1. Oganirire akanga Yezu ajiragamwo ecisomerine cage cirhanzi.

 OBONE omu bwenge bwawe ebyabaga oku buzinda bw’omwaka gwa 29 Kano Kasanzi Kirhu (K.K.K.) erhi Yezu arhondera omukolo gwage. Yezu na nnina Mariya, na baguma b’omu banafunzi bage bali oku idinye ly’obuhya omu Kana, lugo lwali emwenè (Nord) y’evile y’e Nazareti Yezu akuliragamwo. Mariya ali mwîra w’ogo mulala byananahashikana oku akag’irhabala okushibirira ebigolo. Cikone omu mango g’er’idinye, haba mazibu malebe gakabonesize ogo mulala nshonyi bwenene ciru n’abahya: idivayi lyahwa. b Nkaba ebigolo byaba binji bwenene kulusha oku bal’irhanyize. Mariya aja duba-duba emunda omugala ali anamubwira ntya: “Barhacigwerh’idivayi.” (Yn. 2:1-3) Gurhi Yezu ajijire? Ajira kantu kalebe k’okusomeza bwenene, omu njira y’ecisomerine ahindula amishi lyaba “idivayi linja.”​—Yn. 2:9, 10.

2-3. (a) Gurhi Yezu akolesizemwo obuhashe bwage bw’okujira ebisomerine? (b) Gurhi rhwakayungukamwo omu kuganirira ebisomerine Yezu ajiraga?

² Yezu ajijire bindi bisomerine binji omu mango g’omukolo gwage hanw’igulu. c Akolesize obuhashe bwage bw’okujira ebisomerine ly’arhabala amakumi g’ebihumbi by’abantu. Kwa lwiganyo, omu bisomerine byage bibirhi byone alisagyamwo balume 5 000 na buzinda balume 4 000, nkaba mw’ako kanga alisize bantu balushire 27 000 erhi rhwakahiramwo abakazi n’abana bali aho. (Mt. 14:15-21; 15:32-38) Na kandi mw’ago mango,  Yezu afumize bantu banji bal’ilwazire. (Mt. 14:14; 15:30, 31) Orhanye gurhi orhutu rhw’abantu rhwasomirwe bwenene erhi Yezu abafumya n’okubalisa omu njira y’ecisomerine!

³ Ebisomerine Yezu ajiraga byanarhuyigiriza bintu binji ene. Mw’eci cigabi, rhwaganirira masomo maguma na maguma g’okuzibuhya obuyemere ebyo bisomerine byakarhuyigiriza. Enyuma z’aho, rhwayish’ibona gurhi rhwakayigamwo obwirhohye n’obwonjo ayerekine omu mango akag’ijira ebyo bisomerine.

4. Ebisomerine Yezu ajiraga birhuyigirizize amasomo gakarhurhabala rhuzibuhye obuyemere bwirhu muli ndi?

⁴ Ebisomerine bya Yezu birhuyigirizize amasomo gakarhurhabala rhuzibuhye obuyemere bwirhu arhali muli Yezu yene cikone kandi muli Ishe. Buzira karhinda, Yehova ye wakag’iha Yezu obuhashe bw’okujira ebyo bisomerine. Olwandiko lw’Ebijiro by’Entumwa 10:38, NWT, lurhubwizire ntya: “Mungu amushizire [Yezu] amavurha kugerera iroho litagatifu n’obuhashe, anakagera omu cihugo aj’ajira aminja n’okufumya abantu boshi bal’irhindibuzibwe na Shetani, bulya Mungu ali haguma naye.” Kandi okengere oku, omu bintu byoshi Yezu ajijire n’okuderha, ciru n’omu bisomerine byage byoshi, ayerekine n’obwimana entanya z’Ishe n’oku Ishe aciyumva. (Yn. 14:9) Rhuganirirage masomo asharhu rhwakaciyigiriza kugerera ebisomerine Yezu ajiraga.

