1. Bulya gurhi rhuhâna amashuzo oku ntimanano zirhu?

 BULYA gurhi rhuja oku ntimanano z’ecigamba? Burhangiriza, lyo rhukuza Yehova. (Enna. 26:12; 111:1) Kandi rhunaje oku ntimanano z’ecigamba lyo rhuhânana omurhima muli zino nsiku ndarhi. (1 Ts. 5:11) Erhi rhuhira okuboko enyanya n’okuhâna ishuzo, rhunahikirize eyo mihigo yombi.

2. Bulyo buhi rhujira bw’okuhâna amashuzo oku ntimanano zirhu?

² Ngasi mugobe, rhujira bulyo bunji bw’okuhâna amashuzo oku ntimanano zirhu. Kwa lwiganyo, oku buzinda bw’omugobe, rhwanahâna amashuzo okw’ifunzo ly’Ilabiro ly’Akalalizi ly’ecigamba. Oku ntimanano zirhu z’omu garhi k’omugobe, rhwanahâna amashuzo amango g’Obuhirhi bw’Ekiroho, Ifunzo ly’Ebibliya ly’Ecigamba, n’amango g’ebindi bigabi by’amadoso n’amashuzo.

3. Bici byakarhuma kwaba kuzibu kuli rhwe okuhâna amashuzo, na gurhi olwandiko lw’Abahabraniya 10:24, 25 lwakarhurhabalamwo?

³ Rhweshi rhuba rhulonzize okukuza Yehova n’okuhâ abirhu bemezi omurhima. Cikone, hali bintu bibirhi byakarhuma kwaba kuzibu kuli rhwe okuhâna amashuzo. Rhwanayumva ehy’oboba erhi rhulonza okuhâna ishuzo, erhi kandi rhwanaba rhugwerhe irala linji ly’okushuza, cikone rhurhahâbwe obulyo bw’okujira ntyo kanji-kanji nk’oku rhwakalonzize. Bici byakarhurhabala lyo rhuhima ago mazibu? Rhwanabona ishuzo omu maruba Paolo ayandikiraga Abahabraniya. Erhi aganirira obulagirire bw’okurhimanana rhweshi haguma, adesire oku rhushinganine rhusegeze obwenge bwirhu oku ‘kuhânana  omurhima.’ (Osome Abahabraniya 10:24, 25.) Erhi rhwakahugûkwa oku abandi bali oku ntimanano banahabwa omurhima ciru kugerera enderho zirhu nsungunu ziyerekine obuyemere bwirhu, rhurhakaciyoboha bwenene okulonza okushuza. N’erhi akaba rhurhahâbirwi obulyo bw’okushuza kanji-kanji, rhwanashagaluka bulya abandi omu cigamba nabo baba n’obulyo bw’okuhâna amashuzo.​—1 Pt. 3:8.

4. Bintu bisharhu bihi rhwaganirira mw’eci cigabi?

⁴ Mw’eci cigabi, rhwarhang’iganirira gurhi rhwakahânanamwo omurhima omu cigamba cisungunu cirhalimwo bantu banji b’okuhâna amashuzo. Na kandi, rhwaganirira gurhi rhwakahânanamwo omurhima omu cigamba cinene bantu banji bahiramwo okuboko enyanya lyo bashuza. Buzinda, rhwaganirira oku rhwakajira ly’ebi rhuderha omu mashuzo girhu biha abandi omurhima kobinali.

5. Gurhi rhwakahânanamwo omurhima amango harhali bantu banji oku ntimanano?

⁵ Omu cigamba cisungunu erhi cikundi, harhaba bantu banji ba kuhâna amashuzo oli walongoza ecigabi akacishogamwo. Hali amango akadosa idoso n’okulinda kasanzi kalebe ly’omuntu washuza ahira okuboko enyanya. Entimanano yanabonekana nk’eri ya kurhamya, n’oko kwanarhuma abantu barhahâbwa omurhima. Gurhi wakajira? Okaba mubidu okuhira okuboko enyanya kanji-kanji. Omu kujira ntyo, wanashumya abandi bakalonza okuhâna amashuzo kanji-kanji.

6-7. Gurhi rhwakajira lyo rhunyihya oboba rhugwerhe bw’okuhâna amashuzo oku ntimanano?

