ECIGABI C’OKUYIGA CA 7
LWIMBO 51 Ninajitoa kwa Mungu!
Amasomo Rhwakaciyigiriza Kugerera Abanaziri
“Amango goshi anali munaziri, erhi anali mugoshôlere Nyamuzinda.”—MIB. 6:8, Mashi Bible.
EBI ECI CIGABI CISEGIZE
Oku olwiganyo lw’Abanaziri lwakarhurhabala rhukolere Yehova n’iroho ly’okucihâna n’oburhwali.
1. Gurhi abakozi ba Yehova baciyumva kurhenga mîra?
K’OBA oshagalukire bwenene obwîra bwawe haguma na Yehova? Kobinali oba obushagalukire! Arhanali wene oba obushagalukire. Kurhenga mîra, bantu banji bwenene banaciyumve nk’oku ociyumva. (Enna. 104:33, 34) Bantu banji baciyimire bintu binji lyo baharamya Yehova. Kobinali, ako ko kali kanga k’abantu b’omu Israheli ya mîra bakag’ihamagalwa Banaziri. Abanaziri bo bali ba ndi, na bici rhwakaciyigiriza kugerera olwiganyo lwabo?
2. (a) Abanaziri bo bali ba ndi? (Emibalè 6:1, 2) (b) Bulya gurhi Abaisraheli bakag’icishoga okujira eciragane c’Obunaziri?
2 Oluderho “Munaziri” lurhenzire omu luderho lw’ecihabraniya luhugwîre, muntu mulebe ocishozirwe, ogoshwirwe, erhi kuhânwa ly’ajira mukolo mulebe gwago-gwago. Olo luderho luhugwîre bwinja Abaisraheli b’obushiru bakag’iciyima bintu bilebe lyo bakolera Yehova omu njira yago-yago. Irhegeko lya Musa lyal’ihîre omulume erhi omukazi obulyo bw’okujirira Yehova eciragane cago-cago omu kucishoga okulama nka Munaziri kasanzi kalebe. a (Osome Emibalè 6:1, 2.) Erhi Omuisraheli akajijire eciragane c’Obunaziri, akag’irhumikira amarhegeko abandi Baisraheli barhal’ihûnyirwe okurhumikira. Bulya gurhigi Omuisraheli akacishozire okuba Munaziri? Omuisraheli wa ntyo al’ishumibwe n’obuzigire bwage bunji kuli Yehova n’okuvuga kwage Yehova omunkwa kurhenga oku murhima oku migisho yage minji.—Lush. 6:5; 16:17.
3. Ene, gurhi abakozi ba Nnâmahanga bashushinemwo n’Abanaziri?
3 Erhi “irhegeko lya Kristu” lija ahali h’Irhegeko lya Musa, ogo mupango g’Obunaziri gwahwa.” (Gl. 6:2; Rm. 10:4) Cikone, ene aka Abanaziri, abantu ba Yehova bagendekire bayerekana irala lyabo linji ly’okukolera Yehova n’omurhima gwabo goshi, obuguma-guma bwabo boshi, n’obukengere bwabo boshi, n’emisi yabo yoshi. (Mk. 12:30) Oku bulonza bwirhu, rhunajire eciragane c’okujira ntyo erhi rhucihâna emwa Yehova. Okulama kushimbana n’eco ciragane kuba kuhiziremwo okurhumikira obulonza bwa Yehova n’okuciyima binji lyo rhumukolera. Omu kuganirira gurhi Abanaziri bakag’ilama kushimbana n’eciragane cabo, rhwanaciyigiriza amasomo g’obulagirire lugenda gurhi nirhu rhwakalama kushimbana n’eciragane cirhu. b (Mt. 16:24) Lekagi rhuganirire nyiganyo nguma na nguma.
