1. Bici bantu banji basimisibwe n’okuli bayisha oku ntimanano zirhu bashagalukira bwenene? (Olole n’enfoto.)

 ORHANYE mulume muguma na mukage bayishe oburhangiriza oku ntimanano omu Nyumpa y’Entimanano y’Abahamirizi ba Yehova. Bahumwe oku murhima bwenene omu kubona gurhi bayegerezibwe n’omwishingo n’omu kubona obuzigire buli egarhi k’abantu b’omu cigamba. Omu njira y’okugaluka ekâ, omukazi abwire iba ntya: ‘Aba bantu bali lubero n’abandi bantu rhwarhimanine nabo, nanashagalukire okuba haguma nabo.’

2. Bici byarhumire bene wirhu baguma na baguma baleka okukolera Yehova?

² Obuzigire buba egarhi k’abantu b’omu cigamba c’Ecikristu kobinali buba bwago-bwago. Cikone, Abahamirizi ba Yehova barhaba bimana. (1 Yn. 1:8) Co cirhumire oku rhugendekera rhwamanya bwinja abantu b’omu cigamba c’Ecikristu, ko rhunagendekera rhwabona obuzamba bwabo. (Rm. 3:23) Eby’okugayisa, kuli kubona oku bene wirhu na bali birhu baguma na baguma balesire obuzamba bw’abandi bwarhuma baleka okukolera Yehova.

3. Ecimanyiso ciyerekana abanafunzi b’okuli ba Yezu co cihi? (Yowane 13:34, 35)

³ Ocib’isoma olwandiko lw’omusingi lw’eci cigabi. (Osome Yowane 13:34, 35.) Cimanyiso cihi ciyerekana abanafunzi  b’okuli ba Kristu? Buli buzigire, ci arhali bwimana. Kandi, obwine oku Yezu arhaderhaga ntya: ‘Ecimanyiso mwabonerekwo oku muli baganda bani.’ Cikone adesire ntya: “Ecimanyiso abantu boshi babonerekwo oku muli baganda bani.” Muli ntyo, Yezu ayerekine oku arhali banafunzi bage bone cikone n’abantu b’embuga z’ecigamba c’Ecikristu bakamanyire abanafunzi bage b’okuli kugerera obuzigire burhali bwa kucikaliza bakayerekine egarhi kabo.

4. Bici bantu baguma na baguma bakalonza okumanya lugenda Abakristu b’okuli?

⁴ Bantu baguma na baguma barhali Bahamirizi ba Yehova banacidosa ntya: ‘Gurhi obuzigire buyerekanamwo abanafunzi b’okuli ba Yezu? Gurhi Yezu ayeresiremwo entumwa zage obuzigire? Na gurhi byakahashikanamwo okuyiga olwiganyo lwa Yezu ene?’ Kwanaba kwinja Abahamirizi ba Yehova barhanye bwenene oku mashuzo g’ago madoso. Okujira ntyo kwanarhurhabala rhuyerekane obuzigire bunji, ci bwenene omu mango ngasi muguma ali alembera obuzamba bw’owundi.​—Ef. 5:2.

5. Ohugûle enderho za Yezu ziri omu Yowane 15:12, 13.

⁵ Yezu ayerekine oku obuzigire bwago-bwago bwo bwakarhabire abantu bamanye abanafunzi bage. (Osome Yowane 15:12, 13.) Obwine oku Yezu abarhegesire ntya: “Muzigirane nk’oku nammuzigire.” Bici oko kuhugwîre? Nk’oku Yezu agendekire okuhugûla, obo buli buzigire bwa kucihâna, erhi buzigire bushumya Omukristu ciru ahikire aha afâ enyanya z’owabo mwemezi amango bihûnyire okujira ntyo. b

6. Gurhi Akanwa ka Nnâmahanga kayerekinemwo oku obuzigire buli bwa bulagirire bwenene?

⁶ Akanwa ka Nnâmahanga kayigirizize oku obuzigire buba bwa bulagirire bwenene.  Bantu banji banahire amandiko gakulikire oku liste y’amandiko basima bwenene: “Nyamuzinda aba buzigire.” (1 Yn. 4:8) “Okâzigira owinyu nk’oku ocizigira wenene.” (Mt. 22:39) “Obuzigire buzaza omwandu gw’ebyaha.” (1 Pt. 4:8) “Nta mango obuzigire bwahwe.” (1 Kr. 13:8) Ago mandiko n’agandi gayeresire ngasi muguma wirhu n’obwalagale kunganaci kuli kwa bulagirire okuyerekana obwo borhere bwinja bwenene.