⁶ Gurhigi wakajira erhi akaba onayobohe okuhâna ishuzo? Banji banaciyumve ntyo. Cikone, olonze enjira wakanyihyamwo oboba ojira bw’okushuza ly’ohâ bene winyu na bali binyu omurhima bwenene. Gurhi wakajiramwo ntyo?

⁷ Okugalukira amahano maguma na maguma gaganirirwe omu magazeti g’Ilabiro ly’Akalalizi g’emyaka yageraga kwanakurhabala. b Kwa lwiganyo, okarheganya bwinja. (Mig. 21:5) Erhi akaba ohugûsirwe omwanzi bwinja, wanaciyumva orhayobohiri okulonza okushuza. Kandi, okajira amashuzo gawe gabe mofofi. (Mig. 15:23; 17:27) Okuhâna ishuzo lyofofi kwanakurhabala orhayumvagya boba bunji. Ishuzo lyofofi, nkaba lya musemwa muguma erhi ibirhi lyanaba lilembu kuli bene winyu na bali binyu okuhugûkwa, ahali h’ishuzo liri liganirire ntanya nyinji. Omu kuhâna ishuzo lyofofi omu nderho zawe wene, wanayerekana oku wacirheganyize bwinja n’oku ohugûsirwe bwinja omwanzi muli mwaganirira.

8. Gurhi Yehova abona obushiru bwirhu bw’okujira ebi rhwakanahasha?

⁸ Gurhigi erhi wakacihangana okukolesa mahano maguma na maguma muli ago mahano cikone ogendekere wayumva oyobohire bwenene okushuza kanji-kanji oku ntimanano? Oyemere n’obwalagale oku Yehova ashagalukira obushiru oli wajira n’omurhima goshi ly’ojira ebi wakanahasha. (Lk. 21:1-4) Yehova arharhuhûna rhujire ebilushire obuhashe bwirhu. (Fl. 4:5) Ohugûkwe ebi wakahasha okujira, ocihirireho omuhigo gw’okubijira, onashenge Yehova akuhe omurhima gurhuzize. Oku murhondero, ogo muhigo gwanaba gwa kuhâna ishuzo liguma lyofofi.

9. Bulya gurhi kwanaba kuzibu okuhâna amashuzo omu bigamba binene?

⁹ Erhi akaba ecigamba cinyu cibamwo  bahubiri banji, wanaba n’amazibu gali lubero. Nkaba bene wirhu na bali birhu banji banalonze okushuza n’oko kunarhume kanji-kanji barhabona okuboko kwawe. Kwa lwiganyo, mwali wirhu ohamagalwa Danielle, anashagalukire ensiku zoshi okuhâna amashuzo oku ntimanano. c Anabone okujira ntyo oku ciri cigabi c’enterekêro aha Yehova, eri njira y’okuha abandi omurhima, na njira ya kusegeza enyigirizo z’Ebibliya omu bukengere bwage. Cikone erhi ahamira omu cigamba cinene, arhacikag’ihabwa obulyo bw’okushuza kanji-kanji, hali n’amango arhakag’ihabwa obulyo bw’okushuza ciru n’eliguma oku ntimanano yoshi. Aderha ntya: “Navunika omurhima. Nakaciyumva nka nabuzire kuhabwa lukengwa lulebe. Erhi oko kuhika kanji-kanji, omuntu anacidose erhi oli walongoza ali ajira ntyo n’obulonza.”

