ECIGABI C’OKUYIGA 10
Bulya Gurhi Oshinganine Obatizibwe?
“Ngasi muguma abatizibwe.”—EBJ. 2:38.
LWIMBO 34 Nitatembea kwa Uaminifu-Mushikamanifu
EBI RHWAYIGA a
1-2. Kanji-kanji gurhi biba erhi abantu babatizibwa, na bici oshinganine orhanyeko?
K’OKOLA obwine ecigusho c’abantu barhôzire omuhigo gw’okubatizibwa? Wayumva amashuzo gabo g’obwalagale erhi bashuza amadoso abirhi badosibagwa embere babatizibwe. Wabona gurhi abantu b’omulala gwabo n’abîra babo bali bacidinirabo. Erhi barhenga omu mishi, wayumva abantu bakoma akagasha wanabona oku boshi bagwerhe omwishingo. Hofi ngasi mugobe, ebihumbi by’abantu banahâne akalamo kabo emwa Yehova Nnâmahanga n’okuba Bahamirizi bage babatize.
2 Gurhigi nawe? Erhi akaba oli warhanya lugenda omuhigo gw’okubatizibwa, oli wago-wago bwenene mw’er’igulu libi bulya ‘oli walonza Nyamuzinda.’ (Enna. 14:1, 2) Eci cigabi cayandisirwe lyo cikurhabala, obe ociri musole erhi okola mushosi. Cikone ababatizibwe muli rhwe nabo balonzize bazibuhye omuhigo gwabo gw’okukolera Yehova emyaka n’emyaka. Lekagi rhuganirire bintu bisharhu egarhi k’ebintu binji birhushumya rhukolere Yehova.
OBA OZIGIRE OKULI N’OBUSHINGANYANYA
Hamagera ebihumbi by’emyaka Shetani ali azinza izino linja lya Yehova anagendekire okujira ntyo (Olole ecifungo ca 3-4)
3. Bulya gurhi abakozi ba Yehova baba bazigire okuli n’obushinganyanya? (Ennanga 119:128, 163)
3 Yehova arhegesire abantu bage oku ‘balongereze [bazigire, NWT] okuli.’ (Zak. 8:19) Yezu ahûnyire abanafunzi bage bashimbulire obushinganyanya. (Mt. 5:6) Oko kuli kuderha oku omuntu ashinganine abe n’irala linene ly’okujira ebintu bishinganine, binja na bicîre omu masu ga Nnâmahanga. K’oba ozigire okuli n’obushinganyanya? Rhuyemire n’obwalagale oku oba obizigire. Onashombe obunywesi n’ebintu byoshi birhashinganini na bigalu-galu. (Osome Ennanga 119:128, 163.) Obunywesi bunayerekane oborhere bwa Shetani, murhegesi w’er’igulu. (Yn. 8:44; 12:31) Muhigo muguma omu mihigo ya Shetani kuba kuzinza izino litagatifu lya Yehova Nnâmahanga. Kurhenga obugoma bw’omu Edeni Shetani agendekire alumiza obunywesi lugenda Nnâmahanga wirhu. Ajijire okwage koshi ly’abantu barhanya oku Yehova aba Murhegesi wa kucikaliza orhali mushinganyanya oyima abantu ebintu binja. (Murh. 3:1, 4, 5) Obunywesi Shetani aderhera Yehova bugendekire bwarhuma abantu barhanyiza Yehova kubi. Erhi abantu bacishoga okurhalongereza erhi okurhazigira okuli, Shetani anabashumya bakajira ngasi bintu birhashinganini na bigalu-galu.—Rm. 1:25-31.
