1. Mangaci Abakristu bashige amavurha boshi baba bakola bali empingu?

 OMU myaka milebe egezire, abakozi ba Yehova bacidosize ntya: ‘Mangaci Abakristu bashige amavurha bazinda banahêkwe empingu?’ Hali amango rhwakag’irhanya oku nkaba Bakristu balebe bashige amavurha bayish’ibêra omu igulu Paradizo kasanzi kalebe enyuma z’ivita lya Har-magedoni. Cikone omw’Ilabiro ly’Akalalizi ly’omu nsiku 15/7/2013, rhwayizire oku Abakristu bashige amavurha bayish’iba baciri hano igulu boshi bayish’ihêkwa empingu embere ivita lya Har-magedoni lirhondere.—Mt. 24:31.

2. Idoso lihi rhwakacidosa, na bici rhwaganirira mw’eci cigabi?

² Cikone, baguma muli rhwe banacidosa ntya: Bici byanahikire “ebindi bibuzi” bya Kristu byayish’iba biri byakolera Yehova n’obwishwekerezi hano igulu omu mango g’‘amalibuko [madârhi]’? (Yn. 10:16; Mt. 24:21) Baguma na baguma banayoboha oku bayish’iciyumva bahwerirwe banalikirirwe hano bene wabo na bali babo bashige amavurha bayish’ihêkwa empingu. Lekagi rhuganirire myanzi ibirhi eri omu Bibliya yakarhuma barhanya ntyo. Buzinda, rhwaganirira bulya gurhi ntaco cakarhuma rhwayoboha.

BICI BIRHAKAHIKIRA EBINDI BIBUZI?

3-4. Bici baguma na baguma muli rhwe bakarhanya, na bulya gurhi?

³ Hali abakarhanya oku Abakristu b’ebindi bibuzi banaleke okuli amango Abakristu bashige amavurha b’omu Mbaraza Eri Yalongoza bayish’iba barhaciriho lyo babalongoza. Nkaba myanzi milebe eganirirwe omu Bibliya yanarhuma bayoboha ntyo. Rhuganirire nyiganyo ibirhi. Olwiganyo lurhanzi luli lwa Kuhani Mukulu Yehoyada. Ali mukozi mwishwekerezi wa Nnâmahanga. Ye na mukage, Yehoshaba, balanga omwana-rhabana wakag’ihamagalwa Yowasi banamurhabala okuba mwami mwinja  na mwishwekerezi. Omu mango goshi Yehoyada al’izine, Yowasi aharamya Yehova anajira ebintu binja. Cikone enyuma z’okufâ kwa Yehoyada, Yowasi arhondera okujira ebintu bibi. Ayumvirhiza abarhambo babi analeka Yehova.—2 Nga. 24:2, 15-19.

⁴ Olwiganyo lwa kabirhi luli lw’Abakristu balamaga enyuma z’emyaka igana mirhanzi. Yowane, yo yali ntumwa nzinda okufâ. Omu kasanzi koshi acir’izine, arhabire Bakristu banji bagendekere babêra bishwekerezi kuli Yehova. (3 Yn. 4) Haguma n’ezindi ntumwa za Yezu nyishwekerezi, omu kasanzi kalebe Yowane alwisize obugoma bwakag’ilandira. (1 Yn. 2:18) Cikone enyuma z’okufâ kwa Yowane, obugoma bwalandira nka muliro omu muzirhu. Omu myaka yakulikiraga, ecigamba cayahukirwa bwenene n’obo bugoma.

5. Bici eyo myanzi ibirhi eganirirwe omu Bibliya erhayerekini?

⁵ K’eyo myanzi ibirhi y’Ebibliya eyerekine oku kantu kalebe kali nk’ako kanahikire ebindi bibuzi bya Kristu hano Abakristu bashige amavurha bahêkwa empingu? Ago mango, k’Abakristu bishwekerezi okw’igulu bayish’ileka enyigirizo z’okuli, aka Yowasi, erhi ka bayish’iyahukirwa n’obugoma, ak’Abakristu banji balamaga enyuma z’emyaka igana mirhanzi? Ishuzo liri nanga ciru n’ehitya! Rhwanayemera n’obwalagale oku hano Abakristu bashige amavurha bahêkwa empingu, Abakristu b’ebindi bibuzi bayish’igendekera baharamya Yehova omu njira eshinganine, na Yehova ayish’igendekera abashibirira. Bulya gurhi rhwakayemera ntyo n’obwalagale?

