1-2. Bici byakarhurhabala lyo rhuhugûkwa oku Yehova aciyumva enyanya z’obunywesi Shetani amuderhire?

 ORHANYE kuli oku: Muntu mulebe ob’oshibirire aderhe kantu kalebe kabi kuli we. Omanyire oku ebi anaderhaga buli bunywesi, cikone bantu baguma na baguma babuyemire. N’akantu k’okugayisa bwenene, abo bantu bayemire obo bunywesi barhondere babuderha-derha, na bandi bantu banji babuyemere. Gurhi wakaciyumva? Erhi akaba onashibirire abantu n’irenge lyawe, oyo kakoza anarhuma waciyumva kubi, k’arhali ntyo?—Mig. 22:1.

² Ako kanga kanarhurhabala rhuhugûkwe gurhi Yehova aciyumvirhe erhi bamuhegeza irenge. Muguma w’omu bana bage b’ekiroho abwira omukazi murhangiriza, Eva, obunywesi lugenda Yehova, naye anabuyemera. Enyanya z’obo bunywesi, ababusi birhu barhangiriza bagomera Yehova. Oko kwalerhera bene bantu boshi ecaha n’olufû. (Murh. 3:1-6; Rm. 5:12) Amazibu goshi rhuli rhwabona ene omw’igulu, nk’olufû, amavita, n’amalibuko, gadwirhwe n’obo bunywesi Shetani arhonderaga okuderha omw’ishwa ly’e Edeni. Ka Yehova anaciyumve kubi enyanya z’obo bunywesi n’amazibu bwadwirhe? Neci, buzira karhinda. Ciru akaba ntyo, Yehova arhaba wabukunizi erhi wakubîka akarhinda. Lubero n’oko, agendekire okuba “Nnâmahanga w’omwishingo.”—1 Tm. 1:11, NWT.

3. Lukengwa luhi rhugwerhe?

³ Rhugwerhe olukengwa lw’okushangira okuhalira izino lya Yehova omu kurhumikira er’irhegeko lilembu: “Mukuze izino lya Nyakasane [Yehova, NWT].” (Enna. 113:1) Rhunajire ntyo omu kuderha bwinja lugenda nna er’izino litagatifu. Ka nawe wakuza izino lya Yehova? Lekagi rhuganirire birhumire bisharhu binja byakarhushumya rhukuze izino lya Nnâmahanga wirhu n’omurhima goshi.

 RHUNASHAGALUSE YEHOVA ERHI RHUKUZA IZINO LYAGE

4. Bulya gurhi Yehova anashagaluke erhi rhumukuza? Ohâne olwiganyo. (Olole n’enfoto.)

⁴ Rhunashagaluse Larha wirhu w’omu mpingu erhi rhukuza izino lyage. (Enna. 119:108) Ka kuli kuderha oku Nnâmahanga wirhu ogala-byoshi aba aka bene bantu barhali bimana baba balonzize okukuzibwa lyo bahâbwa omurhima? Nanga. Rhuganirire lwiganyo lulebe. Orhanye ehyana-nyere hilibirhire emunda ishe ali himuhobere hinaderhe ntya: “We ba mubusi mwinja omw’igulu lyoshi!” Oyo mubusi amashagaluka ciru n’okuhumwa oku murhima n’eco cijiro arhal’icirheganyizeko. Bulya gurhi? Ka bulya alagirire oku kuhâbwa omurhima n’okukuzibwa n’oyo mwali? Nanga. Lubero n’oko, rhulangalire oku ali mulume w’obuhashe oshagalukire okubona oyo mwali amuyeresa obuzigire n’okumuyereka oku amuvuzire omunkwa. Amanyire oku ago morherhe ga ntyo gamurhabala abe muntu wa mwishingo oku agendekire akula. Ak’oyo mubusi, Larha wirhu mukulu bwenene Yehova anashagaluke erhi rhumukuza.

