1-2. (a) Kanga kahi amaruba emwa Abefezi gayandikagwamwo? (b) Madoso gahi rhwaganirira?

 ERHI entumwa Paolo eri omu mpamikwa e Roma, yal’ilonzize ehe ababo bemezi omurhima. Arhakabalambagirire busu oku busu, ntyo abayandikira amaruba. Egarhi k’omwaka gwa 60 na 61 muli Kano Kasanzi Kirhu (K.K.K.), ayandikira Abefezi amaruba.—Ef. 1:1; 4:1.

² Hofi myaka ikumi embere z’aho, agezize kasanzi kalebe e Efezi, ali ayaliza n’okuyigiriza omwanzi mwinja. (Ebj. 19:1, 8-10; 20:20, 21) Al’izigire bene wabo bwenene, anal’ilonzize abarhabale bagendekere babêra bishwekerezi kuli Yehova. Cikone, bici byarhumaga ayandikira Abakristu bashige amavurha lugenda omwizimya n’obulangashane? Na bici Abakristu boshi bakaciyigiriza kugerera ebi ayandikaga? Leki rhuganirire amashuzo g’ago madoso.

KURHENGA OMU MWIZIMYA KUJA OMU BULANGASHANE

3. Nderho zihi Paolo akolesize omu maruba ayandikiraga Abefezi?

³ Paolo ayandikira Abakristu b’e Efezi ntya: “Mîra mwâli omu mwizimya, buno lero mukola muli bulangashane.” (Ef. 5:8) Ahala, Paolo akolesize enderho mwizimya na bulangashane, ly’ayerekana gurhi Abefezi bal’ikola bali lubero bwenene n’oku bal’iyosire embere. Leki rhurhang’ilaba bulya gurhi Paolo aderhaga oku Abefezi bali “omu mwizimya.”

4. Omu njira nci Abefezi bali omu mwizimya enyanya z’idîni?

⁴ Omu mwizimya enyanya z’idîni ly’obunywesi. Embere bayige okuli n’okuba Bakristu, Abefezi, Paolo ayandikiraga amaruba, bal’igwerhe obuyemere bw’amadîni g’obunywesi, bananal’iyemire eby’obukurungu. Omu vile y’e Efezi mwali ehekalu ya Artemi, hinnâmahanga hikazi higiriki, na bantu banji ba mw’ago  mango bakag’ibona eyo hekalu oku eli nguma y’omu bintu nda by’okusomeza bene bantu bali bamakayubaka. Abantu bakag’ija mw’eyo hekalu lyo baharamya ensanamu. Abantu bakag’iba na nsaranga nyinji bwenene omu kutula n’okuguza ensanamu z’eyo hekalu n’ez’ehyo hinnâmahanga hyayo. (Ebj. 19:23-27) Na kandi, eyo vile yal’imanyikine bwenene okubiyerekire eby’obukurungu.—Ebj. 19:19.

5. Omu njira nci Abefezi bali omu mwizimya gw’olugenzi?

⁵ Omu mwizimya enyanya z’okurharhumikira amakanuni g’olugenzi. Abantu b’e Efezi bagwerhe olugenzi lw’okujira eby’enshonyi, barhanagwerhe nshonyi omu lugenzi lwabo. Emyanzi eyerekire eby’enshonyi yakag’iyumvikana ngasi hoshi ciru n’amango g’amadinye g’amadîni. (Ef. 5:3) Bantu banji ba mw’eyo vile bali “bacikala-shonyi,” luderho luhugwîre oku barhacikag’ishishwa n’olugenzi lwabo lw’okujira eby’enshonyi. (Ef. 4:17-19) Embere Abefezi bayige ebintu binja n’ebibi, ezamiri yabo erhakag’ibatumuza, barhananakag’irhanya ciru lugenda oku Yehova aciyumva enyanya z’olugenzi lwabo. Co carhumaga Paolo aderha oku “obukengere bwabo buyunjwire mwizimya, n’obuhwinja bw’omurhima gwabo guhûsire bwarhumire barhabona obuzine bwa Nyamuzinda.”

6. Bulya gurhi Paolo aderhaga oku Abefezi ‘bakola bali bulangashane’?

⁶ Cikone, bantu baguma na baguma b’e Efezi barhagendekeraga babêra omu mwizimya. Paolo ayandika ntya: “Buno lero mukola muli bulangashane muli Nyakasane.” (Ef. 5:8) Bal’ikola bali balama nk’oku Akanwa ka Nnâmahanga kadesire, kali nka bulangashane bwakag’ibalongoza. (Enna. 119:105) Abefezi baleka ebijiro by’amadîni g’obunywesi n’olugenzi lw’okujira eby’enshonyi. Barhondera ‘bashusha Nnâmahanga’ banajira okwabo koshi lyo baharamya Yehova n’okumushagalusa.—Ef. 5:1.

