1. Gurhi murhabana muguma ayerekinemwo oku alangalire obufûke?

 OMURHABANA ohamagalwa Matthew aba alwazire endwala ndarhi amanaberwa kanji-kanji. Erhi agwerhe myaka nda, ye n’omulala gwage bakag’ilola eprograme ya ngasi mwezi ya JW Télédiffusion. Hofi n’oku buzinda bw’eyo programe, babona evideo y’omuziki eyerekine gurhi abantu bali bayegereza abazigirwa babo omu mango g’obufûke. b Erhi bayusa okulola eyo programe, Matthew ayegera ababusi bage abagwarha oku maboko, anababwira ntya: “Larha na Nyâma, ka mubwine? Ciru nakafâ, nayish’ifûka omu mango g’obufûke. Mwananninda; byayish’iba binja.” Orhanye gurhi abo babusi bagwasirwe babe baciyumvirhe erhi babona oku oyo mugala wabo al’igwerhe obuyemere busezire omu bulangalire bw’obufûke!

2-3. Bulya gurhi kuli kwinja kuli rhwe rhukarhanya oku bulangalire bw’obufûke?

² Kasanzi oku kandi, kuli kwinja rhweshi rhukarhanya oku ciragane c’Ebibliya c’obufûke bwaba omu mango gayisha. (Yn. 5:28, 29) Bulya gurhi? Bulya rhurhakamanya mangaci rhwakarhibukirwa n’obulwala budarhi erhi mangaci rhwakafîrwa n’omuzigirwa wirhu buzira kulaliza. (Muh. 9:11; Yk. 4:13, 14) Obulangalire bwirhu bw’obufûke bwanarhurhabala rhulembere ago mazibu ga ntyo. (1 Ts. 4:13) Amandiko garhuyemezize n’obwalagale oku Larha wirhu w’omu mpingu aba arhumanyire bwinja anaba arhuzigire bwenene. (Lk. 12:7) Yehova Nnâmahanga agwasirwe abe arhumanyire bwinja bwenene ly’acib’irhulema n’oborhere bwirhu bo n’obo n’enkengero zirhu zo n’ezo. Yehova aba arhuzigire bwenene, anarhuhashisize okulama ensiku n’amango, na ciru rhwakafâ ayish’irhufûla!

³ Mw’eci cigabi, rhwarhang’iganirira bulya gurhi rhwanaba n’obuyemere omu ciragane c’obufûke. Enyuma z’aho, rhwaganirira omwanzi gw’Ebibliya gw’okuzibuhya obuyemere  gulimw’enderho z’olwandiko lwirhu lw’omusingi, ludesire: “Mushinja wawe afûka.” (Yn. 11:23) Buzinda, rhwabona gurhi rhwakazibuhyamwo obulangalire bwirhu omu bufûke.

4. Lyo rhulangalira ciragane cilebe, bici rhugwasirwe rhuyemere n’obwalagale? Ohâne olwiganyo.

⁴ Lyo rhuba n’obulangalire omu ciragane cilebe, rhugwasirwe rhuyemere n’obwalagale oku owahanaga eco ciragane agwerhe irala n’obuhashe bw’okucihikiriza. Kwa lwiganyo: Orhanye enyumpa yawe ebe yasherezibwe bwenene n’empusi. Mwîra wawe muguma ayishe anakulaganye ntya: ‘Nakurhabala okucib’iyubaka enyumpa yawe.’ Ebyo adesire birhenzire oku murhima, onayemire n’obwalagale oku agwerhe irala ly’okukurhabala. Erhi akaba agwerhe obulenga omu by’obubasi anagwerhe ebikolanwa bihûnyirwe, wanamanya oku agwerhe n’obuhashe bw’okukurhabala. Muli ntyo, wanayemera eco ciragane cage. Gurhigi lugenda eciragane ca Nnâmahanga c’obufûke? Ka kobinali agwerhe irala n’obuhashe bw’okucihikiriza?

5-6. Bulya gurhi rhwanayemera n’obwalagale oku Yehova ajira irala y’okufûla abafîre?

