1. Ohâne olwiganyo luyerekine bulya gurhi rhushinganine rhukulikire Yehova, Cirongozi wirhu.

 ORHANYE obe oherire omu muzirhu. Wanaba oli omu mazibu mw’ogo muzirhu bulya muli ensimba z’emuzirhu, ebiruru byakaha omuntu endwala, emirhi erimwo sumu, na kandi wanarhogera omu mina. Wanavuga omunkwa bwenene erhi wakaba ogwerhe omuntu w’okukulongoza omanyire bwinja ogo muzirhu wakamanya aha amazibu gali n’okukuyasa nago! Er’igulu ko liri nk’ogo muzirhu. Liyunjwiremwo mazibu manji gakashereza ehali yirhu y’ekiroho. Cikone rhugwerhe Cirongozi mwimana, ko kuderha Yehova. Anarhurhenze omu mazibu n’okurhulongoza emunda rhuyerekire, ko kuderha ebwa buzine bw’ensiku n’amango omw’igulu lihyahya.

2. Gurhi Yehova arhulongozamwo?

² Gurhi Yehova arhulongozamwo? Burhangiriza, kugerera Akanwa kage Bibliya. Cikone kandi anakolese abantu aba ahizireho lyo barhulongoza. Kwa lwiganyo, anakolese “mushizi mwirhonzi na mwikubagirwa” ly’arhuha ebiryo by’ekiroho birhurhabala okurhôla emihigo y’obwenge. (Mt. 24:45, NWT) Kandi Yehova anakolese abandi balume b’obuhashe lyo barhulongoza. Kwa lwiganyo, abangalizi b’omuzunguko n’abagula b’ecigamba banarhuhe omurhima n’enyigirizo zirhurhabala lyo rhulwisa amazibu girhu. Rhuvuzire omunkwa bwenene oku bulongozi bw’okulangalirwa rhuli rhwahâbwa muli zino nsiku nzinda! Oko kunarhurhabale rhugendekere rhwayemerwa na Yehova n’okugendekera rhwalambagira omw’ibarabara lihêsire ebwa buzine.

3. Bici rhwaganirira mw’eci cigabi?

³ Ciru akaba ntyo, hali amango rhubona nka kuli kuzibu okukulikira obulongozi bwa Yehova, bwenene amango rhubuhâbirwe n’abantu barhali bimana. Bulya gurhi? Amahano barhuhîre ganaba arhali go rhusimire okuyumva. Erhi nkaba rhwanarhanya  oku obulongozi barhuhîre burhapatini n’obwenge n’oko kwanarhuma rhwaderha oku obulongozi bwabo burharhenziri emwa Yehova. Omu mango ga ntyo, rhushinganine rhuyemere bwenene oku Yehova yeri walongoza abantu bage n’oku okukulikira obulongozi bwage kunalerhe emigisho. Omu kurhurhabala rhuyemere ntyo n’obwalagale, eci cigabi caganirira (1) oku Yehova alongozizemwo abantu bage omu mango ga mîra, (2) oku ali arhulongozamwo ene, na (3) oku rhuyungukamwo erhi rhugendekera rhwakulikira obulongozi bwage.

OKU YEHOVA ALONGOZIZEMWO ISHANJA LY’ABAISRAHELI

4-5. Gurhi Yehova ayerekinemwo oku akag’ikolesa Musa ly’alongoza ishanja ly’Abaisraheli? (Olole enfoto eri oku cijalada.)

⁴ Yehova ahizireho Musa ly’alongoza Abaisraheli kurhenga e Misri. Kandi abayeresa ebintu byal’iyerekine n’obwalagale oku ye wakag’ibalongoza kugerera Musa. Kwa lwiganyo, al’ihizireho omutungo gw’olwikungu mushi n’omutungo gw’omuliro budufu. (Lub. 13:21) Musa akag’ikulikira ogo mutungo gwanamulongoza ye n’Abaisraheli kuhika oku Nyanya Ndukula. Abantu bayoboha bwenene erhi barhanya oku Abamisri babagwarha bulya bacirhimanyire bali egarhi kabo n’Enyanja Ndukula. Baderha oku Musa ajijire igosa omu kubahêka ebwa Nyanja Ndukula. Cikone lirhali igosa. Yehova ye wabalongozagya eyo munda n’obulonza bwage kugerera Musa. (Lub. 14:2) Muli ntyo, Mungu abayokola omu njira y’okusomeza bwenene.—Lub. 14:26-28.

