Ebibliya eyerekine n’obwalagale oku Yehova anamanya ebyaba omu mango gayisha. (Iz. 45:21) Erhadesiri n’obwalagale ngasi kantu lugenda gurhi erhi mangaci acishoga okujira ntyo erhi ciru bintu binganaci acishoga okumanya. Co cirhumire rhurhakamanya ngasi kantu lugenda obuhashe bwa Yehova bw’okumanya ebyaba omu mango gayisha. Ciru akaba ntyo, rhuganirire bintu bisungunu rhumanyire.

Ntabyo Yehova arhakahasha okujira, ahanyuma n’ebi yene acishoga okurhajira. Kugerera obwenge bwage burhagwerhi lugero, anamanya ngasi kantu kaba omu mango gayisha, erhi akaba alonzize okujira ntyo. (Rm. 11:33) Bulya ajira oborhere bwimana bw’okucihasha, kandi anacishoga okurhamanya ebyaba omu mango gayisha.—Oshushanye na Izaya 42:14

Yehova anajire obulonza bwage buhikirizibwe. Gurhi oko kupatinemwo n’obuhashe bwage bw’okumanya ebyaba omu mango gayisha? Olwandiko lwa Izaya 46:10 luhugwîre ntya: “Kurhenga aha murhondero nnamanyise okwayishibâ, n’ebirhasagibâho, nnambe nabiderha mîra embere bwenene. Nnanderhe, nti: ‘Omuhigo gwani gwayunjula, na ngasi oku nnonzize nakujira.’”

Muli ntyo, cirhumire ciguma cakarhuma Yehova amanya ebyaba omu mango gayisha kuli kuba bulya ajira obuhashe bw’okujira ebintu bihikirire. Co cirhumire, Yehova arhaba alagirire oku kurhalukira bintu bilebe ly’amanya ebyaba omu mango gayisha nka kula rhurhalukira bintu bilebe amango rhuli rhwalola efilme lyo rhumanya ebyaba oku buzinda. Lubero n’oko, Yehova anahiga oku kantu kalebe kaba omu kasanzi kalebe na buzinda anajira ako kantu kajirikane hano ako kasanzi kahika.—Lub. 9:​5, 6; Mt. 24:36; Ebj. 17:31.

Co cirhumire, Ebibliya ekolesize enderho nka ‘kurheganya’ na ‘kuhiga’ ly’eganirira ebi Yehova ajira lugenda bintu bilebe byaba omu mango gayisha. (2 Bam. 19:​25, Mashi Bible; Iz. 46:11) Ezo nderho zahindwirwe kurhenga omu luderho lw’omu lulimi lurhangiriza lugwerhe olushangi n’oluderho luhugwîre “mubumbi.” (Yer. 18:4) Nka kula omubumbi w’obulenga akabumba ibumba cibe cirugu cilebe cinja bwenene, Yehova anabumba, erhi kujira, ebintu lyo bihikiriza obulonza bwage.—Ef. 1:11.

Yehova anakenge engalo arhuhîre y’oluhuma lw’okucishoga. Arhahiga embere z’akasanzi abyahikira ngasi muntu. Arhanalongoza abantu binja bajire kantu kalebe kabalerhera obushereze. Analeke ngasi muntu acishoge enjira yage yene, cikone ayinginzire ngasi muntu acishoge enjira nyinja.

Rhuganirire nyiganyo ibirhi. Olwiganyo lurhanzi luyerekire abantu b’e Ninawi. Yehova al’ilebire oku eyo vile yakasherezibwe enyanya z’obubi bwalimwo. Cikone erhi abo bantu baciyunjuza, Yehova “ashukira arhanacibarhumiraga obuhanya àli amahiga oku àbarhumira.” (Yon. 3:​1-10) Yehova ashanja omuhigo gwage lugenda ebi al’ihizire bulya abantu b’e Ninawi bakolesize oluhuma lwabo lw’okucishoga omu kurhumikira omwanzi gw’oburhonde Yehova abarhumiraga na muli ntyo baciyunjuza.

Olwiganyo lwa kabirhi buli bulebi lugenda omulwi w’ivita w’obuhashe wakag’ihamagalwa Sirusi, wakarhenzize Abayahudi emunda bal’ihêsirwe mpira n’okuhâna irhegeko ly’okucib’iyubaka buhyahya ehekalu ya Yehova. (Iz. 44:26–45:4) Omwami Sirusi w’e Perse ahikiriza obo bulebi. (Ezr. 1:​1-4) Cikone Sirusi arhakag’iharamya Mungu w’okuli. Yehova akolesize Sirusi ly’ahikiriza obulebi cikone amulekera oluhuma lwage lw’okucishoga ndi akaharamize.—Mig. 21:1.

Okuderha okuli, arhali ebyo bintu byone byo Yehova alola ly’amanya ebyaba omu mango gayisha. Kobinali, nta muntu yeshi-yeshi wakahugûkwa bwinja-bwinja entanya za Yehova n’ebijiro byage. (Iz. 55:​8, 9) Ciru akaba ntyo, ebi Yehova ayerekine bizibuhize obuyemere bwirhu oku ensiku zoshi anajire ebishinganine, ciru n’erhi ahiga okumanya ebyaba omu mango gayisha.