OBE MUBIDU OKUCIYIMA BINTU BILEBE
4. Kushimbana n’Emibalè 6:3, 4, gurhi iroho ly’okuciyima ly’Abanaziri ly’akag’irhangulwamwo?
4 Osome Emibalè 6:3, 4. Abanaziri barhal’iyemerirwe okunywa amamvu, n’okulya bintu bilebe nk’emizabibu mibishi n’emyumu. Abantu bali bazungulusire bohe bakag’ishagalukira ebyo biryo ngasi mango, banal’ishinganine okujira ntyo bulya ebyo biryo birhali bibi. Ebibliya edesire oku idivayi eba ngalo kurhenga emwa Nnâmahanga, enadesire oku ‘linahiremwo omuntu orukara [obushagaluke].’ (Enna. 104:14, 15) Ciru akaba ntyo, Abanaziri bakag’ileka okushagalukira ebyo bintu oku bulonza bwabo. c
K’oba mubidu ociyima bintu bilebe, nk’oku Abanaziri bakag’ijira? (Olole ecifungo ca 4-6)
5. Gurhi Madián na Marcela baciyimiremwo, na bulya gurhi?
5 Aka Abanaziri, nirhu rhunaciyime bintu binji lyo rhujira binji omu mukolo gwa Yehova. Rhuganirire olwiganyo lwa Madián na Marcela. d Oyo mulume na mukage bal’igwerhe akalamo kinja. Madián al’igwerhe akazi kinja kakag’ibahashisa okulipira enyumpa nyinja bakag’ilamamwo. Ciru akaba ntyo, balonza okujira binji omu mukolo gwa Yehova. Lyo bahikira ogo muhigo, bahiga okujira mpindulo ndebe. Badesire ntya: “Rhwarhondera okukolesa nsaranga nsungunu kulusha ezi rhwakag’ikolesa, rhwahamira omu nyumpa nsungunu, rhwanaguza omutuga gwirhu.” Madián na Marcela barhal’ihûnyirwe okujira ezo mpindulo, cikone bacishoga okuzijira bulya okujira ntyo kwakabahash’isize bajire binji omu mukolo gwa Yehova. Bali baciyumva barhimusirwe banagwerhe omwishingo enyanya z’emihigo barhôzire.
6. Ene, bulya gurhi Abakristu baciyima bintu bilebe? (Olole n’enfoto.)
6 Ene, Abakristu banabe n’omwishingo omu kuciyima bintu bilebe lyo bakolesa kasanzi kanji omu mikolo y’eciteokrasi. (1 Kr. 9:3-6) Yehova arharhuhûna rhuciyime bintu bilebe; n’ebyo bintu rhwakaciyima birhaba bibi. Kwa lwiganyo, baguma na baguma banabe babidu okuleka enyumpa yabo, erhi omukolo basima. Banji bacishozire okurhang’ibêra balamba erhi kurhaburha abana enyuma z’okuja omu buhya. Abandi bacishozire okukolera ahali obulagirire bunji bw’abahubiri, ciru akaba oko kuhûnyire okulama kulî n’abîra babo n’abantu b’omulala gwabo. Banji muli rhwe baciyimire n’obulonza ebintu biri nk’ebyo bulya balonzize okukolera Yehova n’obuhashe bwabo boshi. Oyemere n’obwalagale oku Yehova anashagalukire ngasi kantu ocishozire okuciyima, kabe kanene erhi kasungunu, ly’omukolera.—Hb. 6:10.
OBE MUBIDU OKUBA LUBERO
7. Nkaba mazibu gahi Omunaziri akag’ilwisa omu kuhikiriza eciragane cage? (Emibalè 6:5) (Olole n’enfoto.)
7 Osome Emibalè 6:5. Abanaziri bakag’ijira eciragane c’okurhamomwa emviri zabo. Eyo yali njira y’okuyerekana oku bacihanyire okurhumikira Yehova loshi-loshi. Erhi Omuisraheli akabire Munaziri kasanzi kanji, emviri zage zakabire ndîri n’abandi bakabwine ntyo buzira mazibu. Erhi abandi bantu bakakenzire Omunaziri n’okumuha omurhima agendekere akenga eciragane cage, kwakabire kulembu kuli ye okuba lubero. Cikone, eby’okugayisa kuli kubona oku hali amango Abanaziri barhal’ikenzirwe erhi kulungwa okuboko omu Israheli. Omu nsiku z’omulebi Amosi, Abaisraheli bagoma ‘bakanywesa abanya-ciragâne,’ nkaba lyo babajira bavune eciragane cabo c’okurhanywa amamvu. (Am. 2:12) Ago mango, byal’ihûnyire Omunaziri abe n’oburhwali bunji ly’agendekera akenga eciragane cage n’okugendekera aba lubero n’abandi.