⁵ Myaka 40 enyuma z’aho, Musa agendekire akulikira ogo mutungo gw’olwikungu ly’alongoza abantu ba Mungu omw’irungu. a Omu kasanzi kalebe, Yehova ahizire ogo mutungo enyanya z’ihema lya Musa, hantu Abaisraheli boshi bakagubwine. (Lub. 33:7, 9, 10) Kurhenga mw’ogo mutungo, Yehova aganiza Musa, na Musa naye abwira abantu ebi Yehova amubwiraga. (Enna. 99:7) Abaisraheli babwine bintu binji bwenene byal’iyerekine oku Yehova ye wakag’ikolesa Musa ly’abalongoza.

6. K’Abaisraheli barhumikire obulongozi bwa Yehova? (Emibalè 14:2, 10, 11)

⁶ Eby’okugayisa kuli kubona oku Baisraheli banji balahire okuyemera ebintu byal’iyerekine n’obwalagale oku Yehova ye wal’ihizireho Musa ly’abalongoza. (Osome Emibalè 14:2, 10, 11.) Kanji-kanji balahira okuyemera oku Yehova ye wakag’ikolesa Musa ly’abalongoza. Enyanya z’oko, Yehova arhabayemereraga okuja omu Cihugo c’Amalaganyo.—Mib. 14:30.

7. Ohâne enyiganyo z’abantu bakulikire obulongozi bwa Yehova. (Emibalè 14:24) (Olole n’enfoto.)

⁷ Cikone, hali Baisraheli balebe bakulikire obulongozi bwa Yehova. Kwa lwiganyo, Yehova adesire ntya: ‘Kalebu . . . ayosire acîshwekire kuli nie.’ (Osome Emibalè 14:24.) Nnâmahanga ahembire Kalebu, anamuha ciru e eneo nyinja al’icishozire omu cihugo c’e Kanani. (Yoz. 14:12-14) Iburha lyakulikiraga ly’Abaisraheli nalyo lyayerekine olwiganyo lwinja omu kukulikira obulongozi bwa Yehova. Erhi Yozwe ahirwaho ly’alongoza Abaisraheli ahali ha Musa, “bâmukenga . . . omu kalamo kage mwoshi.” (Yoz. 4:14, Mashi Bible) Oko kwarhuma Yehova abagisha omu kubahisa omu cihugo al’ibalaganyize.—Yoz. 21:43, 44.

8. Ohugûle gurhi Yehova alongozizemwo abantu bage omu mango g’abami. (Olole n’enfoto.)

⁸ Myaka milebe enyuma z’aho, Yehova ahiraho abaciranûzi lyo balongoza abantu bage. Buzinda, omu mango g’abami, Yehova ahiraho abalebi lyo balongoza abantu bage. Abami bishwekerezi bakulikire amahano g’abalebi. Kwa lwiganyo, Mwami Daudi ayemire n’obwirhohye  okukubûlwa n’omulebi Natani. (2 Sam. 12:7, 13; 1 Nga. 17:3, 4) Mwami Yozafati alangalire obulongozi bw’omulebi Yahazieli anaha abantu b’e Yuda omurhima ‘bacihire omu maboko g’abalêbi [ba Nnâmahanga].’ (2 Nga. 20:14, 15, 20) Amango Mwami Hezekiya al’ibabire, aj’ihûna omulebi Izaya oburhabale. (Iz. 37:1-6) Ngasi mango erhi abami bakakulikire obulongozi bwa Yehova, Yehova akag’ibagisha n’okulanga abantu bage. (2 Nga. 20:29, 30; 32:22) Abantu boshi bakabwine n’obwalagale oku Yehova akag’ikolesa abalebi ly’alongoza olubaga lwage. Ciru akaba ntyo, bami banji ciru na bantu banji balahire okuyumvirhiza abalebi ba Yehova.—Yer. 35:12-15.

