1-2. Migisho ehi omuntu aba nayo enyuma z’okubatizibwa?

 RHUNASHAGALUKE bwenene erhi rhubatizibwa n’okuba baguma b’omu mulala gwa Yehova. Luba lukengwa lunene bwenene okuba n’obwîra bwa ntyo haguma na Yehova. Rhuyemire n’obwalagale ezi nderho z’omwandisi w’ennanga Daudi, waderhaga ntya: “Ow’obushagaluke ali muntu ocishozire n’okumulerha hofi ly’alama omu ngo zawe.”—Enna. 65:4, NWT.

² Arhali ngasi muntu yeshi ye Yehova alerha omu mulala gwage. Nk’oku rhwabonaga omu cigabi cageraga, anacishoge okukulula emunda ali balya boshi bayerekine oku balonzize okuba n’obwîra bwa hofi-hofi haguma naye. (Yk. 4:8) Erhi ocihâna emwa Yehova n’okubatizibwa, onamuyegerere omu njira yago-yago. Wanayemera n’obwalagale oku enyuma z’okubatizibwa ‘akubulagira emigisho kuhika nta kantu kabulikanage.’—Mal. 3:10, NWT; Yer. 17:7, 8.

3. Mukolo guhi gw’obulagirire Abakristu bacihânyire emwa Yehova banabatizibwa baba nago? (Omuhanûzi 5:4, 5)

³ Obubatizo, guli murhondero gw’akalamo kawe k’okukolera Yehova. Enyuma z’okubatizibwa, wayish’ijira okwawe koshi ly’ohikiriza eciragane c’okukolera Yehova, n’okugendekera wabêra mwishwekerezi kuli ye, ciru n’amango oshumibwe okujira kantu kalebe kabi erhi amango oli omu marhangulo. (Osome Omuhanûzi 5:4, 5.) We nka mwanafunzi wa Yezu, wakulikira olwiganyo lwage n’okurhumikira amarhegeko gage nk’oku binahashikine. (Mt. 28:19, 20; 1 Pt. 2:21) Eci cigabi cakurhabala okujira ntyo.

 ‘OGENDEKERE WAKULIKIRA’ YEZU CIRU WAKAGERA OMU MASHUMI ERHI MAZIBU

4. Omu njira nci abanafunzi ba Yezu babarhula “omurhi . . . gw’amalibuko”? (Luka 9:23, NWT)

⁴ Orharhanyagya oku enyuma z’okubatizibwa akalamo kawe kaba kalembu. Kobinali, Yezu ayerekine n’obwalagale oku abanafunzi bage bakabarhwire “omurhi . . . gw’amalibuko.” Bal’ishinganine bajire ntyo “ngasi lusiku.” (Osome Luka 9:23, NWT.) Ka Yezu akagiderha oku abanafunzi bage bakalibusire ngasi mango? Nanga ciru n’ehitya. Alonzagya kone okuderha oku ahanyuma n’emigisho bakabire nayo, bakahikirwe n’amazibu. Maguma na maguma ga muli ago mazibu gakabire madarhi bwenene.—2 Tm. 3:12.

5. Migisho ehi Yezu alaganyize balya boshi bacihâna?

⁵ Nkabaga okola ohagalisirwe n’abantu b’omu mulala gwawe, erhi nkaba walesire okushimbulira bintu bilebe by’omubiri ly’ohira obunguke bw’Obwami oku nafasi ntanzi. (Mt. 6:33) Erhi akaba ntyo ko biri, wanayemera n’obwalagale oku Yehova abwine ebyo byoshi wamujirire. (Hb. 6:10) Nkaba wacibwinire okuli kw’ezi nderho za Yezu: “Ntaye waleke enyumpa yage, bene wabo, bâli babo, ishe, nnina, abana erhi mashwa gage nie ntuma n’Emyanzi y’Akalembe erhuma, abule kuhâbwa kali igana, buno, en’igulu: enyumpa, bene wabo, bâli babo, ba-nnina, abana n’amashwa, haguma n’amalibuko, n’omu mango gaciyisha, akalamo karhahwa.” (Mk. 10:29, 30) Kobinali emigisho wabîre nayo eri minji bwenene kulusha ngasi kantu koshi walesire.—Enna. 37:4.