5. Erhi rhukuza izino lya Nnâmahanga, bici Shetani adesire rhwakayerekana oku biri bya bunywesi?

⁵ Erhi rhukuza Larha wirhu w’omu mpingu, rhunarhabale okuyerekana oku ebi Shetani aderheraga ngasi muguma wirhu biba bya bunywesi. Shetani aderha oku nta muntu wakahalira n’obwishwekerezi izino lya Nnâmahanga. Aderha oku nta mwene muntu wakabêra mwishwekerezi kuli Nnâmahanga amango ali omu marhangulo. Aderha oku rhweshi rhwanaleka okukolera Nnâmahanga erhi rhwakabona oku oko kwarhulerhera obunguke. (Ayu. 1:9-11; 2:4) Cikone Ayubu omu kugendekera abêra mwishwekerezi kuli Nnâmahanga, ayerekana oku Shetani ali munywesi. Ka nawe wagendekera wabêra mwishwekerezi kuli Nnâmahanga? Ngasi muguma wirhu agwerhe olukengwa lw’okuhalîra izino lya Nnâmahanga wirhu n’okumushagalusa omu kumukolera n’obwishwekerezi. (Mig. 27:11) Kobinali luli lukengwa okujira ntyo.

6. Gurhi rhwakayigamwo olwiganyo lwa Mwami Daudi n’Abalevi? (Nehemiya 9:5)

⁶ Okuzigira Nnâmahanga kunashumye abantu bishwekerezi bakuze izino lyage n’omurhima gwabo goshi. Mwami Daudi ayandisire ntya: “Murhima gwani kuza Nyamuzinda, ebindi oku ndubi y’omurhima bikuze izino lyage.” (Enna. 103:1) Daudi al’ihugusirhwe oku okukuza izino lya Yehova kuli kumukuza ye nnene. Izino lya Yehova lihiziremwo irenge lyage, co cirhumire linarhume rhwarhanya oku morhere gage minja goshi n’ebijiro byage binja bwenene. Daudi al’ilonzize abone izino ly’ishe nka litagatifu n’okulikuza. Al’ilonzize okujira ntyo  kugerera ebyamuli oku ‘ndubi y’omurhima,’ ko kuderha n’omurhima gwage goshi. Ko n’oko Abalevi bakagilongoza abandi omu kukuza Yehova. Bal’iyemire n’obwirhohye oku enderho zabo zirhakahash’iriyerekana cirhu n’ehitya obukuze izino lya Yehova lishinganine. (Osome Nehemiya 9:5.) Buzira karhinda, obo bukuze bw’obwirhohye na bwa kurhenga oku murhima bwashagalusize Yehova.

7. Gurhi rhwakakuzamwo Yehova omu mukolo gwirhu gw’amahubiri n’omu kalamo kirhu ka ngasi lusiku?

⁷ Ene, rhwanaganirira abandi lugenda ye omu njira eyerekine kunganaci rhumuvuzire omunkwa na kunganaci rhumuzigire. Amango rhuli omu mukolo gw’amahubiri, omuhigo gwirhu mukulu kuli kurhabala abantu bayegere Yehova n’okukabona Larha wirhu w’obuzigire nk’oku rhumubona. (Yk. 4:8) Rhunashagalukire okuyereka abantu gurhi Ebibliya eba eganirire Yehova omu kuyerekana obuzigire, obushinganyanya, obwenge bwage, emisi yage n’agandi morhere gage minja. Kandi rhunakuze Yehova n’okumushagalusa omu kujira okwirhu koshi lyo rhuyiga olwiganyo lwage. (Ef. 5:1) Erhi rhujira ntyo, abandi banabona oku rhuli lubero n’abandi bantu ba mwer’igulu libi nkaba bananacidosa bulya gurhi. (Mt. 5:14-16) Na ntyo, omu kalamo kirhu ka ngasi lusiku haguma nabo rhwanahasha okubahugûlira bulya gurhi rhujijire ebintu omu njira ndebe. N’oko kwanarhuma abantu b’emirhima minja bayegera Nnâmahanga wirhu. Erhi rhukuza Larha wirhu mw’ezo njira, rhunashagaluse omurhima gwage.—1 Tm. 2:3, 4.