OKU YEHOVA ALONGOZIZEMWO ABAKRISTU BARHANGIRIZA

9. Bandi Yehova akolesize lyo balongoza Abakristu omu myaka igana mirhanzi? (Olole n’enfoto.)

⁹ Omu myaka igana mirhanzi muli Kano Kasanzi Kirhu (K.K.K.), Yehova arhondezize ecigamba c’Ecikristu. Gurhi alongozizemwo abo Bakristu barhangiriza? Ahiraho Yezu abe irhwe ly’ecigamba. (Ef. 5:23) Cikone Yezu arhakag’ilonzoga ngasi mwanafunzi lwage-lwage. Akag’ikolesa entumwa n’abagula bali e Yeruzalemu lyo balongoza. (Ebj. 15:1, 2) Kandi, abagula bakag’ihirwaho lyo balongoza ebigamba.—1 Ts. 5:12; Tt. 1:5.

10. (a) Gurhi Bakristu banji b’omu myaka igana mirhanzi bajijire lugenda obulongozi bahâbagwa? (Ebj. 15:30, 31) (b) Bulya gurhi bantu baguma na baguma b’omu mango ga mîra balahiraga abantu Yehova al’ihizireho lyo babalongoza? (Olole ecisanduku cidesire, “ Bulya Gurhi Bantu Balebe Balahiraga Okuyemera Ebyal’iyerekine n’Obwalagale oku Yehova Akag’ikolesa Abantu ly’Abalongoza?”)

¹⁰ K’Abakristu b’omu myaka igana mirhanzi bayemire obo bulongozi? Banji mulibo bashagalukire okurhumikira obulongozi bakag’ihâbwa. Kobinali, “bacishingira oburhulirize” bahâbagwa. (Osome Ebijiro by’Entumwa 15:30, 31.) Gurhigi Yehova ali alongozamwo abantu bage muli gano mango girhu?

OKU YEHOVA ALI ALONGOZAMWO ENE

11. Ohâne olwiganyo luyerekine gurhi Yehova arhabiremwo abali balongoza muli gano mango girhu.

¹¹ Yehova agendekire alongoza abantu bage ene. Ali ajira ntyo kugerera Akanwa kage n’Omugala, oli irhwe ly’ecigamba. Ka hali ebikuyeresire oku Nnâmahanga acigendekire akolesa bene bantu lyo balongoza? Neci. Kwa lwiganyo,  rhuganirire ebyabaga enyuma z’omwaka gwa 1870. Charles Taze Russell n’abal’icilunzire haguma naye barhondera okuhugûkwa oku omwaka gwa 1914 gwakabire mwaka gwa bulagirire okubiyerekire Obwami bwa Nnâmahanga. (Dan. 4:25, 26) Obulebi bw’Ebibliya bo bwabarhabire okuhugûkwa ntyo. Ka Yehova akag’ibalongoza omu busagasi bwabo bakag’ijira omu Bibliya? Bibonekine ntyo n’obwalagale. Ebyajirikine omw’igulu omu mwaka gwa 1914 byayerekana n’obwalagale oku Obwami ba Nnâmahanga bwarhondire okurhegeka mw’ogo mwaka. Ivita lirhanzi ly’Igulu lyarhondera, haba endwala z’okuyahukira, emisisi y’idaho, n’ishali. (Lk. 21:10, 11) Kobinali, Yehova akag’ikolesa abo balume Bakristu b’emirhima minja ly’arhabala abantu bage.

12-13. Mipango ehi yarhôzirwe ly’omukolo gw’okuhubiri n’okuyigiriza guja mbere omu mango g’Ivita lya Kabirhi ly’Igulu?

