunguka bwenene n’obusomi bwirhu bw’Ebibliya kandi rhwanagendekera rhwayegera Yehova.​—Enna. 119:17, 18; Yk. 4:8.