10. Gurhi rhwakajira lyo rhuba na bulyo bunji bw’okuhâna amashuzo?

¹⁰ K’onaciyumve aka Danielle? Erhi akaba onaciyumve ntyo, wanarhogera omu murhego gw’okuleka okuhira okuboko enyanya n’okukayumvirhiza kone entimanano. Cikone orhalekaga okukacihangana ly’ohâna ishuzo. Bici byakakurhabala? Okurheganya mashuzo manji wakahâna oku ngasi ntimanano kwanakurhabala. Muli ntyo, erhi akaba orhahabirwi obulyo bw’okushuza oku murhondero gw’ifunzo, wanaciba n’obundi bulyo bunji bw’okushuza enyuma z’aho. Amango oli warheganya ifunzo ly’Ilabiro ly’Akalalizi, okarhanya lugenda gurhi ngasi cifungo cipatine n’entanya nkulu z’eco cigabi. Erhi wakajira ntyo, nkaba wanaba n’amashuzo minja wakahâna amango g’er’ifunzo. Kandi, nkaba wanacirheganya okuhâna amashuzo oku bifungo biganirire enyigirizo z’Ebibliya ziri nzibu bwenene okuhugûla. (1 Kr. 2:10) Bulya gurhi? Bulya nkaba hanaba bantu basungunu bone balonzize okushuza kw’ebyo bifungo. Gurhigi wakajira erhi akaba enyuma z’okukolesa ago mahano, obone oku hali ntimanano nyinji orhahabirweko kandi obulyo bw’okushuza? Wanaganira n’owalongoza embere entimanano erhondere onamuyerese idoso olonzize oyish’ishuzako.

11. Bici olwandiko lw’Abafilipi 2:4 lurhuhîre omurhima rhujire?

¹¹ Osome Abafilipi 2:4. Omu kulongozibwa n’iroho litagatifu, entumwa Paolo yahîre  Abakristu omurhima oku bakashokoza obunguke bw’abandi. Gurhi rhwakakolesamwo er’ihano omu mango rhuli omu ntimanano? Omu kukengera oku abandi nabo balonzize okuhâna amashuzo akirhu.

12. Njira nguma ehi nyinja rhuhamwo abandi omurhima oku ntimanano? (Olole n’enfoto.)

¹² Lugenda oko, orhanye ntya: Amango oli waganira n’abîra bawe, k’onalonze okuganira bwenene kuhika bohe babule obulyo bw’okuderha? Nanga ciru n’ehitya! Onalonze nabo bashangire oku nshambalo. Ko n’oko, oku ntimanano, rhunalonze rhulekere bantu banji nk’oku bihashikine obulyo bw’okuhâna amashuzo. Kobinali, njira nguma y’omu njira nyinja bwenene rhuhamwo bene wirhu na bali birhu omurhima, kuli kubaha obulyo bw’okuganirira obuyemere bwabo. (1 Kr. 10:24) Lekagi rhuganirire gurhi rhwakajiramwo ntyo.

13. Gurhi rhwakajira lyo rhulekera abandi banji akasanzi k’okushuza oku ntimanano?

¹³ Burhangiriza, rhwanajira amashuzo girhu gabe mofofi, na muli ntyo rhwanalekera abandi banji akasanzi k’okuhâna amashuzo. Abagula n’abandi bahubiri bakuzire kiroho bashinganine bayerekane olwiganyo. Ciru n’amango wahâna ishuzo lyofofi, okayaka okuganirira bintu binji bwenene. Erhi wakaganirira entanya zoshi ziri omu cifungo, ntabyo abandi bakaciderha. Kwa lwiganyo, mw’eci cifungo muli ntanya ibirhi, okujira amashuzo gawe gabe mofofi n’okuyaka okuganirira bintu binji bwenene. Erhi akaba we murhanzi okushuza kw’eci cifungo, wanaganirira ntanya nguma zone.

14. Bici byakarhurhabala lyo rhuhiga kanga rhwahira okuboko enyanya? (Olole n’enfoto.)

¹⁴ Okakolesa oburhimanya ly’ohiga kanga wahira okuboko enyanya ly’ohâna ishuzo. Erhi rhwakaheba okuboko enyanya kanji bwenene, rhwanajira oli walongoza aciyumve nka rhumusezize arhuhe obulyo bw’okushuza kanji-kanji ciru akaba abandi barhacihabwa obulyo bw’okushuza. Okujira ntyo kwanarhuma abandi bavunika omurhima banaleke okuhira okuboko enyanya.—Muh. 3:7.

15. (a) Gurhi rhushinganine rhujire erhi akaba rhurhahabirwi obulyo bw’okuhâna ishuzo? (b) Gurhi abali balongoza ecigabi c’amadoso n’amashuzo bakayerekanamwo oku bashibirire ngasi muntu? (Olole ecisanduku cidesire, “ Erhi Akaba Oli Walongoza.”)