5. Bici byakag’ishumya Yezu okujira ebisomerine? (Mateyo 20:30-34)

⁵ Burhangiriza, Yezu n’Ishe baba barhuzigire bwenene. Erhi Yezu ali hanw’igulu, ayerekine obuzigire bunji oku bantu omu kukolesa obuhashe bwage bw’okujira ebisomerine ly’arhabala abakag’ilibuka. Mango maguma, mihurha ibirhi yamulakira oku ayirhabale. (Osome Mateyo 20:30-34.) Olo lwandiko luyerekine oku Yezu “ayibêra obwonjo” anayifumya. Oluderho lw’Ecigiriki lwahindwirwe “ayibêra obwonjo” lukolesibwe aha luyerekine obwonjo bunji bwenene ayumvagya omu kandalala. Obo bwonjo bunji bwa ntyo buyerekine obuzigire agwerhe kuli bene bantu, kandi bwamushumya alisa abantu bal’ishalisire anafumya omushomyo. (Mt. 15:32; Mk. 1:41) Rhwanayemera n’obwalagale oku Yehova, Nnâmahanga oba wa “lukogo lw’omurhima,” n’Omugala baba barhuzigire bwenene bananaciyumve kubi amango rhuli rhwalibuka. (Lk. 1:78; 1 Pt. 5:7) Bacifinjire bwenene okurhenzaho amazibu goshi gali galibuza bene bantu!

6. Buhashe buhi Nnâmahanga ahîre Yezu?

⁶ Bwa kabirhi, Nnâmahanga ahîre Yezu obuhashe bw’okuyusa amazibu ga bene bantu goshi. Kugerera ebisomerine byage, Yezu ayerekine oku agwerhe obuhashe bw’okuhima amazibu rhurhakahash’ihima oku buhashe bwirhu rhwene. Kwa lwiganyo, agwerhe obuhashe bw’okurhulikuza oku bintu birhulerhera amazibu, ko kuderha ecaha rhwayimagamwo n’amazibu carhudwirhire g’endwala n’olufû. (Mt. 9:1-6; Rm. 5:12, 18, 19) Ebisomerine ajiraga byayerekine oku anafumya “ngasi” ndwala ciru n’okufûla abafîre. (Mt. 4:23; Yn. 11:43, 44) Kandi agwerhe obuhashe bw’okurhuliriza emilaba midarhi n’okuhima abazimu. (Mk. 4:37-39; Lk. 8:2) Okumanya oku Yehova ahîre Omugala obo buhashe boshi kurhuhîre omurhima bwenene!

7-8. (a) Bici ebisomirine Yezu ajiraga birhuyemezize n’obwalagale? (b) Cisomerine cihi oli walindirira okubona oku cahikirira omw’igulu lihyahya?

⁷ Bwa kasharhu, rhwanayemera n’obwalagale oku emigisho rhulaganyizibwe yalerhwa n’Obwami bwa Nnâmahanga kobinali yahikirira. Ebisomerine Yezu akag’ijira amango ali hanw’igulu birhuyeresire ebi ayish’ijira omw’igulu lyoshi ye nka Mwami w’Obwami  bwa Nnâmahanga. Rhuganirire emigisho rhwayish’iba nayo hano Kristu arhondera okurhegeka igulu. Rhwayish’iba n’amagala mimana bulya ayish’irhenza ngasi ndwala na ngasi bulema bulibuza bene bantu. (Iz. 33:24; 35:5, 6; Maf. 21:3, 4) Rhurhakac’ilibuzibwa n’ishali n’amazibu galerhwa n’obuhanya bucilerha bone. (Iz. 25:6; Mk. 4:41) Rhwayish’iba na mwishingo munji bwenene gw’okuyegereza abazigirwa birhu bafîre hano barhenga “omu nshinda.” (Yn. 5:28, 29) Cisomerine cihi oli walindirira bwenene okubona oku cahikirira omw’igulu lihyahya?