Omunaziri wali mwishwekerezi oku ciragane cage ali mubidu okuba lubero n’abandi bantu (Olole ecifungo ca 7)
8. Gurhi olwiganyo lwa Benjamin lukuhîremwo omurhima?
8 Kugerera oburhabale bwa Yehova, nirhu rhwanaba n’oburhwali bw’okuba lubero n’abandi ciru akaba rhuba ba nshonyi. Rhuganirire olwiganyo lwa Benjamin, Muhamirizi wa myaka ikumi w’omu cihugo c’e Norvège. Enyanya z’ivita lyali omu Ukraine, amasomo gabo gajira olusiku lukulu lw’okuyerekana oku balunzire okuboko abantu b’omu Ukraine. Abana bahûnwa bayimbe olwimbo erhi banayambirhe emishangi y’irangi ly’ecihugo c’e Ukraine. Lyo Benjamin ayaka okucilunga kw’olo lusiku lukulu, ayimanga kulî n’abandi. Cikone, mwalimu muguma amubona anamuyakuza ntya: “Ogwasirwe oyishe ocilunge haguma na nirhu. Rhweshi rhuli rhwakulinda!” Benjamin ayegera mwalimu n’oburhwali amubwira ntya: “Ntalunga okuboko oluhande loshi-loshi, ntanacilunga omu by’epolitike. Kobinali, Bahamirizi ba Yehova banji bali omu prizo enyanya z’okulahira okuja oku ivita.” Mwalimu ayemera ago mahugûlo gage anamuyemerera arhacilunganga kw’ebyo by’olusiku lukulu. Cikone, ababo banafunzi barhondera okudosa bulya gurhi arhacilunganga haguma nabo. Benjamin ayoboha bwenene analonz’ilaka; ciru akaba ntyo, abwira n’oburhwali ababo banafunzi boshi ebi abwiraga mwalimu. Buzinda, Benjamin abwira ababusi bage oku aciyumvirhe oku Yehova ye wamurhabire ly’ahalira obuyemere bwage.
9. Omu njira nci rhwakashagalusamwo omurhima gwa Yehova?
9 Bulya rhunacishoge okurhumikira obulonza bwa Yehova, abandi bantu banabone oku rhuli lubero nabo. Rhuba rhulagirire oku burhwali lyo rhucimanyisa oku rhuli Bahamirizi ba Yehova ebwa kazi erhi ebwa masomo. Oku entanya n’olugenzi lw’abantu b’er’igulu byagendekera byaba bibi bwenene, ko kwanagendekera kwaba kuzibu bwenene kuli rhwe okulama kushimbana n’amakanuni g’Ebibliya n’okuganirira abandi omwanzi mwinja. (2 Tm. 1:8; 3:13) Cikone, ensiku zoshi okengere oku ‘rhunashagaluse omurhima gwa [Yehova]’ erhi rhuba n’oburhwali bw’okuba lubero n’abandi bantu barhamukolera.—Mig. 27:11; Mal. 3:18.
OHIRE YEHOVA OKU NAFASI NTANZI OMU KALAMO KAWE
10. Nkaba gurhi okurhumikira irhegeko liri omu Emibalè 6:6, 7 kwakabire irhangulo oku Banaziri?
10 Osome Emibalè 6:6, 7. Abanaziri barhakayegire amayiti. Nkaba, orharhanyizi oku oko kwali kuciyima bwenene. Cikone omu mango ga mîra, Omunaziri akabwine oku er’irhegeko lyali lizibu bwenene erhi omuntu w’omu mulala gwage gwa hofi-hofi akafîre. Enkomedu z’okubisha z’ago mango zal’ihiziremwo okuba hofi n’amayiti. (Yn. 19:39, 40; Ebj. 9:36-40) Eciragane c’Omunaziri cakarhumire arhakulikira ezo nkomedu. Ciru n’amango Abanaziri bakag’iba bali omu bintu by’omulala amango g’amababale manji, bakag’iyerekana obuyemere buzibu omu kugendekera bakenga eciragane cabo. Kobinali Yehova akag’iha abo bakozi bage bishwekerezi emisi lyo balembera amazibu bakag’irhimanana nago.
