1-2. Bici omuntu ashinganine ajire embere abatizibwe?

 OMU myaka irhanu egezire, bantu barhalusire muliyoni muguma bacihânyire emwa Yehova banabatizibwa nka baguma b’omu Bahamirizi ba Yehova. Nk’oku byanali omu myaka igana mirhanzi lugenda Timoteyo, banji mulibo bayigirizibagwa okuli “kurhenga eburho.” (2 Tm. 3:14, 15) Abandi bayigaga lugenda Yehova erhi banakola bakulu n’abandi erhi bakola bashosi. Omu nsiku zigezire, mukazi muguma wakag’iyiga Ebibliya haguma n’Abahamirizi ba Yehova abatizibwa erhi akola agwerhe myaka 97!

² Akaba oli wayiga Ebibliya nisi akaba oli walerwa n’ababusi Bahamirizi, k’oli warhanya lugenda okubatizibwa? Ogo guli muhigo mwinja bwenene! Cikone embere obatizibwe, oshinganine ocihâne emwa Yehova. Eci cigabi cahugûla ebi okucihâna emwa Yehova kuhiziremwo. Na kandi cakurhabala obone bulya gurhi orhashinganini oyobohe erhi kurhindira okucihâna emwa Nnâmahanga n’okubatizibwa amango okola oli tayari.

OKUCIHÂNA EMWA NNÂMAHANGA KO KUDERHA GURHI?

3. Ohâne enyiganyo ziri omu Bibliya z’abantu bacihânyire emwa Yehova.

³ Omu Bibliya, omuntu wakag’iba acihânyire emwa Yehova akag’iba acishozirwe lugenda muhigo mulebe gwago-gwago. Abaisraheli lyali ishanja Yehova ali cishozire. Cikone bantu baguma na baguma ba mw’er’ishanja bal’icihânyire emwa Yehova omu njira yago-yago. Kwa lwiganyo, Aroni ayambala “ecimanyiso citagatifu c’okuhirwa eburhambi;”ko kuderha ehy’olubamba hy’enoro hyakagilangala emalanga g’ecitambara cage. Ehyo hy’olubamba hyakag’ilangala, hyakag’iyerekana oku al’icishozirwe okukolera Yehova nka kuhâni mukulu omu Israheli. (Lev. 8:9, NWT) Abanaziri nabo bal’icihânyire emwa Yehova omu  njira yago-yago. Oluderho “Munaziri,” lurhenzire omu luderho lw’ecihabraniya nazirʹ, luhûgwire “Ohizirwe eburhambi,” erhi “Ocihânyire.” Abanaziri bal’ishinganine balame kushimbana n’amarhegeko gago-gago gali omw’Irhegeko lya Musa.—Mib. 6:2-8.

4. (a) Omu njira nci abantu bacihânyire emwa Yehona baba bahizirwe eburhambi enyanya z’omuhigo mutagatifu? (b) ‘Okucilahira’ wenene ko kuderha gurhi? (Olole n’enfoto.)

⁴ Erhi ocihâna emwa Yehova, onacishoge okuba mwanafunzi wa Yezu Kristu n’okujira obulonza bwa Nnâmahanga kabe ko kantu k’obulagirire bwenene omu kalamo kawe. Bici okucihâna emwa Yehova kuhiziremwo? Yezu adesire ntya: “Owalonz’inshimba, acilahire yenene.” (Mt. 16:24) Omusemwa gw’Ecigiriki gwahindwirwe “acilahire yenene” gwanacib’iderhwa “ashinganine acibwire nanga yenene.” Nka mukozi wacihânyire emwa Yehova, byayish’ikahûna okaderha nanga kuli ngasi kantu karhashagalusizi Yehova. (2 Kr. 5:14, 15) Oko kuhiziremwo okuyaka “ebijiro by’omubiri,” nk’olugenzi lw’okujira eby’enshonyi. (Gl. 5:19-21; 1 Kr. 6:18) K’okurhumikira ago marhegeko kwarhuma akalamo kawe kaba kazibu? Nanga, erhi akaba ozigire Yehova onayemire n’obwalagale oku okurhumikira amarhegeko gage kwanakulerhera obunguke. (Enna. 119:97; Iz. 48:17, 18) Mwene wirhu muguma ohamagalwa Nicholas adesire ntya: “Wanabona amarhegeko ga Yehova nka byuma biyubasire eprizo bikuhanza okujira ebi olonzize nisi nka byuma biyubasire olupango lw’entale bikulanga ly’orhahikiragwa n’obuhanya.”