⁸ Amango Yezu akag’ijira ebisomerine, akag’iyerekana obwirhohye bunji n’obwonjo, ago gali morhere minja rhushinganine rhuyige. Lekagi rhuganirire nyiganyo ibirhi, rhwarhangirira oku mwanzi guganirire idinye ly’obuhya e Kana.

9. Bici Yezu ajijire okw’idinye ly’obuhya? (Yowane 2:6-10)

⁹ Osome Yowane 2:6-10. Erhi idivayi lihwa kw’er’idinye ly’obuhya, ka Yezu alisezibwe okujira kantu kalebe? Nanga. Nta bulebi boshi-boshi bwal’iyerekine oku Masiya akajijire ecisomerine c’okuhindula amishi libe idivayi. Cikone, orhanye gurhi wakaciyumvirhe erhi akaba we amamvu gahwaga oku buhya bwawe. Bibonekine oku Yezu ayumvize ogo mulala obwonjo, ci bwenene omuhya mulume n’omuhya mukazi, analonza okubarhabala lyo barhag’iyumva enshonyi. Co carhumaga ajira ecisomerine nk’oku rhwaganiriraga oku murhondero.  Ahindula amishi lyaba idivayi linja bwenene, zali hofi litre 390 z’amishi. Nkaba ahânyire idivayi linji ntyo lyo hajira elyasigala liyish’ikolesibwa agandi mango erhi lyo liguzibwa lirhabale omuhya mulume n’omuhya mukazi. Oyo muhya mulume n’omuhya mukazi bashinganine babe baciyumvirhe bwinja bwenene!

10. Mahugûlo maguma na maguma gahi g’obulagirire gali omu mwanzi guganirirwe omu Yowane cigabi ca 2? (Olole n’enfoto.)

¹⁰ Rhuganirire mahugûlo maguma na maguma g’obulagirire gali omu mwanzi guganirirwe omu Yowane cigabi ca 2. K’obwine oku arhali Yezu ye wayunjuzagya orho rhubindi mishi? Abwira abakag’ikola kw’er’idinye babumbe orho rhubindi mishi bulya arhal’ilonzize abantu bamusegezeko obwenge. (Mulongo gwa 6, 7) N’enyuma z’okuhindula amishi lyaba idivayi, Yezu arharhôlaga yene kw’er’idivayi ly’ahêkera oyimangire er’idinye. Cikone, abwira abakag’ikola oku bajire ntyo. (Mulongo gwa 8) Kobinali, Yezu arharhôlaga ecikombe c’idivayi ly’acifumbarha embere z’ebigolo n’okucikunga omu kuderha erhi: ‘Mulabule kw’er’idivayi nyusize najira!’

11. Bici rhwakaciyigiriza kugerera eco cisomerine Yezu ajiraga?

¹¹ Bici rhwakaciyigiriza kugerera ecisomerine ca Yezu c’okuhindula amishi lyaba idivayi? Eco cisomerine cirhuyigirizize isomo ly’obwirhohye. Yezu arhacikungiraga eco cisomerine; kobinali, nta lusiku acikungire ebi akag’ihikiriza. Lubero n’oko, akag’icirhohya n’okuha Ishe irenge n’obukuze ngasi mango. (Yn. 5:19, 30; 8:28) Erhi rhwakayiga olwiganyo lwa Yezu lw’okucirhohya, rhurhakacikungira ebi rhwahikirizize. Ciru rhwakahikiriza bici omu mukolo gwa Yehova, rhukacikungira Nnâmahanga wirhu mwinja orhuhîre olukengwa lw’okumukolera ahali h’okucikungira ebi rhwahikirizize. (Yer. 9:23, 24) Leki rhukamuha obukuze ashinganine. Kobinali, buzira burhabale bwa Yehova nta kantu koshi-koshi kinja rhwakahash’ihikiriza.​—1 Kr. 1:26-31.