RHUNASHAGALUSE YEZU ERHI RHUKUZA IZINO LYA YEHOVA

8. Gurhi Yezu ayerekinemwo olwiganyo lwinja lw’okukuza izino lya Yehova?

⁸ Omu mpingu na hano igulu, ntaye omanyire Yehova bwinja kulusha Yezu. (Mt. 11:27) Yezu aba azigire ishe, anayerekine olwiganyo omu kukuza izino lyage. (Yn. 14:31) Omw’isala ashengaga Yehova omu budufu bw’embere z’okufâ kwage, aganirire kwa bofofi ebi ahikirizize amango g’omukolo gwage hano igulu, aderha ntya: “Nabamanyisize izino lyawe.” (Yn. 17:26) Gurhi Yezu ajijiremwo ntyo?

9. Lwiganyo luhi Yezu akolesize ly’ahugûla omu njira y’obwalagale bwenene oku Ishe ayorha?

⁹ Yezu ajijire binji ahanyuma n’okumanyisa abantu kone oku Yehova ly’izino lya Mungu. Abayahudi Yezu akag’iyigiriza bal’ikola bamanyire izino lya Mungu. Cikone Yezu ayerekine olwiganyo bulya “ye warhumanyisagya ye.” (Yn. 1:17, 18) Kwa lwiganyo, Amandiko g’Ecihabraniya gayerekine oku Yehova aba wa lukogo na wa bwonjo. (Lub. 34:5-7) Yezu ahugwîre oko okuli n’obwalagale kulusha agandi mango goshi erhi aganirira olwiganyo lw’omwana mulalahi n’ishe. Erhi rhusoma lugenda gurhi oyo mubusi alangiraga omugala wal’iciyunjuzize “erhi aba aciri kuli,” gurhi alibirhaga ly’arhimanana naye, amuhôbera n’okumubabalira n’omurhima gwage goshi, rhunahugûkwe kunganaci Yehova aba wa lukogo na wa bwonjo. (Lk. 15:11-32) Yezu ayerekine gurhi Ishe ayorha kobinali.

10. (a) Gurhi rhumanyiremwo oku Yezu akolesize izino ly’Ishe anal’ilonzize abandi bakalikolesa? (Marko 5:19) (Olole n’enfoto.) (b) Bici Yezu alonzize rhujire ene?

¹⁰ Kandi, ka Yezu al’ilonzize abandi bakakolesa izino ly’Ishe? Neci. Ago mango birongozi biguma na biguma by’amadîni nkaba byal’iyemire oku izino lya Mungu lirhakaderhwa bulya liri litagatifu bwenene, cikone Yezu arhalekaga ciru n’ehitya ezo nyigirizo zirhapatini n’Amandiko zirhume arhakuza izino ly’Ishe. Rhuganirire amango Yezu akûlagako mulume muguma abazimu omu eneo y’Abajerazeni. Abantu bayoboha bwenene banahûna Yezu agende, na ntyo arhabêraga mw’eyo eneo. (Mk. 5:16, 17) Cikone, Yezu al’ilonzize izino lya Yehova limanyikane mw’eyo eneo. Co cirhumire Yezu arhahûnaga  oyo muntu akulagako abazimu aganirire abantu ebi Yezu anamujirire cikone ebi Yehova anamujirire. (Osome Marko 5:19.) a Ene ntyo ko analonzize: alonzize rhumanyise izino ly’Ishe omw’igulu lyoshi! (Mt. 24:14; 28:19, 20) Erhi rhujira ntyo, rhunashagaluse Yezu, Mwami wirhu.

11. Bici Yezu ayigirizize abanafunzi bage bakasalira, na kushimbana na Ezekiyeli 36:23, bulya gurhi oko kuli kwa bulagirire?