ENTEREKÊRO ECÎRE ERHAYISH’IYAHUKIRWE N’OBUGOMA

6. Mango gahi asharhu rhwaganirira kwa bofofi?

⁶ Bulya gurhi rhwakayemera n’obwalagale oku enterekêro ecîre erhayahukirwe n’obugoma, ciru n’omu mango mazibu gali embere? Rhwanayemera ntyo n’obwalagale enyanya z’ebi rhwayizire omu Bibliya lugenda amango rhulamiremwo. Amango rhulamiremwo gali lubero bwenene n’amango g’ishanja lya mîra ly’Abaisraheli n’amango g’Abakristu b’enyuma z’emyaka igana mirhanzi. Co cirhumire rhuganirirage kwa bulîri ago mango asharhu: (1) Amango g’ishanja lya mîra ly’Abaisraheli, (2) amango g’enyuma z’okufâ kw’entumwa, (3) gano mango girhu, “amango g’okuyumanyanya ebintu byoshi.”—Ebj. 3:21.

7. Bulya gurhi Abaisraheli bishwekerezi barhahezagya obulangalire erhi abami babo n’abandi bantu banji bacishoga okujira amabi?

⁷ Amango g’ishanja lya mîra ly’Abaisraheli. Kasanzi kasungunu enyuma z’okufâ kwage, Musa abwira Abaisraheli ntya: “Mmanyire oku amango naba nafîre murhabule bwahemuka; mwarhenga omu njira namurhegekaga.” (Lush. 31:29) Kandi Musa al’irhonzire Abaisraheli oku bakagoma, bakahêsirwe omu cihugo ca bene. (Lush. 28:35, 36) K’ezo nderho zahikirire? Neci. Omu magana g’emyaka, bami banji bacishozire okujira amabi banarhuma abantu ba Nnâmahanga bahemuka. Enyanya z’oko, Yehova ahana Abaisraheli bagalu-galu arhanaciyemeraga abami Baisraheli barhambule abantu bage. (Eze. 21:25-27) Cikone Abaisraheli bishwekerezi baba n’oburhwali erhi bakabona Akanwa ka Nnâmahanga kahikirira.—Iz. 55:10, 11.

8. Ka rhwanasomerwa okubona oku ecigamba c’Ecikristu c’enyuma z’emyaka igana mirhanzi cayahukiragwa n’obugoma? Ohugûle.

⁸ Amango g’enyuma z’okufâ kw’entumwa. Ka rhwanasomerwa okubona oku ecigamba c’Ecikristu cayahukirwe n’obugoma enyuma z’okufâ kw’entumwa? Nanga ciru n’ehitya. Yezu alebire oku hakabire bugoma bunji. (Mt. 7:21-23; 13:24-30, 36-43) Entumwa Paolo, Petro, na Yowane boshi bayerekine n’obwalagale oku  obulebi bwa Yezu bwal’ikola bwamarhondera okuhikirira omu kasanzi kabo. (2 Ts. 2:3, 7; 2 Pt. 2:1-3, 17-19; 1 Yn. 2:18) Enyuma z’emyaka igana mirhanzi, ecigamba c’Ecikristu cayahukirwa n’obugoma. Obukristu bugoma bwazuka bwanaba cigabi cinene ca Babiloni Mukulu, ko kuderha, amadîni goshi g’obunywesi. Kandi, ebi Yezu alebaga byahikirire.

9. Gurhi amango rhulamiremwo gali lubero n’amango g’ishanja lya mîra ly’Abaisraheli n’amango g’ecigamba c’Ecikristu c’enyuma z’emyaka igana mirhanzi?

