1. Migisho ehi miguma na miguma rhushagalukira omu kuba baguma bw’omw’ikubuliro lya Yehova?

 RHUGISHIRWE bwenene okuba cigabi c’ikubuliro lya Yehova mw’ezi nsiku nzinda. Akalamo mw’er’igulu kagendekire kaba kazibu bwenene, cikone, Yehova arhuhîre bene wirhu na bali birhu bakarhurhabala. (Enna. 133:1) Anarhurhabale rhube n’akalamo k’omwishingo omu mulala gwirhu. (Ef. 5:33–6:1) Na kandi, anarhuhe oburhimanya n’obwenge rhulagirireko lyo rhuba n’omurhûla gw’ekandalala.

2. Bici rhushinganine rhujire na bulya gurhi?

² Cikone, rhugwasirwe rhucihangane bwenene lyo rhugendekera rhwakolera Yehova n’obwishwekerezi. Bulya gurhi? Bulya hali amango rhwakavunika omurhima enyanya z’enderho erhi ebijiro by’abandi. Na kandi, hali amango rhwakaciyumva rhuvunisire omurhima erhi rhwakajira amagosa, ci bwenene erhi rhwakajira galya magosa go na galya ngasi mango. Rhulagirire oku kugendekera rhwalembera omu mukolo gwa Yehova (1) erhi owirhu mwemezi akarhugokeza, (2) erhi omulume wirhu erhi mukirhwe akarhuvuna omurhima, na (3) erhi rhwakaciyumva rhuvunisire omurhima enyanya z’amagosa rhwajijire. Mw’eci cigabi rhwaganirira ebi rhwakaciyigiriza kugerera enyiganyo za bantu basharhu baganirirwe omu Bibliya bagendekire babêra bishwekerezi ciru akaba bakag’igera mw’ezo hali isharhu.

OLEMBERE ERHI OWINYU MWEMEZI AKAKUGOKEZA

3. Mazibu gahi abakozi ba Yehova bali barhimanana nago?

³ Ebirhuma kwaba kuzibu. Owirhu mwemezi abe agwerhe amorhere gakarhugayisa. Abandi banarhujirira ebintu byarhuvuna omurhima, erhi barhujirire bintu bilebe omu njira erhayerekini olukogo. Abali barhulongoza omu ikubuliro banajira amagosa.  Ebyo bintu byoshi byanarhuma bantu baguma na baguma baba n’akarhinda n’okucidosa erhi kobinali eri lir’ikubuliro lya Nnâmahanga. Ahali h’okugendekera bakolera Nnâmahanga omu “cinyabuguma” haguma na bene wabo na bali babo, hali amango bakaleka okukomerana n’abo babagokezagya erhi ciru baleke okukaja oku ntimanano. (Sof. 3:9 NWT) K’okujira ntyo kuli kwinja? Rhuganirire olwiganyo lwa muntu mulebe oganirirwe omu Bibliya wahikirwe n’amazibu ga ntyo.

4. Mazibu gahi entumwa Paolo yarhimanine nago?

⁴ Olwiganyo lw’Ebibliya. Entumwa Paolo yal’imanyire oku bene wabo na bali babo Bakristu barhali bimana. Kwa lwiganyo, bantu baguma na baguma b’omu cigamba e Yeruzalemu bakag’imuyoboha, barhanal’iyemire erhi kobinali ali mwanafunzi wa Yezu. (Ebj. 9:26) Enyuma z’aho, bantu baguma na baguma bakamuderha-derha kubi lyo barhuma abandi baleka okumulangalira. (2 Kr. 10:10) Paolo abona mugula muguma warhôlaga omuhigo mubi gwakarhumire abandi basarhala. (Gl. 2:11, 12) Na Marko mwîra wa hofi-hofi wa Paolo, amuvuna omurhima. (Ebj. 15:37, 38) Ebyo byoshi byakarhumire Paolo ayaka okukacilunga haguma n’abamugokezagya. Cikone, agendekera aba n’entanya nyinja lugenda bene wabo na bali babo anagendekera akolera Yehova n’obwishwekerezi. Bici byarhabire Paolo ly’alembera?