¹¹ Yezu al’imanyire oku omuhigo gwa Yehova guba gwa kucesa izino lyage, ko kuderha kulikûlako izinga lyoshi. Co carhumaga Nawirhu ayigiriza abanafunzi bage bakasalira ntya: “Larha, oli omu mpingu, Izino lyawe likuzibwe [licesibwe, NWT].” (Mt. 6:9) Yezu al’ihugûsirwe oku ako kali kantu k’obulagirire kayerekire ebiremwa byoshi. (Osome Ezekiyeli 36:23.) Nta ciremwa c’obwenge omu mpingu na hano igulu cisag’ijira binji omu kucesa izino lya Yehova aka Yezu. Ciru akaba ntyo, erhi Yezu agwarhwa, caha cihi abashombanyi bage bamushobesire? Kujacira Nnâmahanga! Yezu akag’ibona oku okukolesa izino ly’Ishe kubi erhi kulizinza cali caha cizibu bwenene. Yezu ababire bwenene okubona oku bakamushobesire eco caha banamutwira olubanja oku eco co caha anajijire. Nkaba eco co cirhumire cikulu carhumaga Yezu ‘agogomerwa n’oburhe’ omu nsa z’embere agwarhwe.—Lk. 22:41-44.

12. Omu njira ehi nkulu bwenene Yezu acesizemwo izino ly’Ishe?

¹² Ly’acesa izino ly’Ishe, Yezu alembire amalibuko ga ngasi lubero, okujacirwa n’obunywesi bamushobekaga. Bulya al’imanyire oku arhumikire Ishe omu bintu byoshi, al’imanyire oku ntaco cakarhumire ayumva enshonyi. (Hb. 12:2) Na kandi al’imanyire oku Shetani akag’imurhera omu njira y’obwalagale mw’ako kasanzi kazibu alimwo. (Lk. 22:2-4; 23:33, 34) Kobinali Shetani al’ilangalire oku akajijire Yezu aleke obwishwekerezi bwage; cikone, Shetani ayabirwa loshi-loshi! Yezu ayerekine loshi-loshi oku Shetani aba munywesi nkununu n’oku Yehova ajira abakozi bage bishwekerezi, bagendekera babêra bishwekerezi ciru n’omu mango bali omu marhangulo madarhi bwenene!

13. Gurhi wakashagalusamwo Mwami wawe oli warhegaka?

¹³ K’olonzize okushagalusa Mwami wirhu oli  warhegeka? Ogendekere wakuza izino lya Yehova omu kurhabala abandi bamanye amorhere gage minja. Omu kujira ntyo, wanaba oli wakulikira enshando za Yezu. (1 Pt. 2:21) Aka Yezu, oli washagalusa Yehova, onali wayerekana oku omushombanyi wage Shetani aba munywesi nkununu!

ERHI RHUKUZA IZINO LYA YEHOVA, RHUNARHABALE OKUYOKOLA OBUZINE BW’ABANTU

14-15. Malehe gahi minja bwenene okuyigiriza abantu lugenda Yehova kwakalerha?

¹⁴ Erhi rhukuza izino lya Yehova, rhunarhabale okuyokola obuzine bw’abantu. Omu njira nci? Kobinali, “balya barhayemera [Shetani] ahûsize obukengere” bwabo. (2 Kr. 4:4) N’oko kwarhumire bayemera obunywesi bwa Shetani buli nk’obu: Mungu arhahaba, Mungu aba kuli na nirhu arhanashibirira bene bantu, Mungu arhajira bwonjo ananalibuze abanyabyaha ensiku nʼamango. Shetani anaderhe obo bunywesi bulya aba alonzize kone okuzinza izino lya Yehova n’okujira abantu barhabaga n’irala ly’okuyegera Yehova. Cikone omukolo gwirhu gunarhume Shetani ayabirwa okuhikiriza ogo muhigo gwage. Rhunayigirize abantu okuli lugenda Larha wirhu, omu kujira ntyo rhunakuze izino lya Nnâmahanga wirhu. Malehe gahi oko kulerha?