11. Bici Omukristu agwasirwe ahige okujira omu kanga kayerekire eby’omulala? (Olole n’enfoto.)
11 Rhuli Bakristu, rhunarhôle kwa buzibu-zibu eciragane cirhu c’okucihâna emwa Yehova. Oko kunahume oku mihigo yirhu n’ebijiro birhu lugenda ebintu biyerekire omulala. Rhunajire okwirhu koshi lyo rhushibirira amalagirire g’abantu b’omulala gwirhu, cikone ensiku zoshi rhunashokoze ebi Yehova arhuhûnyire ahali h’okushokoza obulonza bw’abantu b’omulala gwirhu. (Mt. 10:35-37; 1 Tm. 5:8) Cikone, hali amango oko kwakarhuma rhurhaba n’omurhûla haguma n’abantu b’omulala gwirhu lyo rhushagalusa Yehova.
K’oba mubidu okuhira obulonza bwa Yehova oku nafasi ntanzi ciru n’omu kanga kazibu bwenene? (Olole ecifungo ca 11) e
12. Amango Alexandru akag’ishibibira akanga kazibu omu mulala gwage, bici ajijire na bici arhajiraga?
12 Rhuganirire ebyahikiraga Alexandru na mukage, Dorina. Enyuma z’oyo mulume na mukage okuyiga Ebibliya mwaka muguma, Dorina ahiga okuleka, analonza iba Alexandru naye aleke. Cikone omu njira y’obutûdu n’obulenga Alexandru amubwira oku alonzize agendekere. Dorina arhashagalukiraga oko analonza okuseza iba aleke okuyiga Ebibliya. Alexandru adesire oku akag’icihangana okuhugûkwa oku mukage akag’iciyumva, cikone oko kurhali kulembu kuli ye. Mango maguma na maguma, erhi Dorina akamuderha-derha kubi n’okumushuza n’obukali, akayumva nk’aleke okuyiga Ebibliya. Ciru akaba ntyo, Alexandru agendekera omu kuhira Yehova oku nafasi ntanzi, amango goshi akayeresa mukage buzigire bunji n’obukenge. Buzinda, olwiganyo lwage lwinja lwashumya mukage acib’irhondera okuyiga Ebibliya, n’enyuma z’aho aja omu okuli.—Olole oku jw.org evideo edesire, Alexandru na Dorina Văcar: “Upendo ni wenye Uvumilivu na wenye Fazili” omu mwanzi gudesire, “Kweli Inabadilisha Maisha.”
13. Gurhi rhwakayerekamwo obuzigire bwirhu kuli Yehova n’oku mulala gwirhu?
13 Yehova ye warhondezagya omulala, anaba alonzize rhube n’omwishingo omu mulala. (Ef. 3:14, 15) Erhi akaba rhulonzize rhube n’omwishingo g’okunali, rhushinganine rhujire ebintu nk’oku Yehova alonzize. Oyemere n’obwalagale oku Yehova aba ashagalukire ebi ociyima ly’omuharamya amango oli washibirira omulala gwawe n’okubajirira omu njira y’obuzigire n’obukenge.—Rm. 12:10.
RHUKAHANANA OMURHIMA OKUBA AKA ABANAZIRI
14. Bantu bahi bwenene rhukwanine rhucihangane okuha omurhima kugerera enderho zirhu?
14 Abantu boshi bacishoga okuharamya Yehova ene bashinganine babe babidu okuciyima bintu bilebe eyanya z’obuzigire bwabo kuli ye. Hali amango okujira ntyo kuba kuzibu. Gurhi rhwakarhabala abandi lyo bakayerekana iroho lya ntyo? Omu kuba ba kuhânana omurhima kugerera enderho zirhu. (Ayu. 16:5) Ka hali bantu balebe omu cigamba cinyu bali bacihangana okuba n’akalamo karhahûnyiri bintu binji lyo bacihâna bwenene omu mikolo y’eciteokrasi? Ka hali emisole omanyire eri yayerekana oburhwali bw’okuba lubero n’abandi ebwa masomo, ciru akaba kuli kuzibu kuli bo okujira ntyo? Ka hali abanafunzi b’Ebibliya erhi abinyu bemezi bali bacihangana okugendekera babêra bishwekerezi amango bali bahagalikwa n’omulala gwabo? Lekagi rhukolese ngasi bulyo rhwakaba nabo, lyo rhubwira abo birhu bemezi bazigirwa enderho z’okuhâna omurhima omu kubayeresa oku rhushagalukire iroho lyabo ly’okucihâna n’oburhwali bwabo.—Fm. 4, 5, 7.