12. Yindi njira ehi rhwakayigamwo obwirhohye bwa Yezu? Ohâne olwiganyo.

¹² Rhuganirire eyindi njira rhwakayigamwo obwirhohye bwa Yezu. Orhanye kw’aka kanga: Mugula muguma ageze kasanzi kanji ali arhabala omurhabazi w’abagula ociri musole ly’arheganya ehotuba yage ntangiriza y’abantu boshi. Enyanya z’obo burhable, oyo mwene wirhu ociri musole ageze ehotuba y’okuhâna omurhima eshagalusize ecigamba coshi. Enyuma z’entimanano, muntu muguma ayishe aha oyo mugula ali anamubwire ntya: ‘Mwene wirhu Lebe anagezize ehotuba nyinja bwenene, k’arhali ntyo?’ K’oyo mugula ashinganine aderhe erhi: ‘Neci yali nyinja, cikone nagezize kasanzi kanji ndi namurhabala’? Erhi omu njira y’obwirhohye anaderha ntya: ‘Neci, yali nyinja. Ncidinîre ye bwenene’? Erhi akaba rhuli birhohye, rhurhakacikungira ebintu binja rhwajirire abandi. Rhunarhimukwe bulya rhumanyire oku Yehova ali abona ebi rhwajijire anabishagalukire. (Oshushanye na Mateyo 6:2-4; Hb. 13:16) Buzira karhinda, Yehova anashagaluke erhi rhuyiga olwiganyo lwa Yezu omu kuba birhohye.​—1 Pt. 5:6.

13. Bici Yezu abonaga hofi n’olugo lw’e Nayini, na gurhi ajijire lugenda oko? (Luka 7:11-15)

¹³ Osome Luka 7:11-15. Orhanye kw’ebi byajirikanaga omu garhi k’omukolo gwa Yezu. Al’ibalamire e Nayini, lugo luguma lw’e Galileya lwali hofi n’e Shunemu, emunda omulebi Elisha afûlaga omwana wa mukazi muguma hali hamagera hofi myaka 900. (2 Bam. 4:32-37) Erhi Yezu ayegera omuhango gw’olo lugo, abona abantu bajaga oku mazishi bakola barhenga omu lugo. Ako kanga kali ka kugayisa bwenene, bulya oyo mukana al’ifirîrwe  n’omwana muguma yene agwerhe. Cikone oyo mukana wali omu mishibo arhali yene, ali haguma n’engabo y’abantu ba mw’olo lugo. Yezu ayimanza abo bantu anajirira oyo muzire wafîragwa kantu kalebe kago-kago; afûla omugala! Oyo ye muntu murhangiriza omu bantu basharhu Yezu afûlaga baganirirwe omu bitabu by’e Injili.

14. Mahugûlo gahi maguma na maguma g’obulagirire gali omu mwanzi guganirirwe omu Luka cigabi ca 7? (Olole n’enfoto.)

¹⁴ Rhuganirire mahugûlo maguma na maguma g’obulagirire gali omu mwanzi guganirirwe omu Luka cigabi ca 7. K’obwine oku Yezu ‘abona’ oyo muzire wal’ifîrirwe na buzinda “amufa bwonjo”? (Mulongo gwa 13) Co cirhumire, ebi abwine, nkaba oku oyo mukazi akag’ilaka anali alambagira embere z’amaiti g’omugala, byarhuma amuyumviza obwonjo. Yezu arhayumvizagya oyo muzire obwonjo kone; amuyeresa obwonjo. Kobinali, aganiza oyo muzire omw’izu ly’okuhâna omurhima, anaderha ntya: “Orhalakaga.” Enyuma z’aho ajira kantu kalebe ly’amurhabala. Afûla mugala w’oyo muzire na buzinda “amuha nnina.”​—Mulongo gwa 14, 15.