7. Bulya gurhi rhwakaderha oku nta lusiku Shetani akahash’ilunga abantu haguma omu buzigire bw’okunali?

⁷ Bantu banji banadose ntya: ‘Gurhi nakamanyamwo idîni ly’okuli? Amadîni goshi ganaderhe oku ganayigirize okuli, cikone ngasi idîni linayigirize akantu kali lubero lugenda Nnâmahanga.’ Shetani arhondezize madîni manji ga bunywesi n’oko kunarhume abantu bayabirwa okumanya idîni ly’okuli. Cikone nta lusiku akahash’irhondeza omulala gw’omw’igulu lyoshi gw’Abakristu bazigirine bone na nnene. Yehova yene wakahasha okujira ntyo. Okwo kuyumvikine bulya obuzigire bw’okunali emwa Yehova burhenga; abantu bagwerhe iroho lyage n’emigisho yage bone bakaba n’obuzigire bw’okunali egarhi kabo. (1 Yn. 4:7) Co carhumaga Yezu aderha oku abanafunzi bage bone bo bakabire n’obuzigire bw’okunali egarhi kabo.

8-9. Gurhi bantu banji baciyumvirhe enyanya z’obuzigire babwine egarhi k’Abahamirizi ba Yehova?

⁸ Nk’oku Yezu analebaga, bantu banji bahashire okumanya abanafunzi bage b’okuli kugerera obuzigire bw’okunali bayerekana egarhi kabo. Kwa lwiganyo, mwene wirhu muguma ohamagalwa Ian akengire entimanano nkulu ntangiriza ajagako yajiriragwa omu stade y’emicezo hofi n’aha mwage. Myezi misungunu embere z’aho, Ian ali mw’eyo stade ly’alola omucezo. Adesire ntya: “Hali lubero lunji egarhi k’abantu bali kw’eyo ntimanano nkulu n’aba nabonaga kw’ogo mucezo. Abahamirizi bali birhohye banal’iyambirhe bwinja, n’abana babo bakag’icigendesa bwinja.” Ayushwire ntya: “Kulusha byoshi, abo bantu bakag’ibonekana oku barhimusirwe banagwerhe omurhûla, ko na kantu nakag’icifinja. Ntacikengiri ciru hotuba nguma omu hotuba zajiragwa olwo lusiku, cikone olugenzi lw’Abahamirizi lwo ncigendekire nakengera.” c Kobinali, obuzigire bw’okuli rhuyerekana egarhi kirhu bo burhuma rhwaba n’olugenzi lwa ntyo. Bulya rhuba rhuzigire bene wirhu na bali birhu, rhunabajirire omu njira y’olukogo na ya bukenge.

⁹ Mwene wirhu muguma ohamagalwa John naye acibwinire ntyo erhi aja oku ntimanano z’Abahamirizi ba Yehova oburhangiriza. Adesire ntya: “Nashagalukire bwenene obwîra . . . ngasi muguma anyeresire eyo munda, bakag’ibonekana nka batagatifu. Obuzigire bwabo bw’okunali bwanyemeza n’obwalagale oku nabwine idîni ly’okuli.” d Ebyo n’ebindi bintu abantu bacibonera, binayerekane n’obwalagale oku rhwe Bakristu b’okuli.

10. Mangaci rhuba n’obulyo bwago-bwago bw’okuyerekana obuzigire bw’Ecikristu? (Olole n’amahugûlo g’idako.)

¹⁰ Nk’oku rhwaganiriraga oku murhondero gw’eci cigabi, nta muguma omu birhu bemezi oba mwimana. Hali amango bajira erhi kuderha akantu kakarhugayisa. e (Yk. 3:2) Omu mango ga ntyo, rhunabe n’obulyo bwago-bwago bw’okuyerekana obuzigire bw’Ecikristu kugerera oku rhujira. Lugenda oko, gurhi  rhwakayigamwo olwiganyo Yezu ayerekine?​—Yn. 13:15.