15. Gurhi bantu baguma na baguma barhabiremwo abali omu mukolo gw’akasanzi koshi?
15 Mango maguma na maguma, rhwanaba n’obuhashe bw’okuha abirhu bemezi bali omu mukolo gw’akasanzi koshi oburhabale balagirireko. (Mig. 19:17; Hb. 13:16) Elyo lyo lyali irala ly’okurhenga oku murhima lya mwali wirhu muguma mwishwekerezi okola mugikulu olama omu Sri Lanka. Erhi ahâbwa ensaranga bamuyushuliraga oku pansiyo yage alonza okurhabala bali birhu babirhi bapainiya baciri misole lyo bagendekera omu mukolo gwabo ciru akaba bal’igwerhe amazibu g’okubula ensaranga. Ahiga okukabaha nsaranga ndebe ngasi mwezi lyo zibarhabala balipe e dépenses z’etelefone zabo. Oyo mwali wirhu ali ayerekana iroho linja bwenene!
16. Bici rhwakaciyigiriza kugerera eciragane c’Abanaziri b’omu mango ga mîra?
16 Kobinali, rhwanaciyigiriza binji kugerera olwiganyo lwinja lw’Abanaziri ba mîra! Cikone, kandi eciragane c’Abanaziri canarhuyigiriza kantu kalebe lugenda Larha wirhu w’omu mpingu, Yehova. Aba ayemire n’obwalagale oku rhuba rhulonzize okumushagalusa n’omurhima gwirhu goshi n’oku rhuba babidu okuciyima bintu bilebe lyo rhulama kushimbana n’eciragane cirhu c’okucihâna emwage. Anarhuyerese obukenge omu kurhuha obulyo bw’okucishoga okuyerekana obuzigire bwirhu kuli ye. (Mig. 23:15, 16; Mk. 10:28-30; 1 Yn. 4:19) Eciragane c’Abanaziri ciyerekine oku Yehova anabone n’okushagalukira ebi rhuciyima lyo rhumukolera. Lekagi rhuhige okugendekera rhwakolera Yehova, omu kumuha n’obulonza ebintu birhu binja.
GURHI WAKASHUZAGYA?
-
Omu nijira nci Abanaziri bakag’iyerekanamwo oku bal’igwerhe iroho ly’okucihâna banali ba burhwali?
-
Ene, gurhi rhwakahânanamwo omurhima okuyerekana iroho liri nk’elya Abanaziri?
-
Bici eciragane c’Abanaziri ciyerekine Yehova aba ayemire lugenda abakozi bage?
LWIMBO 124 Tukuwe Washikamanifu
a Ciru akaba Yehova ye wacishogaga bantu balebe oku babe Banaziri, banji muli bo bali Baisraheli bal’icihânyire n’obulonza okukola nka Banaziri omu kasanzi kalebe.—Olole ecisanduku cidesire “ Abanaziri Yehova Acishogaga.”
b Hali amango ebicapo birhu byashushanyize Abanaziri n’abali omu mukolo gw’akasanzi koshi. Cikone mw’eci cigabi, rhwasegeza gurhi abakozi ba Yehova boshi bacihânyire emwage bakayerekanamwo iroho ly’Obunaziri.
c Omu kanga kanji, nta bindi Omunaziri al’ihûnyirwe ajire, kwa lwiganyo nka mukolo mulebe, ly’ahikiriza eciragane cage.
d Oku jw.org, olole ecigabi cidesire “Rhwahiga Okulama Akalamo Karhahûnyiri Bintu Binji” omu mwanzi gudesire, “Ebyabwinwe n’Abahamirizi ba Yehova.”
e AMAHUGÛLO G’ENFOTO: Kurhenga oku nyanya z’enyumpa, Omunaziri ali alola abaj’ibisha omuzigirwa w’omu mulala gwabo. Enyanya z’eciragane cage, arhakacilunga haguma n’abo bantu.
