1. Bici ababusi baba balonzize?

 MWE babusi, rhumanyire oku muba mulonzize murhabale abana binyu bahikire aha bamanya Yehova n’okumuzigira. Cikone Nnâmahanga arhabonekana. Gurhi mwakarhabalamwo abana binyu bakamubona nka Muntu w’okunali n’okumuyegera?​—Yk. 4:8.

2. Gurhi ababusi bakayigirizamwo abana babo lugenda amorhere ga Yehova?

² Enjira y’obulagirire y’okurhabala abana bayegere Yehova kuli kuyiga Ebibliya haguma nabo. (2 Tm. 3:14-17) Cikone, Ebibliya eyerekine eyindi njira abana bakayigamwo lugenda Yehova. Omu citabu c’Emigani, bibonekine oku mulume muguma ali akengeza omugala oku arhahiraga akayibagira amorhere ga Yehova, gabonekana kugerera obulemi. (Mig. 3:19-21) Rhwaganirira njira nguma na nguma ababusi bakakolesamwo obulemi lyo barhabala abana babo bayige lugenda amorhere ga Yehova.

3. Burhabale buhi ababusi bashinganine bahe abana babo?

³ Ebibliya edesire oku ‘kurhenga amango Nnâmahanga alemaga igulu amorhere gage garhabonekana ganabonekane omu mikolo ajiraga.’ (Rm. 1:20, Mashi Bible) Mwe babusi, bibonekine oku munashagalukire okugeza akasanzi embuga z’aha kâ haguma n’abana binyu. Mukakolesa ako kasanzi lyo murhabala abana binyu babone gurhi amorhere minja ga Yehova gabonekana kugerera ‘emikolo ajiraga.’ Lugenda oko, lekagi rhulole bici ababusi bakac’iyigiriza kugerera olwiganyo lwa Yezu.

4. Gurhi Yezu akolesizemwo obulemi ly’ayigiriza abanafunzi bage? (Luka 12:24, 27-30)

⁴ Lola gurhi Yezu akolesizemwo obulemi ly’ayigiriza. Mango maguma, ahûna abanafunzi bage balolereze bahungwe n’amauwa.  (Osome Luka 12:24, 27-30.) Yezu akakolesize ensimba erhi omurhi anal’ilonzize, cikone acishoga akanyunyi n’eliuwa abanafunzi bage bal’imanyire bwinja. Byanahashikana oku abanafunzi bakag’ibona bahungwe bali babalala enyanya zabo n’amauwa minja gali omu mashwa. Obone omu bwenge bwawe gurhi Yezu ali aderha anali ashunga ebyo bintu omunwe. Na bicigi ajijire enyuma z’okuganirira ezo nyinganyo? Ayigiriza abanafunzi bage er’isomo linja bwenene lugenda gurhi Ishe w’omu mpingu aba muhanyi na wa lukogo: Yehova alisa n’okuyambika abakozi bage bishwekerezi nk’oku ajirira bahungwe n’amauwa.

5. Nyiganyo zihi z’obulemi ababusi bakakolesa lyo bayigiriza abana babo lugenda Yehova?

⁵ Mwe babusi, ka mwayiga enjira ya Yezu y’okuyigiriza? Nkaba wanaganirira omwana wawe lugenda kantu kalebe oshagalukira omu bulemi, kwa lwiganyo ensimba erhi omurhi osima bwenene. Omu mango oli wajira ntyo, orhayibagiraga okumuhugûlira ebi olo lwiganyo luyerekine lugenda Yehova. Buzinda wanadosa omwana wawe nsimba ehi erhi murhi guhi asima bwenene. Erhi wakakolesa kantu kalebe k’omu bulemi aba ashagakukire bwenene, nkaba ciru anasegeza obwenge bwenene kw’ebi oli waderha lugenda amorhere ga Yehova.