 ¹⁵ Erhi akaba bahubiri banji banahire okuboko enyanya omu mango g’ifunzo, rhurhakaba n’obulyo bw’okushuza kanji-kanji nk’oku rhwakalonzize. Hali amango oli walongoza akayabirwa okuha abantu boshi obulyo bw’okushuza. Oko kwanavuna omurhima, cikone rhurhashinganini rhugaye amango rhurhahabirwe obulyo bw’okushuza.​—Muh. 7:9.

16. Gurhi rhwakahamwo abandi bahânyire amashuzo omurhima?

¹⁶ Erhi akaba birhahashikini ohâne amashuzo kanji-kanji nk’oku wal’ilonzize, bulya gurhi orhakayumvirhiza bwinja-bwinja amashuzo g’abandi n’enyuma z’entimanano obavuge omunkwa oku mashuzo gabo? Okuvuga bene winyu na bali binyu omunkwa kwanabaha omurhima nk’oku bakanahabirwe omurhima kugerera amashuzo wakanahânyire. (Mig. 10:21) Okuvuga abandi omunkwa eri yindi njira rhwakahânanamwo omurhima.

17. (a) Gurhi ababusi bakarhabalamwo abana babo bakarheganya amashuzo bakahasha okuhâna? (b) Nk’oku evideo eyerekine, njira zihi ini rhwakarheganyamwo ishuzo? (Olole n’amahugûlo g’idako.)

¹⁷ Zindi njira zihi rhwakahânanamwo omurhima oku ntimanano zirhu? Akaba oli  mubusi, okarhabala abana bawe barheganye amashuzo bakahash’ihâna kushimbana n’emyaka yabo. (Mt. 21:16) Hali amango rhuganirira emyanzi mizibu amango g’ifunzo, kwa lwiganyo, amazibu g’omu buhya, erhi ebiyerekire olugenzi, cikone hanaba cifungo ciguma erhi bibirhi omwana akahash’ishuzako. Kandi, orhabale abana bawe bahugûkwe bulya gurhi birhakahashikana ngasi mango bakahabwa obulyo bw’okushuza erhi bakahira okuboko enyanya. Okubahugûlira ntyo kwanabarhabala barhavunikaga omurhima erhi abandi bakahabwa obulyo bw’okushuza ahali habo.​—1 Tm. 6:18. d

18. Gurhi rhwakajira ly’abandi barharhusegezagyako obwenge amango rhuli rhwahâna ishuzo oku ntimanano? (Emigani 27:2)

¹⁸ Rhweshi rhwanarheganya amashuzo minja gakakuza Yehova n’okuha bene wirhu na bali birhu omurhima. (Mig. 25:11) Ciru akaba mango maguma na maguma rhwanaganirira kwa bofofi ebi rhwacibwinire omu kalamo, rhushinganine rhukayaka okuganirira binji bwenene okubirhuyerekire. (Osome Emigani 27:2; 2 Kr. 10:18) Ahali h’okujira ntyo, rhunacihangane okusegeza obwenge kuli Yehova, Akanwa kage, n’olubaga lwage lwoshi. (Maf. 4:11) Kobinali, erhi akaba idoso ly’ecifungo lirhuhûnyire rhuganirire kantu kalebe rhwacibwinire, kwanaba kwinja rhujire ntyo. Olwiganyo lwa ntyo luli omu cifungo cikulikire c’eci cigabi.

19. (a) Bunguke buhi rhwakaba nabo erhi rhwakashokoza amalagirire g’abantu boshi bali oku ntimanano? (Abaroma 1:11, 12) (b) Bici oshagalukira bwenene lugenda okuhâna amashuzo oku ntimanano?

¹⁹ Ciru akaba nta marhegeko g’obwalagale gayerekine gurhi rhwakahânamwo amashuzo oku ntimanano, rhweshi rhushinganine rhucihangane ly’amashuzo girhu gaba ga kuhâna omurhima. Oko kwanaba kuderha oku rhurhashinganini rhulonze okushuza kanji bwenene. Erhi kwanaba kuderha oku rhushinganine rhushagalukire obulyo rhuhabirwe bw’okushuza, n’okushagaluka bulya abandi nabo bahabirwe obulyo bw’okuhâna amashuzo gabo. Erhi rhwakakashokoza obunguke bw’abandi oku ntimanano zirhu, rhweshi ‘rhwanahânana omurhima.’​—Osome Abaroma 1:11, 12.