¹² Kandi orhanye oku bintu byajirikanaga omu mango g’Ivita lya Kabirhi ly’Igulu. Enyuma z’okuyiga olwandiko lw’Amafulûlo 17:8, bene wirhu bakag’ilongoza oku biro bikulu bahugûkwa oku er’ivita lirhakalongozize oku Har-magedoni, cikone lyakalongozize oku kasanzi k’omurhûla gw’olugero gwakabarhabire babe na bulyo bunji bw’okujira binji omu mukolo gw’amahubiri. Co cirhumire, ciru akaba kwabonekine nka kurhapatini n’obwenge ago mango, bene wirhu bakag’ilongoza barhondeza Amasomo g’Egileyadi lyo bakomereza bamisiyonere okuhubiri n’okuyigiriza omu bihugo byoshi by’omw’igulu. Bamisiyonere barhumwa ciru akaba gali mango g’ivita. Kandi, mushizi mwirhonzi arhondeza Enyigirizo z’Amasomo g’Eciteokrati b lyo gakomereza abantu boshi omu cigamba babe bahubiri na balimu binja. Kugerera ezo njira, abakozi ba Nnâmahanga bakag’irheganyizibwa oku mukolo gwali embere.

¹³ Ene, rhwanabona n’obwalagale oku Yehova akag’ilongoza abantu bage mw’ako kasanzi kazibu. Kurhenga amango g’Ivita lya Kabiri ly’Igulu, abantu ba Yehova omu bihugo binji babire n’omurhûla n’oluhuma lw’olugero lyo bahikiriza omukolo gw’amahubiri. Kobinali, omukolo gw’amahubiri gwajijire amajambere.

14. Bulya gurhi rhwanalangalira obulongozi rhuhâbwa n’ikubuliro lya Yehova n’obw’abagula bahizirweho? (Amafulûlo 2:1) (Olole n’enfoto.)

 ¹⁴ Ene, bene wirhu b’omu Mbaraza Eri Yalongoza bagendekire bayegemera obulongozi bwa Kristu. Baba balonzize obulongozi bali baha bene wabo na bali babo bubonekane oku burhenzire empingu. Nabo banakolese abangalizi b’omuzunguko n’abagula lyo baha ebigamba obulongozi. c Abagula bashige amavurha n’abagula boshi b’ebigamba bali omu “kuboko kulyo” kwa Kristu. (Osome Amafulûlo 2:1.) Kobinali, abo bagula barhaba bimana bananajire amagosa. Ak’entumwa, hali amango Musa na Yozwe nabo bajijire amagosa. (Mib. 20:12; Yoz. 9:14, 15; Rm. 3:23) Ciru akaba ntyo, Kristu ali alongoza bwinjinja mushizi mwirhonzi n’abagula bahizirweho anagendekera ajira ntyo “ensiku zoshi, kuhika oku buzinda bw’igulu.” (Mt. 28:20) Co cirhumire, rhugwerhe birhumire binji by’okulangalira obulongozi rhuli rhwahâbwa kugerera abantu bahizirweho lyo barhulongoza.

RHUNAYUNGUKE ERHI RHUGENDEKERA RHWAKULIKIRA OBULONGOZI BWA YEHOVA

15-16. Bici wakaciyigiriza kugerera enyiganyo z’abantu bakulikire obulongozi bwa Yehova?

