1. Bici rhuba rhuyemire n’obwalagale?

 RHULI bakozi ba Yehova, rhuba rhumanyire oku aba arhuzigire, n’oku aba alonzize rhube n’akalamo kinja nk’oku binahashikine. (Rm. 8:35-39) Kandi rhuba rhuyemire n’obwalagale oku amakanuni g’Ebibliya ensiku zoshi ganarhulerhere obunguke, erhi rhwakagakolesa. (Iz. 48:17, 18) Cikone, gurhi rhwakajira erhi rhwakahikirwa n’amazibu rhurhal’irhanyizeko?

2. Mazibu gahi gakarhuhikira, na madoso gahi amazibu ga ntyo gakarhuma rhwacidosa?

² Abakozi ba Yehova boshi banalwise amazibu. Kwa lwiganyo, omuntu w’omu mulala anarhuvuna omurhima omu njira ndebe. Rhwanaba rhulwazire endwala yakarhuma rhurhajira binji omu mukolo gwa Yehova. Rhwanahikirwa n’amazibu galerhwa n’obuhanya bucilerha bone. Erhi kandi rhwanahagalikwa enyanya z’obuyemere bwirhu. Erhi rhwakahikirwa n’amazibu gali nk’ago, nkaba rhwanacidosa ntya: ‘Bulya gurhi ebi biri byampikira? Ka hali akantu kabi najijire? K’ebi biri byampikira biyerekine oku Yehova arhali angisha?’ Ka hali amango okola ociyumvirhe ntyo? Akaba okola ociyumvirhe ntyo, orhavunikaga omurhima. Banji b’omu bakozi bishwekerezi ba Yehova nabo baciyumvirhe ntyo.​—Enna. 22:1, 2; Hab. 1:2, 3.

3. Bici olwandiko lw’Ennanga 34:19 lurhuyigirizize?

³ Osome Ennanga 34:19, Mashi Bible. Obwine oku olo lulanga luganirire bintu bibirhi by’obulagirire: (1) Abashinganyanya banahikirwe n’amahanya erhi mazibu. (2) Yehova anarhufumye erhi kurhulikuza oku mazibu girhu. Gurhi Yehova arhulikuzamwo oku mazibu girhu? Njira nguma Yehova ajiramwo ntyo kuba kurhurhabala rhube n’entanya nyinja lugenda akalamo ka mw’er’igulu. Ciru akaba Yehova arhulaganyize oku rhwaba n’omwishingo omu kumukolera, arharhubwiziri oku rhwaba n’akalamo karhagwerhi mazibu muli gano mango. (Iz. 66:14) Arhuhûnyire rhusegeze obwenge bwirhu oku  kasanzi kayisha, ko kuderha akasanzi rhwayish’ilama akalamo alonzize rhushagalukire ensiku n’amango. (2 Kr. 4:16-18) Embere ako kasanzi kahike, ali arhurhabala rhugendekere rhwamukolera ngasi lusiku.​—End. 3:22-24.

4. Bici rhwaganirira mw’eci cigabi?

⁴ Rhuganirirage ebi rhwakaciyigiriza kugerera enyiganyo z’abakozi ba Yehova bishwekerezi, b’omu mango ga mîra n’aba muli gano mango. Nk’oku rhwabona mw’eci cigabi, rhwanahikirwa n’amazibu rhurhal’irhanyizeko. Cikone erhi rhwakalangalira Yehova, nta lusiku akaleka okurhurhabala. (Enna. 55:22) Amango rhuli rhwaganirira ezo nyiganyo, ocidose ntya: ‘Gurhi nakajijire omu kanga ka ntyo? Gurhi ezi nyiganyo zintabire ndangalire Yehova bwenene? Masomo gahi nkuzire mw’ezi nyiganyo nakakolesa omu kalamo kani?’