4. Gurhi Yehova ayerekinemwo oku aba “Nyamuzinda w’okunali”? (Olole n’enfoto.)
4 Yehova aba “Nyamuzinda w’okunali,” na bulya aba muhanyi anayigirize abantu boshi bamuzigira okuli. (Enna. 31:5, Mashi Bible) Omu kujira ntyo, anabarhabale barhenge omu bunywesi bwa Shetani. Kandi Yehova anayigirize abakozi bage okuba bikubagirwa na bashinganyanya. Oko kunabahe obukenge omu njira ndebe n’omurhûla gw’ekandalala. (Mig. 13:5, 6) K’akujirire ntyo nawe erhi oyiga Ebibliya? Wayizire oku enjira za Yehova ziba nyinja bwenene oku bantu boshi na kuli wenene. (Enna. 77:13) Co cirhumire olonzize okujira ebintu by’obushinganyanya omu masu ga Nnâmahanga. (Mt. 6:33) Olonzize okumanyisa abandi okuli n’okuyerekana oku ebi Shetani adesire lugenda Nnâmahanga wirhu Yehova, biri bya bunywesi. Gurhi wakajiramwo ntyo?
5. Gurhi wakalungamwo okuli n’obushinganyanya okuboko?
5 Wanacishoga okulama akalamo kali nka kadesire ntya: “Ndahire obunywesi bwa Shetani, na nunzire okuli okuboko. Ndonzize Yehova abe Murhegesi wani Mukulu, na ndozize okujira ebi adesire oku bishinganine.” Gurhi wakajiramwo ntyo? Oyegere Yehova kugerera isala onacihâne emwage na buzinda obatizibwe ly’oyerekana embere z’abantu boshi oku wacihanyîre emwage. Okuzigira ebintu bishinganine na by’okuli ko kurhushumya bwenene rhurhôle omuhigo gw’okubatizibwa.
OBA OZIGIRE YEZU KRISTU
6. Birhumire bihi biyerekinwe omu lwandiko lw’Ennanga 45:4 byakarhuma wazigira Yezu?
6 Bulya gurhi oba ozigire Yezu Kristu? Rhulole birhumire biguma na biguma biri omu lwandiko lw’Ennanga 45:4. (Osome.) Yezu aba azigire okuli, obwirhohye n’obushinganyanya. Erhi akaba oba ozigire okuli n’obushinganyanya, biyumvikine oku oba ozigire na Yezu Kristu. Orhanye gurhi Yezu ahaliragamw’okuli n’obushinganyanya omu njira y’oburhwali. (Yn. 18:37) Cikone, gurhigi azigiramwo obwirhohye?
7. Bici bikusimisize lugenda obwirhohye bwa Yezu?
7 Yezu anazigire obwirhohye kugerera olwiganyo lwage. Kwa lwiganyo, ngasi mango anahe Ishe irenge lyoshi, ahali h’okuciha lyo yenene. (Mk. 10:17, 18; Yn. 5:19) Gurhi obwirhohye bwa Yezu burhumire waciyumva? Ka burhakushumizi ozigire Mugala wa Nnâmahanga onayige olwiganyo lwage? Neci kobinali. Bulya gurhi Yezu aba mwirhohye? Bulya aba azigire Ishe oba mwirhohye ananayige olwiganyo lwage. (Enna. 18:35; Hb. 1:3) Bulya Yezu anayerekane amorhere ga Yehova omu bwimana, k’oko kurhakushumizi omuzigire?
8. Bulya gurhi rhuzigira Omwami wirhu Yezu?
8 Rhunazigire Omwami wirhu Yezu bulya aba Murhegesi mwinja bwenene. Yehova yene akomerezize Omugala anamuhiraho ly’arhegeka. (Iz. 50:4, 5) Kandi, orhanye oku buzigire bw’okucihâna Yezu ayerekine. (Yn. 13:1) Bulya Yezu ye Mwami wawe, kobinali ogwasirwe omuzigire. Ayerekine oku abantu bamuzigira kobinali, ko kuderha aba ahamagala bîra bage, banayerekane obuzigire bwabo omu kukenga amarhegeko gage. (Yn. 14:15; 15:14, 15) Luli lukengwa lunene okuba mwîra wa Mugala wa Yehova!