¹⁵ Cirhu n’ene, erhi rhugendekera rhwakulikira obulongozi bwa Yehova, rhunabe n’emigisho. Kwa lwiganyo, Andy na Robyn barhumikire ihano lya mushizi mwirhonzi ly’okulama akalamo karhahûnyiri binji. Oko kwarhuma bacihâna lyo bakola oku mikolo y’obubasi bw’eciteokrasi. Robyn adesire ntya: “Rhwalamire omu nyumpa nsungunu bwenene, kanji-kanji ciru zirhalimwo masiga. Ciru nal’igwasirwe nguze bintu binji bwenene by’okurhôla enfoto nakag’ikolesa, n’obo ogo gwali mukolo nal’izigire. Erhi nguza ebyo bintu, nalaka. Cikone, aka Sara muka Abrahamu, nal’ihizire okugendekera embere, ci arhali kugaluka enyuma.” (Hb. 11:15) Bunguke buhi oyo mulume na mukage babire nabo omu kurhôla ogo muhigo? Robyn adesire ntya: “Rhurhimusirwe bwenene omu kumanya oku rhuli rhwaha Yehova ngasi kantu rhugwerhe. Omu kukola oku mikolo y’eciteokrasti, rhunahugûkwe gurhi akalamo kayish’iyorha omw’igulu lihyahya.” Andy ayemire ntyo omu kuderha ntya: “Rhugwerhe omwishingo bulya rhuli rhwacihâna loshi-loshi lyo rhulunga Obwami okuboko.”

¹⁶ Omu yindi njira nci rhuyungukamwo erhi rhugendekera rhwakulikira obulongozi bwa Yehova?  Kwa lwiganyo, erhi Marcia ayusa amasomo g’enyanya, alonza kobinali okukulikira ihano ahâbagwa ly’okuba painiya. (Mt. 6:33; Rm. 12:11) Adesire ntya: “Nahâbwa myaka ini y’okusoma e Université buzira kulipa. Cikone nalonza okukulikira emihigo y’ekiroho ahali h’okuyemera obo bulyo nahâbagwa. Muli ntyo, nacishoga okuyiga bulenga bulebe bwakantabire mbe n’ensaranga ndagirireko lyo ngendekera n’omukolo gwani gw’obupainiya. Ogo gwali muguma g’omu mihigo minja bwenene narhôzire omu kalamo kani. Ene, nshagalusire okukola nka painiya w’akasanzi koshi n’eprograme yani y’akazi yampashisize okugend’ikakola oku Beteli, hali n’eyindi mikolo njira omw’ikubuliro lya Yehova.”

17. Yindi migisho erhi rhuba nayo erhi rhukulikira obulongozi bwa Yehova? (Izaya 48:17, 18)

¹⁷ Hali amango rhuhâbwa amahano garhurhabala lyo rhucilanga n’ebintu nk’okuzigira ebintu by’omubiri n’eyindi mikolo yakarhuhira omu murhego gw’okuvuna amarhegeko ga Mungu. Muli ezo njira nazo, rhunagishwe omu kukulikira obulongozi bwa Yehova. Rhunagendekere rhwaba n’ezamiri ecîre rhunanayake mazibu manji. (1 Tm. 6:9, 10) Oko kunarhume rhwagendekera rhwaharamya Yehova n’omurhima gwirhu goshi n’okujira ntyo kunarhulerhere omwishingo munji, omurhûla, n’okurhimukwa.—Osome Izaya 48:17, 18.

18. Bulya gurhi ohizire okugendekera wakulikira obulongozi bwa Yehova?

¹⁸ Buzira karhinda, Yehova agendekera akolesa bene bantu ahizireho lyo barhuha obulongozi omu mango g’amalibuko madarhi n’omu Burhegesi bw’Emyaka Cihumbi. (Enna. 45:16) Ka rhwagendekera rhwakulikira obo bulongozi ciru akaba okujira ntyo kuhûnyire rhuleke bintu bilebe rhuba rhusimire? Kwayish’iba kulembu okujira ntyo erhi akaba rhuli rhwakulikira obulongozi bwa Yehova ene. Co cirhumire, lekagi ensiku zoshi rhukulikire obulongozi bwa Yehova, buhiziremwo obulongozi rhuhâbwa n’abalume ahizireho lyo barhulanga. (Iz. 32:1, 2; Hb. 13:17) N’omu mango rhuli rhwajira ntyo, rhugwerhe ebirhumire byoshi by’okulangalira Yehova Cirongozi wirhu, oli warhulongoza kurhenga omu mazibu g’ekiroho n’okurhuhêka emunda rhuyerekire, ebwa buzine bw’ensiku n’amango omw’igulu lihyahya.