1. Njira nguma ehi Ayubu ahikiremwo okumanya Yehova bwinja?

 OMU nshambalo zoshi Ayubu ajijire omu kalamo kage, enshambalo ajiraga haguma na Yehova Nnâmahanga zo zali za kusimisa bwenene. Lyo Yehova arhabala Ayubu ayemere n’obwalagale oku ajira obwenge n’obuhashe bw’okushibirira abakozi bage, amuyeresa bintu biguma na biguma by’okusomeza bwenene alemire. Kwa lwiganyo, Nnâmahanga akengeza Ayubu oku analise ensimba, co cirhumire akahashire okushibirira na Ayubu. (Ayu. 38:39-41; 39:1, 5, 13-16) Omu kulolereza biremwa bilebe, Ayubu ayiga binji lugenda amorhere ga Nnâmahanga wage.

2. Bulya gurhi hali amango kwakaba kuzibu kuli rhwe okulolereza obulemi bwa Yehova?

² Nirhu rhwanayiga binji lugenda Nnâmahanga wirhu amango rhuli rhwalolereza ebintu alemire. Cikone, hali amango kwakaba kuzibu kuli rhwe okujira ntyo. Erhi akaba rhuba rhulamire omu vile, nkaba ngasi lusiku rhurhabona bintu binji Yehova alemire. Ciru akaba rhurhaba rhulamire omu vile, nkaba rhwanabona nka rhurhajira kasanzi kanji k’okulolereza ebi Yehova alemire. Co cirhumire, rhuganirirage bulya gurhi kuba kwinja rhukaciha akasanzi n’obushiru bw’okulolereza obulemi. Rhwabona gurhi Yehova na Yezu bakolesize obulemi lyo bayigiriza, n’agandi masomo rhwakaciyigiriza kugerera obulemi.

3. Bici biyerekine oku Yehova al’ilonzize Adamu ashagalukire obulemi?

³ Yehova al’ilonzize omuntu murhangiriza ashagalukire obulemi bwage. Erhi Nnâmahanga alema Adamu, amuhîre eparadizo erhal’isherezibwe n’akantu koshi-koshi akashagalukire, amuha n’omukolo gw’okuyihinga n’okuyigalihya. (Murh. 2:8, 9, 15) Orhanye gurhi Adamu akag’ishagaluka omu mango akag’ilolereza gurhi emburho ziri zamera na gurhi ziri zajako amauwa.  Adamu agwerhe olukengwa lunene lw’okushibirira obustani bw’e Edeni! Kandi Yehova al’ihîre Adamu omukolo gw’okuha ensimba zoshi amazino. (Murh. 2:19, 20) Yehova yene akac’ishozire izino lya ngasi nsimba; cikone, aha Adamu ogo mukolo. Buzira karhinda, embere Adamu acishoge izino aha ngasi nsimba, akag’iyiyiga bwinja-bwinja, akalabiriza oku yal’iyosire embuga n’oku yakag’icigendesa. Adamu agwasirwe abe ashagalukire okujira ogo mukolo. Kobinali, ogo mukolo gwamuhîre obulyo bw’okushagalukira bwenene obwenge bw’Ishe, obulenga bwage n’obulemi bwage.

4. (a) Cirhumire ciguma cihi cishinganine cirhushumye rhukalolereza obulemi? (b) Biremwa bihi oshagalukira bwenene?

⁴ Ecirhumire ciguma cirhushumya rhukalabiriza obulemi kuli kuba bulya Yehova alonzize rhukajira ntyo. Arhubwizire ntya: “Yinamuliri amasu enyanya mucîbonere.” Enyuma z’aho, arhudosize ntya: “Ndi wajiraga ebyo biremwa?” Rhumanyire ishuzo bwinja. (Iz. 40:26) Yehova ayunjuzize empingu n’igulu ciru n’enyanja bintu binji bya kusomeza bwenene byakarhuyigiriza binji kuli ye. (Enna. 104:24, 25) Kandi orhanye lugenda oku Nnâmahanga arhulemire. Arhuhîre obuhashe bw’okushagalukira ebintu binja birhuzungulusire rhubona. Arhuhîre obuhashe bw’okubona, okuyumva, okuhuma, okulabula n’okubayiza. Obwo buhashe boshi bunarhuhashise rhushagalukire ebintu biri lubero alemire.