5. (a) Gurhi wakacihânamwo emwa Yehova? (b) Lubero luhi luhali egarhi k’okucihâna emwa Yehova n’okubatizibwa? (Olole n’enfoto.)

⁵ Gurhi wakacihânamwo emwa Yehova? Onamulaganye kugerera isala oku wakamuharamya yenene n’oku wakahira obulonza bwage oku nafasi ntanzi omu kalamo kawe. Enyuma z’aho onalaganye Yehova oku wagendekera wamuzigira  ‘n’omurhima gwawe goshi, n’omûka [buguma-guma] bwawe boshi, n’obukengere bwawe boshi n’emisi yawe yoshi.’ (Mk. 12:30) Okucihâna emwa Yehova kunajirwe n’omuntu yenene, kantu kajirwa egarhi kage na Yehova. Lubero n’oko, omuntu anabatizibwe embere z’abantu banji; oko kunayerese abandi oku wacihânyire emwa Yehova. Okucihâna emwa Yehova ciba ciragane cizibu-zibu, omuhigo gwawe kushinganine kube kuhikiriza eco ciragane na Yehova alangalire oku wacihikiriza.—Muh. 5:4, 5.

BULYA GURHI KULI KWA BULAGIRIRE OKUCIHÂNA EMWA YEHOVA?

6. Bici bishumya omuntu ly’acihâna emwa Yehova?

⁶ Obuzigire bwawe kuli Yehova ko kantu kakulu kakushumya ocihâne emwage. Obuzigire bwawe burhashimbini n’oku ociyumva kone. Lubero n’oko, buba buyimangire oku “bumanye burhalimwo magosa” n’“okuhugûkwa omu hali y’ekiroho” ebintu wayizire lugenda Yehova byashumyagya obuzigire bwawe kuli ye buyushuke. (Kl. 1:9, NWT) Okuyiga kwawe Amandiko kwakuyemezize n’obwalagale 1) oku Yehova aba muntu w’okunali, (2) oku Ebibliya ko Kanwa kalongozibagwa n’iroho lyage n’oku (3) anakolese ikubuliro lyage ly’ahikiriza obulonza bwage.

7. Bici rhushinganine rhube rhuli rhwajira embere rhucihâne emwa Nnâmahanga?

⁷ Abacihâna emwa Nnâmahanga bashinganine bamanye enyigirizo z’omusingi z’Akanwa kage banarhumikire amarhegeko gage. Banajire okwabo koshi lyo baganirira abandi ebi bayizire. (Mt. 28:19, 20) Obuzigire bwabo kuli Yehova bwayushusire, n’irala lyabo likulu kuba kumuharamya yenene. Ka ntyo ko biyosire kuli we? Erhi wakaba n’obuzigire bwa ntyo, orhakacikabona  oku okucihâna emwa Yehova n’okubatizibwa nka kantu oshinganine ojire mpu ly’oshagalusa kone omwalimu wawe w’Ebibliya erhi ababusi bawe nisi okubona oku kali kantu oshinganine ojire ly’oba ak’abîra bawe.

8. Gurhi okuvuga omunkwa kukurhabalamwo ly’orhôla omuhigo gw’okucihâna emwa Yehova? (Ennanga 116:12-14)

⁸ Erhi wakakarhanya bwenene oku bintu byoshi Yehova akujirire wanaba n’etanya z’okulonza okumuvuga omunkwa n’okulonza okucihâna emwage. (Osome Ennanga 116:12-14.) Ebibliya eyerekine n’obwalagale oku Yehova ye ohâna “ngasi ngalo nyinja na ngasi nshokano nkana.” (Yk. 1:17) Engalo nene ya muli ezo ngalo zoshi eri nterekêro y’Omugala Yezu. Orhanye hitya kunganaci eyo ngalo eba ya kushagalusa! Engombôlo yajijire bihashikane kuli we okuba n’obwîra bwa hofi-hofi haguma na Yehova. Ananakuhîre obulyo bw’okulama ensiku n’amango. (1 Yn. 4:9, 10, 19) Okucihâna emwa Yehova eri njira wakayerekanamwo oku oshagalukire eco cijiro cikulu bwenene c’obuzigire cirhasag’ijirwa bundi, n’oku oshagalukire eyindi migisho yoshi Yehova akuhîre. (Lush. 16:17; 2 Kr. 5:15) Enjira wakayerekanamwo aku ovuzire Yehova omunkwa ziganirirwe omu nugta ya 4 y’isomo lya 46, ly’ecitabu Oshagalukire Akalamo Ensiku n’Amango!, zihiziremwo evideo ya miniti isharhu edesire; Ohe Nnâmahanga Oluhembo.

