1. Ntanya zihi bakozi baguma na baguma ba Yehova bakaba bali balwisa?

 BIBA bya kuhuma oku murhima bwenene okumanya oku Yehova anashagalukire abakozi bage boshi! Ebibliya edesire ntya: “Nyamuzinda ashagaluka n’olubaga lwage.” (Enna. 149:4) Cikone, hali amango bantu baguma na baguma bavunika omurhima n’okucidosa ntya: ‘Ka kobinali Yehova ananshagalukire?’ Bantu banji baganirirwe omu Bibliya bakolire Yehova n’obwishwekerezi, hali amango babwine oku kwali kuzibu okuyemera oku Yehova al’ibashagalukire.—1 Sam. 1:6-10; Ayu. 29:2, 4; Enna. 51:11.

2. Ndi Yehova ashagalukira?

² Ebibliya eyerekine n’obwalagale oku abantu barhali bimana banayemerwa na Yehova. Omu njira nci? Rhushinganine rhube n’obuyemere muli Yezu n’okubatizibwa. (Yn. 3:16) Omu kujira ntyo, rhunayereke abantu boshi oku rhwahûngamire ebyaha birhu n’okulaganya Nnâmahanga oku rhwakajira obulonza bwage. (Ebj. 2:38; 3:19) Yehova anashagaluke erhi rhurhôla eyo mihigo yoshi y’okuba n’obwîra bwinja haguma naye. Erhi rhujira okwirhu koshi lyo rhugendekera rhwalama kushimbana n’eciragane rhwajiraga erhi rhucihâna emwa Yehova, anarhushagalukire n’okurhubona nka bîra bage.—Enna. 25:14.

3. Bici rhukolaga rhwaganirira?

³ Bici byakarhuma kasanzi kalebe bantu baguma na baguma barhanya oku Yehova arhabashagalukira? Gurhi Yehova ayerekanamwo oku arhushagalukire? Na gurhi Omukristu akazibuhyamwo abulangalire bwage oku Yehova aba amushagalukire?

 BULYA GURHI BANTU BAGUMA NA BAGUMA BARHANYA OKU YEHOVA ARHABA ABASHAGALUKIRE?

4-5. Ciru akaba rhunaciyumve oku rhurhali ba bulagirire, bici rhwakayemera n’obwalagale?

⁴ Kurhenga amango rhwaciri barho, banji ba muli rhwe bakagic’iyumva oku barhali ba bulagirire. (Enna. 88:15) Mwene wirhu muguma ohamagalwa Adrián adesire ntya: “Ngasi mango nakag’iciyumva oku ntaba wa bulagirire. Nkengire oku erhi nciri murho nakag’ishenga oku omulala gwani guyish’ija omu Paradizo, ciru akaba nal’imanyire n’obwalagale oku ntakajiremwo.” Tony, orhakuliraga omu mulala gw’Abahamirizi ba Yehova adesire ntya: “Nta mango ababusi bani bambwizire oku baba banzigire erhi baba banshagalukire. Oko kwarhuma naciyumva oku nta kantu nakajijire k’okubashagalusa.”

⁵ Erhi akaba rhuli rhwalibuzibwa n’entanya z’okuciyumva oku rhurhali ba bulagirire, rhwanakengera oku Yehova ye warhukululaga emunda ali. (Yn. 6:44) Anabone aminja muli rhwe nkaba rhurhabona rhwenene ananabe amanyire omurhima gwirhu. (1 Sam. 16:7; 2 Nga. 6:30) Co cirhumire rhwanamulangalira amango adesire oku rhuli ba bulagirire omu masu gage.—1 Yn. 3:19, 20.

6. Gurhi Paolo akag’iciyumva enyanya z’ebyaha ajiraga mîra?

⁶ Embere rhuyige okuli, banji muli rhwe bajijire ebintu birhumire bacigendekire baciyumva kubi. (1 Pt. 4:3) Abandi bamajira myaka minji bali bakolera Yehova n’obwishwekerezi banaba banacilwise buzamba bulebe. Gurhigi lugenda we? Ka hali amango ociyumva oku Yehova arhakakubabalira? Erhi akaba ntyo ko biri, wanarhulirizibwa omu kumanya oku hali abandi bakozi ba Yehova bishwekerezi baciyumvirhe ntyo. Kwa lwiganyo, entumwa Paolo yakag’iciyumva kubi erhi yakarhanyize oku buzamba yal’igwerhe. (Rm. 7:24) Kobinali, Paolo ali erhi aciyunjuzize ebyaha byage anabatizibwa. Cikone acikag’iciganirira oku ye “munyi omu ntumwa zoshi,” n’oku ye “wa burhanzi” omu banya-byaha.—1 Kr. 15:9; 1 Tm. 1:15.

