Rhwanababalirwa ebyaha birhu kugerera engombôlo ya Yezu yone, yahânagwa omu kubulagwa k’omuko gwage. (Ef. 1:7) Ebibliya edesire oku Nyamuzinda “ayerekana obwimâna bwage omu kurhubabalira ebyaha bya mîra,” embere Yezu ahâne engombôlo. (Rm. 3:25) Gurhi Yehova akababaliremwo ebyaha birhu embere engombôlo ehânwe anagendekere aba Mungu mushinganyanya?

Omu masu ga Yehova, engombôlo yali yamahânwa kurhenga amango ahigaga oku hakabire “iburha” lyakayokwire bene bantu boshi bakabire n’obuyemere muli ye n’omu biragane byage. (Murh. 3:15; 22:18) Nnâmahanga al’iyemire n’obwalagale oku Omugala akahânyire engombôlo buzira kusezibwa omu kasanzi Nnâmahanga akalonzize ehânwe. (Gl. 4:4; Hb. 10:​7-10) Amango Yezu ali hanw’igulu, Yehova al’imuhîre obuhashe bw’okubabalira ebyaha embere engombôlo ehânwe. Yezu akababalire ebyaha by’abantu bagwerhe obuyemere muli ye bulya al’imanyire oku enterekêro akahânyire yakabirhenzize.—Mt. 9:2-6.