1-2. Bici rhushinganine rhujire omu mango rhuli rhwalinda igulu lihyahya?

 RHUNAVUGE Yehova omunkwa bwenene oku ciragane arhuhîre c’okurhenza er’igulu libî n’okulerha igulu lihyahya ly’obushinganyanya. (2 Pt. 3:13) Ciru akaba rhurhamanyiri mangaci er’igulu lihyahya lyayisha, ebiri byajirikana omw’igulu biyerekine oku rhurhacililinde kasanzi kanji.​—Mt. 24:32-34, 36; Ebj. 1:7.

² Embere er’igulu lihyahya lihike, rhweshi rhushinganine rhuzibuhye obuyemere bwirhu mw’eco ciragane, rhube rhugwerhe myaka minji erhi misungunu kurhenga rhwamanyaga okuli. Bulya gurhi? Bulya ciru n’obuyemere buzibu bwanazambanya. Kobinali, entumwa Paolo yadesire oku okubula obuyemere ciri ‘caha cirhuzonga [buzira mazibu].’ (Hb. 12:1) Ly’obuyemere bwirhu burhazambanyagya, ngasi mango rhushinganine rhukarhanya bwenene oku bintu biyerekine oku eciragane c’igulu lihyahya cahikirira hano hofi-hofi.​—Hb. 11:1.

3. Bici rhwaganirira mw’eci cigabi?

³ Mw’eci cigabi, rhwaganirira njira isharhu rhwakazibuhyamwo obuyemere bwirhu omu ciragane ca Yehova c’igulu lihyahya: (1) omu kurhanya bwenene lugenda engombôlo, (2) omu kurhanya bwenene oku buhashe bwa Yehova na (3) omu kugeza akasanzi omu mikolo y’ekiroho. Buzinda rhwaganirira gurhi omwanzi Yehova abwiraga Habakuki gwakazibuhyamwo obuyemere bwirhu ene. Cikone burhangiriza, rhurhang’iganirira kanga kaguma na kaguma rhwakaba rhuli rhwalwisa ene kahûnyire rhube n’obuyemere buzibu omu ciragane c’igulu lihyahya lyayisha.

 KANGA KAGUMA NA KAGUMA KABA KUHÛNYIRE RHUBE N’OBUYEMERE BUZIBU

4. Mihigo ehi eba ehûnyire rhube n’obuyemere buzibu?

⁴ Ngasi lusiku, rhunarhôle emihigo ehûna rhube n’obuyemere buzibu. Kwa lwiganyo, rhunarhôle emihigo lugenda abîra, eby’okucishagalusa, amasomo, obuhya, abana n’akazi. Kuli kwinja rhukacidosa ntya: ‘K’emihigo yani enayerekane oku nyemire n’obwalagale oku er’igulu liri lya kasanzi kasungunu n’oku hano hofi-hofi igulu lihyahya lya Nnâmahanga lyarhôla enafasi yalyo? Erhi k’emihigo y’abantu barhaba bayemire oku banalama ensiku n’amango enashumye emihigo yani?’ (Mt. 6:19, 20; Lk. 12:16-21) Rhwanarhôla emihigo minja erhi rhwakaba rhuyemire n’obwalagale oku igulu lihyahya liri hofi bwenene.

5-6. Bulya gurhi rhulagirire oku buyemere buzibu amango rhuli rhwalwisa amazibu? Ohâne olwiganyo.

⁵ Kandi rhunahikirwe n’amazibu gaba gahûnyire rhube n’obuyemere buzibu. Nkaba rhwanalembera okulibuzibwa, endwala erhafuma, erhi agandi mazibu gakarhuma rhwavunika omurhima. Cikone erhi gakagendekera, nk’oku amazibu ga ntyo galug’ijira, rhwanaba rhulagirire oku buyemere buzibu lyo rhugalembera n’okugendekera rhwakolera Yehova n’omwishingo.​—Rm. 12:12; 1 Pt. 1:6, 7.

⁶ Amango rhuli rhwalwisa mazibu malebe, rhwanabona nk’igulu lihyahya lya Yehova lirhakayisha ciru n’olusiku luguma. K’oko kuli kuderha oku obuyemere bwirhu buzambanyize? Nanga. Rhurhôle olwiganyo. Omu mango g’ecanda cidarhi, wanabona nk’amango g’empondo garhakahika ciru n’ehitya. Cikone amango g’empondo ganahike. Ko n’oko, amango rhuvunisire omurhima bwenene, rhwanabona nka nta lusiku igulu lihyahya lyanayishe. Cikone erhi rhwakaba rhugwerhe obuyemere buzibu, rhunamanye oku ebiragane bya Nnâmahanga byahikirira. (Enna. 94:3, 14, 15; Hb. 6:17-19) Erhi rhwakaba rhuyemire ntyo n’obwalagale, rhwanagendekera rhwahira enterekêro rhuha Yehova oku nafasi ntanzi omu kalamo kirhu.