⁵ Ka Yehova agwerhe irala ly’okufûla abafîre? Neci, buzira karhinda. Alongozize bandisi banji b’Ebibliya bayandike eco ciragane cage c’obufûke bw’amango gayisha. (Iz. 26:19; Hoz. 13:14; Maf. 20:11-13) N’erhi Yehova ahâna eciragane, ensiku zoshi anacihikirize. (Yoz. 23:14) Kobinali, Yehova alonzize okufûla abafîre. Bulya gurhi rhwakaderha ntyo?

⁶ Rhuganirire enderho za Ayubu. Al’iyemire n’obwalagale oku ciru akafîre, Yehova akalonzize okucib’imubona ali alama. (Ayu. 14:14, 15) Yehova aba alonzize okucib’ibona abakozi bage boshi bafîre nk’oku anal’ilonzize okucib’ibona Ayubu. Aba alonzize okucib’ibagalulira obuzine banagwerhe amagala minja n’omwishingo. Gurhigi lugenda emiliyare y’abantu bafîre barhanabaga n’obulyo bw’okuyiga okuli lugenda Yehova? Nnâmahanga wirhu w’obuzigire aba alonzize okubafûla nabo. (Ebj. 24:15) Aba alonzize nabo babe n’obulyo bw’okuba bîra bage n’okulama ensiku n’amango hanw’igulu. (Yn. 3:16) Bibonekine n’obwalagale oku Yehova ajira irala ly’okufûla abafîre.

7-8. Bulya gurhi rhwanayemera n’obwalagale oku Yehova agwerhe obuhashe bw’okufûla abafîre?

⁷ Ka Yehova agwerhege n’obuhashe bw’okufûla abafîre? Neci kobinali! Ye “Ogala-byoshi.” (Maf. 1:8) Co cirhumire, agwerhe obuhashe bw’okuhima ngasi mushombanyi, ciru n’olufû. (1 Kr. 15:26) Rhunabe n’emisi n’oburhulirize omu kumanya ntyo. Rhuganirire olwiganyo lwa Mwali wirhu Emma Arnold. Ye n’omulala gwage balwisize amarhangulo madarhi g’obuyemere omu mango g’Ivita lya Kabirhi ly’Igulu. Omu kurhuliriza omwali enyanya z’okufîrwa n’abantu al’izigire omu makambi g’amalibuko g’Abanazi, Emma aderha ntya: “Erhi abantu bakagendekera babêra omu buja bw’olufû ensiku zoshi, lwanabonekana nka lwo lugwerhe emisi kulusha Nnâmahanga, k’arhali ntyo?” Kobinali, nta kantu kagwerhe emisi kulusha Yehova! Nnâmahanga ogala-byoshi walemaga obuzine agwerhe obuhashe bw’okugalulira abantu bafîre obuzine.

⁸ Ecindi cirhumire cirhuyemezize oku Nnâmahanga agwerhe obuhashe bw’okufûla abafîre kuli kuba bulya ajira obukengere burhakagerwa. Anahamagale ngasi nyenyezi oku izino lyayo. (Iz. 40:26) Kandi, anakengere abantu bafîre. (Ayu. 14:13; Lk. 20:37, 38) Anakengera buzira mazibu ebintu bisungunu-ngunu lugenda abantu ayish’ifûla, ciru n’oku bakag’ibonekana, amorhere gabo, ebyabahikire omu kalamo n’enkengero zabo.

9. Bulya gurhi ogwerhe obuyemere omu ciragane ca Yehova c’obufûke bw’amango gayisha?

 ⁹ Kobinali, rhwanaba n’obuyemere omu ciragane ca Yehova c’obufûke bw’amango gayisha bulya rhumanyire oku agwerhe irala n’obuhashe bw’okucihikiriza. Rhuganirire ecindi cirhumire cirhushumize rhuyemere eciragane ca Nnâmahanga c’obufûke: Yehova afûzire abantu bal’ifîre. Omu mango ga mîra, ahîre balume baguma na baguma bishwekerezi obuhashe bw’okufûla abafîre, abo balume bahiziremwo Yezu. Lekagi rhuganirire omwanzi lugenda bufûke buguma Yezu ajiraga, guli omu Yowane cigabi ca 11.