6. Bulya gurhi byayish’ihûna ogendekere walwisa “irala ly’omubiri” enyuma z’okubatizibwa?

⁶ Enyuma z’okubatizibwa byahûna ogendekere walwisa “irala ly’omubiri.” (1 Yn. 2:16) Wajira ntyo bulya orhaciba mwimana. Hali amango wakakaciyumva nk’oku entumwa Paolo yaciyumvagya. Yayandika ntya: “Nnanyumve nsimire amarhegeko ga Nnâmahanga omu murhima gwani; ci omu birumbu byani nyumve erindi irhegeko liherhe lyalwisa irhegeko ly’obukengere bwani n’okunjira mpira y’irhegeko ly’ecaha cindi omu birumbu.” (Rm. 7:22, 23) Hali amamgo wakaciyumva ovunisire omurhima enyanya z’okulwisa irala ly’okulonza okujira ecaha. Cikone, okurhanya oku ciragane wahâga Yehova erhi ocihâna emwage kwanazibuhya omuhigo gwawe gw’okugendekera walwisa enshumi z’okujira ecaha. Okuderha okuli, amango oli omu marhangulo, eciragane cawe c’okucihâna emwa Yehova cakakulanga. Gurhi cakajiramwo ntyo?

7. Gurhi okucihâna emwa Yehova kwakurhabalamwo ogendekere wabêra mwishwekerezi kuli ye?

⁷ Erhi ocihâna emwa Yehova, onacilahire wenene. Ko kuderha oku onacishoge okuhagalika amarala gawe n’emihigo yawe erhakashagalusa Yehova. (Mt. 16:24) Na ntyo, amango waba oli omu marhangulo erhi amango waba oli wagera omu kanga kazibu, orhakaheza akasanzi omu kucidosa ebi oshinganine ojire. Wayish’iba erhi wahizire ebi oshinganine ojire, ko kuderha okubêra mwishwekerezi kuli Yehova. Wayish’igendekera wabêra ohizire okushagalusa Yehova. Omu kanga ka ntyo, wayish’iba aka Ayubu. Ciru akaba akag’igera omu mazibu madarhi bwenene, aderha ntya n’obwalagale: “Nta mango nanaleke obwishwekerezi bwani!”—Ayu. 27:5, NWT.

8. Gurhi okurhanya oku isala wajiraga erhi ocihâna emwa Yehova kwakakurhabala ohagalike amarhangulo?

⁸ Omu kurhanya oku isala wajiraga erhi ocihâna emwa Yehova, wanaba n’emisi y’okuhagalika ngasi irhangulo. Kwa lwiganyo, ka wanarhondera okulehya omuntu orhali balo erhi mukawe? Nanga kobinali! Walaganyize Yehova oku nta mango wakajira akantu kali nk’ako. Erhi akaba orhalesiri entanya mbi zikule muli we, kurhakayish’iba kuzibu kuli  we okuziyaka. Wakayaka ‘enjira z’abaminya.’—Mig. 4:14, 15.

9. Gurhi okurhanya oku isala wajiraga erhi ocihâna emwa Yehova kwakakurhabala ly’ogendekera wahira emikolo y’ekiroho oku nafasi ntanzi omu kalamo kawe?

⁹ Gurhigi erhi muntu mulebe akakuha akazi kakarhuma orhacikahika oku ntimanano z’ecigamba ngasi mango? Wanamanya ebi wajira. Embere bakuhe ako kazi, wali erhi walahire oku nta mango wanayemere akazi kakarhuma orhahika oku ntimanano. Na ntyo, orhakacihira omu marhangulo omu kuyemera ako kazi buzinda olonze enjira wakahiramwo Yehova oku nafasi ntanzi omu kalamo kawe. Omu kurhanya lugenda omuhigo gwa Yezu gw’okushagalusa Ishe, nawe waba mubidu okuyaka ngasi kantu kakarhuma orhashagalusa Nnâmahanga oyu wacihânyire emwage.—Mt. 4:10; Yn. 8:29.

10. Gurhi Yehova akurhabalamwo enyuma z’okubatizibwa ly’‘ogendekera wakulikira’ Yezu?

¹⁰ Okuderha okuli, amarhangulo n’amazibu ganakuhe obulyo bw’okuyerekana oku wahizire ‘okugendekera wakulikira’ Yezu. Wananayemera n’obwalagale oku Yehova akurhabala ogendekere wakulikira Yezu. Ebibliya edesire ntya: “Akanwa ka Nyamuzinda karhagaluka; arhankaziga mwashumikwa okulushire emisi yinyu. Ci haguma n’amashumi, ammuhâ oku mwagafuma n’emisi mwagagalamwo.”—1 Kr. 10:13.