7. Ntanya zihi rhugwasirwe rhuyake?

⁷ Rhuganirire akandi kanga kahûnyire rhube n’obuyemere buzibu: omukolo gw’amahubiri. Bantu banji rhuganira nabo banabone nk’“omwanzi mwinja” lugenda igulu lihyahya lya Nnâmahanga lyayisha, guli mwinja bwenene birhakanahashikana gube gw’okuli. (Mt. 24:14, NWT; Eze. 33:32) Rhurhalonzizi ciru n’olusiku luguma rhube n’akarhinda akabo lugenda ebi Yehova ali arhuyigiriza. Ly’oko kurharhuhikiraga, rhugwasirwe rhugendekere rhwazibuhya obuyemere bwirhu. Rhuganirire njira isharhu rhwakajiramwo ntyo.

OKARHANYA BWENENE LUGENDA ENGOMBÔLO

8-9. Gurhi okurhanya bwenene lugenda engombôlo kwakazibuhyamwo obuyemere bwirhu?

⁸ Njira nguma rhwakazibuhyamwo obuyemere bwirhu, kuli kurhanya bwenene lugenda engombôlo. Engombôlo erhuyemezize n’obwalagale oku ebiragane bya Nnâmahanga byahikirira. Erhi rhurhanya bwenene lugenda bulya gurhi engombôlo yahânagwa n’ebyal’ihûnyirwe ly’ahânwa, rhunazibuhye obuyemere bwirhu oku eciragane ca Nnâmahanga c’okurhuha akalamo karhagwerhi buzinda omw’igulu linja bwenene cahikirira kobinali. Bulya gurhi rhudesire ntyo?

⁹ Bici byal’ihûnyirwe ly’engombôlo ehânwa? Yehova arhumire Omugala muzigirwa na nfûla yage, mwîra wage wa hofi-hofi bwenene, kurhenga empingu aburhwe nka muntu mwimana hanw’igulu. Amango Yezu ali hanw’igulu, alembire amazibu ga ngasi lubero. Buzinda alibuzibwa anafâ olufû lw’amalumwa manji. Eryo liri ibeyi linene bwenene Yehova alyuzire! Nnâmahanga wirhu w’obuzigire arhakalesire  Omugala alibuzibwe n’okufâ ly’arhuha akalamo kinja bwenene cikone ka kasanzi kasungunu kone. (Yn. 3:16; 1 Pt. 1:18, 19) Bulya Yehova alyuzire ibeyi linene ntyo, kobinali ahikiriza eciragane cage c’okurhuha akalamo karhagwerhi buzinda omw’igulu lihyahya.

OKARHANYA BWENENE OKU BUHASHE BWA YEHOVA

10. Kushimbana n’olwandiko lw’Abefezi 3:20, bici Yehova agwerhe obuhashe bw’okujira?

¹⁰ Enjira ya kabirhi rhwakazibuhyamwo obuyemere bwirhu kuli kurhanya bwenene oku buhashe bwa Yehova. Agwerhe obuhashe bw’okuhikiriza ngasi kantu alaganyize okujira. Kobinali, bene bantu banabona nka birhakahashikana okulama akalamo karhagwerhi buzinda omw’igulu lihyahya. Cikone, kanji-kanji Yehova analaganye ebintu bene bantu barhakahasha okuhikiriza ciru n’ehitya. Anajira ntyo bulya ye Nnâmahanga Ogala-byoshi. (Ayu. 42:2; Mk. 10:27) Co cirhumire rhurhakasomerwa erhi akarhulaganya ebintu by’okusomeza.​—Osome Abefezi 3:20.

11. Ohâne lwiganyo luguma omu biragane bya Nnâmahanga by’okusomeza. (Olole ecisanduku cidesire “ Biragane Biguma na Biguma by’Okusomeza Byahikirizibwe.”)