5. Nk’oku olwandiko lw’Abaroma 1:20 luyerekine, gurhi rhuyungukamwo omu kuyiga obulemi bwa Yehova?

⁵ Ebibliya eyerekine ecindi cirhumire c’obulagirire cishinganine cirhushumye rhukalolereza obulemi. Erhuyigirizize lugenda amorhere ga Yehova. (Osome Abaroma 1:20.) Kwa lwiganyo, olole oku bintu Yehova alemire onabone gurhi biba bilemirwe bwinja-bwinja bwenene. Ka birhayerekana obwenge bwa Nnâmahanga? Kandi orhanye oku biryo biri lubero rhushagalukira. Ebyo biryo binayerekane n’obwalagale obuzigire ajira kuli bene bantu. Erhi rhubona amorhere ga Yehova kugerera ebintu ajijire, rhunahikire aha rhwamumanya bwinja n’oko kunarhushumye rhumuyegere bwenene. Lekagi rhuganirire njira nguma na nguma Yehova akolesizemwo obulemi ly’ayigiriza bene bantu amasomo g’obulagirire.

6. Isomo lihi rhwakaciyigiriza omu kulolereza orhunyunyi rhubunga?

⁶ Yehova ahizireho akasanzi bintu biguma na biguma bishinganine bijirikane. Ngasi mwaka, kurhangira oku buzinda bw’Omwezi gwa 2 kuhika omu garhi k’Omwezi gwa 5, Abaisraheli bakag’ibona ba lubôndo badwirhe babalala omu cihugo cabo amango bakag’iba bali bahamira  omu eneo y’emwenè (Nord). Nnâmahanga abwira Abaisraheli ntya: “Ciru na lubondo ayishi akasanzi k’okubunga.” (Yer. 8:7, Mashi Bible) Nk’oku Yehova anahiriragaho orho rhunyunyi akasanzi k’okubunga, ko anahizireho akasanzi k’okuhikiriza emanja zage. Ene, erhi rhubona orho rhunyunyi rhubunga, rhunakengezibwe oku rhwanalangalira oku Yehova agwerhe “amango” ahizireho g’okulerha obuzinda bw’er’igulu ligalu-galu.​—Hab. 2:3.

7. Okulolereza oku akanyunyi kabalala, bici kwakarhuyemeza n’obwalagale? (Izaya 40:31, Mashi Bible)

⁷ Yehova anahe abakozi bage emisi. Kugerera Izaya, Yehova alaganya oku akahîre abakozi bage emisi lyo “baburûduka nka nyunda” omu mango bakaciyumvirhe bazambanyize erhi bavunisire omurhima. (Osome Izaya 40:31, Mashi Bible.) Abaisraheli bal’ikomire okubona enyunda ziri zabalala omu malunga omu kukolesa empusi buzira kushurha-shurha ebyubi byazo bwenene. Okwo kurhukengezize bwinja oku Yehova anarhuha emisi nk’oku ayiha orho rhunyunyi! Irhondo okabona akanyunyi kanenene kali kabalala enyanya bwenene omu malunga buzira kushurha-shurha bwenene ebyubi byako, okakengera oku Yehova anakuha emisi ly’ohima amazibu gawe.

8. Bici Ayubu aciyigirizize omu kulolereza obulemi bwa Nnâmahanga, na bici oko kwakarhuyigiriza?

⁸ Yehova ashinganine okulangalirwa. Yehova arhabire Ayubu ly’amulangalira bwenene. (Ayu. 32:2; 40:6-8) Omu nshambalo haguma na Ayubu, Nnâmahanga aganirire bintu binji by’omu bintu alemire. Kwa lwiganyo, aganirire enyenyezi, ebitû, n’emilazo. Kandi, Yehova aganirire ensimba nk’embogo erhi nkafu y’emuzirhu n’enfarasi. (Ayu. 38:32-35; 39:9, 19, 20) Ebyo byoshi byayeresire Ayubu oku arhali misi minji yone Nnâmahanga ajira cikone kandi oku aba wa buzigire na wa bwenge bunji. Ezo nshambalo zarhabire Ayubu ahikira aha alangalira Yehova bwenene kulusha embere. (Ayu. 42:1-6) Ko n’oko, erhi rhuyiga obulemi, oko kunarhukengeze oku Yehova aba wa bwenge bunji anajira misi minji bwenene kurhulusha. Kandi agwerhe obuhashe bw’okuyusa amazibu girhu na kobinali agayusa. Okumanya ntyo kwanarhurhabala rhumulangalire bwenene.

9-10. Bici izuba n’enkuba birhuyigiriza lugenda Yehova?