5. Mazibu gahi gahikire Yakobo erhi Labani orhuma? (Olole enfoto eri oku cijalada c’eyi gazeti.)

⁵ Abakozi ba Yehova b’omu mango ga mîra bahikirwe n’amazibu barhal’irhanyizeko. Rhuganirire olwiganyo lwa Yakobo. Ishe amurhegeka oku aj’irhôla omukazi wakag’iharamya Yehova w’omu mulala gwabo omu banyere ba Labani, anamuyemeza n’obwalagale oku Yehova amugisha bwenene. (Murh. 28:1-4) Yakobo ajijire akantu kashinganine. Arhenga omu cihugo cabo c’e Kanani anajira omubalamo gw’okuja emwa Labani, wal’igwerhe banyere babirhi, ko kuderha Leya na Raheli. Yakobo asima Raheli, mwali wa Labani murho, anayemera okukolera ishe myaka nda embere amurhôle. (Murh. 29:18) Cikone birhabaga nk’oku Yakobo al’ilangalire. Labani amurheba ly’arhôla omwali mukulu, Leya. Mugobe muguma enyuma z’okurhôla Leya, Labani ayemerera Yakobo arhôle na Raheli, cikone al’igwasirwe acib’ikolera Labani yindi myaka nda ly’arhôla Raheli. (Murh. 29:25-27) Na kandi Labani arhabaga mwikubagirwa omu mikolo bajiraga haguma na Yakobo. Labani ajirire Yakobo omu njira erhali y’obushinganyanya omu kasanzi ka myaka 20 yoshi!​—Murh. 31:41, 42.

6. Gandi mazibu gahi Yakobo alembire?

⁶ Yakobo alembire agandi mazibu. Al’igwerhe omulala munene, cikone abagala barhakag’iyumvikana ensiku zoshi. Ciru bahikira aha baguza mulumuna wabo Yozefu ly’ajiba muja. Bagala babirhi ba Yakobo, ko kuderha Simoni na Levi, babonesa omulala gwabo nshonyi banacafula izino lya Yehova. Kandi, Raheli, muka Yakobo muzigirwa, afâ erhi aburha omwana wabo wa kabirhi. N’enyanya z’ishali lidarhi, Yakobo ahamira omu cihugo c’e Misri erhi anakola mushosi.​—Murh. 34:30; 35:16-19; 37:28; 45:9-11, 28.

7. Gurhi Yehova ayeresiremwo Yakobo oku al’imuyemire?

⁷ Ciru akaba ago mazibu goshi gahikire Yakobo, arhahezagya obuyemere muli Yehova n’omu biragane byage. Na Yehova ayeresire Yakobo oku al’imuyemire. Kwa lwiganyo, ciru akaba Labani akag’irheba Yakobo, Yehova agishire Yakobo omu kumuha buhirhi bunji. Kandi orhanye kunganaci Yakobo avuzire Yehova omunkwa bwenene erhi acib’ibuganana n’omugala Yozefu amalaga myaka minji ali arhanya mpu afîre! Obwîra bwa hofi-hofi Yakobo agwerhe haguma na Yehova bo bwamurhabire ly’ahash’ilembera ago mazibu. (Murh. 30:43; 32:9, 10; 46:28-30) Erhi rhwakagendekera rhwaba n’obwîra bwa hofi-hofi haguma na Yehova, nirhu rhwanahash’ilembera erhi amazibu rhurhal’irhanyizeko gakarhuhikira.

8. Bici Mwami Daudi al’ilangalire okujira?

⁸ Mwami Daudi arhahashaga okujira ngasi kantu al’ilangalire okujira omu mukolo gwa Yehova. Kwa lwiganyo, Daudi al’ilonzize bwenene okuyubakira Nnâmahanga wage ehekalu. Abwira omulebi Natani oku al’ilonzize okujira ntyo. Natani amushuza omu kuderha  ntya: “Ojire nk’oku oyumvirhe omurhima gwawe gudesire, bulya Nyamuzinda ali haguma nawe.” (1 Nga. 17:1, 2) Rhwanarhanya oku ezo nderho zahîre Daudi omurhima bwenene. Nkaba ho n’aho arhondera okujira amarheganyo g’ogo mukolo munene bwenene.