K’OLI TAYARI OKUCIHÂNA EMWA YEHOVA N’OKUBATIZIBWA?

9. Bulya gurhi omuntu arhashinganini aciyumve oku asezibwe okucihâna emwa Yehova?

⁹ Hali amango wakaciyumva oku orhali tayari akucihâna emwa Yehova n’okubatizibwa. Nkaba ocilagirire oku kasanzi k’okujira empindûlo, ly’akalamo kawe kapatana n’amarhegeko ga Yehova, erhi nkaba ocilagirire oku kasanzi kanji ly’ozibuhya obuyemere bwawe. (Kl. 2:6, 7) Abanafunzi boshi b’Ebibliya barhajirira amajambere caligumiza, n’emisole yoshi erhaba tayari okucihâna emwa Yehova n’okubatizibwa oku myaka miguma. Opime okulabiriza amajambere g’ekiroho oli wajira kushimbana n’obuhashe bwawe c’arhali omu kucigerera oku wundi muntu.—Gl. 6:4, 5.

10. Bici wakajira erhi wakahûgukwa oku orhaciba tayari okucihâna emwa Yehova n’okubatizibwa? (Olole n’ecisanduku cidesire; “ Kuli Balya Bali Balererwa omu Okuli.”)

¹⁰ Ciru wakahûgukwa oku orhaciba tayari okucihâna emwa Yehova, ogendekere wacihêberaho ogo muhigo. Oshenge Yehova akurhabale ojire empindûlo z’obulagire omu kalamo kawe. (Fl. 2:13; 3:16) Wanayemera n’obwalagale oku ayumvirhiza isala lyawe n’oku akushuza.—1 Yn. 5:14.

BULYA GURHI BANTU BAGUMA NA BAGUMA BAKARHINDIRA OKUCIHÂNA EMWA YEHOVA N’OKUBATIZIBWA?

11. Gurhi Yehova arhurhabalamwo lyo rhugendekera rhwabêra bwishwekerezi kuli ye?

¹¹ Bantu baguma na baguma baba tayari okucihâna emwa Yehova n’okubatizibwa banarhindire. Hali amango bakayoboha oku, ‘enyuma z’okubatizibwa bayish’ijira ecaha cizibu n’oko kwanarhuma batengwa n’ecigamba.’ Erhi akaba nawe oyobohire ntyo, oyemere n’obwalagale oku Yehova akuha ngasi kantu olagirireko ly’‘ogenda nk’oku Nyakasane [Yehova, NWT] alonzize n’okukâjira ebimusîmîsize ensiku zoshi.’ (Kl. 1:10, Mashi Bible) Na kandi, akuha emisi y’okujira ebishinganine. Ayerekine oku anajira ntyo kugerera oku ajirire abandi bantu banji. (1 Kr. 10:13) Eco co cirhuma bantu basungunu bone batengwa omu cigamba c’Ecikristu. Yehova anarhabale abantu bage lyo babêra bishwekerezi.

12. Gurhi wakayakamwo okujira ecaha cizibu?

¹² Ngasi muntu orhali mwimana anashumibwe okujira ebintu bibi. (Yk. 1:14) Cikone,  amango oli omu irhangulo wene oshinganine ocishoge ebi wajira. Okuderha okuli, wene oshinganine ocishoge oku walama. Bantu baguma na baguma banaderhe oku rhurhakaba n’obuhashe lugenda oku rhuciyumva na lugenda ebi rhujira, cikone obo buba bunywesi, wanayiga okuhasha amarala gawe mabi. Co cirhumire ciru wakaba omu irhangulo wanacishoga okurhajira kantu kalebe kabi. Hanali ebintu byakakurhabala ly’oyaka okukajira ecaha, kwa lwiganyo, okashenga Yehova ngasi lusiku. Ogendekere waba n’enkomedu nyinja y’okuyiga wene Akanwa ka Mungu. Okaja oku ntimanano z’Ecikristu. Okaganirira abandi lugenda obuyemere bwawe. Okujira ebyo bintu ngasi mango kwanakuha emisi y’okugendekera wabêra mwishwekerezi kuli Yehova. Orhanayibagiraga ciru n’ehitya oku Yehova akurhabala ojire ntyo.—Gl. 5:16.