⁹ Yezu al’imanyire binji lugenda obulemi. Ye nka “mulenga” w’akazi, agwerhe olukengwa lw’okukola haguma n’Ishe omu kulema amalunga n’igulu. (Mig. 8:30, Mashi Bible) Buzinda, amango Yezu ali hanw’igulu, akolesize obulemi ly’ayigiriza abanafunzi bage lugenda Ishe. Rhuganirire masomo maguma na maguma ayigirizize.

¹⁰ Yehova anayerese ngasi muntu obuzigire bwage. Omu Mahubiri gage g’oku Ntôndo, Yezu aganirire abanafunzi bage lugenda izuba n’enkuba; ebyo biri bintu bibirhi by’omu bulemi bantu banji barharhanyako. Rhuba rhulagirire kw’ebyo bintu byombi lyo rhugendekera rhwalama. Yehova akayimire abantu barhamukolera ebyo bintu byombi. Lubero n’oko, enyanya z’obuzigire bwage anahe abantu boshi izuba n’enkuba. (Mt. 5:43-45) Yezu akolesize ir’isomo ly’ayigiriza abanafunzi bage oku Yehova aba alonzize bakayeresa ngasi muntu obuzigire. Ngasi mango erhi rhushagalukira ehizuba hy’eciremba-baja n’okubona ehikuba hinja hy’ehishishirha, rhwanarhanya oku buzigire Yehova ayeresa abantu boshi. Olwiganyo lwage lwanarhushumya rhukayerekana obuzigire bwa ntyo omu kuhubiri abantu boshi.

11. Gurhi rhwakahabwamwo omurhima omu kulolereza orhunyunyi rhw’emalunga?

¹¹ Yehova anarhuhikirigize amalagirire girhu g’omubiri. Mw’ago Mahubiri gage g’oku Ntôndo, kandi Yezu adesire ntya: “Loli orhunyunyi rhubalala omu malunga: rhurharhwera  rhurhanasarula, rhurhanahakira omu nguli, cikwone Sho winyu oba e mpingu analîse rhwo.” Byanahashikana oku, abumvirhiza ba Yezu babwine orhunyunyi rhuli rhwabalala enyanya zabo erhi Yezu abadosa ntya: “K’arhali mwe mulushire orhwo rhunyunyi?” (Mt. 6:26, Mashi Bible) Mw’eyo njira y’obuzigire, Yezu arhurhabire rhubone oku Yehova ashibirira amalagirire girhu! (Mt. 6:31, 32) Er’isomo rhuciyigirizize kugerera obulemi ligendekire lyaha abakozi bishwekerezi ba Nnâmahanga omurhima. Mwali wirhu muguma ociri musole w’omu Espagne oba painiya akag’iciyumva avunisire omurhima bulya arhagwerhe ahantu hinja h’okulama. Cikone enyuma z’okubona orhunyunyi rhuli rhwalya emogomogo n’amatunda, okwo kwamuha omurhima. Adesire ntya: “Orho rhunyunyi rhwankengeza oku Yehova anarhushibirire n’oku anshibirira nani.” Kasanzi kasungunu enyuma z’aho, oyo mwali wirhu apata ahantu h’okulama.

12. Kushimbana na Mateyo 10:29-31, bici orhufunzi rhurhuyigirizize lugenda Yehova?

¹² Yehova anabone ngasi muguma wirhu oku ali wa bulagirire. Embere Yezu arhume abaganda bage omu mukolo gw’amahubiri, abarhabire lyo barhag’iyoboha okuhagalikwa. (Osome Mateyo 10:29-31.) Ajijire ntyo omu kuganirira kanyunyi kaguma k’omu rhunyunyi rhwal’imanyikine bwenene omu cihugo c’e Israheli, ko kuderha citora erhi kafunzi. Orho rhunyunyi rhwagwerhe ibeyi lisungunu omu mango ga Yezu. Cikone Yezu abwira abanafunzi bage ntya: “Ntaco cankafa na Sho arhamanyiri!” Buzinda ayushula ntya: “Ecitwiro cinyu cilushire eca bitora binji.” Omu kuderha ntyo, Yezu ayemezize n’obwalagale abanafunzi bage oku Yehova anabone ngasi muguma wabo oku ali wa bulagirire, muli ntyo nta cirhumire bagwerhe c’okuyoboha okuhagalikwa. Kobinali abanafunzi bakag’ikengera enderho za Yezu erhi bakabwine orhufunzi omu mango bakag’iba bali omu mukolo gw’amahubiri omu vile n’omu lugo. Irhondo okabona ehyo hinyunyi hisungunu, okakengera oku Yehova anakubone oku oli muntu wa bulagirire bulya nawe ‘ecitwiro cawe cilushire eca bitora binji.’ Kugerera oburhabale bwage, wanaba n’oburhwali bw’okulwisa amazibu g’okuhagalikwa.​—Enna. 118:6.