7. Bici rhushinganine rhubîke omu bukengere lugenda ebyaha birhu bya mîra?

⁷ Larha wirhu w’omu mpingu arhulaganyize oku arhubabalira erhi rhwakaciyunjuza. (Enna. 86:5) Co cirhumire erhi rhwakaciyunza kobinali ebyaha rhwajiraga, rhwanalangalira ebi Yehova adesire; oku arhubabalire.—Kl. 2:13.

8-9. Gurhi rhwakahimamwo entanya z’okuciyumva oku nta mango rhwakahash’ishagalusa Yehova?

⁸ Rhweshi rhuba rhulonzize okukolera Yehova bwenene nk’oku rhwakanahasha. Cikone bantu baguma na baguma banaciyumva oku nta kantu bakahash’ijira lyo bashagalusa Yehova. Mwali wirhu muguma ohamahagalwa Amanda adesire ntya: “Nakag’irhanya oku okuha Yehova ebintu byani binja kuli kujira binji ensiku zoshi omu mukolo gwage. Ntyo nakacihangana okujira binji kulusha ebi nakahash’ijira. Erhi ‘nakayabirwe,’ nakag’irhanya oku Yehova avunisire omurhima enyanya zani nk’oku nani nvunisire omurhima.”

⁹ Gurhi rhwakahimamwo entanya ziyerekine oku nta mango rhwakajira ebintu byakashagalusa Yehova? Okengere oku Yehova arhahûna ebintu birhalusire olugero. Nta mango akarhuhûna ebintu rhurhakahash’ijira. Anashagalukire byoshi rhujira enyanya zage erhi rhubijira n’omurhima gwirhu goshi. Na kandi orhanye oku nyiganyo z’abantu baganirirwe omu Bibliya bakolire Yehova n’obuguma-guma bwabo boshi. Rhurhanye lugenda olwiganyo lwa Paolo. Ajijire myaka minji ali akolera Yehova n’obushiru, abalama ebihumbi by’ebilometre anarhondeza bigamba binji. Cikone, erhi akanga karhuma arhacijira binji omu mukolo  gwa Yehova, k’oko kwarhumire arhaciyemerwa naye? Nanga. Agendekera ajira ebi akanahashire, na Yehova amugisha. (Ebj. 28:30, 31) Ko n’oko, hali amango rhurhakahash’ijira binji omu mukolo gwa Yehova nk’oku rhwakag’ijira embere. Cikone akantu k’obulagirire asegeza ciba cirhumire cirhushumya okumukolera. Lekagi rhulole njira nguma na nguma Yehova ayerekanamwo oku arhushagalukire.

GURHI YEHOVA AYEREKANAMWO OKU ARHUSHAGALUKIRE?

10. Gurhi Yehova “arhubwiramwo” oku aba arhushagalukire? (Yowane 16:27)

¹⁰ Kugerera Ebibliya. Yehova analonze enjira akayerekamwo abakozi bage oku abazigire anabashagalukire. Amandiko gaganirire hali ibirhi Yehova abwiragamwo Yezu oku amuzigire anamusima. (Mt. 3:17; 17:5) Ka wanalonza Yehova akuyemeze oku aba akuzigire? Yehova arharhuganiza kurhenga empingu, cikone anarhuganize kugerera Akanwa kage, Bibliya. “Rhwanayumva” izu lya Yehova lirhubwizire oku aba arhushagalukire omu kusoma enderho za Yezu ziba omu Injili. (Osome Yowane 16:27.) Yezu ayerekine n’obwimana amorhere g’Ishe. Erhi rhwakasoma oku Yezu abwiraga abanafunzi bage barhali bimana cikone bishwekerezi oku abashagalukire, nirhu rhwanarhanya oku Yehova ali arhubwira ezo nderho.—Yn. 15:9, 15.

11. Bulya gurhi okugera omu mazibu kurhayerekini oku Yehova arhacirhushagalukira? (Yakobo 1:12)

¹¹ Kugerera ebijiro byage. Yehova ajira irala ly’okurhurhabala, nk’okurhuhikirhigiza amalagirire girhu g’omubiri. Cikone hali amango Yehova akaleka ebintu bibi birhuhikire nk’oku ajiraga omu kanga ka Ayubu wali mushinganyanya. (Ayu. 1:8-11) Okulibuka kurhayerekana oku rhurhaciyemirwi na Yehova. Lubero n’oko, kunarhuhe obulyo bw’okuyerekana kunganaci rhuzigire Yehova na kunganaci rhumulangalire. (Osome Yakobo 1:12.) N’amango rhuli omu mazibu rhwanabona kunganaci arhuzigire na kunganaci ali arhurhabala okulembera.