7. Omu njira nci akanga kirhu kashushine n’akanga ka Bakristu banji b’e Efezi?

⁷ Ko n’oko, embere rhuyige okuli, rhwali omu mwizimya enyanya z’amadîni n’enyanya z’olugenzi lubi. Baguma na baguma muli rhwe bakag’ijira ensiku nkulu z’amadîni; n’abandi bagwerhe olugenzi lw’okujira eby’enshonyi. Cikone,  erhi rhuyiga amakanuni ga Nnâmahanga lugenda aminja n’amabi, rhwajira empindûlo. Rhwarhondera okulama nk’oku alonzize rhulame. N’oko kwarhumire rhwaba na bunguke bunji bwenene. (Iz. 48:17) Ciru akaba ntyo, buno rhuciri rhwalwisa ebyo bintu. Rhushinganine rhugendekere rhwayaka omwizimya rhwalesire enyuma, n’okugendekera ‘rhwayorha nka bana ba bumoleke.’ Gurhi rhwakajiramwo ntyo?

OYAKE OMWIZIMYA

8. Kushimbana na Abefezi 5:3-5, bici Abefezi bal’ishinganine bayake?

⁸ Osome Abefezi 5:3-5. Lyo bagendekera baba kuli bwenene n’omwizimya gw’olugenzi, Abakristu b’e Efezi bal’ishinganine bagendekere bayaka ebijiro birhashagalusa Yehova. Barhal’ishinganine bayake kone olugenzi lw’eby’enshonyi, cikone kandi, bal’ishinganine bayake enderho zibozire ziyerekire eby’enshonyi. Paolo abakengeza oku bal’ishinganine bayake ebyo bintu erhi akaba bal’ilonzize ‘balabarhe omu Bwami bwa Kristu na Nnâmahanga.’

9. Bulya gurhi rhushinganine rhuyake ngasi kantu kakarhuma rhwaba n’olugenzi lw’okujira eby’enshonyi?

⁹ Na nirhu rhushinganine rhugendekere rhwajira okwirhu koshi lyo rhuyaka okucihira omu “mikolo y’omwizimya erhajira kamalo [bunguke].” (Ef. 5:11) Omu kasanzi kanji, byabonekine n’obwalagale oku; oku omuntu agendekera ayumvirhiza, oku agendekera alaba, erhi kuganirira ebintu birhacîri, erhi bintu biyerekire olugenzi lw’eby’enshonyi, ko kunaba kulembu kuli ye okurhogera omu bijiro bibi. (Murh. 3:6; Yk. 1:14, 15) Omu cihugo ciguma, ecigusho ca bene wirhu banji, carhondire okuganira n’abandi kugerera esite z’e enternete z’okuganira na bantu banji. Oku murhondêro, banji muli bo bakag’iganira lugenda Yehova na lugenda okuli. Cikone bunyi-bunyi, barhondera okukaganirira ebintu birhashagalusizi Yehova. Enganîro zabo zarhondera okuyerekera eby’enshonyi. Enyuma z’aho, banji muli bo bayerekine n’obwalagale oku ezo nganiro zirhacîri zarhumire bahikira aha bajira eby’enshonyi.

10. Gurhi Shetani alonza okurhurheba? (Abefezi 5:6)

¹⁰ Igulu lya Shetani linakalonza okurhurheba, linakalonza okurhuyemeza oku ebi Yehova abona oku biri bya nshonyi birhanacîri, birhaba bibi bujayo. (2 Pt. 2:19) Oko kurharhusomezizi! Njira nguma y’omu njira Shetani amakakolesa kanji-kanji, kuba kuhusa abantu lyo barhag’ihugûkwa ebinja n’ebibi. (Iz. 5:20; 2 Kr. 4:4) Co cirhuma filme nyinji, ebigera oku mateleviziyo, n’ebiba oku site nyinji z’e enternete binakaganirira entanya ziri lubero n’amakanuni mashinganyanya ga Yehova! Shetani anakalonza okurhurheba rhurhanye oku ebijiro n’olungenzi lurhacîri birhaba biyemirwe kone, cikone kandi biba bya kushagalusa n’oku birhakarhulerhera amazibu.—Osome Abefezi 5:6.