13. Lwiganyo luhi lwinja Yozefu arhulekire?

¹³ Kwayish’iba kulembu kuli we okubêra mwishwekerezi kuli Yehova, erhi wakahiga embere z’akasanzi ebi wakajira erhi wakarhangulwa. Ebibliya erhuganirire bantu banji bahashire okujira ntyo ciru akaba nabo barhali bimana. Kwa lwiganyo, muka Potifari kanji-kanji akag’ilonza okushumya Yozefu ajire acijiro c’obuhya haguma naye. Cikone Yozefu al’iyosire amanyire ebi ashinganine ajire. Ebibliya erhubwizire oku “alahira,” anaderha ntya: “Kurhi nankajiraga obubî bungana aho n’okuhemukira Nyamuzinda?” (Murh. 39:8-10) Bibonekine n’obwalagale oku Yozefu al’imanyire ebi ashinganine ajire ciru n’embere muka Potifari alonze okumushumya. Oko kwarhuma kwaba kulembu kuli ye okujira ebintu bishinganine erhi aba ali omw’irhangulo.

14. Gurhi rhwakayigamwo okuyaka okujira ebintu bibi?

¹⁴ Gurhi wakayigamwo olwiganyo lwa Yozefu lw’okugendekera wabêra mwishwekerezi kuli Yehova amango wamarhangulwa? Wanahiga buno gurhi wayish’ijira erhi wakahikirwa n’irhangulo. Oyige okuyaka ho n’aho ebintu Yehova ashomba, onayake ciru okukabirhanyako. (Enna. 97:10; 119:165) Muli eyo njira orhakajira ecaha erhi wakarhangulwa. Omu kanga ka ntyo, wayish’iba okola omanyire ebi wakajira erhi wakarhangulwa.

15. Gurhi omuntu akayerekanamwo oku ali alonza Yehova n’omurhima gwage goshi? (Abahabraniya 11:6)

¹⁵ Omu kanga kawe, nkaba omanyire oku wabwine okuli onalonzize okolere Yehova n’omurhima gwawe goshi, cikone nkaba haciri kantu kalebe kali karhuma warhindira okucihâna  emwa Yehova n’okubatibwa. Wanajira nk’oku Mwami Daudi ajiraga. Wanasemberera Yehova ntya: “Onje ebulâbi, omanye n’oku ndi emurhima, onsinze omanye n’emihigo yani. Olole erhi hali ngeso mbi nkola ngwerhe, onnongôle omu njira nyinja ensiku n’amango.” (Enna. 139:23, 24, Mashi Bible) Yehova anahembe “balya bamulonza” n’omurhima goshi. Okukola kwawe ly’ohikiriza omuhigo gw’okucihâna emwage n’okubatizibwa kunamuyerese oku okola oli wamulonza.—Osome Abahabraniya 11:6.

OGENDEKERE WAYEGERA YEHOVA

16-17. Gurhi abali balererwa omu okuli bakakululwamwo na Yehova? (Yowane 6:44)

¹⁶ Yezu adesire oku abanafunzi bage banakululwe na Yehova. (Osome Yowane 6:44.) Orhanye kunganaci ezo ntanya ziri za kushagalusa n’ebi zihugwîre kuli we. Yehova anabone kantu kalebe kinja muli ngasi muntu akulula emunda ali. Anabone ngasi muntu oku ali “birugu byage bya ngulo ndarhi.” (Lush. 7:6, Mashi Bible) Ntyo ko nawe akubona.

¹⁷ Nkabaga oli musole guli gwalerwa n’ababusi Bahamirizi. Hali amango wakaciyumva oku onamukolere bulya ababusi bawe nabo bali bajira ntyo, c’arhali mpu bulya akukulwire emunda ali. Ciru akaba ntyo, Ebibliya edesire ntya: “Yegeri Nyamuzinda, naye ammuyegerera.” (Yk. 4:8; 1 Nga. 28:9) Erhi orhôla omuhigo gw’okuyegera Yehova, naye anakuyegerere. Yehova arhakubona kone nka muguma w’omu cigusho cilebe c’abantu. Anakulule ngasi muntu, kuhiramwo na ngasi muntu oli walererwa omu okuli. Erhi omuntu wa ntyo arhôla omuhigo gw’okuyegera Yehova, Yehova naye anamuyegerere nk’oku rhwabonaga omu Yakobo 4:8.—Oshushanye na 2 Abatesalonika 2:13.

18. Bici rhwaganirira omu cigabi cikulikire? (Ennanga 40:8)

¹⁸ Erhi ocihâna emwa Yehova n’okubatizibwa, onayerekane oborhere buli nk’obwa Yezu. Acihânyire emw’Ishe ly’ajira ngasi byoshi akamuhûnyire okujira. (Osome Ennanga 40:8; Hb. 10:7) Omu cigabi cikulikire rhwayish’iganirira, ebyakakurhabala ly’ogendekera wakolera Yehova n’obwishwekerezi enyuma z’okubatizibwa.