12. Bici rhwakaciyigiriza kugerera olwiganyo lwa Dmitrii?

¹² Rhuganirire olwiganyo lwa mwene wirhu muguma w’e Asie, ohamagalwa Dmitrii. Aheza akazi kage anayusa myezi minji arhagwerhi kazi. Ntyo ahiga okucihâna omu mukolo gw’amahubiri na ntyo ayerekana oku alangalire Yehova. Myezi minji yagera arhanapataga akazi. Enyuma z’aho alwala endwala ndarhi arhakanahashir’irhenga omu ncingo. Arhondera  arhanya oku arhaciri mulume mwinja na mubusi mwinja anarhondera acidosa erhi aciba ayemirwe na Yehova. Bijingo biguma omwali omuha ehiradasi hyaliko enderho ziri omu Izaya 30:15, (NWT), zidesire ntya: “Omu kudekerera n’omu kundangalira mwo mwarhenza oburhwali bwinyu.” Ahiheka aha burhambi bw’encingo y’ishe, anaderha ntya: “Larha, amango wamaciyumva kubi okakengera olu lwandiko.” Dmitrii ayemera oku kugerera oburhabale bwa Yehova, omulala gwage gwagendekire gwaba n’ebiryo, emishangi n’ahantu h’okulama. Adesire ntya: “Ebinal’ishinganine njire kwali kurhulirira n’okugendekera nalangalira Nnâmahanga wani.” Erhi akaba oli walwisa amazibu gali nk’ago, wanalangalira oku Yehova akushibirira anakurhabala olembere.

13. Bandi Yehova akolesa ly’arhuyeresa oku aba arhuzigire, na gurhi abakolesamwo?

¹³ Kugerera abirhu bemezi. Yehova anakolese bene wirhu na bali birhu ly’arhuyeresa oku arhushagalukire. Kwa lwiganyo, anashumya abandi baderhe enderho z’okuhâna omurhima amango rhuzilagirireko. Mwali wirhu muguma w’e Asie acibwinire oko amango ali omu mababale manji. Aheza akazi kage analwala bwenene. N’enyuma z’aho iba ajira ecaha cizibu arhanacigendekeraga akola nka mugula. Adesire ntya: “Ntahugûkagwa bulya gurhi ebyo byoshi byampikire. Narhanya oku najijire kantu kalebe kabi n’oku Yehova arhacinshagalukiri.” Oyo mwali wirhu asemberera Yehova amuyerese oku acimuyemire. Gurhi Yehova amuyemezizemwo ntyo? Adesire ntya: “Abagula b’omu cigamba banganiza bananyemeza oku Yehova anzigire.” Enyuma z’aho acib’ihûna Yehova oburhabale. Adesire ntya: “Olo lusiku lo n’olo nabona amaruba ecigusho ca bene wirhu na bali birhu b’omu cigamba banyandikiraga. Erhi nsoma enderho zabo z’okurhuliriza, naciyumva oku Yehova ananyumvirhizize.” Kobinali  Yehova anayerekane oku arhuzigire kugerera enderho nyinja z’abandi.—Enna. 10:17.

14. Yindi njira ehi Yehova ayerekanamwo oku aba arhushagalukire?

¹⁴ Na kandi Yehova anayerekane oku arhushagalukire omu kukolesa abirhu bemezi lyo barhuha amahano amango rhugalagirireko. Kwa lwiganyo, omu myaka igana mirhanzi, Yehova akolesize Paolo, ly’ayandikira ababo bemezi maruba 14 galongozibagwa n’iroho litagatifu. Mw’ago maruba Paolo aha bene wabo na bali babo amahano g’okubazibuhya omu njira y’obuzigire. Bici byarhumaga Yehova alongoza Paolo ly’aheba ago mahano mw’ago maruba? Yehova aba Larha mwinja, ananahane abana bage “aba arhonya.” (Mig. 3:11, 12) Co cirhumire erhi muntu mulebe akarhuha amahano gayimangire oku Bibliya, oko kurhayerekini oku Yehova anarhulesire, cikone kuyerekine oku Yehova acirhuzigire. (Hb. 12:6) Bindi bici biyerekana oku Yehova arhushagalukire?