¹¹ Rhuganirire bintu biguma na biguma byakag’ibonekana nka birhakahashikana Yehova alaganyagya abakozi bage omu mango ga mîra. Abwira Abrahamu na Sara oku baburha omwana-rhabana omu myaka yabo y’obushosi. (Murh. 17:15-17) Kandi, abwira Abrahamu oku iburha lyage lyahabwa ecihugo c’e Kanani. Bulya omu myaka minji, abantu b’omw’iburha lya Abrahamu, ko kuderha Abaisraheli bali baja e Misri, byakabonekine nk’eco ciragane cirhakahikirira ciru n’olusiku luguma. Cikone cahikirire. Buzinda, Yehova aderha oku Elizabeti wal’ikola mugikulu aburha omwana-rhabana. Kandi, abwira Mariya wali mubikira oku aburha Mugala wa Nnâmahanga yenene, na Yehova alaganyagya okuyisha kw’oyo Mugala omu cindi ciragane ahânaga omw’ishwa ly’e Edeni bihumbi by’emyaka embere z’aho!​—Murh. 3:15.

12. Bici olwandiko lwa Yozwe 23:14 na Izaya 55:10, 11 lurhuyemezize n’obwalagale lugenda obuhashe bwa Yehova?

¹² Omu kurhanya bwenene oku myanzi eganirire ebiragane Nnâmahanga ahânaga n’okubihikiriza, rhunazibuhye obuyemere bwirhu omu buhashe bwage bw’okulerha igulu lihyahya. (Osome Yozwe 23:14; Izaya 55:10, 11.) Oko kunarhume rhwaba rhucirheganyize bwinja lyo rhurhabala abandi bahugûkwe oku igulu lihyahya lilaganyizibwe birhali bilorho kone. Lugenda empingu mpyahya n’igulu lihyahya, Yehova yene adesire ntya: “Ebi binwa birhali bya bunywesi, biri by’okuli.”​—Maf. 21:1, 5.

OBE NA BINJI BYA KUJIRA OMU MIKOLO Y’EKIROHO

13. Gurhi entimanano z’ecigamba zizibuhyamwo obuyemere bwirhu? Ohugûle.

¹³ Enjira ya kasharhu rhwakazibuhyamwo obuyemere bwirhu kuli kugeza akasanzi omu mikolo y’ekiroho. Kwa lwiganyo, rhuganirire obunguke entimanano zirhu z’ecigamba zirhulerhera. Anna, wagezize amakumi g’emyaka omu bigabi biri lubero by’omukolo gw’akasanzi koshi adesire ntya: “Entimanano zinantabale okuzibuhya obuyemere bwani. Ciru akaba owagezagya ehotuba arhagwerhi buhashe bunji bw’okuyigiriza erhi arhadesire kantu koshi-koshi kahyahya, kanji-kanji nanyumve kantu kalebe kahyahya kantabire okuhugûkwa bwinja okuli kw’Ebibliya, n’oko kunazibuhye obuyemere bwani.” b Buzira karhinda, kandi rhunashagalukire amashuzo g’okuzibuhya obuyemere g’abali oku ntimanano.​—Rm. 1:11, 12; 10:17.

14. Gurhi omukolo gw’amahubiri guzibuhyamwo obuyemere bwirhu?

 ¹⁴ Kandi rhunazibuhye obuyemere bwirhu omu kujira omukolo gw’amahubiri. (Hb. 10:23) Barbara, okola ogwerhe myaka 70 na kulusha ali akolera Yehova, adesire ntya: “Ensiku zoshi nambone oku omukolo gw’amahubiri gunazibuhye obuyemere. Oku ngendekera naganirira abandi bwenene lugenda ebiragane binja bwenene bya Yehova, ko n’obuyemere bwani bugendekera bwazibuha.”

15. Gurhi ifunzo lirhu rhwenene lizibuhyamwo obuyemere bwirhu? (Olole n’enfoto.)

¹⁵ Rhuganirire ogundi mukolo gw’ekiroho guzibuhya obuyemere bwirhu: ifunzo lirhu rhwenene. Susan anabone oku okupanga amango g’okujira ifunzo lyage yenene kunamurhabale. Adesire ntya: “Ngasi Lw’Iyinga nanyige ecigabi c’Ilabiro ly’Akalalizi c’omugobe gukulikire. Ngasi Lwa Kasi na Lwa Kabirhi nanteganye entimanano y’egarhi k’omugobe. Ezindi nsiku zisigire, nanjire ebiyerekire ifunzo lyani nienene.” Susan agendekire azibuhya obuyemere bwage bulya anakenge eprograme yage y’ifunzo. Irène, wamakola amakumi g’emyaka oku biro bikulu by’Abahamirizi ba Yehova, abwine oku okuyiga obulebi bw’Ebibliya kunazibuhye obuyemere bwage. Adesire ntya: “Nansomerwe okubona oku obulebi bwa Yehova bunahikirizibwe ciru n’omu bintu bisungunu-ngunu.” c