EBI WAKAJIRA LY’OGENDEKERA WAKULIKIRA YEZU

11. Njira nguma ehi nyinja y’omu njira wakakulikiramwo Yezu? (Olole n’enfoto.)

¹¹ Yezu ali wa bushiru, anagendekire ayegerera Yehova kugerera isala. (Lk. 6:12) Kobinali, nguma y’omu njira nyinja wakakolesa ly’ogendekera wakulikira Yezu enyuma z’okubatizibwa kuli kugendekera wajira ebintu byakarhuma wayegerera Yehova. Ebibliya edesire ntya: “Ngasi aha rhwankaba rhuhisire, rhushimbe  [buzira kavulindi] njira nguma.” (Fl. 3:16) Mango oku gandi, wayish’ikayumva emyanzi eyerekire bene wirhu na bali birhu balebe bahizire okujira binji omu mukolo gwa Yehova. Nkabaga bajire oku Masomo g’Abaeneza-Injili b’Obwami erhi bahamire omu eneo erimwo obulagirire bunji bw’abahubiri. Erhi akaba ogwerhe obuhashe bw’okucihiriraho eyo mihigo, ojire okwawe koshi ly’ojira ntyo. Abakozi ba Yehova bajira irala ly’okulonza enjira bakajiramwo binji omu mukolo gwage. (Ebj. 16:9) Cikone, gurhigi erhi akaba mwa gano mango orhaciba n’obuhashe bw’okujira ntyo? Orharhanyagya oku abagwerhe obuhashe bw’okujira ntyo bali ba bulagirire kukulusha. Akantu k’obulagirire oku Bakristu kuli kugendekera balembera. (Mt. 10:22) Orhahîra okayibagira ciru n’ehitya oku onashagaluse Yehova bwenene erhi ojira okwawe koshi ly’omukolera kushimbana n’akanga kawe. Yo njira y’obulagirire eyo bwenene wakagendekera wakulikiramwo Yezu enyuma z’okubatizibwa.—Enna. 26:1.

12-13. Bici wakajira erhi obushiru bwawe bwakarhondera bwanyiha? (1 Abakorinti 9:16, 17) (Olole n’ecisanduku “ Ogendekere Wakulikira Omuhigo Gwawe.”)

¹² Bici oshinganine ojire erhi wakahugûkwa oku amasala gawe garhaciri ga kurhenga oku murhima, nisi erhi akaba orhaciri washagalukira omukolo gw’amahubiri nk’oku byali embere? Bici oshinganine ojire erhi akaba orhacishagalukira okusoma Ebibliya nk’oku byali omu mango gageraga? Erhi akanga ka ntyo kakakuhikira enyuma z’okubatizibwa, orharhanyagya duba-duba oku wahezize iroho lya Yehova. Bulya rhuba bene bantu barhali bimana, entanya zirhu zanashanja kasanzi oku kandi. Erhi akaba obushiru bwawe buli bwanyiha, orhanye oku lwiganyo lw’entumwa Paolo. Ciru akaba akag’icihangana okuyiga olwiganyo lwa Yezu, Paolo al’imanyire oku hali amango akabuzire irala linji ly’okujira ebi al’ilonzize  okujira. (Osome 1 Abakorinti 9:16, 17.) Aderha ntya: “Ci akaba kurhali kulonza kwani, kwo kuderha oku buli burhindisi nahâbirwe.” Omu zindi nderho, Paolo al’ihizire okuhikiriza omukolo gwage gw’amahubiri ciru akaba akag’iciyumva kubi mw’ako kasanzi.

¹³ Ko n’oko, oyake okukarhôla emihigo eyimangire kuli oku oli waciyumva kone. Ohige okujira ebintu binja ciru n’amango orhalonzizi okubijira. Erhi wakagendekera wajira ebintu binja, enyuma z’akasanzi nkaba oku ociyumva kwanashanja. Muli ntyo, okugendekera waba n’enkomedu nyinja y’okujira ifunzo lyawe wene, okushenga, okuja oku ntimanano, n’okujira omukolo gw’amahubiri, kwanakurhabala ogendekere wakulikira Yezu enyuma z’okubatizibwa. Erhi bene winyu na bali binyu babona gurhi oli walembera omu mukolo gwa Yehova, banahâbwe omurhima.—1 Ts. 5:11.