10. Bici byabire erhi Yezu ali ahubiri olundi lunda lw’e Yordani kurhenga e Betaniya, na bici ajijire? (Yowane 11:1-3)

¹⁰ Osome Yowane 11:1-3. Orhanye lugenda ebyajirikanaga omu Betaniya hofi oku buzinda bw’omwaka gwa 32 Kano Kasanzi Kirhu (K.K.K.). Yezu agwerhe abîra bazigirwa mw’olo lugo, ko kuderha Lazaro na bali babo babirhi, Mariya na Marta. (Lk. 10:38-42) Cikone Lazaro alwala, na bali babo bayoboha. Barhumira Yezu omwanzi, erhi ali olundi lunda lw’e Yordani, lugendo lwa nsiku hofi ibirhi kurhenga e Betaniya. (Yn. 10:40) Eby’okugayisa, Lazaro afâ hofi omu kasanzi oyo warhumagwa ahikaga aha Yezu ali. Ciru akaba Yezu al’imanyire oku omwîra wage anafîre, acibêrera aho ali zindi nsiku ibirhi na buzinda arhondera omubalamo gw’okuja e Betaniya. Co cirhumire erhi Yezu ahika e Betaniya, Lazaro ali amajira nsiku ini afîre. Yezu ajira kantu kalebe kalerhera abîra bage obunguke n’okulerhera Nnâmahanga obukuze.​—Yn. 11:4, 6, 11, 17.

11. Isomo lihi rhwakaciyigiriza lugenda obwîra kugerera ogo mwanzi?

¹¹ Ogo mwanzi gurhuyigirizize isomo lilebe lugenda obwîra. Rhanya kw’oku: Erhi Mariya na Marta barhumira Yezu omwanzi barhamuhûnaga oku ayishe e Betaniya. Bamubwizire kone oku omwîra wage muzigirwa alwazire. (Yn. 11:3) Erhi Lazaro afâ, Yezu akamufuzire erhi anali kuli. Cikone, ahiga okuja e Betaniya ly’aba haguma n’abîra bage Mariya na Marta. K’ojira omwîra wakayisha ali kurhabala orhanamuhûnyire oburhabale? Muli ntyo omanyire oku wanalangalira oku akurhabala “omu mbaka.” (Mig. 17:17) Lekagi rhube bîra ba ntyo oku bandi, aka Yezu! Rhucibig’iganirira ogo mwanzi lyo rhumanya gurhi byabire buzinda.

12. Bici Yezu alaganyize Marta, na bulya gurhi Marta akabire n’obuyemere muli eco ciragane? (Yowane 11:23-26)

¹² Osome Yowane 11:23-26. Marta amanya oku Yezu ali hofi n’e Betaniya. Alibirha ly’arhimanana naye anamubwira ntya: “Ocibâga hano, mushinja wani arhankafîre.” (Yn. 11:21) Kobinali, Yezu akafumize Lazaro. Cikone al’ilonzize okujira kantu kalebe kago-kago bwenene. Alaganya ntya: “Mushinja wawe afûka.” Abwira Marta ecindi cirhumire c’okuba n’obulangalire omu ciragane cage erhi aderha ntya: “Nie bufûke [n’obuzine, NWT].” Kobinali Nnâmahanga ahîre Yezu obuhashe bw’okufûla abafîre. Embere z’aho afuzîre omwana-nyere wali wamajira hisanzi hisungunu afîre na  kandi afûla omwana-rhabana, bibonekine oku olo lusiku lo oyo murhabana afâga. (Lk. 7:11-15; 8:49-55) Cikone, k’akafuzîre omuntu okola ogwerhe nsiku ini afîre n’omubiri gwage gukola guli gwabola?

13. Nk’oku biyerekinwe omu Yowane 11:32-35, gurhi Yezu ajijire erhi abona Mariya n’abandi bantu bali balaka? (Olole n’enfoto.)