11. Ngeso mbi zihi Yakobo na Yowane bayerekine? (Olole n’enfoto.)

¹¹ Yezu arhalongezagyako abanafunzi bage obwimana. Lubero n’oko, omu njira y’obuzigire akag’ibarhabala bakubûle engeso mbi z’obumuntu bwabo lyo bayemerwa na Yehova. Mango maguma, baganda bage babirhi, ko kuderha Yakobo na Yowane, barhuma nnina ahûne Yezu oku abahe ecikono cilengerire omu Bwami bwa Nnâmahanga. (Mt. 20:20, 21) Muli ntyo, Yakobo na Yowane bayerekana engeso y’obucibone banalonza babonekane ba bulagirire kulusha abandi.​—Mig. 16:18.

12. Ka Yakobo na Yowane bone bayerekine engeso mbi? Ohugûle.

¹² Arhali Yakobo na Yowane bone bayerekine engeso mbi muli ago mango. Olole gurhi ezindi ntumwa zajijire: ‘Erhi balya ikumi bayumva okwo, bakunirira balya babo babirhi.’ (Mt. 20:24) Rhwanarhanya oku habire akadali kadarhi egarhi ka Yakobo na Yowane n’ezindi ntumwa. Nkaba ezindi ntumwa zadesire enderho ziri nk’ezi: ‘Murhanyize oku muba ba ndi lyo muhûna ebikono bilengerire omu Bwami bwa Nnâmahanga? Arhali mwene mwakozire bwenene haguma na Yezu. Nirhu rhushinganine akinyu akuhabwa olukengwa lwago-lwago!’ Abe entumwa zadesire  ntyo erhi nanga, zalesire ako kanga karhume zirhayerekana obuzigire bw’Ecikristu egarhi kabo omu kasanzi kalebe.

13. Gurhi Yezu agendekire ajirira entumwa zage ciru akaba zal’igwerhe obuzamba? (Mateyo 20:25-28)

¹³ Gurhi Yezu ajijire mw’ako kanga? Yezu arhakuniraga. Arhaderhaga oku akola alonza abanafunzi binja bwenene bakabire birhohye bwenene n’okujirirana omu njira y’obuzigire ensiku zoshi. Cikone, Yezu arhanya n’obulembedu haguma n’abo balume b’emirhima minja. (Osome Mateyo 20:25-28.) Agendekera abajirira omu njira y’obuzigire, ciru akaba kanji-kanji bakag’ilonza okumanya ndi mukulu bwenene mulibo.​—Mk. 9:34; Lk. 22:24.

14. Nkomedu zihi entumwa za Yezu zakuliragamwo?

¹⁴ Buzira karhinda Yezu akag’ikengera enkomedu entumwa zage zakuliragamwo. (Yn. 2:24, 25) Bakuliraga omu eneo abakulu b’amadîni bakag’iyigiriza oku abantu banaba ba bulagirire erhi bakaba bamanyikine bwenene banagwerhe ebikono bilengerire. (Mt. 23:6) Kandi abakulu b’idîni ly’Eciyahudi bakag’icibona oku bali bashinganyanya. f (Lk. 18:9-12) Yezu al’ihugûsirwe oku entanya za ntyo zakashumize oku entumwa zakag’icibona n’oku zakag’ibona abandi. (Mig. 19:11) Arhakag’irhanya oku nta mango abanafunzi bage bajira amagosa, n’erhi bakajijire amagosa akag’ibalembera. Al’imanyire oku bagwerhe omurhima mwinja, co carhumaga abarhabala omu njira y’obulembedu babe n’obuzigire ahali h’engeso y’obucibone n’okulonza okuba ba bulagirire kulusha abandi.

15. Bici omwanzi guganirire Yakobo na Yowane gurhuyigirizize?

¹⁵ Oku Yakobo na Yowane bajiraga kwanarhuyigiriza binji. Bajijire igosa omu kuhûna ebikono bilengerire omu Bwami. Cikone ezindi ntumwa nazo zajijire kubi omu kuleka ako kanga kashereze ecinyabuguma cali egarhi kabo. Cikone, Yezu ajirira ezo ntumwa zoshi 12 omu njira nyinja na ya buzigire. Isomo lihi oko kurhuyigirizize? Akantu k’obulagirire arhali oku abandi bantu bajira kone cikone kandi oku rhujira lugenda amagosa n’obuzamba bwabo. Bici byakarhurhabala? Erhi owirhu mwemezi akarhugayisa, rhwanacidosa ntya: ‘Bici birhumire ebi anajijire byangayisa bwenene? K’oku kurhayerekini oku hali buzamba bulebe nshinganine ndwise? K’arhakaba oyo muntu wangayisize ali alwisa mazibu malebe? Ciru akaba ndi naciyumva oku ngwerhe ecirhumire cinja c’okugaya, ka ntakamuyeresa obuzigire n’okumubabalira?’ Oku rhwagendekera rhwajirira abandi omu njira y’obuzigire, ko rhwanagendekera rhwayerekana oku rhuli banafunzi b’okuli ba Yezu.