11. Gurhi ebyahikiraga Angela bisegizemwo obulagirire bw’okukolesa amahano g’obwenge gali omu Abefezi 5:7? (Olole n’enfoto.)

¹¹ Shetani anakalonza rhucilunge n’abantu bakarhuma kwaba kuzibu kuli rhwe okurhumikira amakanuni ga Yehova. Oko ko kwarhumaga Paolo arhonda Abefezi ntya: “Murhashangîraga akantu mweshi n’abo bantu,” bajira ebintu bibi omu masu ga Yehova. (Ef. 5:7, Mashi Bible) Cikone rhushinganine rhube masu bwenene kulusha Abefezi ba mîra, bulya ene rhunageze akasanzi haguma n’abantu, arhali busu oku busu kone, cikone kandi kugerera esite z’e enternete z’okuganira na bantu banji. Angela, a olama omu Asie, abwine omurhego guba omu site z’e enternete z’okuganira na bantu banji.  Adesire ntya: “Esite z’e enternete z’okuganira na bantu banji zanashanja entanya zawe bunyi-bunyi. Ntal’ihugûsirwe oku nakakomerine n’abantu barhakag’irhumikira amakanuni g’Ebibliya. Bunyi-bunyi, narhondera narhanya oku kurhali kubi okuba n’akalamo karhashagalusizi Yehova.” Cikone, bagula baguma b’obuzigire barhabala Angela ajire empindûlo. Adesire ntya: “Nkola nkasegeza obwenge bwani kuli Yehova ahali h’okubusegeza oku site z’e enternete z’okuganira na bantu banji.”

12. Bici byakarhurhabala lyo rhugendekera rhwarhumikira amakanuni ga Yehova lugenda ebinja n’ebibi?

¹² Rhushinganine rhulwise entanya z’igulu ziyerekine oku olugenzi lw’okujira eby’enshonyi lurhaba lubi. Rhumanyire oku olo lugenzi luba lubi bwenene. (Ef. 4:19, 20) Ciru akaba ntyo, rhushinganine rhucidose ntya: ‘Ka nambe masu amango kurhali kwa bulagirire okurhacilunga n’abirhu banyakazi, abirhu rhusoma rhweshi, erhi abandi barhakenga amakanuni mashinganyanya ga Yehova? Ka nambe n’oburhwali bw’okurhumikira ebi Yehova adesire oku bili binja erhi bibi ciru abandi bakaderha oku ntalusire olugero omu kujira ntyo?’ Nk’oku biyerekinwe omu 2 Timoteyo 2:20-22, rhushinganine rhube masu amango rhwacishoga aba rhwakomerana nabo ciru n’omu cigamba c’Ecikristu. Rhunakengere oku hali bantu baguma na baguma barhakarhurhabala rhugendekere rhwabêra bishwekerezi omu mukolo gwa Yehova.

RHULAMBAGIRE “NKA BANA BA BUMOLEKE”

13. Okuba “nka bana ba bumoleke” ko kuderha gurhi? (Abefezi 5:7-9)

¹³ Paolo arhahâga Abakristu b’e Efezi omurhima bayake kone omwizimya, cikone kandi ababwira, ‘bayorhe nka bana ba bumoleke.’ (Osome Abefezi 5:7-9.) Bici oko kuhugwîre? Omu nderho nembu, oko kuhugwîre oku rhushinganine rhukaba n’olugenzi lw’Ecikristu ngasi kasanzi. Enjira yakarhurhabala rhuhikirize ogo muhigo, kuli kukasoma bwinja n’okuyiga Ebibliya haguma n’ebicapo birhu biyimangire oku Bibliya. Kuli kwa bulagirire bwenene rhukasegeza obwenge bwirhu oku lwiganyo n’enyigirizo za Yezu Kristu, “kamole k’igulu.”—Yn. 8:12; Mig. 6:23.

14. Gurhi iroho litagatifu lyakarhurhabalamwo?

 ¹⁴ Na kandi, rhulagirire oku burhabale bw’iroho litagatifu lyo rhugendekera rhwaba n’olugenzi luli ‘nka lw’abana ba bumoleke.’ Bulya gurhi? Bulya kurhali kulembu okugendekera rhwabêra rhucîre mw’er’igulu ligwerhe olugenzi lubi. (1 Ts. 4:3-5, 7, 8) Iroho litagatifu lyanarhurhabala rhuhagalike entanya z’er’igulu, zihiziremo efilozofi, n’entanya z’abantu barhabona ebintu nk’oku Yehova abibona. Na kandi iroho litagatifu lyanarhurhabala rhujire “ngasi hiri hyinja, ngasi hishinganine.”—Ef. 5:9.