6. Bici olwiganyo lwa nnina wa Christopher lwakarhuyigiriza?

⁶ K’ababusi bashinganine bageze kasanzi kanji bali balonza nsimba ndebe erhi murhi mulebe gwago-gwago embere baganirire abana babo ebi eyo nsimba erhi ogo murhi guyerekine lugenda Yehova? Oko kurhali kwa bulagirire. Yezu arhahânaga amahugûlo malîri lugenda gurhi bahungwe balyamwo erhi gurhi amauwa gakula. Kobinali, hali amango omwana wawe akashagalukira enganîro ndîri okubiyerekire obulemi, cikone hali amango enderho nsungunu erhi idoso lyone lyakamurhabala okuhugûkwa ebi olonzize okumuyigiriza. Olole ebi mwene wirhu muguma ohamagalwa Christopher akengire aciboneraga erhi aciri murho: “Nyâma akag’iderha nderho nsungunu zone ly’arhurhabala rhushagalukire obulemi burhuzungulusire. Kwa lwiganyo, erhi rhwakabire rhuli hofi n’entôndo, akadesire ntya: ‘Lola gurhi ezo ntôndo ziri nnenene na yinja bwenene! Ka Yehova arhali wa kusomeza obo?’ Erhi kandi amango rhwakabire rhuli hofi n’enyanja, akadesire ntya: ‘Lola obuhashe bw’eyo milaba! Ka Nnâmahanga arhagwerhi buhashe bunji?’” Christopher adesire ntya: “Ezo nderho nsungunu zihugwîre binji zakag’irhurhabala lyo rhurhanya.”

7. Gurhi wakakomerezamwo abana bawe lyo bakarhanya bwenene oku bulemi?

⁷ Amango abana bawe bali bakula, wanabayigiriza okusegeza bwenene obwenge bwabo oku bulemi n’okuderha bici bubayigirizize lugenda amorhere ga Yehova. Wanaganirira kantu kaguma kone Nnâmahanga alemire n’okudosa abana bawe ntya: “Bici aka kantu kakuyigirizize lugenda Yehova?” Nkaba wanasomerwa okuyumva ebi baderha.​—Mt. 21:16.

8. Bulyo buhi ababusi Baisraheli bakag’iba nabo erhi bakabire bali balambagira “omu njira”?

⁸ Ababusi Baisraheli bal’ihûnyirwe bakayigiriza abana babo ebidesirwe omu marhegeko ga Yehova “amango bali balambagira omu njira [ibarabara].” (Lush. 11:19) Omu cihugo c’e Israheli amabarabara gal’igezire omu eneo zoshi za kuli n’evile. Byakag’ihashikana okubona ensimba ziri lubero, orhunyunyi rhuli lubero, n’amauwa gali lubero. Erhi emilala y’Abaisraheli yakabire eri yalambagira omw’ibarabara, ababusi bakag’iba n’obulyo bw’okurhabala abana babo basimisibwe n’obulemi bwa Yehova. Mwe babusi, ninyu mugwerhe obulyo  buli nk’obo bw’okukolesa obulemi lyo muyigiriza abana binyu. Rhuganirire gurhi babusi baguma na baguma bajijiremwo ntyo.

9. Bici olwiganyo lwa Punitha na Katya lwakakuyigiriza?

⁹ Muzire muguma ohamagalwa Punitha, olama omu vile nnene y’omu cihugo c’e Inde, adesire ntya: “Erhi rhulambagirira omulala omu eneo eba kuli n’evile, rhunabone oku obo buli bulyo bw’okurhabala abana birhu bayige binji lugenda ebintu binja bwenene Yehova alemire. Nambone oku abana bani banahugûkwe bwinja obulemi amango bali kuli n’amabarara g’omu vile gayunjwiremwo abantu n’emituga.” Mwe babusi, nkaba abana binyu barhakayibagira ciru n’ehitya akasanzi mwagezize nabo hantu halebe hinja bwenene. Mwali wirhu muguma w’omu cihugo c’e Moldavie ohamagalwa Katya, adesire ntya: “Akasanzi kinja k’omu burho nkengera bwenene kali kasanzi nagezagya haguma n’ababusi bani omu eneo ya kuli n’evile. Mbavuzire omunkwa okubona banyigirizize nanciri murho okukaciha akasanzi k’okulolereza ebi Yehova alemire n’okumubona kugerera obulemi bwage.”

10. Gurhi ababusi bakajira erhi akaba kuli kuzibu kulibo akubalamira omu eneo ya kuli n’evile? (Olole ecisanduku cidesire “ Oburhabale oku Babusi.”)