5. Bici byarhabire entumwa Paolo ly’egendekera yabêra hofi na bene wabo na bali babo? (Abakolosi 3:13, 14) (Olole n’enfoto.)

⁵ Paolo al’izigire bene wabo na bali babo. Obuzigire bwa Paolo bwamurhabala arhakag’isegeza obwenge bwage oku buzamba bw’abo bene wabo na bali babo, cikone akabusegeza oku morhere gabo minja. Na kandi, obuzigire bwamurhabala ajire ebi yene ayandikaga biri omu Abakolosi 3:13, 14. (Osome.) Olole gurhi Paolo ajiriraga Marko. Ciru akaba Marko alekaga Paolo omu mubalamo gwage murhanzi gw’obumisiyonere, Paolo, arhagendekeraga abîka akarhinda. Enyuma z’aho erhi Paolo ayandikira ecigamba c’Ekolosi amaruba g’obuzigire, akunga Marko oku ali wabo munya-kazi w’obulagirire bwenene omu kuderha oku ‘abire [nshôko] y’oburhulirize.’ (Kl. 4:10, 11) N’erhi ali omu prizo e Roma, Paolo ahûna Marko ayishe amurhabale. (2 Tm. 4:11) Bibonekine n’obwalagale oku Paolo ababalire bene wabo na bali babo anagendekera abayegerera. Bici rhwakaciyigiriza kugerera olwiganyo lwa Paolo?

6-7. Gurhi rhwakagendekeramwo rhwayeresa bene wirhu na bali birhu obuzigire ciru akaba bajira buzamba bulebe? (1 Yowane 4:7)

⁶ Ebi rhuciyigirizize. Yehova alonzize rhugendekere rhwalembera omu kuyeresa bene  wirhu na bali birhu obuzigire. (Osome 1 Yowane 4:7.) Erhi muntu mulebe akabula bwayerekana borhere bulebe bw’Ecikristu, rhwanayemera n’obwalagale oku alonzize alame kushimbana n’amakanuni g’Ebibliya, cikone nkaba anajijire kone kantu kalebe buzira kurhanya. (Mig. 12:18) Yehova aba azigire abakozi bage bishwekerezi ciru akaba bajira buzamba bulebe. Yehova anagendekere abêra mwîra wirhu ciru akaba rhujira amagosa arhanarhubikira akarhinda. (Enna. 103:9) Kuli kwa bulagirire bwenene kuli rhwe okuyiga olwiganyo lwa Larha wirhu w’obuzigire!—Ef. 4:32–5:1.

⁷ Na kandi, okengere oku, bulya obuzinda buyegerire, rhulagirire oku kugendekera rhwayegerera bene wirhu na bali birhu. Rhulangalire oku amalibuko gagendekera gayushuka. Hali n’amango ciru rhwakashwekwa enyanya z’obuyemere bwirhu. Erhi oko kwakarhuhikira, rhwaba rhulagirire kuli bene wirhu na bali birhu kulusha agandi mango goshi. (Mig. 17:17) Olabe ebyahikiraga Josep, a mugula muguma w’e Espagne. Ye n’abandi bene wirhu bal’ishwekirwe haguma enyanya z’obuyemere bwabo. Adesire ntya: “Erhi rhuli omu prizo, kwali kulembu kuli rhwe okugokezanya bulya rhwakag’iba rhuli haguma ensa zoshi. Byal’ihunyire rhuje rhwalemberana n’okubabalirana buzira kusezibwa. Oko kwarhurhabala rhugendekere rhwabêra omu cinyabuguma rhunalanzirwe. Rhwal’izungulusirwe n’abandi bantu barhakag’ikolera Yehova. Mango maguma nayagalika, navunika okuboko, bakuhira kw’e bandage ntakanac’ihashire okukukolesa. Cikone mwene wirhu muguma akanfulira emishangi n’okunshimbirira omu yindi njira. Nayeresirwe obuzigire bw’okunali omu kasanzi nal’ibulagirireko.” Rhugwerhe ebirhumire binja by’okuyusa amazibu gakaba gali egarhi kirhu ene!