13. Bici byakarhurhabala lyo rhuciyigiriza masomo malebe kugerera obulemi?

¹³ Rhwanayiga agandi masomo manji lugenda Yehova kugerera obulemi. Gurhi rhwakajiramwo ntyo? Burhangiriza, rhushinganine rhukaciha akasanzi k’okulolereza obulemi. Kandi, rhushinganine rhukarhanya kw’ebi obo bulemi burhuyigirizize lugenda Yehova. Nkaba ngasi mango kurhakaba kulembu kuli rhwe okujira ntyo. Mwali wirhu Géraldine, w’omu cihugo c’e Cameroun, adesire ntya: “Nakuliraga omu vile, co cirhumire nambone oku binahune okucihangana bwenene lyo ndolereza obulemi.” Mugula muguma ohamagalwa Alfonso adesire ntya: “Naciyigirizize oku mba nshinganine ncihirireho akasanzi k’okuba niene lyo ndolereza obulemi  bwa Yehova n’okurhanya bwenene kw’ebi bunyigirizize kuli ye.”

14. Bici Daudi aciyigirizize omu kurhanya bwenene oku bulemi bwa Nnâmahanga?

¹⁴ Daudi akag’irhanya bwenene oku bulemi bwa Nnâmahanga. Abwizire Yehova ntya: “Nkalola amalunga walemaga, nkalola omwezi n’enyenyezi wajiraga oziheba yo, nancîdôse nti: ‘Omuntu aligi munganci obu okâmukengêra?’” (Enna. 8:3, 4, Mashi Bible) Erhi Daudi akalolerezize amalunga budufu, arhali bwinja bw’enyenyezi bone akag’ishagalukira. Kandi akag’irhanya bwenene kw’ebi ezo nyenyezi zimuyigirizize lugenda Nnâmahanga. Aciyigiriza oku Yehova aba wa buhashe bunji bwenene. Agandi mango, Daudi akag’irhanya bwenene lugenda gurhi omubiri gwage gwajire gwakula omu nda ya nnina. Omu kurhanya bwenene lugenda eyo njira y’okusomeza omubiri gwage gwalemirwemwo, aba wa kuvuga omunkwa bwenene lugenda obwenge bunji Yehova ajira.​—Enna. 139:14-17.

15. Ohâne enyiganyo ziyerekine gurhi wabwinemwo amorhere ga Yehova kugerera bulemi. (Ennanga 148:7-10)

¹⁵ Aka Daudi, birhahûnyiri olole kulî bwenene mpu ly’obona akantu Yehova alemire wakarhanyako. Erhi wakalola ebikuzungulusire, wanabona ebintu biyerekine morhere manji ga Yehova. Kwa lwiganyo, wanahugûkwa obuhashe bwa Yehova erhi ehizuba hyakakubashako oku mubiri. (Yer. 31:35) Wanarhanya oku bwenge bwa Nnâmahanga erhi wakabona ehinyunyi hiri hyayubaka ologo lwahyo. Wanarhanya oku Yehova aba alonzize rhukashagaluka erhi wakabona ehibwana hiri hyadunda omucira gwahyo. Na ngasi mango erhi wakabona omuzire ali ashasa akabonjo kage wanavuga Yehova omunkwa oku buzigire bwage. Rhujira bulyo bunji bwenene bw’okuyiga lugenda Yehova bulya ebintu alemire byoshi binamukuze, bibe binenene erhi bisungunu, bibe biri hofi erhi biri kulî.​—Osome Ennanga 148:7-10.

16. Bici rhushinganine rhuhige okujira?

¹⁶ Nnâmahanga wirhu aba wa bwenge bunji, buzigire bunji, ajira buhashe bunji, na ngasi kantu alemire kaba kinja bwenene. Ago morhere n’agandi manji ganabonekane n’obwalagale omu bintu alemire erhi rhwakakaciha akasanzi k’okubilolereza. Lekagi ngasi mango rhukaciha akasanzi k’okushagalukira obulemi n’okurhanya bwenene kw’ebi burhuyigirizize lugenda Yehova. Omu kujira ntyo, rhwanagendekera rhwayegera bwenene Omulemi wirhu. (Yk. 4:8) Omu cigabi cikulikire, rhwabona gurhi ababusi bakakolesamwo obulemi lyo barhabala abana babo bayegere Yehova.