9. Gurhi Daudi ajijire erhi abwirwa omwanzi gw’okuvuna omurhima?

⁹ Cikone, enyuma za kasanzi kasungunu omulebi wa Yehova agaluka n’omwanzi gw’okuvuna omurhima. “Obudufu bwakulikiraga,” Yehova abwira Natani oku arhali Daudi ye wamuyubakira ehekalu; cikone, muguma w’omu bagala bage ye wakajijire ntyo. (1 Nga. 17:3, 4, 11, 12) Gurhi Daudi ajijire erhi abwirwa ogo mwanzi? Ashanja omuhigo gwage. Asegeza obwenge bwage oku kugusanya ensaranga n’ebikolanwa omugala Salomoni akalagirireko ly’ajira ogo mukolo.​—1 Nga. 29:1-5.

10. Gurhi Yehova agishiremwo Daudi?

¹⁰ Ho n’aho enyuma z’okubwira Daudi oku arhali ye wayubaka ehekalu, Yehova ajira endagano haguma naye. Alaganya Daudi oku muntu muguma w’omu iburha lyage akarhegesire ensiku n’amango. (2 Sam. 7:16) Omw’igulu lihyahya, orhanye omwishingo Daudi ayish’iba nago omu kumanya oku ali ashagalukira akalamo idako ly’oburhegesi bw’emyaka cihumbi bwa Yezu, Mwami w’omu iburha lyage! Ogo mwanzi gurhurhabire okubona oku ciru akaba rhurhahashiri okujira ebi rhwal’ilangalire okujira byoshi omu mukolo gwa Yehova, Nnâmahanga wirhu anarhugisha omu zindi njira nyinji rhurhal’irhanyizeko.

11. Gurhi Abakristu b’omu myaka igana mirhanzi bagishirwemwo ciru akaba Obwami burhayishaga omu mango bal’ilangalire oku lyo bwayisha? (Ebijiro by’Entumwa 6:7)

¹¹ Abakristu b’omu myaka igana mirhanzi bahikirwe na mazibu maguma na maguma barhal’irhanyizeko. Kwa lwiganyo, bakag’icifinja bwenene Obwami bwa Nnâmahanga buyishe, cikone barhal’imanyire mangaci bwakayishire. (Ebj. 1:6, 7) Gurhigi bajijire? Bagendekera bajira binji omu mukolo gw’amahubiri. Erhi omwanzi mwinja gugendekera gwayenera hantu hanji, babona ebyabayemezize oku kobinali Yehova akag’igisha obushiru bwabo.​—Osome Ebijiro by’Entumwa 6:7.

12. Gurhi Abakristu b’omu myaka igana mirhanzi bajijire amango hali ishali lidarhi?

¹² Mango maguma, ishali lidarhi lyaba “omu igulu lyoshi.” (Ebj. 11:28) Nnâmahanga arhacikaga Abakristu b’omu myaka igana mirhanzi kw’er’ishali. Orhanye amalibuko gabahikire enyanya z’er’ishali lidarhi! Buzira karhinda, ebirhwe by’emilala byakag’iyoboha lugenda gurhi balisamwo abantu b’omulala gwabo. Na gurhigi lugenda emisole yakag’ipanga okujira binji omu mukolo gw’amahubiri? Nkaba bacidosize erhi balinde er’ishali lirhang’ihwa bagal’ijira ntyo. Abakristu bakag’ilama kushimbana na ngasi kanga balimwo. Bagendekire bahubiri omu ngasi njira bakanahashire, banagendekera bashagalukira okushangira ebintu by’omubiri bagwerhe haguma n’ababo bemezi b’omu Yudeya.​—Ebj. 11:29, 30.