⁹ “Amango g’okuyumanyanya ebintu byoshi.” Amango girhu gali lubero n’amango g’ishanja lya mîra ly’Abaisraheli n’amango obugoma bunene bwabagaho enyuma z’emyaka igana mirhanzi. Gurhi amango girhu gahamagirwe? Rhunalug’igahamagala “nsiku nzinda” z’er’igulu libi. (2 Tm. 3:1) Cikone Ebibliya eyerekine oku hali akasanzi kanji na kalîri karhonderaga omu mango maguma n’ensiku nzinda. Ako kasanzi kagendekera kuhika Obwami bw’Ecimasiya bugalule abantu bacib’iba bimana n’okuhindula igulu libe paradizo. Ako kasanzi kahamagirwe “mango g’okuyumanyanya [kugalulwa] kw’ebintu byoshi.” (Ebj. 3:21) Ago mango garhonderaga omu mwaka gwa 1914. Bici byagalwirwe? Yezu, ajirwa Mwami omu mpingu. Muli ntyo, Yehova acib’iba n’omurhegesi w’okurhegeka ahali hage, w’omw’iburha lya Daudi, Mwami mwishwekerezi. Cikone, arhali ako kalibwami kone Yehova agalwire. Kasanzi kasungunu enyuma z’aho, enterekêro ecîre yarhondera okugalulwa! (Iz. 2:2-4; Eze. 11:17-20) Ka yanaciyahukirwe n’obugoma?

10. (a) Bici Ebibliya elebire lugenda enterekêro ecîre muli kano kasanzi kirhu (K.K.K.)? (Izaya 54:17) (b) Bulya gurhi ago malebi garhurhabire rhurhayobohaga?

¹⁰ Osome Izaya 54:17. Orhanye k’obu bulebi: “Ngasi murasano gwatulwe mpu bakurheremwo, kufananda gwakaz’ifananda”! Ezo nderho zalongozibagwa n’iroho lya Nnâmahanga ziri zahikirira ene. Ezi nderho zikulikire z’okurhuliriza nazo ziyerekire kano kasanzi kirhu: “Bagala bawe boshi bàbà baganda ba Nyakasane [Yehova, NWT], n’omurhûla gw’abana bawe gwàbà murhûla munene. Wasimîkira oku bushinganyanya; . . . Nta kuciba n’obwôba, bulya burhankacikuyegera.” (Iz. 54:13, 14) Ciru na ‘nyamuzinda w’en’igulu,’ Shetani ye nnene, arhagwerhi obuhashe bw’okuyimanza omukolo gw’okuyigiriza abantu ba Yehova bali bahikiriza. (2 Kr. 4:4) Enterekêro ecîre yagalwirwe, erhakanaciyahukirwa n’obugoma ciru n’ehitya. Yagendekera yaba ho ensiku n’amango. Nta murasano erhi cikolanwa c’okulwa ivita catulwa mpu lyo cirhurhera cabêrwe!

 BICI BYANAHIKIRE EBINDI BIBUZI?

11. Bici birhuyemezize n’obwalagale oku ehitû hy’abantu hirhakalikirirwa amango abashige amavurhga baja empingu?

¹¹ Bici byayish’ihikira ebindi bibuzi hano Abakristu bashige amavurha bahêkwa empingu? Okengere oku Yezu ye Lungere wirhu. Yezu y’irhwe ly’ecigamba c’Ecikristu. Adesire ntya n’obwalagale: “Mujira Mukulu muguma, ye Masiya.” (Mt. 23:10, Mashi Bible) Yezu, Mwami wirhu oli warhegeka, ashibirira abanafunzi bage b’okuli ensiku zoshi. Bulya Kristu ali abalongoza, abanafunzi bage barhakayoboha cici. Kobinali, rhurhamanyiri ngasi kantu lugenda oku Kristu ayish’ilongozamwo abantu bage ago mango. Lekagi rhuganirire nyiganyo ndebe z’Ebibliya zakarhurhabala lyo rhurhayobohaga.

12. Gurhi Yehova ashibiriremwo abantu bage (a) enyuma z’okufâ kwa Musa? (b) enyuma za Eliya okuhâbwa ogundi mukolo? (Olole n’enfoto.)