¹³ Osome Yowane 11:32-35. Orhanye lugenda oku byabire enyuma z’aho. Mariya, wundi mwali wabo Lazaro, agend’irhimanana na Yezu. Agalukira enderho Marta aderhaga erhi: “Nyakasane, ocibaga hano, mushinja wani arhakafîre.” Ye n’abandi bantu bali haguma naye bal’ibabire bwenene. Erhi Yezu abona n’okuyumva gurhi bali balaka, ababala bwenene. Enyanya z’okuyumviza abîra bage obwonjo bunji, naye alaka. Ahugûkwa amalumwa omuntu ayumva erhi afîrwa n’omuzigirwa wage. Kobinali, al’ilonzize bwenene okukûla ebyabalerheraga eyo mirenge!

14. Bici oku Yezu ajiraga erhi abona Mariya ali alaka kwakarhuyigiriza lugenda Yehova?

¹⁴ Oku Yezu ajiraga erhi abona Mariya ali alaka kurhuyigirizize oku Yehova aba Nnâmahanga wa bwonjo bunji. Bulya gurhi rhwakaderha ntyo? Nk’oku rhwabwine omu cigabi c’embere, Yezu ayerekine n’obwimana entanya z’Ishe n’oku Ishe aciyumva. (Yn. 12:45) Co cirhumire omu kusoma oku Yezu ayumvize bwonjo bunji abo bîra bage bakag’ilaka, rhwanaderha oku Yehova naye anarhuyumvize bwonjo bunji erhi rhulaka enyanya z’amababale. (Enna. 56:8) K’oko kurhakushumizi olonze okuyegera bwenene Nnâmahanga wirhu w’obwonjo?

15. Nk’oku biyerekinwe omu Yowane 11:41-44, bici byajirikanaga aha nshinda ya Lazaro? (Olole n’enfoto.)

¹⁵ Osome Yowane 11:41-44. Yezu ahika aha nshinda ya Lazaro anahûna bakûle ibuye lyal’ifunisire enshinda. Marta arhayemeraga, aderha oku omubiri gwa Lazaro gugwasirwe gube gukola guli gwabaya. Yezu amushuza ntya: “Ka ntakubwizire nti akaba oyemire, wabona irenge lya Nnâmahanga?” (Yn. 11:39, 40) Enyuma z’aho Yezu ayinamula amasu gage anasalira embere z’abantu banji. Al’ilonzize okuha Yehova obukuze enyanya z’ebyajirikana enyuma z’aho. Buzinda ayakuza ntya: “Lazaro, huluka!” Na Lazaro arhenga omu nshinda! Yezu  ajira akantu bantu baguma na baguma bakarhanyize oku karhakahashikine.

16. Gurhi omwanzi guganirirwe omu Yowane cigabi ca 11 gwakazibuhyamwo obuyemere bwirhu omu bulangalire bw’obufûke?

¹⁶ Omwanzi guganirirwe omu Yowane cigabi ca 11 guzibuhize obuyemere bwirhu omu bulangalire bw’obufûke. Omu njira nci? Okengere eciragane Yezu ahaga Marta: “Mushinja wawe afûka.” (Yn. 11:23) Ak’Ishe, Yezu agwerhe irala n’obuhashe bw’okuhikiriza eco ciragane. Emirenge alakaga yayerekine oku alonzize bwenene akuleho olufû n’amababale galerhwa n’olufû. N’erhi Lazaro arhenga omu nshinda, kandi Yezu ayerekana oku agwerhe obuhashe bw’okufûla abafîre. Kandi, orhanye oku nderho Yezu akengezagya Marta: “Ka ntakubwizire nti akaba oyemire, wabona irenge lya Nnâmahanga?” (Yn. 11:40) Rhugwerhe ebirhumire binja by’okuyemera oku eciragane ca Nnâmahanga c’obufûke cahikirira. Cikone, bici rhwakajira lyo rhuseza obulangalire bwirhu muli eco ciragane?

