Ciru akaba ntyo, Yehova arhuhûnyire rhugendekere rhwalindirira akasanzi ahizireho ly’akola. Bulya gurhi arhuhûnyire rhujire ntyo? Bici byakarhurhabala rhugendekere rhwaba n’omwishingo amango rhuli rhwalinda?

BULYA GURHI YEHOVA ARHUHÛNYIRE RHULINDE?

Ebibliya edesire ntya: ‘Nyakasane [Yehova, NWT] adwirhe alinga amango ammubabalira, co cirhumire anayimuke mpu amumyereke olukogo lwage. Bulya Nyakasane aba Nyamuzinda mushinganyanya [ab’omwishingo bali] boshi bamulangalira.’ (Iz. 30:18) Burhangiriza ezo nderho za Izaya zali yerekire Abayahudi bagoma. (Iz. 30:1) Cikone, hali Bayahudi baguma na baguma bishwekerezi n’ezo nderho zabahîre obulangalire. Ene, ezo nderho zo n’ezo zahîre abakozi ba Yehova bishwekerezi obulangalire.

Co cirhumre rhugwasirwe rhulindirire bulya Yehova naye ali alindirira. Ahizireho akasanzi alerha obuzinda bw’er’igulu libi, anali alindîrira akasanzi n’olo lusiku bihike. (Mt. 24:36) Ago mango, byayishʼibonekana n’obwalagale oku ebi Ibilisi ashobesire Yehova n’abamukolera biba bya bunywesi. Ago mango ayish’ikulaho Shetani na ngasi yeshi oli eluhande lwage, cikone ‘ayish’irhuyeresa olukogo lwage.’

Embere ago mango gahike, nkaba Yehova arhakule amazibu girhu, cikone arhuyemezize n’obwalagale oku rhwanaba n’omwishingo amango rhuli rhwalinda. Nk’oku Izaya aderhaga rhwanaba n’omwishingo amango rhuli rhwalingûza erhi kulangalira kantu kalebe kinja kabe. (Iz. 30:18) a Gurhi rhwakajira lyo rhuba n’ogo mwishingo? Bintu bini byanarhurhabala.

OKU RHWAKAJIRA LYO RHUBA N’OMWISHINGO AMANGO RHULI RHWALINDA

Osegeze obwenge oku bintu binja biri byaba omu kalamo kawe. Mwami Daudi abwine mabi manji omu kalamo kage. (Enna. 37:35) Cirhu akaba ntyo, ayandisire ntya: “Ohwekere emalanga ga Nyamunzida, olembe omulinde bwenene, omanye orhabâga burhê muntu wamâbêrwa orhumire, nisi erhi ola ohikîriza okujira amabi.” (Enna. 37:7, Mashi Bible.) Daudi akolesize ye nnene er’ihano omu kusegeza obwenge oku bulangalire bwage bw’obucire. Kandi akag’ibona emigisho Yehova akag’imuha.  (Enna. 40:5) Erhi nirhu rhwakasegeza obwenge bwirhu oku bintu binja biri byaba omu kalamo kirhu ahali h’okubusegeza oku bintu bibi, kwanaba kulembu kuli rhwe okulinda Yehova.

Okolese ngasi bulyo wakaba nabo ly’okuza Yehova. Omwandisi w’Olulanga lwa 71, bibonekine oku lwayandikagwa na Daudi, abwizire Yehova ntya: “We nyorha cikubagira, Nakâkukuza ngasi mango.” (Enna. 71:14, Mashi Bible) Gurhi akakuzizemwo Yehova? Akakazir’ibwira abandi lungenda Yehova n’okumuyimbira irenge. (Enna. 71:16, 23) Aka Daudi, rhwanaba n’omwishingo amango rhuli rhwalinda Yehova. Rhunamukuze kugerera omukolo gwirhu gw’amahubiri, kugerera enshambalo zirhu za ngasi lusiku, n’enyimbo z’okumuharamya. Agandi mango wayimba luguma l’omu nyimbo zirhu z’obwami, orhanye bwenene lugenda enderho zalo n’oku zikuhiremwo omwishingo.

Oleke bene wirhu na bali birhu bakuhe omurhima. Erhi Daudi ali arhimanana n’amazibu, abwira Yehova ntya: “Nakalangâlira izino lyawe. Omu masu g’abikubagirwa bawe.” (Enna. 52:9, Mashi Bible) Nirhu rhwanahâbwa omurhima kugerera bene wirhu na bali birhu, arhali oku ntimanano zirhu kone n’omu mukolo gw’amahuri, cikone kandi amango rhuli rhwageza akasanzi haguma nabo.—Rm. 1:11, 12.

Ozibuhye obulangalire bwawe. Olwandiko lw’Ennanga 62:5, NWT, ludesire ntya: “Nalinda Nyamuzinda omu kahwenyenye bulya obulangalire bwani emwage bwarhenga.” Kuli kwa bulagirire bwenene okuba n’obulangalire busezire, bwenene erhi akaba obuzinda burhayishiri amango rhwal’irhanyize. Rhugwasirwe rhuyemere n’obwalagale oku ebiragane bya Yehova byahikirira cirhu hakagera kasanzi kanganaci rhuli rhwalinda oku byahikirira. Rhwanazibuhya obulangalire bwirhu omu kuyiga Akanwa ka Mungu: amalebi gabamwo, oku emyanzi ebamwo eba epatine n’amahûgulo masungunu-ngunu Yehova ahânyire okubimuyerekire. (Enna. 1:2, 3) Kandi, rhushinganine “rhugendekere rhwashenga rhunagwere iroho litagatifu” lyo rhugendekera rhwaba n’obwîra bwinja haguma na Yehova amango rhuli rhwalinda oku eciragane cage c’obuzine bw’esiku n’amango cahikirira.—Yd. 20, 21, NWT.

Aka Mwami Daudi, oyemere n’obwalagale oku Yehova analange balya bamulinda n’oku anabayerese obuzigire bwage bwishwekerezi. (Enna. 33:18, 22) Ogendekere walindirira Yehova omu kusegeza obwenge oku bintu binja biri byaba omu kalamo kawe, omu kumukuza, n’omu kuleka ohâbwe omurhima n’abinyu bemezi, omu kugendekera wazibuhya obulangalire bwawe bwinja bwenene.