13. Migisho ehi Abakristu babire nayo omu mango g’ishali?

¹³ Migisho ehi Abakristu babire nayo omu mango g’er’ishali? Abahâbirwe oburhabale bw’ebintu by’obulagirire bacibonera okuboko kwa Yehova. (Mt. 6:31-33) Bagwasirwe babe baciyumvirhe bayegerire bwenene ababo bakristu babahâga oburhabale. N’abahânyire oburhabale erhi kandi abashangire oku mukolo gw’okuhâna oburhabale babire n’omwishingo gurhenga omu kuhâna. (Ebj. 20:35) Yehova abagishire boshi bulya balamire kushimbana n’akanga kahyahya balimwo.

14. Bici byahikiraga Barnaba n’entumwa Paolo, na malehe gahi oko kwadwirhe? (Ebijiro by’Entumwa 14:21, 22)

¹⁴ Kanji-kanji Abakristu b’omu myaka  igana mirhanzi balibuzibwe, mango malebe oko kwabahikire omu kasanzi barhal’irhanyize ciru n’ehitya. Rhuganirire ebyahikiraga Barnaba n’entumwa Paolo omu mango bakag’ihubiri omu eneo y’e Listra. Oku murhondero, abantu babayegereza bwinja banabayumvirhiza. Cikone enyuma z’aho, abantu bakag’ibahagalika “bayinjibana olubaga,” na bantu baguma na baguma b’omu lubaga babanda Paolo amabuye banamusiga bamanya mpu afîre. (Ebj. 14:19) Cikone Barnaba na Paolo baj’ihubiri omu yindi eneo. Malehe gahi bapasire? Bahindula ‘bantu banji [baba] baganda,’ n’enderho zabo n’olwiganyo lwabo lwazibuhya ababo bemezi. (Osome Ebijiro by’Entumwa 14:21, 22.) Bantu banji bayunguka bulya Barnaba na Paolo barhalekaga okuhubiri ciru akaba balibuzibwe. Yehova arhugisha erhi rhwakagendekera rhwajira omukolo arhuhîre buzira kurhama.

15. Bici olwiganyo lwa Mwene wirhu Alexander Hugh Macmillan lukuyigirizize?

¹⁵ Embere z’omwaka gwa 1914, abakozi ba Yehova bal’ilangalire bwenene oku bintu bilebe byaba. Rhuganirire olwiganyo lwa Mwene wirhu Alexander Hugh Macmillan. Ak’abandi banji ba mw’ago mango, Mwene wirhu Macmillan akag’irhanya oku ali hofi aje e mpingu. Omu hotuba agezagya omu Mwezi gwa 9, 1914, aderha ntya: “Nkaba eyi yo hotuba nzinda y’abantu boshi najira.” Kobinali, arhali eyo yo yali hotuba yage nzinda. Mwene wirhu Macmillan ayandika ntya enyuma z’aho: “Nkaba baguma muli rhwe barhanyize duba-duba mpu rhukola rhwaja e mpingu.” Acib’iderha ntya: “Akantu rhwal’ishingane rhujire kwali kujira binji omu mukolo gwa Nnawirhu.” Mwene wirhu Macmillan ajijire binji mw’ogo mukolo. Agwerhe bushiru bunji omu mukolo gw’amahubiri. Abire n’olukengwa lw’okuha omurhima bene wirhu banji bali omu prizo enyanya z’okurhalunga okuboko oluhande loshi-loshi. Anayerekine obuyemere omu kukaja oku ntimanano z’ecigamba ngasi mango ciru akaba al’ikola mushosi. Gurhi Mwene wirhu Macmillan ayungusiremwo omu kuba na binji bya kujira amango akag’ilinda oluhembo lwage lw’okuja e mpingu? Kasanzi kasungunu embere z’okufâ kwage omu mwaka gwa 1966, ayandika ntya: “Obuyemere bwani busezire ene nk’oku bunayorha buba busezire ensiku zoshi.” Olo luli lwiganyo lwinja bwenene rhweshi rhushinganine rhuyige, ci bwenene erhi akaba rhuli rhwalembera amazibu kasanzi kanji kulusha oku rhwal’irhanyize!​—Hb. 13:7.