¹⁵ Enyigirizo z’okuli z’Akanwa ka Nnâmahanga zijira buhashe bunji. Omu kuyigiriza abantu okuli lugenda Yehova n’oku ayorha kobinali, rhunabe n’amalehe minja bwenene. Aba Shetani ahûsize banayiguke amasu bunyi-bunyi bananarhondere babona amorhere minja ga Larha wirhu. Banasomerwe bwenene n’obuhashe bwage burhakagerwa. (Iz. 40:26) Banaciyigirize okumulangalira enyanya z’obushinganyanya bwage bwimana. (Lush. 32:4) Banaciyigirize binji bwenene kugerera obwenge bwage bunji. (Iz. 55:9; Rm. 11:33) Bananarhulirizibwe omu kuyiga oku aba buzigire. (1 Yn. 4:8) Erhi bagendekera bayegera Yehova obulangalire bwabo bw’okulama ensiku n’amango nka bana bage bunahikire aha bwaba bw’okunali. Luli lukengwa lunene bwenene kuli rhwe okurhabala abantu bayegere Larha wirhu! Erhi rhujra ntyo, Yehova anabone oku ‘kugwasa rhuli rhwamugwasa.’—1 Kr. 3:5, 9.

16. Gurhi bantu baguma na baguma bahumwa oku murhima erhi bamanya izino lya Mungu? Ohâne enyiganyo.

 ¹⁶ Oku murhondero, nkaba rhwanayigiriza kone abantu oku izino lya Mungu ye Yehova. Oko kone kwanahuma oku murhima gw’omuntu ogwerhe omurhima mwinja. Kwa lwiganyo, mwana-nyere muguma ohamagwalwa Aaliyah b akuliraga omu mulala gurhali gw’Ecikristu. Cikone arhakag’iciyumva arhimusirwe n’idîni lyage arhanakag’iciyumva ayegerire Nnâmahanga. Cikone enyuma z’okurhondera ayiga Ebibliya haguma n’Abahamirizi ba Yehova, arhacikag’iciyumva ntyo. Arhondera okubona Nnâmahanga nka mwîra wage. Anasomerwa okumanya oku izino lya Mungu lyarhenzibwe omu Bibliya nyinji n’aha lyali bahiraho amazino g’obukulu nka Nyakasane. Okumanya izino lya Yehova kwashanja akalamo kage. Aderha ntya: “Omwîra wani mwinja bwenene ajira izino!” Malehe gahi oko kwamudwirire? Adesire ntya: “Ene nkola mba ngwerhe murhûla munji omu murhima gwani. Nanciyumve ngishirwe bwenene okumanya izino lya Yehova.” Mulume muguma ohamagalwa Steve ali muzihi w’omuziki wakuliraga omw’idîni ly’Eciyahudi anal’icishwekire bwenene oku nkomedu z’er’idîni lyage. Arhakag’ilonza okuja omu lindi idîni bulya akag’ibona bulyalya bunji omu madîni. Cikone, enyuma z’okufâ kwa nnina, ayemera okucilunga okw’ifunzo l’Ebibliya lyakag’ilongozibwa n’Omuhamirizi wa Yehova. Okumanya izino lya Nnâmahanga kwamuhuma oku murhima bwenene. Adesire ntya: “Ntalisag’iyumva izino lya Nnâmahanga.” Acibir’iderha ntya: “Bo bwali burhanzi nahugûkwa oku ho Nnâmahanga aba! Namubona nka muntu w’okunali. Ago mango namanya oku napasire omwîra.”

17. Bulya gurhi ohizire okugendekera wakuza izino lya Yehova? (Olole n’enfoto.)

¹⁷ Omu mukolo gwawe gw’okuhubiri n’okuyigiriza, k’onaganirire abantu izino litagatifu lya Yehova? K’onabarhabale babone gurhi Nnâmahanga wirhu ayorha kobinali? Omu kujira ntyo, onakuze izino lya Nnâmahanga. Ogendekerage wakuza izino litagatifu lya Yehova omu kurhabala abantu bamanye nna er’izino. Omu kujira ntyo, wayokola obuzine bw’abantu. Wanaba oli wakulikira obulogonzi bwa Yezu Kristu, Mwami wawe. Na kulusha byoshi, washagalusa Yehova Sho w’obuzigire. Ogendekerage ‘wakûza izino lyage ensiku zoshi n’emyaka n’emyaka’!—Enna. 145:2, Mashi Bible.