9. Gurhi obubatizo bw’Abakristu buba bushushinemwo n’obubatizo bwa Kristu?
9 Irhegeko liguma ly’omu marhegeko ga Yezu lihunyîre abanafunzi bage babatizibwe. (Mt. 28:19, 20) Ayerekine olwiganyo. Omu njira nguma na nguma, obubatizo bwage buli lubero n’obubatizo bw’abanafunzi bage. (Olole ecisanduku cidesire “ Olubero Luli Egarhi k’Obubatizo bwa Yezu n’Obubatizo bw’Abanafunzi Bage.”) Cikone omu zindi njira, obubatizo bwage bushushine n’obw’abanafunzi bage. Omu kubatizibwa, Yezu aciyerekine embere z’Ishe ly’ajira obulonza bwage. (Hb. 10:7) Ko n’oko, abanafunzi ba Kristu banabatizibwe lyo bayerekana embere z’abantu boshi oku bacihânyire emwa Yehova Nnâmahanga. Banayerekane oku akantu k’obulagirire omu kalamo kabo kukola kujira obulonza bwa Nnâmahanga, ci arhali bulonza bwabo bonene. Muli ntyo banakulikire olwiganyo lwa Nnawabo.
10. Bulya gurhi obuzigire kuli Yezu bushinganine bukushumye obatizibwe?
10 Oba oyemire oku Yezu ye Mugala-cusha wa Yehova n’oku ye Mwami Nnâmahanga ahizireho ly’arhurhegeka. Omanyire oku Yezu aba mwirhohye, n’oku anayige olwiganyo lw’Ishe n’obwimana. Wayizire oku alisize abal’ishalisire, arhuliriza abal’ivunisire omurhima, anafumya ciru n’abalwala. (Mt. 14:14-21) Wacibwinire gurhi ali alongoza ecigamba cage ene. (Mt. 23:10) Onamanyire oku ajira binji kulusha omu mango gayisha ye nka Mwami w’Obwami bwa Nnâmahanga. Gurhi wakayerekanamwo oku omuzigire? Omu kuyiga olwiganyo lwage. (Yn. 14:21) Kantu kaguma omu bintu birhangiriza wakajira ly’oyiga olwiganyo lwage, kuli kucihâna emwa Yehova n’okubatizibwa.
OBA OZIGIRE YEHOVA NNÂMAHANGA
11. Ecirhumire c’obulagirire bwenene cirhushumya rhubatizibwe co cihi, na bulya gurhi?
11 Ecirhumire c’obulagirire bwenene cirhushumya rhubatizibwe co cihi? Yezu ayerekine irhegeko likulu omu marhegeko ga Nnâmahanga erhi aderha ntya: “Wakâzigira Nyakasane [Yehova, NWT] Nyamuzinda wawe n’omurhima gwawe goshi n’omûka [bugumaguma] gwawe gwoshi, n’obukengere bwawe boshi, n’emisi yawe yoshi.” (Mk. 12:30) K’ezo nderho ziyerekine obuzigire ojira kuli Nnâmahanga?
Yehova ye Nshôko ya ngasi kantu kinja washagalukire na ngasi kantu kinja washagalukira omu mango gayisha (Olole ecifungo ca 12-13)
12. Bulya gurhi oba ozigire Yehova? (Olole n’enfoto.)
12 Haba birhumire binji bwenene birhushumya rhuzigire Yehova. Kwa lwiganyo, wahikire aha wahugûkwa oku ye “nshôko y’obuzine” n’oku ye Muhanyi wa “ngasi ngalo nyinja na ngasi nshokano nkana.” (Enna. 36:9, Mashi Bible; Yk. 1:17) Ngasi kantu kinja rhushagalukira, emwa Nnâmahanga wirhu w’obuzigire na muhanyi karhenga.