15. Bici rhwakaciyigiriza kugerera eco cisomerine Yezu ajiraga?

¹⁵ Bici rhwakaciyigiriza kugerera ecisomerine Yezu ajiraga c’okufûla mugala w’omukana? Rhuyizire oku rhushinganine rhukayeresa abafîrirwe obwonjo. Kobinali, rhurhagwerhi obuhashe bw’okufûla abafîre, nk’oku Yezu ajiraga. Cikone, aka Yezu, rhwanayeresa abantu bafîrirwe obwonjo omu kuba ba kulolereza bwinja. Rhwanayeresa abandi obwonjo omu kuderha n’okujira ebi rhunahashire byoshi lyo rhubarhabala n’okubarhuliriza. d (Mig. 17:17; 2 Kr. 1:3, 4; 1 Pt. 3:8) Ciru n’enderho nsungunu erhi bijiro bisungunu byanabarhabala bwenene.

16. Nk’oku biyerekinwe oku nfoto, bici ebi muzire muguma wacizindig’ifîrwa n’omwana wage acibwinire bikuyigirizize?

¹⁶ Rhuganirire kantu kaguma kabwinwe. Myaka milebe egezire, oku ntimanano y’ecigamba, mwali wirhu muguma abona muzire muguma wakag’ilaka aha burhambi bwage erhi bali bayimba olwimbo. Olo lwimbo lwal’iganirire  obulangalire bw’obufûke, n’oyo muzire erhi acizindig’ifîrwa n’omwana-nyere wage. Bulya oyo mwali wirhu al’imanyire ntyo, ho n’aho aja aha oyo muzire ali, amuhirako okuboko anayimba ecigabi c’olwimbo cal’isigire haguma naye. Buzinda oyo muzire adesire ntya: “Naciyumva ngwerhe buzigire bunji bwenene kuli bene wirhu na bali birhu.” Avuga omunkwa bwenene okubona ajire oku ntimanano olo lusiku. Aderha ntya: “Oku ntimanano ko rhukûla oburhabale, omu Nyumpa y’Entimanano.” Rhwanayemera n’obwalagale oku Yehova anabone ananashagalukire ciru ebintu bisungunu rhujira lyo rhuyeresa obwonjo abafîrirwe, ‘bavunisire omurhima.’​—Enna. 34:18, NWT.

17. Bici rhwayizire mw’eci cigabi?

¹⁷ Obuyemere bwirhu bwanasêra bwenene erhi rhwakakayiga emyanzi eri omu bitabu by’e Injili eganirire ebisomerine Yezu ajijire. Eyo myanzi erhuyigirizize oku Yehova na Yezu baba barhuzigire bwenene, oku Yezu agwerhe obuhashe bw’okuyusa amazibu ga bene bantu goshi, n’oku kobinali rhwanalangalira emigisho rhulaganyizibwe y’amango gayisha Obwami bwa Nnâmahanga bwarhulerhera hano hofi-hofi. Amango rhuli rhwayiga eyo myanzi, rhwanarhanya bwenene oku njira rhwakayigamwo amorhere ga Yezu. Nkaba wanacihiriraho omupango gw’okuyiga lugenda ebindi bisomerine Yezu ajiraga omu ifunzo lyawe wenene erhi omu nterekêro y’omulala. Omu mango oli wajira ntyo, olole masomo gahi wakaciyigiriza na buzinda wanaganirira abandi ebi wayizire. Orhanye kunganaci ezo nshambalo zakaba za kuhâna omurhima!​—Rm. 1:11, 12.

18. Bici rhwaganirira omu cigabi cikulikire?

¹⁸ Oku buzinda bw’omukolo gwage, Yezu afûla omuntu wa kasharhu, n’obo bo bufûke buzinda ajiraga buyandisirwe omu Bibliya. Cikone obo bufûke buli lubero n’obundi ajiraga, afûla omwîra wage muzigirwa, anajira ntyo omu kanga kago-kago. Ogo mwanzi guli omu bitabu by’e Injili guganirire eco cisomerine, masomo gahi gwakarhuyigiriza? Na gurhi rhwakazibuhyamwo obuyemere bwirhu omu bulangalire bw’obufûke? Ecigabi cikulikire cashuza kw’ago madoso.