¹² Embere z’Abaisraheli okuja omu Cihugo c’Amalaganyo, Musa afâ. Bici byahikire abantu ba Mungu? Buzira oyo mulume mwishwekerezi, ka babêzire buzira burhabale? Nanga. Omu kasanzi koshi bagendekire babêra bishwekerezi, Yehova abashibirire. Embere Musa afê, Yehova amubwizire oku ahe Yozwe omukolo gw’okulongoza abantu bage. Musa ajijire amakumi g’emyaka ali akomereza Yozwe. (Lub. 33:11; Lush. 34:9) Na kandi, hali abandi balume banji b’obuhashe bakag’ilongoza: abarhambo b’ebihumbi, ab’amagana, ab’amakumi arhanu, ciru n’ab’ikumi ikumi. (Lush. 1:15) Abantu ba Nnâmahanga bakag’ishibirirwa bwinja. Eliya luli lundi lwiganyo luyerekine ntyo. Ajijire amakumi g’emyaka ali alongoza Abaisraheli omu nterekêro ecîre. Cikone buzinda Yehova amuha ogundi mukolo, omu eneo y’emukondwe y’e Yuda. (2 Bam. 2:1; 2 Nga. 21:12) K’abantu bishwekerezi b’omu bwami bw’e Israheli bw’amûko ikumi balekerirwe? Nanga. Eliya ali amajira myaka minji ali akomereza Elisha. Kandi hali “abana b’abalebi,” binabonekine oku bal’ipanzirwe omu bigusho by’amasomo. (2 Bam. 2:7, NWT) Oko kuyerekine oku hali balume banji bishwekerezi bali ho lyo balongoza abantu ba Nnâmahanga. Yehova agendekera ahikiriza omuhigo gwage, n’okushibirira abakozi bage bishwekerezi.

13. Nderho zihi z’okuhâna omurhima ziri omu Abahabraniya 13:5b? (Olole n’enfoto.)

¹³ Kugerera ezo nyiganyo, gurhi orhanyize byayish’iba hano abashige amavurha bazinda bahêkwa empingu? Oko kurhakubabazagya. Ebibliya eyerekine okuli kw’obwalagale: Yehova arhakalîkirira ciru n’ehitya abantu bage  hano igulu. (Osome Abahabraniya 13:5b.) Aka Musa na Eliya, ecigusho cisungunu c’Abakristu bashige amavurha ciri calongoza ene ciba cihugûsirwe obulagirire bw’okukomereza abandi. Omu makumi g’emyaka, bene wirhu b’omu Mbaraza Eri Yalongoza bali bakomereza abalume b’omu bindi bibuzi okulongoza. Kwa lwiganyo, bajijire masomo manji g’okukomereza abagula, abangalizi b’omuzunguko, bene wirhu b’omu Komite z’Etawi, abayimangire emikolo oku Beteli, n’abandi. Embaraza Eri Yalongoza yo nnene eri yakomereza abarhabazi babo oku mikolo eri lubero y’ekomite z’Embaraza Eri Yalongoza. Kuhika ene abo barhabazi bali bahikiriza mikolo minji omw’ikubuliro. Bali barheganyizibwa bwinja okuyish’igendekeza omukolo gw’okushibirira ebibuzi bya Kristu enyuma z’okuhêkwa kw’abashige amavurha empingu.

14. Entanya z’obulagirire z’eci cigabi ziri zihi?

¹⁴ Alaga entanya z’obulagirire z’eci cigabi: Hano Abakristu bashige amavurha bazinda bahêkwa empingu hofi nʼobuzinda bw’amalibuko madarhi, enterekêro ecîre yayish’igendekera bwinja hano igulu. Kugerera obulongozi bwa Yezu Kristu, abakozi ba Nnâmahanga barhakabulirwa na cici. Rhumanyire oku ago mango, omulungano gw’amashanja Ebibliya ehamagire Gogi w’Amagogi gwayish’iba guli gwarhera abakozi ba Nnâmahanga. (Eze. 38:18-20) Cikone eco cirhero ca kasanzi kasungunu cirhayish’ibêrwe; cirhakarhuma abakozi ba Nnâmahanga baleka okumuharamya. Buzira karhinda, ayish’ibayokola! Omu cibonekerezi, entumwa Yowane yabwine “ehitû hy’abantu” hy’ebindi bibuzi bya Kristu. Yowane abwirwa oku ehyo “hitû hy’abantu” hirhenzire omu “malibuko madârhi.” (Maf. 7:9, 14) Co cirhumire, rhumanyire buzira karhinda oku Yehova ayish’ibayokola!