‘EBI NDESIRE BYAYISHA BUZIRA KULEGAMA’

16. Bulya gurhi ebi Yehova ayemezagya Habakuki n’obwalagale bigwerhe eci bihugwîre kuli rhwe ene? (Abahabraniya 10:36, 37)

¹⁶ Bakozi ba Yehova baguma na baguma bakola bagwerhe kasanzi kanji bali balinda obuzinda bw’er’igulu. Oku ntanya za bene bantu, okuhikirizibwa kw’eciragane ca Nnâmahanga kwanabonekena nka kulegamire. Yehova ayerekine oku amanyire oku abantu banaciyumve ntyo erhi ayemeza n’obwalagale omulebi Habakuki ntya: ‘Ebyo nkufulûlîre amango  byabâmwo garhacihika, cikwone byayish’iyalagala omu mango gabyo. Obilinde kwone onabilembere ciru wankabona nka bilegamire: ebi ndesire byayisha buzira kulegama!’ (Hab. 2:3) Ka Nnâmahanga ayemezize Habakuki ntyo n’obwalagale oku bunguke bwage yene? Erhi ka hali ebi enderho zage zihugwîre kuli rhwe ene? Omu kulongozibwa n’iroho litagatifu, entumwa Paolo yakolesize ezo ndero lugenda Abakristu bali balindirira igulu lihyahya. (Osome Abahabraniya 10:36, 37.) Kobinali, rhwanayemera n’obwalagale oku ciru obucunguke rhulaganyizibwe bwakabonekana nka bulegamire, ‘bwayisha buzira kulegama!’

17. Gurhi mwali wirhu muguma akolesizemwo ihano Yehova ahaga Habakuki?

¹⁷ Hali bakozi ba Yehova banji bakola bagwerhe ciru amakumi g’emyaka ‘bali balinda.’ Kwa lwiganyo, Louise arhonderaga okukolera Yehova omu mwaka gwa 1939. Adesire ntya: “Mw’ago mango, nakag’irhanya oku ivita lya Harmagedoni lyakayishire embere nyuse amasomo g’enyanya. Cikone arhali ntyo ko byabire. Omu myaka minji, nabwine oku narhabirwe n’okusoma ebi mpamagala ‘myanzi lugenda okulinda,’ ko kuderha myanzi y’Ebibliya eganirire akalamo ka Nuhu, Abrahamu, Yozefu n’abandi balinzire kasanzi kanji embere Yehova abahe oluhembo abalaganyagya. Okuba n’oborhere bw’okulinda kwantabire nie n’abandi rhugendekere rhwayemera n’obwalagale oku igulu lihyahya liri hofi bwenene.” Abandi bakozi ba Yehova banji bakolire Yehova omu kasanzi ka myaka minji nabo banabone ntyo!

18. Gurhi okulabiriza obulemi kwakazibuhyamwo obuyemere bwirhu lugenda igulu lihyahya lyayisha?

¹⁸ Kobinali igulu lihyahya lirhacibaho. Cikone hali bintu biguma na biguma biriho: enyenyezi, emirhi, ensimba n’abinyu bantu. Ntaye wakaderha oku ebyo bintu byoshi birhaba by’okuli. Ciru akaba hali amango birhaliho, biriho ene bulya Yehova abilemire. (Murh. 1:1, 26, 27) Kandi Nnâmahanga wirhu ahizire oku ajira igulu libe lihyahya. Ahikiriza ogo muhigo. Omw’igulu lihyahya abantu bayish’ishagalukira akalamo karhagwerhi buzinda n’amagala mimana. Rhwanayemera n’obwalagale oku igulu lihyahya lyayisha oku kasanzi Nnâmahanga ahizireho.​—Iz. 65:17; Maf. 21:3, 4.

19. Gurhi wakazibuhyamwo obuyemere bwawe?

¹⁹ Embere er’iguli lihyahya liyishe, okakolesa ngasi bulyo ogwerhe ly’ozibuhya obuyemere bwawe. Ensiku zoshi, obe wa kuvuga omunkwa enyanya z’engombôlo. Okarhanya bwenene oku buhashe bwa Yehova. Okajira binji omu mikolo y’ekiroho. Omu kujira ntyo wanaba muguma muli “bala bayemire banali ba bushibirizi banahîragwe ebi Nnâmahanga alaganyagya.”​—Hb. 6:11, 12, Mashi Bible; Rm. 5:5.