OGENDEKERE WALEMBERA ERHI BALO ERHI MUKAWE AKAKUVUNA OMURHIMA

8. Mazibu gahi abajire omu buhya barhimanana nago?

⁸ Ebirhuma kwaba kuzibu. Amahya goshi gabamwo amazibu. Ebibliya ebwizire n’obwalagale abantu bajire omu buhya oku “bayumva amalibuko omu mubiri gwabo.” (1 Kr. 7:28) Bulya gurhi? Bulya obuhya bunahumanye haguma bantu babirhi barhali bimana na ngasi muguma muli bo, ajira agage morhere, eby’ashagalukira n’ebi arhashagalukira. Omulume n’omukazi banaba barhali b’omu bûko buguma, barhanali b’omu nkomedu ziri kuguma. Hali amango omulume erhi omukazi akabona amorhere owabo agwerhe n’obu arhagabonaga embere barhôlane. Ngasi kaguma k’ebyo bintu byoshi kanalerha amazibu. Ahali h’okukola bwenene haguma lyo bayusa amazibu banarhondera batumuzanya n’obu boshi bagwerhe amagosa. Hali amango ciru bakabona oku okulekana nisi erhi okuzaza obuhya ko kwayusa amazibu gabo. Cikone, k’okulekana erhi okuzaza obuhya k’okuyusa amazibu? b Leki rhuganirire olwiganyo lwa muntu mulebe oganirirwe omu Bibliya walembire amazibu madarhi bwenene g’omu buhya.

9. Mazibu gahi Abigaili arhimanine nago?

⁹ Olwiganyo lw’Ebibliya. Abigaili ali muka Nabali, oyu Ebibliya edesire oku ali mudarhi anali mubi. (1 Sam. 25:3) Kushinganine kube kwali kuzibu kuli Abigaili okulama n’omulume wa ntyo. Ka Abigaili agwerhe obulyo akayusizemwo obuhya bwabo? Neci. Ahâbirwe obo bulyo erhi Daudi wakayishir’iba mwami w’Israheli ayish’iyirha iba bulya amujacire anajacira abalume bage. (1 Sam. 25:9-13) Abigaili akayasire n’okuleka Daudi anige Nabali. Arhajiraga ntyo, lubero  n’oko ayemeza Daudi amanye akaniga Nabali. (1 Sam. 25:23-27) Bici byarhumaga ajira ntyo?

10. Bici nkaba byashumyagya Abigaili ly’agendekera abêra omu buhya bwage ciru akaba bwalimwo amazibu?

¹⁰ Abigaili al’izigire Yehova, anakag’ikenga amakanuni gage lugenda obuhya. Buzira karhinda ashinganine abe al’imanyire ebi Yehova abwiraga Adamu na Eva erhi arhondeza obuhya burhanzi. (Murh. 2:24) Abigaili al’imanyire oku Yehova akag’ibona obuhya oku guli mupango mutagatifu. Al’ilonzize okushagalusa Nnâmahanga, n’oko kushinganine kube ko kwamushumize ajire ebi akanahasha byoshi ly’ayokola iba n’obuhya bwabo. Ajira duba-duba ly’ahanza Daudi okuniga Nabali. Ananali ciru mubidu okuhûna obonjo bw’amagosa arhajiraga. Bibonekine oku Yehova agishire oyo mukazi w’oburhwali orhanali wa kucikaliza. Bici abalume n’abakazi bajire omu buhya bakaciyigiriza kugerera olwiganyo lwa Abigaili?

11. (a) Bici Yehova aba ahûnyire abajire omu buhya? (Abefezi 5:33) (b) Bici ociyigirizize kugerera oku Carmen ayokolagamwo obuhya bwage? (Olole n’enfoto.)