16. Mazibu gahi Herbert Jennings na mukage barhal’irhanyizeko gabahikire? (Yakobo 4:14)

¹⁶ Banji b’omu bakozi ba Yehova bali balwisa amazibu barhal’irhanyizeko g’endwala. Kwa lwiganyo, omu nganîro z’akalamo kage, Mwene wirhu Herbert Jennings b aganirire gurhi ye na mukage bal’ishagalukire omukolo gwabo gw’obumisiyonere omu cihugo c’e Ghana. Cikone buzinda, avumbulwamwo endwala ndarhi y’okukavunika omurhima ciru akaba anal’ishagalusire. Omu kugalukira enderho ziri omu Yakobo 4:14, Mwene wirhu Jennings ahamagala ako kanga kage kahyahya oku “lyo ‘irhondo’ rhurhaba rhurhanyizeko.” (Osome.) Ayandika ntya: “Bulya rhwal’igwasirwe rhuyemere akanga kirhu, rhwarhôla omupango gw’okurhenga e Ghana n’okuleka abîra birhu banji ba hofi-hofi rhwanagaluka e Canada [lyo njibukwa].” Yehova arhabire Mwene wirhu Jennings na mukage bagendekere bamukolera n’obwishwekerezi ciru akaba bakag’ilwisa ago mazibu.

17. Gurhi olwiganyo lwa Mwene wirhu Jennings lwarhabiremwo abandi bemezi?

 ¹⁷ Enderho z’obwalagale za Mwene wirhu Jennings ziri omu nganîro z’akalamo kage zarhabire abandi bwenene. Mwali wirhu muguma ayandika ntya: “Nta kantu kalisag’impuma oku murhima bwenene nk’oku ogo mwanzi gwampumaga oku murhima. . . . Okusoma gurhi Mwene wirhu Jennings alekaga omukolo gwage ly’agend’ishibirira endwala yage kwantabire mbe n’entanya z’olugero lugenda akanga kani.” Mwene wirhu muguma naye ayandika ntya: “Nali mugula w’ecigamba myaka ikumi yoshi, cikone byahûna ndeke ogo mukolo enyanya z’endwala y’irhwe. Entanya z’okuciyumva wa busha kanji-kanji zakarhuma navunika omurhima bwenene nanakayabirwa okusoma emyanzi eganirire akalamo k’abantu. . . . Cikone, obulembedu bwa Mwene wirhu Jennings bwakampa omurhima.” Oko kurhukengezize oku rhwanaha abandi omurhima erhi rhwakalembera amazibu rhurhal’irhanyizeko. Ciru n’amango akalamo kirhu karhabiri nk’oku rhwal’ilangalire, oko kurhakarhuma rhurhaba lwiganyo lwinja lw’obuyemere n’obulembedu.​—1 Pt. 5:9.