¹⁰ Gurhigi wakajira erhi akaba orhakahasha okubalamira omu eneo ya kuli n’evile? Amol, naye olama omu cihugo c’e Inde, adesire ntya: “Emunda ndama, ababusi banakakola nsa nyinji n’okubalamira omu eneo ya kuli n’evile kwanahûna nsaranga nyinji. Cikone, wanabona obulemi bwa Yehova n’okuganirira amorhere gage erhi wakaba oli omu jardin nsungunu erhi ahandi hantu wakayimanga enyanya z’enyumpa.” Erhi wakalabiriza bwinja, kandi nkaba wanavumbula bintu binji by’obulemi biri hofi n’enyumpa yawe wakayeresa abana bawe. (Enna. 104:24) Nkaba wanabona orhunyunyi, ebiruru, emirhi, n’ebindi binji. Karina, w’omu cihugo c’e Allemagne, adesire ntya: “Nyâma anazigire amauwa, co cirhumire amango naciri munyere murho, akag’irhuyeresa  amauwa minja bwenene ngasi mango erhi rhwakalambagire haguma.” Mwe babusi, kandi mwanayigiriza abana binyu omu kukolesa video nyinji n’ebicapo binji biganirire obulemi ikubuliro lya Yehova lyarhuhîre. Kobinali, ciru wakaba olamire ngahi wanarhabala abana bawe lyo bakalolereza ebi Nnâmahanga alemire. Lekagi rhuganirire morhere ga Yehova maguma na maguma wakaganirira abana bawe.

11. Gurhi ababusi bakarhabalamwo abana babo bahugûkwe obuzigire bwa Yehova?

¹¹ Ly’orhabala abana bawe bahugûkwe obuzigire bwa Yehova, wanaganirira enjira y’obuzigire nsimba nyinji zishibiriramwo ebyana byazo. (Mt. 23:37) Kandi wanaganirira ebintu binja bya mbero nyinji rhushagalukira bwenene omu bulemi. Karina, rhwaganiriraga embere, adesire ntya: “Erhi rhwakagenzir’ilambagira, nyâma akag’impa omurhima nyimange n’okulola gurhi ngasi liuwa liri lyago-lyago na gurhi obwinja bwago buyerekinemwo obuzigire bwa Yehova. Hamagera myaka minji kurhenga ago mango, cikone nancilolereze bwinja-bwinja amauwa; gurhi ngasi liguma liri lubero n’elindi, gurhi liyosire n’irangi lyalyo. Gacigendekire gankengeza kunganaci Yehova aba arhuzigire.”

12. Gurhi ababusi bakarhabalamwo abana babo bahugûkwe obwenge bwa Nnâmahanga? (Ennanga 139:14) (Olole n’enfoto.)

¹² Orhabale abana bawe bahugûkwe obwenge bwa Nnâmahanga. Kobinali Yehova aba wa bwenge bunji bwenene kurhulusha. (Rm. 11:33) Kwa lwiganyo, wanabaganirira gurhi amishi gasoka emalunga n’okuhinduka bitû na gurhi ebyo bitû bija byaja eyi n’eyi buzira mazibu. (Ayu. 38:36, 37) Kandi wanabaganirira enjira nyinja bwenene omubiri gw’omuntu gwalemirwemo. (Osome Ennanga 139:14.) Yumva gurhi mulume muguma ohamagalwa Vladimir ajijiremwo ntyo. Adesire ntya: “Lusiku luguma, mugala wirhu ahirima okw’ikinga lyage anayagalika. Enyuma za nsiku nsungunu eco cihulu cafuma. Nie na mukanie rhwamuhugûlira oku Yehova alemire omubiri gwirhu n’obuhashe bw’okucifumya. Rhwamuyeresa oku rhurhasag’ibona akantu kali nk’ako omu bintu abantu batula. Kwa lwiganyo, omutuga gurhacitengeneza gone enyuma z’okujira e aksida. Ebyo byahikiraga mugala wirhu byamurhabala ahugûkwa obwenge bwa Yehova.”

13. Gurhi ababusi bakarhabalamwo abana babo bahugûkwe obuhashe bwa Nnâmahanga? (Izaya 40:26)

 ¹³ Yehova arhuhûnyire oku rhuyinamule amasu emalunga n’okurhanya bwenene lugenda gurhi obuhashe bwage bw’okusomeza bujira enyenyezi zibere oku nafasi yazo. (Osome Izaya 40:26.) Wanaha abana bawe omurhima bakagalamira emalunga n’okurhanya bwenene kw’ebi bali babona. Mwali wirhu Tingting, w’omu cihugo c’e Taiwan, akengire ebi abonaga erhi aciri murho. Adesire ntya: “Mango maguma, nyâma ampêka rhwajijira ikambi omu eneo ya kuli n’evile, rhwanakalola amalunga bwinja-bwinja budufu bulya garhal’ifulisirwe n’amatara manji g’omu vile. Ago gali mango nakag’iyoboha enshumi z’abirhu nanakag’icidosa erhi nahasha okugendekera nakolera Yehova n’obwishwekerezi. Nyâma ampa omurhima ntanye oku misi Yehova akolesize ly’alema ezo nyenyezi zoshi nankengere oku kobinali anakolesa eyo misi ly’antabala ndwise ngasi irhangulo. Enyuma z’okulolereza obulemi mw’ogo mubalamo, oko kwanshumya ndonze okumanya Yehova bwinja, nanazibuhya omuhigo gwani gw’okumukolera.”