‘OGEREREZE . . . OCIRHANGULE’

14. Bici oshinganine okalabiriza, na bulya gurhi? (2 Abakorinti 13:5)

¹⁴ Na kandi, kuli kwa bulagirire bwenene erhi wakakacilabiriza ngasi mango enyuma z’okubatizibwa. (Osome 2 Abakorinti 13:5.) Kuli kwa bulagirire ngasi mango okalabiriza erhi kobinali ocigwerhe enkomedu nyinja y’okushenga ngasi lusiku, okusoma n’okuyiga Ebibliya, okuja oku ntimanano, n’okuja omu mukolo gw’amahubiri. Ocihangane okulonza enjira nyinja wakashagalukiramwo n’okuyunguka kugerera eyi mikolo minja. Kwa lwiganyo, okacidosa amadoso gali nk’aga: ‘Ka nanahugûlira abandi enyigirizo z’omusingi z’Ebibliya? Ka hali enjira nakajiramwo omukolo gwani gw’amahubiri gube gwa kushagalusa kulusha? Gurhi amasala gani gaba gayosire, ka kobinali ganayerekane oku mba ndangalire Yehova loshi? Ka nanje oku ntimanano z’Ecikristu ngasi mango? Gurhi nakajira lyo nkasegeza obwenge oku ntimanano n’okuhâna kw’amashuzo kulusha?’

15-16. Bici ociyigirizize lugenda okuhagalika amarhangulo kugerera olwiganyo lwa mwene wirhu Robert?

¹⁵ Na kandi kuli kwa bulagirire bwenene omanye obuzamba bwawe buba buhi. Mwene wirhu muguma ohamagalwa Robert aganirire ebyamuhikiraga bihugwîre oko: “Erhi ngwerhe myaka 20 nagwerhe akazi ka kasanzi kasungunu. Lusiku luguma enyuma z’akazi, mukazi muguma rhwakag’ikola naye andalika emwage. Aderha oku rhwayish’iba rhwene n’oku rhwayish’igeza ‘akasanzi kinja haguma.’ Oku murhondero, nakamubwira kone oku birhahashikane, cikone buzinda nalahira nanamuhugûlira bulya gurhi.” Robert ahagalisire er’irhangulo, n’ako kali kantu kinja bwenene. Cikone enyuma  z’aho, arhanya oku byabaga anahugûkwa oku al’ishinganine alwise ako kanga omu njira eri lubero. Adesire ntya: “Ntalahiraga buzibu-zibu na duba-duba ogo mulali nk’oku Yozefu ahagalikaga muka Potifari. (Murh. 39:7-9) Kobinali, nasomirwe okubona gurhi kwali kuzibu kuli nie okulahira. Ako kanga kantabire mbone oku kobinali nal’ishinganine nzibuhye obwîra bwani haguma na Yehova.”

¹⁶ Wanaba n’obunguke erhi nanawe wakacilabiriza wenene nk’oku Robert ajiraga. Ciru n’amango ohashire okuhagalika irhangulo, ocidose ntya: ‘Kasanzi kanganaci byampunyire lyo ndahira?’ Orhavunikaga omurhima erhi wakabona oku bihûnyire okujira empindulo. Ocishinge bwenene bulya okola omanyire obo buzamba. Oshenge lugenda oko, onarhôle emihigo y’okuzibuhya omuhigo gwawe gw’okugendekera walama kushimbana n’amakanuni ga Yehova g’olugenzi.—Enna. 139:23, 24.

17. Gurhi okubêra mwishwekerezi kwa Robert kwahumire oku izino lya Yehova?

¹⁷ Haciri akandi kantu rhwakaciyigiriza kugerera olwiganyo lwa Robert. Agendekire okuderha ntya: “Erhi ndahira omulali gw’oyo mukazi, aderha ntya: ‘Wamahima er’irhangulo!’ Namudosa bici alonzize okuderha. Ampugulira oku mwîra-rhabana wage muguma wali Muhamirizi wa Yehova omu mango gageraga, amubwizire oku Abahamirizi ba Yehova boshi baciri misole banakalama akalamo k’obulyalya n’oku barhakabula bwakolesa obulyo bahâbirwe bw’okujira ebintu bibi. N’oyo murhabana wali Muhamirizi abwira oyo mukazi oku antangule abona oku nayemera. Ntyo, nashagaluka bwenene okubona kunganaci nakengesize izino lya Yehova.”

18. Bici ohizire okujira enyuma z’okubatizibwa? (Olole n’ecisanduku “ Myanzi Ibirhi Washagalukira Bwenene.”)

¹⁸ Erhi ocihâna emwa Yehova n’okubatizibwa, onayerekane oku olonzize ocêse izino lyage ciru bici byakaba. Wanayemera n’obwalagale oku Yehova ayishi amazibu ogeramwo n’amarhangulo ohagalika. Agisha obushiru bwawe bw’okubêra mwishwekerezi. Oyemere n’obwalagale oku kugerera iroho lyage litagatifu, anakuha emisi y’okujira ntyo. (Lk. 11:11-13) Kugerera oburhabale bwa Yehova, wanaba n’obuhashe bw’okugendekera wakulikira Yezu enyuma z’okubatizibwa.