17. Bici rhushinganine rhukakengera amango rhuli rhwasoma emyanzi y’Ebibliya eganirire obufûke?

¹⁷ Okasoma n’okurhanya bwenene oku myanzi eganirire obufûke bwajirikanaga omu mango ga mîra. Ebibliya eganirire bantu munani bafûlagwa n’okulama hanw’igulu. c Wanacihiriraho omuhigo gw’okuyiga bwinja-bwinja ngasi muguma gw’eyo myanzi. Amango oli wajira ntyo, okakengera oku abo bali bantu b’okunali; balume, bakazi, n’abana. Olonze n’amasomo eyo myanzi yakakuyigiriza. Okarhanya lugenda gurhi ngasi lwiganyo luyerekinemwo oku Nnâmahanga agwerhe irala  n’obuhashe bw’okufûla abafîre. Na kulusha byoshi, orhanye oku bufûke bw’obulagirire bwenene, ko kuderha obufûke bwa Yezu. Okengere oku hali amagana g’abantu babwine Yezu enyuma z’okufûka kwage banahamiriza oku afûsire n’ogo guli musingi mwinja gw’obuyemere bwirhu.​—1 Kr. 15:3-6, 20-22.

18. Gurhi wakakolesa bwinja enyimbo zirhu ziganirire obulangalire bw’obufûke? (Olole n’amahugûlo g’idako.)

¹⁸ Okakolesa bwinja “enyimbo z’obunya-mûka [z’ekiroho]” ziganirire obulangalire bw’obufûke. d (Ef. 5:19) Ezo nyimbo zinajire obulangalire bw’obufûke bube bw’okunali bwenene kuli rhwe zinanazibuhye obuyemere bwirhu muli obo bulangalire bwinja bwenene. Okaziyumvirhiza, okaziyimba kanji-kanji, n’okuganirira amahugûlo g’enderho zazo amango g’enterekêro yinyu y’omulala. Obîke enderho z’ezo nyimbo omu bukengere bwawe n’omu murhima gwawe. Omu kujira ntyo, erhi wakarhimanana n’amarhangulo madarhi erhi kufîrwa n’omuzigirwa wawe, iroho lya Yehova lyanakurhabala okengere ezo nyimbo n’okuhabwa oburhulirize n’emisi kugerera zo.

19. Bici rhwakabona omu bwenge bwirhu okubiyerekire obufûke? (Olole ecisanduku cidesire “ Madoso Gahi Wakabadosa?”)

¹⁹ Okakolesa obuhashe bwawe bw’okubona ebintu omu bwenge. Yehova arhuhîre obuhashe bw’okucibona rhuli omw’igulu lihyahya. Mwali wirhu muguma ahugwîre ntya: “Nangeze kasanzi kanji ndi nacibona ndi omw’igulu lihyahya n’okubona nka ndi nabayiza ehisununu hy’amauwa omu Paradizo.” Obone omu bwenge bwawe oli warhimanana n’abalume n’abakazi b’obuyemere b’omu mango ga mîra. Ndi mulibo oli walindirira okurhimanana naye? Madoso gahi wayish’imudosa? Ocibone omu bwenge bwawe oli warhimanana n’abazigirwa bawe bafîre. Orhanye oku nderho ntangiriza wayish’ibabwira, gurhi wayish’ibahobera n’obushagaluke, na gurhi wayish’ishagaluka bwenene okucib’ibabona.

20. Bici rhushinganine rhuhige okujira?

²⁰ Rhuvuzire omunkwa bwenene enyanya z’eciragane ca Yehova c’obufûke! Rhwanayemera n’obwalagale oku eco ciragane cayish’ihikirira, na Yehova agwerhe irala n’obuhashe bw’okucihikiriza. Lekagi rhuhige okugendekera rhwazibuhya obuyemere bwirhu mw’obo bulangalire bwinja bwenene. Omu kujira ntyo, rhwanagendekera rhwayegera bwenene Nnâmahanga wirhu, olaganyize ngasi muguma wirhu ntya: ‘Abazigirwa bawe bafûka!’