14. Gurhi ababusi bakakolesamwo obulemi lyo barhabala abana babo babone oku Yehova aba Nnâmahanga w’omwishingo?

¹⁴ Ebintu Yehova alemire biba biyerekine oku aba wa mwishingo n’oku alonzize rhukashagaluka. Abasomire eby’esiyanse bahikire aha babona oku hofi ensimba zoshi zinasharhe, ciru n’orhunyunyi n’ensamaki. (Ayu. 40:20) K’okola obwine abana bawe bali basheka omu kubona ensimba eri yasharha? Nkaba babona ehyana hya nyabu hiri hyahiva ecibungo c’enyuzi erhi rhubwana rhuli rhwakubana. Agandi mango abana bawe basheka omu kubona ensimba eri yasharha-sharha omu jira y’okusomeza, wanabakengeza oku rhunakolere Nnâmahanga w’omwishingo.​—1 Tm. 1:11.

15. Bici byakarhabala ababusi lyo bamanya entanya z’abana babo? (Emigani 20:5) (Olole n’enfoto.)

¹⁵ Hali amango ababusi babona oku kuli kuzibu okurhabala abana babo babaganirire amazibu bali balwisa. Akaba ako ko kanga kawe, byanahûna ojire okwawe koshi ly’omanya ebibali emurhima. (Osome Emigani  20:5.) Babusi baguma na baguma banabone oku kuli kulembu okujira ntyo amango bali bashagalukira obulemi haguma n’abana babo. Bulya gurhi? Ecirhumire ciguma kuli kuba hanabe harhali bintu binji byakarhuma abana n’ababusi barhasegeza obwenge kw’ebi bali babona. Mushamuka muguma w’omu Taiwan ohamagalwa Masahiko ayerekine ecindi cirhumire: “Erhi rhugeza akasanzi embuga z’aha kâ haguma n’abana birhu omu kulambagira omu ntôndo erhi kulambagira oku mashinji, kanji-kanji banaciyumve baluhusire bwenene. Muli oko, kunabe kulembu kuli rhwe okubaganiza n’okumanya ebibali emurhima.” Katya, rhwaganiriraga embere, adesire ntya: “Enyuma z’amasomo, nyâma akag’impeka omu bustani nyinja bwenene. Mw’ako kanga nakag’iba nduhusire bwinja, nakag’ibona oku kuli kulembu okumubwira ebyabire emasomo n’ebiri byampangayisa.”

16. Gurhi abantu b’omu mulala bakaluhuka n’okucishagalusa haguma amango bali balolereza obulemi bwa Yehova?

¹⁶ Amango abantu b’omulala bali bashagalukira ebintu Yehova alemire, banaluhuka n’okucishagalusa haguma, n’oko kwanabarhabala okuzigirana bwenene. Ebibliya edesire oku haba “amango g’okusheka” n’“aga okusâma.” (Muh. 3:1, 4) Yehova alemire hantu hanji hinja bwenene okw’igulu rhwakajiriraho ebintu rhusima. Milala minji enashagalukire okuba haguma omu parke, omu eneo eri kuli n’evile, erhi oku mashinji. Bana baguma na baguma basima okulibirha omu bustani n’okusharhiramwo, okulolereza ensimba erhi okuyoga omu lwishi erhi omu nyanja. Rhujira bulyo bunji bwenene bw’okushagalukira ebintu Yehova alemire!

17. Bulya gurhi ababusi bashinganine barhabale abana babo bakashagalukira obulemi bwa Nnâmahanga?

¹⁷ Omw’igulu lihyahya, ababusi n’abana bayish’ishagalukira obulemi bwa Yehova bwenene kulusha embere. Lubero n’oku biyosire ene, rhurhakaba n’ecirhumire coshi-coshi c’okuyoboha ensimba; nazo zirhakarhuyoboha. (Iz. 11:6-9) Rhwayish’iba n’akasanzi k’okushagalukira obulemi bwa Yehova ensiku n’amango. (Enna. 22:26) Cikone mwe babusi, murhalindaga mpu kuhika ako kasanzi kahike lyo murhabala abana binyu barhondere okushagalukira obulemi. Erhi mwakakakolesa obulemi lyo muyigiriza abana binyu lugenda Yehova, nkaba banahikira aha bayemera ezi derho za Mwami Daudi: “Nta mulenga ohisire okw’ikola lyawe.”​—Enna. 86:8.