13. Bulya gurhi engombôlo eba ngalo nyinja bwenene?
13 Engombôlo eba ngalo nyinja bwenene Yehova arhuhîre. Bulya gurhi rhwakaderha ntyo? Orhanye oku bwîra bwa hofi-hofi buba egarhi ka Yehova n’Omugala. Yezu adesire ntya: ‘Larha ananzigire’ na nani “nzigira Larha.” (Yn. 10:17; 14:31, Mashi Bible) Obo bwîra egarhi kabo bwagendekire bwasêra omu miliyare y’emyaka balamire haguma. (Mig. 8:22, 23, 30) Orhanyagye malumwa manganaci Nnâmahanga ayumvirhe erhi aleka Omugala alibuke n’okufâ. Yehova aba azigire bene bantu bwenene, ciru na nawe, n’oko ko kwarhumire ayemera okuhâna Omugala muzigirwa nterekêro ly’akuhashisa we n’abandi mulame ensiku n’amango. (Yn. 3:16; Gl. 2:20) Nta cindi cirhumire cilushire eco cakarhuma rhwazigira Nnâmahanga.
14. Omuhigo mwinja bwenene wakarhôla omu kalamo kawe go guhi?
14 Obuzigire bwawe kuli Yehova bwayushusire erhi oyiga binji okubimuyerekire. Kobinali olonzize omuyegere bwenene ene, n’ensiku n’amango. Wananahash’ijira ntyo. Omu njira y’olukogo akuhûnyire oshagaluse omurhima gwage. (Mig. 23:15, 16) Wanajira ntyo arhali kugerera enderho zawe zone cikone na kugerera ebijiro byawe. Oku olamire omu kalamo kawe kwanayerekana oku kobinali ozigire Yehova. (1 Yn. 5:3) Ogo go muhigo mwinja bwenene wakarhôla omu kalamo kawe.
15. Gurhi wakayerekanamwo obuzigire bwawe kuli Yehova?
15 Gurhi wakayerekanamwo obuzigire bwawe kuli Yehova? Burhangiriza, wanacihâna emwa Nnâmahanga muguma w’okuli kugerera isala lyago-lyago. (Enna. 40:8) Enyuma z’aho, wanayerekana embere z’abantu boshi oku wacihânyire emwa Nnâmahanga omu kubatizibwa. Nk’oku rhwaganiriraga embere mw’eci cigabi, obubatizo bwawe ko kasanzi k’omwishingo na ka bulagirire bwenene omu kalamo kawe. Omu kubatizibwa wanarhondera okulama akalamo kahyahya, arhali ly’ojira obulonza bwawe wenene cikone ly’ojira obulonza bwa Yehova. (Rm. 14:8; 1 Pt. 4:1, 2) Ogo gwanabonekana nka guli muhigo munene bwenene gw’okurhôla, na ntyo kobinali. Cikone gwanakuyigulira enjira y’okulama akalamo kinja bwenene. Omu njira nci?
16. Nk’oku biyerekinwe omu lwandiko lw’Ennanga 41:12, gurhi Yehova anahembemwo abahâna akalamo kabo lyo bamukolera?
16 Yehova ye Muntu oba muhanyi bwenene. Ciru wakamuha kantu kanganaci, ensiku zoshi anakugalulire binji kulusha ebi wamuhaga. (Mk. 10:29, 30) Akuha akalamo kinja bwenene, ka kushagalusa, na ka kurhimusa ciru n’ene mw’er’igulu ligalu-galu. N’ogo guli murhondero kone. Akalamo warhondera omu kubatizibwa karhakaba na buzinda. Wanagendekera wakolera Sho muzigirwa ensiku n’amango. Obuzigire egarhi kawe na Sho w’omu mpingu bwagendekera bwayushuka, na kandi wahikira aha walama ensiku n’amango nk’oku yene alama.—Osome Ennanga 41:12.
17. Bici Yehova arhagwerhi wakamuha?
17 Erhi wakarhôla omuhigo gw’okucihâna emwa Yehova n’okubatizibwa, wanaba n’olukengwa lw’okuha Sho w’omu mpingu akantu kinja bwenene. Akuhîre ngasi kantu kinja, ngasi kasanzi k’omwishingo washagalukire. Na nawe, wanaha Nn’empingu n’igulu kantu kalebe arhagwerhi, k’okuderha okumukolera n’obulonza n’obwishwekerezi. (Ayu. 1:8; 41:11; Mig. 27:11) Eyo yo njira nyinja bwenene wakakolesamwo akalamo kawe. Buzira karhinda, obuzigire bwawe kuli Yehova co cirhumire cinja bwenene cakakushumya obatizibwe.