¹¹ Ebi rhuciyigirizize. Yehova alonzize omulume n’omukazi bagendekere babêra haguma ciru akaba kurhali kulembu okujira ntyo. Nnâmahanga anashagaluke bwenene erhi abona abajire omu buhya bali bakola bwenene lyo bayusa amazibu g’omu buhya bwabo n’okuyerekana obuzigire burhali bwa kucikaliza n’obukenge. (Osome Abefezi 5:33.) Rhuganirire olwiganyo lwa Carmen. Hofi myaka ndarhu enyuma z’okuja omu buhya, Carmen arhondera okuyiga Ebibliya haguma n’Abahamirizi ba Yehova, n’enyuma z’aho abatizibwa. Carmen adesire ntya: “Ibanie arhashagalukiraga omuhigo gwani, ayumviza Yehova burhe bunene bwenene. Akanjacira bwenene n’okunyobohya oku andeka.” Ciru akaba ntyo, Carmen agendekera abêra omu buhya bwage. Omu myaka 50 yoshi, agendekire ajira okwage koshi ly’agendekera azigira iba n’okumukenga. “Oku emyaka yajaga yagera, naciyigiriza okuhûgukwa gurhi ibanie ali aciyumva n’okumuganiza omu njira nyinja na ya bukenge. Bulya nal’imanyire oku obuhya buba butagatifu omu masu ga Yehova, nakajira ngasi kantu koshi nakahashire lyo mbulanga. Ntarhengaga omu buhya bwani bulya nal’izigire Yehova.” c Erhi amazibu gakahikira omu buhya bwinyu, wanalangalira oku Yehova akurhabala n’okukuha emisi y’okulembera.

OGENDEKERE WALEMBERA ERHI WAKAVUNIKA OMURHIMA ENYANYA Z’AMAGOSA GAWE

12. Mazibu gahi rhwakalwisa erhi rhwakajira ecaha cizibu?

¹² Ebirhuma kwaba kuzibu. Hali amango rhwakaciyumva rhuvunisire omurhima bwenene  erhi rhwakajira ecaha cizibu. Ebibliya eyerekine n’obwalagale oku ebyaha birhu byanarhuma rhwaciyumva ‘rhuvunisire rhunavungunyusire.’ (Enna. 51:17, NWT) Mwene wirhu muguma ohamagalwa Robert, ayusize myaka minji ali akola bwenene ly’ahikiriza ebihûnyirwe ly’aba murhabazi w’abagula. Cikone ajira ecaha cizibu anahûgukwa oku anagomire Yehova, adesire ntya: “Erhi mpugûkwa ebinajiraga ezamiri yani yakantumuza bwenene. Enyuma z’aho naciyumva kubi bwenene, nalaka bwenene nanashenga Yehova. Nkengire oku naciyumva nka ntamango Nnâmahanga akaciyumvirhizize amasala gani bulya nal’imuvunyire omurhima.” Erhi rhwakajira ecaha cizibu, hali amango rhwakaciyumva rhuvunisire omurhima n’okurhondera rhwarhanya oku Yehova arhulekerire, n’oku kurhaciri kwa bulagirire rhugendekere rhwamukolera. (Enna. 38:4) Erhi akaba onaciyumve ntyo, olole olwiganyo lwa muntu mulebe oganirirwe omu Bibliya wagendekire akolera Yehova ciru akaba ajiraga ecaha cizibu.

13. Caha cihi cizibu Petro ajiraga na gandi magosa gahi ajiraga embere acijire?

¹³ Olwiganyo lw’Ebibliya. Omu budufu bw’embere z’okufâ kwa Yezu, entumwa Petro yajira magosa manji garhumaga yahikira aha yajira akantu kabi bwenene erhal’irhanyize oku yakajijire omu kalamo kayo. Burhangiriza, Petro ayerekana oku al’icilangalire bwenene, acikunga oku abêra mwishwekerezi ciru ezindi entumwa zoshi zakayaka Yezu. (Mk. 14:27-29) Enyuma z’aho erhi bali omw’ishwa ly’e Getesemani, Petro ayabirwa okugendekera abêra masu. (Mk. 14:32, 37-41) Na kandi, Petro ayaka Yezu erhi bayish’imugwarha. (Mk. 14:50) Buzinda, Petro ahakana kasharhu koshi-koshi oku arhayishi Yezu, ciru ananalapa oku arhamumanyiri. (Mk. 14:66-71) Gurhi Petro ajijire erhi ahugûkwa oku anajijire ecaha cizibu? Avunika omurhima analaka bwenene, nkaba aciyumva ali wa busha bulya anajijire akantu kabi. (Mk. 14:72) Orhanye hitya kunganaci Petro ababire bwenene nsa ndebe enyuma z’aho erhi omwîra wage Yezu anigwa. Ashinganine abe aciyumvirhe kubi bwenene!