EBINDI BIYEREKANA OKU YEHOVA ARHUSHAGALUKIRE

15. Bandi Yehova aha iroho lyage litagatifu, na bulya gurhi lyakarhurhabala rhuyemere oku aba arhushagalukire?

¹⁵ Yehova anahâne iroho lyage litagatifu kuli balya aba ashagalukire. (Mt. 12:18) Rhwanacidosa ntya: ‘Ka nanyerekane borhere bulebe bw’omu morhere g’iroho litagatifu lya Nnâmahanga omu kalamo kani?’ Ka wabwine oku okola okalembera abantu kulusha oku byali embere omanye Yehova? Kobinali oku wagendekera wayerekana amorhere g’iroho litagatifu, ko wanagendekera wabona oku Yehova akushagalukire!—Olole ecisanduku “ Ilehe ly’Iroho Liba . . .”

16. Bandi Yehova akolesa lyo bayaliza omwanzi mwinja, na gurhi ociyumvirhe lugenda oko? (1 Abatesalonika 2:4)

¹⁶ Yehova anashagalukire okuha balya aba ayemire omukolo gw’okuyaliza omwanzi mwinja. (Osome 1 Abatesalonika 2:4.) Olole gurhi mwali wirhu muguma ohamagalwa Jocelyn ayungusire omu kuyaligiza abandi omwanzi mwinja. Lusiku luguma Jocelyn azusire anali aciyumva avunisire omurhima, adesire ntya: “Naciyumva nka ntagwerhi kantu nakahâna, cikone nali painiya, lwanali lusiku lwani lw’okuja omu mahubiri. Ntyo nashenga nanaja omu mahubiri.” Mw’eryo sezi Jocelyn arhimanana na Mary, mukazi mwinja wayemeraga ifunzo ly’Ebibliya. Myezi milebe enyuma z’aho Mary aderha oku erhi Jocelyn akomamba oku lumvi lwage, akag’ishenga Nnâmahanga amurhabale. Omu kurhanya kw’ebi acibwinire,  Jocelyn adesire ntya: “Naciyumva nka Yehova akag’imbwira erhi; ‘nkushagalukire.’” Okuderha okuli, arhali ngasi muntu oyemera omwanzi rhuyigiriza. Cikone rhwanayemera n’obwalagale oku Yehova anashagaluke erhi rhujira okwirhu koshi lyo rhuyaligiza abandi omwanzi mwinja.

17. Bici ociyigirizize kugerera ebi Vicky aderhaga lugenda engombôlo? (Ennanga 5:12)

¹⁷ Engombôlo Yehova ahânaga enalerhere obunguke balya boshi aba ashagalukire. (1 Tm. 2:5, 6) Cikone gurhigi erhi omurhima gwirhu gwakaba gugwerhe akarhinda oku Yehova arhaba arhushagalukire, ciru akaba rhujira obuyemere rhwanabatizibwe? Okengere oku orhashinganini okalangalira oku ociyumva wene, cikone wanalangalira Yehova. Anabone balya boshi bajira obuyemere omu ngombôlo oku bali bashinganyanya anabalaganyize oku abagisha. (Osome Ennanga 5:12; Rm. 3:26) Okurhanya oku ngombôlo kwarhabire Vicky. Lusiku luguma erhi ayus’irhanya bwenene oku ngombôlo, ahugûkwa ntya: “Hamagera kasanzi kanji Yehova ali anembera. . . . Cikone, nali nk’oli wabwira Yehova erhi; ‘orhakazigira omuntu oli akani. Enterekêro ya Mugala wawe erhakabwikira ebyaha byani.’” Omu kurhanya oku ngalo y’engombôlo arhondera aciyumva oku azigirwe na Yehova. Omu kurhanya oku ngombôlo, na nirhu rhwanaciyumva oku rhuzigirwe na Yehova n’oku rhuyemirwe naye.

18. Bici rhwakayemera n’obwalagale erhi rhwakagendekera rhwazigira Larha wirhu w’omu mpingu?

¹⁸ Ciru akaba rhwanacihangana okukolesa ebi rhwayizire mw’eci cigabi, hali amango rhwakayumva rhuvunisire omurhima n’okucidosa erhi Yehova arhushagalukire. Erhi oko kwakahikira, wanakengera oku Yehova anashagalukire abagendekera “bamuzigira.” (Yk. 1:12) Ogendekerage wayegera Yehova n’okubona oku akushagalukire. Ngasi mango okakengera oku Yehova “ntaye ali kuli muli rhwe.”—Ebj. 17:27.