K’OLI WARHINDIRA OKUBATIZIBWA?
18. Madoso gahi oshinganine ocidose?
18 Gurhigi oshuza kw’er’idoso, Ka wabatizibwa? Wene wakahash’ilishuzako. Cikone, kwanaba kwinja erhi wakacidosa ntya, ‘Bulya gurhi ndi narhindira okubatizibwa?’ (Ebj. 8:36) Okengere birhumire bisharhu rhwaganirire mw’eci cigabi. Burhangiriza, oba ozigire okuli n’obushinganyanya. Ocidose ntya, ‘Ka ndonzize mbone olusiku ngasi muntu akaderha okuli n’okujira ebishinganine?’ Bwa kabirhi, oba ozigire Yezu Kristu. Ocidose ntya, ‘Ka ndonzize Mugala wa Nnâmahanga abe Mwami wani, ka nandonzize okuyiga olwiganyo lwage?’ Bwa kasharhu, kulusha byoshi, oba ozigire Yehova. Ocidose ntya, ‘Ka ndonzize okushagalusa omurhima gwa Yehova omu kumukolera ye nka Nnâmahanga wani?’ Akaba oshuzize neci kw’ago madoso, cakarhumaga orhabatizibwa? Bulya gurhi oli warhindira?—Ebj. 16:33.
19. Bulya gurhi orhashinganini orhindire okubatizibwa? Ohâne olwiganyo. (Yowane 4:34)
19 Erhi akaba oli warhindira okubatizibwa, orhanye oku lwiganyo luguma Yezu akolesagya. (Osome Yowane 4:34.) Obwine oku Yezu ashushanyize okujira obulonza bw’Ishe n’ebiryo. Bulya gurhi? Bulya ebiryo biba binja kuli rhwe. Yezu al’imanyire oku ngasi kantu Yehova arhuhûnyire rhujire kaba kinja kuli rhwe. Yehova arhakalonza rhujire akantu koshi-koshi kakarhulerhera amazibu. Ka Yehova alonzize obatizibwe? Neci. (Ebj. 2:38) Co cirhumire wanayemera n’obwalagale oku okurhumikira irhegeko ly’okubatizibwa kwanakulerhera obunguke. Akaba orhakarhindira okulya ebiryo binja bwenene, bulya gurhi wakarhindira okubatizibwa?
20. Bici rhwaganirira omu cigabi cikulikire?
20 Bici birhuma bantu baguma na baguma barhindira okubatizibwa? Banji banashuza ntya, “Ntaciba tayari.” Kobinali omuhigo gw’okucihâna emwa Yehova n’okubatizibwa go muhigo gw’obulagirire bwenene wakarhôla omu kalamo kawe. Co cirhumire oshinganine orhanye bwenene kw’ogo muhigo, n’okuhikiriza ebihûnyirwe ly’obatizibwa kwanahûna akasanzi n’obushiru bunji. Cikone erhi akaba kobinali olonzize okurhôla ogo muhigo, bici wakajira ene ly’ocirheganya? Rhwaganirira ishuzo ly’er’idoso omu cigabi cikulikire.
LWIMBO 28 Rafiki ya Yehova Ni Nani?
a Okubatizibwa guli muhigo gw’obulagirire ngasi mwanafunzi w’Ebibliya ashinganine arhôle. Bici byakashumya omwanafunzi w’Ebibliya ly’arhôla ogo muhigo? Omu luderho luguma, buli buzigire. Cikone, buzigire kuli ndi n’oku bici? Mw’eci cigabi, rhwabona amashuzo kw’ago madoso na kandi rhwaganirira kalamo kahi rhwakaba nako erhi akaba rhuli Bakristu babatize.