18. Nk’oku biyerekinwe oku nfoto, bici olwiganyo ly’oyu mukana w’omu Nigeria lukuyigirizize?

¹⁸ Bahamirizi ba Yehova banji bahikirwe n’obuhanya, kwa lwiganyo endwala y’okuyahukira y’e COVID-19. Kwa lwiganyo, mukana muguma w’omu cihugo c’e Nigeria agwerhe rhulyo rhusungunu na rhusaranga rhusungunu. Lusiku luguma sezi, omwali amudosa bici balya enyuma z’okudeka igopo lizinda ly’omucere balisigaline. Oyo mwali wirhu abwira omwali oku nta nsaranga na nta biryo bacigwerhe cikone bashinganine bayige olwiganyo lw’omukana w’e Zarefati, ko kuderha oku badeke ebiryo bizinda bacigwerhe n’okulangalira Yehova loshi-loshi. (1 Bam. 17:8-16) Embere ciru barhondere okurhanya oku biryo by’emidi bakalire mw’olo lusiku, bapata omufuko gwalimwo oburhabale ababo bemezi babarhumiraga. Ogo mufuko gwalimwo ebiryo bakalire maposo abirhi na kurhaluka. Oyo mwali  wirhu aderha oku arhal’imanyire oku Yehova akag’iyumvirhiza bwinja-bwinja ebi akag’ibwira omwali. Kobinali, erhi rhwakalangalira Yehova, amazibu g’akalamo ganajira rhumuyegere bwenene.​—1 Pt. 5:6, 7.

19. Malibuko gahi Mwene wirhu Aleksey Yershov alembire?

¹⁹ Omu myaka egezire, bene wirhu na bali birhu banji balembire amazibu g’okulibuzibwa barhal’irhanyize oku ganabahikira. Rhuganirire olwiganyo lwa Mwene wirhu Aleksey Yershov, olama omu Russie. Erhi Mwene wirhu Yershov abatizibwa omu mwaka gwa 1994, Abahamirizi ba Yehova ba mw’eco cihugo bal’igwerhe ehy’oluhûma. Cikone omu myaka y’enyuma z’aho, akanga kashanja. Omu mwaka gwa 2020, enyumpa ya Mwene wirhu Yershov yarherwa banajiramwo omusako, na birugu byage binji byanyagwa. Myezi milebe enyuma z’aho, oburhegesi bw’eco cihugo bwamushobeka oku aba nyankola-maligo. N’ebyarhumire ebintu byabiha bwenene, ebyo bamushobekaga byal’iyimangire oku video zajiragwa na muntu mulebe wayusagya omwaka goshi na kulusha ali ayerekana nka asimisibwe n’ifunzo ly’Ebibliya. Oyo muntu ajijire kubi bwenene!

20. Gurhi Mwene wirhu Yershov asezizemwo obwîra bwage haguma na Yehova?

²⁰ K’amazibu Mwene wirhu Yershov alemberaga gamudwirhire bunguke bulebe? Neci. Obwîra bwage haguma na Yehova bwasezire bwenene. Adesire ntya: “Nie na mukanie rhunasalire haguma kanji-kanji bwenene. Nahugûsirwe oku ntakahashire okulembera ako kanga buzira burhabale bwa Yehova.” Ayushwire ntya: “Okujira ifunzo lyani nienene kunantabale lyo ndwisa entanya z’okuvunika omurhima. Nantanye bwenene oku nyiganyo z’abakozi ba Yehova bishwekerezi b’omu mango ga mîra. Hali myanzi minji bwenene yayandisirwe omu Bibliya eyerekine oku okurhulirira n’okulangalira Yehova kuba kwa bulagirire bwenene.”

21. Bici rhwayizire mw’eci cigabi?

²¹ Bici rhwayizire mw’eci cigabi? Mw’er’igulu hali amango rhuhikirwa n’amazibu rhurhal’irhanyizeko. Ciru akaba ntyo, ensiku zoshi Yehova anarhabale abakozi bage erhi bakamulangalira. Nk’oku olwandiko lw’omusingi lw’eci cigabi ludesire, “Amahanya galugira omushinganyanya, cikwone Nyamuzinda anamufumye kuli go goshi.” (Enna. 34:19, Mashi Bible) Lekagi rhugendekere rhwasegeza obwenge oku buhashe bwa Yehova bw’okurhurhabala, ahali h’okubusegeza oku mazibu girhu. Erhi rhwakajira ntyo, ak’entumwa Paolo nirhu rhwanaderha ntya: “Nanahasha byoshi n’oburhabale bw’Olya onzibuhya.”​—Fl. 4:13.