14. Bici byarhabalaga Petro ly’agendekera akolera Yehova? (Olole enfoto eri oku cijalada.)

¹⁴ Petro agwerhe birhumire binji by’okugendekera alembera omu mukolo gwa Yehova. Petro arhaciyegulaga n’abandi; aja emunda bene wabo b’ekiroho bali na buzira karhinda bamurhulirizize. (Lk. 24:33) N’erhi Yezu ayus’ifûlwa, abonekera Petro, bulya al’ilonzize okumuha omurhima. (Lk. 24:34; 1 Kr. 15:5) Enyuma z’aho ahali h’okukalihira Petro enyanya z’amagosa gage, Yezu aganiza omwîra wage anamubwira oku ahâbwa mikolo minji bwenene. (Yn. 21:15-17) Petro al’imanyire oku anajijire ecaha cizibu, cikone agendekera acihangana okujira  ebintu binja. Bulya gurhi? Bulya al’imanyire oku Nnawabo Yezu acir’imuzigire. Na bene wabo b’ekiroho bagendekire bamurhabala. Bici rhwakaciyigiriza kugerera olwiganyo lwa Petro?

15. Bici Yehova alonzize rhuyemere n’obwalagale? (Ennanga 86:5; Abaroma 8:38, 39) (Olole n’enfoto.)

¹⁵ Ebi rhuciyigirizize. Yehova alonzize rhuyemere n’obwalagale oku aba arhuzigire n’oku aba mubidu okurhubabalira. (Osome Ennanga 86:5; Abaroma 8:38, 39.) Erhi rhujira ecaha, rhunaciyumve kubi bwenene. Okuciyumva ntyo kurhali kubi, kunali kwa bulagirire bwenene. Cikone, rhurhashinganini rhurhanye oku rhurhakacizigirwa rhurhakanababalirwa. Lubero n’oko, rhushinganine rhulonze oburhabale ho n’aho. Robert, rhwaganiriraga embere, adesire ntya: “Narhogire omu caha bulya nal’ilangalire obuhashe bwani niene bw’okuhagalika amarhangulo.” Ahugûkwa oku al’ishinganine aganize abagula. Adesire ntya: “Erhi nganiza abagula bantabala nciyumve oku nzigirwe bwenene na Yehova. Nayumva oku abagula nabo banzigire. Bantabala nyemere n’obwalagale oku Yehova arhasag’indekerera.” Na nirhu rhwanayemera n’obwalagale oku Yehova anarhuzigire bwenene, n’okurhubabalira erhi rhwakaciyunjuza ebyaha birhu, okulonza oburhabale rhulagirireko n’okujira okwirhu koshi lyo rhurhacigalukiraga amagosa girhu. (1 Yn. 1:8, 9) Erhi rhwakayemera ntyo n’obwalagale nta mango rhwakaleka okukolera Yehova erhi rhwakajira amagosa.

16. Bulya gurhi ohizire okugendekera walembera omu mukolo gwa Yehova?

¹⁶ Yehova anashagalukire bwenene obushiru bwirhu bw’okumukolera mw’aka kasanzi kazibu k’ensiku nzinda. Kugerera oburhabale bwage rhwanagendekera rhwamukolera n’obwishwekerezi ciru rhwakavunika omurhima enyanya z’amagosa girhu erhi enyanya z’amagosa g’abandi. Rhwanagendekera rhwazigira bene wirhu na bali birhu n’okubababalira ciru bakarhugokeza. Rhwanayerekana oku rhuzigire Yehova bwenene rhunakenzire emipango yage erhi rhwakajira oku rhwakanasha koshi lyo rhuyusa amazibu gakahikira omu buhya bwirhu. N’erhi rhwakajira ecaha, rhwanalonza oburhabale bwa Yehova, rhwanayemera n’obwalagale oku arhuzigire ananarhubabalire, na ntyo rhwanagendekera rhwamukolera. Rhwanayemera n’obwalagale oku Yehova arhugisha bwenene erhi rhwakajira okwirhu koshi lyo “rhurharhamaga okujira aminja.”—Gl. 6:9.