16. Bindi bici olwiganyo lwa Yezu lwakarhuyigiriza?

¹⁶ Kandi olwiganyo lwa Yezu lurhuyigirizize oku rhukacihangana rhumanye bwinja abirhu bemezi. (Mig. 20:5) Kobinali, Yezu al’igwerhe obuhashe bw’okusoma emirhima. Rhwehe rhurhagwerhi obo buhashe. Cikoki rhwanahasha okulembera bene wirhu na bali birhu amango barhugokize. (Ef. 4:1, 2; 1 Pt. 3:8) Kwanaba kulembu kuli rhwe okujira ntyo erhi rhwakacihangana okuyiga binji kuli bo. Rhuganirire lwiganyo luguma.

17. Bunguke buhi mwangalizi muguma w’omuzunguko abire nabo omu kuhikira okumanya owabo mwemezi bwinja?

¹⁷ Mwangalizi muguma w’omuzunguko  okolera omu Afrique de l’Est akengire mwene wirhu muguma akag’irhanya oku arhajira borhere bwinja. Gurhi oyo mwangalizi w’omuzunguko ajijire? Adesire ntya: “Ahali h’okukayaka oyo mwene wirhu, nahiga oku nacihangana mumanye bwinja.” Omu kujira ntyo, oyo mwangalizi w’omuzunguko amanya bintu bilebe lugenda akanga oyo mwene wirhu akuliragamwo karhumaga aba nk’oko al’iyosire. Acibir’iderha ntya: “Erhi mpugûkwa oku oyo mwene wirhu akag’ijira okwage koshi ly’ahima engeso zage mbi n’empindûlo ali amahikira okujira, namushagalukira. Rhwahikira okuba bîra binja.” Kobinali, erhi rhucihangana okumanya bene wirhu na bali birhu bwinja, kanji-kanji kunabe kulembu kuli rhwe okubayeresa obuzigire.

18. Madoso gahi rhwakacidosa erhi akaba hali mwene wirhu erhi mwali wirhu warhugokize? (Emigani 26:20)

¹⁸ Hali amango rhwakabona oku kuli kwa bulagirire rhugend’iganiza owirhu mwemezi warhugokezagya. Cikone embere rhujire ntyo, kwanaba kwinja rhucidose amadoso gali nk’aga: ‘Ka mmanyire binji lugenda ako kanga?’ (Mig. 18:13) ‘K’arhakaba arhangokize n’obulonza?’ (Muh. 7:20) ‘Ka nta mango nani nkola njijire igosa liri nk’eryo?’ (Muh. 7:21, 22) ‘Omu kuganiza oyu muntu, ka najira amazibu gabe madarhi bwenene kulusha aga rhuli rhwalonza okuyusa?’ (Osome Emigani 26:20.) Erhi rhwakaciha akasanzi k’okurhanya oku madoso gali nk’ago, nkaba rhwanabona oku obuzigire bwirhu kuli oyo mwene wirhu bwanarhushumya rhuleke okurhanya kw’ebi anarhujiriraga.

19. Bici ohizire okujira?

¹⁹ Nka cigusho, Abahamirizi ba Yehova bali bayerekana oku bo banafunzi b’okuli ba Yezu. Ngasi muguma wirhu anayerekane oku rhuli banafunzi b’okuli ba Yezu omu mango ali ayereka bene wirhu na bali birhu obuzigire burhalimwo kucikaliza ciru akaba bagwerhe obuzamba. Omu kujira ntyo, rhwanarhabala abandi bamanye idîni ly’okuli n’okucilunga haguma na nirhu omu kuharamya Yehova, Nnâmahanga w’obuzigire. Lekagi rhuhige okugendekera rhwayerekana obuzigire bulya co cimanyiso c’Abakristu b’okuli.