15. Njira zihi rhwakapatamwo iroho litagatifu? (Abefezi 5:19, 20)

¹⁵ Njira nguma rhwakapatamwo iroho litagatifu, kuli kulihûna Yehova kugerera isala. Yezu adesire oku Yehova “ahâna kulusha iroho litagatifu kuli balya balihûnyire.” (Lk. 11:13, NWT) Na kandi, rhunahâbwe iroho litagatifu erhi rhukuza Yehova haguma oku ntimanano z’Ecikristu. (Osome Abefezi 5:19, 20.) Okubona iroho litagatifu lya Nnâmahanga linarhushumye omu njira nyinja, oko kunarhurhabale rhulame omu njira eshagalusize Nnâmahanga.

16. Bici byakarhurhabala lyo rhurhôla emihigo y’obwenge? (Abefezi 5:10, 17)

¹⁶ Amango bihûnyire rhurhôle emihigo y’obulagirire, rhushinganine rhulonze okumanya “cici Nyakasane [Yehova] alonza” n’okujira kushimbana n’ebi alonza. (Osome Abefezi 5:10, 17.) Erhi rhubona amakanuni g’Ebibliya gakakola omu kanga kirhu, rhunabe rhukola rhumanyire entanya za Nnâmahanga lugenda ako kanga. Enyuma z’aho erhi rhukolesa ago makanuni, rhunarhôle emihigo minja.

17. Bici okukolesa akasanzi kirhu n’obwenge kuhiziremwo? (Abefezi 5:15, 16) (Olole n’enfoto.)

¹⁷ Na kandi, Paolo ahanûla Abakristu b’e Efezi bakolese akasanzi kabo n’obwenge. (Osome Abefezi 5:15, 16.) Omushombanyi wirhu Shetani, “olya mubi,” aba alonzize rhugeze kasanzi kanji rhuli rhwajira emikolo y’er’igulu, na ntyo rhubule akasanzi rhwakageza omu mukolo rhujirira Yehova. (1 Yn. 5:19) Omukristu  anarhondera asegeza obwenge bwage oku nsaranga, amasomo, erhi akazi, ahali h’okubusegeza oku njira nyinji akakoleramwo Yehova. Erhi oko kwakahikira, anayerekana oku akola ali arhanya nk’oku abantu barhakolera Yehova barhanya. Okuderha okuli, ebyo bintu birhali bibi, cikone, birhashinganini birhôle enafasi ntanzi omu kalamo kirhu. Lyo rhulambagira “nka bana ba bumoleke,” rhushinganine ‘rhukolese bwinja amango [kasanzi] rhuhîrwe,’ omu kusegeza obwenge oku bintu biri bya bulagirire bwenene.

18. Mihigo ehi Donald arhôzire ly’akakolesa bwinja akasanzi kage?

¹⁸ Olonze enjira wakajiriramwo Yehova binji kulusha. Ntyo ko Donald, olama e Afrique du Sud ajijire. Adesire ntya: “Nalabirizize akanga kani nanasemberera Yehova antabale mbe n’amalehe minja omu mukolo gw’amahubiri. Nashenga lyo mba n’akazi kakantabala mbe na kasanzi kanji k’okuhubiri. Kugerera oburhabale bwa Yehova, napata akazi kashinganine. Nie na mukanie rhwarhondera omukolo gw’akasanzi koshi.”

19. Gurhi rhwakagendekera rhwalambagira “nka bana ba bumoleke”?

¹⁹ Amaruba Paolo ayandikiraga Abefezi, gashinganine gabe garhabire abo Bakristu bagendekere babêra bishwekerezi kuli Yehova. N’ago mahano galongozibagwa n’iroho lya Yehova ganarhurhabala na nirhu. Nk’oku rhwabwine, ganarhurhabala rhucishoge n’obwenge eby’okucishagalusa nabyo, n’aba rhwakomerana nabo. Ganarhushumya rhugendekere rhwakayiga Akanwa ka Nnâmahanga ngasi mango, ly’obumoleke bw’okuli bukarhulongoza muli byoshi rhuli rhwajira. Ganasegize obulagirire bw’iroho litagatifu lyakarhurhabala rhube n’amorhere minja. Okukolesa ebiri mw’ago maruba Paolo ayandikaga kwanarhurhabala rhurhôle emihigo minja epatine n’entanya za Yehova. Omu kujira ebyo bintu, rhwanaba n’obuhashe bw’okuhagalika omwizimya gw’er’igulu n’okugendekera rhwabêra omu bulangashane!