15-16. Kushimbana n’Amafulûlo 17:14, bici abashige amavurha ba Kristu bayish’iba bali bajira amango g’ivita lya Har-magedoni, na bulya gurhi oko kurhuhîre omurhima?

¹⁵ Ciru akaba ntyo, hali abakarhanya ntya: ‘Gurhigi lugenda abashige amavurha? Bici bayish’ijira enyuma z’okuja empingu?’ Ebibliya eshuzize n’obwalagale er’idoso. Eyerekine oku abarhegesi b’er’igulu “bayish’ilwisa Omwana-buzi.” Kobinali, bayish’ihimwa. Ebibliya edesire  ntya: “Omwana-buzi abahima.” Na ndi wayish’imurhabala? Olo lwandiko lushuzize. Balya “bahamagirwe,” “bîshogwe,” na “bemezi.” (Osome Amafulûlo 17:14.) Bo bandi? Bo bashige amavurha bafûzirwe! Co cirhumire hano abashige amavurha bazinda hano igulu bahêkwa empingu oku buzinda bw’amalibuko madarhi, muguma gw’omu mikolo yabo mirhanzi kwayish’iba kulwa ivita. Ogo guli mukolo gwa kusomeza! Bakristu baguma na baguma bashige amavurha bakag’ilwisa abandi embere babe Bahamirizi ba Yehova. Ciru baguma na baguma bali basoda b’er’igulu. Cikone, buzinda baba Bakristu b’okunali banayiga okulama omu murhûla haguma n’abandi. (Gl. 5:22; 2 Ts. 3:16) Baleka eby’okulwa ivita ly’omubiri. Cikone enyuma z’okuja empingu, bayish’ikola haguma na Kristu na bamalahika bage batagatifu, omu kulwisa abashombanyi ba Nnâmahanga ivita lizinda.

¹⁶ Orhanye k’oku! Bakristu baguma na baguma bashige amavurha bali hano igulu, bakola bashosi erhi ciru bazamba. Cikone hano bafûlwa n’okuhâbwa obuzine empingu, byayish’iba biremwa by’ekiroho bigwerhe emisi birhakanafâ, banayish’iba bagwerhe omukolo gw’okulwa haguma na Yezu Kristu Mwami wabo Mulwi w’Ivita. Enyuma z’okulwa ivita lya Har-magedoni, bayish’ikola haguma na Yezu lyo barhabala abantu bahikire okuba bimana. Buzira karhinda, ago mango bayish’ijirira bene wabo na bali babo bazigirwa bali okw’igulu bintu binji bwenene erhi banali empingu kulusha ebi bakahashir’ijira amango baciri bantu barhali bimana!

17. Gurhi rhumanyiremwo oku abakozi ba Nnâmahanga boshi bayish’iba bali omu bulanzi amango g’ivita lya Har-magedoni?

¹⁷ K’oli w’omu bindi bibuzi? Akaba ntyo, bici ohûnyirwe okuyish’ijira hano ivita ly’obulagirire bwenene lya Har-magedoni lirhondera? Kwa bofofi: Kuli kulangalira Yehova n’okukulikira obulongozi bwage. Bici oko kwakaba kuhiziremwo? Omu njira y’okurhuliriza, Ebibliya edesire ntya: “Kanya, lubaga lwani, oje omu nyumpa zawe [byumpa byawe by’endani, NWT], onaciyigalirekwo enyumvi; Orhang’icifulika kasanzi kasungunu kuhika obukunizi bugere.” (Iz. 26:20) Abakozi boshi bishwekerezi ba Nnâmahanga b’omu mpingu na hano igulu, bayish’iba omu bulanzi ago mango. Ak’entumwa Paolo, rhuyemire n’obwalagale oku ciru ‘amami, ciru gano mango erhi amango gayisha, . . . garhankahasha okurhunanûla oku buzigire bwa Nyamuzinda.’ (Rm. 8:38, 39) Ensiku zoshi okakengera ntya: Yehova aba akuzigire, arhakanakulikirira ciru n’ehitya!